လျးအရှိုဏ် ဟံသာဝတဳ (သ္ကုတ်ဒုတိယ၊ ပိုဒ် - ၂ )

ဂၞကျာ်ပဳယရာဇာဒေဝဳဝွံ လံက်လေတ်တဴ ဒဵုကဵုကျေဝ် အိုတ်အစောန်တုဲ အာခစဒၟံၚ် ဇရေၚ်တၠညး ဟွံဂွံသ္ကုတ်ရ။ မုက်မတ် ဇိုၚ်တဲတအ်ဂှ်လေဝ် လံက်လေတ်တဴ စၠန်မြမောဝ်လၟိုန်တုဲ ဒဵုကဵုဗိုပြၚ် ၜတ်တကတ် ဂွံမံက်ဂတဝ် ပဠေဝ်ဒၟံၚ်လၟိုန်ရ။ ညးမစှ်ေစးတဴကဵု ပွသာ်ဂှ်တုန် ဂၞကျာ်တၠမေဒဴ မဒှ်ရ။ ဂၞကျာ်တၠမေဒဴဝွံ ဒှ်သမ္ဘာဍောတ်တုဲ ညးတၠကောန်လေဝ် ဒှ်ရ။ နုကဵုအခိၚ်တၠညး ခပ္တိုန်စကဵု ပဳယရာဇာဒေဝဳ ဂၞကျာ်ဇၞော်ဂှ် စိုတ်ၜေဲအာတုဲ ဂွံလုပ်ခစ ဇရေၚ်တၠညးဟီုဂှ် ဟွံမွဲတုဲ အဖဝ်ကောန်ဇကု ပ္ဍဲသ္ၚိနန်ဟေၚ် နွံတဴလေပ်ရ။ ဒှ်ဒၟံၚ်ညးတၠကောန်တုဲ ဂွံပဠေဝ်ပဠေတ်တဴ ညံၚ်ရဴဂၞကျာ် ပဳယရာဇာဒေဝဳဂှ်လေဝ် ဟွံမွဲတဴရ။ ဂၞကျာ်ဒလသုဒ္ဓမာယာဂှ်တှ်ေ ဒှ်ညးမၜိုဟ်သြိုဟ်တုဲ မံၚ်တဴဗွဲမယျဵုလ္ဂူရ။ မိကေသာမွဲ ၜိုန်ဒှ်ဂၞကျာ်ကီုလေဝ် ကၠောန်ၜိုတ်ပ္တုဲဒၟံၚ်ဝတ် ဇရေၚ်နာဲဗြဴဇကု ဂၞကျာ်တၠမေဒဴ ဟွံသ္ကုတဴရ။ လၟိုန်အခိၚ်အခါ မၞုံတဴဒၟံၚ် ဇရေၚ်ဂၞကျာ်တၠမေဒဴ လေပ်ရ။ လၟုဟ်လေဝ် ဂၞကျာ်ဒလသုဒ္ဓမာယာ မိက်ဂွံအာဇရေၚ် ဂၞကျာ်တၠမေဒဴ သာ်ဝွံသ္ဂးတုဲ ညးၜါ ကေုာံ ဍိက်သ္ကအ်ဂမၠိုၚ် တိတ်ကၠုၚ်ဇရေၚ် ဂၞကျာ်တၠမေဒဴရ။ ပ္ဍံဂၠံၚ်ဝွံ သိုဟွံထေၚ်လဝ်မွဲသာ် ဆဵုဂဗအာကဵု ဂၞကျာ်ဇၞော် ပဳယရာဇာဒေဝဳတုဲ ဆုဲပါဲကၠေံဗ္ဒါဲဂၠံၚ် သ္ပတဴဂါရဝအိုတ်ရ။ "အဝ် ဒေံဗြဴတအ်ဏောၚ်ဟာ၊ အလဵုမပြာပ်အာရောၝာဲ" သၟာန်ဂၞကျာ် ပဳယရာဇာဒေဝဳဂှ် မိကေသာ ဟွံသွဟ်တုဲ ဂၞကျာ်ဒလသုဒ္ဓမာယာ ဒးသွဟ်တဴရ။ "အာဇရေၚ် ဂၞကျာ်တၠမေဒဴရအဴ ဣၝဲ၊ ဣၝဲရော ဗက်အာကီုဟာ..." "အဝ်... ဒေံဗြဴအဲ သုဒ္ဓမာယာ စိုပ်ဂွံပ္ဍဲဝၚ်နန် ဟွံလအ်ဏီတုဲ ဟွဴတီတဴ အခိုက်ကၞာ ပြဝေဏီနန်ထဝ်ဏီရသွံ။ သဘဴဂၞကျာ်ဇၞော် ဒးအာဆဵုကဵု ဂၞကျာ်ဍောတ် ဟွံမွဲပုဟ်ၝာဲ၊ ဂၞကျာ်ဍောတ်ဟေၚ် ဒးကၠုၚ်ခစ ဂၞကျာ်ဇၞော်ရ" မိကေသာ မိၚ်ဂလာန်ဂၞကျာ် ပဳယရာဇာဒေဝဳ ဟိုတ်နူမသ္ဂးတဴကဵု နာဲဗြဴဇကု ဂၞကျာ်ဍောတ်တုဲ ဒေါသတိတ်ဒၟံၚ်ရ။ "ဟေံ နန်ကေသရာ...၊ ဗှ်ေမံၚ်လဝ် ပ္ဍဲကဵုနန်ဏအ်လအ်တုဲ ဗှ်ေတီရဒှ်၊ ဟီုကဵုနာဲဗြဴဗှ်ေတအ်ညိကီု၊ ကဵုဂၞကျာ်ဇၞော်လေဝ် ဟွံကၠုၚ်သ္ပ ဂါရဝ၊ ဟွံကၠုၚ်ခစ၊ ဟွံတီတဴ ပြဝေဏီနန်ဟာၝာဲ" မိကေသာလေဝ် မုဟွံက္လေၚ်သွဟ် ဂစိုၚ်က္ဍိုပ်တုဲ မံၚ်တဴရ။ ဟိုတ်နူကဵုဂလာန် ဂၞကျာ်ပဳယရာဇာဒေဝဳ မထ္ပက်နၚ်ဂှ် ဂၞကျာ်ဒလသုဒ္ဓမာယာ ညှာစိုတ်ကဵု မိကေသာတုဲ မုက်မတ်ဟွံခိုဟ် ဒှ်အာရ။ "ကှ်ေဟဂှ်တှ်ေလေဝ် ဒေံဗြဴတအ်လေဝ် အာအိုတ်ညိ၊ ဣၝဲလေဝ် ဒးအာဇရေၚ် ကောဍေံဏောၚ်" ဂၞကျာ်ပဳယရာဇာဒေဝဳဝွံ ဟီုဂလာန်တုဲဗက် တိတ်အာရ။ ကါလဂၞကျာ်ဇၞော် ကေုာံ ပိက်သ္ကအ်ဂမၠိုၚ် လောန်အာအိုတ်တုဲမှ မိကေသာကဵု ဂၞကျာ်ဒလသုဒ္ဓမာယာတအ်လေဝ် ဆက်အာတဴဇရေၚ် ဂၞကျာ်တၠမေဒဴအိုတ်ရ။ ခဒမ်ဂၞကျာ်တၠမေဒဴဝွံ ၜိုန်ရဍိုက်ပေၚ်တဴကဵု ပိုန်ဘိုက်ဂၞကျာ်မွဲကီုလေဝ် ဗွဲတၟေၚ် ဟိုတ်နူဟွံဂွံ ပဠေဝ်ပဠေတ်လဝ်တုဲ ဒှ်ဒၟံၚ်ညံၚ်ရဴ ခဒမ်နန် သာမညမွဲရ။ ဂၞကျာ်တၠမေဒဴ မၞုံပ္ဍဲခဒမ်ဂှ်လေဝ် ဟွံဂွံကျိုၚ်ပယျေဝ်လဝ် လ္တူနူကဵုသာမည၊ နကဵုကျေဝ်ပကတိဟေၚ် အတိုၚ်မၞုံဂှ် သပ္ပါဲဆာဲဒၟံၚ်ရ။ ဂၞကျာ်ပဳယရာဇာဒေဝဳဝွံ ကျေဝ်တဴ ဟိုတ်နူကဵု ကျိုၚ်ကျဝ်မာန်တုဲ ဂၞကျာ်တၠမေဒဴဝွံ ကျေဝ်သပ္ပါဲဆာဲ ဗွဲပကတိရ။ ဂၞကျာ်တၠမေဒဴဝွံ ညာတ်ဒးဂၞကျာ် ၜါတၠဂှ်ကၠုၚ်မ္ဂး လးကဵုဒၞာဲမံၚ်ဂ္ဇအ်တုဲ ဒုၚ်တၠုၚ်တဴကၟုဲရ။ "ယွံဒေံဗြဴတအ် ကၠုၚ်ညိ၊ ဂ္ဇအ်အိုတ်ညိ" ဂၞကျာ်တၠမေဒဴဝွံ သီုမလးတဴ သ္ကဝ်ယာတ်ခေါဇာ ဖအောဝ်ကဵု ဍိက်ဗြဴဂမၠိုၚ် ကေတ်နၚ် သတ်ဆုသတ်ဒုန်၊ ကွာၚ်ဂမၠိုၚ်တုဲ ဒုၚ်ကၟုဲရ။ "ဟွံဒးကေတ်ရ ဣၝဲ" "အဝ် ဟွံသေၚ်ရ၊ ဣၝဲ ဒှ်ညးတၠသ္ၚိမွဲဗိုန်န် ဝတ်ကၟုဲဒးပြေကီုရဒှ်" ဂၞကျာ်တၠမေဒဴဝွံ ဒဵုကဵုဂၞကျာ် ဒလသုဒ္ဓမာယာ ဗဒေါံဟွံဂွံ ပဠေဝ်ပဠေတ်ဒၟံၚ် စၞစဂမၠိုၚ်ရ။ ဂၞကျာ်ဒလသုဒ္ဓမာယာမွံ ဂၞကျာ်တၠမေဒဴဝွံ သီုဟွံမွဲတဴကဵု ဗုဗုအးအး လ္တူဇကု က္ဍုဟ်မၠေံဒၟံၚ်ဏောၚ် သာ်ဝွံ မထေၚ်လဝ်ဂှ် လၟုဟ်ဏအ် လညာတ်ကဵု အထေၚ် တၞဟ်ခြာတဴရ။ "နာဲဗြဴယျေ ဂၞကျာ်သုဒ္ဓမာယာဝွံ သွက်ဂွံပလံၚ်နၚ်ကဵု ဇရေၚ်နာဲဗြဴဂှ် ဟီုဒၟံၚ်ဂၠိုၚ်လောန်တုဲ ကော်နၚ်ကဵုကၠုၚ်ရ" "မိကေသာယျေ ဗှ်ေလေဝ် ဒှ်ဒၟံၚ်ဂၞကျာ်ကီုယျတှ်ေ လ္ပကော်ဒၟံၚ်အဲ နာဲဗြဴရဂှ်ၝာဲ ဟီုလေဝ် ဟွံဂွံပုဟ်" ဂၞကျာ်တၠမေဒဴ ကရောတ်ဂဒုန်ဒၟံၚ်ဂှ် မိကေသာ ဒးဂၞပ်တုဲ ဂအီတဴဒၟံၚ်ရ။ "နာဣဏအ် ပရၚ်စၟဳစၟိန်ဂမၠိုၚ် ကေတ်နၚ်လဝ် သွက်ဣၝဲဂှ် ဒုၚ်တဲညိ ဣၝဲ" "အဝ် သုဒ္ဓမာယာယျေ၊ ဒုၚ်ဒဒိုက်ၝာဲ သွက်ဣၝဲ ဟွံဒးဂွိၚ်ပုဟ်" ဍိက်ဗြဴ ဂၞကျာ်သုဒ္ဓမာယာဂမၠိုၚ် ယာတ်လးကတ္တဳဗါ၊ ယာတ်ပဠောံ ကေုာံ ယာတ်တၞဟ်ဂမၠိုၚ် စွံလဝ်လ္တူကြာပ်တုဲ ကေတ်နၚ်ဒုၚ်ကဵု ဂၞကျာ်ဇကုရ။ ဂၞကျာ်သုဒ္ဓမာယာဝွံ ဗွဲမရှ်ေသှ်ေ ဒုၚ်ကဵုဂၞကျာ်တၠမေဒဴတုဲ ဂၞကျာ်တၠမေဒဴလေဝ် ပါဲဓလေတ်ဟွဴဗၠး ဒးဒုၚ်ထောံတဲရ။ "ဣၝဲဂှ် ဆီဝၚ်နန်ဟီုတှ်ေ နကဵုအလံၚ် ဟွံမွဲတဴ ဗုဗုအးအး လ္တူဒေံဗြဴတအ်ပုဟ် ထေၚ်လဝ်ရ။ တုဲပၠန် ဒေံဗြဴဏအ် ဟိုတ်နူမဒှ်ဒၟံၚ် တၠညးမကပှ် ကေတ်လဝ်တုဲ ဣၝဲဍုက်ကေဝ်တဴရောၚ် ဟွံထေၚ်လဝ်ရ။ လၟုဟ်ဏအ် အထေၚ်ဒေံဗြဴတအ် ဗၠေတ်အာရ" "အဝ်... ဒေံဗြဴယျေ ဆီဝၚ်နန်လေဝ် မၞိဟ်ကီုရ၊ မုသက်ဂွံဒးစွံ မာနနွံရော။ တြုံမွဲခိုဟ် သမ္ဘာလ္ၚီ ဗီုဂလာန်မန်လေဝ် နွံတဴရ။ သၟိၚ်ဝွံ သမ္ဘာဂၠိုၚ်တဴဂှ်တှ်ေ ဣၝဲလေဝ် ကၠိုဟ်ဒၟံၚ်ရ။ ဆဂး တေ ဗြဴသွံကၠေၚ်ဂှ်တှ်ေ အခိုက်ပြဝေဏီ နန်လေဝ်ဟွံတီ ရိုၚ်ဇိုၚ်တဴ ဗွဲမလောန်ရ" ဟိုတ်နူကဵုဂလာန် ဂၞကျာ်တၠမေဒဴတုဲ မိကေသာကဵု ဂၞကျာ်သုဒ္ဓမာယာတအ် ညးမွဲကုမွဲ ရံၚ်တဴမုက် ညးသ္ကအ်အိုတ်ရ။ သီုညးၜါ အရာမဟီုဂှ် ကၠိုဟ်တဴအိုတ်ရ။ ပ္ဍဲလ္အိတ်ဂလာန် ဂၞကျာ်တၠမေဒဴဝွံ ဒှ်မံၚ်မုက်မတ်ကြံၚ်ကြံၚ် ရမျာၚ်မ္ၚိုဟ်မ္ၚိုဟ်ရ။ ပ္ဍဲအကြာ ဂၞကျာ်ၜါဝွံ ပရေၚ်မပြိုၚ်ပ္ကာန် ညးမွဲသ္အာၚ် ဟွံတီဂမၠိုၚ် မၞုံတဴဗွဲမဍာံစၟတ်ရ။ သာ်လဵုမွဲ မဟီုဟီု သ္ပပ္တံနူကဵု အခိၚ်ဂှ်တုဲ ဂၞကျာ်သုဒ္ဓမာယာ ကေုာံ ဂၞကျာ်တၠမေဒဴ၊ မိကေသာတအ် ဍုက်ကေဝ်အာရ။ ဂၞကျာ်သုဒ္ဓမာယာလေဝ် ညံၚ်ရဴမိကေသာကီု ဟွံလအ်ဟွံလအ် ကၠုၚ်စိုပ်ဇရေၚ် ဂၞကျာ်တၠမေဒဴလေပ်ရ။ စိုပ်ကၠုၚ်မ္ဂးလေဝ် ကပေါတ်စၟဳစၟိန် အောန်အိုတ် မွဲမွဲသာ် ပါကၠုၚ်ဒၟံၚ်လၟိုန်ရ။ ဂၞကျာ်ဒလသုဒ္ဓမာယာဝွံ သ္ပပ္တံနူကဵု စိုပ်ဝၚ်နန်တုဲ ပ္ဍဲပြဒ္ဒညာ ပရေၚ်ယှုက်တုဲ ပ္ဍဲဝၚ်နန်ဂမၠိုၚ်ဂှ် သီုဟွံပါ ဓလေတ်ပါဲဒၟံၚ်ဟေၚ် ဂၠိုၚ်ရ။ ဟိုတ်ဂှ်ရလေဝ် ဟွံဒှ်ကယျာန်ဓဝါတ်ကဵု မၞိဟ်ပ္ဍဲဝၚ်နန်ဂမၠိုၚ်ရ။ တၠညးလေဝ် သ္ဍိုက်ဆာန်တဴ ဂၞကျာ်ဒလသုဒ္ဓမာယာရ။ ~~~~~~~~~~ "ယွံဂၞကျာ်ဇၞော်၊ သွက်ဂွံတိုန်နန်ဂှ် ဗ္တိုက်ဖ္အောဝ်တဴ ကောန်သၟိၚ်ညိအဴ။ လၟုဘ်ဟီုမ္ဂး သ္ပလဝ်မဟာမိတ်ကဵု ဍုၚ်အၚ်ဝဂှ်လေဝ် လီုအာယျ။ အာဂတဏအ်မ္ဂး လ္တူနူဏအ် သာတုဲ ဒးဒှ်ကၠုၚ်ပၞာန် မာန်ရောၚ်အဴ။ ညးဟွံဒးစိုတ်တဴ ဗညာနဲဂမၠိုၚ်လေဝ် သွက်ဂွံကဵု ကောန်သၟိၚ် တိုန်နန်ဂှ် ကၠုၚ်ဟီုဒၟံၚ်ကုအဲဍိက် ဂၠိုၚ်လောန်ရအဴ" ပ္ဍဲဂတမုက် ဂၞကျာ်ရာဇာဒေဝဳ မဒှ်ဂၞကျာ်ဇၞော် တၠညးစိၚ်ဗ္တာၚ် သၟိၚ်ဗညာဥူဝွံ အမာတ်ဇၞော် သၟိၚ်ဇိပ်ပန် မဒှ်အမာတ်ဇၞော် တၠညးစိၚ်ဗ္တာၚ်ဂှ် သီုကဵုမထံက်က္ၜံၚ် ခစဒၟံၚ်တုဲ ပ္တိုန်ထ္ၜးဒၟံၚ်ရ။ အမာတ်ဇၞော် သၟိၚ်ဇိပ်ပန်ဝွံ နူအခိၚ်သၟိၚ်မရူ မၞုံတေံဂှ် ဒှ်ညးမခစဒၟံၚ် ဇရေၚ်မဟာဒေဝဳ ဟွံဂွံသ္ကုတ်ရ။ ပ္ဍဲအခိၚ်တၠညးမဒှ်ဘဝ ကောန်သၟိၚ်ဗညာနဲတေံ ဒှ်ဗဗၞး ညးမကဵုအခါ သွက်ဂွံဗ္တိုက်တဴလ္ဂုၚ် မွဲတၠကီုရ။ နူကၠာတၠညး ဟွံဂွံတိုန်နန်က္ဍၚ်ဏီ တီဒဒှ်သၟိၚ်မရူ ဒးကျဗြမ်မှ ဟိုတ်နူကဵု မတိတ်ဒုၚ်တၠုၚ်တဴ တၠညးတုဲ ဂွံဗၠးကၠုၚ် နူဘဲလမျီုရ။ ဂၞကျာ်ဇၞော် ရာဇာဒေဝဳ မသ္ပဒ္တဴသ္ၚိနန်သၟဝ်ကီုလေဝ် ဂလာန်အမာတ်ဇၞော် မပ္တိုန်ထ္ၜးဂှ် ချပ်ဒၟံၚ်ဇြိုဟ်ဟ်နက်က်ရ။ ကောန်သၟိၚ်ဘဝ်ၚာၚ်မုၚ်ကီုလေဝ် သီုကဵုမဂတးလဝ်မုက် နကဵုမုက်မတ် ဟွံယးတၟး ဂ္ဇအ်ဒၟံၚ် ပ္ဍဲဗ္ဒာဲဂှ်ရ။ ဂၞကျာ်ဇၞော် ရာဇာဒေဝဳ မဒှ်ကၠုၚ်လဝ် ဂၞကျာ်ဇၞော် တၠညးစိၚ်ဗ္တာၚ်ဝွံ ပ္ဍဲလက်ထက် တၠညးရာဇာဓိရာဇ်ဏအ် ၜိုန်ရဒးမံၚ်ဒၟံၚ် သ္ၚိနန်သၟဝ်ကီုလေဝ် က္လိဂွံတဴဍိက်သ္ကအ် ပိုန်ဘိုက်ဂမၠိုၚ် ဗွဲမထေက်ကြိုက်ရ။ ၜိုန်ရမုက်မတ် ဟွံယးတၟး ၜိုတ်မိခဝီု တၠညးရာဇာဓိရာဇ် ဂၞကျာ်ၝောံအာဲလဴကီုလေဝ် ကောန်ဝုတ်ကီု သီုကောန်ခမာန် ဒးချိုတ်အာ ညံၚ်ရဴဂၞကျာ်ၝောံဇိပ် ယုတ်ယုတ်ဒေက်ဒေက် ဟွံသေၚ်ရ။ ပါဲနူဂှ် ကောန်ဇကု ကောန်သၟိၚ်ဘဝ်ၚာၚ်မုၚ်ဂှ် တၠညးတၚ်ကဵုယၟုတဆိပ် မတွံဂး ဗညာဒုက်တုဲ ဟိုတ်မစွံလဝ်ကဵု ကဆံၚ်ဟွံလီု ပ္ဍဲသ္ၚိနန်သၟဝ်ကီုလေဝ် ဂွံသ္ပဒ္တဴအာ ၜိုဟ်ဟ်သြိုဟ်ဟ်ရ။ ပ္ဍဲမွဲလ္ပာ်ဂှ်ပၠန်လေဝ် ဒဵုကဵုတၠညး ရာဇာဓိရာဇ် မတိုန်နန် နူကဵုလက်ထက် တၠညးစိၚ်ဗ္တာၚ် ကောန်သၟိၚ်ဘဝ်ၚာၚ်မုၚ်ဂှ် ညးမသ္ဍိုက်ဆာန်ဂမၠိုၚ်လေဝ် က္လေၚ်နွံတဴဒၟံၚ်ပၠန်ရ။ မဖှ်သာ်ဝွံ တၠညးစိၚ်ဗ္တာၚ် က္လိလောန်စဴအာတုဲ ဒဵုကဵုတၠညးမတိုန်နန် တၠညးကြံၚ်မ္ၚိုဟ်ဂှ် ဓဇန်တဴရသ္ဂးတုဲ ဟွံဒးဂၞပ်အိုတ်ရ။ အခါလၟုဟ် အၚ်ဝကဵု ဟံသာဝတဳ က္တဵုဒှ်ပၞာန်ဂှ် ဒှ်အာညံၚ်ရဴ ဒၞာဲပၟတ်ဂဵု ကျာမပိုက်လွိၚ်ရ။ "ပရေၚ်ဗှ်ေ မပ္တိုန်ထ္ၜးဂှ် ထေက်ကြိုက်တဴရ။ ဍောတ်အပသုံဝွံ နူကဵုဍောတ်တ်တေံ မၞိဟ်ကြံကြ စိုတ်ကြာန် တၠညးမက္လိလောန်အာ ဟွံမွဲတဴပၟိက်ဂှ် သၟိၚ်ဇိပ်ဗြာဲတအ် ဟွံက္လၚ်တုဲ ခပ္တိုန်ကဵုနန်ထဝ်ရ။ အဲလေဝ် ဟွံဒးဂၞပ်ပုဟ်၊ သွက်ပရေၚ်တိုန်နန်ဂှ် ဍာံဒၟံၚ်ရ၊ ဒြဟတ်ပၞာန်ဂှ် က္လိဂွံနူလဵုရော၊ ကသပ်ဗှ်ေ နွံဒၟံၚ်ကီုဟာ" အမာတ်ဇၞော် မထံက်က္ၜံၚ် ပ္တိုန်ထ္ၜးဒၟံၚ်ဂှ် မုက်မတ်ယးတၟးအာရ။ "နွံဒၟံၚ်ရအဴ၊ စဍုၚ်မံၚ်မလ သၟိၚ်လိုက်ဖြာဝွံ နကဵုကောန်၊ ကောန်ခမာန်ဂမၠိုၚ် ဒြဟတ်ပၞာန် ဇၞော်မောဝ်တဴ ဗွဲမလောန်ရ။ စဍုၚ်မံၚ်မလလေဝ် ဟွံမွဲပၟိက်ကဵု ကောန်သၟိၚ်ဗညာနဲ ဗ္စိုပ်လိက်သဝဏ်ကဵု သၟိၚ်အၚ်ဝတုဲ သွက်ဂွံဇက်ကၠုၚ်ပၞာန် ကဵုဗ္တိုက်တဴဂှ် ဂွံမိၚ်လဝ်ရအဴ။ ဟိုတ်ဂှ်ရ ဘိက်ကော်နၚ် သၟိၚ်စဍုၚ်မံၚ်မလမ္ဂး ဂွံမာန်ရအဴ။ အဃောတၠညးစိၚ်ဗ္တာၚ် မယဲဒၟံၚ်ဂှ် မဟာဒေဝဳကဵု စဍုၚ်မံၚ်မလတအ် တၠညးစိၚ်ဗ္တာၚ် ဟွံမွဲမ္ဂး သွက်ဂွံပ္အပ်ကဵု ရာဇာသမ္ပတ္တိကု စဍုၚ်မံၚ်မလဂှ် ကေၚ်ကဵုလဝ် ဂတိပါၚ်ရအဴ။ ဂတိပါၚ်ဂှ် မဟာဒေဝဳ ဖံက်ပလီုတုဲ ချပ်တဴသွက်ဂွံပ္အပ်ကဵု သၟိၚ်မရူ နန်ထဝ်ဂှ်ရ သၟိၚ်စဍုၚ်မံၚ်မလဝွံ သီုဟွံရီုဗၚ်တဴပၞာန် လ္ပာ်မဟာဒေဝဳ က္လေၚ်ဂတးစဴအာရအဴ။ ဟိုတ်ဂှ်ရ သ္ပပြယာဲတုဲ ကော်ဘိက်နၚ် သၟိၚ်စဍုၚ်မံၚ်မလညိ။ ဂၞကျာ်ဇၞော် ကော်ဘိက်မ္ဂး စဍုၚ်မံၚ်မလ မံၚ်ဟွံဂွံ သ္ဒးကၠုၚ်ရောၚ်အဴ။ အဲဍိက်ဝွံ နူအခိၚ်တေံဂှ် ဟိုတ်နူမၞုံဒၟံၚ် ပ္ဍဲဂတမုက် ကောယဴအဲဍိက် သၟိၚ်ဇိပ်ဗြာဲတုဲ ဟွံဂံၚ်သ္ဂးတဴရအဴ။ လၟုဟ်တှ်ေ ကောယဴအဲဍိက်လေဝ် ဗျုအာယျဒှ်တုဲ အဲဍိက်ဂံၚ်ဟီုသ္ဂးတဴရအဴ။ သၟိၚ်ဨကရာဇ် မသ္ပတဴကဵု