သာရဝဏ်နဳတိ

မ္ၚဵုရအဴ👃

ကၠုင်လုပ်ကဵုဇြဟတ်ဂှ်တင်ဂုဏ်််််််််ဗွဲမလောန်ရအဴ။

လိက်အုပ်မွဲဍောတ်မၞုံယၟု (သာရဝဏ်နဳတိ) မ္ဂးရ၊ ညးမချူခၞံဗဒှ်လဝ် − သာရဝဏ် −−− ဘာမဟာသတိပဋ္ဌာန်− ကွာန်တၚ်ဖလုတ် ပွိုၚ်ဍုၚ်ဇြပ်ဗု တွဵုရးဍုၚ်မန်

နိဒါန်

ပ္ဍဲလောကဝွံ တသိုက်ခိုဟ်ပြဲမ္ဂး ဇၟာပ်မၞိဟ်ဒးစိုတ်ဖအိုတ်ရ၊ ညံၚ်ဂွံဒှ်တသိုက်လေဝ် ဂိုတ်ဂစာန်လွဳပရာဒၟံၚ်နာနာသာ်အိုတ်ရ၊ ဇၟာပ်ကမၠောန်မကၠောန်သ္ပတဴဒၟံၚ်ဂှ်လေဝ် ထေၚ်မံၚ်ဂွံဒှ်တသိုက်မာန်ဖအိုတ်ရ။

ၜုန်ရရဲကၠောန်ပွဒုစ္စရိုတ်တအ်ဂှ်လေဝ် ဂွံကၠောန်ပွဒုစ္စရိုတ်မ္ဂး အံၚ်ဇၞးပြဟ် ဂွံဒှ်တသိုက် ဂွံဇၞော်မောဝ်ရ− သာ်ဝွံ ဗွဲကိုပ်ကၠာ ဍေံတံစှ်ေတဴစိုတ်တုဲဟေၚ်မှ− ဂံၚ်ကၠောန်, ဂံၚ်ဟီု, ဂံၚ်ချပ်တဴအိုတ်ရ။

ကၠောန်ပွဒုစ္စရိုတ်မ္ဂး ဘဝလၟုဟ်လေဝ်ဒှ်ဒဒိုက် ချိုတ်အာတုဲလေဝ်ဒးဆဵုဒဒိုက်ရ− သာ်ဝွံယဝ်စှ်ေဒၟံၚ်စိုတ် ချိုတ်ချိုတ်ပၠိုတ်ပၠိုတ် ဍာံဍာံပြဴပြဴသီုညးဖအိုတ်မ္ဂး ပ္ဍဲဂၠးတိဇၞော်ဏအ် ကၠောန်လဝ်လွလက်နက် သိုၚ်ခၞံလဝ်ထံၚ် ရုၚ်စတ်အမှုတအ်ဂှ် ဒှ်အာသၟးသၟးဖအိုတ်ရ၊ ဆဂှ်ဟွံသေၚ်ဏီ ဍုၚ်သွဝ်လေဝ်ဍန် အပါဲပန်လေဝ်လ္ၚုလ္ၚန်သုန်ဂြာံအာအိုတ်ရ၊ လၟုဟ်အပါဲပန်ဂှ်လ္ပဟီုဏီရ၊ ပ္ဍဲကဵုဘုံမၞိဟ်ဏံမွဲဓဝ်ဟေၚ်ဂှ် ကလေၚ်ရံၚ်တဴစမ်။

မၞိဟ်လ္ၚဵုတအ်ဂှ် ဟိုတ်နူမိက်ဂွံဒှ်တသိုက် မိက်ဂွံဇၞော်မောဝ် ဘဝဇကုဂွံသၠုၚ်ပြဲညိဂးတုဲ ဂိုတ်ကၠောန်သ္ပဒၟံၚ်နာနာသာ်အိုတ်ရ၊ ၜိုန်ဂှ်လေဝ် တသိုက်ဟွံဆဵုဒဒိုက်ရုန်မဵုသၟးဒးဆဵုညာတ်မံၚ်အိုတ်ရ၊ လ္ၚဵုဂှ်ပၠန် ၜိုန်လေပ်လဝ်ဒးတၞီဗၠိုက် ၜိုတ်သိုက်လဝ်ဒးလေၚ်ဒိုက် ၜိုတ်ဇၞော်မောဝ်လေဝ်ဒးလီုလာ်နွံတဴဗွဲမဂၠိုၚ်ရဟွံသေၚ်ဟာ၊ မပတမ် “ဗီုဗီုဏအ် ဂွံဒှ်တဴဒၟံၚ်ဂှ် မူဟိုတ်ရော” သာ်ဝွံ ယဝ်ဂၠုက်ဂၠာဲသွဟ်ဍေံမ္ဂး ဟိုတ်နူလညာတ်ဟွံဍာံပြ ဒ္ဂေတ်ပွဟွံတပ် ကသပ်ခိုဟ်ဟွံဒှ် ကၠေၚ်ဍဟ်ဟွံလှဲ ဟွံမွဲကဵုဓဝ်ချပ်ဗ္စာရ။

ဟိုတ်ဂှ်ရ− မိက်သ္ဂောံရၚ်တၠုၚ်ဏာကဵုဒတုဲဖိုလ်ကောန်ဂကူတအ် −−−

၁ ။ ညံၚ်လညတာ်ဂွံဍာံပြ ။

၂ ။ ဒ္ဂေတ်ပွဂွံတပ် ။

၃ ။ ကသပ်ခိုဟ်ဂွံဒှ် ။

၄ ။ ကၠေၚ်ဍဟ်ဂွံလှဲအာ ။

၅ ။ ဓဝ်ချပ်ဗစာဂွံဒှ်ကၠုၚ်ညိဂးတုဲ နကဵုစေတနာသၠုၚ်သၠုၚ်ပြဲပြဲဂှ် ( ပြကိုဟ်နဳတိ ) ဝွံ အဲနာဲသာရဝဏ် မ္ဒးချူဇန်တက်ပတိတ်ဏာရောၚ်မဂ္ဂး ။ တၠစေတနာ −−− နာဲသာရဝဏ်

ပဏာမ

နမော တဿ ဘဂဝတော အရဟတော သမ္မာ သမ္ဗုဒ္ဓဿ

(က) ဂုဏ်ကျာ်ဇၞော်ဂး လှဲလးဂုဏ်ဓရ်

ပွယုတ်ရောတၚ် ဂုဏ်သၚ်ဟီုလဝ်

ဂုဏ်မိမအ္စာ နွံကၠာဂၠိုၚ်ဗဝ်

ဂုဏ်ညးတအ် ကလအ်လ္ၚောဝ်ဇအ်သဝ် ။

ပဋိညာဏ်

(ခ) လ္ၚောဝ်တုဲဟွံဇ ဂုဏ်မသန်ဗွဝ်

သွက်ဂကူရ ညးတၠနန်ထဝ်

မိက်ရေၚ်တၠုၚ်ကဵု ဂုဏ်ဖဵုဂၠိုၚ်ဗဝ်

ချူဗိုန်ဂၠိ “နဳတိ.. ယၟုဂးလဝ် ။

က

၁။ ကၠောန်လ္ပတော်ဆ၊ မှာလ္ပဂွ။
ကၠောန်ယဝ်တော်ဆ ဝိရဳယအေယ်ဇြ၊
မှာယဝ်ဂွ  ဒှ်မာန။

၂။ ကၠိုဟ်တုဲကဵုခိုဟ်၊ ၜိုဟ်တုဲကဵုဒှ်ဖိုလ်။
ကၠိုဟ်တုဲဟွံခိုဟ်  သပ္ပုရိုဟ်ဟွံဒှ်၊
ၜိုဟ်တုဲဟၟဲဖိုလ်  ၜိုတ်ကၠဵုဟွံဒှ်။

၃။ ကျာ်လေဝ်ပူဇဴ၊  ဓရ်လေဝ်ရဴဂဴ။
ယဝ်ပူဇဴကျာ်  ဂၠိုင်သာ်ဒှ်ဖိုလ်၊
ယဝ်ရဴဂဴဓရ်   ဟွံဒးသဝ်တွဵု။

၄။ ကလောလ္ပသ္ပမာန်၊ ညးဝေတ်လ္ပစာန်စး။
ယဝ်သ္ပမာန်ကဵုကလော  ဗွဲကြဴဒးဆဵုဝါတ်၊
ညးဝေတ်ယဝ်စာန်စး  ဂွံစဳကၠးဝါတ်ဂါတ်။

၅။ ကၠာညးဟွံကဵုဂှ်ကၠောန်၊ ကၠာညးဟွံဒေါန်ဂှ်အာ။
ညးကဵုမှကၠောန်  ကမၠောန်စေတနာဟွံဒှ်၊
ညးဒေါန်တုဲမှအာ  မေတ္တာဒးအေဲကှ်။

၆။ ကၠောန်ကဵုဒှ်မ္ၚဵု၊ ရံၚ်ဗဵုကဵုဒှ်ဂုဏ် ။
ယဝ်ကၠောန်ဒှ်မ္ၚဵု ဇၟာပ်ညးဆဵုဒးစိုတ်၊
ရံၚ်ဗဵုယဝ်ဒှ်ဂုဏ် ဟွံရုန်မဵုချိုတ်ပၠိုတ် ။

၇။ ကောမ်တုဲပါ်ပါဲ၊ ကောမ်တုဲဂၠုက်ဂၠာဲ ။
ကောမ်တုဲယဝ်ပါ်ပါဲ ဇၟာပ်ဒၞါဲဂွံအံၚ်ဇၞး၊
ကောန်တုဲယဝ်ဂၠုက်ဂၠာဲ အန္တရာယ်လေဝ်ဂွံဗၠး ။

၈။ ကွးလ္ပကဵုညေတ်၊ ခါဝေတ်လ္ပကဵုတီ ။
ကွးယဝ်ညေတ် ဟီုဝေတ်ဝါတ်ဂါတ်၊
ခါဝေတ်ယဝ်တီမ္ဂး ၜိုန်ဒးဍေံကေတ်ဝါတ် ။

၉။ ကွေတ်လေဝ်ဒးတပ်၊ ကသပ်လေတ်ဒးခိုဟ် ။
ကွေတ်ယဝ်တပ်မ္ဂး ဂွံဗၠးဒဒိုက်၊
ယသပ်ယဝ်ခိုဟ်ပၠန် ဂွံၜိုဟ်ဒှ်တသိုက် ။

၁၀။ ကွေတ်ခိုဟ်ကဵုဂွံတန်၊ သဒ္ဓါပၠန်ကဵုဂွံနွံ။
ကွေတ်ခိုဟ်ယဝ်တန် သောတာပန်ဒှ်လောဲသွာ၊
သဒ္ဓါယဝ်နွံ ဇၟာပ်ဘုံဂွံပြာထာ ။

၁၁။ ကုသိုလ်လ္ပဝိုတ်၊ ဒြပ်လေဝ်ဂိုတ်ကၠောန်။
ကုသိုလ်ဟွံဝိုတ်မ္ဂး ဂွံဗၠးအပါယ်ပန်၊
ဒပ်ယဝ်ကၠောန်မ္ဂး ဂွံဗၠးဝါတ်ဂါတ်ပၠန်။

၁၂။ ကုသိုလ်လေဝ်ကၠောန်၊ ကမၠောန်အကုသဵုလေဝ်ပါဲ။
ကုသိုလ်ယဝ်ကၠောန်မ္ဂး အပါယ်ဟွံဒးဂဗ ၊
အကုသိုလ်ယဝ်ပါဲ ဂွံဆာန်တိုန်ဇၟာပ်ဘဝ ။

၁၃။ ကၠာဟွံကၠောန်ဂှ်ချပ်၊ ကသပ်ခိုဟ်ဂှ်နိဿဲအာ။
ကၠာဟွံကၠောန်ယဝ်ချပ်မ္ဂး ဂွံအံၚ်ဇၞးလောဲလောဲ၊
ကသပ်ခိုဟ်ယဝ်နိဿဲ ညံၚ်တ္ၚဲဂွံသၠုၚ်ပြဲ။

၁၄။ ကောန်ၚာ်လ္ပဗၟက်၊ ထေဲလ္ပဒက်ဝဲ။
ယဝ်ဗၟက်ကောန်ၚာ်မ္ဂး ဒးဒုက်လက်ကြာန်၊
ထေဲတုဲယဝ်ဒက်ဝဲ နူဘဲသၞအိုတ်ဟွံမာန်။

၁၅။ ကျလေဝ်လ္ပကြာန်၊ မာန်လေဝ်လ္ပကြအ်။
ကျတုဲယွံကြာန် မၞိဟ်ဆာန်ဟွံဟွံမဲ၊
မာန်တုဲယွံကြအ် ဟွံလအ်ဒှ်သၞဝဲ။

၁၆။ က္ဍုဟ်လ္ပကဵုဒှ်သၞ၊ ဆာန်လ္ပကဵုဒှ်ဒုဟ်။
က္ဍုဟ်တုဲယဝ်ဒှ်သၞ ဒှ်ပွမၞိဟ်ယုတ်ကာဲ၊
ဆာန်တုဲယဝ်ဒှ်ဒုဟ် ဒးဒုၚ်ကဍုဟ်ဇၟာပ်ဒၞါဲ။

၁၇။ ကဵုဒါန်ကဵုဂွံကၠး ထိုၚ်သးကဵုဂွံလေပ်။
ကဵုဒါန်ယဝ်ဟွံကၠး ၜိုတ်သၠးဟွံဒှ်ဖိုလ်၊
ထိုၚ်သးယဝ်ဟွံလေပ် မံၚ်ကြေပ်ဒၟံၚ်တွဵု။

၁၈။ ကေတ်ဗြဴဒးရုဲစှ်၊ ခတှ်နွံဒးလဴထောံ။
ကေတ်ဗြဴယဝ်ဟွံရုဲစှ် ကြဴဒှ်ဒဒိုက်၊
ခတှ်နွံယဝ်ဟွံလဴ ညံၚ်ဂၠဴညးဍဵုဍိုက်။

၁၉။ ကေတ်ဒြပ်ဒးကၠောန်၊ ကေတ်ကောန်ဒးဂၠာဲဗြဴ။
ကေတ်ဒြပ်ယဝ်ဟွံကၠောန် ဒှ်ကမၠောန်သမၠီု၊
ကောန်ကောန်ယဝ်ဟွံဂၠာဲဗြဴ ဒှ်ညံၚ်လဴဝေၚ်ပုံ။

၂၀။ ကဵုဒါန်လ္ပကဵုချိၚ်ဆ၊ သဳလလ္ပကဵုလီု။
ကဵုဒါန်ယဝ်ချိၚ်ဆ လအ်စေတနာအေဲဇြ၊
သဳလယဝ်လီု ဒးဟောမ်ဗြီုဘဝ။

၂၁။ ကၠအ်ညးလ္ပတဵု ကၠဵုညးလ္ပလွဳ။
ကၠညးယဝ်တဵု ဂုဏ်ဖိုလ်ဟွံတန်၊
ကၠဵုညးယဝ်လွဳ ကြဴဍေံကဳဇကုပၠန်။

၂၂။ ကမ်သၟးလ္ပဖျေံစိုတ် အိုတ်တုဲလ္ပဍောၚ်ၜိုတ်။
ကမ်သၟးယဝ်ဖျေံစိုတ် ဒှ်ဟိုတ်လေၚ်ဒိုက်၊
အိုတ်တုဲယဝ်ဍောၚ်စိုတ် ဒှ်ဟိုတ်ယဲဍဵုဍိုက်။

၂၃။ ကမၠောန်ဂှ်လ္ပထေၚ်သဝ် ချပ်လဝ်ဂှ်လ္ပယှအ်။
ကမၠောန်ဂှ်ထေၚ်သဝ် ဇၟာပ်ကဝ်ဟွံဇၞော်မောဝ်၊
ချပ်လဝ်ဂှ်ယဝ်ယှအ် ဆလအ်ဟွံမံက်ဂတဝ်။

၂၄။ ကွေတ်မှာလ္ပကေတ် ဒ္ဂေတ်ခိုဟ်လ္ပကၠဟ်။
ကွေတ်မှာယဝ်ကေတ် ဒဒိုက်ဇေတ်ဒးဆဵု၊
ဒဂေတ်ခိုဟ်ယဝ်ကၠဟ် ဒှ်မၞိဟ်ရုန်မဵု။

၂၅။ ကွတ်ခိုဟ်ဒးကေတ်လဝ် ကွတ်သဝ်ဒးပါဲထောံ။
ကွတ်ခိုဟ်ယဝ်ကေတ်လဝ် ဟွံဒးသဝ်အာ၊
ကွတ်သဝ်ယဝ်ပါဲ ဇၟာပ်ဒၞါဲဂွံသံက်သာ။

၂၆။ ကျာ်သြဳဂှ်မၚ်မွဲ စိုတ်ပြဲဂှ်လ္ပဗလး။
ကျာ်သြဳမၚ်မွဲမှ ညးပမၞိဟ်ခိုဟ်၊
စိုတ်ခိုဟ်နွံမှ ဘဝဂတဂွံၜိုဟ်။

၂၇။ ကွေတ်လ္ပဗၠေတ် ဒ္ဂေတ်လ္ပမုတ်။
ယဝ်ကွေတ်ဗၠေတ် ဒဒိုက်ကေတ်ဟွံမာန်၊
ယဝ်ဒဂေတ်မုတ် ဒးဟုတ်ဇၟာပ်ဌာန်။

၂၈။ ကွေတ်ဒးဍာံပြ သဳလးဒးနွံ။
ယဝ်ကွေတ်ဍာံပြ သောကဗၠးလောဲ၊
ယဝ်သဳလနွံ ဇၟာပ်ဘုံဂွံပြဲ။

၂၉။ ကြံလေဝ်လ္ပကြံကြ ဝဲသၞလေဝ်လ္ပစွံ။
ယဝ်ကြံကြ ဝဲသၞထုဲၜန်၊
ယဝ်စွံဝဲသၞ သောကဒှ်ပၠန်။

၃၀။ ကေတ်လေဝ်ဒးညှာ ကဵုဏာလေဝ်ဒးချိၚ်။
ကေတ်ယဝ်ဟွံညှာ စေတနာညးလီု၊
ကဵုဏာယဝ်ဟွံချိၚ် ဒှ်ဓဝိၚ်စိုတ်လီု။

၃၁။ ကေတ်ဗြဴတုဲဒးတ္ၚအ် ကေတ်ကၠအ်ဒးတဵု။
ကေတ်ဗြဴတုဲဟွံတ္ၚအ်မ္ဂး ဟွံဗၠးဝါတ်ဂါတ်၊
ကေတ်ကၠအ်တုဲဟွံတဵု ဂုဏ်ဖိုလ်ဟွံညာတ်။

၃၂။ ကဵုသၞလ္ပဒက်ဝဲ ကဵုရဲလ္ပတ္ၚံက်စၞာဲ။
ကဵုသၞယဝ်ဒက်ဝဲ ဒဒိုက်ဟဲဟွံမာန်၊
ကဵုရဲယဝ်တ္ၚဲစၞာဲ ဒြပ်လာဲလေၚ်မနာ်။

၃၃။ ကဵုကၠိုဟ် ကဵုဍိုဟ်။
ဟွံကၠိုဟ်တှ်ေ ညးကော်အၚိုက်၊
ဟွံဍိုဟ်တှ်ေ ညးကော်အဝိုက်။

၃၄။ ကွေတ်ခိုဟ်ဒးတီ ဗၠိုက်တၞီဒးကၠိုဟ်။
ကွေတ်ခိုဟ်ယဝ်ဟွံတီ ဒးတ္ၚီဗၠိုက်လၟိုန်၊
ဗၠိုက်တၞီယဝ်ဟွံကၠိုဟ် ဂၠံၚ်ခိုဟ်ဟွံဗိုန်။

၃၅။ ကမၠောန်ခိုဟ်လေဝ်ဒးတ္ၚအ် ရန်တၟံလေဝ်ဒးနွံ။
ကမၠောန်ခိုဟ်ယဝ်တ္ၚဲအ် ဟွံလအ်ဒှ်တသိုက်၊
ရန်တၟံယဝ်နွံမှ ဝိရဳယဟွံလီုလာ်။

၃၆။ ကၠိုဟ်တုဲဒးလွဳ ညဳတုဲဒးကၠောန်။
ကၠိုဟ်တုဲဟွံလွဳ ဒှ်ကၠဵုကဳပုၚ်၊
ညဳတုဲဟွံကၠောန် ကောန်ဂကူဟွံသၠုၚ်။

၃၇။ ကေတ်ကုသဵုတှ်ေသ္ပခမဳ ကေတ်ပါရမဳတှ်ေအေၚ်။
ဟွံကေတ်ကုသဵုယဝ်သ္ပခမဳ ဒှ်ခါခၞဳသာသနာ၊
ကေတ်ပါရမဳယဝ်ဟွံအေၚ် ဒးလေၚ်ဒိုက်အာ။

၃၈။ ကြာန်ကြာန်လ္ပမံၚ် ယံၚ်ယံၚ်လ္ပကၠောန်။
ကြာန်ကြာန်ယဝ်မံၚ် ညးဆံၚ်အဲချဟ်၊
ယံၚ်ယံၚ်ယဝ်ကၠောန် ကမၠောန်ဂှ်လီုပြဟ်။

၃၉။ ကၠးကၠးဟီုဂး ဒးဒးဖန်ဏာ။
ကၠးကၠးယဝ်ဟီုဂး ၚုဟ်မးဂလာန်ဒှ်၊
ဒးဒးယဝ်ဖနဏာ ပြာထာဂွံဒယှ်။

၄၀။ ကမ်လေဝ်ဒးခိုဟ် ကၠိုဟ်လေဝ်ဒးကၠိုဟ်။
ယဝ်ကမ်ခိုဟ် ဂွံၜိုဟ်သိုဟ်လောဲ၊
ယဝ်ကၠိုဟ်မ္ဂး ဂွံဗၠးသၞဝဲ။

၄၁။ ကေတ်တှ်ေအာတ် ဟွံညာတ်တှ်ေသၟာန်။
ကေတ်ယဝ်ဟွံအာတ် ဒှ်ဝါတ်ညးတၞဟ်၊
ဟွံညာတ်ယဝ်ဟွံသၟာန် ဆဵုမာန်ဟွံဒှ်။

၄၂။ ကၠောန်သီုစေတနာ အာသီုမေတ္တာ။
ကၠောန်သီုစေတနာမ္ဂး ဂွံအံၚ်ဇၞးလောဲ၊
အာသီုမေတ္တာမ္ဂး ဟွံဒးဆဵုဘဲ။

၄၃။ ကဵုသၞလေဝ်လ္ပကြံၚ် ကဵုသမၠီုလေဝ်လ္ပပံၚ်။
ယဝ်ကြံၚ်ကဵုသၞ ဆလအ်ဟွံၜိုဟ်၊
ယဝ်ပံၚ်ကဵုသမၠီု သီုသ္ၚိဟွံခိုဟ်။

