လျးအရှိုဏ် ဟံသာဝတဳ (သ္ကုတ်ဒုတိယ၊ ပိုဒ် - ၁ )
"အဲဍိက်သၟိၚ်လိုက်ဖြာ စဍုၚ်မံၚ်မလ လ္ၚောဝ်ပ္တီဏါ တၠညးနန်ထဝ် ဍုၚ်အၚ်ဝရအဴ၊ လၟုဟ် တၠညးစိၚ်ဗ္တာၚ် ဍုၚ်ဟံသာဝတဳ စိုပ်အနိစ္စဓဝ်တုဲရ၊ ကောန်တၠညးစိၚ်ဗ္တာၚ် ဗညာနဲဝွံ ဒုၚ်ယၟုရာဇာဓိရာဇ်တုဲ တိုန်နန်သ္ပသၟိၚ်ရအဴ၊ ဟိုတ်ဒှ်သာ်ဂှ်ရ နူကၠာဗညာနဲ သ္ဇိုၚ်ဟွံဗိုန်ခိုၚ်ဏီ နူတၠနန်ထဝ် ကဵုဒပ်ပၞာန် ဇက်စှ်ေကၠုၚ်ညိ။ အဲဍိက်လေဝ် ဇက်တိုန်အာ နကဵုဒပ်ဍာ်ရောၚ်၊ ဂၠံၚ်တိုက်၊ ဂၠံၚ်ဍာ် ပိုဲကြာပ်ဗ္တိုက်မ္ဂး ရာဇာဓိရာဇ် ဒုၚ်ဗ္တိုက်မာန်ညိဟာ၊ ကါလစိုပ်ဒတုဲမ္ဂး ကြက်ဍေံဂှ် တွာဲကဵု တၠနန်ထဝ်၊ ဆသရာဲ အဲဍိက် အာတ်ဒုၚ်ဒါန်ညိ"
တၠညးဍုၚ်အၚ်ဝ မၚ်ဂဳဆွာ (မင်းကြီးစွာစော်ကဲ) မက္လၚ်ဒၟံၚ် ရမျာၚ်တခဳဗှ်လိက် နူကဵုလ္တူပၞၚ်ဟံသာသန မဒုၚ်လဝ် ရုပ်ၜိုပ် ပ္ဍဲခဒမ်ဇေတဝန် မၞုံဂတမုက်နန်ထဝ်အၚ်ဝတုန် သီုကဵုမက္လၚ်တဴဒၟံၚ် လိက်သဝဏ် စဍုၚ်မံၚ်မလ သၟိၚ်လိုက်ဖြာဂှ် ဒးဒၟံၚ်ဂၞပ်ရ။ ပ္ဍဲလက္ကရဴပၞၚ်ဂှ် မပုတ်ဂၠတ်လဝ် ရုပ်ထဝ်ဂမၠိုၚ်၊ ဗ္ဒာဲဂှ်ပၠန် ခ္ဍအ်ဇဗၠု၊ ထၟာဲတဲဂမၠိုၚ် ကေုာံ ညးပ္တုဲဝတ်ဂမၠိုၚ်ဂှ် သီုကဵုမလွိုက်တဴဒၟံၚ် နကဵုပၞိက်ရ။
ပ္ဍဲဂတမုက်ဂှ်ဝွံ ကပေါတ်ပဏ္ဍာ စဍုၚ်မံၚ်မလ သၟိၚ်လိုက်ဖြာ မဆက်ကွာဲ နၚ်လဝ်ဂမၠိုၚ်ကဵု ကလုတ် စဍုၚ်မံၚ်မလ သၟိၚ်လိုက်ဖြာ မဗလးနၚ် ပန်တၠ (၁) စက်ဒရပ်၊ (၂) မပသုံ၊ (၃) မၚ်စေသူ၊ (၄) မလွန် တအ် သီုကဵုမထံက်က္ၜံၚ် ခစဒၟံၚ်အိုတ်ရ။ မွဲလ္ပာ်ဂှ် ကောန်ညး ဥပ္ပရာဇာ ကောန်သၟိၚ် တရဖြာ၊ ကောန်ညး မၚ်သွေ (မင်းဆွေ) ကေုာံ အမာတ်စေဝ်တပေတ် (စည်းတပစ်)၊ အမာတ်ဇၞော် ရာဇသၚ်္ကြာန် တအ်လေဝ် ခစဒၟံၚ်အိုတ်ရ။
"ယွံကောန် ပရေၚ် စဍုၚ်မံၚ်မလဂှ် သာ်လဵုညာတ်ရော"
"ဍာံပြမံၚ်ရအဴ၊ သၟိၚ်ဗဂေါဝွံ ၜိုန်ရ ဆဂွံတိုန်နန်ကီုလေဝ် လအ်ကၠုၚ်တှ်ေ ဒြဟတ်ဇၞော်ကၠုၚ်မ္ဂး လုပ်ဍိုက်ဂွံ ပယျဵုဒၞက် ဍုၚ်အၚ်ဝပိုဲ မာန်ဒၟံၚ်ရအဴ၊ ဟိုတ်ဂှ်ရ နူကၠာဟွံဒှ်တၞံဏီ ဍိုတ်ကၠေံ နကဵုတဲမ္ဂး ခိုဟ်တဴရောၚ် မအံက်တၠညး"
စဍုၚ်မံၚ်မလ ပလံၚ်နၚ်ပရိုၚ်ဂှ် သၟိၚ်အၚ်ဝမၚ်ဂဳဆွာ သီကၠဳဒၟံၚ်ကု ကောန်ညး မၞုံဂတမုက်ဂှ်ရ။ ကောန်ညး ဥပ္ပရာဇာဂှ်လေဝ် နွံပၟိက်တဴကဵုပၞာန်ရ။ အမာတ်ဇၞော်ၜါဂှ်လေဝ် ဓညိက်တဴက္ဍိုပ်ရ။
"ကှ်ေ... အတိုၚ်မပါတဴ ပ္ဍဲလိက်သဝဏ်ဂှ် ဩဝ်ဇက်ပၞာန်ညိ။ အလဵုဇကုကောန်အဲ နဒဒှ်က္ဍိုပ်သ္ကိုပ်ဂှ် ဩဝ်ကောပ်ကါဲ ဗ္တိုက်အာညိ"
"အတိုၚ်အမိၚ် အသံရအဴ"
သၟိၚ်မၚ်ဂဳဆွာဝွံ ဝိုတ်ကၠေံထောံ သ္ပလဝ်သစ္စၜါဍုၚ် နူအခိၚ် တၠညးဍုၚ်ဟံသာဝတဳ သၟိၚ်ဗညာဥူ နွံတေံတုဲ သွက်ဂွံဇက်ပၞာန်ဂှ် ပ္ဍဲဂတမုက် ကလုတ် စဍုၚ်မံၚ်မလဟေၚ် ဖျေံတဴအမိၚ်ရ။ ကလုတ် စဍုၚ်မံၚ်မလဂမၠိုၚ်ဂှ် ပရေၚ်ကိစ္စ ဇကုတအ် အံၚ်ဇၞးရဒှ်တုဲ မိပ်သၠောၚ်ဒၟံၚ်အိုတ်ရ။ ကောန်ဗၠာဲ သၟိၚ်မၚ်ဂဳဆွာ ၜါတၠဂှ်လေဝ် အတိုၚ်လၟေၚ်မၞိဟ်သၟတ် စိုတ်ထတ်စောန် ကေုာံ နကဵုဆီပၞာန်မာန်ပၞာန် ပေၚ်ကၟိုဟ်ဒၟံၚ်အိုတ်ရ။
~~~~~~~~~~~~~~~~~
ပ္ဍဲဍုၚ်ဟံသာဝတဳ နူကဵုတၠညးရာဇာဓိရာဇ် တိုန်နန်တုဲဂှ် ကၟိန်ဍုၚ်ဝွံ ညံၚ်ရဴအတိုၚ်တြေံတေံဟေၚ် က္လေၚ်ၜိုဟ်သြိုဟ်ကၠုၚ်ပၠန်ရ။ ဂကောံဒြဟတ် သၟိၚ်မရူကဵု မဟာဒေဝဳတအ်ဂမၠိုၚ်လေဝ် လီုလာ်ပါ်ထ္ကးအာအိုတ်တုဲ၊ ပရေၚ်အပ္ဍဲနန်ထဝ်ဂှ်လေဝ် ပကတိ ၜိုဟ်သြိုဟ်ဒၟံၚ်ရောၚ် သာ်ဝွံ အယာံမာတ်ထေၚ်ကေတ် ၜိုတ်လ္တူကျာရ။ ၜိုန်ဂှ်လေဝ် ပရေၚ်ပြိုၚ်ပ္ကာန် နူကဵုညးအရာပ် ဒှ်ကၠုၚ်ဂၞကျာ်ဇၞော် ဂၞကျာ်ပဳယရာဇာဒေဝဳ ကဵု ဂၞကျာ်တၠမေဒဴ မဒှ်ကောန်ဝုတ် ဨကရာဇ်ဂမၠိုၚ်ကီု၊ ပရေၚ်သ္ပစၞာဲ နူကဵုဂၞကျာ်ဇၞော် တၠညးသၟိၚ်ဗညာဥူတေံ သွက်ကောန်ညး ဘဝ်ၚာၚ်မုၚ် သ္ဂောံက္လိဂွံနန်ထဝ်ဂမၠိုၚ်ကီုဂှ် ညးလဵုမွဲလေဝ် ဟွံဂွံတီကေတ် ပရေၚ်အပ္ဍဲ ချိုတ်တ်ပၠိုတ်တ်ရ။
သၟိၚ်ရာဇာဓိရာဇ် မတိုန်နန်တၟိဝွံ ဟိုတ်မဒှ် ကောန်ဇၞော် တၠညးစိၚ်ဗ္တာၚ်တုဲ ကောန်ဍုၚ်ကောန်ကွာန်ဂမၠိုၚ် သ္ဍိုက်ဆညန်တဴအိုတ်ရ။ ဟိုတ်ဂှ်ရလေဝ် တၠညး ရဴသာ်ဝွံ ဗွဲမအဲပရဲ ကေည်တဴအိုတ်ရ။ တၠညးရာဇာဓိရာဇ်ဝွံ ပါဲနူကဵုဂၞကျာ် ပဳယရာဇာဒေဝဳ၊ ဒလသုဒ္ဓမာယာ၊ တၠမေဒဴ၊ မိနန်ကေသရာတအ်တုဲ အမာတ်ဇၞော် သၟိၚ်ဇိပ်ဗြာဲ မဆက်ကွာဲလဝ်ကဵု ကောန်ဝုတ် အမာတ်ဇၞော် ၜါတၠဂှ်လေဝ် ပ္တိုန်စလဝ် နဒဒှ်ဂၞကျာ်ကီုရ။
တၠမေဒဴဝွံ စဵုကဵုအာစိုပ် ဒဒှ်ဂၞကျာ် အခိၚ်တိုန်နန်တၟိတေံဂှ် သီုဟွံမံၚ်တဴ အပ္ဍဲဝၚ်နန် သ္ပဒ္တဴအာ ပ္ဍဲသ္ၚိနန်ဇကု ဟေၚ်ရ။ လက္ကရဴဏအ်မှ က္လေၚ်ပြံၚ်သ္ပဒ္တဴအာ ပ္ဍဲကဵုဝၚ်နန်ရ။ မိကေသာဝွံ ၜိုန်ဒှ်ဂၞကျာ်ဍောတ်ကီုလေဝ် လ္တူနာဲဗြဴဇကု ဂၞကျာ်တၠမေဒဴဂှ် ကၠောန်ၜိုတ်ပ္တုဲဝတ် ဟွံကဵုလီုရ။ တၠညးရာဇာဓိရာဇ်ဝွံ သ္ၚိနန်ဇကု မသ္ပဒ္တဴလဝ် အခိၚ်ဒှ် ဘဝကောန်သၟိၚ်တေံဂှ် ကဵုအမာတ်ရာဇမနု မဒှ်အမာတ်ပတှ်ေဇကု သ္ပဒ္တဴအာရ။ ဘဝ်မန်ကဵု မသိုက်တအ်ကီုလေဝ် နကဵုပိုန်ဘိုက် ကယျိုၚ်ကယျဝ်ဂမၠိုၚ် သီုကဵုမရပ်တဴလဝ် ဇြၚ်မစဳလဝ်မတ်ဂှ် ဂွံယိုက်ဂၠေၚ် ခစဇရေၚ်တမ်ဇိုၚ်တၠညးကီုရ။
