လျးအရှိုဏ် ဟံသာဝတဳ သ္ကုတ်ဒုတိယ ပိုဒ် ၅
ဒပ်ပၞာန်ဇၞော် မဇက်ကၠုၚ် နူဟံသာဝတဳဝွံ ခြာဟွံလအ် စိုပ်ကၠုၚ်ဇရေၚ် ဍုၚ်ဝါန်ရ။ ကြပ်ကၠုၚ်ယျဒှ်တုဲ နူကဵုလ္တူစိၚ်ဟေၚ် ဂွံညာတ်ကေတ်ဒၟံၚ်ဍုၚ်ဝါန် ဟဗုၚ်ဟဗုၚ်ဟပါဟပါရ။ ဒပ်ပၞာန်ဇၞော် မနွံဒၟံၚ်လ္တူချောဲမဍာပ်ဍဴ မပ္တဝ်အာဒၟံၚ် ဇရေၚ်ဍုၚ်ဝါန် မဒုၚ်လဝ်သ္ဇိုၚ်ကဵု ဗလးဗဵု ဒဵုဂမၠိုၚ်ဂှ် ကျာမပိုက်လွိၚ်ကၠုၚ် နူလ္ပာ်သၟဝ်ကျာဂမၠိုၚ် ဒစးဒုၚ်တၠုၚ်ဒၟံၚ်အိုတ်ရ။ ပ္ဍဲကဵုဂၠးအကးတေံလေဝ် နကဵုမတ်ဗြဲ မွဲၜါကဠောံဟေၚ် ဥတုရာသဳ ၜိုဟ်သြိုဟ်ဒၟံၚ်ရ။ သရာဲဂမၠိုၚ်တအ်ဂှ်လေဝ် ဟိုတ်မဂွံဇၞးလဝ် ပၞာန်အၚ်ဝဂမၠိုၚ်တုဲ စိုတ်ထတ် မြဟ်မြဴဒၟံၚ်အိုတ်ရ။ "ယွံအမာတ်ဇၞော် စဍုၚ်ဝါန် သၟိၚ်သာံလှေက်ဂှ် ကွတ်စိၚ် သ္ကေက်သ္ကာမံၚ်ဂး" စိၚ်အမာတ်ဒိန်ဝွံ ကြပ်လုပ်အာဗ္ဒာဲ စိၚ်အမာတ်ဇၞော် သၟိၚ်ဇိပ်ဗြာဲတုဲ ဟီုသ္ဂးဏါဂလာန်ရ။ အမာတ်ဇၞော် သၟိၚ်ဇိပ်ဗြာဲဝွံ စိုတ်ထတ်ဒၟံၚ်တုဲ ၜိုန်ရပါဗက်ကၠုၚ် ကရောံပၞာန်ကီုလေဝ် အာယုက်ဇၞော်ဒၟံၚ်ယျဒှ်တုဲ သော်က္ဍိုပ်၊ သော်ကၞေၚ်မတ်ဂမၠိုၚ် ဒှ်ဒၟံၚ်အရံၚ်ဍာ်မိတ်တုဲ စၞာံဂမၠိုၚ် ဟညောတ်ဒၟံၚ်ရ။ ကါလလ္တက်စုတ် ပဠောံခြပ် ဓလဲတဴ ခပေဲဂၠေံမ္ဂး လ္တူနူကဵုတုပ်တဴ သ္ကိုပ်ပၞာန်ဂှ် တုပ်တဴဒၟံၚ် ညံၚ်ရဴရသိမွဲတၠရ။ "အေ... ဍေံဂှ် ကွတ်စိၚ်သၟး ခိုဟ်တဴဟွံသေၚ်ဏီ၊ ကွတ်ဇိုၚ်ကွတ်တဲလေဝ် ခိုဟ်တဴရ။ ဟိုတ်ဂှ်ရ အလဵုဇကု တၠညးစိၚ်ဗ္တာၚ် မက္လိလောန်အာတေံ ပါဲနူကဵုတဴ စိၚ်အဗြာတ်တုဲ အရပ်အစပ်သၟိၚ် မသုန်သာ်လေဝ် ကဵုတဴရ။ ဒးဟီုလဴပရောဂှ်မ္ဂး ဂၠိၚ်တဴရ" "လဴကဵုညိစမ် ယွံအမာတ်ဇၞော်..." ဟိုတ်နူကဵု အမာတ်ဒိန် စကဵုဂလာန်တုဲ အမာတ်ဇၞော် သၟိၚ်ဇိပ်ဗြာဲဝွံ ဒးက္လေၚ်လဴထ္ၜးကဵု ပရောနူအခိၚ်တေံရောၚ်ဂှ် ချပ်ဗှ်သၞာကေတ် အခိၚ်ကၠာတေံဂမၠိုၚ်တုဲ စိုတ်ဓါတ်မြဟ်မြဴဒၟံၚ်ရ။ "ကှ်ေ... ၝကဵုလဴထ္ၜးဏောၚ်တှ်ေ အဲဒးလဴထ္ၜးကဵုရဒှ်။ မအံက်ၝ သ္ကိုပ်ဒပ်ဇဲယသူရ ဃောမစှ်ေအာပ္ဍဲမုတ္တမဂှ် ၝဂွံအာယုက် မူစိရရော" "ဂွံအာယုက် စှ်မသုန်သၞာံရအဴ" အမာတ်ဇၞော်ဝွံ သီုမသ္ၚာဲတဴဇဗၠု မသ္ဂးတဴဂလာန် နူလ္တူစိၚ်ဂှ် ဍာ်ပါၚ်ဇဗၠုဂမၠိုၚ် ချဟ်ပ္တိတ်မံၚ် ပ္ဍဲကဵုထၟာဲတဲရ။ "ဍောတ်ဒၟံၚ်ဏီရဏောၚ်သွံ၊ တၠညးသၟိၚ်တၠနာဲပိုဲ မက္လိလောန်စဴအာတုဲဂှ် စဍုၚ်မုတ္တမ သ္ပတဴသပုန်ရ။ ဟိုတ်ဂှ်ရ တၠညးစိၚ်ဗ္တာၚ်လေဝ် နူကဵုမုတ္တမ ဒးပြံၚ်အာ ဇရေၚ်ဍုၚ်ဝါန်ရ။ အေဒၞာဲဂှ် သီုကဵုမဗ္တိုက်တဴ မုတ္တမ မအံက်ၝလေဝ်ချိုတ်၊ တြုံဇၞော်မဟာဒေဝဳ သၟိၚ်ဗြတ္ၜိုတ်လေဝ်ချိုတ်၊ သဟာဲအဲ အမာတ်တၠချေတ်သေၚ်တအ်လေဝ် စှ်ေအာပ္ဍဲတဲဍေံတုဲ ဒးဒုၚ်သွံစရ။ ကုသဵုခိုဟ်ဟေၚ် စဍုၚ်မံၚ်မလ တတ်ရာန်လဝ်အကြာဂှ်တုဲ လမျီုဟွံအိုတ်ရ။ ယဝ်ခါရ မအံက်ၝ ဟွံချိုတ်အာမ္ဂး ၝလေဝ် ဒးဒှ်ကောန်ခဝီု မဟာဒေဝဳရ... ဟာ... ဟာ... ဟာ..." အမာတ်ဇၞော် သၟိၚ်ဇိပ်ဗြာဲဝွံ ဂလာန်ညးဂှ် ညးဒးဂၞပ်တုဲ စၞာံပ္ဍဲကဵုကၞိၚ် မထညောတ်ဒၟံၚ်ဂမၠိုၚ် ဒဵုကဵုလၜက်စဵုပ်ကတောဝ် ဂြိုၚ်တဴမွဲကအ်ရ။ ပ္ဍဲကဵုသၟန်ပါၚ်တအ်ဂှ်လေဝ် အဖါတ်ဇဗၠုဂမၠိုၚ် သီုကဵုမလေတ်ကၠိဒၟံၚ်ရ။ အမာတ်ဒိန်ဝွံ ဟိုတ်မတီတဴ ပွဒဒှ်မဟာဒေဝဳ မယုတ်စၞာဲဂမၠိုၚ်တုဲ ဒးဒုၚ်ဒှ်တဴ မိခဝီုဇကုဂှ် ဒုၚ်ဟွံမာန်တုဲ မုက်မတ်ဍာဲအာရ။ "သၟိၚ်တၠညးစိၚ်ဗ္တာၚ် သ္ပဒ္တဴပ္ဍဲဍုၚ်ဝါန် ပေၚ်တြဴသၞာံဂှ် ဒေံစဍုၚ်မုတ္တမ အာဲဗြၜုန် လုပ်ဗ္တိုက်ဍုၚ်ဝါန်ရ။ ဟိုတ်နူဒးဒုၚ်ကၠတ်ဗ္တိုက် ဗွဲမသ္ကာတ်တုဲ အခိၚ်ဂွံစဵုဒၞာလေဝ် ဟွံက္လိဂွံရ။ တၠညးကီု သီုကဵုပိုဲတအ် ဒးဂြိပ်ဂ္စာန်လမျီုရ။ ကါလတၠညး စိုပ်ဗဂေါမှ ဗလးဏါ သၟိၚ်သာံလှေက် ဇရေၚ်ဍုၚ်တိုက်ဂလာ နဒဒှ်မၚ်မွဲဍုၚ်ရ။ ဍေံစိုပ်ဍုၚ်တိုက်ဂလာဂှ် ဟိုတ်နူကောန် စဍုၚ်မုတ္တမချိုတ်တုဲ လ္ပာ်ဍုၚ်ဝါန်တေံ တ္ၚာ်က္ဍိုပ်ရ။ ဣဂှ်ဂှ် သၟိၚ်သာံလှေက် ကေတ်အခေါၚ်ခိုဟ်တုဲ သရာဲဍေံ ပိကၠံဂှ် ကဵုတ္ၚာ်ကၠေံက္ဍိုပ်တုဲ လုပ်ဗ္တိုက်ဍုၚ်ဝါန်ရ။ ကောန်စဍုၚ်မုတ္တမ မမၚ်ဒၟံၚ်ဍုၚ်ဂှ်ချိုတ်တုဲ က္လိဂွံဍုၚ်ဝါန်ရ။ ဟိုတ်ဂှ်ရ တၠညးစိၚ်ဗ္တာၚ် ခပ္တိုန်စကဵု သၟိၚ်သာံလှေက် နဒဒှ်ညးစဍုၚ်ဝါန်တုဲ ကဵုတဴသီုကဵု အရပ်အစပ်သၟိၚ် မသုန်သာ်ရ" အမာတ်ဇၞော် သၟိၚ်ဇိပ်ဗြာဲဝွံ စၟဳဗဵုရံၚ်အာဍုၚ်ဝါန် မဂွံညာတ်အာဒၟံၚ် နူသ္ၚောဲသ္ၚောဲတုဲ နူမသ္ဂးဒၟံၚ်ဂလာန်ဂှ် ဍောၚ်ၜိုတ်ကၠုၚ်ဂှ်ရ ဒေါံကၠေံဂလာန်တုဲ သုၚ်ထောံဍာ် မွဲခေါ်ရ။ အမာတ်ဒိန်လေဝ် ဗွဲစိုတ်မလုပ်စ ဗဵုရံၚ်ဒၟံၚ် အမာတ်ဇၞော် သၟိၚ်ဇိပ်ဗြာဲရ။ သ္ကိုပ်ဒပ်ရတ္တသံၚ်ရာံလေဝ် ကြပ်လုပ်ကၠုၚ်ကဵု စိၚ်အမာတ်ဒိန်ကဵု အမာတ်ဇၞော် သၟိၚ်ဇိပ်ဗြာဲတအ်တုဲ ကလၚ်ဒၟံၚ် ဂလာန်အမာတ်ဇၞော် သၟိၚ်ဇိပ်ဗြာဲရ။ "တၠညးစိၚ်ဗ္တာၚ်လေဝ် ဒၞာဲမဒးဖျေံကဵုလာပ်ဗဇဴဂှ် သၠဲလးတဴလောန်ရ။ ဟိုတ်ဂှ်ရ ၝကီုလေဝ် အာယုက်ဍောတ်တ်ဓဝ်ဂှ် ဒှ်အမာတ်ကီုတုဲ ဍုၚ်သြေၚ် မအံက်ၝ ဇဲယသူရ မစဂှ် ကဵုစတဴ ရံၚ်ညိ။ အေပ္ဍဲအခိၚ်ဂှ် အရပ်အစပ်သၟိၚ် မသုန်သာ်ဂှ် နကဵုအမိၚ် တၠညးစိၚ်ဗ္တာၚ် အလဵုဇကုအဲ သ္ဒးပလံၚ်တဴရ။ အေပ္ဍဲအခိၚ်ဂှ် စိုပ်မွဲတ္ၚဲ ဒးဒှ်သာ်ဏအ်ဏောၚ်ဟီုဂှ် ညးဂှ်မွဲ သ္ဂောံထေၚ်တဴရော၊ သ္ပပ္တံနူကဵု ပလံၚ်ဏါ အရပ်အစပ်သၟိၚ် မသုန်သာ်တုဲ သၟိၚ်သာံလှေက် ဟွံက္လေၚ်စဴကၠုၚ် ဇရေၚ်ဟံသာဝတဳဂှ် ဒဵုကဵုဗၞတ်အာယုက် ကောန်ဝုတ်ဍေံ မိကေသာ ဒဵုကဵုလၟုဟ်ရ" သ္ကိုပ်ဒပ် ရတ္တသံၚ်ရာံလေဝ် ဒှ်ဒၟံၚ်သ္ကအ်ရဲကု သၟိၚ်သာံလှေက်တုဲ ဂလာန်အမာတ်ဇၞော် မသ္ဂးတဴဂှ် ဍာံစၟတ်ရသာ်ဝွံ ထံက်ဂလာန် ဓညိက်ဏါက္ဍိုပ်ရ။ "သာံလှေက်ဝွံ နူကၠာတေံဂှ် ဗီုဏအ်ဟွံသေၚ်ရ အမာတ်ဇၞော်ယျေ၊ သ္ကအ်ရဲဆာန်အဲ ဍက်ဍက်ရ။ ဒှ်ညးနွံကဵုသစ္စလောန်တုဲ ဂတိပါၚ်ဗိုန်မွဲရ။ စိုပ်အာဍုၚ်ဝါန်တုဲမှ ဒှ်အာသာ်လဵုရောဂှ် ချပ်ဟွံဒးရ အမာတ်ဇၞော်ယျေ" ရတ္တသံၚ်ရာံဝွံ သီုမဓရိုက်တဴက္ဍိုပ် ဟီုသ္ဂးဒၟံၚ် ပရောသာံလှေက်ရ။ အမာတ်ဇၞော်လေဝ် ရံၚ်ဗဵုရတ္တသံၚ်ရာံတုဲ အီဒၟံၚ်ရ။ "နာသာ်ဏအ် သ္ကိုပ်ဒပ်၊ ပိုန်ဘိုက်ဓနကဵု အဝဵုအာဏာဂှ် ပြံၚ်သၠာဲကၠေံထောံကဵု မၞိဟ်တအ်မာန်ရ။ တဆိပ်ကြာ၊ ဂုဏ်တၟေၚ်၊ က္ဆံၚ်အလံၚ်၊ အဝဵုအာဏာတအ်ဂှ် ဒှ်သွက်ဂွံ ၜတ်ကၞာတ်စၟတ်ကေတ် ပရေၚ်ယဵုလ္ဂူ၊ တပ်တး၊ မၞုံကဵုသစ္စတအ်ရ။ သာ်ဂှ်ကီု ညးမစၟတ်ကေတ်ဟွံမာန် လ္ၚဵုတအ်ဂှ် ဟိုတ်နူကဵု ပိုန်ဘိုက်၊ က္ဆံၚ်အလံၚ်တအ်ဂှ် မာနသၠုၚ်တိုန်တုဲ ဝိုတ်အာဘဝအိုတ်ရ။ လ္ၚဵုပၠန်လေဝ် ဗက်လက္ကရဴ ဂုဏ်ပကာသနတုဲ ဒးအာစိုပ်လီုလာ်အာရ။ ညးလ္ၚဵုဗွဲမအောန်ဟေၚ် သီုဟွံပြံၚ်သၠာဲကၠေံ ဓဝ်လောက ပန်ပြကာတုဲ နကဵုဒ္ဂေတ်ဓဝ်သဳလ ဗွဲမၜိုဟ်သြိုဟ်ဂှ် သ္ပဒ္တဴအာမာန်ရ။ လၟုဟ် သၟိၚ်သာံလှေက်ဟေၚ်ရံၚ်ညိ အရပ်အစပ်သၟိၚ် မသုန်ပြကာလေဝ် က္လိဂွံ၊ စိၚ်သၟိၚ်လေဝ် က္လိဂွံ၊ ဍုၚ်သၟိၚ်မပ္တန်လဝ်ဂှ်လေဝ် က္လိဂွံတဴရ။ ဒှ်သာ်ဂှ်တှ်ေ ဟွံလုပ်ခစတဴသၟိၚ်ဂှ် တၟေၚ်ကီုဟာ၊ တၠညးစိၚ်ဗ္တာၚ် မပ္တိုန်ကဵုလဝ် ပိုန်ဘိုက်ဂမၠိုၚ်ကဵု တဆိပ်ကြာ က္ဆံၚ်အလံၚ် ဟွံတီဗၞတ်ဗ္ၜတ်တအ်ဂှ်ဟေၚ် ဗၠေတ်တဴရ။ ဟိုတ်ဂှ်ရ မၞိဟ်သၟတ် ဗီုၝတအ် စၟတ်လဝ် ဒဵုကဵုချိုတ်ညိ။ ပိုဲတအ်ဂှ် အာယုက်ဇၞော်အာတုဲ ဟွံဂွံမံၚ်တဴ လအ်လအ်ရပုဟ်၊ အာဂတနူဏအ် တၠညးရာဇာဓိရာဇ် သရာဲခိုဟ်ဂးတုဲ အရာဟွံထေက်တန်ဂမၠိုၚ် ပ္တိုန်စကဵုဒၟံၚ်မ္ဂး ၝတအ် ကဵုသတိ ဒၞါတာအိုတ်ညိ" အမာတ်ဇၞော် သၟိၚ်ဇိပ်ဗြာဲဝွံ သီုမသ္ဂးတဴဂလာန် ဂတးရံၚ်ကၠုၚ် အမာတ်ဒိန်ကဵု သ္ကိုပ်ဒပ်ရတ္တသံၚ်ရာံတအ်ရ။ အမာတ်ဒိန်ကဵု သ္ကိုပ်ဒပ်ရတ္တသံၚ်ရာံတအ် ဓညိက်က္ဍိုပ်တုဲ ဒုၚ်တဲက္လၚ်ဒၟံၚ်အိုတ်ရ။ ကျာနူကဵု ပ္ၚံက်ၜဳမုတ္တမတေံလေဝ် သီုမပိုက်လွ်ၚ်ကၠုၚ်ဒၟံၚ် ရူရူရ။ အဃောမဇက်အာဒၟံၚ်ဂှ် ဒပ်ဂတ ဟိုတ်နူကဵု ဒပ်တၠညးရာဇာဓိရာဇ် ဒေါံအာတုဲ အမာတ်ဇၞော် သၟိၚ်ဇိပ်ဗြာဲတအ်လေဝ် ဗဒေါံကၠေံစိၚ်အိုတ်ရ။ "သၟိၚ်တၠညး ဖျေံဗ္ဒိုပ် ဇူရောၚ်အဴ" ရမျာၚ်သ္ကိုပ်ဒပ် ထတ်မွဲတၠဝွံ ဗျာပ်ဓလီုအာ အလုံဒပ်မွဲတုဲ ရမျာၚ်ဗဂိုဟ် ဂြၚ်ပြေၚ်ဂမၠိုၚ် ဗြုတိတ်ကၠုၚ်ရ။ ကောန်ဒပ် မပါဗက်ကၠုၚ်ဂမၠိုၚ်ဂှ်လေဝ် စှ်ေနူစိၚ်ချေံဂမၠိုၚ်အိုတ်တုဲ သြိုၚ်ခၞံတဴဒပ် ပဠေဝ်ဖျေံတဴဗ္ဒိုပ်အိုတ်ရ။ အခိၚ်မစိုပ်အာ ကြပ်ဍုၚ်ဝါန်ဝွံ ဒှ်အခိၚ်ပယျာံတ္ၚဲဒစေၚ်တုဲ ဂွံစၟဳညာတ်အာဒၟံၚ်ဍုၚ်ဝါန် ဗလးဇိုၚ်ဒဵုမုတ္တမးမၠိုၚ် သၟဝ်လျးတ္ၚဲ ၜတ်ၜတ်ရ။ ပ္ဍဲဒၞာဲတၠညးတအ် မဖျေံလဝ်ဒပ်ဝွံ သီုကဵုယက်ဂမၠိုၚ် မဓဂုဲတိုန်ဒၟံၚ်ရူရူ ညးမတုမ်ပုၚ်ဂှ် တုမ်၊ ညးမကုတ်အှော်ဂှ် ကုတ်၊ ညးမသြိုၚ်တာဲဂှ် သြိုၚ် နွံဒၟံၚ် ဗွဲမချဳဒရာၚ်ရ။ ~~~~~~~~~~~~~~~~~~ ပ္ဍဲကဵုဂဒုက်တာဲနန် တၠညးရာဇာဓိရာဇ်ဝွံ အမာတ်၊ သ္ကိုပ်ပၞာန်၊ သေနာပတိဂမၠိုၚ် ကောံဒၟံၚ်အိုတ်ရ။ ဟိုတ်ဂွံကောံဒၟံၚ်သာ်ဂှ်တုန် ဍိက်စဍုၚ်ဝါန် သၟိၚ်သာံလှေက်မွဲတၠ သီုကဵုပရၚ်စၟဳစၟိန် ကၠုၚ်စိုပ်ဆက်ကွာဲနၚ် သီုလိက်သဝဏ် သၟိၚ်သာံလှေက်ရ။ ပ္ဍဲဂတမုက် တၠညးဝွံ စဍုၚ်ဝါန် သၟိၚ်သာံလှေက် မဆက်ကွာဲနၚ်လဝ် ဂၠိက်ယာတ် တောဝ်ထဝ်ဂမၠိုၚ်၊ ဂြၚ်စိၚ် မၞုံကဵုစရာဲၜါတၞုၚ်၊ ကပေါတ်မတိတ်နူ ဂြိုပ်ဆုဂမၠိုၚ်၊ ကပေါတ်ရတ်ဂမၠိုၚ် ကေုာံ ဍိက်စဍုၚ်ဝါန် ထံက်က္ၜံၚ် ခစဒၟံၚ်ရ။ ပ္ဍဲဗ္ဒာဲဂှ် အမာတ်ဂမၠိုၚ် ကောံဗိုၚ်ဒၟံၚ် ဗှ်တဴလိက်သဝဏ် သၟိၚ်သာံလှေက်တုဲ က္လၚ်ဒၟံၚ်အိုတ်ရ။ "ယွံတၠညး အဲဍိက်စဍုၚ်ဝါန် သာံလှေက်ဝွံ ဒုၚ်လဝ်သစ္စကဵု တၠညးစိၚ်ဗ္တာၚ် သၟိၚ်ဗညာဥူတုဲ ဟိုတ်မယိုက်ဂၠေၚ်လဝ် တာလျိုၚ်သ္ဇိုၚ်ဝန်ဂှ်ရ ဂွံစတဴဍုၚ်ဏအ် တိဍာ်ဏအ်ဝွံ ဒှ်ဂလာန်ဍာံစၟတ်ရအဴ။ ဟိုတ်ဂှ်ရ ဒှ်တဴညးမသပုန် ကုတၠညး မဒှ်ကောန် တၠညးစိၚ်ဗ္တာၚ် ဟွံသေၚ်ရအဴ။ ဍုၚ်အဲဍိက် မဂွံစဂမၠိုၚ်ဂှ် နအလဵုဇကုအဲဍိက် ဟိုတ်မဂွံဗ္တိုက်ကေတ်လဝ် နူတဲသၞဂှ်ရ ဍုၚ်တၠညးစိၚ်ဗ္တာၚ် မဇိုန်ကဵုလဝ်ဂမၠိုၚ်ရအဴ။ ဍုၚ်မုတ္တမ၊ လ္ဂန်ဖေန်၊ ခမိုၚ်၊ ကြေဝ် တအ်ဟေၚ် မဒှ်တဴသပုန် ဇေတ်ဇေတ်ရအဴ၊ အဲဍိက်ဝွံ ဟွံတာဒၞါ၊ ဟွံပလာံဗဇး ဂၠံၚ်တရဴ တၠညးရ။ ယဝ်ခါရ ဗ္တိုက်သ္အးကၠေံ သပုန်ဂမၠိုၚ် က္လိဂွံဇၞးမ္ဂး အဲဍိက်သၟိၚ်သာံလှေက် ဒုၚ်သစ္စ သၟဝ်ဂၠးဂတာဇိုၚ်ထဝ်ရောၚ်အဴ၊ လ္တူသၟိၚ်တၠညးဂှ် အဲဍိက် ဟွံမံၚ်တဴရအဴ။" "သာံလှေက်မွဲ ဝေၚ်တဴပြယာဲ လ္တူအဲသၟိၚ်ယျသွံ" တၠညးဝွံ နူကဵုမအီတဴဒၟံၚ် သောဲသောဲဂှ် ပါ်ပါဲဏာ လ္တူလိက်သဝဏ် သၟိၚ်သာံလှေက်ရ။ အမာတ်ဂမၠိုၚ်လေဝ် ချပ်တဴဒၟံၚ် နာနာသာ်အိုတ်ရ။ "ယွံတၠညး၊ ဍုၚ်ဝါန်ဝွံ အလဵုဇကု အဲဍိက်ကဵု မာံဇြဲတၞုၚ် စဳရေၚ်ပြုပြေၚ်လဝ် ညံၚ်သ္ဂောံဒုၚ်ဒဝ်သၞ မာန်ရအဴ။ မအံက်တၠညးလေဝ် ကေၚ်သ္ပဒ္တဴကၠုၚ်တုဲ ဍိုက်ပေၚ်တဴကဵု အၚ်္ဂလက်သဏ်ဍုၚ်ရအဴ။ လၟုဟ် စဍုၚ်ဝါန်ကီုလေဝ် ဍုၚ်ညံၚ်သ္ဂောံခိုၚ်ကၠိုက် ဂၠိုၚ်တိုန်အာဂှ် ပဠေဝ်တဴတုဲရဏောၚ်ထေၚ်၊ အခေါၚ်အရာလေဝ် က္ဍန်တဴဗွဲမလောန်တုဲ လၟုဟ်ဏအ် သီုဟွံဗ္တိုက်ဏီ အာဂတနူဏအ်မှ ဗ္တိုက်သီကေတ်ထေက်ရအဴ" တၠညးဝွံ က္လၚ်ကေတ်ဂလာန် အမာတ်ဇၞော် သၟိၚ်ဇိပ်ဗြာဲတုဲ ဓညိက်တဴက္ဍိုပ်ရ။ "ယွံတၠညး၊ ပ္ဍဲဍုၚ်ကြေဝ်ဝွံ စဍုၚ်ကြေဝ် မဒှ်ကောန် စဍုၚ်မံၚ်မလ၊ မဒှ်ခမာန် စဍုၚ်မုတ္တမ စဴအာဲဗညာ ဟွံမွဲရောၚ် သာ်ဝွံဂွံမိၚ်လဝ်ရအဴ။ စဴအာဲဗညာ ဟွံမွဲတုဲ ကောန်စဍုၚ်မုတ္တမ ဘဝ်လ္ဂန်ဟေၚ် မၚ်မွဲလဝ်ဍုၚ်ရအဴ။ ဟိုတ်ဂှ်ရ အခိၚ်လၟုဟ် ဗ္တိုက်ဍုၚ်ကြေဝ်မ္ဂး က္လိဂွံတဴ ဗွဲမလောဲသွာရအဴ" ဂလာန် သၟိၚ်ဇၞော်သာံပြာပ် မဂရၚ်ပ္တီဂှ် တၠညး စိုတ်လုပ်စ ဗွဲမလောန်ရ။ သ္ကိုပ်ဒပ်တၞဟ်ဂမၠိုၚ်လေဝ် လညာတ်ဇကုကဵု ဇကုဂှ် ဟီုသ္ဂးတဴဒၟံၚ် သာသာအိုတ်ရ။ "ကှ်ေ... သာံလှေက် သ္ဂးကၠုၚ်သာ်ဏအ်မ္ဂးတှ်ေလေဝ် အဲဒးသီထ္ၜးကဵု ဍုၚ်တၞဟ်ကၠာရဒှ်။ အလုံမွဲဂၠးဗၟံက်ဂှ် အဲသီကေတ် အိုတ်တုဲမှ သာံလှေက် စိုပ်ဇရေၚ်တမ်ဇိုက်အဲဟာ ဗဵုရံၚ်ဏီရဒှ်။ အမာတ်ဒိန်ကဵု အမာတ်ဇၞော် သၟိၚ်သာံပြာပ်တအ် ဂၠုၚ်မၞုံဒၟံၚ် ပ္ဍဲဍုၚ်ဝါန်ကဵု ဍုၚ်တိုဂ္ဂလာဂမၠိုၚ်ဂှ် သီကေတ်တုဲ ဇက်အာဇရေၚ် ဍုၚ်ကြေဝ် နကဵုပၞာန်တိုက်၊ ပၞာန်ဍာ်ညိ" "အတိုၚ်အမိၚ် အသံရအဴ" "ဟီုကဵုတၠၝတအ် သာံလှေက်စမ်၊ ဍုၚ်ဝါန်ဂှ် ဍောတ်ဒၟံၚ်ဏီရ။ တၠၝတအ် နွံပၟိက်မ္ဂး အဲသၟိၚ် ပြံၚ်ကဵုစတဴ ဍုၚ်ဇၞော်ဇၞော်ဂမၠိုၚ်ဏီရောၚ်ဂှ် ဟီုလဴထ္ၜးကဵုဍေံစမ်" "ဒးရးသန်ရအဴ" ဍိက်စဍုၚ်ဝါန်ဂှ်လေဝ် လ္ၚောဝ်ဖျေံက္ဍိုပ်ကု တၠညးတုဲ စဴအာရ။ အမာတ်ဒိန်ကဵု အမာတ်ဇၞော် သၟိၚ်သာံပြာပ်တအ် သွက်ဂွံဇက်အာ ဇရေၚ်ဍုၚ်ကြေဝ် နကဵုဂၠံၚ်ဍာ်ဂှ် ပဠေဝ်ပဠေတ်တုဲ နဒဒှ်ဒပ်ဂတ ဇက်အဂၠံၚ်ဍာ်အိုတ်ရ။ တၠညးရာဇာဓိရာဇ်ဝွံ နကဵုဂၠံၚ်တိုက်ဟေၚ် ဇက်အာဇရေၚ် ဍုၚ်ကြေဝ်ရ။ ဍုၚ်ကြေဝ်ဝွံ အယာံမာတ် ဒပ်မၚ်ဍုၚ်ဟေၚ်မၞုံတုဲ ကါလအမာတ်ဒိန်ကဵု အမာတ်ဇၞော် သၟိၚ်သာံပြာပ်တအ် စိုပ်အာဇရေၚ် ဍုၚ်ကြေဝ်ဂှ် ဘဝ်လ္ဂန် သီုဒုၚ်ဟွံမာန် ဒးဆုတ်ဂြိပ်အာ ဇရေၚ်မုတ္တမရ။ ဟိုတ်ဂှ်ရ အမာတ်ဒိန်ကဵု အမာတ်ဇၞော် သၟိၚ်သာံပြာပ်တအ်ဝွံ နူကၠာတၠညးရာဇာဓိရာဇ် ဟွံစိုပ်ဍုၚ်ကြေဝ်ဏီ သီကေတ်ဏါမာန် ဗွဲမလောဲသွာရ။ ကါလတၠညးရာဇာဓိရာဇ် စိုပ်ဍုၚ်ကြေဝ်ဂှ် အမာတ်ဇၞော်တအ်ညးၜါ ဒုၚ်တၠုၚ်တုဲ ဆက်ကွာဲတဴကဵုဍုၚ်အိုတ်ရ။ "ဍုၚ်ကြေဝ် သ္ပဒၟံၚ်သပုန်ဟီုဂှ် လၟုဟ်ဏအ်လေဝ် ဟွံဒးပ္တိတ်တဴဒြဟတ် ၜိုတ်ရပ်စစာၚ်၊ အဒါရသွံ... ဟာ... ဟာ... ဟာ..." တၠညးဝွံ ဟိုတ်နူကဵုသီဂွံ ဍုၚ်ကြေဝ် ဗွဲမလောဲသွာတုဲ ဂွံဒၟံၚ်ဒြဟတ် ဗွဲမလောန်ရ။ အမာတ်ဒိန်ကဵု အမာတ်သာံပြာပ်တအ်ဝွံ မၞုံတဴဒၟံၚ် ဗွဲမတန်ကြန်ဟေၚ်ရ။ လ္တူနူကဵုမတန်ကြန်ဂွံ ဂွိၚ်တဴဒၟံၚ် သွက်ဂွံဗ္တိုက်အာ ဍုၚ်မုတ္တမ ဂတဏအ်ရ။ လၟုဟ် ဒြဟတ်ပၞာန် ဟွံဂွံဗ္တိုက်လဝ် ပ္ဍဲဍုၚ်ကြေဝ်ဂှ် အာကောံဒၟံၚ် ပ္ဍဲမုတ္တမတေံ ဗွဲစၟတ်ဨကန်ရောၚ်။ ၜိုန်ရက္လိဂွံတဴ ဍုၚ်ကြေဝ် ဗွဲမလောဲသွာကီုလေဝ် ပ္ဍဲဒၞာဲ ကောန်၊ ခမာန် စဍုၚ်မုတ္တမတအ်မၞုံ ခမိုၚ်၊ လ္ဂန်ဖေန်တအ်ဂှ်လေဝ် က္လိဂွံတဴ လောဲသွာဟွံသေၚ်ရ။ ဝါတ်အိုတ်ဂှ်တုန် ဍုၚ်ဝါန် ဒၞာဲသၟိၚ်သာံလှေက် မသ္ကေက်သ္ကာကဵု ကွတ် မၞုံတေံ ကေုာံ နူကဵုလက်ထက် မအံက်တၠညးတေံ ဟိုတ်နူဗ္တိုက်ကေတ် ဟွံမာန်တုဲ မဒးသၠးကၠေံနန် ဍုၚ်မုတ္တမဟေၚ်ရောၚ်။ "သၞဟွံဒးသ္ပဂရုဟီုဂှ် ဟွံမွဲရအဴ တၠညး၊ ဗြာတ္ထၜ မဒှ်သၞအဓိက အလုံမွဲဂၠး ဒိုဟ်ဗၟံက်ဏအ်ဂှ် ဟွံဂွံဗ္တိုက်ဏီရအဴ။ လုကဴဟွံဂွံဗ္တိုက်ကဵု ဗြာတ္ထၜဏီမ္ဂး တုပ်တဴညံၚ်ရဴ လွဳတဴလဝ်သၞရအဴ။ ညံၚ်ရဴမဆတ်လဝ် ဇြုံမၞုံကဵုဂျိ ပ္ဍဲဂၞိၚ်ကီု ဇြုံဂှ် ၜိုန်ရဂြိပ်ဟွံမာန်ကီုလေဝ် အခေါၚ်ခိုဟ်ကၠုၚ်မ္ဂး ပၠးဂၞေါ်တုဲ က္လေၚ်သ္ပတဴသၞရောၚ်အဴ တၠညး" "ကှ်ေ... ပလံၚ်ဏါ လိက်သဝဏ် ဇရေၚ်စပုၚ်ခမိုၚ် မဂြာၚ်စမ်။ အလဵုဇကုအဲသၟိၚ် ဇက်အာဒပ်တုဲ ဒအာဟာ၊ ကၠုၚ်ဇရေၚ် တမ်ဇိုၚ်အဲတုဲ လ္ၚောဝ်ဟာ သၟာန်ဏါစမ်ဟေံ" တၠညးဝွံ ဟိုတ်မက္လိဂွံဇၞးတုဲ တုပ်ပၟာညံၚ်ရဴ သရာဲပၞာန် ဇၟာပ်မဗ္တိုက် ဂွံဇၞးကီု ဂံၚ်သ္ကာဒၟံၚ်ရ။ ညံၚ်ရဴသၟိၚ်ဇာဒိသိုၚ် ကေသရာဇာ ဒြဟတ်ပေၚ်ဒၟံၚ်ရ။ "ဒးရးသန်ရအဴ" တၠညးရာဇာဓိရာဇ်ဝွံ ပိုၚ်ပြဳကေတ် ဍုၚ်ကြေဝ်တုဲ ဖျေံတဴဗ္ဒိုပ် ဇူမံၚ်ပ္ဍဲဍုၚ်ကြေဝ် မွဲခဏရ။ အခိၚ်မဇူဒၟံၚ်ဂှ် ပ္ဍဲမွဲတ္ၚဲ ကလုတ်တခဳ နူဍုၚ်ဟံသာဝတဳတေံ စိုပ်ကၠုၚ်ရ။ တခဳဝွံ လိက်မၚ်ကာန်စဳ မမၚ်ဒၟံၚ်နန် ဍုၚ်ဟံသာဝတဳတေံဂှ် ဆက်ကွာဲကုတၠညးရ။ ပ္ဍဲလိက်ဝွံ မုရဴပရောပရာမွဲ မချူလဝ်ဂှ်ဟွံတီ တၠညးမွဲ မုက်မတ်လီုအာ ညိညရ။ "ယွံသၟိၚ်ဇၞော်တအ်၊ နူကၠာဟွံဂွံဗ္တိုက်တဴ မုတ္တမဏီ အဲဒးဂတးစဴအာ ဇရေၚ်ဟံသာဝတဳ မွဲခဏရောၚ်" "မုဟိုတ် သ္ဂောံဒးဂတးစဴရောအဴ တၠညး၊ တၠညး စဴအာမ္ဂး စဍုၚ်မုတ္တမတအ် က္လေၚ်ဗ္တိုက်ကေတ်ထောံ ဍုၚ်ပိုဲမက္လိဂွံလဝ်ရ။ တုပ်တဴညံၚ်ရဴ ကဵုတဴအခိၚ်ကုသၞ သွက်ဂွံပ္ကောံဒြဟတ်ရ" အမာတ်ဇၞော် သၟိၚ်သာံပြာပ် ဂရၚ်ပ္တီတဴရ။ အမာတ်ဇၞော်ဝွံ အဃောမဗ္တိုက်ပၞာန် ဂတးစဴအာဂှ် ဟွံဒးစိုတ် အလုံမွဲဂၠးဗၟံက် ဗ္တိုက်သီကေတ်တုဲမှ မိက်ဂွံကဵုစဴတဴရ။ အမာတ်ဒိန်ဝွံ သာ်ဂှ်ဟွံသေၚ်ရ။ "စဴမ္ဂးလေဝ် ထေက်ဒၟံၚ်ရအဴ။ ဝေၚ်လဝ်ပၞာန် ကုအၚ်ဝတုဲ ဆက်ဗ္တိုက်ဒၟံၚ်ပၞာန် သ္ကုတ်လ္ပာ်ဗၟံက်ဏအ်မ္ဂး ကောန်သ္ဂံၚ်တအ်လေဝ် ဍောၚ်ၜိုတ်တဴရ။ လၟုဟ်ဝွံလေဝ် ဒှ်ရာသဳဗြဲတုဲ ယဲဘဲလေဝ် ဂၠိုၚ်တဴရ။ ဒှ်အခိၚ် ရတ်သီသြောံ၊ သတ်ဆုသတ်ဒုန်တုဲ ဆက်ဗ္တိုက်တဴပၞာန်မ္ဂး ပ္ဍဲအလုံမွဲဂၠး မုတ္တမ၊ မတ်မလီု သၞာံဂတဏအ်ဝွံ ဒးဆဵုဘဲတၞောဝ်မာန်ရအဴ။ လၟုဟ်ဂတးစဴအာတုဲ ဝဿန်လေဝ်အိုတ် ကၠောံဟေမန်၊ က္ညၚ်မံက်မှ ဇက်မ္ဂးလေဝ် ဂွံတဴအခိၚ် သွက်ဂွံလွဳတဴဒြဟတ် ဒပ်ဟံသာဝတဳမာန်ရအဴ" "စဍုၚ်ခမိုၚ် မဂြာၚ် လုပ်စိုပ်ခစရအဴ" "စဍုၚ်ခမိုၚ် မဂြာၚ်" သာ်ဝွံ ဂွံမိၚ်ကေတ်ရမျာၚ် တခဳလလောၚ်ပၟိၚ်ဗက် သီုညးဖအိုတ် အမ်သဝ်ဒၟံၚ်အိုတ်ရ။ ဟိုတ်နူကဵု မဂြာၚ် မသ္ပဒၟံၚ်သပုန် ယၟုတိတ်ဒၟံၚ်ဂှ် စိုပ်ကၠုၚ်တုဲ အမ်သဝ်ဒၟံၚ်အိုတ်ရ။ မဂြာၚ် စိုပ်ကၠုၚ်တုဲ ပရေၚ်မသဳကၠာဲဒၟံၚ်ဂှ်လေဝ် သ္ၚိတ်အာရ။ "လုပ်ကၠုၚ်ညိ" က္လိဂွံအမိၚ် နူတၠညးဗက် ပါၚ်တြၚ်ၝောံခန်ၜါလ္ပာ် ပံက်လဟာ်ကၠုၚ်တုဲ မၞိဟ်မၞုံကဵုသော်ပါၚ်၊ သော်မုၚ်မဓဗြိုက်၊ ဖျုန်စၞာံလမ္စံက် ဇကုဇကောဝ် တိုက်က်မွဲ ဟိုတ်နူကဵု လ္တက်လဝ် ကယျိုၚ်ပၞာန် အရံၚ်သာ်တ္ၚေက်တုဲ ဖျုန်စၞာံမလမ္စံက်ဒၟံၚ်ဂှ် သာတုဲလမ္စံက်အာရ။ ထကတ်လဝ် သော်ယံၚ်တုဲ ယာ်ကဝါသာ်ဗုဂှ် ပူထမိၚ်လဝ် ပ္ဍဲက္ဍိုပ်ရ။ ညးဂှ်ဝွံ စဍုၚ်ခမိုၚ် မဂြာၚ်ရ။ ဗီုပြၚ်မဂြာၚ်ဝွံ ၜိုန်ရဒှ်ဂကူမန်ကီုလေဝ် သာတုဲတုပ်တဴဗီုပြၚ် ညံၚ်ရဴဂလာ ကၞောတ်ရးမွဲရ။ မဂြာၚ်ဝွံ ကါလစိုပ် ဂတမုက်တၠညးဂှ် အောပ်မာဇံသဝ်တုဲ လ္ၚောဝ်တဴရ။ တုဲဂှ် ခေါ်ထဝ်သြန် ဍိက်ဂမၠိုၚ် မယိုက်နၚ်ဂှ် ဆက်ကွာဲဒၟံၚ်ကု တၠညးရ။ အမာတ်ဂမၠိုၚ်လေဝ် ခါတ်အကာဲရံၚ်ဒၟံၚ် စဍုၚ်ခမိုၚ် မဂြာၚ်အိုတ်ရ။ မဂြာၚ်မသ္ပတဴသပုန်ဝွံ ပ္ဍဲဂတမုက်တၠညး ညံၚ်ရဴယာတ်ဇိုတ်ဇိုၚ်၊ ဇြုံဂျိမအိုတ် ရှ်ေသှ်ေရဴဂဴဒၟံၚ်ရ။ သ္ပတဴဒၟံၚ်သပုန်ဟီုဂှ် အရေဝ်ထ္ပက်ဗဇဵုရဴသာ်ဝွံ ဒဵုကဵုမ္ဒးထေၚ်ကေတ်ရ။ "မဂြာၚ်၊ ၝသ္ပဒၟံၚ်သပုန် ကုအဲဟာ" တၠညး ရံၚ်ဂစိုတ်လဝ်မတ်ကဵု မဂြာၚ်စေအ်အ်တုဲ သၟာန်ဏာ ပိုတ်တ်သ္ကုတ်တ်ရ။ မဂြာၚ် သီုဟွံလ္ၚာ်ရံၚ်တၠညး သီုမအောပ်မာဒၟံၚ်ဂှ်ဟေၚ် သွဟ်ဏါရ။ "ဒှ်ဆအယာံမာတ် အရေဝ်ထ္ပက်ဗဇဵု ညးဟွံဒးဂၞပ်စိုတ်တအ်ရအဴ။ စဍုၚ်သၟတ် ကၞောတ်ရးတၞုၚ်ဍုၚ် ညံၚ်ရဴအဲဍိက်ဝွံ ဂံၚ်သ္ပတဴဒၟံၚ်သပုန်ကု သၟိၚ်ဨကရာဇ် ညံၚ်ရဴတၠညး မပိုၚ်ပြဳလဝ် ဍုၚ်ဟံသာဝတဳကီုဟာ၊ ယဝ်ခါရအဲဍိက် သ္ပတဴသပုန်ဍာံစၟတ်မ္ဂး ကၠုၚ်စိုပ်လ္ၚောဝ်ဒၟံၚ်တၠညး ညံၚ်ရဴလၟုဟ်ဏအ်ဏီရဟာအဴ..." ပ္ဍဲလအိတ်ဂလာန်ဂှ် မဂြာၚ်ဝွံ လ္ၚာ်ရံၚ်တၠညးတုဲ ခါတ်အကာဲတဴရ။ တၠညးလေဝ် မုရဴဂလာန်မွဲဟွံသ္ဂး၊ ဟွံဗက်မုက်တုဲ မံၚ်တဴဗွဲမတန်ကြန်ရ။ အမာတ်ဒိန်တအ်လေဝ် တၠညးမုမက္လေၚ်သ္ဂးရောဂှ် စိုတ်လုပ်စဒၟံၚ်အိုတ်ရ။ ပ္ဍဲဂၠံစိုတ်တၠညးဝွံ လ္တူမဂြာၚ်ဂှ် ပတှ်ေညံၚ်ၚ်၊ ဟွံပတှ်ေညံၚ်ၚ် ဒှ်ဒၟံၚ်ရ။ "ယွံသၟိၚ်မပြဲ၊ ဂလာန်ထ္ပက်ဗဇဵု ညးမွဲသ္အာၚ်ဂှ် ဩဝ်လ္ပပတှ်ေညိအဴ။ အဲဍိက်မဂြာၚ် ဒှ်ညးသပုန် ဟွံသေၚ်ရောၚ်ဂှ် ဂံၚ်ယဵုဒုၚ်သစ္စာ ဂတမုက် တၠညးရအဴ..." မဂြာၚ်ဝွံ သ္ပတဴဗီုပြၚ် သက်ဒးဆာန်ဍူတုဲ က္လေၚ်လ္ၚောဝ်ဒၟံၚ် တၠညးရ။ တၠညးတုန် မိက်ဂွံထ္ၜး ပၞောတ်ဒေါသ ကုမဂြာၚ်တုဲ သ္ပထောံလဝ်ညံၚ်ရဴ မုက်မတ်တီုတီုရ။ "ခိုဟ်ရ၊ အာနိမန်နၚ် ကျာ်ထွာဲမွဲဇကုစမ်။ အဲကဵုမၞး သ္ပတဴသစ္စ ဂတမုက်အဲရောၚ်" အမာတ်ဇၞော် သၟိၚ်သာံပြာပ်ဝွံ ဇဖန်ဂှ် က္ညနိမမန်နၚ် ကျာ်ထွာဲမွဲဇကုတုဲ ကျာ်ထွာဲဂှ် ကဵုမဂြာၚ် ယဵုလဝ်တုဲ သ္ဂးတဴ ဂလာန်သစ္စရ။ သ္ပစၟတ်သစ္စတုဲ မဂြာၚ်ဂှ်လေဝ် က္ဆံၚ်ဟွံကဵုလီု ကဵုစတဴ ဍုၚ်ခမိုၚ်ပၠန်ရ။ ပ္ဍဲတ္ၚဲယးဂတ ဒပ်တၠညးရာဇာဓိရာဇ်ဂမၠိုၚ် သွက်ဂွံစဴအာ ဇရေၚ်ဍုၚ်ဟံသာဝတဳဂှ် နူကဵုအခိၚ် နူဂယးပြဟ် ပဠေဝ်ပလေတ်ဒၟံၚ်အိုတ်ရ။ အမာတ်ဒိန်ဝွံ ဒပ်ဇကု စိုပ်ဒတုဲရဒှ်တုဲ စိုပ်ဒၟံၚ်လ္တူစိၚ်ရ။ တၠညးဟွံပြာပ်ကၠုၚ်ဏီတုဲ အမာတ်သ္ကိုပ်ပၞာန်ဂမၠိုၚ် ဂေတ်စၟဳစၟတ်ရံၚ် ဒပ်ဇကုတုဲ မၚ်ဒၟံၚ်အိုတ်ရ။ သ္ဂံၚ်ပၞာန်ဂမၠိုၚ် သီုကဵုဗၞုဟ်ဇြၚ် စူစူစၚ်စၚ် ဂွံက္လေၚ်စဴသ္ၚိရဒှ်တုဲ မိပ်ဒၟံၚ်အိုတ်ရ။ အမာတ်ဇၞော် သၟိၚ်သာံပြာပ်ဝွံ စဵုကဵုတၠညး မစိုပ်ကၠုၚ် စၟဳစၟတ်ဒၟံၚ်ဒပ်ဇကုဖိုဟ်ရ။ တၠညးဝွံ သီုဟွံတိုန်အာ လ္တူစိၚ်ဏီ ပ္တဝ်အာဒၟံၚ်ကဵု ဇရေၚ်အမာတ်ဇၞော် သၟိၚ်သာံပြာပ်မၞုံတေံရ။ "အမာတ်ဇၞော် သာံပြာပ်" "ယွံ တၠညး" အမာတ်ဇၞော်ဝွံ မိၚ်ရမျာၚ် တၠညးမကော်ဂှ် ကလုက်တဴ နူသ္ၚောဲသ္ၚောဲ ဗွဲမထတ်တုဲ ပြာပ်ကၠုၚ်ဇရေၚ် ဗ္ဒာဲတမ်ဇိုၚ် တၠညးရ။ အမာတ်ဇၞော်လေဝ် တၠညးမိက်ဂွံဗ္ကန်ကဵုဇကု မမိက်ကဵုမွဲမွဲတုဲ မကော်တဴရောၚ်ဂှ်တီတုဲ ကါလစိုပ် ဂတမုက်တၠညးဂှ် ထံက်က္ၜံၚ်တုဲ သ္ပတဴရှ်ေသှ်ေရ။ "အဲသၟိၚ်စဴအာ နူကဵုဍုၚ်ကြေဝ်မ္ဂး ညံၚ်ရဴအမာတ်ဇၞော် မဟီုလဝ် ဒပ်ဍေံတအ် ကၠုၚ်ဗ္တိုက်တဴရောၚ်။ ဟိုတ်ဂှ်ရ သရာဲအဲ မသုန်လ္ၚီ ကေုာံ အမာတ်ဇၞော်ဂှ် စွံလဝ်ကဵုမၚ် ဍုၚ်ကြေဝ်ဏအ်ရောၚ်။ မၞိဟ်ဍေံကၠုၚ်ဗ္တိုက်မ္ဂး ဒုၚ်ညံၚ်သ္ဂောံမာန်ညိ။ ဗြဲအိုတ်ဗက် အဲသၟိၚ် က္လေၚ်ကၠုၚ်ရောၚ်" "အတိုၚ်အမိၚ် အသံရအဴ" သွဟ် သၟိၚ်ဇၞော်သာံပြာပ်ဝွံ ဟွံမွဲတဴကဵုဘိၚ်ဘၚ်၊ ဂံၚ်သ္ကာပိုတ်သ္ကုတ်တုဲ သီုကဵုမထံက်လဝ်က္ၜံၚ် ပ္ဍဲဂတမုက်တၠညးဟေၚ် နွံတဴဗွဲမဗိုန်ဇၟအ်ရ။ "ကေတ်... ဣဏအ် သွက်အမာတ်ဇၞော်..." အမာတ်ဇၞော်လေဝ် နူကဵုမထံက်လဝ်က္ၜံၚ်ဂှ် ဒုၚ်ဂိုၚ်ကေတ် နူတၠညး ကပေါတ်မပ္တိုန်စ နကဵုတဲၜါ ဗွဲမရှ်ေသှ်ေရဴဂဴရ။ ပ္ဍဲကပေါတ် တၠညးမကဵုဂှ် တဆိပ်ထဝ် ထမိၚ်က္ဍိုပ် မကှ်ေချူလဝ် " သၟိၚ်ဗြာဇ္ဇ" ရ။ "အမာတ်ဇၞော် သၟိၚ်သာံပြာပ် မယိုက်ဂၠေၚ်တာလျိုၚ် ဗွဲမဗိုန်ဇၟံဝွံ နကဵုယၟု သၟိၚ်ဗြာဇ္ဇ ဩဝ်စတဴ ဍုၚ်ကြေဝ်ညိ" ရမျာၚ်တခဳလၟိၚ် မဗျာပ်တြးကၠုၚ် နူလက္ကရဴတၠညးတုဲ အမာတ်ဇၞော်မွဲ သီုကဵုမဗှ်ဗၞုဟ်တဴ ဂုဏ်တၠညး လ္ၚောဝ်ဖျေံဒၟံၚ်က္ဍိုပ် ဂၠိုၚ်ကဵုဝါရ။ ကောန်ဒပ်မၞုံလက္ကရဴဂမၠိုၚ်လေဝ် ဟိုတ်နူတၠညး မဖျေံလာပ်ကု သ္ကိုပ်ဒပ်ဇကုဂမၠိုၚ်ဂှ် တက်တဲတက်ဇိုၚ်တုဲ သီုကဵုမက္ညာၚ်တဴ ဟေဟေဟာဟာ မိပ်သၠောၚ်ဒၟံၚ်အိုတ်ရ။ တုဲဂှ် တၠညးတိုန်ဍိုက်ကေတ် စိၚ်မကယျိုၚ်လဝ် နကဵုထဝ်သြန်တအ်ဂှ်တုဲ သီုကဵုဒပ် အမာတ်ဒိန်၊ အမာတ်ဇၞော် သၟိၚ်ဇိပ်ဗြာဲ၊ သၟိၚ်ရတ္တသံၚ်ရာံ၊ သၟိၚ်ယောဂရာဇ်ဂမၠိုၚ် စ္ဍးတိတ်အာ နူကဵုဍုၚ်ကြေဝ် သိုက်က်ရ။ ပ္ဍဲဍုၚ်ကြေဝ်ဝွံ အမာတ်ဇၞော် (သၟိၚ်သာံပြာပ်) သၟိၚ်ဗြာဇ္ဇကဵု ကောန်ဒပ်ဂမၠိုၚ်ဟေၚ် သှ်ေတဴရ။ သၟိၚ်ဇၞော် သာံပြာပ်လေဝ် ရပ်ကေတ် တဆိပ်ထဝ် တၠညးမကဵုလဝ်ဂှ်တုဲ ဗဵုသ္ၚဳတဴဒၟံၚ် ဒပ်မစ္ဍးအာဂမၠိုၚ်ဂှ်ရ။ "ဟူ... တဆိပ်ကြာမွဲ၊ က္ဆံၚ်မွဲ ဟွံသေၚ်ရ။ တာလျိုၚ်မွဲ၊ ဝတ်မဒးယိုက်ဂၠေၚ်တဴ နကဵုလမျီုမွဲ ဂၠိုၚ်ကၠုၚ်ရောၚ်။ ဟိုတ်နူကဵု ပတှ်ေအဲတုဲ ဍုၚ်မုတ္တမ ၃၂ ဍုၚ် ဒုၚ်တဝ်စၞေဟ် ညံၚ်သ္ဂောံဇၞးတဴဂှ် စကာတဴယျ။ စၞးတၠညး ညံၚ်သ္ဂောံဇၞးဂှ် အဲဒးဒုၚ်တဝ်စၞေဟ်ကဵုရောၚ်" သၟိၚ်ဇၞော်သာံပြာပ် သီုကဵုမကေမ်တဴသတ်တဲ ကရောတ်ဟီုဏါ သာသာရ။ ပါဲနူကဵု ကျာမၜိုဟ်ဂံက် မပိုက်လွိၚ်ကၠုၚ် ဗ္ဒာဲဂှ်ဂမၠိုၚ်တုဲ ညးလဵုမွဲလေဝ် မိၚ်ကေတ်ဟွံမာန်ရ။ အရာတၠညး မစုတ်လဝ်ကဵု ပ္ဍဲတဲဇကုဂှ် ထဝ်ဂတှ်ေမွဲ ဟွံသေၚ်၊ ကောန်ပၞာန် မသုန်လ္ၚီ ဟွံသေၚ်၊ ဍုၚ်ကြေဝ် ဟွံသေၚ်၊ ဒှ်ကံဇာတာ ပလိုတ်ဍုၚ်မုတ္တမ ၃၂ ဍုၚ်ရ။ သတိတိတ်ဗၠးအာ မွဲဝါမ္ဂး အလုံမွဲဂၠးဒိုဟ်ဗၟံက် က္လေၚ်ပါအာ ပ္ဍဲတဲသၞတအ်မာန်ရောၚ် ဟွံသေၚ်ဟာ။ #သ္ဂံၚ် လအီမန် (သၟာပၠန်ဂတး အညတြ) ပ္ဍဲကဵု Telegram လေဝ် လုပ်ဗှ်တဴမာန်ရအဴ။ https://t.me/laaeimon #တၠညးရာဇာဓိရာဇ် #စဍုၚ်ဝါန်သၟိၚ်သာံလှေက် #အၚ်ဝ - ဟံသာဝတဳ ပေါဲပၞာန်ပန်စှော်သၞာံ #လျးအရှိုဏ် ဟံသာဝတဳ သ္ကုတ်ဒုတိယ #The Light of Dawn, Hongsawatoi Part2 Ep5