၄၄။ ကၠောန်သီုညာဏ် ဂစာန်သီုဇဲ။
သီုညာဏ်ယဝ်ကၠောန် ကမၠောန်တုဲပြဟ်၊
ဂစာန်သီုဇဲ ဂၠိၚ်သ္ၚောဲဟွံဒှ်။

၄၅။ ကဵုညာတ်ဖဵု ကဵုဆဵုဒုဟ်။
ဖဵုဟွံညာတ် စိုတ်ဓါတ်ဍိုန်လျ၊
ဒုဟ်ဟွံဆဵု ရုန်မဵုဇၟာပ်ဘဝ။

၄၆။ ကေတ်တှ်ေလ္ပက္ဍုဟ် လၞုဟ်တှ်ေလ္ပဂွ။
သီုဍုဟ်သီုကေတ် ဍေံဗၠေတ်ဂၠံၚ်ရ၊
သီုလၞုဟ်သီုဂွ မာနဒှ်ရ။

၄၇။ ကၠောန်ကဵုသောၚ် အခေါၚ်ကဵုကၠိုဟ်။
ကၠောန်သောၚ်မ္ဂး ဂွံဗၠးထုဲကြာန်၊
အခေါၚ်ကၠိုဟ် ဂွံခိုဟ်စမာန်။

၄၈။ ကဵုဍိုဟ် ကဵုကၠိုဟ်။
ဟွံဍိုဟ် ဂၠံၚ်ခိုဟ်ဟၟဲ။
ဟွံကၠိုဟ် ဂွံခိုဟ်ဟွံလောဲ။

၄၉။ ကဵုကၠိုဟ်သဘာဝ မာနကဵုတီ။
သဘာဝဟွံကၠိုဟ် ဂၠံၚ်ခိုဟ်ဟၟဲ၊
မာနဟွံတီ ဒးဗၠိုက်တၞီလောဲ။

၅၀။ ကွာ်ဂၠံၚ်ကဵုတပ် ရပ်လဝ်အဓိဋ္ဌာန်။
ဂၠံၚ်တပ်ယဝ်ကွာ် လီုလာ်ဟွံလောဲ၊
ယဝ်ရပ်အဓိဋ္ဌာန် ဒှ်မာန်လောဲလောဲ။

၅၁။ ကၠောန်စိုတ်ပယံၚ် ကွာ်ဂၠံၚ်ပနက်။
ကၠောန်စိုတ်ယဝ်ယံၚ် အံၚ်ဇၞးဟွံမာန်၊
ကွာ်ဂၠံၚ်ဟွံနက် ညးဗက်သီုကွာန်။ ။

ခ

၅၂။ ခိုဟ်မ္ဂးဗတောန် ဂျိုၚ်မ္ဂးဒးကၠောန်။
ခိုဟ်ယဝ်ဟွံဗတောန် ဒးအောန်စိုတ်ဇၟာပ်ဒၞာဲ၊
ဂျိုၚ်မံၚ်ယဝ်ဟွံကၠောန် ဒှ်ကောန်မၞိဟ်ဟွံဆာဲ။

၅၃။ ချပ်ၜိုဟ်ၜိုဟ် ကၠောန်ခိုဟ်ခိုဟ်။
ယဝ်ချပ်ၜိုဟ်ၜိုဟ် ကသပ်ခိုဟ်ဒှ်လောဲ၊
ယဝ်ကၠောန်ခိုဟ်ခိုဟ် ညးအိုဟ်တၟိုဟ်ဟွံဖဲ။

၅၄။ ချိုတ်လေဝ်လ္ပဂွိၚ် အခိၚ်လေဝ်လ္ပဖအိုတ်။
ချိုတ်ယဝ်ဂွိၚ်မ္ဂး စိုတ်ဒးလီုလာဲ၊
အခိၚ်ယဝ်ဖအိုတ် ကြဴစိုတ်ဒှ်ဒဒိုက်။

၅၅။ ခိုဟ်မ္ဂးအေၚ်ဒုၚ် ပြဲမ္ဂးလျုၚ်ဇြုၚ်သ္ဍိုက်။
ခိုဟ်မံၚ်ယဝ်ဟွံအေၚ်ဒုၚ် တုပ်ညံၚ်ၜုၚ်ဖျေံအပါဲ၊
ပြဲဂှ်ယဝ်ဟွံဇြုၚ်သ္ဍိုက် တုပ်ညံၚ်ယိုက်ဖျေံနရက်။

၅၆။ ခိုဟ်မ္ဂးလ္ပထေဲထုတ် ညးယုတ်လ္ပပံၚ်။
ခိုဟ်မံၚ်ယဝ်ထေဲထုတ် ညံၚ်ပြိုက်စုတ်လ္ၚပၟတ်၊
ညးယုတ်ယဝ်ပံၚ် အရာဂၠံၚ်ဟွံဒးနှောတ်။

၅၇။ ခိုဟ်ပြဲဂှ်ရန်တၟံ ဟွံဒးကအ်ဂှ်လ္ပစ။
ခိုဟ်ပြဲယဝ်ရန်တၟံ ဟွံလအ်ဂွံသၠုၚ်ပြဲ၊
ဟွံဒးကအ်ဟွံစမ္ဂး သွက်ဒးမှာဟွံမွဲ။

၅၈။ ခါဂွံလ္ပမိပ်စိုတ် ခါအိုတ်လ္ပဍောတ်စိုတ်။
ခါဂွံယဝ်မိပ် ဒှ်ဟိုတ်မာနသၠုၚ်လောဲ၊
ခါအိုတ်ယဝ်ဍောတ်စိုတ် ၜိုတ်ချိုတ်ဒဒိုက်ဟွံဟဲ။

၅၉။ ချပ်လ္ပကဵုမှာ ဖန်ဏာလ္ပကဵုဗၠေတ်။
ချပ်ယဝ်ရမှာ ဂၠံၚ်သာတိုန်ဟွံမွဲ၊
ဖန်ဏာယဝ်ရဗၠေတ် ညးကေတ်စဟွံမွဲ။

၆၀။ ချပ်လေဝ်လ္ပယှအ် ရန်တၟံလေဝ်ကဵုသၠုၚ်ပြဲ။
ချပ်ယဝ်ဟွံယှအ် ဟွံလအ်ကၠေၚ်ဍဟ်လှဲ၊
ရန်တၟံယဝ်သၠုၚ်ပြဲ ပွယုတ်မွဲဒှ်ဟွံလောဲ။

၆၁။ ချပ်ဗစာတုဲဟီု ရံၚ်အစောမ်တုဲကြီု။
ယဝ်ဟီုဟွံချပ်ဗစာ ဗၠေတ်မှာဒှ်ဂၠိုၚ်၊
ဟွံရံၚ်အစောမ်တုဲယဝ်ဟီု ဒှ်သမၠီုရိုၚ်ရိုၚ်။

၆၂။ ချိုတ်မှထောံလွဳ ပေၚ်ဇဳမှဒေါံ ။
ဟွံချိုတ်ဏီထောံလွဳမ္ဂး ကြဴဒးဆဵုကျာတ်၊
ဟွံပေၚ်ဇဳဒေါံမ္ဂး ကြဴဒးဝါတ်ဂါတ်။

၆၃။ ချပ်လေဝ်သီုညာဏ် ဟီုဂလာန်လေဝ်သီုသတိ။
ယဝ်ချပ်သီုညာဏ် ဒှ်မာန်တုဲပြဟ်၊
ယဝ်ဟီုဂလာန်သီုသတိ ကလိဂွံဒယှ်တှ်။

၆၄။ ခါကၠောန်ဗီုဍိုက် ခါနွံပၟိက်ဗီုဨကရာဇ်။
ကၠောန်ဗီုဍိက်မှ အတိုၚ်ပၟိက်ဍိုက်ပေၚ်၊
နွံပၟိက်ဗီုဨကရာဇ်မှ လညာတ်ပြဲဗၠးလေၚ်။

၆၅။ ခိုဟ်ဂှ်ကၠောန်မှ ဍာံပြဂှ်သ္ပမှ ။
ခိုဟ်ဂှ်ကၠောန်မှ ထာဝရၜိုဟ်သြိုဟ်၊
ဍာံပြဂှ်သ္ပမှ ဘဝဂတဂွံခိုဟ်။

၆၆။ အခိၚ်သောၚ်ဂှ်ချပ် ပွတပ်ဂှ်ကၠောန်။
အခိၚ်သောၚ်ယဝ်ချပ် လညာတ်တပ်ဒှ်လောဲ၊
ပွတပ်ယဝ်ကၠောန် ဂွံစောန်ဂွံပြဲ။

၆၇။ ခိုဟ်ဂှ်လ္ပခဍန် ဒၞါဲဗဒန်ဂှ်လ္ပဟီု။
ခိုဟ်ဂှ်ယဝ်ခဍန် ဒုဟ်ဒန်ဟွံဗၠး၊
ဒၞာဲဗဒန်ယဝ်ဟီု မိတ်လီုပြးဇး။

၆၈။ ခေတ်လေဝ်ဒးကၠိုဟ် ခိၚ်ခိုဟ်လေဝ်ဒးတီ။
ဟွံကၠိုဟ်အခေတ် ၜေတ်ညးဟွံမာန်၊
အခိၚ်ခိုဟ်ဟွံတီ ဗၠိုက်တၞီဒှ်ကြာန်။

၆၉။ ခိုဟ်ကေတ် ဗၠေတ်ပါဲ။
ခိုဟ်ကေတ်မဂး ဗၠးသောကလောဲ၊
ဗၠေတ်ပါဲမဂး ဟွံဒးစုတ်စောဲ။

၇၀။ ခိုဟ်ဂှ်ဂၠါဲ ဟွံခိုဟ်ဂှ်ပါဲ။
ခိုဟ်ဂှ်ဂၠါဲမှ ကၠောန်ပအံၚ်ဇၞး၊
ဟွံခိုဟ်ပါဲမှ သောကဗၠး ။ ။

ဂ

၇၁။ ဂွံတုဲကဵုဒှ်ၚုဟ် ဘဝလၞုဟ်လ္ပကဵုဒှ်။
ဂွံတုဲၚုဟ်ဟွံဒှ် တုပ်သၟဟ်တဲပိုတ်ပိုတ်၊
ဘဝလၞုဟ်ယဝ်ဒှ် တုပ်သၟဟ်မၞိဟ်ချိုတ်ချိုတ်။

၇၂။ ဂုဏ်ညးဂှ်ဟီုညိ၊ ဝါသနာဗျိဂှ်ဖအောန်။
ယဝ်ဟီုဂုဏ်ညး ညးဒးသ္ဍိုက်ဆာန်၊
ဝါသနာဗျိယဝ်ဖအောန် ကောန်နွံဇြဟာန်။

၇၃။ ဂုဏ်စဒ္ဂေတ်လီု ဂုဏ်ဓီုစိုတ်လ္ပကြာန်။
ဂုဏ်စယဝ်ဒ္ဂေတ်လီု မၞိဟ်ဒိုဟ်ဓီုညးကော်၊
ဂုဏ်ဓီုယဝ်စိုတ်ကြာန် အ္စာဟွံဆာန်ဒှ်ဒဒိုက်ဇၞော်။

၇၄။ ဂုဏ်ပါၚ်လ္ပကဵုဂြက် ဂုဏ်ပၟက်လ္ပဒှ်သၞ။
ဂုဏ်ပါၚ်ယဝ်ဂြက် ညံၚ်ရေက်ထေက်ဝေၚ်ပါၚ်၊
ဂုဏ်ဗၟက်ယဝ်ဒှ်သၞ ညံၚ်သွခိုဟ်ဒးအိက်စာၚ်။

၇၅။ ဂတကွးလ္ပဂြိုၚ်ထတ် ဟွံဂွံစမ်ၜတ်လ္ပဒေါန်။
ဂတကွးယဝ်ဂြိုၚ်ထတ် ဇြဟတ်ဂျိဟွံကာန်၊
ဟွံဂွံစမ်ၜတ်ယဝ်ဒေါန် ခါလောန်နုက်ဝါတ်။

၇၆။ ဂုဏ်ပါၚ်လ္ပကဵုက္ဍုဟ် ဂုဏ်လၞုဟ်လ္ပကဵုဝါတ်။
ဂုဏ်ပါၚ်ယဝ်ညးက္ဍုဟ် ဟွံဗၠးဒုဟ်ဒန်၊
ဂုဏ်လၞုဟ်ယဝ်ဝါတ် ဒှ်မၞိဟ်လညာတ်ဍန်။

၇၇။ ဂုဏ်စလ္ပကဵုယဲ ဂုဏ်စောဲလ္ပစံၚ်တူ။
ဂုဏ်စယဝ်ယဲ ဒှ်နယ်သမၠီုယုတ်၊
ဂုဏ်စောဲဒးစံၚ်တူ ကော်ခဴမၞိဟ်ဂြုတ်ဂြုတ်။

၇၈။ ဂၠာဲကဵုဂွံလေပ် ဂွံတုဲဒေပ်ကဵုဒး။
ယဝ်ဂၠာဲဟွံလေပ်မ္ဂး ဂွံဗၠးဒဒိုက်ဝါတ်၊
ဂွံတုဲယဝ်ဒေပ်ဟွံဒး ညးဂးမၞိဟ်ဝိုက်ဝိုက်။

၇၉။ ဂလာန်ယာဲတလ္ပစး သ္ပကွးလ္ပလၞုဟ်။
ဂလာန်ယာဲတယဝ်စး ဒဒိုက်သၟးဒးဆဵု၊
သ္ပကွးယဝ်လၞုဟ် ဘဝလၟုဟ်ဟွံဒှ်မ္ၚဵု။

၈၀။ ဂကူဂှ်လ္ပကဵုကၠာဲ မၞိဟ်စိုတ်ဆာဲဂှ်လ္ပကၠဟ်။
ဂကူယဝ်ကၠာဲ ဂွံဆာဲတိုန်ဝါတ်သန်၊
မၞိဟ်စိုတ်ဆာဲယဝ်ကၠဟ် ဂၠံၚ်ခိုဟ်ဂှ်ကၠေံဗ္ဒန်။

၈၁။ ဂုဏ်ထေဲလ္ပကဵုလေၚ် ဂုဏ်ပၠေၚ်လ္ပကဵုဝါတ်။
ဂုဏ်ထေဲယဝ်လေၚ် ဂွံကလေၚ်ပေၚ်ဝါတ်ပၠန်၊
ဂုဏ်ပၠေၚ်ယဝ်ဝါတ် ဒှ်မၞိဟ်လညာတ်ဍန်။

၈၂။ ဂုဏ်ကျာ်လေဝ်ပၟဝ် ဂုဏ်ဓရ်လေဝ်ဗက်ဗၞုဟ်။
ယဝ်ပၟဝ်ဂုဏ်ကျာ် ဂၠိုၚ်သာ်ဂွံဖိုလ်မာန်၊
ယဝ်ဗက်ဗၞုဟ်ဂုဏ်ဓရ် ဍုၚ်သွဝ်ဂွံစိုပ်မာန်။

၈၃။ ဂလာန်မိမလ္ပကၠဟ် ကာတ်မြဟ်လ္ပဟီု၊
ဂလာန်မိမယဝ်ကၠဟ် ဂွံဒှ်တသိုက်ဝါတ်၊
ကာတ်မြဟ်ယဝ်ဟီု အိုတ်သီုဒးကျာတ်။

၈၄။ ဂုဏ်သအေတ်လ္ပဝါတ် ဂုဏ်ကျာတ်လ္ပကြံ။
ဂုဏ်သအေတ်ယဝ်ဝါတ် ဒှ်မၞိဟ်လညာတ်ဍန်၊
ဂုဏ်ကျာတ်ယဝ်ကြံ မကမ်စိုပ်ဗုၚ်ပၠန်။

၈၅။ ဂၠာဲဒြပ်လ္ပစွံမနာ် ဂၠာဲဇြဟာန်လ္ပထ္ၜးဒြပ်။
ဂၠာဲဒြပ်ယဝ်စွံမာန် ပိုန်ဟာန်ဒှ်ဝါတ်၊
ဂၠာဲဇြဟာန်ယဝ်ထ္ၜးဒြပ် အတိုၚ်ချပ်ဒှ်ဝါတ်။

၈၆။ ဂံၚ်လေဝ်လ္ပဂံၚ် ယံၚ်လေဝ်လ္ပယံၚ်။
ဂံၚ်မံၚ်တွဵု ဒတုဲဖိုလ်လေၚ်၊
ယံၚ်မံၚ်တွဵု တ္ၚဲလဵုဟွံပေၚ်။

၈၇။ ဂုဏ်လွဳလ္ပမှာ ဂုဏ်အာလ္ပဒှ်ဒုဟ်။
ဂုဏ်လွဳယဝ်မှာ ဒှ်မၞိဟ်ပညာအောန်၊
ဂုဏ်အာယဝ်ဒုဟ်ဒှ် မၞိဟ်ဂှ်ဝိုက်လောန်။

၈၈။ ဂုဏ်ဒြပ်လ္ပညးက္ဍုဟ် ဂုဏ်လၞုဟ်လ္ပလေၚ်ဒိုက်။
ဂုဏ်ဒြပ်ယဝ်ညးဍုဟ် ၚုဟ်မးဒြပ်အောန်၊
ဂုဏ်လၞုဟ်ယဝ်လေၚ်ဒိုက် ဒှ်မၞိဟ်ၚိုက်လောန်။

၈၉။ ဂုဏ်ညးလ္ပတၠိၚ် ဓဝိၚ်ညးလ္ပကေတ်။
ဂုဏ်ညးယဝ်တၠိၚ် အခိၚ်လဵုဟွံမွဲဖိုလ်၊
ဓဝိၚ်ညးယဝ်ကေတ်မံၚ်ၜေတ်ဒၟံၚ်တွဵု။

၉၀။ ဂုဏ်ဟီုလ္ပဆာန် ဂုဏ်ဌာန်လ္ပပြး။
ဂုဏ်ဟီုယဝ်ဆာန် ဇြဟာန်ဇေတ်ဟွံဒှ်၊
ဂုဏ်ဌာန်ယဝ်ပြး မၞိဟ်ကၠးဟွံဒှ်။

၉၁။ ဂုဏ်ကုသိုလ်လ္ပလေၚ် ဂုဏ်အေၚ်လ္ပဒှ်သၞ။
ဂုဏ်ကုသဵုယဝ်လေၚ် ဒှ်ပၠေၚ်ဇကု၊
ဂုဏ်အေၚ်ယဝ်ဒှ်သၞ ဒှ်မၞိဟ်အအ ။

၉၂။ ဂုဏ်လေၚ်ဒးကၠိုဟ် ဂုဏ်ခိုဟ်ဒးတီ။
ဂုဏ်လေၚ်ယဝ်ကၠိုဟ် မၞိဟ်ဂှ်ခိုဟ်ဟွံမာန်၊
ဂုဏ်ခိုဟ်ယဝ်ဟွံတီ မွဲတ္ၚဲတ္ၚီဗၠိုက်မာန်။

၉၃။ ဂုဏ်သြန်လ္ပဆာန် ဂုဏ်ဌာန်လ္ပဍုဟ်။
ဂုဏ်သြန်ယဝ်ဆာန် ကြဴကြာန်ဒှ်ဂွံ၊
ဂုဏ်ဌာန်ယဝ်ဍုဟ် မံၚ်သၟးဒုဟ်ဂွံ။

၉၄။ ဂုဏ်ပါၚ်လ္ပဒှ်ဒုဟ် ဂုဏ်က္ဍုဟ်ဒြပ်လ္ပလေၚ်။
ဂုဏ်ပါၚ်ယဝ်ဒှ်ဒုဟ် ဒှ်ပါၚ်ၚုဟ်ဟွံမဲ၊
ဂုဏ်က္ဍုဟ်ယဝ်ဒြပ်လေၚ် ဒှ်ပၠေၚ်ဇကုမွဲ။

၉၅။ ဂၠံၚ်ခိုဟ်ဂှ်ကေတ် ဂၠံၚ်ဗၠေတ်ဂှ်ပါဲ။
ဂၠံၚ်ခိုဟ်ယဝ်ကေတ် တသိုက်ဇေတ်ဒှ်မာန်၊
ဂၠံၚ်ဗၠေတ်ယဝ်ပါဲ ဂွံဆာဲဇၟာပ်ဌာန်။

၉၆။ ဂုဏ်ယာဲလေဝ်လ္ပပါဲ ဂုဏ်အာဲလေဝ်လ္ပဓဇန်။
ဂုဏ်ယာဲယဝ်ပါဲ အန္တရာယ်ကၠုၚ်စိုပ်၊
ဂုဏ်ယာဲယွံဓဇန် လညာတ်ဍန်ဟွံတပ်။

၉၇။ ဂုဏ်ပါၚ်ကအ်လ္ပပိုတ် ဂုဏ်စိုတ်လ္ပဍောၚ်။
ဂုဏ်ပါၚ်ယဝ်ကအ်ပိုတ် ဒှ်မၞိဟ်အိုတ်ဍာ်၊
ဂုဏ်စိုတ်ယဝ်ဍောၚ် အခေါၚ်ဇၞော်မောဝ်လီုလာ်။

၉၈။ ဂုဏ်ဝါတ်လ္ပဒှ်ဝဲ ဂုဏ်လောဲလ္ပကဵုကျာတ်။
ဂုဏ်ဝါတ်ယဝ်ဒှ်ဝဲ ညးမွဲဟွံရီုဗၚ်၊
ဂုဏ်လောဲယဝ်ကျာတ် ၜိုတ်ဝါတ်ဒှ်ဟွံဒှ်ဟေၚ်။

၉၉။ ဂုဏ်ဒါန်လေဝ်ဒးကၠိုဟ် ဂုဏ်ခိုဟ်လေဝ်ဒးတီ။
ဟွံကၠိုဟ်ဂုဏ်ဒါန် ပိုန်ဟာန်ဒးဝါတ်ပၠန်၊
ဂုဏ်ခိုဟ်ဟွံတီ ဒးတၞီဗၠိုက်ဨကန်။

၁၀၀။ ဂုဏ်မသလ္ပကဵုဟုတ် ဂုဏ်ယုတ်လ္ပကဵုဒိုက်။
ဂုဏ်မသယဝ်ဟုတ် ၜိုတ်ခဒုတ်ဟွံပြဲ၊
ဂုဏ်ယုတ်ယဝ်ဒိုက် တသိုက်ဆဵုဟွံလောဲ။

၁၀၁။ ဂုဏ်ညးဒးကျောဝ် ဂုဏ်တၞောဝ်ဒးရံၚ်။
ဂုဏ်ညးယဝ်ကျောဝ် ဂွံဇၞော်မောဝ်၊
ဂုဏ်တၞောဝ်ယဝ်ရံၚ် ဂၠံၚ်ယုတ်ဟွံလၟောဝ်။

၁၀၂။ ဂုဏ်ဒြဟ်လ္ပလေၚ် ဂုဏ်ပၠေၚ်လ္ပဝါတ်။
ဂုဏ်ဒြပ်ယဝ်လေၚ် ဒှ်မၞိဟ်ဟွံပေၚ်အှ်ေ၊
ဂုဏ်ပၠေၚ်ယဝ်ဝါတ် ကောန်ဇာတ်ဟွံရှ်ေသှ်ေ။

၁၀၃။ ဂုဏ်စလ္ပဒးဒုဟ် ဂုဏ်လၞုဟ်လ္ပဒှ်ဝဲ။
ဂုဏ်စယဝ်ဒးဒုဟ် ခေတ်လၟုဟ်မၞိဟ်ယုတ်အိုတ်၊
ဂုဏ်လၞုဟ်ယဝ်ဒှ်ဝဲ ဟွံသၠုၚ်ပြဲစဵုချိုတ်။

၁၀၄။ ဂၠံၚ်လီုလေဝ်ဒးထဗ မာနလေဝ်ဒးပါဲ။
ယဝ်ဟွံထဗဂၠံၚ်လီု ဟောမ်ဗြီုသီုဂကူ၊
ယဝ်ဟွံပါဲမာန် ဒးထဗစံၚ်တူ။

၁၀၅။ ဂုဏ်ပါၚ်ကဵုရာၚ်ဆာဲ ဂုဏ်သဟာဲကဵုဇၞော်မောဝ်။
ဂုဏ်ပါၚ်ရာၚ်ဆာဲမှ ဝဲသၞလလမ်၊
ဂုဏ်သဟာဲဇၞော်မောဝ် တသိုက်ဂေါဝ်ဂီုကၠီု။

၁၀၆။ ဂုဏ်ဍေံလ္ပကဵုဂြုဲ ဂုဏ်ထုဲလ္ပကဵုချိုတ်။
ဂုဏ်ဍေံယဝ်ဂြုဲမ္ဂး မံၚ်သၟးဒးယုတ်သဝ်၊
ဂုဏ်ထုဲယဝ်ချိုတ်မ္ဂး ဟွံဒးကဵုဓရ်။

၁၀၇။ ဂကူဂှ်ယိုက် အခိုက်ဂှ်မၚ်မွဲ။
ဂကူယိုက်ဒိုက်မှ ပ္ဍဲလိုက်ဇၞော်မောဝ်၊
အခိုက်မၚ်မွဲမှ သ္ပမၞိဟ်ဆာဲဂေါဝ်။

၁၀၈။ ဂုဏ်ဒြပ်လ္ပပြးဆာဲ ဂုဏ်အာဲလ္ပဒှ်သၞ။
ဂုဏ်ဒြပ်ပြးဆာဲမ္ဂး မၞိဟ်မှးဟွံဒှ်၊
ဂုဏ်အာဲဒှ်သၞမ္ဂး ဟွံဗၠးဗျိညးတၞဟ်။

၁၀၉။ ဂုဏ်ညးလ္ပပလီု လဟီုညးလ္ပဆေဝ်တာ။
ဂုဏ်ညးယဝ်ပလီု ဒှ်သမၠီုယုတ်၊
လဟီုညးယဝ်ဆေဝ်တာ မေတ္တာညးဟုတ်။

၁၁၀။ ဂုဏ်ဆာန်လ်ပကဵုချိုတ် ဂုဏ်စိုတ်လ္ပကဵုကြအ်။
ဂုဏ်ဆာန်ယဝ်ချိုတ်မ္ဂး ၚုဟ်မးဟွံမဲ၊
ဂုဏ်စိုတ်ယဝ်ကြအ်မ္ဂး ဂွံဗၠးဟွံလောဲ။

၁၁၁။ ဂၠာဲကဵုလေပ် ဂိုၚ်ဒေပ်ကဵုဒး။
ဂၠာဲဟွံလေပ်မ္ဂး ဟွံဗၠးဒဒိုတ်ဝါတ်၊
ဂိုၚ်ဒေပ်ဟွံဒးမ္ဂး ဟွံလအ်ဒးကျာတ်။

၁၁၂။ ဂၠာဲကဵုဆဵု ရံၚ်ဗဵုကဵုညာတ်။
ဂၠာဲယဝ်ဟွံဆဵု ဟွံပြေစိုတ်ဍောၚ်၊
ရံၚ်ဗဵုယဝ်ဟွံညာတ် မံၚ်ကျာတ်ဟွံသောၚ်။

၁၁၃။ ဂုဏ်ဒြပ်လ္ပကဵုဟုတ် ဂုဏ်ယုတ်လ္ပကဵုချိုတ်။
ဂုဏ်ဒြပ်ယဝ်ဟုတ် မၞိဟ်ယုတ်ဟွံမှး၊
ဂုဏ်ယုတ်ယဝ်ချိုတ် ဒဒိုစိုတ်ဟွံဗၠး။

၁၁၄။ ဂုဏ်ပြိုၚ်လ္ပချိုတ် ဂုဏ်အိုတ်လ္ပယုတ်သဝ်။
ဂုဏ်ပြိုၚ်ယဝ်ချိုတ် ဒှ်ဟိုတ်စိုပ်အပါဲ၊
ဂုဏ်အိုတ်ယဝ်ယုတ်သဝ် ဇၟာပ်ကဝ်ဟွံဆာဲ။

၁၁၅။ ဂွံပညာဒးကၠောန် ဂွံကောန်ဒးဝေတ်။
ဂွံပညာတုဲယဝ်ဟွံကၠောန် ဒှ်ကောန်မၞိဟ်ဝိုက်၊
ဂွံကောန်ယဝ်ဟွံဝေတ် ဒးဂေတ်လီုလာ်။

၁၁၆။ ဂၠံၚ်ခိုဟ်ဂှ်အာ ဂၠံၚ်မှာဂှ်ဒေါံ။
ဂၠံၚ်ခိုဟ်ဂှ်အာ ဟွံမှာတွဵုရ၊
ဂၠံၚ်မှာဒေါံမ္ဂး ဂွံဗၠးသောက။

၁၁၇။ ဂိုဏ်ဂှ်လ္ပစောဲဂၠိုၚ် နာမ်မြိုၚ်ဂှ်လ္ပထေၚ်ဇၞော်။
ဂိုဏ်ှ်ယဝ်စောဲဂၠိုၚ် ဒှ်ဂရိုၚ်သပ္ပရိုဟ်၊
နာမ်မြိုၚ်ဂှ်ယဝ်ထေၚ်ဇၞော် ဒှ်ဗော်ညးဟွံကၠိုဟ်။

၁၁၈။ ဂုဏ်ဂိုဏ်လ္ပလီုလာ် ဂုဏ်အခိုက်လ္ပယောၚ်ယာ။
ဂုဏ်ဂိုဏ်ယဝ်လိုလာ် ဂကူဗၠိုက်အိုတ်၊
ဂုဏ်အခိုက်ယဝ်ယောၚ်ယာ ဘာသာဟုတ်ပၠိုတ်အာ။

၁၁၉။ ဂုဏ်နွံဂှ်ထိၚ် ထဝိၚ်ခိုဟ်ဂှ်စွံ။
ဂုဏ်နွံဂှ်ယဝ်ဟွံထိၚ် ဇၟာပ်အခိၚ်ဟွံမဲဖိုလ်၊
ထဝိၚ်ခိုဟ်ယဝ်ဟွံစွံ ညံၚ်ထောံဖျေံဂုဏ်ဖိုလ်။

၁၂၀။ ဂုဏ်တ္ၚံက်လ္ပကဵုလေၚ် ဂုဏ်ပၠေၚ်လ္ပကဵုကျာတ်။
ဂုဏ်တ္ၚံက်ယဝ်လေၚ် မၞိဟ်ပၠေၚ်ဂကူရ၊
ဂုဏ်ပၠေၚ်ယဝ်ကျာတ် မၞိဟ်မာတ်တသိုက်ရ။

၁၂၁။ ဂုဏ်ထေၚ်လ္ပကျာတ် ဂုဏ်အာတ်လ္ပက္ဍုဟ်။
ဂုဏ်ထေၚ်ယဝ်ကျာတ် ဒှ်လညာတ်ဍန်၊
ဂုဏ်အာတ်ယဝ်က္ဍုဟ် ဘဝလၟုဟ်ဒးကၠိခန်။

၁၂၂။ ဂၠံၚ်ဒးတှ်ေဗကန် အခိၚ်တန်တှ်ေရာန်။
ဂၠံၚ်ဒးယဝ်ဗကန် ဒုဟ်ဒဏ်ဟွံလောန်၊
အခိၚ်တန်ယဝ်ရာန် ပိုန်ဟာန်အိုတ်အောန်။

၁၂၃။ ဂုဏ်လေပ်လ္ပကျာတ် ဂုဏ်ညာတ်လ္ပဒှ်ဝဲ။
ဂုဏ်လေပ်ယဝ်ကျာတ် ဒှ်လညာတ်ဍန်၊
ဂုဏ်ညာတ်ယဝ်ဒှ်ဝဲ ဂုဏ်ပရဲဟွံတန်။

၁၂၄။ ဂုဏ်ကွာန်လ္ပတၠိၚ် ဂုဏ်သၟိၚ်လ္ပကၠဟ်။
ယဝ်တၠိၚ်ဂုဏ်ကွာန် မၞိဟ်ဆာန်ယာဲဟွံသေၚ်၊
ယဝ်ကၠဟ်ဂုဏ်သၟိၚ် ထဝိၚ်ဒးဆဵုဟေၚ်။

၁၂၅။ ဂတမၞိဟ်လ္ပဒေါန် ဂတကောန်လ္ပရိုၚ်။
ဂတမၞိဟ်ယဝ်ဒေါန် ၚုဟ်ကောန်စှ်ေအိုတ်၊
ဂတကောန်ယဝ်ရိုၚ် ယေန်သၞာၚ်လီုအိုတ်။

၁၂၆။ ဂုဏ်ဝါတ်ပလီုလာ် ဂုဏ်သိုက်စိုတ်ပသၠုၚ်။
ဂုဏ်ဝါတ်ယဝ်လီုလာ် ဂၠိုၚ်သာ်ဒှ်အန္တရာယ်၊
ဂုဏ်သိုက်ယဝ်သၠုၚ် ညံၚ်ၜုၚ်ဖျေံအပါဲ။

၁၂၇။ ဂုဏ်ချိၚ်လ္ပယောၚ် ဂုဏ်အခေါၚ်ပလီု။
ဂုဏ်ချိၚ်ယဝ်ယောၚ် အခေါၚ်ခိုဟ်လီုဒိုက်၊
ဂုဏ်အခေါၚ်ယဝ်လီု ဒှ်မၞိဟ်ဓီုဝိုက်။

၁၂၈။ ဂုဏ်ဗြဴပလီု ဂုဏ်လမျီုပယုတ်။
ယဝ်လီုဂုဏ်ဗြဴ ညးလဴဒုဟ်ပေၚ်ကွာန်၊
ဂုဏ်လမျီုယဝ်ယုတ် ဒးဟုတ်ဇၟာပ်ဌာန်။

၁၂၉။ ဂုဏ်ပတှ်ေပလေၚ် ဂုဏ်အေၚ်ပလီု။
ဂုဏ်ပတှ်ေယဝ်လေၚ် ဂွံပေၚ်ပၠန်ဟွံလောဲ၊
ဂုဏ်အေၚ်ယဝ်လီု အရီုဗၚ်ဟၟဲ။

၁၃၀။ ဂုဏ်နွံတှ်ေဆာန် ပံၚ်မာန်တှ်ေကေတ်။
ဂုဏ်နွံယဝ်ဆာန် ကြာန်ဍေံဟွံဒှ်၊
ပံၚ်မာန်ယဝ်ကေတ် သၞဇေတ်ဟွံဒှ်။

၁၃၁။ ဂုဏ်အဝဵုပလီု ဂုဏ်လမျီုပယုတ်။
ဂုဏ်အဝဵုယဝ်လီု မၞိဟ်ရီုဟၟဲ၊
ဂုဏ်လမျီုယဝ်ယုတ် ဒးဟုတ်လောဲ။

၁၃၂။ ဂွံအခေါၚ်ပကြာန် ဂွံဌာန်ပလီု။
ဂွံအခေါၚ်ယဝ်ကြာန် မၞိဟ်ဆာန်ဟၟဲ၊
ဂွံဌာန်ယဝ်လီု သမၠီုဟွံတီဂုဏ်ပြဲ။

၁၃၃။ ဂွံအဝဵုဂွံဒှ်မ္ၚဵု ဂွံဆဵုကဵုဒှ်ဂုဏ်။
ဂွံအဝဵုဟွံဒှ်မ္ၚဵုမ္ဂး ဟွံဗၠးဂရိုဟ်ညး၊
ဂွံဆဵုဂုဏ်ဟွံဒှ် ဗျဟ်လောန်ညးဂး။

၁၃၄။ ဂုဏ်သြန်သၞောဝ်ပလီု ဂုဏ်အာရီုပဒှ်သၞ။
သြန်ပလီုသၞောဝ် ဟွံဇၞော်မောဝ်၊
ရီုဒှ်သၞ ပွဂှ်ဟွံဂပ်ဂေါဝ်။

၁၃၅။ ဂုဏ်ညးကဵုညာတ် ဒဒိုက်ဝါတ်ကဵုဆဵု။
ဟွံဆဵုဂုဏ် ရုန်မဵုလောဲ၊
ဟွံဆဵုဒဒိုက် တသိုက်ဇမ္ၚောဲ။

၁၃၆။ ဂွံကဵုဒှ်ဖဵု သၠးကဵုဒှ်ဂုဏ်။
ဂွံဒှ်ဖဵုမဂး ဒှ်ဒြပ်ဗၠးဝဲ၊
သၠးဒှ်ဂုဏ်မဂး ၚုဟ်မးသၠုၚ်ပြဲ။ ။

ဃ

၁၃၇။ ဃောညးထေဲလ္ပဟီုဒုဟ် ဃောညးလၞုဟ်လ္ပစကာ။
ဃောညးထေဲယဝ်ဟီုဒဟ် ဒှ်ဂဍုဟ်လောဲသွာ၊
ဃောညးလၞုဟ်ယဝ်စကာ ယံၚ်လောဲသွာ။

၁၃၈။ ဃရေက်ဃရေက်လ္ပချပ် အတိုၚ်ချပ်လ္ပဟီုဖအိုတ်။
ယဝ်ချပ်ဃရေက် ဟွံဇြိုဟ်နက်ရ၊
အတိုၚ်ချပ်ယဝ်ဟီုဖအိုတ် ဒှ်ဟိုတ်လီုလောဲရ။

၁၃၉။ ဃောဒိုက်ဒးဟေန်ဆာဲ ဃောဂၠာဲဒးအေၚ်။
ဃောဒိုက်ဟွံဟေၚ်ဆာဲ ဇၟာပ်ဒၞာဲဒးဍောၚ်ၜိုတ်၊
ဃောဲဂၠာဲဟွံအေၚ် ဟွံပေၚ်စဵုချိုတ်။

၁၄၀။ ဃောဆာန်ဂှ်ဝေတ် ဃောဗၠေတ်ဂှ်ဟီုထၜး။
ဃောဆာန်ယဝ်ဝေတ် ဍေံကေတ်စလောဲ၊
ဃောဗၠေတ်ယဝ်ဟီုထ္ၜး ဍေံသေၚ်ကၠးလောဲ။

၁၄၁။ ဃောကၠောန်လ္ပရံၚ်ဒုဟ် ဃောဍုဟ်လ္ပတက်ကျာ။
ဃောကၠောန်ယဝ်ရံၚ်ဒုဟ် စိုတ်လၞုဟ်ဂွံဒၞါဲ၊
ဃောဍုဟ်ယဝ်တက်ကျာ ရေဝ်မှာဒှ်အန္တရာယ်။

၁၄၂။ ဃောခိုဟ်လ္ပယုတ် ဃောဟုတ်လ္ပကြာန်။
ဃောခိုဟ်ယဝ်ယုတ် ကျာ်သြဳဟုတ်ပၠိုတ်၊

ၚ

၁၄၃။ ၚုဟ်မးဘဝကဵုဂွံကၠိုဟ် သပ္ပရိုဟ်ဂှ်နိဿဲ။
ၚုဟ်ဘဝယဝ်ကၠိုဟ် ကမၠောန်ခိုဟ်ဒှ်လောဲ၊
သပ္ပရိုဟ်ယဝ်နိဿဲ မွဲတ္ၚဲဂွံခိုဟ်ပြဲ။ ။

စ

၁၄၄။ စကဵုဒှ်ဖိုလ် မံၚ်ကဵုညးဆာန်။
စယဝ်ဒှ်ဖိုလ် တ္ၚဲလဵုဟွံဒးယဲ၊
ယဝ်မံၚ်ကဵုညးဆာန် မၞိဟ်သ္ပာန်ကဵုဇကုဟွံမွဲ။

၁၄၅။ စိုတ်ကဵုထတ် ဇြဟတ်ကဵုနွံ။
ယဝ်စိုတ်ထဝ်မ္ဂး ဟွံဒးဟီုဂၠိုၚ်၊
ယဝ်ဇြဟတ်နွံမ္ဂး ကၠောန်ဂွံၚုဟ်ဂၠိၚ်။

၁၄၆။ စိုတ်လေဝ်လ္ပကဵုကၠိ မံၚ်ပ္ဍဲသ္ၚိလေဝ်ဓရ်ကဵုနွံ။
ယဝ်စိုတ်ကၠိ ကသပ်တၟိဒှ်ဟွံလောဲ၊
မံၚ်ပ္ဍဲသ္ၚိယဝ်ဓရ်ဟွံမဲ ဂြဲဂြက်ဒှ်သၞဝဲ။

၁၄၇။ စိုတ်ကဵုဂွံတန် ကၠောန်ပၠန်ကဵုဒးရး။
စိုတ်ယဝ်ဟွံတန် ဒှ်လက်သန်မၞိဟ်ဟွံမာန်စိုတ်၊
ယဝ်ကၠောန်ဟွံဒးရး ညးဟွံဒးစိုတ်။

၁၄၈။ စိုတ်လေဝ်ကဵုတပ်တး သၟးသၟးလေဝ်လ္ပမံၚ်။
စိုတ်ယဝ်တပ်တး ဂွံဒုၚ်အထိုၚ်သးညးရ၊
သၟးသၟးယဝ်မံၚ်မ္ဂး ကြဴဒးဆဵုဒဒိုက်ရ။

၁၄၉။ စလ္ပကဵုလောန်ကာဲ စိုတ်စၞာဲလ္ပစွံ။
စယဝ်လောန်ကာဲ အန္တာယ်ဒှ်ဍာံရ၊
ယဝ်စွံစိုတ်စၞာဲ ဂွံဆာဲတိုန်ဝါတ်ရ။

၁၅၀။ စိုတ်ဟွံမဲမ္ဂးလ္ပကၠောန် ညးဒေါန်မ္ဂးလ္ပဂိ။
စိုတ်ဟွံမဲယဝ်ကၠောန် ကမၠောန်ဂှ်ဟွံအံၚ်၊
ညးဒေါန်ယဝ်ဂိ ညံၚ်သုၚ်ဂျိစိုတ်ဒးစံၚ်။

၁၅၁။ စလေဝ်ဒးဗစာ မှာလေဝ်ဒးပဠေဝ်။
စယဝ်ဟွံဗစာ မှာလောန်တှ်ေချိုတ်၊
မှာဒၟံၚ်ဟွံပဠေဝ်မ္ဂး ဟွံဒးစဵုကဵုချိုတ်။

၁၅၂။ စိုတ်လ္ပကဵုၜတ် ပ္ဍဲကွတ်လ္ပထေၚ်သောဲ။
ယဝ်စိုတ်ၜတ် ဇြဟတ်ဍိုန်ဒှ်၊
ပ္ဍဲကွတ်ထေၚ်သောဲ လွဳမွဲအေဲကှ်။

၁၅၃။ စိုတ်လ္ပကဵုပြဟ် ၜိုတ်ဒှ်ဂှ်ဟီု။
ယဝ်စိုတ်ပြဟ် ကြဴဒှ်ဂမ်တူ၊
ၜိုတ်ဒှ်ယဝ်ဟီုမ္ဂး ဟွံဒးစံၚ်တူ။

၁၅၄။ စိုတ်လ္ပကြာန် ဂလာန်လ္ပကာတ်။
ယဝ်စိုတ်ကြာန် မၞိဟ်ဆာန်ဇကုဟွံမဲ၊
ယဝ်ဂလာန်သကာတ် ညးညာတ်ဟွံပရဲ။

၁၅၅။ စလေဝ်ကဵုဖဲ သၞဝဲလေဝ်လ္ပဂလိုၚ်။
စဒၟံၚ်ယဝ်ဟွံဖဲ ဒှ်မၞိဟ်တဲဍိုန်၊
သၞဝဲယဝ်ဂလိုၚ် ဂွိၚ်ဂၠိုၚ်ကၠောန်စဟွံတိုန်။

၁၅၆။ စသုၚ်လေဝ်ချိၚ်ဆ ကာလလေဝ်ဒးတီ။
စသုၚ်ဟွံချိၚ်ဆ ကာလယဲမှတီ၊
ကာလဟွံတီမ္ဂး မွဲတ္ၚဲဒးဗၠိုက်တၞီ။

၁၅၇။ သၟဳစၟတ်တုဲသ္ပ တော်ဆတုဲဟီု။
စၟဳစၟတ်တုဲယဝ်သ္ပ ဍာံပြစိုပ်လအိတ်၊
တော်ဆတုဲယဝ်ဟီု ဟွံဒးလီုမိတ်။

၁၅၈။ စိုတ်ခိုဟ်ကဵုနွံကၠာ ဓဝ်ဗစာကဵုနွံလၟိုန်။
စိုတ်ခိုဟ်နွံကၠာမှ ဒ္ဂေတ်ပွခိုဟ်ဒှ်လောဲ၊
ဓဝ်ဗစာနွံလၟိုန်မှ ဂွံဗၠးသၞဝဲ။

၁၅၉။ စိုတ်ခိုဟ်ဂှ်ဒးလွဳ မဂဳခိုဟ်ဂှ်ဒးဂၠာဲ။
စိုတ်ခိုဟ်ယဝ်လွဳ ဇၟာပ်ဇဳဂၠံၚ်ဒှ်တသိုက်၊
မဂဳခိုဟ်ယဝ်ဂၠာဲ ဟွံဒးမာဲပ္ဍဲလိုက်။

၁၆၀။ စိုတ်လ္ပဍိုန်လျ မာနလ္ပစွံ။
စိုတ်ယဝ်ဍိုန်လျ မာနယုတ်သဝ်၊
မာနယဝ်စွံ ညံၚ်ပါဲထောံသွတ်။

၁၆၁။ စိုတ်ဒးထိၚ် ထဝိၚ်ဒးဖအောန်။
စိုတ်ယဝ်ထိၚ် အာယုက်ဂၠိၚ်ခိုဟ်၊
ထဝိၚ်ယဝ်ဖအောန် ကောန်စိုတ်ၜိုဟ်။