တၠညးရာဇာဓိရာဇ်ဝွံ တိုန်နန်တုဲ ဍိက်တၠညး အဒဴကုန် စဴအာဌာန်မုတ္တမ ဒးယဲဇွဟ် အကြာဂၠံၚ်တုဲ ချိုတ်အာဂှ်လေဝ် စိုတ်ဟွံခိုဟ် က္တဵုဒှ်တဴရ။ ဇြၚ်အဒဴကုန်ဂှ် စွံပ္တန်လဝ် ခဒမ်စွံဇြၚ် ပ္ဍဲဝၚ်နန်ရ။ လၟုဟ်လေဝ် နူကဵုစိုပ်ကၠုၚ်ခဒမ်ဂှ် ညာတ်ဒးဇြၚ် အဒဴကုန်တုဲ ချပ်ဗှ်သၞာဂွံဒၟံၚ် လ္ပာ်အဒဴကုန်ရ။ အဒဴကုန်မွဲ ကဵုက္လိဂွံ ဘုံသုဂတိညိ သာ်ဝွံ ရာဒနာမိက်ဒၟံၚ် ပ္ဍဲဂၠံစိုတ်တေံ ဂၠိုၚ်ဂၠိုၚ်ကဵုလ္တုန်ရ။
လၟုဟ်လေဝ် တၠညးရာဇာဓိရာဇ်ဝွံ ဃောသ္ပဒ္တဴဒၟံၚ် ပ္ဍဲခဒမ် သုၚ်ဍာ်လက်ဖက်ဂှ် ညာတ်ဒး ဇြၚ်အဒဴကုန် မဂိုၚ်လဝ်ဂှ်တုဲ ဗှ်ဂွံသၞာ လ္ပာ်အဒဴကုန်ရ။ ဗ္ဒာဲဂှ်ဝွံ မၚ်ကာန်စဳလေဝ် ခစဒၟံၚ်တုဲ ညးပ္တုဲဝတ်ဂမၠိုၚ်ဂှ် သိုမပိုက်ဒၟံၚ်ကဵုကျာ ညးပ္တုဲဝတ်လ္ၚဵုတအ်ဂှ် တိၚ်ဒၟံၚ်တူရိယျာစံၚ်ကျာံတုဲ လဟိၚ်ဒၟံၚ်ကဵုရ။ အဃောမသ္ပဒ္တဴဒၟံၚ်ဂှ် စဍုၚ်ပါန်ကျဝ် သၟိၚ်ဗြာတ်ထ္ၜမွဲ အာတ်အခေါၚ် ဆဵုကဵုတၠညးတုဲ ဗက်လုပ်ကၠုၚ် ဒဵုကဵုစိုပ် ခဒမ်သုၚ်ဍာ်လက်ဖက်ရ။ ဟိုတ်နူဂဗဆဵုဒးတၠညး ပ္ဍဲခဒမ်ဍာ်လက်ဖက်တုဲ လ္ၚောဝ်ဖျေံက္ဍိုပ်ရ။
"ယွံတၠနန်ထဝ်၊ ဒပ်ပၞာန်ဇၞော်အၚ်ဝ ဇက်ကၠုၚ်နူလ္ပာ် တံၚ်ၚူရအဴ"
တၠညးရာဇာဓိရာဇ်ဝွံ ဟိုတ်နူဂွံမိၚ်ကေတ် ပရိုၚ်ဟွံထေၚ်လဝ် မွဲသာ်တုဲ ဒးလကိုတ်တ္ၚဵုအာရ။ သာ်ဂှ်ကီု မၚ်ကာန်စဳလေဝ် ဒးလကိုတ်တ္ၚဵု အမ်သဝ်အာရ။ ဍုၚ်အၚ်ဝဝွံ နူကဵုအခိၚ် မအံက်တၠညးစိၚ်ဗ္တာၚ် နွံတေံရ သ္ပလဝ်မဟာမိတ် ၜါဍုၚ်တုဲ သ္ပဒ္တဴကၠုၚ်လဝ် ဗွဲမၜိုဟ်သြိုဟ်ရ။ လၟုဟ်တုန် မုရဴဟိုတ်မုတုဲ သ္ဂောံဇက်ကၠုၚ် ပၞာန်ဂှ်ရော။ တီချိုတ်ပၠိုတ် မွဲဂှ်တှ်ေ မိက်ဂွံစမ်ၜတ်တဴဒြဟတ် သၟိၚ်ဍောတ်တ် မတိုန်နန်တၟိမွဲရ။ ဒးဆဵုဂဗကၠုၚ်ကဵု ပရေၚ်ပၞာန် ဟီုတှ်ေလေဝ် သွက်ဒးဗ္တိုက်ဟေၚ်နွံရ။ ဒဵုကဵုဂွံဇၞး ဇကုဗ္တိုက် ဟွံမာန်မ္ဂး ဍေံကေတ်ဇၞးဏာ လ္ဆူဇကုရောၚ် ဟွံသေၚ်ဟာ၊ ဟိုတ်ဂှ်ရ တၠညးရာဇာဓိရာဇ်လေဝ် သွက်ဂွံဗ္တိုက်ပၞာန်ဂှ် ဖျေံတဴသ္ဂုတ်သွာတ် ဗွဲမပြဟ်ရ။
"ဇက်ကၠုၚ်ဂၠံၚ် လ္ပာ်တံၚ်ၚူတှ်ေ တံၚ်ၚူတုဲမ္ဂး စိုပ်အာဇရေၚ် ဍုၚ်ပါန်ကျဝ် ၝစဒၟံၚ်ဂှ်ရောၚ်။ နူကဵုပါန်ကျဝ် ၝဒုၚ်လဝ်ပၞာန် ညံၚ်သ္ဂောံမာန်ညိ၊ အဲပဠေဝ်ဒပ်တုဲ ဇက်အာဇရေၚ် ဍုၚ်ပါန်ကျဝ်တေံရောၚ်"
"ဒးရးသန်ရအဴ"
စဍုၚ်ပါန်ကျဝ်ဝွံ က္လိဂွံအမိၚ်တုဲဗက် လ္ၚောဝ်တုဲ ဗွဲမပြဟ် ဂတးစဴအာရ။ တၠညးရာဇာဓိရာဇ်လေဝ် ဗွဲမပြဟ်ဟေၚ် ကော်ကောံဓရီုတုဲ ပဠေဝ်ပဠေတ်တဴ သွက်ဂွံတိတ်ပၞာန်ရ။
