လျးအရှိုဏ် ဟံသာဝတဳ သ္ကုတ်ဒုတိယ ပိုဒ် ၄ ပ္ဍဲအခိၚ် ဒပ်တၠညးရာဇာဓိရာဇ်ဂမၠိုၚ် မစိုပ်ဇရေၚ် မုဟ်ဗဳဂှ် ဒပ်အၚ်ဝဂမၠိုၚ် သီဂွံအာ မုဟ်ဗဳယျဒှ်တုဲ ဒပ်ဟံသာဝတဳဂမၠိုၚ် ဒးဖျေံတဴဒပ် မ္ၚးဍုၚ်ဟေၚ်ရ။ သၟိၚ်ပေန်ယျကဵု ပေန်လှေဝ်တအ်ဝွံ ဍုၚ်မုဟ်ဗဳဂှ် ကၟာၚ်တြၚ်ဍုၚ်တုဲ ဟိုတ်မပခိုၚ်ဒၟံၚ်ဂှ်ရ တၠညးရာဇာဓိရာဇ်ဝွံ ဂၠာဲတဴတၚ်ဍိုန်လျ ဒပ်မုဟ်ဗဳတုဲ ပဠေဝ်တိုန် သွက်ဂွံဗ္တိုက်ရ။ သီီုမဍိုက်ကေတ်စိၚ် မတွံဂး အရးလဗုန် ကေုာံ သရာဲခိုဟ် ထပှ်ကၠံ ကြပ်လုပ်ဗ္ဒာဲကၟာၚ်ဍုၚ်တုဲ ရံၚ်တဴရ။ အဃောဂှ် သၟိၚ်ပေန်ကဵု သၟိၚ်ပေန်လှေဝ်တအ်လေဝ် ညာတ်တဴအိုတ်ရ။ "ဟေ ဗညာနဲ၊ မုဟိုတ်ဂွံကၠုၚ်တဴဂှ်ရော၊ ၝဂံၚ်ဗ္တိုက်ကဵုပိုဲတအ်ဟာ" "ဟာ... ဟာ... ဟာ... မၞးတအ်ဟေၚ် ပံက်ကဵုပါၚ်တြၚ်ညိလေဝ်၊ ဂွံတီတဴအစောန်အဲဏောၚ်" နကဵုရမျာၚ် တၠညးရာဇာဓိရာဇ် ဗွဲမထတ်သ္ကာတ် ရမျာၚ်ဂြိုၚ်ဝွံ အုပ်ဓလီုအာ အလုံဒပ်မုဟ်ဗဳရ။ ဟိုတ်နူဒှ်အခိၚ် နူဂယးပြဟ် အရှိုဏ်စတိုန်တုဲ ဟွံဂွံညာတ်ကေတ် မၞိဟ်ချိုတ်တ်ပၠိုတ်တ် ကၠးကၠးတၟးတၟးဏီရ။ ထၞဟ်လတိုပ်ဂမၠိုၚ်ဟေၚ် ပြဟ်စှ်ေဒၟံၚ် ဖြေအ်အ်ရ။ ဟိုတ်နူကဵု လျးပၟတ်တဝ်က္ၜံၚ်၊ ပၟတ်ကၠေၚ်သ္ဍဴ လ္တူကၟာၚ်ဍုၚ်ဂမၠိုၚ်တုဲ ဂွံညာတ်ကေတ်ဒၟံၚ် သ္ကိုပ်ဒပ်အၚ်ဝဂမၠိုၚ် မၞုံဒၟံၚ်လ္တူကၟာၚ်ဍုၚ်တေံ ဟဗုၚ်ဟဗုၚ် ဟပါဟပါရ။ "အဝ်... မၞးဟေၚ် ဗ္တိုက်ညိလေဝ်၊ ပိုဲတအ် ပံက်ကဵုပါၚ်တြၚ်ရဒှ်" "ပံက်ကဵုပါၚ်တြၚ်ဍုၚ်တုဲမ္ဂး ၝတအ် ဂြိပ်ညံၚ်ဂွံဗၠးညိ" သၟိၚ်ပေန်ယျကဵု သၟိၚ်ပေန်လှေဝ် မၞုံအပ္ဍဲဍုၚ်တအ်ဝွံ ဒပ်တၠညးရာဇာဓိရာဇ် ဍိုက်လုပ်ကၠုၚ် အပ္ဍဲကဵုဍုၚ်မ္ဂး ဗာ်ထ္ပက်ဟွံကဵုဗၠးရောၚ် သာ်ဝွံ သဳကၠဳရေၚ်သ္ကအ်တုဲ ပံက်တဴပါၚ်တြၚ်ဍုၚ်အိုတ်ရ။ တၠညးကီုလေဝ် လုပ်အာအပ္ဍဲဍုၚ်ဗက်မ္ဂး ၜိုတ်မညာတ်ဂှ် ဗာ်ထ္ပက်ထောံဖအိုတ်ညိ ကဵုတဴအမိၚ်ကု ဒပ်ဇကုရ။ ကုသ္ကိုပ်ဒပ် သၟိၚ်သာံပြာပ်ဂှ်ကီုလေဝ် လုပ်အပ္ဍဲဍုၚ်ဗက် စံၚ်ထောံဒပ်ညိဂှိ ကဵုတဴလဝ် အမိၚ်ကီုရ။ ကါလသၟိၚ်ပေန်ယျ ပံက်တဴပါၚ်တြၚ်ဍုၚ်ဂှ် ဒပ်ဟံသာဝတဳဂမၠိုၚ် ဍိုက်ဗာ်ထ္ပက်တဴ ဒပ်အၚ်ဝ မၞုံဒၟံၚ်အပ္ဍဲကဵုဍုၚ်ဂမၠိုၚ်အိုတ်ရ။ ဒပ်အၚ်ဝဂမၠိုၚ်ကီုလေဝ် မၚ်ဗာ်တဴဒၟံၚ် ဒပ်ဟံသာဝတဳ မလုပ်ကၠုၚ်ဂှ်ကီုတုဲ သီုဒပ်ၜါလ္ပာ်ဂမၠိုၚ် ဇီုထုဲထံၚ်ဒၟံၚ်အိုတ်ရ။ ဒပ်အမာတ်ဇၞော် သၟိၚ်သာံပြာပ် မပါဗက်ကၠုၚ် လက္ကရဴဂမၠိုၚ်ဝွံ ဒပ်တၠညး လုပ်ဂွံအာ အပ္ဍဲဍုၚ်ဗက် စံၚ်ကၠေံလ္တူကၟာၚ်ဍုၚ်ရ။ ဒပ်အၚ်ဝဂမၠိုၚ် ၜိုန်ရဒုၚ်ဗ္တိုက်တဴ ဗွဲမသ္ကာတ်ကီုလေဝ် ဒပ်ဟံသာဝတဳဂမၠိုၚ် ဍိုက်လုပ်ကၠုၚ်ဒၟံၚ် ညံၚ်ရဴဍာ်မဇွောဝ်ဆၚ်စှ်ေ နူကဵုဒဵုကီု ဟိုတ်မထပါ်လုပ်တဴ နကဵုအသိၚ် ဗွဲမသ္ကာတ်တုဲ တာဒၞါကၠေံ ဟွံမာန်အိုတ်ရ။ ပ္ဍဲအခိၚ်နူဂယးပြဟ် ဍုၚ်မုဟ်ဗဳဝွံ ရမျာၚ်ဇြၚ်ကဵုဇြၚ် ဗာ်၊ ရမျာၚ်က္ညာၚ်ကရေဲ ကဵုအမိၚ်၊ ရမျာၚ်ချေံ ကရေဲ၊ ရမျာၚ်တူပၟတ်တုဲ ခတိုဟ်တိတ်ဂမၠိုၚ် ဟောကၠံၚ်ဒၟံၚ်ရ။ သ္ၚိတာဲ မၞုံပ္ဍဲဍုၚ်ဂမၠိုၚ် တူပၟတ်တုဲ ကဠောံပၟတ်၊ ကဠောံသၟုဟ်ယက်ဂမၠိုၚ် ဓဂူတိုန်ဒၟံၚ် လ္တူအကာသတေံရ။ သၟိၚ်ပေန်လှေဝ်ကဵု သၟိၚ်ပေန်ယျတအ်လေဝ် ဟိုတ်နူဂွံညာတ်ကေတ် ဒပ်အၚ်ဝဂမၠိုၚ် ဒုၚ်ဒဝ်ကဵု ဒပ်ဟံသာဝတဳဂမၠိုၚ် ဟွံမာန်တုဲ နူကဵုအပ္ဍဲဍုၚ်ဂှ် ဒးဆုတ်တိတ်အာ မ္ၚးဍုၚ်တေံရ။ ဒပ်အၚ်ဝဂမၠိုၚ် မဆုတ်တိတ်အာဂှ် ဒပ်တၠညး ဗြုရမျာၚ်ဖံတုဲ ဟိုတ်နူကဵု မဍိုက်ဗ္တိုက်တဴဂှ်ရ သၟိၚ်ပေန်လှေဝ်ကဵု သၟိၚ်ပေန်ယျတအ် ဒပ်လီုတုဲ ဂြိပ်ပြးအာအိုတ်ရ။ ကါလဂှ် တၠညးလေဝ် ဒေါံကၠေံ ပေါဲဗ္တိုက်တုဲ ဒၞါဲမတူဒၟံၚ်ပၟတ်ဂမၠိုၚ်ဂှ် ကဵုသိုဘ်ပၠိုတ်ကၠေံရ။ အပ္ဍဲကဵုဍုၚ်မုဟ်ဗဳဝွံ ပြးပေၚ်ဒၟံၚ် နကဵုဇွမၞုံကဵုဆီဂမၠိုၚ်၊ ဇြၚ်၊ ခတေက်၊ ဗၞုဟ်ဂမၠိုၚ်၊ ညးမဒးလဝ် ဝပ်ဂမၠိုၚ်၊ လီုလာ်ဒၟံၚ်ဗွဲမဂၠိုၚ်ရ။ ဒပ်တၠညး ရာဇာဓိရာဇ်ဂမၠိုၚ်ဝွံ သီုကဵုမရပ်ဂွံလဝ် သ္ကိုပ်ဒပ်အၚ်ဝ မသုန်တၠ နဒဒှ်ဂၠုဲဂမၠိုၚ်ရ။ "တၠနာဲၝတအ် တၠညးအၚ်ဝဝွံ အဲ နဒဒှ်သၟိၚ်ဨကရာဇ်မွဲ ၜိုန်ရပြၚ်ဏါ လိက်သဝဏ် ပလံၚ်ဏါ စၟဳစၟိန်ပဏ္ဍာကီုလေဝ် ဟွံက္လိဂွံတဴ ဂလာန်ဗ္ကန်ရ။ ဟွံက္လၚ်တဴဂလာန် အဲသၟိၚ်ဨကရာဇ်၊ က္လၚ်တဴဂလာန် သပုန်တုဲ သ္ပတဴညံၚ်ရဴ ဍုၚ်ကွာန် သ္ဂောံက္တဴက္တာန်ရ။ အလန်ဏအ်တှ်ေ တၠနာဲၝတအ်ဂှ် အလဵုဇကုအဲ ဒးအာရပ်ကေတ်ရဏောၚ်" သ္ကိုပ်ဒပ်အၚ်ဝ ဒးလဝ်ဝပ်တုဲ ကယျိုၚ်ကယျဝ် မစာ်ဒၟံၚ်ဂမၠိုၚ်ဝွံ သီုကဵုမထံက်လဝ်က္ၜံၚ် ပ္ဍဲဂတမုက်တၠညးတုဲ ဟွံဂံၚ်ယာမုက်အိုတ်ရ။ ဟိုတ်နူဂွံမိၚ်ကေတာ် ဂလာန်တၠညးဂှ် ဖေက်ဂၟံက်တုဲ ဖျုန်ဇကု ခတဝ်ဒၟဴံၚ်အိုတ်ရ။ တၠညးကီုလေဝ် သီုဟွံဂစိုတ်တုဲ ဗလးကၠေံဗက် ဂြိပ်စဴအာ ဇရေၚ်ဒပ်အၚ်ဝ မၞုံတေံအိုတ်ရ။ ~~~~~~~~~~~~~~~~~~~ "ၝတအ် ဒပ်ဇၞော်ၜါဒပ် ဇက်အာတုဲ နကဵုသၞ ထပှ်ကၠံဂှ် ဒပ်ဒးလီုကၠုၚ်ဟာ၊ ဍုၚ်မက္လိဂွံလဝ်တုဲဂှ်မှ ပံက်ကဵုပါၚ်တြၚ် သွက်သၞဂွံလုပ်ဏီဟာ၊ ဒိုဟ်မံၚ်ကီု ကွေံရဏး" သၟိၚ်ပေန်လှေဝ်ကဵု သၟိၚ်ပေန်ယျတအ် သီုကဵုမခၠပ်လဝ်က္ၜံၚ် ပ္ဍဲဂတမုက် မၚ်ဂမဆွာ ဟိုတ်နူကဵု ဒးဒုၚ်လက်ဗျိဒေါန်ဒၟံၚ်ကဵု မၚ်ဂဳဆွာတုဲ ဟွံဂံၚ်ယာတဴက္ဍိုပ်ရ။ မၚ်ဂဳဆွာလေဝ် ဍုၚ်မုဟ်ဗဳ မက္လိဂွံလဝ်တုဲ ဟိုတ်နူကဵု ဒးဒုၚ်သၠးကၠေံတုဲ ဒုၚ်ဟွံမာန် ကြဴကြာန်ဒၟံၚ်ရ။ နူကဵုမလက်ဗျိဒေါန်ဒၟံၚ် သၟိၚ်ပေန်လှေဝ်ကဵု သၟိၚ်ပေန်ယျတအ်ဂှ် ရမျာၚ်မၚ်ဂဳဆွာ ဒေါံအာတုဲ သၟိၚ်ပေန်လှေဝ်တအ် လ္ၚာ်ရံၚ်တဴဂှ် စဍုၚ်မံၚ်မလ သၟိၚ်လိုက်ဖြာ ကေုာံ ဍိက်သ္ကအ်ဂမၠိုၚ် စိုပ်ကၠုၚ်ရ။ မၚ်ဂဳဆွာဝွံ ဟိုတ်နူကဵု စဍုၚ်မံၚ်မလ စိုပ်ကၠုၚ်ဂှ် သီုကဵုပၞောတ်ဟွံပြေ၊ မုက်မတ်တီုဒၟံၚ်ဖိုဟ်ဏီရ။ စဍုၚ်မံၚ်မလ သၟိၚ်လိုက်ဖြာဝွံ ဒပ်အၚ်ဝဂမၠိုၚ် ကျအာ ဒပ်တၠညးရာဇာဓိရာဇ် မစဴကၠုၚ်ဂှ် ဂွံမိၚ်ကေတ်တုဲ ကၠုၚ်လုပ်ခစ ဇရေၚ်မၚ်ဂဳဆွာရ။ ဒပ်မၞုံပ္ဍဲမုဟ်ဗဳသၟး ကျအာဟွံသေၚ်ဏီ ပ္ဍဲကဵုဍုၚ်လိုၚ်တေံလေဝ် သီုစၞေဟ်ကဵု အမာတ်ဒိန်ဟွံမာန် ဒးဗိုၚ်လဝ် မ္ၚးဍုၚ်ဂှ် ပေၚ်ကၠုၚ်မွဲဂိတုရ။ ဟိုတ်ဂှ်ရ စဍုၚ်မံၚ်မလဂှ် သၟိၚ်အၚ်ဝဝွံ ဟွံဇၞးတဴ တၠညးရာဇာဓိရာဇ်ရ ရဴသာ်ဝွံ ထေၚ်ကေတ်တုဲ သွက်ဂွံရုပ်သဳဒပ် ကၠုၚ်ဂရၚ်ပ္တီတဴရ။ စဍုၚ်မံၚ်မလ သၟိၚ်လိုက်ဖြာလေဝ် စိုပ်အာဂတမုက် မၚ်ဂဳဆွာမ္ဂး လ္ၚောဝ်ကလအ်တုဲ ဂ္ဇအ်တဴဒၞာဲ ဗွဲမထေက်ကြိုက်ရ။ သီုကဵုမသ္ၚဳဗဵုအာဒၟံၚ် သၟိၚ်စဍုၚ်ၜါတၠ မကျကၠုၚ်ပၞာန် မဂ္ဇအ်ဂစိုၚ်လဝ်က္ဍိုပ်ဂှ်ရ။ သၟိၚ်ပေန်လှေဝ်ကဵု သၟိၚ်ပေန်ယျတအ် ဖေက်မၚ်ဂဳဆွာတုဲ ဟွံဂံၚ်ချဳတဴအိုတ်ရ။ " ယွံတၠညးအၚ်ဝ၊ သ္ကိုပ်ဒပ်ၜါတၠဏအ်ဂှ် ဗလးကဵုညိ၊ အလန်ဏအ် ဟွံဇၞးမ္ဂး မွဲအလန်ပၠန် ဒးဇၞးတဴရောၚ်အဴ" "ဟာ... ၝအဒိုဟ်တအ်ဏအ်၊ အလန်ဏအ် ဟိုတ်နူကဵုသဟာဲအဲ စဍုၚ်မံၚ်မလတုဲ အဲသၠးအခေါၚ်ကဵု ၝတအ်ရောၚ်၊ မွဲအလန်ပၠန်ဟီုတှ်ေ ဟွံလောဲသွာပုဟ်ဂှ် စၟတ်လဝ်ညိ" "ဒးရးသန်ရအဴ၊ ဂုဏ်ဇၞော်ပြဲလောန်သန်ရအဴ" သၟိၚ်ပေန်လှေဝ်ကဵု သၟိၚ်ပေန်ယျတအ် ဟိုတ်နူဗၠးနူဒုဟ်တုဲ လ္ၚောဝ်တဴဒၟံၚ် မၚ်ဂဳဆွာ မွဲလ္စုတ်၊ စဍုၚ်မံၚ်မလ မွဲလ္စုတ်တုဲ တိတ်အာနူကဵု ခဒမ်နန် ဗွဲမပြဟ်အိုတ်ရ။ "ယွံတၠညးနန်ထဝ်၊ ဒၞာဲဒပ်အဲဍိက် ပ္ဍဲဌာန်အလဲဝွံဍာ်ဍာဒၟံၚ်ရအဴ။ ဒပ်အဲဍိက်ဂမၠိုၚ်ဝွံ က္ၜၚ်ဇၞော်ပါဒၟံၚ်တုဲ မိက်ဂွံပြံၚ်အာ ဒၞာဲဍာ်ဒမျိုဟ်ရအဴ" ဂလာန်စဍုၚ်မံၚ်မလ သၟိၚ်လိုက်ဖြာ သ္ဂးကၠုၚ်သွက်ဂွံ နုက်ပၞာန်ဂှ် မၚ်ဂဳဆွာမိၚ်တုဲ သီုဟွံပြေစိုတ် သ္ၚဳရံၚ်ဒၟံၚ် စဍုၚ်မံၚ်မလ ဗွဲမလအ်ရ။ စဍုၚ်မံၚ်မလဝွံ လုကဴဂလာန် မၚ်ဂဳဆွာ ဟွံက္လေၚ်နၚ်ဂှ် ဟွံယာတဴက္ဍိုပ်ရ။ မၚ်ဂဳဆွာလေဝ် မွဲလ္ပာ်ဂှ် ကျကၠုၚ်ပၞာန်၊ မွဲလ္ပာ်ဂှ် ဟိုတ်နူမသ္ဂးကၠုၚ် သွက်ဂွံနုက်ပၞာန်တုဲ ဇဖန်ဂှ် သီုဟွံဖျေံကဵုအမိၚ်ဏီ ချပ်ဗ္စာဒၟံၚ်ရ။ "ကှ်ေ... မိက်ဂွံရုဲစှ်တဴ ဒၞာဲဍာ်ဒမျိုဟ် ဟီုမ္ဂးတှ်ေလေဝ် ရုဲကေတ်ညိ" "အတိုၚ်အမိၚ် အသံရအဴ" စဍုၚ်မံၚ်မလဝွံ မုရဴမွဲလေဝ် ဟွံသ္ပတဴဂရု မၚ်ဂဳဆွာ သၠးကဵုအခေါၚ်ဗက် လ္ၚောဝ်တုဲ ဂတးစဴအာရ။ တုဲဂှ် စဴအာဒပ်ဇကုတုဲ ပြံၚ်အာ ဇရေၚ်ဍုၚ်လ္ဂုၚ်ရ။ စဍုၚ်မံၚ်မလ စဴအာတုဲဂှ် ဥပ္ပရာဇာ လုပ်ခစ စိုပ်ကၠုၚ်ဇရေၚ် မၚ်ဂဳဆွာရ။ ဥပ္ပရာဇာသၟးဟွံက ဍိက်မသုန်တၠ မဗၠးတိတ်ကၠုၚ် နူကဵုဍုၚ်မုဟ်ဗဳတေံလေဝ် ပါဗက်ကၠုၚ်ကီုရ။ "ညးဂှ်အိုတ်ဂှ်ရော ကောန်အဲ" "သ္ကိုပ်ဒပ် မဒးဒုၚ်ရပ်ကဵု ဒပ်ဟံသာဝတဳတုဲ မဗၠးတိတ်ကၠုၚ်ဂမၠိုၚ်ရအဴ" ဟိုတ်နူကဵု ဥပ္ပရာဇာ သွဟ်ဏါကဵု ဍိက်မဗၠးတိတ်ကၠုၚ် နူဒပ်ဟံသာဝတဳတုဲ မၚ်ဂဳဆွာဝွံ ဒးက္လိဂွံတဴပရိုၚ် မမိက်ကဵုမွဲမွဲရောၚ် သာ်ဝွံထေၚ်တုဲ ဂွံအာဒြဟတ်ရ။ "ကွေံဟာ၊ ၝတအ် မုရဴမွဲ ဂွံညာတ်ကေတ် ပ္ဍဲဒပ်ဍေံကီုရော" ဘ"ဒးရးသန်ရအဴ၊ သၟိၚ်ဟံသာဝတဳဝွံ သ္ဂးတဴဒၟံၚ်ကဵု ပိုဲဍိက်တအ်ရ။ သၟိၚ်ၝတအ်ဂှ် ဂလာန်သၟိၚ်ဂှ် ဟွံက္လၚ်၊ က္လၚ်တဴဂလာန် ညးသပုန်ရ၊ ရပ်ကေတ်တဴ ဒဵုကဵုဂွံဏောၚ်ဂှ်လေဝ် ကြီုကြဵုဇာဒၟံၚ်ရအဴ" "ဟဳ..." မၚ်ဂဳဆွာဝွံ ဟိုတ်နူကဵု သၟိၚ်ဟံသာဝတဳ ရပ်ကေတ်ဇကု ဒဵုကဵုဂွံရောၚ် မသ္ဂးတုဲ ဖေက်လကိုတ် ခတဝ်အာ ဗၞတ်ညိညရ။ လကိုတ်အာတုဲ ဂလာန်ကီုလေဝ် ဆက်သ္ဂးတဴ ဟွံမာန်ရ။ "ဒပ်ဟံသာဝတဳဂှ် ဒြဟတ်ဇၞော်မံၚ်ရအဴ၊ သရာဲဂမၠိုၚ်ဂှ်လေဝ် ကောန်မၞိဟ် သာ်ဝွံဟေၚ် မသ္ဂးတဴရ ညံၚ်ရဴလကိုဟ် မလုပ်စကီု ကြံကြတဴ ဗွဲမလောန်ရ။ ဗၞုဟ်၊ ဇြၚ်ဂှ်လေဝ် ဟွံဖေက်၊ ဒချိုတ်ရောၚ်ဂှ်လေဝ် ဟွံဖေက် ဒလူတိုန်အာ ဂတတေံဟေၚ် တိုန်ကၠုၚ်အိုတ်ရအဴ" "ဍာံစၟတ်ရအဴ၊ သၟိၚ်မန်ဝွံ သရာဲပၞာန်လေဝ် ဂၠိုၚ်တဴရ။ နကဵုဒပ် ဗၞတ်ညိဓဝ်ကီုလေဝ် အစောန်တက်ပလီုကၠေံ ဒပ်သၞဂမၠိုၚ် မၞုံတဴအိုတ်ရအဴ" ပရေၚ်ဍိက်ဂမၠိုၚ် မပ္တိုန်ထ္ၜးဂှ် သၟိၚ်ပေန်ယျလေဝ် လုပ်ထံက်ဏါရ။ မၚ်ဂဳဆွာလေဝ် ဂွံမိၚ်ကေတ် ပရိုၚ်ပရေံတုဲ စိုတ်လီု ဒြဟတ်ဆုတ်ယောၚ်ဒၟံၚ်ရ။ ဇက်ကၠုၚ်လဝ်ပၞာန် မွဲဂိတုပြၚ်ကီုလေဝ် ဍုၚ်မွဲဍုၚ်ကီုမှ သီကေတ်ဟွံမာန်ဏီရ၊ ဍုၚ်မသီဂွံလဝ်ဂှ်ကီုလေဝ် ဒးက္လေၚ်ကဵုတဴ သၞပၠန်ရ။ ညးမရီုဗၚ်ပၞာန်ဂှ်လေဝ် ဍာ်က္ဍာအာသ္ဂးတုဲ ရုပ်သီထောံဒပ်ရ။ မွဲသာ်ပၠန် သၟိၚ်သၞတအ်လေဝ် ရပ်ကေတ်ဇကု ဒဵုဂွံဏောၚ်ဂှ် ကြဵုဇာဒၟံၚ်ဏီရ။ မၚ်ဂဳဆွာလေဝ် သွက်ဂွံဆက်ထ္ပက်ပၞာန်ကဵု ဟံသာဝတဳဂှ် ဒှ်မံၚ်ဘိၚ်ၚ်ဘၚ်ၚ်တုဲ ၚၚ်အာရ။ "မၞးတအ် စဴအိုတ်ညိ။ တ္ၚဲယး ကောံဓရီုမှ သဳကၠဳပၠန်ရောၚ်" မၚ်ဂဳဆွာဝွံ ဟိုတ်နူဂွံမိၚ်ကေတ် ပရိုၚ်ဂှ်တုဲ စိုတ်လီုဒြဟတ်ဍိုန်ဒၟံၚ်ရ။ ပ္ဍဲတ္ၚဲယးဂတဂှ် ကော်ကောံဓရီုကူ သ္ကိုပ်ဒပ်ဂမၠိုၚ်တုဲ သဳကၠဳပ္ညဳပ္ညပ်တဴရ။ သၟိၚ်မျေန်စိုၚ် (မြၚ်စိုၚ်းမြို့စား) ၜိုန်မိက်ဂွံ ဆက်ဝေၚ်ပၞာန်ကီုလေဝ် အလဵုဇကု မၚ်ဂဳဆွာဂှ် ဒြဟတ်ဍိုန်ဒၟံၚ်ရ။ စဍုၚ်မံၚ်မလလေဝ် စဴဏောၚ်သ္ဂးတုဲ ဆုတ်ကၠေံဒပ် ဇရေၚ်ဍုၚ်ပြန်ရ။ ဆုတ်ကၠေံဒပ် ဇရေၚ်ဍုၚ်ပြန်တုဲ ခြာဟွံလအ် သဳကၠဳကုအမာတ် သ္ကိုပ်ပၞာန်တအ်တုဲ က္လေၚ်အာဇရေၚ်အၚ်ဝတေံပၠန်ရ။ ~~~~~~~~~~ "ဒပ်အၚ်ဝဟေၚ် ဆုတ်အာရ၊ စဍုၚ်ဝါန် ဟွံစိုပ်ကၠုၚ်ဏီဖိုဟ်။ ဍေံဟွံကၠုၚ်တဴဝွံ ပေၚ်အာၜါအလန်ရ။ အမူအဲလေဝ် သီုဟွံမွဲတဴကဵု အစောန်စရာဲ အလဵုဇကု ဘိက်ကော်တဴ သၟိၚ်အၚ်ဝ ပေၚ်အာၜါအလန်ရ။ ဗၟံက်ကဵု ပလိုတ် ၜါလ္ပာ်ဂှ် က္တဴဒၟံၚ်အိုတ်ရတှ်ေ ပိုဲတအ် သ္ဂောံမံၚ်တဴဒၟံၚ် ခိုဟ်ဟ်မိုဟ်ဟ် ဏီရဟာ" ကောံဓရီု ကၠောန်သ္ပတဴ ပၞာန်အၚ်ဝ ဂတးစဴအာတုဲဂှ်ရ။ တၠညးရာဇာဓိရာဇ်ဝွံ စဵုကဵုပၞောတ်ဒေါသ မတိတ်ဒၟံၚ် ဟွံသေၚ် ရမျာၚ်ကြံၚ်မ္ၚိုဟ်ဒၟံၚ်ဖိုဟ်ဏီရ။ ဟိုတ်နူကဵု ညးမက္တဵုသပုန် နူမုတ္တမ ၃၂ ဍုၚ်၊ ဖာသီ ၃၂ ဍုၚ်တုဲ ဓဝိၚ်ဟွံၜိုဟ်တဴရ။ ဟိုတ်ဂှ်ရလေဝ် ဒးကော်တဴ ကောံဓရီုရ။ ပ္ဍဲတမ်ဇိုၚ်တၠညးဝွံ အမာတ်ရာဇမနု၊ အမာတ်ဒိန်၊ အမာတ်ဇၞော် သၟိၚ်သာံပြာပ်၊ သၟိၚ်ရတ္တသံၚ်ရာံ၊ သၟိၚ်ယောဂရာဇ်၊ အာဲကံဗိန်တအ် မၞုံတဴရ။ "ဍုၚ်ဟံသာဝတဳဝွံ ပ္ဍဲအခိၚ်မနွံဒၟံၚ် ညံၚ်ရဴတၞံဆု အယာံမာတ်ကၟဝ် ဆမဂွံဟစတ်တိတ်ကၠုၚ်ဂှ် သီုဟွံလံၚ်စဝ်ဍာ်တုဲ၊ ချပ်တဴဒၟံၚ် သွက်ဂွံဝးပ္ကဝ် ဍိုတ်ကၠေံအိုတ်ရ။ ပ္ဍဲအခိၚ် ကောန်ဍုၚ်ကွာန်ဂမၠိုၚ် မသ္ပဒ္တဴဒၟံၚ် ဗွဲမၜိုဟ်သြိုဟ်ဂှ် ချပ်တဴဒၟံၚ်ဝေၚ်ပၞာန် သွက်ဖဵုဇကုအိုတ်ရ။ ဟိုတ်ဂှ်ရ သ္ဒးသောၚ်ကၠေံ ညးမက္တဵုသပုန်တအ်မှ ဂွံရောၚ်။ သောၚ်ကၠေံဟွံမာန်မ္ဂး အာဂတနူဏအ် ကြာန်ဂၠိုၚ်ကၠုၚ်ရောၚ်။ ဟိုတ်ဂှ်ရ လ္ပာ်ဗၟံက် ၃၂ ဍုၚ်ကဵု လ္ပာ်ပလိုတ် ၃၂ ဍုၚ်ဂှ် လ္ပာ်လဵုမွဲ သ္ဂောံဇက်အာကၠာဂှ်ရော" အမာတ်ဂမၠိုၚ်ဝွံ ဇဖန်ဂှ်သွဟ်ကဵု ဂလာန်သၟာန်တၠညး