ခေတ်မဳဒဳယာပရိုၚ်(Social media)ဒဒှ်ပကတိဂကူမန်တ္ၚဲဏံ
ဒု-ဒ္ဂိုန် ၈ မံက်၊ ၁၃၈၈
ပိုဲတအ် ဂွံရပ်စပ်သုၚ်စောဲ မဳဒဳယာပရိုၚ်(Social media)ဗွဲမသၠဲလးကၠုၚ်တုဲ ဇၟာပ်မၞိဟ်ဂှ် ကေတ်အခေါၚ်အရာပရေၚ်ဂကူ၊ အခေါၚ်အရာပရေၚ်ဂကောံ၊ အခေါၚ်အရာပူဂဵုတုဲ ချူ ဟီု တက်ပတိုန် လိက်၊ ဗီု၊ ဗဳဒဳယော ဗီုညးဗီုညးအိုတ်ရ။
ကာလအကြာဏံတၚ်ဂွံခန်လ္ၚတ်မွဲဂှ် ပရောပရူမွဲမွဲ မံက်ပြာကတ်တိုန်စိုပ်ကၠုၚ်လတူမုက်လိက် ဒဳယာပရိုၚ်(Social media)တုဲ ဗီုပၟိက်စိုတ်ညး ညးဟီု၊ ဗီုညးကၠိုဟ်ညးဟီု၊ ဗီုညးမိက်ဂွံဒှ် ညးဟီု ဣဏံဂှ် သဘာဝပိုဲမၞိဟ်ပ္ဍဲလိုက်လောက တအ်ရ။
ပ္ဍဲကဵုပိုဲတအ် ဟီုဂး ထမံက်ပတိုန်လတူမုက်လိက် ဒဳယာပရိုၚ်(Social media)ဂှ် ပရောပရူဏံ ထေက်ကဵု မၞိဟ်ဂမၠိုၚ်တီ ထေက်နွံ၊ ထေက်ကဵုမၞိဟ်ဂမၠိုၚ်တီဟွံထေက်နွံရ။ ပရောပရူဏံ ဇီုကပိုက်ကၠုၚ်ကဵုဂုန်သိက္ခာဂကူ၊ ပရောပရူဂှ် ဇီုကပိုက် ကၠုၚ်ကဵုဂုန်သိက္ခာဂကောံ၊ ပရောပရူတေံ ဇီုကပိုက်ဒးဒၟံၚ်ကုဂုဏ်သိက္ခာပူဂဵုပရေၚ်မၞိဟ်ရောၚ် ယဝ်သဒှ်မ္ဂး ပ္ဍဲဝိုၚ်သဳကၠဳဂှ် ထေက်ကဵုဒးချပ်ဗ္စာရ။
မိက်ဂွံဟီုဂှ် ပ္ဍဲဂကောံမွဲမွဲကီုဒှ်၊ ပ္ဍဲဝိုၚ်သဳကၠဳမမိက်မွဲမွဲကီုဒှ် တၚ်သဳကၠဳ က္ဍိုပ်လိက်သဳကၠဳဂှ် မၞိဟ်ဂမၠိုၚ်တအ် ဒးတီထေက် တုဲ ဒးတြးလတူမုက်လိက် ဒဳယာပရိုၚ်(Social media) ထေက်ဟာ၊ သာ်ဂှ်ဟွံသေၚ် တၚ်သဳကၠဳ က္ဍိုပ်လိက်သဳကၠဳဂှ် မၞိဟ် ဂမၠိုၚ်(အလုံဖအိုတ်)တအ် တီဟွံထေက်၊ တြးလတူမုက်လိက် ဒဳယာပရိုၚ်(Social media)ဟွံထေက် ယဝ်ဒှ်မ္ဂး တၚ်သ္ဒး ပလေဝ်ပလေတ် ဝိုၚ်သဳကၠဳနွံတၟာဂလိုၚ်ရ။