ဒပ်ကောန်တၠညးအၚ်ဝ မဇက်ကၠုၚ် ဂၠံၚ်လ္ပာ်တံၚ်ၚူဂှ် (၁) သၟိၚ်တခိုၚ်၊ (၂) သၟိၚ်တံၚ်တွေၚ် (တောင်တွင်းမြို့စာ)၊ (၃) သၟိၚ်တံၚ်ၚူ (တောင်ငူစား)၊ (၄) သၟိၚ်မျေတေဝ် (မြေထဲစား)၊ သၟိၚ်ပန်တၠဝွံ ကဵုဒှ်သ္ကိုပ်ပၞာန်ပန်မုက် ကောန်တၠညး မဒှ်ဥပ္ပရာဇာ မံၚ်ဏာကျေဝ်ဂှ် ဒှ်ဂဥုပ်ပၞာန် လ္တူညးပန်တၠရ။
လ္ပာ်ဂၠံၚ်တရဴ သာယျာဝတဳဂှ် (၁) သၟိၚ်ပခါန် (ပခမ်းမြို့စား)၊ (၂) သၟိၚ်စက်ကေၚ် (စစ်ကိုင်းစား)၊ (၃) သၟိၚ်စလေၚ်၊ (၄) သၟိၚ်ဖကါံ သၟိၚ်ပန်တၠဝွံ ကဵုဒှ်သ္ကိုပ်ပၞာန်ပန်မုက် ကောန်တၠညး စဍုၚ်မျေၚ်စေၚ် ယၟုမံၚ်ဆိုဲ (မင်းဆွေ)၊ ကဵုဒှ်ဂဥုပ်ပၞာန် လ္တူညးပန်တၠရ။ သီုပၞာန်ၜါမုက် ဒပ်ဒ္စါံဒပ်၊ စိၚ်ၜါကၠံ၊ ချေံမသုန်လ္ၚီ၊ သရာဲ ၜိုတ်တြဴလက် ပါတဴရ။
ဒပ်ကောန်တၠညးအၚ်ဝ ဒပ်ဥပ္ပရာဇာဂမၠိုၚ် ကါလစိုပ်အာ ဍုၚ်ပါန်ကျဝ်ဂှ် ဗ္တိုက်တဴ ဗွဲမသ္ကာတ်မြဟ်ရ။ စဍုၚ်ပါန်ကျဝ်လေဝ် ဒုၚ်ဒၟံၚ်ပၞာန် နူလ္ပာ်အပ္ဍဲဍုၚ် ဗွဲမဗိုန်ရ။ ဒပ်အၚ်ဝ ဒြဟတ်ဇၞော်လောန်တုဲ နကဵုဘဲတ္ၚလဴ သရာဲအၚ်ဝဂမၠိုၚ်ဟေၚ် ဒပ်သရာဲဒၞါ လ္တူကၟာၚ်ဍုၚ်ဂမၠိုၚ် ဒးချိုတ်အာအိုတ်ရ။ ဒပ်အၚ်ဝဂမၠိုၚ် ပစူဇိုၚ်ကၞိန်တုဲ ဂွါန်တိုန် လ္တူကၟာၚ်ဍုၚ်အိုတ်ရ။ သရာဲဟံသာဝတဳဂမၠိုၚ်လေဝ် ပန်ကၠဟ်ဖျေံဒၟံၚ် နကဵုတ္ၚလဴ၊ တၟံကဠောံ၊ ဆုကဠောံဂမၠိုၚ်တုဲ တာဒၞါတဴအိုတ်ရ။ ၜိုန်ဂှ် ဍုၚ်ပါန်ကျဝ် မဒှ်ဍုၚ်သၟတ်ဝွံ ဒုၚ်ဒဝ်ကဵု ဒပ်ပၞာန်အၚ်ဝ ဒြဟတ်မဇၞော်ဂှ် ဟွံမာန်၊ ဍုၚ်ပါန်ကျဝ် ဒးစှ်ေအာပ္ဍဲတဲ ဒပ်အၚ်ဝတအ်ရ။ စဍုၚ်ပါန်ကျဝ် သၟိၚ်ဗြာတ်ထ္ၜလေဝ် ညာတ်ဒြဟတ်ပၞာန် ဒပ်အၚ်ဝဂၠိုၚ်တုဲ ဂြိပ်ပေက်ကၠေံရ။ ကါလက္လိဂွံ ဍုၚ်ပါန်ကျဝ်တုဲဂှ် ဥပ္ပရာဇာအၚ်ဝဝွံ ကဵုဒပ်သၟိၚ်မျေတေဝ် (မြေထဲစား) မၚ်လဝ်ဍုၚ်ပါန်ကျဝ်တုဲ ဆက်ဇက်အာပၞာန်ရ။
တၠညးရာဇာဓိရာဇ်လေဝ် ကော်ပ္ကောံဂွံ ဒပ်ရပ်လွဟ် ဂလာ ပိကၠံ၊ သရာဲ မွဲဠက်ပြၚ်ပြၚ် ကေုာံ စိၚ်ချေံ ၜိုတ်မၞုံပ္ဍဲဟံသာဝတဳတုဲ ပဠေဝ်တဴ သွက်ဂွံဇက်အာ ဍုၚ်ပါန်ကျဝ်ရ။ အဃောဒပ်ပၞာန် မကြပ်ဇက်တိတ်အာဂှ် သရာဲမဍိုက်ကၠုၚ် ချေံမွဲ တပ်ကၠုၚ်ကဵုဒပ် ဒဵုကဵုစိုပ် ဇရေၚ်တၠညး ဒဳဒမြိပ်ကၠုၚ် မွဲအသိၚ်ရ။ ကါလစိုပ် ဂတမုက်တၠညးဂှ် စှ်ေကၠေံနူချေံတုဲ လ္ၚောဝ်တဴရ။
"ယွံတၠညး၊ ဒပ်အၚ်ဝ ဇက်ကၠုၚ်လ္ပာ် သာယျာဝတဳတုဲ ဗ္တိုက်တဴ ဍုၚ်လိုၚ်ရအဴ။ ပုၚ်လိုၚ်စှ်ေတုဲ ညးဇၞော်ဍုၚ် သၟိၚ်ဇိပ်ပန်လေဝ် စှ်ေအာပ္ဍဲတဲဍေံရအဴ"
"ဍံက်၊ ရာဇဝၚ် ရိုၚ်ကွေံရဏး"
ဒဒှ်ဍုၚ်လိုၚ်လီု ဂွံမိၚ်တုဲ တၠညးရာဇာဓိရာဇ်လေဝ် ဒေါသတိတ်ဒၟံၚ် ဗွဲမလောန်ရ။ ပါဲနူဂှ် အခိၚ်ညးမပလံင်ပရိုၚ်စိုပ်ဂှ်မှ ဒပ်အၚ်ဝ ဇက်ကၠုၚ်ပၞာန် ၜါဒပ်ရောၚ်ဂှ် ဂွံတီတဴရ။
"အာဟီုကဵု အာဲကံဗိန် မစဍုၚ်မုဟ်ဗဳစမ်၊ ဒုၚ်လဝ်ပၞာန် နူကဵုမုဟ်ဗဳ ညံၚ်သ္ဂောံမာန်ညိ။ အဲဗ္တိုက်ကဵု ဒပ်အၚ်ဝ ပ္ဍဲပါန်ကျဝ်ဏအ်တုဲဂှ် ဗက်စှ်ေအာ ဒဵုကဵုစိုပ် မုဟ်ဗဳရောၚ်"
"ဒးရးသန်ရအဴ"
ညးမပလံၚ်ပရိုၚ်လေဝ် က္လိဂွံအမိၚ်နူတၠညးဗက် ဍိုက်ဒဳဒမြိပ်ဏါချေံတုဲ ဗွဲမပြဟ်ဂတးစဴအာရ။ တုဲဂှ် ဇက်အာဇရေၚ် ဍုၚ်ပါန်ကျဝ်တုဲ ဖျေံလဝ်ဒပ် ပ္ဍဲဌာန်ကျာ်ကလအ်ရ။ အခိၚ်ဂှ် သီုကဵုမကော်ဘိက်လဝ် ပၞာန်အရီုဗၚ် စဍုၚ်ဝါန် သၟိၚ်သာံလှေက် မဒှ်မအံက် မိနန်ကေသရာတအ်ရ။ ၜိုန်ဂှ် တၠညးရာဇာဓိရာဇ်ဝွံ ကါလမဇက်အာပၞာန်ဂှ် သီုဟွံမၚ်တဴ စဍုၚ်ဝါန် ၜိုတ်မပ္ကောံဂှ်ဒြဟတ် ပ္ဍဲဍုၚ်ဟံသာဝတဳဂှ်ဟေၚ် ဇက်တိတ်အာရ။
ကါလတၠညးရာဇာဓိရာဇ် စိုပ်ဇရေၚ် ဍုၚ်ပါန်ကျဝ်ဂှ် ကဵုတာလျိုၚ်ကု အမာတ်ဇၞော် မဟာသာမန် ဒပ်ကၚ်တုဲ လုပ်ဗ္တိုက်တဴ ဍုၚ်ပါန်ကျဝ်ရ။ ပ္ဍဲဍုၚ်ပါန်ကျဝ်ဂှ် ဥပ္ပရာဇာ သၟိၚ်အၚ်ဝ သီုဟွံမွဲ သၟိၚ်မျေတေဝ်ဟေၚ် သှ်ေတဴရ။ သၟိၚ်မျေတေဝ်လေဝ် ကၟာၚ်ဍုၚ်၊ ကြုၚ် မလီုလာ်ဒၟံၚ်တအ်ဂှ် ကဵုပဠေဝ်တုဲ ကၟာၚ်ပါၚ်တြၚ်ဍုၚ် ပခိုၚ်ဒၟံၚ်ဒပ်ရ။ ဒပ်တၠညးရာဇာဓိရာဇ်ဂမၠိုၚ်ဝွံ ဖံက်ကၟာၚ်ဍုၚ်ဟွံမာန် အယာံမာတ် မဗိုၚ်လဝ် မ္ၚးဍုၚ်ဟေၚ်ရ။
ဒပ်မၚ်ဆိုဲ (မင်းဆွေ) မဇက်ကၠုၚ် ဂၠံၚ်သာယျာဝတဳဂမၠိုၚ်ဝွံ စဍုၚ်ပါန်လှေဝ်၊ စဍုၚ်ပေန်ယျ၊ စဍုၚ်သလေန်၊ စဍုၚ်သကု၊ စဍုၚ်ပခါန်၊ စဍုၚ်ဖကါံ၊ စဍုၚ်ညံၚ်ယာန်တအ်ကဵု ဒပ်ဇၞော်ဒ္စာံဒပ် ပါတဴရ။ ဒပ်မၚ်ဆိုဲဂမၠိုၚ်ဝွံ ဇက်ကၠုၚ်ဂၠံၚ်သာယျာဝတဳတုဲ ကါလစိုပ်ဍုၚ်လိုၚ်ဂှ် ဗိုၚ်ဗ္တိုက်တဴ ဍုၚ်လိုၚ်ရ။ ဍုၚ်လိုၚ်ဝွံ ဒှ်ဍုၚ်သၟတ်တုဲ က္လိဂွံအာ ဗွဲမလောဲသွာရ။ တုဲဂှ် ဒပ်စဍုၚ်ပါန်လှေဝ်ဂမၠိုၚ်ဂှ် ဗလးဏါ ကဵုအာဗ္တိုက်ဍုၚ်မုဟ်ဗဳရ။
စဍုၚ်ပါန်လှေဝ်ဝွံ ပ္ဍဲမအာတဴ ဇရေၚ်ဍုၚ်မုဟ်ဗဳဂှ် ဟွံစိစောန်တိဍာ်တုဲ တတ်ဒးအာ အကြာအလဲဒဵုၜါရ။ ဒဒှ်ဝွံ ဒပ်စဍုၚ်မုဟ်ဗဳ အာဲကံဗိန်ဂမၠိုၚ် မတီဂှ် ပဠောဖျေံတၟံကဠောံဂမၠိုၚ် နူလ္တူကုန်ဒဵုတုဲ ဗိုၚ်ပန်ပှော်တဴ နကဵုတ္ၚလဴဂမၠိုၚ်ရ။ ဒပ်စဍုၚ်ပါန်လှေဝ်ဂမၠိုၚ် သီုဟွံဂွံညာတ်ကေတ်သၞ ဒးဘဲတၟံကဠောံ၊ တ္ၚလဴဂမၠိုၚ် ချိုတ်အာဗွဲမဂၠိုၚ်ဂၠၚ်တုဲ ဒပ်စဍုၚ်ပါန်လှေဝ် လီုအာရ။ စဍုၚ်ပါန်လှေဝ်လေဝ် ဒးဘဲဗၞုဟ်တုဲ ချိုတ်အာလ္တူစိၚ်တုဲ ဒပ်စဍုၚ်ပါန်လှေဝ်ဝွံ သီုဟွံစိုပ် မုဟ်ဗဳ ဒပ်လီုတုဲ ဒးဂတးစဴအာအိုတ်ရ။