၁၆၂။ စိုတ်လေဝ်လ္ပသာ စေတနာလေဝ်လ္ပလီု။
ယဝ်စိုတ်သာ ကေၚ်ကာလီုလာ်၊
စေတနာယဝ်လီု ဟောမ်ဗြုံဂၠိုၚ်သာ်။

၁၆၃။ စိုတ်ပၠေၚ်ဒှ်အေၚ် ပွလေဝ်ဂှ်ပါဲ။
စိုတ်ပၠေၚ်ယဝ်ဟွံအေၚ် ဒးလေၚ်ဒိုက်၊
ပွလေၚ်ယဝ်ဟွံပါဲ ဟွံဆာဲပ္ဍဲလိုက်။

၁၆၄။ စိုတ်လ္ပလီု အာရီုလ္ပဂၠိုၚ်။
စိုတ်ယဝ်လီု ဂွံဂီုကၠီုဝါတ်၊
အာရီုယဝ်ဂၠိုၚ် ပခိုၚ်စိုတ်ဝါတ်။

၁၆၅။ စိုတ်လေဝ်ကဵုခိုဟ် ကၠိုဟ်လေဝ်ကဵုကၠိုဟ်။
ယဝ်စိုတ်ခိုဟ် ဂွံၜိုဟ်ဇၟာပ်ဒၞါဲ၊
ယဝ်ရကၠိုဟ် ဂွံခိုဟ်ဆာဲ။

၁၆၆။ စိုတ်လေဝ်ကဵုပါ စေတနာလေဝ်ကဵုထတ်။
ယဝ်စိုတ်ပါ ကၠောန်အာဟွံလၞုဟ်၊
စေတနာယဝ်ထတ် ဇြဟတ်ပေၚ်လၟုဟ်။

၁၆၇။ စိုတ်လ္ပၜတ် ဇြဟတ်လ္ပဍိုန်။
ယဝ်စိုတ်ၜတ် ဇြဟတ်ဍိုန်လျ၊
ယဝ်ဇြဟတ်ဍိုန် ဂၠံၚ်တိုန်ဟွံထဗ။

၁၆၈။ စိုတ်ဒးဇြုၚ်ဗု ဗဟုသုတဒးနွံ။
စိုတ်ယဝ်ဇြုၚ်ဗု ပွကုသိုလ်ဒှ်လောဲ၊
ဗဟုသုတယဝ်နွံ စုံရုံဂွံပြဲ။

၁၆၉။ စိုတ်ခိုဟ်ဂှ်လွဳ ဓဝ်ညဳဂှ်ဂၠာဲ။
စိုတ်ခိုဟ်ယဝ်လွဳ ဟွံဒးဟဳဗၠိုက်၊
ဓဝ်ညဳယဝ်ဂၠာဲ ဂကူဆာဲဗၠးဒဒိုက်။

၁၇၀။ စိုတ်လေဝ်ဒးထတ် ဇြဟတ်လေဝ်ဒးနွံ။
ယဝ်စိုတ်ထတ် ဗိုန်ဗတ်ကၠောန်မာန်၊
ယဝ်ဇြဟတ်နွံ အလုံကမၠောန်သ္ပမာန်။

၁၇၁။ စိုတ်လေဝ်ဒးထိၚ် ထဝိၚ်လေဝ်ဒးနွံ။
ယဝ်ဟွံထိၚ်စိုတ် ဒှ်ဟိုတ်လီုလာ်၊
ယဝ်ထဝိၚ်ဟွံမဲ ဆဵုဘဲဂၠိုၚ်သာ်။

၁၇၂။ စိုတ်ကဵုဂၠိၚ် ထဝိၚ်ကဵုနွံ။
စိုတ်ဂၠိၚ်မှ ထိၚ်ဒက်ဂကောမ်မာန်၊
ထဝိၚ်နွံမှ သၞဝဲဗၠးမာန်။

၁၇၃။ စိုတ်ဓါတ်ဒးခိုဟ် ဓဝ်ကၠိုဟ်ဒးနွံ။
စိုတ်ဓါတ်ခိုဟ်မှ အာဂတမာန်၊
ဓဝ်ကၠိုဟ်နွံမှ သောကဟွံဗါန်။

၁၇၄။ စိုတ်လေဝ်ကဵုအး ကၠးလေဝ်ကဵုကၠး။
စိုတ်ဟွံအး ယးတၟးဟွံလောဲ၊
ယဝ်ဟွံကၠး မံၚ်သၟးဒးဘဲ။

၁၇၅။ စိုတ်ပသာ စေတနာပလောန်။
ယဝ်စိုတ်သာ ဒးမှာလောဲ၊
စေတနာလောန် ဒးအောန်စိုတ်လောဲ။

၁၇၆။ စိုတ်ဂှ်မၚ်မွဲ သၟဝဲဂှ်ဖအောန်။
ယဝ်မၚ်မွဲစိုတ် ၜိုန််ချိုတ်ဒှ်မ္ၚဵု၊
ယဝ်ဖအောန်သၞဝဲ မိတ်ပြဲဂွံဆဵု။

၁၇၇။ စိုတ်ပလ္ၚု ယၟုပလီု။
စိုတ်လ္ၚုမဂး အံၚ်ဇၞးဝါတ်၊
ယၟုယဝ်လီု မၞိဟ်ရီုဟွံညာတ်။ ။

ဆ

၁၇၈။ ဆာန်မ္ဂးလ္ပစောဲ ဟွံမွဲမ္ဂးလ္ပလၞုဟ်။
ဆာန်တုဲယဝ်စောဲ ကြဴတဲဒးစံၚ်တူ၊
ဟွံမဲယဝ်ရလၞုဟ် ဘဝလၟုဟ်ဒှ်ဂမ်တဴ။

၁၇၉။ ဆာန်ဒၟံၚ်လ္ပကဵုကွးကၠိုဟ် ဂွံခိုဟ်ပရအ်ကဵုညိ။
ဆာန်ဒၟံၚ်ယဝ်ကွးကၠိုဟ် ကွးခိုဟ်လီုအိုတ်၊
ဂွံခိုဟ်ပရအ်ဟွံညဳ ကွးချဳဒရိုက်အိုတ်။

၁၈၀။ ဆဒှ်လ္ပကၠောန် ၜိုတ်အစောန်နွံလ္ပထ္ၜး။
ယဝ်ကၠောန်ဆဒှ် ကမၠောန်ဂှ်ဟွံချိုတ်ပၠိုတ်၊
ၜိုတ်အစောန်နွံယဝ်ထ္ၜး မၞိဟ်ကၠးညးဟွံစှ်ေစိုတ်။

၁၈၁။ ဆာန်တုဲလ္ပသာဲ ဆာဲတုဲလ္ပဂြုဲ။
ဆာန်တုဲယဝ်သာဲ ဒှ်သဟာဲယုတ်ယုတ်၊
ဆုဲတုဲယဝ်ဂြုဲ ဒှ်မၞိဟ်ဒုဲညဴၚ်ခဒုတ်။

၁၈၂။ ဆာန်အိုတ်လ္ပထ္ၜး ဟွံတီကၠးလ္ပကဵု။
ဆာန်အိုတ်ယဝ်ထ္ၜး ဍေံကလေၚ်စးဇကုပၠန်၊
ဟွံတီကၠးယဝ်ကဵု ဂုဏ်ဖိုလ်ဍေံဟွံတန်။

၁၈၃။ ဆာန်လ္ပဆာန်လောန် ဒေါန်လ္ပဒေါန်ဂၠိုၚ်။
ယဝ်ဆာန်လောန် ကဟောန်ဒှ်သၞ၊
ယဝ်ဒေါန်ဂၠိုၚ် အတိုၚ်ဟီုဍေံဟွံသ္ပ။

၁၈၄။ ဆဵုသၚ်ပၚ်တဲ ညာတ်ရဲရေဝ်ကဵုဍာတ်။
ဆဵုသၚ်ယဝ်ပၚ်တဲ ဒှ်မ္ၚဵုပြဲတီကၠး၊
ညာတ်ရဲယဝ်ရေဝ်ဍာတ် ရဲဒါတ်စးဒးထိုၚ်သး။

၁၈၅။ ဆာန်လေဝ်လ္ပကဵုမှာ ပၟိက်တဏှာလေဝ်လ္ပဗက်။
ယဝ်ဆာန်မှာ မေတ္တာကှ်ဒှ်သၞ၊
ယဝ်ဗက်ပၟိက်တဏှာ သံသာဟွံပိုတ်ရ။

၁၈၆။ ဆန္ဒကဵုထတ် ဇြဟတ်စိုတ်ကဵုနွံ။
ဆန္ဒယဝ်ထတ် ဂွံပြာကဋ်တွဵု၊
ဇြဟတ်စိုတ်ယဝ်နွံ အလုံကမၠောန်မာန်တွဵု။

၁၈၇။ ဆဵုကမၠောန်ချပ်ဗစာ ဆဵုမှာပါဲထောံ။
ဆဵုကမၠောန်ချပ်ဗ္စမှ ကာလကၠောန်ဗၠေတ်အောန်၊
ဆဵုမှာပါဲမှ ဒှ်ပွလုပ်ပၞောန်။

၁၈၈။ ဆၜိုတ်တီလ္ပဒးဂၞပ် ဆၜိုတ်ချပ်လ္ပထေၚ်တုဲ။
ဆၜိုတ်တီယဝ်ဒးဂၞပ် မၞိဟ်တပ်ဟွံဒှ်ရ၊
ဆၜိုတ်ခပ်ယဝ်ထေၚ်တုဲ ဒှ်ကၞုဲသိုၚ်သ္ၚိသၠ။

၁၈၉။ ဆာန်ဗြဴတှ်ေထိုၚ်သး ဆာန်ကွးတှ်ေဝေတ်။
ယတ်ထိုၚ်သးဗြဴ ဍေံဟွံလဴဒုဟ်ဇကု၊
ယဝ်ဝေတ်ကွး ဍေံကၠးမ္ဂးဟွံထောံဇကု။

၁၉၀။ ဆဵုဒုဟ်ဒးယံၚ် ဆဵုပွံၚ်ဒးဗစာ။
ဆဵုဒုဟ်ယဝ်ဟွံယံၚ် ဂံၚ်ကၠောန်ဂံၚ်သ္ပ၊
ဆဵုပွံၚ်ယဝ်ဟွံဗစာ ဂၠံၚ်မှာဂၠိုၚ်ရ။

၁၉၁။ ဆၜိုတ်စလ္ပထေၚ်ခိုဟ် ဆၜိုတ်ကၠိုဟ်လ္ပထေၚ်စောန်။
ဆၜိုတ်စထေၚ်ခိုဟ် မၞိဟ်သၠိုဟ်တုပ်ကၠဵု၊
ဆၜိုတ်ကၠိုဟ်ထေၚ်စောန် လညာတ်အောန်ဟၟဲဖဵု။

၁၉၂။ ဆာန်တှ်ေပံၚ် ယံၚ်တှ်ေဗစာ။
ဆာန်တုဲယဝ်ပံၚ် ဒှ်ပွံၚ်နွံဂုဏ်၊
ယံၚ်တှ်ေယဝ်ဗ္စာ ပွမှာဟွံဍုန်။

၁၉၃။ ဆဆဵုလ္ပကြာန် ဆဆဵုလ္ပဆာန်။
ဆဆဵုယဝ်ကြာန် သ္ၚိဌာန်ဒးကၠဟ်၊
ဆဆဵုယဝ်ဆာန် ဒဒိက်ဗါန်ပြဟ်။

၁၉၄။ ဆာန်အေၚ်ဒုၚ် ကေတ်ဍုၚ်စန်ဒက်။
ဆာန်တုဲဟွံအေၚ်ဂှ် ဒှ်သၞဝဲ၊
ကေတ်ဍုၚ်ဟွံစန်ဒက် ဒှ်ကမၠောန်လက်ဂြဲ။

၁၉၅။ ဆက်ဆောမ်ဒးဍိုဟ် ကၠိုဟ်ခၠၚ်ဒးနွံ။
ဆက်ဆောမ်ဍိုဟ်မှ အာဂတမာန်၊
ကၠိုဟ်ခၠၚ်နွံမှ ကၠောန်ပဟွံဒှ်ကြာန်။ ။

ဇ

၁၉၆။ ဇကုလေဝ်လ္ပပတိုန် မၞိဟ်ဍိုန်လေဝ်လ္ပဍဵု။
ဇကုယဝ်ပတိုန်ရ ဒှ်မၞိဟ်ဆဆဵ၊
မၞိဟ်ဍိုဟ်ယဝ်ဍဵုမ္ဂး ဟွံဗၠးဒဒိုက်ရုန်မဵု။

၁၉၇။ ဇၟာပ်ကၠောန်လ္ပပအ် ဓရ်တ္ၚအကဵုနွံ။
ကၠောန်ယဝ်ပအ် ဟွံလအ်ဒးလေၚ်၊
ယဝ်နွံဓရ်တ္ၚအ် ဟွံလအ်ဂွံဍိုက်ပေၚ်။

၁၉၈။ ဇၟာပ်ဒၞါဲလေဝ်လ္ပညှာ ဇၟာပ်အာလေဝ်ဒးစမ်ၜတ်။
ဇၟာပ်ဒၞါဲယဝ်ညှာ ကောန်အပါဟွံမဲဒှ်ဂွံ၊
အာဟွံစမ်ၜတ် လောန်ဗၞတ်ဘဲဒှ်ဂွံ ။

၁၉၉။ ဇၟာပ်ညးဟီုလ္ပကလၚ် ကၠဵုဆၚ်လ္ပရပ်။
ဇၟာပ်ညးဟီုယဝ်ကလၚ်မ္ဂး မွဲတ္ၚဲဒးဒုၚ်ဗျိ၊
ကၠဵုဆၚ်ယဝ်ရပ်မ္ဂး ဍေံကိတ်တှ်ေဒးဂိ။

၂၀၀။ ဇၟာပ်ကၠောန်ကဵုဒှ်မ္ၚဵု ဇၟာပ်ဆဵုကဵုဒှ်သဟာဲ။
ကၠောန်ယဝ်ဒှ်မ္ၚဵု ပူဂိုလ်ကျာ်ဆာန်၊
ဆဵုယဝ်ဒှ်သဟာဲ ဂွံဆာဲဇၟာပ်ဌာန်။

၂၀၁။ ဇၟာပ်ဍာ်လေဝ်လ္ပသုၚ် ဇၟာပ်ပုၚ်လေဝ်လ္ပစ။
ဇၟာပ်ဍာ်ယဝ်သုၚ် အန္တရာယ်ကၠုၚ်စိုပ်ဒှ်၊
ဇၟာပ်ပုၚ်ယဝ်စမ္ဂး ဟွံဗၠးဘဲသကာတ်မြဟ်။

၂၀၂။ ဇၟာပ်ဗြဴလ္ပပံၚ် ဇၟာပ်ဂၠံၚ်လ္ပကွာ်။
ဇၟာပ်ဗြဴယဝ်ပံၚ် ကြဴဒးယံၚ်စိုတ်၊
ဇၟာပ်ဂၠံၚ်ယဝ်ကွာ် ဂၠိုၚ်သာ်ဒးဍောၚ်စိုတ်။

၂၀၃။ ဇၟာပ်ဆဵုလ္ပအာတ် ဇၟာပ်ညာတ်လ္ပရပ်။
ဇၟာပ်ဆဵုယဝ်အာတ် ညးတၞဟ်က္ဍုဟ်၊
ဇၟာပ်ညာတ်ယဝ်ရပ် ဒြပ်ညးလီုဒးဒုဟ်။

၂၀၄။ ဇၟာပ်မၞိဟ်လ္ပသၟာန် ဇၟာပ်ဍာန်လ္ပအာ။
ဇၟာပ်မၞိဟ်ယဝ်သၟာန် ဒှ်ကြာန်မာန်ရ၊
ဇၟာပ်ဍာန်ယဝ်အာ ဒးဍောၚ်ကာယ။

၂၀၅။ ဇၟာပ်ဍိုန်လ္ပအောန်စိုတ် ဇၟာပ်အိုတ်လ္ပဂိုဟ်။
ဇၟာပ်ဍိုန်ယဝ်အောန်စိုတ် ဒှ်ဟိုတ်လေၚ်ဒိုက်၊
ဇၟာပ်အိုတ်ယဝ်ဂိုဟ် ဒှ်မၞိဟ်ၜိုဟ်ဝိုက်။

၂၀၆။ ဇၟာပ်ဒဒိုက်လ္ပဖေက် ဇၟာပ်ဒေက်လ္ပဇြိုၚ်စိုတ်။
ဇၟာပ်ဒဒိုက်ယဝ်ဖေက် လွဳဒေက်ဒှ်ဂွံမံၚ်၊
ဇၟာပ်ဒေက်ယဝ်ဇြိုၚ်စိုတ် ဒးဍောၚ်ၜိုတ်ဇၟာပ်ဂၠံၚ်။

၂၀၇။ ဇၟာပ်ဒၞာဲလ္ပညှာ ဇၟာပ်အ္စာလ္ပပတှ်ေ။
ဇၟာပ်ဒၞာဲယဝ်ညှာ ကေၚ်ကာလီုလောဲ၊
ဇၟာပ်အ္စာယဝ်ပတှ်ေ ဟွံဗၠးသၞဝဲ။

၂၀၈။ ဇကုလေဝ်ကဵုခိုဟ် သပ္ပုရိုဟ်လေဝ်ဗ္ဒာဲ။
ဇကုယဝ်ခိုဟ် သပ္ပုရိုဟ်ဒှ်လောဲ။
သပ္ပုရိုဟ်ယဝ်ဗ္ဒာဲ ဂွံဆာဲညံၚ်တ္ၚဲ။

၂၀၉။ ဇၟာပ်အိုတ်ကဵုဒှ်ဖဵု ဇၟာပ်ကဵုဂုဏ်ကဵုနွံ။
ဇၟာပ်အိုတ်ယဝ်ဟွံမဲဖဵု ညံၚ်ကဵုပၠေၚ်ဝေၚ်ဒြပ်၊
ဇၟာပ်ကဵုဂုဏ်ဟွံမဲ ညံၚ်ပျဲဝေၚ်ဇကု။

၂၁၀။ ဇၟာပ်မၞိဟ်လေဝ်လ္ပဆာန် ဇၟာပ်ဌာန်လေဝ်လ္ပအာ။
ဇၟာပ်မၞိဟ်ယဝ်ဆာန် ဒဒိုက်ဗါန်စး၊
ဇၟာပ်ဌာန်ယဝ်အာ ဗၠေတ်မှာအိုတ်အး။

၂၁၁။ ဇၟာပ်ကၠောန်လ္ပကဟောန် ဇၟာပ်ဒေါန်လ္ပထေဲ။
ဇၟာပ်ကၠောန်ယဝ်ကဟောန် ဒှ်ကမၠောန်ဂၠာဲဒုဟ်၊
ဇၟာပ်ဒေါန်ယဝ်ထေဲမ္ဂး ဟွံဗၠးကဍုဟ်။

၂၁၂။ ဇၟာပ်ဇြိုၚ်လ္ပယှအ် ဇၟာပ်တ္ၚအ်လ္ပကၠောန်။
ဇၟာပ်ဇြိုၚ်ယဝ်ယှအ် လွဳပအ်ညာဏ်ဓီု၊
ဇၟာပ်တ္ၚအ်ယဝ်ကၠောန် ခါလောန်စိုတ်လီု။

၂၁၃။ ဇၟာပ်ကၠောန်လ္ပထေၚ်ခိုဟ် ဇၟာပ်ကၠိုဟ်လ္ပထေၚ်ဒး။
ဇၟာပ်ကၠောန်ယတ်ထေၚ်ခိုဟ် သပ္ပုရိုဟ်ဟွံဒှ်၊
ဇၟာပ်ကၠိုဟ်ယဝ်ထေၚ်ဒး ဟွံဗၠးဗျိညးတၞဟ်။

၂၁၄။ ဇၟာပ်ဒၞာဲလ္ပပတှ်ေ ဇၟာပ်ပတှ်ေလ္ပထေၚ်ဒး။
ဇၟာပ်ဒၞာဲလ္ပပတှ်ေမ္ဂး ဟွံဗၠးဒးလေၚ်၊
ဇၟာပ်ပတှ်ေထေၚ်ခိုဟ် ဓရ်ၜိုဟ်ဟွံပေၚ်။

၂၁၅။ ဇၟာပ်ဒၞာဲလ္ပပြိုၚ် ဇၟာပ်ပရိုၚ်လ္ပကလၚ်။
ဇၟာပ်ဒၞာဲယဝ်ပြိုၚ် ဒှ်မၞိဟ်ရိုၚ်ရိ၊
ဇၟာပ်ပရိုၚ်ယဝ်ကလၚ် ဟွံဗၠးဒုဟ်တၚ်ဗျိ။

၂၁၆။ ဇၟာပ်ဒၞာဲလ္ပထေၚ်ကမ် ဇၟာပ်ဟီုလ္ပထေၚ်ဒး။
ဇၟာပ်ဒၞာဲထေၚ်ကမ် မၞိဟ်အမ်အမ်ညးကော်၊
ဇၟာပ်ဟီုထေၚ်ဒး ဟွံဗၠးသၞဝဲဇၞော်။

၂၁၇။ ဇၟာပ်ပညာလ္ပကတ် ဇၟာပ်ကွတ်လ္ပဗတောန်။
ဇၟာပ်ပညာယဝ်ကတ် ပဋိပတ်လီုအိုတ်၊
ဇၟာပ်ကွတ်ယဝ်ဗတောန် မှာလောန်စဵုချိုတ်။

၂၁၈။ ဇၟာပ်ဒၞာဲလ္ပကျိုၚ် ဇၟာပ်ကယျိုၚ်လ္ပလတက်။
ဇၟာပ်ဒၞာဲယဝ်ကျိုၚ် သၞဂၠိုၚ်ဒးဘယ်၊
ဇၟာပ်ကယျိုၚ်ယဝ်လတက် ဂုဏ်ကြက်ဟွံမဲ။

၂၁၉။ ဇၟာပ်ဒၞါဲဟွံခိုဟ် ဇၟာပ်ကၠိုဟ်ဟွံဒှ်ဂုဏ်။
ဇၟာပ်ဒၞါဲယဝ်ခိုဟ် ၜိုဟ်သိုဟ်လောဲ၊
ဇၟာပ်ကၠိုဟ်ယဝ်ဒှ်ဂုဏ် ရုန်မဵုဟွံမဲ။

၂၂၀။ ဇြဟတ်စိုတ်ဂှ်လွဳ ဇြဟတ်ညဳဂှ်ဂစာန်။
ဇြဟတ်စိုတ်ယဝ်လွဳ တသိုက်ဇဳဂွံမာန်၊
ဇြဟတ်ညဳယဝ်ဂစာန် လုံကွာန်ၜိုဟ်မာန်။ ။