ဟွံမာန်အိုတ်တုဲ မၚ်ကာန်စဳတိတ်တုဲ ပ္တိုန်ထ္ၜးတဴရ။ "လ္ပာ်ဗၟံက် ၃၂ ဍုၚ်ဂှ် ဗ္တိုက်တဴကၠာ ထေက်ရအဴ။ စဍုၚ်မံၚ်မလဝွံ ၜိုန်ရဒြဟတ်ဇၞော်ကီုလေဝ် ရံၚ်ကဵုဒးကော်ဒၟံၚ် ပၞာန်အရီုဗၚ် နူကဵုအၚ်ဝ ဂၠိုၚ်ကဵုအလန်မ္ဂး ဍေံသၟး ဂွံဂံၚ်ပ္တဝ်မုက်ကဵု ပိုဲတအ် ဟွံသေၚ်ရအဴ။ ဟိုတ်ဂှ်ရ သၞလ္ပာ်စဍုၚ်မံၚ်မလဝွံ ဒှ်တဴသၞ ၜိုဟ်ဟ်ရအဴ။ စဍုၚ်မုတ္တမဝွံ ၜိုန်ဟွံဝေၚ်ပၞာန်ဏီကီုလေဝ် ယဝ်က္တဵုသပုန် ဍာံစၟတ်မ္ဂး စဍုၚ်ဝါန် သာံလှေက်ဝွံ ပံၚ်အာကဵု စဍုၚ်မုတ္တမ မာန်ရအဴ။ ဟိုတ်ဂှ်ရ နူကၠာသၞ ဒြဟတ် ဟွံဇၞော်ကၠုၚ်ဏီဂှ် ဒးတက်ပလီုကၠေံ ဗွဲကိုပ်ကၠာ ထေက်ရအဴ" "ဂလာန်မၚ်ကာန်စဳ မပ္တိုန်ထ္ၜးဂှ် ထေက်ကြိုက်သန်ရအဴ။ အခိၚ်ဏအ် ယဝ်ပိုဲဗ္တိုက်တဴ စဍုၚ်မံၚ်မလတှ်ေ နူစဍုၚ်မုတ္တမ ရီုဗၚ်ကၠုၚ်ပၞာန်မ္ဂး သွက်ပိုဲတအ် ဟွံၜိုဟ်သြိုဟ်တဴရအဴ။ ဆဂးဂှ် ယဝ်ဗ္တိုက်တဴ အလုံဂၠးမုတ္တမမ္ဂး စဍုၚ်မံၚ်မလဝွံ ဍေံသၟး ဟွံဂံၚ်ရီုဗၚ်ပၞာန်ရအဴ။ သၟိၚ်အၚ်ဝ မဆုတ်က္လေၚ်အာဂှ်လေဝ် ဇဖန်ဂှ် က္လေၚ်ဂတးကၠုၚ် ဟွံမာန်ရအဴ" ဂလာန်အမာတ်ဒိန် မပ္တိုန်ထ္ၜးဂှ် တၠညးဒးဂၞပ်တုဲ အီဒၟံၚ်ရ။ "ကှ်ေ သွက်ဂွံလၞီဗပိန်ကၠေံ ညးမက္တဵုသပုန် မၞုံပ္ဍဲမုတ္တမ ၃၂ ဍုၚ်ဂှ် ဇက်အာပၞာန်ရောၚ်။ အမာတ်သေနာပတိတအ် သီုဖအိုတ် ပဠေဝ်ပဠေတ်တဴ သွက်ဂွံတိတ်ပၞာန်အိုတ်ညိ။ ကောယဴအဲ ရာဇမနု သွက်ဂွံမၚ်မွဲဍုၚ်ဂှ် သှ်ေဒၟံၚ်အဏအ်ညိ" "အတိုၚ်အမိၚ် အသံရအဴ" သၟိၚ်ဖျေံအမိၚ်ယျဒှ်တုဲ အမာတ်ဂမၠိုၚ်အိုဿီု လ္ၚောဝ်မာစှ်ေအိုတ်ရ။ အမိၚ်တိတ်ပၞာန်တၠညးဝွံ ကောံဓရီု တုဲဒှ်အာဗက် အလုံဍုၚ်၊ နန်ထဝ်မွဲ ဗျာပ်တြးအာရ။ သရာဲပၞာန်ဂမၠိုၚ်လေဝ် သွက်ဂွံတိတ်ပၞာန်ဂှ် ဂၠာဲတဴဇွောံမအိုတ်ရ။ မပ္တံကဵု သ္ၚု၊ ၜဵု၊ ခရံက်၊ ဂဥုဲဇဗ၊ ကပေါတ်ဂမၠိုၚ် ကေုာံ စိုက်ဇွောံမ သွက်ဇကုမွဲဂှ်လေဝ်ကီု၊ နကဵုညးမပဠေဝ်တဴဒၟံၚ် စိၚ်၊ ချေံဂမၠိုၚ်၊ ညးမပဠေဝ်တဴဒၟံၚ် တ္ၚ၊ လဴးမၠိုၚ်ဂှ် ချဳဒရာၚ်ဒၟံၚ် ရုရုသံၚ်သံၚ်အိုတ်ရ။ အပ္ဍဲကဵု ဍုၚ်ဟံသာဝတဳဝွံ ဗြုမံၚ်လံၚ်ဆာၚ်တုဲ ညးမဘိက်ကော် ဂၠာဲတဴဒၟံၚ် ညးမဂၠေၚ်ဝန် ဇရေၚ်တၠညးဂမၠိုၚ်လေဝ် ဘိက်ကော်ဂၠာဲဒၟံၚ်အိုတ်ရ။ ဂွံမိၚ်ကေတ်ပရိုၚ် မတွံဂး ဇက်အာပၞာန် အလုံမွဲဂၠး လ္ပာ်ဗၟံက်ရောၚ်ဗက် မိကေသာမွဲ နမက္တဵုမွဲလ္စုတ်၊ ဂ္ဇအ်မွဲလ္စုတ်၊ ဒတူမွဲလ္စုတ် ဒးဒၟံၚ်ဓဝိၚ်သောက ပ္ဍဲကဵုခဒမ်ရ။ ဟိုတ်နူဟိုတ် မဇက်ပၞာန်တုဲ ညးမလကိုတ် ခတဝ်ခဝဝ်တဴ ၜိုတ်မိကေသာဂှ် ပ္ဍဲကဵုဍုၚ်ဗဂေါဝွံ ညးတၞဟ်သ္အာၚ် ဟွံမွဲရထေၚ်။ တၚ်ပ္တဝ်က္ဍိုပ် အဓိက ဟိုတ်မဇက်အာပၞာန်မွဲဂှ် ကော်ဘိက်လဝ် ပၞာန်အရီုဗၚ် စဍုၚ်ဝါန် သၟိၚ်သာံလှေက် မအံက်ဇကု ဟိုတ်နူဟွံကၠုၚ်တဴဂှ်ရ။ ဟိုတ်ဂှ်ရ ဂွံမိၚ်ကေတ်ပရိုၚ် ဇက်တိတ်ပၞာန်ရောၚ်ဗက်ဂှ် မိကေသာမွဲ ဂွိၚ်စံၚ်တူဒၟံၚ်ကဵု မအံက်ဇကု ဗွဲမလောန်ရ။ မအံက်ဇကုဝွံ သ္ဒးသီကၠေံဇာတ် နဒဒှ်ညးမက္တဵုသပုန်ဂှ် မိကေသာ ဟွံမိက်မိၚ်၊ ဟွံမိက်ဆဵုတဴရ။ မအံက်ဇကုဝွံ နဒဒှ် သရာဲသ္ဂံၚ် ညးမယိုက်ဝန် လ္တူတၠညးမွဲဂှ်ဟေၚ် မိက်ဂွံညာတ်တဴရ။ ၜိုန်ဂှ် မအံက်ဇကုဝွံ နူကဵုကေသာ ဍောတ်တ်တေံ သၟိၚ်တၠညးစိၚ်ဗ္တာၚ် ဟိုတ်နူဂွံဇၞးကေတ် ကောန်စဍုၚ်မုတ္တမ ဒပ်အာဲဗြၜုန်ဂှ် ကဵုတဴအရပ်စပ်သၟိၚ် မသုန်ပြကာတုဲ သ္ပပ္တံနူကဵုအခိၚ် မပ္တိုန်ကဵု နဒဒှ်ညးစဍုၚ်ဝါန်တုဲ ဟွံက္လေၚ်စဴကၠုၚ် ဇရေၚ်ဟံသာဝတဳရ။ ဇကုဂှ် အခါရတၠညးရာဇာဓိရာဇ် မခပ္တိုန်စ နကဵုတဆိပ်ဂၞကျာ်ဂှ်လေဝ် ဟွံကၠုၚ်၊ ကြဴတဲ သွက်ဂွံဗ္တိုက်ကဵု ပၞာန်အၚ်ဝ ဘိက်ကော်တဴဂှ် ဟွံစိုပ်ကၠုၚ်ရ။ မိကေသာဝွံ အဃောမကွာ်အာ ကွာ်ကၠုၚ်ဒၟံၚ် ပ္ဍဲကဵုခဒမ်ဂှ် ကြဴတဲက္လိဂွံအာ ကသပ်မွဲရ။ ဟိုတ်ဂှ်ရ ကေတ်ဏါပ္ကဴအံၚ်ရေၚ်ဂမၠိုၚ် ဇရေၚ်ခဒမ်တၠညး မသ္ပဒ္တဴတုဲ တိတ်ကၠုၚ်ရ။ ကါလစိုပ်အာ ဇရေၚ်ခဒမ်တၠညး မသ္ပဒ္တဴဂှ် တၠညးဝွံ သွက်ဂွံတိတ်ပၞာန် လတက်တဴဒၟံၚ် ပဠောံခြပ်ပၞာန် အရံၚ်သာ်ဆီစာၚ်တုဲ ညးပ္တုဲဝတ်ဂမၠိုၚ်ဂှ် ဘိုၚ်လတက်ကဵုဒၟံၚ်အိုတ်ရ။ ဂၞကျာ် မိနန်ကေသရာ စိုပ်ကၠုၚ်ရ ညးမလလောၚ်ပၟိၚ်ဂှ် လၟိၚ်တဴမ္ဂး တၠညးဝွံ နူကဵုမလတက်တဴ ပဠောံဂှ် ကဵုတဴအခေါၚ်လုပ်ရ။ မိကေသာလေဝ် လ္ၚောဝ်တၠညးတုဲ ပ္ကဴအံၚ်ရေၚ် ဍိက်သ္ကအ်းမၠိုၚ် မကေတ်နၚ်လဝ် နကဵုကလာပ်ထဝ်ဂှ် ဆက်ကွာဲတဴရ။ "ယွံတၠနန်ထဝ်၊ ပ္ကဴအံၚ်ရေၚ် သွက်ဂွံဇၞးပၞာန်ဂမၠိုၚ်ရအဴ" တၠညးဝွံ နူကဵုမလတက်ဒၟံၚ် ပဠောံဂှ် ဂတးကၠုၚ် လ္ပာ်မိကေသာတုဲ ကေတ်တဴ ပ္ကဴအံၚ်ရေၚ် မိကေသာ မဆက်ကွာဲနၚ်ဂှ် တဲၜါပ္ဍုန်လ္တူကၞေၚ် ဂတးဏါမုက် လ္ပာ်ကျာ်စေတဳမုဟ်တဴ မၞုံတေံတုဲ ကလအ်တဴရ။ တုဲဂှ် ပ္ကဴအံၚ်ရေၚ်ဂမၠိုၚ်ဂှ် က္လေၚ်ဒုၚ်ကဵု မိကေသာပၠန်ရ။ "သ္ပစၞးအဲတုဲ ဗှ်ေဟေၚ် အာသ္ပပူဇဴတဴ ပ္ကဴအံၚ်ရေၚ်ဂမၠိုၚ် ဇရေၚ်ကျာ်စေတဳ မုဟ်တဴတေံညိ" "ဒးရးသန်ရအဴ" တၠညးလေဝ် ဂတးအာ မွဲလ္ပာ်တေံတုဲ ဆက်လတက်ပတုဲဒၟံၚ် ပဠောံခြပ်ဂှ်ပၠန်ရ။ မိကေသာလေဝ် ကိစ္စမကၠုၚ်ဂှ် ဟွံဂံၚ်ဂရၚ်ပ္တီတၠညးတုဲ နူလက္ကရဴဟေၚ် ခါတ်အကာဲ ရံၚ်ဒၟံၚ်တၠညး ဗွဲမလအ်လရ။ "အဲဇက်အာပၞာန် လ္ပာ်ဗၟံက် ၃၂ ဍုၚ်ရောၚ်မိၚ်တုဲ ဗှ်ေလေဝ် ဂွိၚ်တဴဒၟံၚ် သွက်မအံက်ဗှ်ေရဒှ်...