ဒပ်ဥပ္ပရာဇာ အၚ်ဝ မဇက်ကၠုၚ် ဂၠံၚ်လ္ပာ်တံၚ်ၚူဂမၠိုၚ်ဝွံ နူဍုၚ်ပါန်ကျဝ် ဇက်ကၠုၚ်ဒဵုကဵုစိုပ် ဍုၚ်လိုၚ် ဒၞာဲဒေံညး မၚ်ဆိုဲမၞုံအိုတ်ရ။ အတိုၚ်ရန်တၟံ တမ်မူလမ္ဂး ပံၚ်ကဵုဒပ်ဒေံညး မၚ်ဆိုဲတုဲ ဇက်အာဒဵုကဵုစိုပ် လ္ဂုၚ်တေံရောၚ်။ စိုပ်လ္ဂုၚ်မ္ဂး ပံၚ်ကဵုဒပ်ဍာ် စဍုၚ်မံၚ်မလ သၟိၚ်လိုက်ဖြာတုဲ သွက်ဂွံဇက်အာ ဒဵုကဵုစိုပ် ဗဂေါရ။ ၜိုန်ဂှ် ပ္ဍဲအခိၚ်ဝွံ ညးမပလံၚ်ပရိုၚ် နူသၟိၚ်မျေတေဝ် မၞုံပ္ဍဲပါန်ကျဝ်တေံ စိုပ်ကၠုၚ်တုဲ ဍုၚ်ပါန်ကျဝ်ဂှ် တၠညးရာဇာဓိရာဇ် ဗိုၚ်လဝ်ရောၚ် ဟိုတ်နူမတီတုဲ သွက်ဂွံရီုဗၚ် သၟိၚ်မျေတေဝ်ဂှ် ကောကဵုဒေဴ သီုညးၜါ က္လေၚ်းတးအာ ဇရေၚ်ဍုၚ်ပါန်ကျဝ်တေံရ။ တၚ်ရန်တၟံမူလ မဇက်အာ ဇရေၚ်လ္ဂုၚ်ဂှ် သီုဟွံအာတဴရ။
ပရိုၚ်ဒပ်အၚ်ဝဂမၠိုၚ် မက္လေၚ်ဂတးကၠုၚ် ဇရေၚ်ဍုၚ်ပါန်ကျဝ်ဂှ် ဒပ်ကၚ်အမာတ် မဟာသာမန် ပ္တိုန်ထ္ၜးကဵု ဇရေၚ်တၠညးရာဇာဓိရာဇ် ဗွဲမဂတာပ်အခိၚ်ရ။ တၠညးရာဇာဓိရာဇ်လေဝ် နူကၠာဒပ်အၚ်ဝဂမၠိုၚ် ဟွံစိုပ်ဏီဂှ် ဗ္တိုက်တဴုပ်မၞုံ ပ္ဍဲဍုၚ်ပါန်ကျဝ် ဗွဲမသ္ကာတ်ရ။ စဍုၚ်ပါန်ကျဝ် ဒုၚ်ဒဝ်ခိုဟ်တုဲ ဗ္တိုက်ဟွံဂွံ ဂွိၚ်ဖေက်ဒးဒုၚ်ကြာပ်ဗ္တိုက် ၜါလ္ပာ်တုဲ က္လေၚ်ဆုတ်တိတ် နူဍုၚ်ပါန်ကျဝ်ရ။ ကါလဂှ် ဒပ်သၟိၚ်မျေတေဝ်းမၠိုၚ် တိတ်ကၠုၚ်တုဲ ဗက်ဗ္တိုက်တဴ ဒပ်တၠညးရာဇာဓိရာဇ် မဆုတ်တိတ်အာဂှ်ရ။
ပ္ဍဲမွဲလ္ပာ်ဂှ်လေဝ် ဒပ်ဥပ္ပရာဇာ သၟိၚ်အၚ်ဝဂမၠိုၚ် စိုပ်ကၠုၚ်ဗ္ဒာဲ ဍုၚ်ပါန်ကျဝ်ရ။ တၠညးရာဇာဓိရာဇ်လေဝ် နကဵုစိၚ်အဓရံၚ် ထ္ပက်လုပ်အာ ပ္ဍဲဒပ်ချေဴအၚ်ဝဂမၠိုၚ် နကဵုအသိၚ်ရ။ အပ္ဍဲပေါဲဗ္တိုက်ဝွံ ရမျာၚ်စိၚ်ကရေဲ၊ ရမျာၚ်ချေံကဟဳ၊ ရမျာၚ်ကဵုသမ္တီ၊ ရမျာၚ်ကြဵုဖာဂမၠိုၚ် ဟောကၠံၚ်ဒၟံၚ်ရ။ စိၚ်အဓရံၚ်ဝွံ ဒြဟတ်ခိုဟ်တုဲ ဒပ်ချေံအၚ်ဝဂမၠိုၚ် ဒုၚ်ဟွံမာန် ဗွဲမထုဲထံၚ် ချေံဂမၠိုၚ် ဒေါမ်အိုတ်ရ။ သရာဲဒပ်ဒၞါစိၚ် တၠညးရာဇာဓိရာဇ်ဂမၠိုၚ်လေဝ် ဟိုတ်နူဒးဘဲ ဒပ်ချေံအၚ်ဝဂမၠိုၚ်တုဲ ချိုတ်အိုတ်ရ။ ဒပ်အၚ်ဝဂမၠိုၚ် ဒြဟတ်ဇၞော်လောန်တုဲ ဒပ်သရာဲဒၞါစိၚ်ဂမၠိုၚ် စှ်ေအာတုဲဂှ် စိၚ်အဓရံၚ်လေဝ် ဗ္တဒးပိုတ်အာ အပ္ဍဲပေါဲဗ္တိုက်ရ။ တၠညးရာဇာဓိရာဇ်လေဝ် ဟွံဇၞးရတီဂှ် က္လေၚ်ဆုတ်အာ ဇရေၚ်ဍုၚ်ဟံသာဝတဳတုဲ က္လေၚ်ပ္ကောံဒၟံၚ်ဒြဟတ် ပ္ဍဲဟံသာဝတဳရ။