ၛ

၂၂၁။ ဇျာန်နူညးလ္ပကျိုၚ် ကယျိုၚ်တၟေၚ်လ္ပလတက်။
ဇျာန်နူညးယဝ်ကျိုၚ် မၞိဟ်ရိုၚ်ဇိုၚ်ဒှ်ဂွံ၊
ယဝ်လတက်ကယျိုၚ်တၟေၚ် ဒးဒုၚ်ထေၚ်သဝ်ဂွံ။ ။

ည

၂၂၂။ ညးဟီုကၠုၚ်ဒးပါ်ဖါဲ ညးဂၠာဲနၚ်ဒးတၚ်ဂုဏ်။
ညးဟီုကၠုၚ်ယဝ်ဟွံပါ်ဖါဲ ဂၠံၚ်ဂွံဆာဲဟွံဆဵု၊
ညးဂၠာဲနၚ်ဟွံတၚ်ဂုဏ် ဒှ်သမၠီုရုန်မဵု။

၂၂၃။ ညးတၞဟ်လ္ပကဵုက္ဍဟ် ညာတ်ဒုဟ်တှ်ေဝေၚ်ပါဲ။
ယဝ်ညးတၞဟ်ဍုဟ် ၚုဟ်မးဇကုအောန်၊
ညာတ်ဒုဟ်ဟွံဝေၚ်ပါဲ ဂွံဆာဲတိုန်ဝါတ်လောန်။

၂၂၄။ ညံၚ်ဂွံခိုဟ်ဂှ်ချပ် ညံၚ်ဂွံတပ်ဂှ်ဝေတ်။
ညံၚ်ဂွံခိုဟ်ယဝ်ဟွံချပ် ၜိုတ်ချပ်ဒှ်ဒဒိုက်၊
ညံၚ်ဂွံတပ်ယဝ်ဟွံဝေတ် ၜိုတ်ဝေတ်ဒးလီုလာ်။

၂၂၅။ ညံၚ်ဂွံညဳဂှ်ဖန် ညံၚ်ဂွံတန်ဂှ်သ္ပ။
ညံၚ်ဂွံညဳယဝ်ဖန် စန်ဒက်ဂကောံလောဲ၊
ညံၚ်ဂွံတန်ယဝ်သ္ပဒှ် ဂကောံဂှ်ဂွံခိုဟ်ပြဲ။

၂၂၆။ ညံၚ်ဟွံဂိဂှ်ဝေတ် ညံၚ်ဟွံဗၠေတ်ဂှ်ချပ်။
ညံၚ်ဟွံဂိယဝ်ဝေတ် ကွးဒုၚ်ဝေတ်လေဝ်မံၚ်လောဲ၊
ညံၚ်ဟွံဗၠေတ်ယဝ်ချပ် ကသပ်ခိုဟ်ညးဒုၚ်တဲ။

၂၂၇။ ညးပြိုၚ်မ္ဂးဒုၚ်ကျ ညးသ္ပမ္ဂးအေၚ်ဒုၚ်။
ညးပြိုၚ်ယဝ်ဒုၚ်ကျ ဆလအ်ဟွံဒးဂိသကေဝ်၊
ညးသ္ပယဝ်အေၚ်ဒုၚ် လအ်ကၠုၚ်ဒှ်ရဲဖဝ်။

၂၂၈။ ညးသၟာန်မှဂး ဟွံဒးမှဝေတ်။
ညးဟွံသၟာန်ယဝ်ဂး မၞိဟ်ဒးစိုတ်အောန်၊
ဟွံဒးယဝ်ဝေတ် မေတ္တာဇေတ်ဒှ်အောန်။

၂၂၉။ ညးဒိုက်လ္ပဍဵုဍိုက် ညးသိုက်လ္ပစောန်စိုတ်။
ညးဒိုက်ယဝ်ဍဵုဍိုက် ဒှ်အခိုက်သမၠီု၊
ညးသိုက်ယဝ်စောန်စိုတ် ဒှ်ဟိုတ်ဂွံဟောမ်ဗြံ။

၂၃၀။ ညာတ်သတ်လေဝ်လ္ပပျဲ ညာတ်ဝဲလေဝ်လ္ပဒက်။
ညာတ်သတ်ယဝ်ပျဲ ဒးဆဵုဘဲဨကန်၊
ညာတ်ဝဲယဝ်ဒက် နရက်ဒှ်သ္ၚိဒတန်။

၂၃၀။ ညံၚ်ဂွံဂိလေဝ်လ္ပဟီု စိုတ်ကြံကြလေဝ်လ္ပစွံ။
ညံၚ်ဂွံဂိယဝ်ဟီု မေတ္တာလီုဒှ်သၞ၊
စိုတ်ကြံကြယဝ်စွံမ္ဂး မွဲတ္ၚဲဒးဂိရ။

၂၇၀။ ညးသိုက်မ္ဂးအိုဟ်တၟိုဟ် ညးခိုဟ်မ္ဂးထိုၚ်သး။
ညးသိုက်အိုဟ်တၟိဟ် သပ္ပုရိုဟ်ညးကော်၊
ညးခိုဟ်ထိုၚ်သးပၠန် ဒှ်လက်သန်မၞိဟ်ဇၞော်။

၂၃၃။ ညးကၠောန်လေဝ်လ္ပပလီု ညးဟီုလ္ပဆေဝ်တာ။
ညးကၠောန်ယဝ်ပလီု သမၠီုညးကော်အိုတ်၊
ညးဟီုယဝ်ဆေဝ်တာ မေတ္တာညးပၠိုတ်။

၂၃၄။ ညးတၞဟ်လေဝ်လ္ပပျဲ ဇကုပြဲအိုတ်လေဝ်လ္ပစွံ။
ညးတၞဟ်ယဝ်ပျဲ ကျာ်တြဲလေဝ်ဟွံထိုၚ်သး၊
ဇကုပြဲအိုတ်ယဝ်စွံမ္ဂး ညးညာတ်ဒးက္ဍုဟ်ပြး။

၂၃၅။ ညးထ္ၜလေဝ်လ္ပတိုန် ဟွံတိုန်လေဝ်လ္ပဒှ်။
ညးထ္ၜယဝ်တိုန် ဒှ်ကိုန်သမၠီုဒယှ်၊
ညးထ္ၜယဝ်ဟွံတိုန် သတ္တိဍိုန်လေဝ်ဒှ်။

၂၃၆။ ညံၚ်ဂွံစိုပ်ဂှ်အာ ညံၚ်ဟွံမှာဂှ်မံၚ်။
ညံၚ်ဂွံစိုပ်ဟွံအာ ဂွံၜိုတ်ကာယဍောၚ်၊
ညံၚ်ဟွံမှာဟွံမံၚ် ဇၟာပ်ဂၠံၚ်ဒးဆော်ယောၚ်။

၂၃၇။ ညးဟွံကဵုလ္ပကေတ် ညးဝေတ်လ္ပစး။
ညးဟွံကဵုယဝ်ကေတ် ဒှ်ဒ္ဂေတ်လီုလီု၊
ညးဝေတ်ယဝ်စး ဒှ်ကွးသမၠီု။

၂၃၈။ ညးရံၚ်ကဵုတီ ညးခအီကဵုကၠိုဟ်။
ညးရံၚ်ဟွံတီမ္ဂး မၞိဟ်ကၠိုဟ်မှးကွေံဟွံဒှ်၊
ညးခအီဟွံကၠိုဟ်မ္ဂး ကော်ဂးမၞိဟ်ဟွံဍိုဟ်။

၂၃၉။ ညးလေၚ်လ္ပအိုဟ်တၟိဟ် ညးခိုဟ်လ္ပစောန်စိုတ်။
ညးလေၚ်ယဝ်အိုဟ်တၟိုဟ် သပ္ပုရိုဟ်ဟွံသေၚ်၊
ညးခိုဟ်ယဝ်စောန်စိုတ် ဒှ်စရိုတ်သမၠီုဟေၚ်။

၂၄၀။ ညးဘလ္ပဖေက်ညိ ညးဗျိလ္ပထေဲပြဟ်။
ညးဘယဝ်ဖေက် သတ္တိဒေက်ညးကော်ခဴ၊
ညးဗျိယဝ်ထေဲပြဟ် မၞိဟ်ဂှ်ဟွံဍိုပ်ဍဴ။

၂၄၁။ ညာတ်မုက်ကဵုဂွံတီစရိုတ် ညာတ်ဟိုတ်ကဵုတီဖဵု။
ညာတ်မုက်ယဝ်တီစရိုတ် ဒှ်ဟိုတ်သဟာဲဂၠိုၚ်၊
ညာတ်ဟိုတ်ယဝ်တီဖဵု တ္ၚဲလဵုဟွံရိုၚ်ဇိုၚ်။

၂၄၂။ ညာတ်ကဵုဒှ်ဖဵု ဆဵုကဵုဒှ်မ္ၚဵု။
ယဝ်ညာတ်ဒှ်ဖဵု တ္ၚဲလဵုဟွံသဝ်အာ၊
ယဝ်ဆဵုဒှ်မ္ၚဵု လက်သန်ပူဂိုလ်ပြာထာ။

၂၄၃။ ညှာတုဲကဵုဒှ်ဖဵု အေၚ်တုဲကဵုဗၠးဒုဟ်။
ညှာတုဲဟွံဒှ်ဖဵု ညံၚ်ကဵုဍာ်တၞံဂျိ၊
အေၚ်တုဲဟွံဗၠးဒုဟ် ဘဝလၟုဟ်လေဝ်ဒးဂိ။

၂၄၄။ ညးဇၞော်ရဴဂဴ ညးလဴဒးကလၚ်။
ညးဇၞော်ယဝ်ရဴဂဴ ဓရ်ဂါရဝဒှ်၊
ညးလဴယဝ်ကလၚ် ဂွံတၚ်နၚ်တၚ်ဏှ်။

၂၄၅။ ညးဟီုးစၟတ်လဝ် ညးဆေဝ်ဒဝ်လ္ပအာ။
ညးဟီုယဝ်ဟွံစၟတ် ဟွံဒးနှောတ်ညးဗျိ၊
ညးဆေဝ်ဒတ်ယဝ်အာ ကြဴဒးမှာဂိ။

၂၄၆။ ညာတ်ညးယုတ်မ္ဂးပါဲ ညာတ်ညးဆာဲမ္ဂးပံၚ်။
ညာတ်ညးယုတ်ဟွံပါဲ အန္တရာယ်ဗၠးဟွံမာန်၊
ညာတ်ညးဆာဲယဝ်ဟွံပံၚ် လ္ပာ်ဂၠံၚ်ခိုဟ်ဒှ်ဟွံမာန်။

၂၄၇။ ညံၚ်ဂွံဒြပ်ဂှ်ကၠောန် ညံၚ်ဂွံစောန်ဂှ်ကတ်။
ညံၚ်ဂွံဒြပ်ယဝ်ဟွံကၠောန် ကြဴဒးအောန်စိုတ်၊
ညံၚ်ဂွံစောန်ဟွံကတ် ဟွံမဲကွတ်ဝါတ်ဒဵုချိုတ်။

၂၄၈။ ညးဇၞော်ဂှ်ယိုက်ဒိုက် ညးသိုက်ဂှ်ဗ္ဒာဲ။
ညးဇၞော်ယဝ်ယိုက်ဒိုက် တသိုက်ပြဲဂွံဒှ်၊
ညးသိုက်ယဝ်ဗ္ဒာဲ ဂွံရာၚ်ဆာဲပြဟ်။

၂၄၉။ ညံၚ်ဂွံအံၚ်ဇၞးဂှ်ကၠောန် ညံၚ်ဂွံစောန်ဂှ်ချပ်။
ညံၚ်ဂွံအံၚ်ဇၞးယဝ်ကၠောန် ကြပ်ညောန်ကဵုတသိုက်၊
ညံၚ်ဂွံစောန်ယဝ်ချပ် လညာတ်တပ်လိုက်။

၂၅၀။ ညးဍဵုလ္ပဖေက် ညးသေက်လ္ပထေဲ။
ညးဍဵုယဝ်ဖေက် ဒတုဲဖဵုဒေက်အာ၊
ညးသေက်ယဝ်ထေဲမ္ဂး ဟွံဒးသီုၜါ။

၂၅၁။ ညံၚ်ဂွံပေၚ်ဂှ်ချပ် ညံၚ်ဂွံတပ်ဂှ်မံၚ်။
ညံၚ်ဂွံပေၚ်ချပ်မ္ဂး ဟွံဒးပၠအ်အခိၚ်၊
ညံၚ်ဂွံတပ်မံၚ်မ္ဂး ဂွံဗၠးထဝိၚ်။

၂၅၂။ ညာတ်ကမၠောန်လ္ပလၞုဟ် ညာတ်ဒုဟ်ကဵုဖေက်။
ညာတ်ကမၠောန်လၞုဟ်မ္ဂး ဟွံဗၠးဝါတ်ခါဲ၊
ညာတ်ဒုဟ်ဟွံဖေက် ဒးဒေက်ဇၟာပ်ဒၞာဲ။

၂၅၃။ ညာဏ်ဂှ်ကၠဟ် ဒြပ်ဂှ်လ္ပပၠေၚ်။
ညာဏ်ယဝ်ကၠဟ် ဟွံဒှ်တသိုက်ကျာတ်၊
ဒြပ်ယဝ်ပၠေၚ် ဒးလေၚ်ဒးဝါတ်။

၂၅၄။ ညးဟီုလ္ပထေဲထုတ် ညးဟုတ်လ္ပထေၚ်သဝ်။
ညးဟီုယဝ်ထေဲထုတ် လဟုတ်စှ်ေလောဲ၊
ညးဟုတ်ယဝ်ထေၚ်သဝ် ဒှ်ဓရ်မေတ္တာဟွံမွဲ။

၂၅၅။ ညးခိုဟ်လ္ပဣဿာ ညးမှာလ္ပကေတ်ဒုဟ်။
ညးခိုဟ်ယဝ်ဣဿာ ဒှ်လအာသမၠီု၊
ညးမှာယဝ်ကေတ်ဒဟ် ဒှ်ကဍုဟ်ညးဟီု။

၂၅၆။ ညးဝေတ်ဂှ်ထိုၚ်သး ညးစးဂှ်ပါဲထောံ။
ညးဝေတ်ဂှ်ထိုၚ်သးမှ ဒှ်တၠပညာ၊
ညးစးဂှ်ပါဲထောံမှ သောကသံက်သာ။

၂၅၇။ ညးယုတ်ဂှ်ပါဲ ညးဆာဲဂှ်ပံၚ်။
ညးယုတ်ယဝ်ပါဲ အန္တရာယ်ဟွံမွဲ၊
ညးဆာဲယဝ်ပံၚ် ဇၟာပ်ဂၠံၚ်ဂွံသၠုၚ်ပြဲ။

၂၅၈။ ညံၚ်ဂွံဒးပၠောပ်ကတောဝ် ညံၚ်ဂွံဂေါဝ်ဗတောန်။
ညးဂွံဒးပၠောပ်ကတောဝ် ဂွံဇၞော်မောဝ်ပြဟ်၊
ညံၚ်ဂွံဂေါဝ်ဗတောန် ဂွံစောန်ဒယှ်။

၂၅၉။ ညံၚ်ဂွံပတှ်ေဂှ်ပံၚ် ညံၚ်ဂွံပံၚ်ဂှ်ဖန်။
ညံၚ်ဂွံပတှ်ေယဝ်ပံၚ် ဟွံထုဲထံၚ်ရ၊
ညံၚ်ဂွံပံၚ်ယဝ်ဖန် ကောပ်ပၠန်ဍာံပြ။

၂၆၀။ ညံၚ်ဂွံကၠးဂှ်ဟီု ညံၚ်ဂွံလီုပကၠောန်။
ညံၚ်ဂွံကၠးယဝ်ဟီု မၞိဟ်လီုလေဝ်ခိုဟ်မာန်၊
ညံၚ်ဂွံလီုယဝ်ဟွံကၠောန် ကမၠောန်ဟွံဒှ်ကြာန်။

၂၆၁။ ညံၚ်ဂွံခိုဟ်ဂှ်လွဳ ညံၚ်ဂွံညဳဂှ်ဖန်။
ညံၚ်ဂွံခိုဟ်လွဳမှ ဒှ်တၠပညာ၊
ညံၚ်ဂွံညဳဖန်မှ ကၠောန်သပလောဲသွာ။

၂၆၂။ ညာတ်ညးကဵုဒှ်ဖဵု ကဵုညးကဵုဒှ်ဂုဏ်။
ညာတ်ညးဟွံဒှ်ဖဵု တ္ၚဲလဵုဟွံဒှ်မိတ်၊
ကဵုညးကဵုဒှ်ဂုဏ် ရုန်မဵုစဵုလအိတ်။

၂၆၃။ ညးဟီုကဵုဂိ ညးဗျိကဵုတီ။
ညးဟီုယဝ်ဟွံဂိ ဒှ်ရိပၞဟ်၊
ညးဗျိယဝ်ဟွံတီ ဒးတၞီဗၠိုက်ပြဟ်။

၂၆၄။ ညံၚ်ဂွံစှ်ေစိုတ်ဂၠာဲ ညံၚ်ဂွံဆာဲဂှ်လွဳ။
ညးဂွံစှ်ေစိုတ်ယဝ်ဂၠာဲ ဂွံဆာဲဒှ်မ္ၚဵု၊
ညးဂွံဆာဲယဝ်လွဳ တသိုက်ဇဳဂွံဆဵု။

၂၆၅။ ညာတ်မုက်လ္ပဆာန် မိၚ်ဂလာန်လ္ပသ္ဍိုက်။
ညာတ်မုက်ယဝ်ဆာန် ဒဒိက်ဗါန်ပြဟ်၊
မိၚ်ဂလာန်ယဝ်သ္ဍိုက် ဒးလေၚ်ဒိုက်ဒှ်။

၂၆၆။ ညာတ်ကဵုကေတ်လှဲ မၚ်မွဲကဵုခိုဟ်။
ညာတ်ယဝ်ကေတ်လှဲ မွဲတ္ၚဲဒှ်တသိုက်၊
ယဝ်မၚ်မွဲခိုဟ် ဂွံၜိုဟ်ဗၠးဒဒိုက်။

၂၆၇။ ညံၚ်ဂွံဆာဲဂှ်လွဳ ညံၚ်ဂွံညဳဂှ်ဖန်။
ညံၚ်ဂွံဆာဲယဝ်လွဳ ဌာန်ဇဳညးထိုၚ်သး၊
ညံၚ်ဂွံညဳယဝ်ဖန် ဨကန်ဟွံပါ်ဒကး။

၂၆၈။ ညးဝေတ်လ္ပထေၚ်လက် ညးဗၟက်လ္ပထေၚ်က္ဍုဟ်။
ညးဝေတ်ယဝ်ထေၚ်လက် ဝဲဗက်ဒှ်ဂွံရ၊
ညးဗၟက်ယဝ်ထေၚ်က္ဍုဟ် မံၚ်သၟးဒုဟ်ဒှ်ရ။

၂၆၉။ ညးကၠိုဟ်ဂှ်ပတိုန် ညးဍိုန်ဂှ်လွဳ။
ညးကၠိုဟ်ယဝ်ပတိုန် ဒှ်ကိုန်ဇၞော်မောဝ်၊
ညးဍိုန်ယဝ်လွဳ ခိုဟ်ဇဳဂွံဂေါတ်။

၂၇၀။ ညးလက်လ္ပဒက်ဝဲ ညးပျဲလ္ပဍောၚ်စိုတ်။
ညးလက်ယဝ်ဒက်ဝဲ ဖိုလ်ပြဲဟွံညာတ်၊
ညးပျဲယဝ်ဍောၚ်စိုတ် ဒှ်ဟိုတ်မံၚ်ကျာတ်။ ။

ဋ

၂၇၁။ ဋာန်နဒးစုတ်ဓရီု ဒ္ဂေတ်လီုဒးပလေဝ်။
ဋာန်နဟွံစုတ်ဟရီု ဟွံစှ်ေဗီုပြၚ်န၊
ဒ္ဂေတ်လီုယဝ်ဟွံပလေဝ် ဟွံကျေဝ်ဇၟာပ်ဘဝ။ ။

ဌ

၂၇၂။ ဌာန်ခိုဟ်ဂှ်မံၚ် ပွံၚ်ပြဲဂှ်ပံၚ်။
ဌာန်ခိုဟ်ယဝ်မံၚ် ဇၟာပ်ဂၠံၚ်ဂွံၜိုဟ်သြိုဟ်၊
ပွံၚ်ပြဲယဝ်ပံၚ် ပရေံမံၚ်ကလေၚ်ခိုဟ်။ ။

ဍ

၂၇၃။ ဍိုန်ဍိုန်ဟီုဂး ဒးဒးရးရးကၠောန်။
ဍိုန်ဍိုန်ယဝ်ဟီုဂး ဂွံဇၞးညးလောဲ၊
ဒးဒးရးရးယဝ်ကၠောန် ကမၠောန်ဂှ်လီုဟွံလောဲ။

၂၇၄။ ဍောတ်လ္ပထေၚ်သောဲ ဇၞော်ပြဲလ္ပထေၚ်သၠုၚ်။
ဍောတ်ယဝ်ထေၚ်သောဲ မၞိဟ်တဲခိုဟ်ဟွံဒှ်၊
ဇၞော်ပြဲထေၚ်သၠုၚ်မ္ဂး ဗၠေတ်လေတ်ဒးဒှ်။

၂၇၅။ ဍာမ်ဍာမ်ဂှ်မံၚ် လ္ပာ်ဂၠံၚ်ဒးဂှ်ကေတ်။
ဍာမ်ဍာမ်ယဝ်မံၚ် ဇၟာပ်မၞိဟ်ဒးယိုက်ဒိုက်၊
ဂၠံၚ်ဒးယဝ်ကေတ် တၠပညာဇေတ်ညးသ္ဍိုက်။

၂၇၆။ ဍုန်သွၜဵုလ္ပဝိုတ် စိုတ်ဃိုတ်လ္ပနွံပၟိက်။
ဍုန်သွဝိုတ်ၜဵုမ္ဂး ၚုဟ်မးသွံဟွံမဲ၊
စိုတ်ဃိုတ်ယဝ်နွံပၟိက် ဒးထၞိက်ဒးပျဲ။

၂၇၇။ ဍိုဟ်လေဝ်ကဵုဒးရး ကော်ဂးကဵုဍိုန်ဍောတ်။
ယဝ်ဍိုဟ်ဒးရး ဂွံဗၠးအထေၚ်သဝ်ဏောၚ်၊
ကော်ဂးဍိုန်ဍောတ် ညးဒးနှောတ်ပ္ဍဲကတောဝ်။

