လျးအရှိုဏ် ဟံသာဝတဳ (သ္ကုတ်ဒုတိယ၊ ပိုဒ်-၃) ပ္ဍဲကောဇာ သက္ကရာဇ် ၇၄၉ သၞာံဂှ် အလဵုဇကု သၟိၚ်အၚ်ဝ မၚ်ဂဳဆွာ ဇက်ကၠုၚ်ပၞာန် ဇရေၚ်ဍုၚ်ဟံသာဝတဳရ။ ပ္ဍဲဒပ်တိုက်ဂှ် ကဵုတဴကောန်ညး ဥပ္ပရာဇာ သ္ကိုပ်သ္ကတုဲ စဍုၚ်တံၚ်ၚူ၊ စဍုၚ်တံၚ်တွေၚ်၊ စဍုၚ်ရမေဝ်တေၚ်၊ စဍုၚ်ပေန်လှေဝ်၊ စဍုၚ်မျေန်စိုၚ်၊ စဍုၚ်ကလေ၊ စဍုၚ်ပေန်ယျ၊ စဍုၚ်ညံၚ်ယျာန်၊ စဍုၚ်တပေန်ယျ၊ သီုမပွဳဗွိုၚ်ကေတ် ဒပ်စဍုၚ်ဂမၠိုၚ် ဒ္စိတ်ဒပ် စိၚ် ပန်ကၠံ၊ ချေံ တြဴဠက်၊ ဗိုလ်လဗး မွဲကိုဋ်ၜါဠက် ပါတဴရ။ ပ္ဍဲဒပ်ဍာ်တုန် စဍုၚ်ပြန်၊ စဍုၚ်မျေတေဝ်၊ စဍုၚ်စကု၊ စဍုၚ်သလေန်၊ စဍုၚ်ပခါန်၊ စဍုၚ်သကိုၚ် ကေုာံ ကောန်ပၞာန်သေံဇၞော်ဂမၠိုၚ် ပါတဴရ။ ပ္ဍဲဒပ်ဍာ်ဝွံ နကဵုဂၠုၚ်ယာ၊ ဂၠုၚ်ဒုန်၊ ဂၠုၚ်သရာဲ လ္ၚီ၊ ဂၠုၚ်ဗ္တိုက် လ္ၚီၜါကၠံ ပွဳဗွိုၚ်လဝ် ဖံၚ်ထဝ် တၠညးအၚ်ဝတုဲ ဖေက်ကၠုၚ်ရ။ ပ္ဍဲဒပ်ဍာ်ဝွံ ဒြဟတ်သရာဲ ၜါကိုဋ်ပြၚ် ပါတဴရ။ ပ္ဍဲဍုၚ်အၚ်ဝတေံတုန် ကဵုကောန်ညး မၚ်ဆိုဲ မၚ်မွဲလဝ်ဍုၚ်ရ။ ~~~~~~~~~~~~~~~~~ ဒပ်ဍာ်ဇၞော် စဍုၚ်မံၚ်မလ သၟိၚ်လိုက်ဖြာဝွံ သီုကဵုမဗြုတဴဓဗိုန် မဇက်အာ ဗ္ဒာဲဍုၚ်ဒလ ဒၞာဲမညဳကာန်ကံၚ်မၞုံဂှ် စဍုၚ်ဒလ မညဳကာန်ကံၚ် ဂွံက္လေၚ်ညာတ်ကေတ် မရနုက်ကဵု အလန်ဒုတိယရ။ နကဵုဂၠုၚ်ယာ၊ ဂၠုၚ်ဒုန်၊ ဂၠုၚ်သရာဲ လွဟ်လက်နက် ဗွဲမဍိုက်ပေၚ် ဗြုဓဗိုန်ဇၞော်တုဲ ဇက်တိုန်ကၠုၚ်ဒၟံၚ်ရ။ ဒပ်စဍုၚ်မံၚ်မလဝွံ သီုအလန်ဏအ်ဟီုမ္ဂး တတ်အာတဴ ဍုၚ်ဇကုမစဒၟံၚ် ဂွံအာၜါအလန်ယျတုဲ သီုမံၚ်ဟွံဂွံ သွက်ဂွံသၟာန်တဴ ပရောမဇက်အာဂှ်တုဲ ပဠေဝ်တိုန် သွက်ဂွံအာဇရေၚ် ဖံၚ်စဍုၚ်မံၚ်မလဂှ်ရ။ ပ္ဍဲကသပ်စိုတ် မညဳကာန်ကံၚ်တေံ သီုဇကု မနွံတဴဒၟံၚ် ပ္ဍဲဒလဖိုဟ် ဒပ်စဍုၚ်မံၚ်မလ မဇက်အာတဴ ဇရေၚ်ဗဂေါဂှ် ပွဟွံသ္ပဂရုကဵုဇကုရ သာ်ဝွံ ချပ်တဴဒၟံၚ်ရ။ ဟိုတ်ဂှ်ရလေဝ် ကော်ကေတ် ကောန်ဇကု ဗဝ်ကျဝ်တုဲ သီုကဵုဍိက်သ္ကအ် ကၠုၚ်တဴဇရေၚ်ဖံၚ် စဍုၚ်မံၚ်မလရ။ အပ္ဍဲဖံၚ် စဍုၚ်မံၚ်မလ သၟိၚ်လိုက်ဖြာတုန်သရာဲပၞာန် ကေုာံ သ္ကိုပ်ဒပ်ဂမၠိုၚ် ဂၠိုၚ်ဂၠၚ်တဴ ဗွဲမလောန်ရ။ သ္ကိုပ်ဒပ်ဂမၠိုၚ်တအ်ဂှ်လေဝ် ဒှ်တဴဒၟံၚ် ကောန်ခမာန် စဍုၚ်မံၚ်မလဂမၠိုၚ်ရ။ ကါလမညဳကာန်ကံၚ် စိုပ်အာဂှ် စဍုၚ်မံၚ်မလ သၟိၚ်လိုက်ဖြာဝွံ ဗွဲမအိုဟ်တၟိုဟ် ဒုၚ်တၠုၚ်တုဲ ဒုၚ်တၠုၚ်ကၟုဲ နကဵုအရက်ရ။ အရပ်အစပ်ဂမၠိုၚ်လေဝ် ပေၚ်တဴဒၟံၚ် နကဵုရတ်ဂမၠိုၚ်တုဲ ပ္ဍဲဗ္ဒာဲဂှ်လေဝ် ညးပ္တုဲဝတ် ဍိက်ဗြဴဂမၠိုၚ် ဂၠိုၚ်ဂၠၚ်တဴ ဗွဲမလောန်ရ။ "ယွံကၟိန်အဲ စဍုၚ်ဒလ၊ ကၠုၚ်ကဵုအရီုဗၚ်ပၞာန် ကုအမူဟာဟေံ" စဍုၚ်မံၚ်မလ ဟီုဏါကဵု မညဳကာန်ကံၚ် ညံၚ်ရဴသ္ပစရဵု အီအီဂြိုၚ်ဂြိုၚ်တုဲ လ္ၚာ်သုၚ်ထောံ ခေါ်အရက်ဂှ်ရ။ မညဳကာန်ကံၚ်လေဝ် ဟွံသ္ဂးတဴဂလာန် ဗဵုရံၚ်ဒၟံၚ် စဍုၚ်မံၚ်မလ စေအ်အ်ရ။ "ကၟိန်အဲဏအ်လေဝ် ဒေံဍေံဒှ်သၟိၚ်ရဂှ် ပဠောံခြပ်ခိုဟ်ဟ် ဟွံမွဲဏီဖိုဟ်၊ ကါလအမူ က္လေၚ်စဴကၠုၚ်မ္ဂး ကဵုဏါၝ ပဠောံခြပ်ခိုဟ်ဟ် မွဲစုမ်ဏောၚ်... ဟာ... ဟာ... ဟာ..." စဍုၚ်မံၚ်မလဝွံ တုပ်တဴညံၚ်ရဴ ညးမသုၚ်ဒၟံၚ်အရက် လၟိုန်လၟိုန်မွဲရယ မွဲခေါ်တုဲမွဲခေါ် ဘိြန်သုၚ်ဖျေံဒၟံၚ်ကီုလေဝ် ဗီုပြၚ်ဂွံဗ္ၜူအာဂှ် ဟွံမွဲရ။ မညဳကာန်ကံၚ်ဝွံ ကါလအာဇရေၚ် စဍုၚ်မံၚ်မလဂှ် ဟိုတ်နူဒှ်ဒၟံၚ် ကယျိုၚ်သာမညဓဝ်တုဲ စဍုၚ်မံၚ်မလ သ္ဂးတဴဟေၚ်ရ။ "သီုအဲမၞုံဒၟံၚ် ပ္ဍဲကဵုဒလဏအ်ဖိုဟ်ဂှ် အမူဇက်အာဗဂေါတေံ ဂွံဒၟံၚ်ကီုရဟာ" မညဳကာန်ကံၚ်ဝွံ သီုကဵုမဂ္ဇအ် ဆိုၚ်တဴမုက်ကဵု စဍုၚ်မံၚ်မလ မွဲခေါ်ဟွံသုၚ်တဴအရက် သ္ၚဳရံၚ်တဴ စဍုၚ်မံၚ်မလ စေအ်စေအ်တုဲ သ္ဂးတဴရ။ စဍုၚ်မံၚ်မလလေဝ် ဟိုတ်နူဂလာန် မညဳကာန်ကံၚ်တုဲ ခေါ်အရက်ရပ်လဝ် မဆိၚ်သုၚ်တဴဂှ် စိုပ်ကြပ်သၟန်ပါၚ်မှ ဗွဲမပြဟ် က္လေၚ်စွံဖျေံ လ္တူခုၚ်ပၠန်ရ။ "ကၟိန်အဲဏအ် ဒိုဟ်ကွေံရဏး၊ ဒေံၝ ဂွံဂ္ဇအ်နန် ဟံသာဝတဳရဂှ် မုကဵုလဝ်ၝ မုကီုရော၊ ဗညာနဲ တိုန်နန်တုဲ မုကဵုလဝ်ၝကီုရော၊ ၝဇက်အာပၞာန်တုဲ ရီုဗၚ်လဝ် ညံၚ်သ္ဂောံက္လိဂွံနန်ကီုလေဝ် မုၝ က္လေၚ်ဂွံလဝ်ကီုရော" စဍုၚ်မံၚ်မလ ဆုဲကြပ်လုပ်အာကဵု မုက္ခဝါ မညဳကာန်ကံၚ်တုဲ မဟီုတဴဝွံ အရာမဒးဒျ်သၠေဟ်ပၟာရ။ ဟိုတ်နူကဵုဂလာန် စဍုၚ်မံၚ်မလတုဲ မညဳကာန်ကံၚ်လေဝ် ဒေါသတိတ် မုက်မတ်ဍာဲဂြၚ်ဒၟံၚ်တုဲ ကေမ်လဝ်သတ်တဲ ဗွဲမကၟောန်ရ။ "နာ ဍုၚ်ဒလဏအ် ဒေံအဲ...." "ဍုၚ်ဒလ ဟဂှ်ဟာ၊ ဍုၚ်ဒလ ၝဟီုသေၚ်ဟာ၊ ဟာ... ဟာ... ဟာ... ဍုၚ်ဒလ ၝစဒၟံၚ်လၟုဟ်ဏအ်ဟီုဂှ် အနာဲၝ ကောအဲ တၠညးစိၚ်ဗ္တာၚ် ကဵုစလဝ်ဏောၚ် ဟွံသေၚ်ဟာ၊ ကၟိန်အဲ ချပ်ကဵုချိုတ်ပၠိုတ်ညိ" စဍုၚ်မံၚ်မလ သၟိၚ်လိုက်ဖြာဝွံ ခေါ်အရက် မစွံလဝ် နူကၠၚ်ဏအ်ဂှ် လ္ၚာ်သုၚ်ထောံတုဲ ခေါ်သၟးဟေၚ် က္လေၚ်စွံဖျေံ လ္တူခုၚ်ဂှ်ရ။ တုဲဂှ် ရပ်ကေတ် ဒဂေါၚ်အရက်တုဲ ထပ်စဝ်ဖျေံဒၟံၚ် ပ္ဍဲကဵုခေါ်ထဝ်ဂှ်ပၠန်ရ။ မညဳကာန်ကံၚ်လေဝ် ဟိုတ်နူကဵုဂလာန် စဍုၚ်မံၚ်မလတုဲ နူကဵုဒေါသ မတိတ်ဂှ် ဘိုၚ်ဘုဲကၠုၚ်တုဲ မုလေဝ် ချပ်ဟွံဂွံ၊ မုရဴမွဲကီုလေဝ် ဟွံညာတ်တဴရ။ "ဟေံ... ကၟိန်အဲ တၚ်ၝဟွံတီမွဲဂှ် အမူ လဴထ္ၜးကဵုဏောၚ် က္လၚ်စမ်၊ လၟုဟ် သၟိၚ်အၚ်ဝ မၚ်ဂဳဆွာဝွံ နကဵုဒပ်ဍာ်၊ ဒပ်တိုက် ၜါသွာၚ် ဇက်ကၠုၚ်ဒၟံၚ် ဟံသာဝတဳရ။ အလန်ကၠာဂှ် ကောန်ညးၜါ ကောပ်ကာဲ ပရေံတုဲ ၜိုန်ဒးက္လေၚ်စဴအာကီုလေဝ် လၟုဟ်ဏအ် အလဵုဇကုညး ဇက်ကၠုၚ်ရ။ ဒပ်ဇၞော်အၚ်ဝဝွံ နကဵုဒေံၝ ဟွံဂွံထပိုတ်လဝ်တှ်ဏီဂှ် ဒုၚ်မာန်ညိဟာ... ဟာ... ဟာ... ဟာ..." စဍုၚ်မံၚ်မလဝွံ အရက် မစဝ်လဝ်ဂှ် လ္ၚာ်သုၚ်ထောံ မွဲအလန်ဓဝ်တုဲ က္လေၚ်စွံဖျေံ ခေါ်ဂှ်ရ။ "နူအဃော ဗညာနဲ နွံလ္ဂုၚ်တေံဂှ် ၝတာဒၞါအဲ ညံၚ်ဟွံဂွံ ရီုဗၚ်ပၞာန်တုဲ ကဵုဂတးစဴအာရ။ အဲလေဝ် ဟိုတ်နူတီတဴ သီုဒဒှ်ပြယာဲ မဟာဒေဝဳတုဲ စဴအာရ။ အလန်ဏအ်တှ်ေ အဲဟွံစဴပုဟ်၊ ညးမဒးဂတးစဴဂှ် အဲဟွံသေၚ်ရ၊ အလဵုဇကုၝရ ကၟိန်အဲ။ ကါလပိုဲတအ် ဗ္တိုက်ကဵု ဗညာနဲမ္ဂး လ္ပာ်လဵုမွဲလေဝ် ၝဟွံပါတုဲ မၚ်ဗဵုဒၟံၚ်ညိ။ ညးလဵုဇၞးမ္ဂး ၝဒုၚ်သစ္စ မာန်ရ၊ စိုပ်မွဲအခိၚ် သွက်ၝဂွံ ဒုၚ်သစ္စ ဂၠုၚ်မတိုန်ကၠုၚ်ဂှ် ဒးဒှ်တဴ ဂၠုၚ်အဲရောၚ် ဟာ... ဟာ..." စဍုၚ်မံၚ်မလဝွံ လောန်ကၠေံထောံ သတ်ဆုမၞုံ ဂတမုက် ဇကုဂှ်တုဲ အာဏောဝ်ဍိုတ်ကေတ် ကပရာန် မၞုံပ္ဍဲပ္ၚာန်ပရဵုတေဴတုဲ ကၠဟ်ပၠုပ် ပ္ဍဲသၟန်ပါၚ်တေံရ။ ဟိုတ်နူကဵုဂလာန် စဍုၚ်မံၚ်မလတုဲ မညဳကာန်ကံၚ်လေဝ် ဂတးစဴကၠေံ နူကဵုလ္တူဖံၚ် စဍုၚ်မံၚ်မလရ။ "ကၟိန်အဲ ချပ်လ္ပကဵုဗၠေတ်ညိ၊ သွက်ဂွံဗ္တိုက်ကဵု ဗညာနဲ သရာဲၜိုတ်မၞုံပၟိက်ဂှ် ကၠုၚ်ကေတ် ဇရေၚ်အမူညိ..." မညဳကာန်ကံၚ်ဝွံ ကရဴကၠေံစးကဵု စဍုၚ်မံၚ်မလ မၞုံလ္တူဖံၚ်ဂှ်တုဲ ဟိုတ်မစဴကၠုၚ်ဂှ်ရ ဂလာန်စဍုၚ်မံၚ်မလဂှ် မိၚ်ညိ ဟွံမိၚ်ကေတ်ညိရ။ ကါလမညဳကာန်ကံၚ်တအ် က္လေၚ်စိုပ်ကၠုၚ် သြၚ်လ္ပာ်ဍုၚ်ဒလဂှ် ဒပ်ဍာ်စဍုၚ်မံၚ်မလဂမၠိုၚ် ဆက်တုဲ ဇက်အာအိုတ်ရ။ ကောန်ညးဗဝ်ကျဝ် ဆိၚ်ဗ္တိုက်ဂှ် တာတဲတုဲ ဒၞါကၠေံရ။ မညဳကာန်ကံၚ်ဝွံ နူကဵုမက္လေၚ်စဴကၠုၚ် ဇရေၚ်စဍုၚ်မံၚ်မလတုဲ သီုဟွံတၟးဇး သောၚ်ခဍောၚ် ညံၚ်ရဴကၠာကၠာတေံ ဇၟာပ်ပ်အခိၚ် မုက်မတ်ဇြကှ်တုဲ ချပ်စၚ်ခြၚ်ဒၟံၚ်ရ။ ဗဝ်ကျဝ်ဂှ်တှ်ေ နကဵုစိုတ်ဓါတ်ညးသၟတ် ဗွဲမဍိုက်ပေၚ် ဟိုတ်နူဟွံဂွံဗ္တိုက်၊ တာဒၞါတဴ စဍုၚ်မံၚ်မလတုဲ ဟွံဂွံဒၟံၚ်ကဵု တရိုပ်စိုတ်ရ။ ~~~~~~~~~~~~~~~~~ "ရိုၚ်ဇိုၚ်ကွေံရ၊ အဲဏအ် တၠတိဍာ်ဂးတုဲ ဗွဲမရှ်ေသှ်ေရဴဂဴ ပလံၚ်ဏါ လိက်သဝဏ်ကီုမှ ဟွံကေတ်ဂလာန်အဲ၊ ကေတ်တဴဂလာန် ညးမသ္ပသပုန်ရ၊ အလန်ဏအ်တှ်ေ ဒးဆဵုဂဗကဵု တၠညးဍုၚ်အၚ်ဝဏီရ" တၠညးရာဇာဓိရာဇ် မဂွံမိၚ်ကေတ် သၟိၚ်ဍုၚ်အၚ်ဝ မၚ်ဂဳဆွာ မဇက်ကၠုၚ်ပၞာန်ဝွံ ဒေါသတိတ်ဒၟံၚ် ဗွဲမလောန်ရ။ ဟိုတ်နူတၠညး ဒေါသတိတ်ဒၟံၚ်တုဲ ညးပ္တုဲဝတ်ဂမၠိုၚ်လေဝ် ဖေက်လကိုတ်ဒၟံၚ်အိုတ်ရ။ အမာတ်ဍောတ်တ်ဂမၠိုၚ်လေဝ် ဟွံဂံၚ်လ္ၚာ်ယာမုက်အိုတ်ရ။ "တၠညးအၚ်ဝ ဖျေံလဝ်ဒပ် ဒၞါဲလဵုရော" "ဍာံပြဒၟံၚ်ရအဴ၊ ပ္ဍဲဌာန်အလဲရအဴ" "ခိုဟ်ရ၊ အမာတ်ဒိန် သရာဲၜိုတ်မၞုံဂှ် ပ္ကောံတုဲ ဒုၚ်လတ်ပ္ဍဲဍုၚ်လိုၚ် ညံၚ်ဂွံမာန်ညိ။ ညံၚ်ရဴအလန်ကၠာတေံ လ္ပကဵုစှ်ေအာ တဲဍေံညိ၊ အလဵုဇကုအဲ ဇက်ပၞာန်တုဲ ဗက်အာဏောၚ်" "အတိုၚ်အမိၚ် အသံရအဴ" အမာတ်ဒိန်လေဝ် အမိၚ်စှ်ေယျဒှ်တုဲ သွက်ဂွံတိတ်ပၞာန် လ္ၚောဝ်တၠညးတုဲ စဴအာ ဗွဲမပြဟ်ရ။ အမာတ် မဟာသာမန်လေဝ် ဟိုတ်နူဗက်စဴအာ လက္ကရဴ အမာတ်ဒိန်တုဲ ပ္ဍဲခဒမ်တၠညး မသ္ပဒ္တဴဂှ် သှ်ေဒၟံၚ်အယာံမာတ် တၠညးကဵု ညးပ္တုဲဝတ်ဂမၠိုၚ် ဟေၚ်ရ။ တၠညးဝွံ ပၞောတ်ဒေါသ ဟွံပြေဏီတုဲ သီုကဵုမကေမ်လဝ် သတ်တဲ ပရံၚ်လဝ်တုဲ သ္ၚဳရံၚ်ဒၟံၚ် မမိက်ကဵုမွဲမွဲ စူစူစၚ်စၚ်ရ။ အမာတ်ဒိန်ဝွံ ဍိုက်ဒပ်တုဲ နူကၠာတၠညး ဟွံဂွံဇက်အာဏီ တိတ်အာ ဇရေၚ်ဍုၚ်လိုၚ်တေံရ။ တၠညးကီုလေဝ် ပွဳဗွိုၚ်ကေတ် သၟိၚ်သာံပြာပ်၊ သၟိၚ်ယောဂရာဇ်၊ သၟိၚ်ရတ္တသံၚ်ရာံ သၟိၚ်ဇိပ်ဗြာဲတအ်တုဲ နကဵုစိၚ် ၜါကၠံ၊ သရာဲ တြဴဠက် ဇက်အာဇရေၚ် မုဟ်ဗဳရ။ ဍုၚ်လိုၚ်ဝွံ နူကဵုတၠညး ရာဇာဓိရာဇ် ဟွံဂွံတိုန်နန်ဏီတေံ ဒှ်မံၚ်အယာံမာတ် ဍုၚ်ဒပ်ဆုသၟတ်မွဲရ။ ပၞာန်အၚ်ဝ အလန်ပထမတုဲ သွက်ဂွံစဵုဒၞာ ဘဲပၞာန်အၚ်ဝ သြိုၚ်ပ္တန်ကၠုၚ် နကဵုကၟာၚ်ဍိုတ်၊ ကြုၚ်ဂမၠိုၚ်ရ။ မၞုံတန်ဒၟံၚ် ပ္ဍဲသြၚ်ၜဳလိုၚ် လ္ပာ်ပလိုတ်တုဲ လ္ပာ်သၠုၚ်ကျာဂှ် သာယာဝတဳ၊ လ္ပာ်သၟဝ်ကျာဂှ် ရေၚ်ဒၟံၚ်ကဵု ဍုၚ်မုဟ်ဗဳရ။ အမာတ်ဒိန်ဝွံ သီုကဵုမလ္တက် ပဠောံခြပ် အရံၚ်သာ်ဆီစာၚ် ရပ်လဝ်ဇြၚ်တုဲ သီုမဂေတ်တဴဒၟံၚ် လ္တူကၟာၚ်ဍုၚ် ဗၟံက်ပလိုတ် ကောပ်ကါဲဒၟံၚ် သရာဲဂမၠိုၚ်ရ။ အမာတ်ဒိန်ဝွံ ညာဏ်ပညာဇၞော်ဒၟံၚ် ညံၚ်ရဴမတ်မၞိက်ရတ်တုဲ ဂုဏ်စရာဲပညာဂမၠိုၚ်လေဝ် ပ္ဍဲဟံသာဝတဳဝွံ တၟးတဴဒၟံၚ် ညံၚ်ရဴသၟိၚ်တ္ၚဲရ။ ကြဴနူကဵု မာံဇြဲတၞုၚ် ဟွံမွဲတုဲ အမာတ်ဒိန်ကဵု အမာတ် ရာဇာမနုတအ်ဟေၚ် ဒှ်တဴဒၟံၚ် မတ်၊ ကတောဝ်၊ က္ဍိုပ် တၠညးဂမၠိုၚ်အိုတ်ရ။ အမာတ်ဒိန်လေဝ် ဒှ်ညးမကြံၚ်မ္ၚိုဟ်မွဲ ဟွံသေၚ်တုဲ ၜိုန်ရခန္ဓကာယ ဇၞော်ဇၞော် ညံၚ်ရဴသ္ကိုပ်ပၞာန် တၞဟ်ဂမၠိုၚ် ဟွံသေၚ်ကီုလေဝ် နကဵုခန္ဓကာယ ဟွံဇြာဲ ကၟောန်ဓရောန် တန်ကြန်တုဲ မၞုံကဵုမုက်မတ် ဂၠိၚ်ဒၟံၚ်ညိ၊ သော်ပါၚ်မၞုံတဴဒၟံၚ် ကြဳကြဳရ။ ဓလဲခၟံက်ဂၠေံတုဲ ကါလကျိုၚ်ကဵု ကယျိုၚ်ပၞာန်မ္ဂး သပ္ပါဲဒၟံၚ် ညံၚ်ရဴသ္ကိုပ်ပၞာန်သၟတ်မွဲရ။ သရာဲပၞာန် နူဒပ်ဍာ်အၚ်ဝ မဖျေံလဝ်ဒပ် ပ္ဍဲၜဳဂမၠိုၚ် ခြာဟွံလအ် ကြပ်လုပ်တိုန်သြၚ်တုဲ ဗ္တိုက်တဴရောၚ်။ ဒဵုကဵုဥတုဗြဲအိုတ် ပ္ဍဲဒိုဘ်ဗာယပ်တုန် ကဠောံမတ်ဗြဲ သာ်လမ္စံက်ဂမၠိုၚ် ဇၟာပ်စိုပ်အခိၚ်တ္ၚဲဒစေၚ်သဝ် တိုန်ကၠုၚ်လေပ်အိုတ်ရ။ ၜိုန်ဂှ် ဂူတဴဟွံသေၚ် ဟဳသ္ပဝ်ကၠေံဗ္ဒန်အာအိုတ်ရ။ ကၟာၚ်ဍုၚ်ဝွံ သၠုၚ်တဴ ကြပ်စှ်မသုန်ပေတုဲ သၞတအ်ဂွံတိုန်မာန် ဟွံလောဲသွာရ။ သာ်ဂှ်ကီု ကြုၚ်ဝွံလေဝ် သၠဲဒၟံၚ် ကြပ် မွဲကၠံပေရ။ နကဵုအစဳရေၚ် အမာတ်ဒိန် ပြာသာဒ်၊ ကအ်ကၠတ်ကၟာၚ်တအ်ဂှ် ညံၚ်ဂွံဂီုကၠီု ပဠေဝ်ပဠေတ်တုဲ အပ္ဍဲကဵုကြုၚ်ပၠန်လေဝ် ညံၚ်ဒပ်သၞဂမၠိုၚ် ဂွံတတ်ကၠောံ ဟွံလောဲသွာဂှ် ပစူလဝ်၊ တိုၚ်နှက် ကေက်က်အိုတ်ရ။ ပ္ဍဲအခိၚ်တ္ၚဲစေၚ် သၟဝ်လျးအရံၚ် ဟဗုၚ်ဟဗုၚ်ဟပါဟပါဝွံ ဒပ်အၚ်ဝဂမၠိုၚ် သီုကဵုမဗြုတဴဖမ်ပၞာန် ညံၚ်ရဴဂၠဴသ္ကအ်အရိုၚ်ကီု ဇက်လုပ်တိုန်ကၠုၚ် ဇရေၚ်ဍုၚ်လိုၚ် မွဲအသိၚ် ဗွဲမသ္ကာတ်အိုတ်ရ။ နူအလန်ကၠာဂှ်လေဝ် ကၠုၚ်ဗ္တိုက်လဝ်တုဲ ဟိုတ်နူဖံက်ထ္ကးကၟာၚ်ဍုၚ် ဟွံမာန်တုဲ ဒးဆုတ်က္လေၚ်အာ ဗွဲမဟောံဗြမ်ရ။ အလန်လၟုဟ်ပၠန်လေဝ် သွက်ဂွံဗက်တမ်ပၠန်ဂှ် ဇက်ကၠုၚ်အိုတ်ရ။ ဒပ်အၚ်ဝသၟး ဟွံသေၚ်ဏီ သရာဲစဍုၚ်မံၚ်မလဂမၠိုၚ်လေဝ် ပါကၠုၚ်မွဲစွံအိုတ်ရ။ ဒပ်တ္ၚ ဟံသာဝတဳဂမၠိုၚ်ဝွံ နကဵုတ္ၚလဴဂမၠိုၚ် ကေတိဒၟံၚ်ဒၞာဲ ပ္ဍဲအကြာလ္တူကၟာၚ်ပုၚ် ဒၞာဲဗ္ဒအိုတ်ရ။ ဟိုတ်နူဟွံဂွံအမိၚ် နူအမာတ်ဒိန်ဏီတုဲ သီုဟွံဂွံပန်ဏီ နကဵုမၚ်လဝ်ဂွန် မၚ်ဒၟံၚ်အမိၚ်အိုတ်ရ။ အမာတ်ဒိန်လေဝ် သီုကဵုမရပ်လဝ်ဇြၚ် မံၚ်လ္တူပြဍုၚ်တုဲ မၚ်ရံၚ်ဒၟံၚ် သရာဲအၚ်ဝ၊ မံၚ်မလးမၠိုၚ် သီုမတ်ဟွံခရေတ်ရ။ ၜိုတ်ဒပ်အၚ်ဝ ဗြုရမျာၚ်ဇက်တိုန်၊ မဗြုလလောၚ်ဒၟံၚ်ကီုလေဝ် ဒပ်ဟံသာဝတဳဂမၠိုၚ်တုန် သီုကဵုမသ္ၚိတ်ဇြ မၞုံဒၟဴၚ်အပ္ဍဲ ဍုၚ်လိုၚ်အိုတ်ရ။ သၟိၚ်တ္ၚဲလုပ် ဂၠုဗ္ဒန်အာရဒှ်တုဲ ဂွံညာတ်ကေတ်ဒပ်သၞ မဇက်တိုန်ကၠုၚ် ဗွဲမဟဗုၚ်ဟပါရ။ ကောန်ဒပ်အၚ်ဝ သီုကဵုမရပ်လဝ် ဗၞုဟ်၊ ဇြၚ်ဂမၠိုၚ်ဂြိပ်လုပ်ကၠုၚ်ဒၟံၚ်ဂှ် စိုပ်ကၠုၚ်ဗ္ဒာဲ ကြုၚ်အိုတ်ရ။ ဒပ်ချေံမမံၚ်ဒၟံၚ် လက္ကရဴဂမၠိုၚ်လေဝ် ကြပ်လုပ်ပါဗက်ကၠုၚ်အိုတ်ရ။ ကောန်ဒပ်သၞလ္ၚဵုဝွံ သွက်သ္ဂောံကၠောံကြုၚ်ဂှ် ပဠေဝ်တဴဒၟံၚ် ဂၠုၚ်သာအိုတ်ရ။ အခိၚ်ဂှ် ဇရေၚ်ဒပ်သၞဂမၠိုၚ် ညံၚ်ရဴဗြဲပၟတ် မဂူစှ်ေကီု ကောန်လဴမဒစုက်လဝ်ပၟတ်ဂမၠိုၚ် ပြဟ်စှ်ေကၠုၚ်ဒၟံၚ် ညံၚ်ရဴပ္ကဴပၟတ်ရ။ ပွဳပွူမဂၠုဗ္ဒန်ဒၟံၚ်ဂှ် ဟိုတ်နူကဵု ပၟတ်တ္ၚလဴတုဲ ဂွံညာတ်အာ ဒဵုကဵုသၞိၚ်မၞိဟ် မံက်ပြာကတ်ရ။ "ပန်..." ရမျာၚ်ကဵုအမိၚ် အမာတ်ဒိန် နူလ္တူကၟာၚ်ဍုၚ်၊ သီုကဵုရမျာၚ်အမိၚ် ကောန်လဴ မလံက်လေတ်လဝ် နကဵုဂျိဂမၠိုၚ် လှောဝ်လုပ်အာ ဇရေၚ်ဒပ်သၞဂမၠိုၚ် မွဲအသိၚ်ရ။ သၞဂမၠိုၚ် ဒေါမ်စှ်ေအာဂၠိုၚ်တုဲ ချေံဂမၠိုၚ်လေဝ် ဒေါမ်ဒၟံၚ်အိုတ်ရ။ ဒပ်ဟံသာဝတဳဂမၠိုၚ်ဝွံ နကဵုလျးအရံၚ် တ္ၚလဴပၟတ် မပန်ဗလးဏါလဝ် ကိုပ်ကၠာဂှ်ဟေၚ် သ္ဂောံဆိၚ်ကေဝ် ပန်ဂစိုတ်ကၠေံ သၞမၞုံဒၟံၚ် မ္ၚးကၟာၚ်ဍုၚ်တေံမာန်ရ။ လ္ပာ်ဒပ်သၞကီုလေဝ် က္လေၚ်ပန်ဏါ လ္တူကၟာၚ်ဍုၚ် နကဵုတ္ၚလဴကီုရ။ ဟိုတ်နူဒၞာဒၟံၚ် ဗ္ဒန်ဒၞာကၟာၚ်ဍုၚ်တုဲ ကောန်လဴသၞဂမၠိုၚ် ဒးကၟာၚ်ဍုၚ်တုဲ ပြဟ်ဒတုံစှ်ေအိုတ်ရ။ ကောန်လဴလ္ၚဵုဂမၠိုၚ်လေဝ် စၚ်ဒၟံၚ် ပ္ဍဲကဵုဒယိုၚ်၊ ကၟဳပြကၟာၚ်အိုတ်ရ။ အမာတ်ဒိန်လေဝ် သီုကဵုမကေါပ်ကါဲဒပ် ကောန်လဴ မလှောဝ်လုပ်ကၠုၚ်ဂမၠိုၚ်ဂှ် တာဒၞါ ကုတ်ထပိုတ်တဴဒၟံၚ် နကဵုဇြၚ်ရ။ သၞမကၠောံတဴကြုၚ်ဂမၠိုၚ်ဝွံ ဟိုတ်နူကဵု နှက်မပစူလဝ် ပ္ဍဲကြုၚ်ဂမၠိုၚ်တုဲ ဒှ်ဒၟံၚ်ဗွဲမလၞၚ်လၞောဝ်ရ။ ညးလ္ၚဵုမွဲၜါဟေၚ် စိုပ်တဴဇိုၚ်ကၟာၚ်ဍုၚ်အိုတ်ရ။ ဒပ်အၚ်ဝ မစိုပ်ကၠုၚ် ဇိုၚ်ကၟာၚ်ဂမၠိုၚ်ဝွံ ပစူထံက်ဇိုၚ်ကၞိန် လ္တူကၟာၚ်ဍုၚ်တုဲ တိုန်အိုတ်ရ။ အဃောဂှ် ဒပ်ဟံသာဝတဳ မၞုံလ္တူကၟာၚ်ဍုၚ်ဂမၠိုၚ်ဂှ် ကၠဟ်ပန်ဖျေံဒၟံၚ် နကဵုတၟံကဠောံဂမၠိုၚ်၊ တ္ၚလဴဂမၠိုၚ်၊ ဆုကဠောံ မစံၚ်လဝ်ပၟတ်ဂမၠိုၚ်အိုတ်ရ။ ဇိုၚ်ကၞိန်ဂမၠိုၚ်ဂှ် စံၚ်ကၠေံအိုတ်ရ။ ဒပ်အၚ်ဝ မတိုန်တဴ နကဵုဇိုၚ်ကၞိန်ဂမၠိုၚ် ဒးဘဲတအ်တုဲ တူပၟတ်တုဲ ပြဟ်ဒတုံစှ်ေ နူကဵုဇိုၚ်ကၞိန်အိုတ်ရ။ ပြဟ်ဒတုံစှ်ေ ပ္ဍဲလ္တူနှက် မပစူလဝ် ဇိုၚ်ကၟာၚ်ဍုၚ်ဂမၠိုၚ်တုဲ ချိုတ်အိုတ်ရ။ ဒပ်အၚ်ဝ ဗၞတ်ညိညဟေၚ် စိုပ်တဴလ္တူကၟာၚ်ဍုၚ်အိုတ်ရ။ စိုပ်လ္တူဂှ်ဗက် ဒပ်ဟံသာဝတဳတအ် ဗာ်တဴနကဵုဇြၚ်၊ ထ္ပက်တဴနကဵုဗၞုဟ်တုဲ ပသောၚ်ထောံအိုတ်ရ။ ပေါဲပၞာန်ဝွံ အခိၚ်လအ်ကၠုၚ်တုဲ နူလ္ပာ်ဒပ်အၚ်ဝဂမၠိုၚ် ညးမချိုတ်၊ ညးမဒးဘဲဒဏ် ဂၠိုၚ်ကၠုၚ်ရ။ နူလ္ပာ် ဒပ်ဟံသာဝတဳတအ် ဗၞတ်ညိညဟေၚ် ဒးဘဲဒဏ်တုဲ ချိုတ်တဴရ။ ကါလဂၠုဗ္ဒန်အာ ဗ္တံသ္ဂာဂှ် ဒပ်အၚ်ဝဂမၠိုၚ် ဗွဲမကျဗြမ် က္လေၚ်ဆုတ်အာအိုတ်ရ။ ပ္ဍဲဂတမုက် ကၟာၚ်ဍုၚ်လိုၚ်ဝွံ ဇွသရာဲဂမၠိုၚ်၊ ဇွချေံဂမၠိုၚ် သီုကဵုလဴမစၚ်ဒၟံၚ်ဂမၠိုၚ်၊ ပၟတ်မတူဒၟံၚ် အတေံမွဲဗွဝ် အဏအ်မွဲဗွဝ် ၊ သီုကဵုယက်မဂၠုဟေၚ် သှ်ေတဴရ။ ပ္ဍဲဂတမုက် ကၟာၚ်ဍုၚ်ဝွံ ကောန်လဴဂမၠိုၚ် ပြဟ်ဒတုံဒၟံၚ် ဗွဲမပြးဇးရ။ ဒၞါဲပၟတ်မတူဒၟံၚ်ဂမၠိုၚ်ဂှ် ကောန်ဒပ်ဟံသာဝတဳဂမၠိုၚ် သီုကဵုမပလိုတ်ကၠေံပၟတ်၊ ညးမဒးဘဲဂမၠိုၚ်ဂှ် ဓလိၚ်ပၠုပ်ဏါ ဇရေၚ်ပ္ဍဲကၟာၚ်ဍုၚ်တေံအိုတ်ရ။ အမာတ်ဒိန်လေဝ် ဟိုတ်နူမဂွံဇၞးကေတ် ဒပ်အၚ်ဝတုဲ ဂွံဒၟံၚ်ဒြဟတ်ရ။ သီုကဵုမရပ်လဝ်ဇြၚ် အမာတ်ဒိန် မဗဵုသ္ၚဳဒၟံၚ် အကာဲအရာသရာဲ မၞုံဒၟံၚ်လ္တူကၟာၚ်ဍုၚ်ဂမၠိုၚ်ဝွံ မုက်မတ်ဍာဲဂြၚ်တုဲ အီခၟောံဒၟံၚ်ရ။ ~~~~~~~~~~~~~~~~~~~~ ပ္ဍဲအခိၚ် ဒပ်တၠညးရာဇာဓိရာဇ်ဂမၠိုၚ် မစိုပ်ဇရေၚ် မုဟ်ဗဳဂှ် ဒပ်အၚ်ဝဂမၠိုၚ် သီဂွံအာ မုဟ်ဗဳယျဒှ်တုဲ ဒပ်ဟံသာဝတဳဂမၠိုၚ် ဒးဖျေံတဴဒပ် မ္ၚးဍုၚ်ဟေၚ်ရ။ သၟိၚ်ပေန်ယျကဵု ပေန်လှေဝ်တအ်ဝွံ ဍုၚ်မုဟ်ဗဳဂှ် ကၟာၚ်တြၚ်ဍုၚ်တုဲ ဟိုတ်မပခိုၚ်ဒၟံၚ်ဂှ်ရ တၠညးရာဇာဓိရာဇ်ဝွံ ဂၠာဲတဴတၚ်ဍိုန်လျ ဒပ်မုဟ်ဗဳတုဲ ပဠေဝ်တိုန် သွက်ဂွံဗ္တိုက်ရ။ သီီုမဍိုက်ကေတ်စိၚ် မတွံဂး အရးလဗုန် ကေုာံ သရာဲခိုဟ် ထပှ်ကၠံ ကြပ်လုပ်ဗ္ဒာဲကၟာၚ်ဍုၚ်တုဲ ရံၚ်တဴရ။ အဃောဂှ် သၟိၚ်ပေန်ကဵု သၟိၚ်ပေန်လှေဝ်တအ်လေဝ် ညာတ်တဴအိုတ်ရ။ "ဟေ ဗညာနဲ၊ မုဟိုတ်ဂွံကၠုၚ်တဴဂှ်ရော၊ ၝဂံၚ်ဗ္တိုက်ကဵုပိုဲတအ်ဟာ" "ဟာ... ဟာ... ဟာ... မၞးတအ်ဟေၚ် ပံက်ကဵုပါၚ်တြၚ်ညိလေဝ်၊ ဂွံတီတဴအစောန်အဲဏောၚ်" နကဵုရမျာၚ် တၠညးရာဇာဓိရာဇ် ဗွဲမထတ်သ္ကာတ် ရမျာၚ်ဂြိုၚ်ဝွံ အုပ်ဓလီုအာ အလုံဒပ်မုဟ်ဗဳရ။ ဟိုတ်နူဒှ်အခိၚ် နူဂယးပြဟ် အရှိုဏ်စတိုန်တုဲ ဟွံဂွံညာတ်ကေတ် မၞိဟ်ချိုတ်တ်ပၠိုတ်တ် ကၠးကၠးတၟးတၟးဏီရ။ ထၞဟ်လတိုပ်ဂမၠိုၚ်ဟေၚ် ပြဟ်စှ်ေဒၟံၚ် ဖြေအ်အ်ရ။ ဟိုတ်နူကဵု လျးပၟတ်တဝ်က္ၜံၚ်၊ ပၟတ်ကၠေၚ်သ္ဍဴ လ္တူကၟာၚ်ဍုၚ်ဂမၠိုၚ်တုဲ ဂွံညာတ်ကေတ်ဒၟံၚ် သ္ကိုပ်ဒပ်အၚ်ဝဂမၠိုၚ် မၞုံဒၟံၚ်လ္တူကၟာၚ်ဍုၚ်တေံ ဟဗုၚ်ဟဗုၚ် ဟပါဟပါရ။ "အဝ်... မၞးဟေၚ် ဗ္တိုက်ညိလေဝ်၊ ပိုဲတအ် ပံက်ကဵုပါၚ်တြၚ်ရဒှ်" "ပံက်ကဵုပါၚ်တြၚ်ဍုၚ်တုဲမ္ဂး ၝတအ် ဂြိပ်ညံၚ်ဂွံဗၠးညိ" #သ္ဂံၚ် လအီမန် (သၟာပၠန်ဂတး အညတြ) ပ္ဍဲကဵု Telegram လေဝ် လုပ်ဗှ်တဴမာန်ရအဴ။ https://t.me/laaeimon #တၠညးရာဇာဓိရာဇ် #သၟိၚ်အၚ်ဝ မၚ်ဂဳဆွာ #အၚ်ဝ-ဟံသာဝတဳ ပေါဲပၞာန်ပန်စှော်သၞာံ #လျးအရှိုဏ် ဟံသာဝတဳ သ္ကုတ်ဒုတိယ #The Light of Dawn, Hongsawatoi (Part2, Ep3)