၊ မအံက်ဗှ်ေလေဝ် ဟွံကၠုၚ်ခစ ဇရေၚ်အဲဂှ် နူကဵုစတိုန်နန်တေံရဟီုဂှ် ဗှ်ေလေဝ်တီတဴရ။ ဟိုတ်ဂှ်ရ ဇက်အာပၞာန်ဂှ် အဲဟွံဗၠေတ်ပုဟ်ထေၚ်ရ မိကေသာ" တၠညးလေဝ် လတက်ပ္တုဲထောံ ပဠောံခြပ်တုဲ က္လေၚ်ဂတးကၠုၚ် လ္ပာ်မိကေသာရ။ မိကေသာဝွံ သွက်ဂွံဂရၚ်ပ္တီဂှ် အောပ်မာဇအ်သဝ်စှ်ေဒၟံၚ် ပ္ဍဲကဵုဗလးကၞီရ။ "ဍာံစၟတ်သန်ရအဴ၊ တၠညး ဟွံဗၠေတ်တဴရအဴ၊ မအံက်အဲဍိက်ဗြဴဟေၚ် သွက်သ္ဂောံကၠုၚ်စိုပ် ခစဇရေၚ်တမ်ဇိုၚ်တၠညးဂှ် ခၠန်တဴရအဴ...။ ဆဂးဂှ်လေဝ် နမစွံကရုဏာ လ္တူအဲဍိက်ဗြဴတုဲ လ္ပဂစိုတ်ကၠေံ မအံက်အဲဍိက်ဗြဴညိအဴ။ လမျီုမအံက်အဲဍိက်ဗြဴဂှ် ေလးကဵုညိအဴ" ပ္ဍဲခ္ဍောၚ်မတ် မိကေသာဝွံ ဍာ်ရမတ်ဂမၠိုၚ် ကောံကလောံကၠုၚ်တုဲ ရမျာၚ်လရိုအ် တိတ်ကၠုၚ်ဒၟံၚ်ညိညရ။ "အဲလေဝ် ဟွံမိက်ဒုၚ်ဆောံတဴ ညးမၞုံကဵုအစောန်စရာဲ ညံၚ်ရဴမအံက်ဗှ်ေရ။ ကဵုစတဴ ကၞောတ်ရးတုဲ မိက်ဂွံကဵု စဵုဒၞါတဴဍုၚ်ကီုရ..." တၠညးဝွံ ဒေါံကၠေံဂလာန်တုဲ နူကဵုမဂ္ဇအ်ဒၟံၚ် လ္တူဇံၚ်ခါတ်ဂှ် သ္ၚဳရံၚ်ဗဵုအာ လ္ပာ်ကၠအ်ပ္ကဴဥဒျာန်နန်တေံရ။ ပ္ကဴပ္ဍဲဥဒျန်နန်ဂမၠိုၚ် ဃောမခၟောံရာၚ်ကဴတဴ သီုကဵုစၟဟိုၚ်သာဲ၊ စၟဠေဝ်ဠော်ဂမၠိုၚ် မဂ္ၚေၚ်ပဝ်ဒၟံၚ်ရ။ "ကှ်ေ... က္တဵုညိ၊ ရန်ကဵုဂုဏ်ဗှ်ေ မယိုက်ဂၠေၚ်လဝ် လျိုၚ်ဝန်အဲတုဲ ဟိုတ်နူကဵုအဲ မအံက်ဗှ်ေ ဟွံကဵုချိုတ်ပုဟ် သေၚ်ဟာ၊ ဣဏအ်ဂှ် ဂတိပါၚ် အဲကဵုဗှ်ေမာန် သၠုၚ်အိုတ်ရ" မိကေသာဝွံ ဟိုတ်နူမိပ်မြဟ်လောန်တုဲ ထၞဟ်ဍာ်ရမတ်ဂမၠိုၚ် ပြဟ်ဒတုံစှ်ေအာရ။ ကၞေၚ်ဒဵုကဵုဒး ပ္ဍဲဗလးကၞဳ လ္ၚောဝ်ဒၟံၚ်တၠညး ဂၠိုၚ်ကဵုလ္တုန်ရ။ "ဂုဏ်ဇၞော်ပြဲ သၠဲလးလောန်ကွေံရအဴ၊ ဂုဏ်ဇၞော်ပြဲ သၠဲလးလောန်ကွေံရအဴ" တၠညးဝွံ သီုကဵုမရပ်ကေတ်ဇြၚ် တိတ်အာဖရေၚ် မ္ၚးခဒမ်နန်တေံရ။ မိကေသာ ညးမွဲဓဝ်ဟေၚ် ပၞၚ်တၠညးမဂ္ဇအ်ဂှ် စၟတ်ကေတ် နဒဒှ်တၠညးတုဲ သီုကဵုမနှဴရဴတဴကဵု ထၞဟ်ပာ်ရမတ်ဂမၠိုၚ် လ္ၚောဝ်တဴဒၟံၚ်ရ။ #သ္ဂံၚ် လအီမန် (သၟာပၠန်ဂတး အညတြ) ပ္ဍဲကဵု Telegram လေဝ် လုပ်ဗှ်တဴမာန်ရအဴ။ https://t.me/laaeimon #တၠညးရာဇာဓိရာဇ် #မၚ်ဂဳဆွာ #အၚ်ဝ - ဟံသာဝတဳ ပေါဲပၞာန်ပန်စှော်သၞာံ #လျးအရှိုဏ် ဟံသာဝတဳ သ္ကုတ်ဒုတိယ #The Light of Dawn, Hongsawatoi_Part2 Ep4