ဥပမာ- ဝိုၚ်သဳကၠဳ က္ဍိုပ်လိက်သဳကၠဳဂှ် တြးပတိတ်မ္ၚးဟွံထေက်၊ မၞိဟ်မဂၠိုၚ်တအ်တီဟွံထေက် ယဝ်သဒှ်မ္ဂး ညးဖန်ဇန် ဝိုၚ်သဳကၠဳတအ် ဒးဖန်ဇန်ဝိုၚ်ကောံဓရီုဗွဲမဇိပ်ဂၠိပ်ထေက်ရ။ မၞိဟ်ဆက်စပ်တအ်ဟေၚ် တိုန်ကောံဓရီုထေက်၊ မပ္တံကဵု ဗီု ရုပ်၊ တၞးလိက်စၟတ်သမ္တီကောံဓရီု ဗဳဒဳယော စတမ် တၚ်ဂၞၚ်သဳကၠဳလဝ်အိုတ်သီုဂှ် အခိၚ်တြးပတိတ်မ္ၚးဟွံဂွံဏီမ္ဂး ဒးထိၚ် ဒဝ်နကဵုစေဝ်ပၞောန်နွံနွံထေက်ရ။
ရံၚ်ကဵုအကာဲအရာဒဒှ်ပကတိရုပ်ဂကူမန်ပိုဲတ္ၚဲဏံမ္ဂး မၞိဟ်လ္ၚဵုလ္ၚဵု တအ် ဆေၚ်စပ်ကဵု ဒဳယာပရိုၚ်(Social media) ဝွံတုဲ သၞောဝ်ဥပဒေဍုၚ်လေဝ် ဟွံကၠိုဟ်၊ ဝတ်တာလျိုၚ်ပရိုၚ် ဒဳယာပရိုၚ်(Social media)လေဝ်ဟွံတီ၊ ဒ္ဂေတ်ဝတ် ပရေၚ် မၞိဟ်လေဝ် ဟွံစွံၚုဟ်မးတုဲ ပရောပရူမွဲမွဲ တိုန်စိုပ်ကၠုၚ်လတူမုက်လိက် ဒဳယာပရိုၚ်(Social media)တုဲမ္ဂး ညးမွဲဗီု အဲမွဲ ပရော ဟီုဂးတဴဒၟံၚ်ညးသ္ကအ် ဗီုညးစှ်ေစိုတ် တံၚ်ဂြဲဒၟံၚ်ပၟိက်ဆန္ဒဇကုတုဲ ဟီုဂး ချူဆာဲ ထမံက်တိုန်စိုပ်ကၠုၚ်လတူ မုက် လိက် ဒဳယာပရိုၚ်(Social media)အိုတ်ရ။
ဂကူမန်ပိုဲဏံဂှ် ဂွံဆဵု ဂွံညာတ် ဂွံမိၚ်ကေတ် ဒဒှ်ကာလအကြာဏံတုဲ ဗီုမၞိဟ်လ္ၚဵုလ္ၚဵုတအ် ဟီုဂး ကၠောန်သ္ပဒၟံၚ် ဂွံမိၚ် ဂွံဆဵု ကေတ်ဒၟံၚ်ဂှ် ဟွံဒှ်ဒြဟတ်ဍာံဍာံ၊ ဂွံဒှ်ဂုန်ဖဵုဍာံဍာံ၊ ဂွံဆဵုရံၚ်ညာတ်အာ သာ်ဝွံတုဲ အဆံၚ်ဘဝဂကူပိုဲ ထေက်တန်ကဵု ဘဝဂကူဟွံမွဲကဵုဍုၚ် ကွေံ ကွေံရသွံဂှ် ဒးဒုၚ်တဲရ။
အနာဂတ်ဂတဏံ ဗော်၊ ဂကောံ ပ္ဍဲဍုၚ် မ္ၚးဍုၚ် ကဏ္ဍသွာၚ်နာနာ ကောံဓရီုသဳကၠဳပရောပရူမွဲမွဲမ္ဂး က္ဍိုပ်လိက်တၚ်သဳကၠဳ ဂှ် ထေက်ကဵု မၞိဟ်မဂၠိုၚ်တီဟာ၊ က္ဍိုပ်လိက်တၚ်သဳကၠဳဂှ် ထေက်ကဵုဒးထိၚ်ဒဝ်စဵုဒၞာ မပ္တံကဵု ဗီု၊ လိက်၊ ဗဳဒဳယော ညံၚ်ဟွံဂွံ ပြးစိုပ်မ္ၚးတုဲ ညံၚ်ဟွံဂွံပြးစိုပ်အာလတူ ဒဳယာပရိုၚ်(Social media)ဂှ် ညးဖန်ဇန် ပရေၚ်ကမၠောန်တအ် ထေက်ကဵုဒး စွံသတိဗွဲမဇြိုဟ်နက်ထေက်ရောၚ်ပတိုန်ထ္ၜးဏာရ။
ဗီု-ကောံဓရီုဇၞော်ပရေၚ်ဍုၚ်ကွာန်မန် ၁၃၇၉ သၞာံ(ခရေတ် ၂၀၁၈)