၂၇၈။ ဍာမ်ဂှ်ကေတ် ဗၠေတ်ဂှ်ကၠဟ်။
ဍာမ်ဂှ်ယဝ်ကေတ် ဒှ်ကွေတ်သပ္ပုရိုဟ်၊
ဗၠေတ်ဂှ်ယဝ်ကၠဟ် ဟွံလအ်ဒှ်မၞိဟ်ခိုဟ်။

၂၇၉။ ဍာံမ္ဂးကဵုဂံၚ် ဗၠေတ်မ္ဂးကဵုယံၚ်။
ဍာံဂှ်ယဝ်ဟွံဂံၚ် ဇၟာပ်ဂၠံၚ်ဒးဟုတ်၊
ဗၠေတ်ဂှ်ယဝ်ဟွံဂံၚ် ဂံၚ်ကၠောန်သ္ပစုတ်။

၂၈၀။ ဍာံဂှ်ကၠောန်သ္ပ ဝိရဳယဂှ်ချိၚ်ဆ။
ဍာံဂှ်ကၠောန်သ္ပ ဒှ်ပွတၠပညာ၊
ဝိရိယယဝ်ချိၚ်ဆ ကာယဂွံသံက်သာ။ ။

တ

၂၈၁။ တ္ၚံက်မ္ဂးလ္ပကၠောန် ကဟောန်မ္ဂးလ္ပဟီု။
တ္ၚံက်တုဲယဝ်ကၠောန် ဒှ်ကမၠောန်ဍဵုဍိုက်၊
ကဟောန်တုဲယဝ်ဟီု မိတ်ခိုဟ်ဒးလီုလာ်။

၂၈၂။ တီဂှ်ကၠောန်ကၠာ မှာဂှ်ဂၠုက်ဂၠာဲ။
တီဂှ်ယဝ်ကၠောန်ကၠာ ဟွံမှာဒှ်ဖဵု၊
မှာဂှ်ယဝ်ဂၠုက်ဂၠာဲ ဂွံဆာဲတိုန်တွဵု။

၂၈၃။ တၠပညာဂှ်နိဿဲ ဓရ်ပြဲဂှ်လ္ၚတ်ညိ။
တၠပညာယဝ်နိဿဲ ဂွံဗၠးဘဲမာန်တွဵု၊
ဓရ်ပြဲယဝ်လ္ၚတ် ဂတမတ်ဂွံဆဵုဖဵု။

၂၈၄။ တဵုကၠအ်လ္ပဂိုဟ်ဝါဲ ဒ္ဂေတ်ဆာဲလ္ပကၠဟ်ထောံ။
တဵုကၠအ်ဂိုဟ်ဝါဲမ္ဂး တမ်ဒးဟောမ်ဗြုံ၊
ဒ္ဂေတ်ဆာဲကၠဟ်ထောံမ္ဂး ဒြပ်ဂွံလဝ်ဒးလီု။

၂၈၅။ တွံဓရ်လ္ပယျာန် ဟီုဂလာန်လ္ပစၞာဲ။
တွံဓရ်ယဝ်ယျာန် ဒှ်စာန်စးကဵုကျာ်၊
ယဝ်ဟီုဂလာန်စၞာဲ ဒှ်အန္တရာယ်ဂၠိုၚ်သာ်။

၂၈၆။ တြေံလေဝ်လ္ပကၠဟ် တၟိဂှ်လေဝ်ကေတ်။
တြေံယဝ်ကၠဟ် ဒှ်ညးပလီုအခိုက်ကၞာ၊
တၟံယဝ်ဟွံကေတ် ဗက်ခေတ်ဟွံမာန်။

၂၈၇။ တၠဂုဏ်လေဝ်ဒးကၠိုဟ် မၞိဟ်ခိုဟ်လေဝ်ဒးတီ။
တၠဂုဏ်ဟွံကၠိုဟ် ဂၠံၚ်ခိုဟ်တိုန်ဟွံမဲ၊
မၞိဟ်ခိုဟ်ဟွံတီ ဒးတၞီဗၠိုက်လောဲ။

၂၈၈။ တသိုက်စိုတ်ဂှ်ကေတ် ဒ္ဂေတ်ခိုဟ်ဂှ်ဆာန်။
တသိုက်စိုတ်ယဝ်ကေတ် ဟွံဗၠေတ်နူဓရ်၊
ဒ္ဂေတ်ခိုဟ်ယဝ်ဆာန် ဇၟာပ်ဌာန်ဟွံသဝ်။

၂၈၉။ တ္ၚဲဏအ်ဂှ်လွဳ တ္ၚဲညဳဂှ်ကၠောန်။
တ္ၚဲဏအ်ယဝ်ဟွံလွဳ ဖိုလ်ဇဳလေၚ်မနာ်၊
တ္ၚဲညဳယဝ်ဟွံကၠောန် ဒှ်ကမၠောန်ကြာန်။

၂၉၀။ တုဲကၠုၚ်ဂှ်ကေတ်နယ် တ္ၚဲဏအ်ဂှ်ပတိတ်ပရဲ။
တုဲကၠုၚ်ဂှ်ယဝ်ကေတ်နယ် ဒှ်လောဲလီုဝါတ်၊

တ္ၚဲဏအ်ယတ်ပတိတ်ပရဲ ဂၠံၚ်ပြဲဂွံညာတ်။ ။

ထ

၂၉၁။ ထုဲထုဲလ္ပကၠောန် ထညောန်ထညောန်လ္ပမံၚ်။
ထုဲထုဲယဝ်ကၠောန် ယှုက်လောန်ဒးဍောၚ်ၜိုတ်၊
မံၚ်ထညောန်ထညောန် မိတ်အောန်ဒးဍောၚ်စိုတ်။

၂၉၂။ ထေဲလ္ပကဟောန် ညးကၠောန်လ္ပပလီု။
ထေဲတုဲယဝ်ကဟောန် မှာလောန်ဒှ်သၞ၊
ညးကၠောန်ယဝ်ပလီု ဒှ်သမၠီုရ။

၂၉၃။ ထေက်ကဵုဇကုဂှ်ကြီု ထေက်ကဵုဟီုဂှ်ဂး။
ထေက်ကဵုဇကုယဝ်ကြီု သမၠီုဟွံဒှ်၊
ထေက်ကဵုဟီုယဝ်ဂး ဂွံအံၚ်ဇၞးပြဟ်။

၂၉၄။ ထေက်မှာကဵု နွံဖဵုမှကေတ်။
ဟွံထေက်ယဝ်ကဵု လေၚ်ဖိုလ်ဂၠိုၚ်သာ်၊
ဟွံမဲဖိုလ်ယဝ်ကေတ် ဒဒိုက်ဇေတ်ဍဵုဍိုက်။

၂၉၅။ ထေက်ဟာချပ်ဗ္စာ ဒးဟာပါ်ဖါဲ။
ဟွံတီထေက်တန် ဖန်ဖက်ဝါတ်၊
ဗၠေတ်မှာဟွံကၠိုဟ် ဂၠံၚ်ခိုဟ်ဟွံညာတ်။ ။

ဒ

၂၉၆။ ဒးလ္ပကေတ်ရဲ ဟွံယဲလ္ပကေတ်ဂဥုဲ။
ဒးယဝ်ကေတ်ရဲ ညံၚ်ဇဲသတ္တိအောန်၊
ဟွံယဲယဝ်ကေတ်ဂဥုဲ ယှုက်ထုဲသ္ၚိလောန်။

၂၉၇။ ဒးမံၚ်လ္ပဖေက် ဟွံဒေက်လ္ပထပ်။
ဒးမံၚ်ဖေက်မ္ဂး ၚုဟ်မးသတ္တိအောန်၊
ဟွံဒေက်ယဝ်ရထပ် ဒှ်မၞိဟ်ထပပ်လောန်။

၂၉၈။ ဒဒိုက်စိုတ်လ္ပဒုၚ် ဒဒိုက်သုၚ်လ္ပဂၠာဲ။
ဒဒိုက်စိုတ်ယဝ်ဒုၚ် ညံၚ်ၜုၚ်တက်ဇကု၊
ဒဒိုက်သုၚ်ယဝ်ဂၠာဲ ဇၟာပ်ဒၞာဲဟွံဆာဲရ။

၂၉၉။ ဒးတီအလိုက် အခိုက်ဒးကၠိုဟ်။
ယဝ်ဟွံတီအလိုက် မၞိဟ်ဝိုက်ဝိုက်ဒှ်၊
ယဝ်ဟွံတီအခိုက် တသိုက်ဟွံဒှ်။

၃၀၀။ ဒေါသလ္ပကာတ် စိုတ်ဓါတ်လ္ပယှအ်။
ယဝ်ဒေါသာကာတ် ဟွံလအ်ညာတ်ဒုဟ်၊
ယဝ်ယှအ်စိုတ်ဓါတ် ကၠောန်ကျာတ်သီုလၞုဟ်။

၃၀၁။ ဒုဟ်ဂကောံလ္ပဟီု ပွလီုလ္ပကၠောန်။
ဒုဟ်ဂကောံယဝ်ဟီု ဒှ်ဟိုတ်လီုလာ်၊
ပွလီုယဝ်ကၠောန် ဒှ်ကမၠောန်ပလီုပလာ်။

၃၀၂။ ဒုဟ်လၞုဟ်ကဵုညာတ် ဒုဟ်ဝါတ်ကဵုဆဵု။
ဒုဟ်လၞုဟ်ယဝ်ညာတ် စိုတ်ဓါတ်မြဟ်လောဲ၊
ဒုဟ်ဝါတ်ယဝ်ဆဵု ဂိုတ်လေဝ်ဟွံဖဲ။

၃၀၃။ ဒုဟ်ခေတ်ဂှ်လပဟီု ပွလီုဂှ်ဝေၚ်ပါဲ။
ဒုဟ်ခေတ်ဟီုမ္ဂး ၚုဟ်မးဟွံမဲ၊
ပွလီုဟွံပါဲမ္ဂး မွဲတ္ၚဲဒးဆဵုဘဲ။

၃၀၄။ ဒၞက်ဆာန်လေဝ်ရံၚ် ဒၞက်ပွံၚ်လေဝ်ပါဲ။
ဒၞက်ဆာန်ယဝ်ရံၚ် ဟွံဗၠးစံၚ်တူစိုတ်၊
ဒၞက်ပွံၚ်ဟွံပါဲ ဟွံဗၠးအန္တရာယ်ချိုတ်။

၃၀၅။ ဒြပ်နွံမှချပ် စိုတ်တပ်မှကၠောန်။
ဒြပ်ဟွံမဲယဝ်ချပ် ကသပ်ဟွံဍိုက်ပေၚ်၊
စိုတ်ဟွံတပ်ယဝ်ကၠောန် ဒှ်ကမၠောန်ပၠေၚ်။

၃၀၆။ ဒုဟ်ကွးဂှ်ဒးဂၠာဲ စၞာဲကွးဂှ်ဒးကၠိုဟ်။
ဒုဟ်ကွးယဝ်ဟွံဂၠာဲ ဇၟာပ်ဒၞာဲလီုပြဟ်၊
စၞာဲကွးယဝ်ဟွံကၠိုဟ် အ္စာခိုဟ်ဟွံဒှ်။

၃၀၇။ ဒှ်တသိုက်လ္ပသ္ဍိုက် တၞီဗၠိုက်လ္ပအောန်စိုတ်။
ဒှ်တသိုက်ယဝ်သ္ဍိုက် မာနဍိုက်ဂၠိုၚ်လီု၊
တၞီဗၠိုက်ယဝ်အောန်စိုတ် စဵုချိုတ်ဟွံဂီုကၠီု။

၃၀၈။ ဒးဗၠေတ်ကဵုတီ တၞီဗၠိုက်ဒးကၠိုဟ်။
ဒးဗၠေတ်ဟွံတီရ လ္ပသ္ပအ္စာပြဟ်၊
တၞီဗၠိုက်ဟွံကၠိုဟ် အ္စာခိုဟ်ဟွံဒှ်။

၃၀၉။ ဒးလေပ်ဇဳ ဒးလွဳမာန်။
လေပ်ဇဳမှ ညးသ္ပအ္စာ၊
လွဳမာန်မှ ဇၟာပ်ဌာန်ပြာထာ။

၃၁၀။ ဒုဟ်ဘဝကဵုကၠိုဟ် ပွခိုဟ်ကဵုတီ။
ဒုဟ်ဘဝယဝ်ကၠိုဟ် ဒှ်သပ္ပုရိုဟ်လောဲ၊
ပွခိုဟ်ယဝ်တီ ဗၠိုက်တၞီဟွံမဲ။

၃၁၁။ ဒုဟ်ဇကုကဵုကၠိုဟ် ညးခိုဟ်လ္ပဣဿာ။
ဒုဟ်ဇကုယဝ်ကၠိုဟ် ဂွံခိုဟ်စမာန်၊
ညးခိုဟ်ယဝ်ဟွံဣဿာ တၠပညာဒှ်မာန်။

၃၁၂။ ဒးညျာကဵုဘဝ ဒးဂွံကဵုဂကူ။
ယဝ်ဟွံညှာဘဝ မာနဒှ်လောဲ၊
ယဝ်ဟွံဂွကဵုဂကူ ဘဝနှဴဒှ်လောဲ။

၃၁၃။ ဒေါသလ္ပကာတ် လ္ပညာတ်ဒုဟ်ပြဟ်။
ယဝ်ဒေါသကာတ် ဒးဝါတ်ရဲဖဝ်၊
ယဝ်ညာတ်ဒုဟ်ပြဟ် ဒှ်ဟိုတ်ဂွံသဝ်။

၃၁၄။ ဒးနွံလွဳ ဒးညဳသာ။
နွံလွဳမှ ဒှ်သေဌဳ၊
ညဳသာမှ ဒှ်တသိုက်ဇဳ။

၃၁၅။ ဒးမံၚ်လ္ပဖေက် ဒေက်မံၚ်လ္ပယှအ်။
ဒးမံၚ်ယဝ်ဖေက် ယှတ်ဒေက်ဂုဏ်ဖိုလ်၊
ဒေက်မံၚ်ယဝ်ယှအ် ဆလအ်ဟွံပေၚ်တွဵု။

၃၁၆။ ဒြပ်ဂှ်လ္ပစောဲစပ် ကသပ်ဂှ်လ္ပကဵုဗၠေတ်။
စောဲစပ်ဒြပ်မ္ဂး ချိုတ်ဒးဒှ်ကြာန်၊
ကသပ်ယဝ်ဗၠေတ် ဒဒိုက်ကေတ်ဟွံမာန်။

၃၁၇။ ဒုဟ်သၟိၚ်လ္ပဟီု ဒုဟ်ကမ်လ္ပဂး။
ယဝ်ဟီုဒုဟ်သၟိၚ် ဒးဂွိၚ်စံၚ်တူ၊
ယဝ်ဟီုဒုဟ်ကမ် မၞိဟ်အမ်အမ်ကော်ခဴ။

၃၁၈။ ဒုက်လက်မာန်မှသ္ပအ္စာ ဒုၚ်စကာမာန်မှသ္ပဍိက်။
ဒုက်လက်ဟွံမာန်သ္ပအ္စာ ခြာဟွံလအ်ညာတ်ဒုဟ်၊
ဒုၚ်စကာဟွံမာန်သ္ပဍိက် အတိုၚ်ပၟိက်ဟွံဂွံၚုဟ်။

၃၁၉။ ဒြပ်ညးလ္ပဂၠေံလအ် ပအ်ပအ်လ္ပမံၚ်။
ဒြပ်ညးဂၠေံလအ်မ္ဂး ဟွံဗၠးဒးဗျိ၊
ပအ်ပအ်မံၚ်မ္ဂး ကြဴဒးစံၚ်တူဂိ။

၃၂၀။ ဒါန်လေဝ်လ္ပဗလး သဳလလေဝ်ဒးမၚ်မွဲ။
ဒါန်ယဝ်ဟွံဗလး ဇၟာပ်မၞိဟ်ဒးဆာန်၊
သဳလမၚ်မွဲ ဘဝပြဲကလိဂွံမာန်။

၃၂၁။ ဒါန်လ္ပကဵုကြဳ သဳလ္ပကဵုလီု။
ဒါန်ယဝ်ကြဳမ္ဂး ကြဴဒးဝါတ်ဂါတ်၊
သဳယဝ်လီုလာ် ဂၠံၚ်လ္ပာ်ခိုဟ်ဟွံညာတ်။

၃၂၂။ ဒါန်လေဝ်နိဿဲ သဳလေဝ်မၚ်မွဲ။
ဒါန်ယဝ်နိဿဲ တ္ၚဲလဵုဟွံဝါတ်၊
သဳယဝ်မၚ်မွဲ ဘဝပြဲဂွံညာတ်။

၃၂၃။ ဒၞာဲစိုပ်ကဵုဂွံလဟိၚ် စိုတ်ထိၚ်ကဵုဂွံမာန်။
ဒၞာဲစိုပ်ယဝ်ဟွံလဟိၚ် ၜိုန်ဒှ်သၟိၚ်ဟွံဍိုပ်ဍဴ၊
ထိၚ်စိုတ်ဟွံမာန်မ္ဂး ဒၞာဲစိုပ်ဒးစံၚ်တူ။

၃၂၄။ ဒှ်ဂၠဴမ္ဂးဒးဒုၚ်ဇိက် ဒှ်ဍိက်မ္ဂးဒးဒုၚ်စကာ။
ဒှ်ဂၠဴဟွံဒုၚ်ဇိက် အတိုၚ်ပၟိက်ညးၜုၚ်တက်၊
ဒှ်ဍိက်ယဝ်ဟွံဒုၚ်စကာ ညးဟွံညှာသက်သက်။

၃၂၅။ ဒါန်လ္ပကဵုဗၠေၚ် သဳလ္ပဝေၚ်ညိ။
ယဝ်ဒါန်ဗၠေၚ် ဗွဲတၟေၚ်ဟွံရာၚ်ဆာဲ၊
သဳယဝ်ရဝေၚ် ဗွဲတၟေၚ်အာပါယ်။

၃၂၆။ ဒုဟ်ဝါတ်ကဵုဂွံဆဵု ဓရ်မ္ၚဵုကဵုဂွံနွံ။
ဒုဟ်ဝါတ်ယဝ်ရဆဵု ပူဂဵုဂှ်ဟွံဂံၚ်ပၠေၚ်၊
ဓရ်မ္ၚဵုယဝ်နွံ စုံရုံဂွံဍိုက်ပေၚ်။

၃၂၇။ ဒှ်မၞိဟ်မ္ဂးကဵုတ္ၚအ် တဵုကၠအ်မ္ဂးဒးမာန်ဝါဲ။
ဒှ်မၞိဟ်ယဝ်ဟွံတ္ၚအ် ဆလအ်ညးဟွံဆာန်၊
တဵုကၠအ်ဝါဲယဝ်ဟွံမာန် ၜိုတ်ဂစာန်ခိုဟ်ဟွံမာန်။

၃၂၈။ ဒေါသဂှ်ဆေဝ်တာ မေတ္တာဂှ်ထ္ၜး။
ဒေါသယဝ်ဆေဝ်တာ အခါလဵုဟွံမှာ၊
မေတ္တာယဝ်ထ္ၜး မုက်မတ်တၟးမြဟ်မြဴ။

၃၂၉။ ဒၞါဲခိုဟ်ကဵုညာတ် ဒၞါဲဝါတ်ကဵုဆဵု။
ယဝ်ညာတ်ဒၞါဲခိုဟ် သပ္ပုရိုဟ်ဒှ်လောဲ၊
ယဝ်ဆဵုဒၞါဲဝါတ် လညာတ်ဇြိုဟနက်ဒှ်လောဲ။

၃၃၀။ ဒးဟာချပ်ဗစာ မှာဟာပါ်ဖါဲ။
ဒးဟာယဝ်ဟွံဗစာ မှာလေဝ်ထေၚ်ဒး၊
မှာဟာဟွံပါ်ဖါဲ ဂၠာဲဒုဟ်ဟွံဒး။

၃၃၁။ ဒြဟတ်စိုတ်ဂှ်လွဳ ဒြဟတ်ညဳဂှ်ထိၚ်။
ဒြဟတ်စိုတ်လွဳမှ ကၠောန်ပဂိုတ်မာန်၊
ဒြဟတ်ညဳထိၚ်မှ ဍာ်ဇမၠိၚ်အာမာန်။

၃၃၂။ ဒးတီအဓိက သာမညဒးကၠိုဟ်။
ဟွံတီအဓိက ကၠောန်ပဟွံစိုပ်တရဴ၊
သာမညဟွံကၠိုဟ် ၜိုန်ခိုဟ်ဟွံဍိုပ်ဍဴ။

၃၃၃။ ဒးတီအခိၚ် ဒးချိၚ်ဒြဟတ်။
ဟွံတီအခိၚ် အံၚ်ဇၞးဂၠိၚ်သ္ၚောဲ၊
ဟွံချိၚ်ဒြဟတ် ဟွံထတ်ဒှ်ယဲ။

၃၃၄။ ဒးဝေၚ်ပရိယာဲ ဒးဂၠာဲလညာတ်ပြဲ။
ဝေၚ်ပရိယာဲ ဇၟာပ်ဒၞါဲအံၚ်ဇၞး၊
ဂၠာဲလညာတ်ပြဲ မွဲတ္ၚဲဒှ်ၚုဟ်မး။

၃၃၅။ ဒဒိုက်ပဖေက် ယုတ်ဒေက်ပလၞုဟ်။
ဒဒိုက်ဖေက် ကၠက်ၜေက်တသိုက်၊
ယုတ်ဒေက်လၞုဟ် လၟုဟ်ဒှ်ဒဒိုက်။

၃၃၆။ ဒးဗစာ ဒးညှာ။
ဟွံဗစာ မှာလောဲ၊
ဟွံညှာ မေတ္တာညးဟွံမဲ။

၃၃၇။ ဒုဟ်ကဵုကၠိုဟ် ဂုဏ်ခိုဟ်ကဵုတီ။
ဒုဟ်ဟွံကၠိုဟ် ဂွံခိုဟ်ဟွံလောဲ၊
ဂုဏ်ခိုဟ်ဟွံတီ ဗၠိုက်တၞီလောဲ။

၃၃၈။ ဒးစွံအိန်ရဳ ကျာ်သြဳဒးနွံ။
နွံအိန်ရဳမှ ကျာ်သြဳဒှ်မာန်၊
ကျာ်သြဳနွံမှ ညးပပဓာန်။

၃၃၉။ ဒုဟ်ပလီု ဂုဏ်ဟီု။
ဒုဟ်ပလီုမဂး ဂွံဗၠးဝဲ၊
ဂုဏ်ဟီုမဂး ၚုဟ်မးဒှ်လောဲ။

၃၄၀။ ဒးနွံရီုဗၚ် ဒးမၚ်မွဲစိုတ်။
ရီုဗၚ်ဟွံမဲ တ္ၚဲလဵုဟွံၜိုဟ်၊
ဟွံမွဲမွဲစိုတ် ချိုတ်လေဝ်ဟွံခိုဟ်။

၂၄၁။ ဒးလေပ်ပညာ ဝေါဟာဒးကၠိုဟ်။
ဟွံလေပ်ပညာ ချပ်ဗစာဟွံဒး၊
ဝေါဟာဟွံကၠိုဟ် မၞိဟ်ခိုဟ်ဟွံဂး။

၃၄၂။ ဒုၚ်ပါ်ဖါဲ ဒုၚ်ဂၠာဲညိ။
လညာတ်ခိုဟ်အိုတ်ဂှ် ဒှ်ပါ်ဖါဲရ၊
ဂၠုက်ဂၠာဲခိုဟ်အိုတ်ဂှ် ဒှ်ဂၠာဲဒုဟ်ရ။

၃၄၃။ ဒးအိုတ်ဟွံမဲ လောဲအိုတ်ဟွံဒှ်။
ဒးအိုတ်ယဝ်နွံ ဇၟာပ်ဘုံကျာ်ဒှ်၊
လောဲအိုတ်နွံတွဵု ကဵုဓရ်ဟွံသၟဟ်။

၃၄၄။ ဒးနွံဝါသနာ စေတနာဒးတပ်။
ဟၟဲဝါသနာ ကၠောန်အာဇြိုၚ်စိုတ်၊
စေတနာဟွံတပ် ကၠောန်ချပ်လေၚ်အိုတ်။

၃၄၅။ ဒၞါဲကြံၚ်ပၜတ် ဒၞာဲၜတ်ပကြံၚ်။
ဒၞါဲကြံၚ်ယဝ်ၜတ် ဒြဟတ်ယှအ်လီု၊
ဒၞါဲၜတ်ယဝ်ကြံၚ် ဟွံအံၚ်ဇၞးလီု။ ။

ဓ

၃၄၆။ ဓရ်ခိုဟ်လ္ပသၠေဟ်ပၟာ ပညာလ္ပထေၚ်သောဲ။
ဓရ်ခိုဟ်ယဝ်သၠေဟ်ပမာ ဒးအာစိုပ်အပါယ်ပန်၊
ပညာဂှ်ယဝ်ထေၚ်သောဲ ဂွံပြဲတိုန်ဝါတ်ဂါတ်။

၃၄၇။ ဓရ်ကဵုညာတ် မၞိဟ်ဝါတ်ကဵုဆာန်ဍူ။
ယဝ်ဟွံညာတ်ဓရ် ဇၟာပ်ကဝ်ဒးကျာတ်၊
မၞိဟ်ဝါတ်ဟွံဆာန်ဍူ စိုတ်လတူတပ်ဂွံဒှ်ဝါတ်။

၃၇၈။ ဓီုမံၚ်လ္ပယှအ်စိုတ် စရိုတ်ခိုဟ်လ္ပကၠဟ်ထောံ။
ဓီုမံၚ်ယဝ်ယှအ်စိုတ် စဵုချိုတ်လေပ်ဟွံမာန်၊
စရိုတ်ခိုဟ်ယဝ်ကၠဟ် ဒးဒှ်ဒဒိုက်ဇၟာပ်ဌာန်။ ။

ပ

၃၅၂။ ပညာလေဝ်ဂၠာဲ ဌာန်ဒၞာဲလေဝ်ရံၚ်။
ပညာယဝ်ဟွံဂၠာဲ ဂၠံၚ်ဆာဲတိုန်ဟွံမဲ၊
ဌာန်ဒၞာဲယဝ်ဟွံရံၚ် မံၚ်တုဲပြံၚ်ဟွံလောဲ။

၃၅၃။ ပါၚ်ဂှ်မၚ်မွဲ စိုတ်ပြဲဂှ်လ္ပကၠဟ်။
ပါၚ်ယဝ်ဟွံမၚ်မွဲ သၞဝဲဒးဆဵုညာတ်၊
စိုတ်ပြဲယဝ်ကၠဟ် ကြဴဒှ်ဒဒိုက်ဝါတ်။

၃၅၄။ ပါၚ်လ္ပဂၠိၚ် အခိၚ်လ္ပဖအိုတ်။
ယဝ်ပါၚ်ဂၠိၚ်မ္ဂး ဟွံဗၠးဒးဗျိ၊
ယဝ်ဖအိုတ်အခိၚ်မ္ဂး ကြဴဒးကဟောမ်ဂိ။

၃၅၅။ ပါၚ်လေဝ်ကဵုတပ် ကသပ်လေဝ်ကဵုခိုဟ်။
ယဝ်ပါၚ်တပ် ညးဒးဂၞပ်လောဲ၊
ယဝ်ကသပ်ခိုဟ် သပ္ပုရိုဟ်ဒုၚ်တဲ။

၃၅၆။ ပြယာဲလေဝ်ကဵုခိုဟ် မၞိဟ်ခိုဟ်လေဝ်ကဵုတီ။
ယဝ်ဟွံကၠိုဟ်ပြယာဲ ဇၟာပ်ဒၞာဲဒးဆဵုဘဲ၊
မၞိဟ်ခိုဟ်ယဝ်ဟွံတီ ဒးတၞီဗၠိုက်လောဲ။

၃၅၇။ ပဋိပတ်လ္ပအမ် ကဵုညးလေဝ်လ္ပကြမ်။
ပဋိပတ်ယဝ်အမ် သမၠီုဒှ်မာန်၊
ယဝ်ကြမ်ဂၠိုၚ် ညးဂိုၚ်ထောံမာန်။

၃၆၈။ ပၟိက်ဇကုလ္ပဗက် ညးလက်အီထ္ၜးဏာ။
ပၟိက်ဇကုယဝ်ဟွံဗက် စန်ဒက်ဂကောံခိုဟ်၊
ညးလက်အီထ္ၜးဏာ စေတနာဇကုညးကၠိုဟ်။

၃၅၉။ ပၟိက်ကွးလေဝ်ဒးကၠိုဟ် နယ်ခိုဟ်လေဝ်ဒးရပ်။
ပၟိက်ကွးယဝ်ကၠိုဟ် အ္စာခိုဟ်ဂွံယၟု၊
နယ်ခိုဟ်ယဝ်ရပ် ဝေတ်ကွးတပ်ဟွံဂံၚ်ဗြု။

၃၆၀။ ပျဲညးလ္ပချပ် ဂၠံၚ်တပ်ဂှ်ကွာ်
ပျဲညးယဝ်ချပ် ဒၞာဲစိုပ်ဆဵုသၞဝဲ၊
ဂၠံၚ်တပ်ယဝ်ဟွံကွာ် ဂၠိုၚ်သာ်ဒးဆဵုဘဲ။

၃၆၁။ ပြဟ်ပြဟ်လ္ပကၠောန် ယောန်ယောန်လ္ပသ္ပ။
ပြဟ်ပြဟ်ယဝ်ကၠောန် မှာလောန်နုက်ဝါတ်၊
ယောန်ယောန်ယဝ်သ္ပ ကျညးမံၚ်ကျာတ်။

၃၆၂။ ပညာဂှ်ဆာန် ပိုန်ဟာန်ဂှ်ဂၠာဲ။
ပညာယဝ်ဆာန် ဇၟာပ်ဌာန်ဟွံကျာတ်၊
ပိုန်ဟာန်ယဝ်ဂၠာဲမ္ဂး ဟွံဒးဝါတ်ဂါတ်။

၃၆၃။ ပွံၚ်လေဝ်ဒးရံၚ် အိန်ထံၚ်လေဝ်ဒးရုဲ။
ယဝ်ဟွံရံၚ်ပွံၚ် ကြဴစံၚ်တူဒှ်၊
အိန်ထံၚ်ယဝ်ဟွံရုဲ ကြဴထုဲထံၚ်ပြးပြဟ်။

၃၆၄။ ပညာလေဝ်ကဵုလေပ်ကၠး ဒ္ဂေတ်အးလေဝ်ကဵုနွံ။
ပညာယဝ်လေပ်ကၠး ဂွံယးတၟးဇၟာပ်ဌာန်၊
ဒ္ဂေတ်အးယဝ်နွံ ဇၟာပ်ဘုံပြယထာမာန်။

၃၆၅။ ပါၚ်လ္ပရုန်မဵု နွံမ္ၚဵုဂှ်ဟီုဂး။
ပါၚ်ယဝ်ရုန်မဵု ဒှ်ပူဂိုလ်သမၠီု၊
နွံမ္ၚဵုယတ်ဟီုဂး ဒှ်ၚုဟ်မးအိုတ်သီု။

၃၆၆။ ပညာလေဝ်ဒးကတ် ပဋိပတ်လေဝ်ဒးမၚ်မွဲ။
ပညာဟွံကတ် ပြာကဋ်ဟွံမာန်၊
ပဋိပတ်ဟွံမွဲ တုပ်နယ်ကၠဵုကွာန်။

၃၆၇။ ပဂုဏ်ကဵုဒး ပါ်ထ္ၜးကဵုတပ်။
ပဂုဏ်ဟွံဒး ဟွံဗၠးသၞဝဲ၊
ပါ်ထ္ၜးဟွံတပ် ဒုဟ်စိုပ်ဂွံဘဲ။

၃၆၈။ ပၟိက်ညးလေဝ်ဗက် နရက်လေဝ်ဒးဖေက်။
ပၟိက်ညးယဝ်ဟွံဗက် ဒးဒုၚ်လက်ကြာန်၊
နရက်ယဝ်ဟွံဖေက် ဒ္ဂေတ်ယုတ်ဒေက်မာန်။

၃၆၉။ ပရေအ်လေဝ်လ္ပဂွ မာနလေဝ်လ္ပစွံ။
ပရေအ်တုဲယဝ်ဂွ ဟွံထဗဂၠံၚ်ခိုဟ်၊
မာနယဝ်စွံ ညံၚ်ကၠဟ်ထောံဘဝခိုဟ်။

၂၇၀။ ပညာဒးလ္ၚတ် ဗၞတ်ဗၜတ်ဒးတီ။
ဟွံလ္ၚတ်ပညာ ဟွံပြာထာ၊
ဗၞတ်ဗၜတ်ဟွံတီ ဗၠိုက်တၞီလၟိုန်ခါ။

၃၇၁။ ပပတှ်ေလောဲ ပထေၚ်သောဲပြဟ်။
ပတှ်ေလောဲ သၞဝဲစိုပ်မာန်၊
ထေၚ်သောဲပြဟ် လေၚ်ဒိုက်ဒှ်ကြာန်။

၃၇၂။ ပပတှ်ေပြဟ် မဒှ်သၞ။
ပတှ်ေပြဟ် ဒှ်လေၚ်၊
ယဝ်ဒှ်သၞ သောကစံၚ်ပၠေၚ်။

၃၇၃။ ပခဒေဟ်လောန် ပကၠောန်ယုတ်။
ခဒေဟ်လောန် အောန်ဂါရဝ၊
ကၠောန်ယုတ် ဒးဟုတ်ဇၟာပ်ဘဝ။

၃၇၄။ ပတံၚ်အခိၚ် ပဂွိၚ်ကဵုညး။
တံၚ်အခိၚ်မဂး ၚုဟ်မးယှအ်အိုတ်၊
ဂွိၚ်ကဵုညးမဂး ဟွံဗၠးဒဒိုက်စိုတ်။

၃၇၅။ ပလီုဂုဏ်လေပ် ပကြေပ်ဂုဏ်သိုက်။
ဂုဏ်လေပ်လီုအာ ပညာဟွံပြဲ၊
ဂုဏ်သိုက်ကြေပ်ဂှ် တုပ်သၟဟ်ပြိုတ်မွဲ။ ။

ဖ

၃၇၆။ ဖန်ဒးဂွံၚုဟ် တီဒုဟ်ဝေၚ်လေပ်။
ယဝ်ဖန်ဟွံဒး ၚုဟ်မးဂွံအောန်၊
ဟွံတီဒဟ်မ္ဂး ဂွံဗၠးဒဒိုက်အောန်။

၃၇၇။ ဖန်ဂွံခေါၚ်လ္ပဍောၚ် ဖန်သောၚ်လွဳဓရ်။
ဖန်ဂွံခေါၚ်ဍောၚ်ထောံမ္ဂး ကြဴဒးကဟောမ်၊
ဖန်သောၚ်ဟွံလွဳဓရ် ဂၠိုၚ်ကဝ်ဒးကဟောမ်။

၃၇၈။ ဖိုလ်ဒါန်ကဵုကၠိုဟ် ခမဳခိုဟ်ကဵုတီ။
ဖိုလ်ဒါန်ယဝ်ကၠိုဟ် ဘဝခိုဟ်စိုပ်လောဲ၊
ခမဳခိုဟ်ယဝ်တီ ဒးတၞီဗၠိုက်ဟွံမွဲ။ ။

ဗ

၃၇၉။ ဗၠေတ်မ္ဂးဒးသောၚ်ထ္ၜး ဟွံကၠးမ္ဂးဒးသၟာန်။
ဗၠေတ်ဟွံသေၚ်ထ္ၜး ညးတၞဟ်စိုတ်ဟွံအး၊
ဟွံကၠးယဝ်ဟွံသၟာန် ဂမြၚ်ညာဏ်ဟွံတၟး။

၃၈၀။ ဗၠေတ်မ္ဂးကၠဟ်လ္ပဇြိုၚ် ဟွံခိုၚ်မ္ဂးလှာဲလ္ပဂိုဟ်။
ဗၠေတ်ဂှ်ယဝ်ကၠဟ်ဇြိုၚ် ပရိုၚ်ယုတ်မံက်၊
ဟွံခိုၚ်ဂှ်ယဝ်လှာဲဂိုဟ် မၞိဟ်ဒိုဟ်ဂွိုၚ်ညးကော်။

၃၈၁။ ဗီုစဂှ်ကၠောန် ဗီုစၞောန်ထ္ၜးဂှ်မံၚ်။
ဗီုစဂှ်ယဝ်ဟွံကၠောန် ဒးဒုၚ်ဒေါန်ဗျိ၊
ဗီုစၞောန်ထ္ၜးယဝ်ဟွံမံၚ် အစံၚ်အ္စာထေဲတှ်ေဂိ။

၃၈၂။ ဗီုချပ်လဝ်ဂှ်သ္ဂး ဗီုဂွံဒးဂှ်ဆက်ဆောမ်။
ဗီုချပလဝ်ယဝ်သ္ဂး ဂွံဗၠးနူသၠေဟ်ပၟာ၊
ဗီုဂွံဒးယဝ်ဆက်ဆောမ် ဂကောမ်ညဳသာ။

၃၈၃။ ဗၠေတ်မ္ဂးလ္ပညှာ သ္ပအ္စာမ္ဂးအေၚ်။
ဗၠေတ်ဒၟံၚ်ယဝ်ညှာ ညံၚ်ထဴဏာပါဲ၊
သ္ပအ္စာယဝ်ဟွံအေၚ် ညံၚ်ပၠေၚ်ထောံကွးဆာဲဆာဲ။

၃၈၄။ ဗီုတ္ၚဲလေဝ်လ္ပသၠုၚ် ဗီုကြုၚ်လေဝ်လ္ပတ္ၚံက်။
ယဝ်သၠုၚ်ဗီုတ္ၚဲ ညးမွဲဟွံသ္ဍိုက်ဆာန်၊
ယဝ်တ္ၚံက်ဗီုကြုၚ် ဒးဒုၚ်ပျဲကဵုညးတၞဟ်မာန်။

၃၈၅။ ဗျုလ္ပထောံဒစုန် မၞိဟ်တၠဂုဏ်လ္ပဝိုတ်။
ဗျုယဝ်ထောံဒစုန် လောတ်စှ်ေဖျုန်မေက်၊
မၞိဟ်တၠဂုဏ်ယဝ်ဝိုတ် ချိုတဟွံဗၠးနရက်။

၃၈၆။ ဗၞတ်ဗ္ၜတ်ကဵုကၠိုဟ် ဒ္ဂေတ်ခိုဟ်ကဵုနွံ။
ဗၞတ်ဗ္ၜတ်ကၠိုဟ်မှ ညးသ္ပခိုဟ်၊
ဒ္ဂေတ်ခိုဟ်နွံမှ ညးသ္ပသပ္ပုရိုဟ်။

၃၈၇။ ဗီုကၠလ္ပဒှ် ဗီုပဟ်လ္ပမံၚ်။
ယဝ်ဒှ်ဗီုကၠမသဟွံမဲ၊
ယဝ်မံၚ်ဗီုပဟ် ဂွံဒယှ်ဟွံလောဲ။

၃၈၈။ ဗီုကေတ်ဂှ်ကဵု ဗီုကဵုဂှ်ကေတ်။
ဗီုကေတ်ယဝ်ကဵု ညးလဵုဟွံက္ဍုဟ်၊
ဗီုကဵုယဝ်ကေတ် ခါလဵုဟွံဗၠေတ်ပုဟ်။

၃၈၉။ ဗီုညးလ္ပမှာ ဗီုအ္စာလ္ပကၠဟ်။
ဗီုညးယဝ်မှာ အခါလဵုဟွံခိုဟ်၊
ဗီုအ္စာယဝ်ကၠဟ် ဟွံဒှ်သပ္ပုရိုဟ်။

၃၉၀။ ဗၠေတ်လ္ပဒက်ဝဲ အစောဲလ္ပစွံလအ်။
ဗၠေတ်ယဝ်ဒက်ဝဲ မွဲတ္ၚဲဒးဆဵုဒဒိုက်၊
အစောဲယဝ်စွံလအ် စိုတ်ယအ်ဂၠိုၚ်ဝိုက်။

၃၉၁။ ဗီုမှာလေဝ်ဒးကၠိုဟ် ဗီုခိုဟ်လေဝ်ဒးတီ။
ဗီုမှာယဝ်ကၠိုဟ် ဂၠံၚ်ခိုဟ်ဒှ်လောဲ၊
ဗီုခိုဟ်ယဝ်တီ ဟွံဒးတၞီဗၠိုက်မွဲ။

၃၉၂။ ဗီုတီဂှ်ကဵုညးကၠိုဟ် ဗီုခိုဟ်ဂှကဵုညးကေတ်။
ဗီုတီဂှ်ဟွံမိက်ကဵုညးကၠိုဟ် တီခိုဟ်ဟွံသေၚ်၊
ဗီုခိုဟ်ဂှ်ယဝ်ဟီုထလေတ် ဒှ်ဒ္ဂေတ်သမၠီုဟေၚ်။

၃၉၃။ ဗီုကေတ်ဒးကၠိုဟ် ဗီုခိုဟ်ဒးဖန်။
ဟွံကၠိုဟ်ဗီုကေတ် ဒးဗၠေတ်ဒၟံၚ်လၟိုန်၊
ဗီုခိုဟ်ဟွံဖန် ထုဲၜန်ဒၟံၚ်လၟိုန်။

၃၉၄။ ဗီုအဲဒးတီ ဗီုညးဒးကၠိုဟ်။
ဗီုအဲဟွံတီပၠန် ဖန်ဖက်ဟွံလောဲ၊
ဗီုညးဟွံကၠိုဟ် ဂၠံၚ်ခိုဟ်ဟၟဲ။

၃၉၅။ ဗီုကၠိုဟ်သောၚ်ထ္ၜး ဗီုကၠးစန်ဒက်။
ဗီုကၠိုဟ်သောၚ်ထ္ၜးမှ ညးပဗက်မာန်၊
ဗီုကၠးစန်ဒက်မှ အာဂတမာန်။

ဘ

၃၉၆။ ဘဝလေဝ်လ္ပပၠေၚ် ကွတ်ဝေၚ်လေဝ်လ္ပကတ်။
ပၠေၚ်ဘဝမ္ဂး ကြဴဒးကဟောမ်စိုတ်၊
ကွတ်ဝေၚ်ယဝ်ကတ် ဒှ်ဟိုတ်ဒြပ်ရတ်အိုတ်။

၃၉၇။ ဘဝသိုက်လ္ပသ္ဍိုက် ဘဝဒိုက်လ္ပဍောၚ်စိုတ်။
ဘဝသိုက်ယဝ်သ္ဍိုက် ဒဒိုက်ဝဋ်ဂၠိၚ်၊
ဘဝဒိုက်ယဝ်ဍောၚ်စိုတ် ကသပ်အိုတ်ဒးဂွိၚ်။

၃၉၈။ ဘာသာဒးဗဒါဲ ပရိယာဲဒးကၠိုဟ်။
ဗဒါဲဘာသာမှ ကၠောန်ပဒှ်လောဲ၊
ပရိယာဲကၠိုဟ်မှ အာဂတိဂၠိၚ်သ္ၚောဲ။

မ

၃၉၉။ မၞိဟ်စိုတ်စၞာဲဂှ်ဝေၚ် မၞိဟ်ကသပ်တၟေၚ်ဂှ်ဗ္ဒာဲ။
မၞိဟ်စိုတ်စၞာဲဟွံဝေၚ် ဗွဲတၟေၚ်ဒးလီုလာ်၊
မၞိဟ်ကသပ်တၟေၚ်ယဝ်ဗ္ဒာဲ ဂွံပြယာဲဂၠိုၚ်သာ်။

၄၀၀။ မၞိဟ်စိုတ်စၞာဲဂှ်ဝေၚ် မၞိဟ်ကသပ်တၟေၚ်ဂှ်ဗ္ဒာဲ။
မၞိဟ်စိုတ်စၞာဲဟွံဝေၚ် ဗွဲတၟေၚ်ဒးလီုလာဲ၊
မၞိဟ်ကသပ်တၟေၚ်ယဝ်ဗ္ဒာဲ ဂွံပြယာဲဂၠိုၚ်သာ်။

၄၀၁။ မေတ္တကဵုဍာံပြ စေတနာကဵုတပ်မှ။
မေတ္တာဍာံပြ ဝဲသၞဟွံမဲ၊
စေတနာတပ် ဂၠာဲဒြပ်ဂွံလောဲ။

၄၀၂။ မံၚ်ကဵုဒးရး စကဵုအးဇ္ၚး။
ယဝ်မံၚ်ဒးရး ဂွံဗၠးသၞဝဲ၊
ယဝ်စအးဇ္ၚး ဟွံဒးဂိယဲ။

၄၀၃။ မံၚ်ကဵုတပ် ကသပ်ကဵုဇြိုဟ်။
ယဝ်မံၚ်တပ် ဂွံဒြပ်သၟးသၟး၊
ယဝ်ကသပ်ဇြိုဟ် ဇၟာပ်ဒိုဟ်ထိုၚ်သး

၄၀၄။ မံၚ်ကဵုသဝ် လၟေတ်ဓရ်ကဵုနွံ။
ယဝ်မံၚ်သဝ် ရဲအဖဝ်ဂၠိုၚ်မိပ်သၠောၚ်၊
ယဝ်နွံလၟေတ်ဓရ် ဍုၚ်သွဝ်ဂွံဟွံယောၚ်။