ဍုၚ်ကွာန်ၜိုဟ်သြိုဟ်ဂှ်ဟေၚ် မၞုံပၟိက်တဴရအဴ" ဂလာန်အမာတ်ဇၞော် သၟိၚ်ဇိပ်ပန်ဂှ် ဂၞကျာ်ဇၞော်လေဝ် ဒးဂၞပ်တုဲ ဂအီတဴဒၟံၚ်ရ။ "ဗှ်ေတအ်တုပ်စိုတ်ဂှ် ဍာံဒၟံၚ်ရ၊ စိုတ်ကောန်ဗၠာဲရော သာ်လဵုမနွံတဴဂှ်ရော" "ဒေါံရ မိယျေ၊ ပရေၚ်မိတအ် မချပ်သဳကၠဳဒၟံၚ်ဂမၠိုၚ်ဂှ် ကောယဴတီမ္ဂး မိတအ် ဒးဒုၚ်ဒှ်တဴပၞောတ်ရောၚ်။ လၟုဟ်လေဝ် ညးစွံလဝ် နကဵုကဆံၚ်အလံၚ် ဟွံကဵုလီုလာ်ရတှ်ေ၊ မုသက်လောဘ သ္ဂောံဒးဇၞော်ဏီရော၊ အဲတှ်ေ ဟွံပါတဴ ပ္ဍဲပရေၚ်မိတအ် မသ္ပတဴသပုန်ဂှ်ရ" ကောန်သၟိၚ်ဘဝ်ၚာၚ်မုၚ်ဝွံ ဂတးကၠေံမွဲလ္ပာ်နူဒၞာဲဂှ် ဟိုတ်နူဟွံဒးစိုတ်တဴ ကသပ်မိတအ်ဂှ် ဟီုကေတ်ဗွဲမသ္ကာတ်တုဲ က္တဵုတိတ်အာ နူကဵုဒၞာဲဂှ်ရ။ "ဟာ... ကောန်ၚာ်ဏအ်မွဲ၊ လာပ်သ္ကာလေဝ် ဟွံညာတ်တဴရ" "လ္ပဂွိၚ်တဴညိအဴ၊ ပိုဲဍိက်တအ် စဳရေၚ်ပြုပြေၚ်တဴ တုဲဒှ်အာ အရာအိုဿီုမှ ပ္အပ်တဴနန်ကု ကောန်သၟိၚ်မ္ဂး ကောန်သၟိၚ်လေဝ် သ္ဒးဒုၚ်တဲရအဴ" ဂၞကျာ်ဇၞော်ဝွံ ဗဵုရံၚ်အာ ပွကောန်ဇကုတုဲ နမဟွံက္လိဂွံတဴဒြဟတ် ဒးကပိုက်ဖျေံဒၟံၚ် ယဝီုရ။ အမာတ်ဇၞော်လေဝ် ညံၚ်ဂၞကျာ်ဇၞော် သ္ဂောံဒးတဴဂၞပ်ဂှ် ပ္တိုန်ထ္ၜးဒၟံၚ် ဗွဲမစုၚ်လေၚ်ရ။ "အေၝာဲ၊ ပိုဲတအ်ရ သ္ဒးစဳရေၚ်တဴကဵု ညံၚ်သ္ဂောံခိုဟ်ရဒှ်၊ သွက်သ္ဂောံဖျေံထောံနန်ကဵု အပသုံဟီုမ္ဂး ဒးသောၚ်ကၠေံ အမာတ်ရာဇာမနု အ္စာလောကဳဂှ်မာန်မှ ဂွံတဴရောၚ်..." "ဇြၚ်ကဵု ဇြၚ်၊ ဗၞုဟ်ကဵု ဗၞုဟ် သ္ဒးပြိုၚ်ပ္ကာန်ရောၚ်အဴ၊ အ္စာလောကဳကဵု အ္စာလောကဳ သ္ဒးပြိုၚ်ပ္ကာန်တုဲသောၚ်မ္ဂး ဂွံတဴရောၚ်။ ပ္ဍဲဇရေၚ်အဲဍိက် အ္စာလောကဳခိုဟ် နွံတဴရအဴ" ဂၞကျာ်ဇၞော် ရာဇာဒေဝဳလေဝ် အရာအမာတ်ဇၞော် မပ္တိုန်ထ္ၜးဂှ် ဗွဲမဒးဂၞပ် ဂအီဒၟဴၚ်ရ။ အမာတ်ဇၞော်လေဝ် ကသပ်ဇကုဂှ် ဟိုတ်နူကဵုဂၞကျာ်ဇၞော် ဒုၚ်တဲတုပ်စိုတ်တုဲ ဂွံဒၟံၚ်ဒြဟတ် တရိုပ်ကဵုစိုတ်ရ။ ~~~~~~~~~~~~~~ အပ္ဍဲခဒမ်ကောဴဓရီု တၠညးရာဇာဓိရာဇ်ဝွံ အမာတ်သ္ကိုပ်ပၞာန်ဂမၠိုၚ် ကောံစိုပ်ဒၟံၚ်အိုတ်ရ။ သီုကဵု စဍုၚ်မုဟ်ဗဳ အာဲကံဗိန်၊ စဍုၚ်သြေၚ် အမာတ်ဒိန် ကေုာံ စဍုၚ်ဒဵုကြေဝ် သၟိၚ်သာံပြာပ်တအ် ပ္ဍဲကဵုပေါဲပၞာန်အၚ်ဝတုဲဂှ် စိုပ်ဒၟံၚ်ဇရေၚ် ဍုၚ်ဟံသာဝတဳအိုတ်ရ။ သၟိၚ်အာဲဗြဲ မဒှ်အမာတ်ဇၞော် သၟိၚ်ဇိပ်ဗြာဲ၊ အမာတ်ဇၞော် မဟာသာမန်၊ အ္စာမပိုၚ် မဒှ်သၟိၚ်သၚ်္ကြာန်၊ သၟိၚ်တိဿကုမ္မာ၊ သၟိၚ်ယောဂရာဇ်၊ သၟိၚ်ရတ္တသံၚ်ရာံတအ်လေဝ် စိုပ်ဒၟံၚ်ကီုရ။ ပ္ဍဲဗ္ဒာဲဂှ် မသိုက်မဒှ် အမာတ်ရာဖာမနုလေဝ် နွံတဴရ။ မာံဇြဲတၞုၚ်ဝွံ နကဵုယဲမၞိဟ်ဇၞော် တိုန်ကောဴဓရီုတဴ ဟွံမာန်ဂှ် ဗွဲမလအ်လရ။ အမာတ်ဇၞော် သၟိၚ်ဇိပ်ဗြာဲ အာယုက်တြဴစှော်ပြၚ်ဂှ်လေဝ် သော်ဂမၠိုၚ်ဗုတုဲ သီုကဵုစၞာံ မထညောတ်တဴ ၚေက်ပြဟ်တုဲ နကဵုဂၞိၚ်မကုန် ရေၚ်တၠုၚ်အာဒၟံၚ် လက္သဏ်ဇရာဗျုရ။ "စဍုၚ်ဝါန် သာံလှေက်ဝွံ အဲဘိက်ကော်လဝ် ဟွံကၠုၚ်စိုပ်ဂှ် က္တဵုဒၟံၚ်သပုန်ဟာ" သွက်ပရေၚ် စဍုၚ်ဝါန် ညးလဵုမွဲလေဝ် ဟွံဂံၚ်ပ္တိုန်ထ္ၜးကဵု တၠညးရ။ စဍုၚ်ဝါန် သၟိၚ်သာံလှေက်ဝွံ တၠညးတိုန်နန်တုဲ ပ္ဍဲအခိၚ် မစဝ်အဘိသိက် မဟေသဳကဵု မိကေသာဂှ်လေဝ် ဟွံစိုပ်ကၠုၚ်၊ ဒှ်ပၞာန်တုဲ မကျာ်ဘိက်တဴဂှ်လေဝ် ဟွံကၠုၚ်တုဲ တၠညး ဒေါသတိတ်ဒၟံၚ်ရ။ "ယွံတၠညး ပရေၚ်စဍုၚ်ဝါန်ဂှ် ဒှ်ပရေၚ် အပ္ဍဲဍုၚ်ရ။ ပရေၚ်ဍုၚ်အၚ်ဝဂှ် ဒှ်ပရေၚ်ဍုၚ်တၞဟ်သ္အာၚ်ရအဴ။ ပ္ဍဲအခိၚ်လၟုဟ် စဍုၚ်ဝါန် သ္ဂောံလုက်စုက်ကဵု ဟံသာဝတဳဂှ် သ္ၚောဲရ ဂၠးပယျဵုလ္ပာ်ဗၟံက်ကီုလေဝ် ဟွံဂံၚ်စုက်ဒးဏီရအဴ။ ဍုၚ်အၚ်ဝဂှ်တှ်ေ ကၞောတ်ဍုၚ် ကၞောတ်ရး ဟွံကဏီ သီုလုက်စုက်ဒး ဍုၚ်ဟံသာဝတဳဏီရအဴ။ ဟိုတ်ဂှ်ရ ပရေၚ်ဍုၚ်အၚ်ဝဂှ် စွံဗွဲမဇြိုဟ်နက်ညိအဴ။ အာဂတနူဏအ် သၞမ္ၚးဟွံမွဲမှ ဗၜိုဟ်ပတုဲကၠေံထောံ သၞအပ္ဍဲညိအဴ။ ပ္ဍဲအခိၚ်လၟုဟ် သၞမ္ၚးဟေၚ် ဗၜိုဟ်ကၠေံ ထေက်ရအဴ" ဟိုတ်နူဂလာန် မၚ်ကာန်စဳ မပကုန်ဖျေံဇကု သၟိၚ်တမ်ဇိုၚ်ပၞၚ်တုဲ မပ္တိုန်ထ္ၜးဂှ် တၠညးလေဝ် ဒးဖျဝ်ဖျေံကၠေံစိုတ်ရ။ မၚ်ကာန်စဳဝွံ ဟိုတ်နူကဵု မကျိုၚ်လဝ် ဗွိုက်လ္တက် မစဳလဝ်ထဝ်ဂှ်တုဲ ဖျုန်ဇကု အရံၚ်သာၚ်ဗ္တာၚ်ဝွံ သာ်တုဲဍောတ်တဴဒၟံၚ်ရောၚ် ဒးထေၚ်ကေတ်ရ။ ပၞောဝ်ကဵုအမာတ် မၞုံပ္ဍဲကောံဓရီုဂမၠိုၚ်ဂှ် ဒှ်ညးအာယုက်ဍောတ်အိုတ် မၞုံကဵုပညာမွဲရ။ ဟိုတ်ဂှ်ရလေဝ် နဒဒှ်အမာတ်ဇၞော် ဇိုၚ်ဂဂဳတၠညး ခစဒၟံၚ်ဗ္ဒာဲဂှ် ဟွံဂွံသ္ကုတ်ရ။ "ဍာံပြဒၟဴၚ်ရအဴတၠညး၊ ၜိုန်ရစဍုၚ်ဝါန် ဟွံကၠုၚ်တဴကီုလေဝ် စဍုၚ်မံၚ်မလ သၟိၚ်လိုက်ဖြာဂှ်တှ်ေ ဇက်ကၠုၚ်ဒပ်ဍာ် ဒဵုကဵုစိုပ်ကၠုၚ် ဍုၚ်လ္ဂုၚ်ရအဴ" "ဟာ..." တၠညးကီု သီုအမာတ် မတိုန်စိုပ် ကောံဓရီုဒၟံၚ် အိုဿီု အမ်သဝ်ဒၟံၚ်အိုတ်ရ။ အပ္ဍဲစိုတ်တေံလေဝ် ဆေၚ်စပ်ကဵု စဍုၚ်မံၚ်မလတုဲ အရာမထေၚ်တဴဂှ် သ္ဂုတ်သွာတ်ဒၟံၚ် ပ္ဍဲကဵုဂၠံစိုတ်အိုတ်ရ။ ဒပ်ဍာ်စဍုၚ်မံၚ်မလ သၟိၚ်လိုက်ဖြာ မဇက်ကၠုၚ် ပွမဒှ်တဴအမ်သဝ်ဂှ် ဟိုတ်နူကဵုတၠညး ဟွံဂွံဘိက်ကော်တဴလဝ်ရ။ စဍုၚ်မံၚ်မလ သၟိၚ်လိုက်ဖြာဝွံ အမူညး စဍုၚ်မုတ္တမ ဗြာတ္ထၜ မၞုံလ္ပာ်ဗၟံက်တုဲမ္ဂး ဒှ်ညးစဍုၚ်ဇၞော်အိုတ် အလုံမွဲဗလး လ္ပာ်ပလိုတ်ဏအ်ရ။ နူကဵုမအံက်ညးမၞုံတေံရ ဒှ်ညးမသ္ပသပုန်တုဲ ဟိုတ်နူကဵု ကောန်၊ ခမာန်တအ်ဂၠိုၚ် ဒြဟတ်ခိုဟ်တဴရ။ ဟိုတ်နူကဵု မက္လိဂွံတဴ အကဴက်အခေါန် နူကဵုသၞေဟ်ဂၠုၚ် ဖာသီတုဲ ကပေါတ်စၟဳစၟိန်လေဝ် သၠဲလးတဴရ။ လွဟ်လက်နက်တၟေၚ် မပ္တံကဵု လွဟ်၊ အမၠံက် မက္လိဂွံနူဇရေၚ် က္ၜၚ်ကောန်ဍုၚ်ပလိုတ် မဗ္ဒလုပ်သၞေဟ်သြၚ်ဂှ်လေဝ် မၞုံတဴရ။ ဒျ်ညးမပိုၚ်ပြဳ တ္ကအ်ဂမၠိုၚ်တုဲ ဒပ်ဍာ်လေဝ် ဇၞော်တဴရ။ ဟိုတ်ဂှ်ရ ညးဒြဟတ်မဇၞော် မွဲတၠ မြဴသာ်ဝွံ ဒပ်ဍာ်မဇက်ကၠုၚ် ဒဵုကဵုလ္ဂုၚ်ဂှ် ဂွံမိၚ်ကေတ်တုဲ သီုညးဖအိုတ် လကိုတ်တ္ၚဵု အမ်သဝ်တဴဒၟံၚ်အိုတ်ရ။ "ဍာံပြဒၟံၚ်ရအဴ၊ ဒပ်စဍုၚ်မံၚ်မလ သၟိၚ်လိုက်ဖြာဝွံ နူကဵုအခိၚ် ဒပ်အၚ်ဝလီုတုဲ စဴအာမှ က္လေၚ်ဂတးစဴအာကီုရအဴ။ ဒပ်အၚ်ဝဝွံ သီုဟွံမွဲတဴကဵု ဟိုတ်မမိက်ကဵုမွဲမွဲ သွက်ဂွံဇက်ကၠုၚ် ဒဵုကဵုစိုပ် ဟံသာဝတဳဂှ် ဟွံမွဲရအဴ။ အဲဍိက်ထေၚ်ကေတ်တှ်ေ ဒပ်အၚ်ဝ သ္ဂောံဇက်ကၠုၚ်ဂှ် ဟိုတ်နူကဵု စဍုၚ်မံၚ်မလ သၟိၚ်လိုက်ဖြာ မဘိက်ကော်တဴလဝ်ရအဴ" စဍုၚ်မုဟ်ဗဳ အာဲကံဗိန်လေဝ် ၜတ်ကၞာတ်တဴ ဒပ်မံၚ်မလ မဇက်ကၠုၚ်ကဵု ဒပ်အၚ်ဝ မဇက်ကၠုၚ်တုဲ ပ္တိုန်ထ္ၜးတဴရ။ "လုကဴဗ္တိုက်တဴ ဍေံတအ်ဟွံမာန်ဏီတုဲ ဇၟာပ်ပ်ဂၠံၚ်ဂှ် ဗက်ကဵုဒၟံၚ်ဒဒိုက်ရ။ သွက်ဂွံဗ္တိုက်တဴ ဂၠးလ္ပာ်ဗၟံက်ကဵု ဂၠးလ္ပာ်ပလိုတ်ဂှ် ဇက်အာမ္ဂး ထေက်ဒၟံၚ်ဟာ" သၟာန်တၠညးဂှ် အမာတ်ဂမၠိုၚ် သီုဟွံသွဟ်ကဵု ဗွဲမပြဟ်ဏီ ချပ်ၚၚ်ဒၟံၚ်အိုတ်ရ။ "ဟွံထေက်ဏီရအဴ၊ ဒပ်အၚ်ဝဝွံ ဟိုတ်မဒးစဴအာ နကဵုကျဗြမ်တုဲ အခိၚ်ဟွံရုဲ က္လေၚ်ဇက်ကၠုၚ် မာန်ရအဴ။ စဍုၚ်မံၚ်မလ သ္ပမဟာမိတ်ကဵု တၠညးဍုၚ်အၚ်ဝဍာံမ္ဂး နကဵုတၠညးကီုလေဝ် အတိုၚ်မသ္ပလဝ် မဟာမိတ် နူလက်ထက် မအံက်တၠညးတေံ တန်ဒၟံၚ်ဂှ် ဗလးကလုတ်တုဲ ပ္တိုန်ထ္ၜးတဴ ထေက်ရအဴ" "ဍာံပြဒၟံၚ်ရအဴ၊ အရာအမာတ်ဇၞော် မပ္တိုန်ထ္ၜးဂှ် ထေက်ကြိုက်ဒၟဴၚ်ရအဴ။ ဒပ်အၚ်ဝမဇက်ကၠုၚ်ဂှ် ပွမသ္ပလဝ် မဟာမိတ် နူလက်ထက် မအံက်တၠညးဂှ် တန် ဟွံတန် မိက်ဂွံစမ်ၜတ်လေဝ် ဒှ်မာန်ဒၟံၚ်ရအဴ။ ဟိုတ်ဂှ်ရ ဗလးကလုတ် ထေက်ဒၟံၚ်ရအဴ" မၚ်ကာန်စဳကီု သီုကဵုအမာတ်ဒိန် သွက်ဂွံဗလးကလုတ် ဇရေၚ်ဍုၚ်အၚ်ဝဂှ် ဟိုတ်နူဗ္တိုက်ဖအောဝ်တုဲ တၠညးလေဝ် တုပ်စိုတ်ရ။ "သွက်ဂွံဗလးဏာကလုတ် ဇရေၚ်ဍုၚ်အၚ်ဝဂှ် ကောဇၞော်ဟေၚ် စဳရေၚ်ဖန်ဖက်ညိ။ လိက်သဝဏ် သွက်ဂွံဆက်ကဵု သၟိၚ်အၚ်ဝဂှ် အဲချူကဵုရ ကောံဓရီုအာစိုပ်ဒတုဲရောၚ်" ကောံဓရီု အာစိုပ်ဒတုဲတုဲ မၚ်ကာန်စဳလေဝ် သွက်ဂွံဗလးဏာကလုတ် ဇရေၚ်ဍုၚ်အၚ်ဝဂှ် စဳရေၚ်တဴ ပရၚ်စၟဳစၟိန် ပဏ္ဍာဂမၠိုၚ် ကေုာံ ထဝ်သြန်၊ ယာတ်ခေါဇာဂမၠိုၚ်၊ ကြာပ်ထဝ်၊ ယာတ်ကတ္တဳဗာဂမၠိုၚ်တုဲ ဗလးဏာ အမာတ်ဗိုတ်ညးကဵု စဴထက်တအ် ဇရေၚ်ဍုၚ်အၚ်ဝရ။ လိက်သဝဏ် မဖျေံလဝ်ထဝ်ဂှ် တၠညးချူတုဲ စုတ်ပ္ဍဲထိုၚ်စၞာံတုဲ စုတ်ကဵုဏာရ။ "အဲကောန်တၠညးစိၚ်ဗ္တာၚ် ဨကရာဇ် ဍုၚ်ဟံသာဝတဳ ပတီမအံက်ဇၞော်အဲ တၠညးနန်ထဝ် ဍုၚ်အၚ်ဝ နူမအဴက်အဲ နာဲညးတၠစိၚ်ဗ္တာၚ် စသုၚ်တသိုက် မနုဿဘုံ ဖဲလဲဂှ် ဟိုတ်နူမစွံကၠေံလဝ် နန်ထဝ်က္ဍိုၚ်ဗ္တာၚ် ဍုၚ်ဟံသာဝတဳတုဲ အဲလေဝ် နဒဒှ် တၠညးဍုၚ်ဟံသာဝတဳ က္လိဂွံအုပ်ဓုပ်တဴ ဗွဲမကိတ်ညဳကဵု ဓဝ်သၟိၚ်စှ်ရ။ ဒဒှ်ဂှ် စဍုၚ်မံၚ်မလ သၟိၚ်လိုက်ဖြာ ဣဿာစောန်စိုတ်တုဲ သွက်မအံက်ဇၞော် သ္ဂောံဇက်ပၞာန်ဂှ် ဒစုက်ဒလူတဴရ။ စဍုၚ်မံၚ်မလဝွံ နူကဵုလက်ထက် မအံက်တၠညး မၞုံတေံရ သီုဟွံထံက်ရံၚ်ကဵု ဂုဏ်မအံက်တၠညး မပ္တိုန်စလဝ်ဂှ်တုဲ သ္ပတဴသပုန်ရ။ ညံၚ်ရဴလၟုဟ်ဏအ် ပဟိုတ်ကဵု ဍေံဒှ်မၞိဟ် မိစ္ဆာဒိဋ္ဌိတုဲ ဟိုတ်မဇက်ကၠုၚ် ပၞာန်ဂှ်ရ ခမဳသၚ်ဂမၠိုၚ် ဟွံဂွံသ္ပဒ္တဴ ဗွဲတသိုက်ရ။ ဒေံအဲဂမၠိုၚ် အဃောမစှ်ေအာ ဍုၚ်ဟံသာဝတဳဏအ်ဂှ် အဲဟွံဂွံဒုၚ်တၠုၚ်တဴ ဒေံအဲဂမၠိုၚ်ရ။ ချပ်တဴ သွက်ဂွံကဵုဏာ ပရၚ်စၟဳစၟိန်ဂမၠိုၚ်ကီုလေဝ် ဒေံအဲဂမၠိုၚ် စဴအာဗွဲမပြဟ်တုဲ အဲဟွံဂွံကဵုဏာရ။ ဟိုတ်ဂှ်ရ ဖအောတ်ဏါ အမာတ်ဇၞော်အဲတုဲ မ္ဒးပလံၚ်ဏာ ပရၚ်စၟဳစၟိန်ဂမၠိုၚ်ရအဴ" တၠညးနန်ထဝ် ဍုၚ်အၚ်ဝ သၟိၚ်မၚ်ဂဳဆွာလေဝ် က္လၚ်တဴဒၟံၚ် နူလ္တူပၞၚ်ရ။ ပ္ဍဲဂတဂှ်ဝွံ ကလုတ်နူဟံသာဝတဳဂမၠိုၚ် ကေုာံ ကောန်ညးဥပ္ပရာဇာ၊ မၚ်ဆိုဲကဵု မၚ်သိဒ္ဓတ်တအ်လေဝ် ခစဒၟံၚ်ရ။ အခိၚ်မဗှ်ဒၟဴၚ် လိက်သဝဏ် တၠညးရာဇာဓိရာဇ်ဂှ် ပွကမကျပၞာန်ဂှ် ဂွတုဲ ဟွံဂံၚ်ယာတဴ က္ဍိုပ်ရ။ "ကှ်ေ... ညံၚ်ရဴညးမဟီုစ ထၞက်ဟွံဂိ၊ လဟီုရောၚ်ဂိတဴရ။ အာဂတနူဏအ် ဗညာနဲ သ္ဇိုၚ်ခိုၚ်ကၠုၚ်မ္ဂး မံၚ်မလ၊ ဖာသီ၊ မုတ္တမဂှ် ဒှ်အာသၟဝ်တဲဍေံ အိုတ်ရောၚ်" သၟိၚ်မၚ်ဂဳဆွာလေဝ် သီုမထိၚ်ဣိန်ရဳဟွံမာန် ပ္ဍဲဂတကလုတ် ဟံသာဝတဳဂမၠိုၚ်ဟေၚ် ကရောတ်တဴရ။ တုဲဂှ် သီုဟွံဗ္ကန်တဴ လိက်သဝဏ်ကဵု ကလုတ်ဟံသာဝတဳဂမၠိုၚ် ကပေါတ်ပရၚ်စၟဳစၟိန် မထေက်ကြိုက်ဂမၠိုၚ်ဟေၚ် က္လေၚ်ကဵုနၚ်ရ။ ကလုတ်တၠညးဂမၠိုၚ် စဴအာအိုတ်တုဲ ခြာဂွံ ပန်မသုန်တ္ၚဲဂှ် စဍုၚ်မံၚ်မလ သၟိၚ်လိုက်ဖြာ ဖအောဝ်နၚ် အမာတ်မွဲတၠတုဲ ဆက်ကွာဲနၚ်ကဵု ပရၚ်စၟဳစၟိန် ပဏ္ဍာဂမၠိုၚ်တုဲ သွက်ဂွံဇက်ပၞာန်ဂှ် ပ္တိုန်ထ္ၜးတဴပၠန်ရ။ ပ္ဍဲအလန်လၟုဟ်ဝွံ အလဵုဇကုတၠညး နန်ထဝ်ဍုၚ်အၚ်ဝ ဇက်ပၞာန်တုဲ သွက်ဂွံကၠုၚ် ဒဵုကဵုဌာန်အလဲ ကေုာံ ဇကုလေဝ် ဇက်အာဒပ်ဍာ် ဒဵုကဵုစိုပ် အလဲ ညးၜါပံၚ်တုဲ သွက်ဂွံသီကေတ် ဍုၚ်ကွာန်ဂမၠိုၚ် ဗွဲလၟေၚ်ၚ်ရ။ သၟိၚ်မၚ်ဂဳဆွာ မဂွံမိၚ်ကေတ် ဂလာန်မပ္တိုန်ထ္ၜး နူကဵုစဍုၚ်မံၚ်မလဂှ်လေဝ် ဟွံချပ်ဗ္စာရံၚ် ဂတကြဴရ။ သွက်ဂွံဗက်ဂတှ် ကောန်ညးၜါတၠဂှ် မကျလဝ်တုဲ ပဠေဝ်ဒပ်ဍာ်တုဲ ဇက်အာဇရေၚ် ဟံသာဝတဳ နကဵုဒပ်ဍာ်ရ။ #သ္ဂံၚ် လအီမန် (သၟာပၠန်ဂတး အညတြ) ပ္ဍဲကဵု Telegram လေဝ် လုပ်ဗှ်တဴမာန်ရအဴ။ https://t.me/laaeimon #တၠညးရာဇာဓိရာဇ် #ပဳယရာဇာဒေဝဳ #တၠမေဒဴ #အၚ်ဝ-ဟံသာဝတဳ ပေါဲပၞာန်ပန်စှော်သၞာံ #လျးအရှိုဏ် ဟံသာဝတဳ သ္ကုတ်ဒုတိယ #The Light of Dawn, Hongsawatoi (Part2, Ep2)