အပ္ဍဲကောံဓရီု တၠညးရာဇာဓိရာဇ်ဝွံ အမာတ်ဗိုလ်လဗးဂမၠိုၚ် ကောံစိုပ်ဒၟံၚ်တုဲ ဟိုတ်နူပၞာန်ဟွံဇၞး သိုညးဖအိုတ် မုက်မတ် ဟွံကျေဝ်တဴအိုတ်ရ။ တၠညးရာဇာဓိရာဇ်မ္ဂး ဟွံဂွံကဵု ပၟိက်စိုတ်ဂၞပ်စိုတ်ရ။
"ကော်ဘိက်လဝ် စဍုၚ်ဝါန် သၟိၚ်သာံလှေက်ဂှ် ဒဵုကဵုလၟုဟ် ဟွံဂွံစိုပ်ကၠုၚ်ဏီတှ်ေ က္တဵုသ္ပသပုန်ရဟာ"
"ထိၚ်လဝ်စိုတ်ညိအဴ တၠညး... ပၞာန်အၚ်ဝဟေၚ် ပၟိက်ဇၞော်မံၚ်ဒှ်တုဲ ပရေၚ်စဍုၚ်ဝါန်ဂှ် လ္ပသ္ဂုတ်သွာတ်ဏီညိအဴ"
သွက်ဒေါသဂွံပြေ ၜိုန်ရအမာတ်ဒိန် ပ္တိုန်ထ္ၜးကီုလေဝ် တၠညးဝွံ နကဵုစိုတ်ညးသၟတ် သီုကဵုဒေါသမတိတ်တဴ မုက်မတ် ကြံၚ်မ္ၚိုဟ်ဒၟံၚ်ရ။
"ဒပ်အၚ်ဝဂမၠိုၚ် ဖျေဴလဝ်ဒပ် ပ္ဍဲတာလီဂှ် မဒှ်ရအဴတၠညး"
"ပ္ဍဲတာလီ၊ ကွေံဟာ အမာတ်ဇၞော်"
"ဍာံပြမံၚ်ရအဴ၊ ယွံပြောဟိတ်ဇၞော်၊ ဖျေံလဝ်ဒပ် ပ္ဍဲတာလီရောၚ်ဂှ် အဲဍိက် ဂွံညာတ်လဝ်ရအဴ"
"တာလီဟီုဂှ် တာလီုသာ်ဝွံ က္လိဂွံအဓိပ္ပါဲရအဴ၊ တာလီုကဵု ဒပ်လီုဂှ် ဒှ်တဴတုပ်တုပ်ရ။ ဟိုတ်ဂှ်ရ ယဝ်တၠညး တိတ်ဗ္တိုက်မ္ဂး ဒပ်အၚ်ဝ မုချဨကန် ဒးလီုလာ်ရောၚ်၊ အတိုၚ်ကွတ်ပညာဒိတ္ထဳနက္သတ်မ္ဂး ဂၠံၚ်လ္ပာ်တၠညး လာပ်ခိုဟ်ရောၚ်။ ဂၞန်မသှ်ေ ပ္ဍြတၠညးဂှ်လေဝ် တန်ပ္ဍဲမိဿရာသဳရအဴ။ အခါနက္သတ်လေဝ် ခိုဟ်တဴရအဴ"
"သရာဲပခက် ရပ်လွဟ် မၞုံပ္ဍဲပုၚ်ဟံသာဝတဳဏအ် သီုဖအိုတ်းှ် ၜိုတ်မက္လိဂွံ ပ္ကောံလဝ်ညိ၊ ဒပ်အၚ်ဝဂှ် အလဵုဖကုအဲ တိတ်ဗ္တိုက်ဏောၚ်"
"အတိုၚ်အမိၚ်အသံ မပြဲရအဴ"
ဟိုတ်နူကဵု မၚ်ကာန်စဳ မကဵုအခါဂှ် တၠညးရာဇာဓိရာဇ် ဂွံတဴဒြဟတ်တုဲ ပဠေဝ်တဴ သွက်ဂွံထပ်ဗ္တိုက်ကဵု ဒပ်အၚ်ဝ မွဲအလန်ပၠန်ရ။
မြဴသာ်ဝွံ နကဵုအခါ မၚ်ကာန်စဳ မကဵုဂှ် တိတ်အာ သွက်ဂွံ ထပ်ဗ္တိုက်ကဵု ဒပ်အၚ်ဝ အလန်ဒုတိယပၠန်ရ။ ၜိုန်ဂှ် ဒပ်ပၞာန်တိတ်ဗက် က္ဍိုၚ်ဗ္တာၚ်မၞုံလ္တူစိၚ် တၠညးရာဇာဓိရာဇ် မဍိုက် ဓလဲတဴဂှ် ပ္ဍဲကဵုကျာမပိုက် တဲက္ဍိုၚ်ကဝ်တုဲ ဒတုံစှ်ေတိရ။ တၠညးလေဝ် ဘိုတ်နူကဵု က္ဍိုၚ်ဗ္တာၚ်ဒတုံစိုပ်တိ နိမိတ်ဟွံခိုဟ် သာ်ဝွံသ္ဂးတုဲ သီုဟွံဇက်တိတ်ဏီ ဒတူဒေါံဒၟံၚ်ရ။ ဒပ်ပၞာန်မဇက်အာဂှ် သီုဟွံဆက်အာ ဒတူဒၟံၚ် ပ္ဍဲပါၚ်တြၚ်ဍုၚ်တုဲ မၚ်ကာန်စဳလေဝ် ဂွိၚ်တုဲဗက်ကၠုၚ်ရ။ ကါလဂှ် ဂွံညာတ်ကေတ် က္ဍိုၚ်ဗ္တာၚ် ကျာပိုက်တုဲ ဒတုံဒၟံၚ်ပ္ဍဲတိရ။
"အဵု နိမိတ် ခိုဟ်ကွေဴရ၊ က္ဍိုၚ်ဗ္တာၚ် ဒတုံစှ်ေ စိုပ်တိဂှ် ဒှ်တဴနိမိတ် တၠညးဂွံပိုၚ်ပြဳကေတ် တိဍာ်အလုံအိုဿီုရအဴ။ လၟုဟ် ဗ္တိုက်ပၞာန်မ္ဂး မုချဨကန် ဒးအံၚ်ဇၞးရောၚ်အဴတၠညး"
"ကွေံဟာ ကောဇၞော်"
"ဍာံပြမံၚ်ရအဴ၊ မုချဨကန် ဒးဇၞးကေတ် ဒပ်အၚ်ဝရောၚ်။ ဟွံဇၞးမ္ဂး ကဵုရာဒဏ် ကုတ်က္ဍိုပ် အြဍိက်ညိအဴ"
တၠညးရာဇာဓိရာဇ်လေဝ် နူကဵုက္ဍိုၚ်ဗ္တာၚ် ဒတုံစိုပ်တိတုဲ စိုတ်လီုဒၟံၚ်ဂှ် ဟိုတ်နူကဵု မၚ်ကာန်စဳ ကံက်ထ္ၜးကဵုနိမိတ် ဂွံဒြဟတ်တုဲ ဇရေၚ်ဒပ်အၚ်ဝ မၞုံတေံဂှ် ညံၚ်ရဴမေလံၚ် ဇက်တိတ်အာ မွဲအသိၚ်ရ။
ဒပ်တၠညးရာဇာဓိရာဇ် မဇက်တိတ်ကၠုၚ် နူဟံသာဝတဳဂှ် ဒပ်မၚ်ဆိုဲ မဖျေံလဝ်ဒပ် ပ္ဍဲတာလီဂှ်ကီု၊ ဒပ်ဥပ္ပရာဇာ သၟိၚ်အၚ်ဝ မဇက်ကၠုၚ် နူကဵုဍုၚ်ပါန်ကျဝ်ကီု ဂွံညာတ်ကေတ်ရ။
"ယွံကောန်သၟိၚ်၊ ကောယဴကောန်သၟိၚ် ဗ္ကန်နၚ်ရ။ ဒပ်ဗဂေါဝွံ ဂၠံၚ်ဇၞးဟွံမွဲမ္ဂး ဟွံဇက်ကၠုၚ်ပၞာန်ပုဟ် လ္ပဗ္တိုက်ကဵု ဒပ်ဍေံတအ်ဏီညိ။ မၚ်ကောယဴကၠာညိရအဴ"
ဥပ္ပရာဇာ မဒှ်သ္ကိုပ်ဒပ်အၚ်ဝဝွဴ ဗလးမၞိဟ်တုဲ ဗွဲမပြဟ် လ္ပဗ္တိုက်ကဵု ဒပ်ဗဂေါဏီဂှ် ဗ္ကန်ဏါကဵု ဒေံဇကုရ။ မၚ်ဆိုဲတုန်လေဝ် ဂလာန်ကောဇကု ဗ္ကန်နၚ်ဂှ် ဟွံဒးဂၞပ်ရ၊ အတိုၚ်လၟေၚ်မၞိဟ်သၟတ် မိက်ဂွံဗ္တိုက်ဒၟဴၚ်ပၞာန်ရ။
"ကောယဴမွဲလေဝ်၊ သွက်ဂွံဗ္တိုက်ကဵု ဒပ်ဍေံတအ်ဂှ် နူကဵုအၚ်ဝ ဒဵုကဵုစိုပ် ဟံသာဝတဳ ဇက်ကၠုၚ်တုဲရ၊ မုဟိုတ် ဒးမၚ်တဴဏီရော၊ ဟေံ သ္ကိုပ်ဒပ်တအ် ကၠောံကြုၚ်တုဲ ဗ္တိုက်တဴဒပ်ဗဂေါအိုတ်ညိ"
မၚ်ဆိုဲမွဲ ကောယဴဇကု ကဵုမၚ်တဴဂှ် သီုဟွံက္လၚ် သွက်ဂွံဗ္တိုက်ကဵု ဒပ်ဗဂေါဂှ် ကဵုတဴအမိၚ်ကု သ္ကိုပ်ဒပ်ဂမၠိုၚ်ရ။ သ္ကိုပ်ဒပ်ဂမၠိုၚ်လေဝ် ဟွံဂံၚ်စးအမိၚ် မၚ်ဆိုဲတုဲ သွက်ဂွံဗ္တိုက်ကဵု ဒပ်ဗဂေါဂှ် ကၠောံအာကြုၚ်အိုတ်ရ။ ဒပ်ချေံအၚ်ဝ မကၠောံဒၟံၚ်ကြုၚ်ဂှ် တၠညးရာဇာဓိရာဇ် ညာတ်မ္ဂး ကေတ်အခေါၚ်ခိုဟ်တုဲ လုပ်ဗ္တိုက်တဴ ဗွဲမသ္ကာတ်ရ။ ဒပ်အၚ်ဝဝွံ ပ္ဍဲကဵုကၠောံကြုၚ်ဂျ် ဟိုတ်နူဒးဒုၚ်ဗ္တိုက်တဴ မွဲအသိၚ်တုဲ သီုဒုၚ်ဒဝ်ဟွံမာန် ဒှ်ဒၟံၚ်ရုရုသံၚ်သံၚ်ရ။ ဟိုတ်နူကဵု လၟက်သရီု ပ္ဍဲကဵုကြုၚ်တုဲ ချေံအၚ်ဝဂမၠိုၚ် ဒုၚ်ဒဝ်ညံၚ်ရဴ လ္တူဗလးဟွံမာန်ရ။ ဥပ္ပရာဇာ ၜိုန်ရညာတ်ကီုလေဝ် ဒပ်ဟံသာဝတဳဂမၠိုၚ် ဒြဟတ်ဇၞော်လောန်တုဲ ဟွံဂံၚ်လုပ်ဗ္တိုက်ရ။ ဒပ်မၚ်ဆိုဲဂမၠိုၚ်လေဝ် ဟိုတ်နူမဒုၚ်ဒဝ်ဟွံမာန် ဒပ်လီုတုဲ ဂြိပ်ပေက်အာအိုတ်ရ။ ကောယဴညး ဥပ္ပရာဇာလေဝ် ဟိုတ်နူကဵုဒေံဇကု ဒပ်လီုဂှ်ရ နုက်ဒပ်တုဲ ဒးက္လေၚ်စဴအာရ။ စဍုၚ်မံၚ်မလ သၟိၚ်လိုက်ဖြာ မၞုံပ္ဍဲလ္ဂုၚ်ဂှ်လေဝ် ဒပ်အၚ်ဝဂမၠိုၚ် ဟွံစိုပ်ကၠုၚ် ဒပ်လီုရဴသာ်ဝွံ ဂွံမိၚ်ကေတ်မ္ဂး က္လေၚ်ဂတးစဴအာ မံၚ်မလတေံရ။