၄၀၅။ မံၚ်လေဝ်ကဵုၜိုဟ် စိုတ်ခိုဟ်လေဝ်ကဵုနွံ။
မံၚ်ၜိုဟ်မ္ဂး ဟွံဒးဍောၚ်ၜိုတ်၊
စိုတ်ခိုဟ်မ္ဂး ညးဒးဆာန်ဖအိုတ်။

၄၀၆။ မၞိဟ်ဟွံခိုဟ်ဝေၚ်ပါဲ မၞိဟ်ဆာဲနိဿဲ။
မၞိဟ်ဟွံခိုဟ်ဟွံဝေၚ်ပါဲ ဂၠံၚ်ဆာဲတိုန်ဟွံမဲ၊
မၞိဟ်ဆာဲယဝ်ဟွံနိဿဲ ဂွံသၠုၚ်ပြဲဟွံမဲ။

၄၀၇။ မံၚ်စလ္ပပပ် ကသပ်ယုတ်လ္ပချပ်။
မံၚ်ပပ်မ္ဂး စိုတ်ဟွံအးၚး၊
ကသပ်ယုတ်ချပ် ဂၠံၚ်တပ်ကေတ်ဟွံဒး။

၄၀၈။ မာနဂှ်ၜုၚ် ဓရ်ဂှ်သၠုၚ်။
မာနယဝ်ၜုၚ် ဂွံသၠုၚ်တိုန်ဇၟာပ်ကဝ်၊
ဓရ်ယဝ်သၠုၚ် ဂွံစိုပ်ဍုၚ်သွဝ်။

၄၀၉။ မံၚ်လေဝ်ကဵုညဳ ဓရ်လွဳလေဝ်ကဵုနွံ။
မံၚ်ညဳမ္ဂး ကျာ်ဒးထိုၚ်သး၊
ဓရ်လွဳနွံမ္ဂး ဂွံဇၞးသၞအိုတ်အး။

၄၁၀။ မှာမ္ဂးဒုၚ်ဝန် ဂွံနန်မ္ဂးလ္ပသၠုၚ်။
မှာဟွံဒုၚ်ဝန် ဒှ်လက်သန်သမၠီု၊
ဂွံနန်တုဲသၠုၚ်မ္ဂး ကြဴစိုတ်ဒးလီု။

၄၁၁။ မံၚ်ကဵုမေတ္တာ စေတနာကဵုသၠုၚ်။
မံၚ်ကဵုမေတ္တာ ဒၞာဲအာညးသ္ဍိုက်၊
စေတနာသၠုၚ်ပြဲ မွဲတ္ၚဲဂွံတသိုက်။

၄၁၂။ မၞိဟ်ယုတ်ဂှ်လ္ပနိဿဲ မံၚ်လှဲဂှ်လ္ပဒးစိုတ်။
မၞိဟ်ယုတ်ယဝ်နိဿဲ ဘဝပြဲဒးဟောမ်တဴ၊
မံၚ်လှဲယဝ်ဒးစိုတ် ခါချိုတ်ဒးစံၚ်တူ။

၄၁၃။ မံၚ်ကဵုချိုတ်ပၠိုတ် အလိုက်စိုတ်လ္ပဗက်။
မံၚ်ဟွံချိုတ်ပၠိုတ် ဒးဍောၚ်စိုတ်ရိုဟ်တ္ၚဲ၊
အလိုက်စိုတ်ယဝ်ဗက် နရက်ဗၠးဟွံလောဲ။

၄၁၄။ မံၚ်ကဵုတီအခိုက် အလိုက်ညးလ္ပကၠဟ်။
ယဝ်မံၚ်ဟွံတီအခိုက် မၞိဟ်ဝိုက်ဝိုက်ညးကော်၊
အလိုက်ညးယဝ်ကၠဟ် ညးတၞဟ်ဟွံသ္ပဇၞော်။

၄၁၅။ မိၚ်ဓရ်မ္ဂးကလၚ် ဆဵုသၚ်မ္ဂးလ္ၚောဝ်။
မိၚ်ဓရ်ယဝ်ကလၚ် တဟၚ်တဏှာပိုတ်၊
ဆဵုသၚ်လ္ၚောဝ်မ္ဂး ဘဝယုတ်ဗၠးအိုတ်။

၄၁၆။ မိက်ဇၞော်မောဝ်ဒးကၠောန် မိက်စောန်ဒးလ္ၚတ်။
မိက်ဇၞော်မောဝ်ဟွံကၠောန် ဒှ်မၞိဟ်ကောန်စိုတ်လီု၊
မိက်ဂွံစောန်ဟွံလ္ၚတ် ညံၚ်ပၟတ်ဗတေၚ်ဓလီု။

၄၁၇။ မိက်ဇၞော်ဒးလွဳ မိက်ဒှတ်သေဋ္ဌဳဒးကၠောန်။
မိက်ဇၞော်မောတ်ဟွံလွဳ ဟွံညဳကဵုပၟိက်ဂၞပ်၊
မိက်ဒှ်သေဋ္ဌဳဟွံကၠောန် ပၟိက်လောန်စိုတ်ဟွံတပ်။

၄၁၈။ မံၚ်သၟးလ္ပဗၟက် ညးလက်အေၚ်ထောံ။
မံၚ်သၟးယဝ်ဗၟက် ဂြဲဂြက်ဟွံဒှ်မ္ၚဵု၊
ညးလက်ယဝ်ဟွံအေၚ် ဟီုတေၚ်ဒးဆဆဵု။

၄၁၉။ မံၚ်စလ္ပဟေၚ်ဟဟ် မိတ်စှ်လ္ပကဵုလီု။
မံၚ်စယဝ်ဟေၚ်ဟဟ် ညးတၞဟ်ဟွံဆာန်၊
မိတ်စှ်ယဝ်လီု ဒးဟောမ်ဗြီုမာန်။

၄၂၀။ မံၚ်စလေဝ်ကဵုတၟိ ရတ်ပိလေဝ်ရဴဂဴ။
မံၚ်စတၟိမ္ဂး ရံၚ်ဒးရးဒှ်မ္ၚဵု၊
ရတ်ပိရဴဂဴမ္ဂး သၞဝဲဟွံဒးဆဵု။

၄၂၁။ မံၚ်စလ္ပၚုၚ် ဍာ်ခၞုၚ်လ္ပသုၚ်။
မံၚ်စယဝ်ၚုၚ် စိုတ်ဟွံဇြုၚ်ကေဝ်၊
ဍာ်ခၞုၚ်ယဝ်သုၚ် ဗုၚ်လီုဂၞဴကၠေဝ်။

၄၂၂။ မၚ်သဳလ္ပဂွ ဒါနလ္ပဖေက်။
မၚ်သဳယဝ်ဂွ ဘဝဟွံသၠုၚ်ပြဲ၊
ဒါနယဝ်ဖေက် ပိုန်ဒေက်ဝါတ်လောဲ။

၄၂၃။ မံၚ်သၟးလ္ပကြာန် ပိုန်ဟာန်လ္ပပၠေၚ်။
မံၚ်သၟးယဝ်ကြာန် ညးကွာန်သ္ပဒုဟ်၊
ပိုန်ဟာန်ယဝ်ပၠေၚ် ဒးလေၚ်ဘဝလၟုဟ်။

၄၂၄။ မံၚ်ကဵုခိုဟ် ဟီုကဵုဍိုဟ်။
ယဝ်မံၚ်ခိုဟ်ပၠန် တၠပညာထိုၚ်သး၊
ယဝ်ဟီုဍိုဟ်ရ ဝဲသၞဗၠးၜး။

၄၂၅။ မိ,မလေဝ်လွဳအာ မေတ္တာလေဝ်ဇၞော်ပၟဝ်။
မိ,မယဝ်လွဳအာ တၠပညာထိုၚ်သး၊
ယဝ်ဇၞော်ပၟဝ်မေတ္တာ ဒၞာဲအာမုက်မတ်တၟး။

၄၂၆။ ကမၠောန်ခိုဟ်ကၠောန်အာ ဘာကၟာလ္ပကၠဟ်။
ကမၠောန်ခိုဟ်ကၠောန်မ္ဂး ကြဴဟွံဒးဍောၚ်စိုတ်၊
ဟွံကၠဟ်ဘာကၟာ အခါလဵုဟွဒးကဟောမ်စိုတ်။

၄၂၇။ မိက်ဂွံခိုဟ်တှ်ေအေၚ် မိက်ဂွံပေၚ်တှ်ေတ္ၚအ်။
ယဝ်အေၚ်ပၠန် ဨကန်ဂွံခိုဟ်၊
ယဝ်တ္ၚအ်ပၠန် ဨကန်ဂွံပေၚ်တၟိုဟ်။

၄၂၈။ မံၚ်လေဝ်ကဵုယျဵု ဓရ်မ္ၚဵုလေဝ်ကဵုဒှ်။
ယဝ်မံၚ်ယျဵု ညးဆဵုဒးဆာန်၊
ဓရ်မ္ၚဵယဝ်ဒှ် ဂွံဒယှ်တှ်မာန်။

၄၂၉။ မံၚ်စလ္ပဟာန် ဟီုဂလာန်လ္ပယုတ်။
မံၚ်စယဝ်ဟာန် ညာဏ်ပညာဃိုတ်၊
ယဝ်ဟီုဂလာန်ယုတ် ကျာ်သြဳဟုတ်ပၠိုတ်။

၄၃၀။ မိက်ဂွံဗြဴဆာန်ကဵုဒြပ် မိက်ဂွံချပ်မံၚ်ဌာန်လ္ၚု။
ယဝ်ကဵုဒြပ်ဟွံမာန် ဗြဴဂွံဆာန်ဝါတ်၊
ပ္ဍဲဌာန်လ္ၚုယဝ်ဟွံချပ် ကသပ်ခိုဟ်ဟွံညာတ်။

၄၃၁။ မၞိဟ်ခိုဟ်ဒးပံၚ် ရံၚ်တုဲဆက်ဆောမ်။
မၞိဟ်ခိုဟ်ပံၚ်မ္ဂး အံၚ်ဇၞးလောဲ၊
ရံၚ်တုဲဆက်ဆောံမ္ဂး ဂွံဗၠးဘဲ။

၄၃၂။ မၞိဟ်ယုတ်လ္ပရီု မၞိဟ်ဓီုလ္ပဗတောန်။
မၞိဟ်ယုတ်ယဝ်ရီု လမျီုအိုတ်ဒှ်ဂွံ၊
မၞိဟ်ဓီုယဝ်ဗတောန် ဂိုတ်လောန်ဂွဂွံ။

၄၃၃။ မှာတှ်ေပါဲထောံ ဒးစွံလဝ်ကၠာ။
မှာပါဲထောံမ္ဂး ဟွံဒးလေၚ်ဂၠိုၚ်၊
ဒးစွံလဝ်မ္ဂး ဂွံဗၠးညးဂြိုၚ်။

၄၃၄။ မှာဂှ်ကဵုတီ ဗၠိုက်တၞီဂှ်ကဵုကၠိုဟ်။
မှာတီမ္ဂး ဂွံဗၠးဘဲ၊
ဗၠိုက်တၞီယဝ်ကၠိုဟ် ဂွံကလေၚ်ခိုဟ်လောဲ။

၄၃၅။ မိက်ဂွံတှ်ေကဵု မိက်ဂွံဖိုလ်တှ်ေလွဳ။
မိက်ဂွံတုဲယဝ်ဟွံကဵု ဒှ်ကၠဵုစၟဳပုၚ်၊
မိက်ဂွံဖိုလ်ယဝ်ဟွံလွဳ ဒှ်ကၠဳကဳခၞုက်ပုၚ်။

၄၃၆။ မံၚ်ကဵုတပ် ကသပ်လ္ပတ္ၚံက်။
ယဝ်မံၚ်တပ် စဂပ်လောဲ၊
ယဝ်ကသပ်ဟွံတ္ၚံက် လံက်ဟုတ်ဟွံမဲ။

၄၃၇။ မိက်ဂွံသၠုၚ်လ္ပသဝ် မိက်ဂွံဂတဝ်လ္ပကြာန်။
ယဝ်စိုတ်ယုတ်သဝ် ဂၠိုၚ်ကဝ်ဒှ်ဒဒိုက်၊
ယဝ်ရကြာန် ဇၟာပ်ဌာန်ဒးတၞီဗၠိုက်။

၄၃၈။ မိက်ဂွံဇြိုဟ်ခါဲဍာဍာ မိက်ဂွံသာမံၚ်ဂြက်ဂြက်။
မိက်ဂွံဇြိုဟ်ခါဲဍာဍာ ကာယဟွံဍောၚ်ၜိုတ်၊
မိက်ဂွံသာမံၚ်ဂြက်ဂြက် နရက်ဗၠးချိုတ်ပၠိုတ်။

၄၃၉။ မာနလေဝ်လ္ပပါ စေတနာလေဝ်လ္ပစၞာဲ။
မာနယဝ်ပါ ဘာသာလီုအိုတ်၊
စေတနာယဝ်စၞာဲ ဂကူကၠာဲအိုတ်။

၄၄၀။ မိမလေဝ်လွဳဝတ် ဗၞတ်ဗ္ၜတ်လေဝ်ဒးကၠိုဟ်။
မိမယဝ်ဟွံလွဳဝတ် ဂတမတ်ဒးဘယ်၊
ဗၞတ်ဗ္ၜတ်ယဝ်ဟွံကၠိုဟ် မၞိဟ်ခိုဟ်ဒှ်ဟွံလောဲ။

၄၄၁။ မူကၠောန်ရောကဵုကၠိုဟ် မူခိုဟ်ရောကဵုတီ။
မူကၠောန်ယဝ်ဟွံကၠိုဟ် မၞိဟ်ခိုဟ်ညးဟွံကော်၊
မူခိုဟ်ရောယဝ်ဟွံတီ ဒးတၞီဗၠိုက်ဇၞော်။

၄၄၂။ မၞိဟ်ကဵုဂှ်လ္ပက္ဍုဟ် မၞိဟ်လၞုဟ်ဂှ်လ္ပပံၚ်။
မၞိဟ်ကဵုယဝ်က္ဍုဟ် ဟွံဗၠးဒုဟ်ရ၊
မၞိဟ်လၞုဟ်ယဝ်ပံၚ် ဇၟာပ်ဂၠံၚ်ဍိုန်လျ။

၄၄၃။ မွဲဘဝလ္ပရံၚ် မွဲအံၚ်လ္ပကၠောန်။
မွဲဘဝယဝ်ရံၚ် အစံၚ်တူဟွံဗၠး၊
မွဲအံၚ်ယဝ်ကၠောန် ကမၠောန်ဟွံအံၚ်ဇၞး။

၄၄၄။ မှာတုဲလ္ပဝိုတ် ဂိုတ်တုဲလ္ပယှအ်။
မှာတုဲယဝ်ဝိုတ် ညံၚ်ဇိုတ်ထောံဂုဏ်ဖဵု၊
ဂိုတ်တုဲယဝ်ယှအ် ဒှ်ကြအ်ဟွံတီဖဵု။

၄၄၅။ မံၚ်ကဵုယေန်သၞာၚ် သၟန်ပါၚ်ကဵုဍာတ်။
ယဝ်မံၚ်ယေန်သၞာၚ် ညးသအာၚ်ထိုၚ်သး၊
ယဝ်သၟန်ပါၚ်ဍာတ် ကောန်ဇာတ်ဟွံဒးပြး။

၄၄၆။ မုဆာန်ဒးကၠိုဟ် မုခိုဟ်ဒးတီ။
မုဆာန်ဟွံကၠိုဟ် ဆာန်ခိုဟ်ဟွံဒှ်၊
မုခိုဟ်ဟွံတီ ဒးဗၠိုက်တၞီပြဟ်။

၄၄၇။ မုဍိုန်ဒးကၠိုဟ် မုခိုဟ်ဒးတီ။
မုဍိုန်ဟွံကၠိုဟ် ခိုဟ်ဂၠံၚ်ဟွံမဲ၊
မုခိုဟ်ဟွံတီ ဗၠိုက်တၞီရိုဟ်တ္ၚဲ။

၄၄၈။ မုဟိုတ်ရန်တၟံ မုဟိုတ်လအ်မံၚ်။
ရန်တၟံဟွဲကဵုဟိုတ် ဆၜိုတ်အိုတ်အခိၚ်၊
ဟိုတ်လအ်ဟွံကၠိုဟ် ၜိုန်ခိုဟ်ဟွံလဟိၚ်။

၄၄၉။ မေတ္တာဂှ်လ္ပခယျ စေတနာဂှ်ချိၚ်ဆ။
မေတ္တာဂှ်ယဝ်ခယျ ကာလလဵုဟွံဒးဗီု၊
စေတနာဂှ်ယဝ်ဟွံချိၚ်ဆ ကၠောန်ပစိုတ်လီု။

၄၅၀။ မှာပဂွ မာနပစွံ။
မှာယဝ်ဂွ ဘဝလီုလောဲ၊
မာနယဝ်စွံ ဒးထောံမိတ်ပြဲ။

၄၅၁။ မိက်ခိုဟ်မၚ်မွဲ မိက်လောဲတြပ်စိုတ်။
ယဝ်မၚ်မွဲ ရိုဟ်တ္ၚဲခိုဟ်မာန်၊
တြပ်စိုတ်မွဲ လောဲအိုတ်ရ။

ယ

၄၅၂။ ယုတ်ဂှ်လ္ပဒးဂၞပ် ပွပပ်ဂှ်လ္ပကၠောန်။
ယုတ်ယဝ်ဒးဂၞပ် မၞိဟ်ပပ်ပပ်ညးကော်၊
ပွပပ်ကၠောန်မ္ဂး ကြဴဴဒးဒဒိုက်ဇၞော်။

၄၅၃။ ယဲလ္ပဂိုဟ်ဒြပ် ဟွံဒးဂၞပ်လ္ပစ။
ယဲဂိုဟ်ဒြပ်မ္ဂး ဂွံဗၠးဟွံလောဲ၊
ဟွံဒးဂၞပ်စမ္ဂး ဒးဆဵုဘဲ။

၄၅၄။ ယၟုလေဝ်မၚ်မွဲ အဝယ်လေဝ်ဒးရံၚ်။
ယၟုယဝ်ဟွံမၚ်မွဲ ညးမွဲဟွံသ္ပကာ၊
အဝယ်ယဝ်ဟွံရံၚ် လ္ပာ်ဂၠံၚ်ယုတ်ကၠောန်ဒးအာ။

၄၅၅။ ယုတ်မွဲလ္ပပကေၚ် အထေၚ်မွဲလ္ပဂလိုၚ်။
ယုတ်မွဲယဝ်ပကေၚ် ယုတ်ဟေၚ်ဒှ်ရ၊
အထေၚ်မွဲယဝ်ဂလိုၚ် စိုတ်ဟွံခိုၚ်ရ။ ။

ရ

၄၅၆။ ရံၚ်ဌာန်တုဲဗ္ဒာဲ ရံၚ်သဟာဲတုဲကဵု။
ဟွံရံၚ်ဌာန်တုဲယဝ်ဗ္ဒာဲ အန္တရာယ်ကၠုၚ်စိုတ်၊
ဟွံရံၚ်သဟာဲတုဲယဝ်ကဵု ဂုဏ်ဖိုလ်ဟွံစိုတ်။

၄၅၇။ ရန်တၟံကဵုဍာံပြ ဝိရဳယကဵုနွံတွဵု။
ရန်တၟံယဝ်ဍာံပြ ဒ္ဂေတ်ပွလေဝ်ဟွံပြံၚ်သၠာဲ၊
ဝိရဳယယဝ်နွံတွဵု ဂုဏ်ဖိုလ်ဂွံညာတ်ဆာဲ။

၄၅၈။ ရံၚ်အခိၚ်တုဲချပ် ရံၚ်ဒြပ်တုဲကျိုၚ်။
ဟွံရံၚ်အခိၚ်ယဝ်ချပ် ကသပ်ဗက်ခေတ်ဟွံမာန်၊
ဟွံရံၚ်ဒြပ်ယဝ်ကျိုၚ် ညးဂြိုၚ်ဒးသီုကွာန်။

၄၅၉။ ရံၚ်ဂၞပ်ညးတုဲဟီု စမ်ၜတ်တုဲထိုၚ်သး။
ဟွံရံၚ်ဂၞပ်တုဲယဝ်ဟီု ၜိုတ်ဟီုဏာဟွံမဲရှ်၊
စမ်ၜတ်တုဲယဝ်ထိုၚ်သး သၟးသၟးဍေံဟွံဒှ်။

၄၆၀။ ရံၚ်သၞောဝ်တုဲဝေတ် ရံၚ်ကွေတ်တုဲကေတ်။
ဟွံရံၚ်သၞောဝ်ယဝ်ဝေတ် တၠပညာဇေတ်ဟွံဒှ်၊
ဟွံရံၚ်ကွေတ်တုဲကေတ် တသိုက်ဇေတ်ဟွံဒှ်။

၄၆၁။ ရံၚ်အဝယ်တုဲသ္ပ ရံၚ်ပွတုဲကြီု။
ရံၚ်အဝယ်တုဲသ္ပ ဟွံဒှ်ပွယုတ်၊
ရံၚ်ပွတုဲယဝ်ကြီု ၜိုတ်ဟီုဍေံဟွံလုတ်။

၄၆၂။ ရတ်ပိဂှ်ဗ္ဒာဲ စိုတ်စၞာဲဂှ်ဝေတ်။
ရတ်ပိယဝ်ဗ္ဒာဲ ဂွံဆာဲဇၟာပ်ဘဝ၊
စိုတ်စၞာဲယဝ်ဝေတ် တသိုက်ဇေတ်ဂွံထဗ။

၄၆၃။ ရံၚ်တုဲတှ်ေညှာ ရံၚ်အခါတုဲကၠုၚ်။
ဟွံရံၚ်တုဲယဝ်ညှာ ဒှ်ကောန်အပါဟွံမဲ၊
ဟွံရံၚ်အခါတုဲယဝ်ကၠုၚ် ဒးဒုၚ်စုတ်စောဲ။

၄၆၄။ ရံၚ်အဝယ်တုဲကၠောန် ရံၚ်ကမၠောန်တုဲသ္ပ။
ရံၚ်အဝယ်တုဲယဝ်ကၠောန် ဒှ်ကမၠောန်သပ္ပုရိုဟ်၊
ရံၚ်ကမၠောန်တုဲယဝ်သ္ပ ထာဝရဂွံခိုဟ်။

၄၆၅။ ရပ်လေဝ်ဒးတော်ဆ ဒ္ဂေတ်ပွလေဝ်ဒးခိုဟ်။
ရပ်တော်ဆမှ ကာယဗၠးဍောၚ်ၜိုတ်၊
ဒ္ဂေတ်ပွခိုဟ်မှ ဍာံပြဒြပ်ပေၚ်စိုတ်။

၄၆၆။ ရံၚ်ဌာန်တုဲကၠောန် ရံၚ်ကမၠောန်တုဲဖန်။
ရံၚ်ဌာန်တုဲယဝ်ကၠောန် ဗၠေတ်အောန်ဗၠးဘဲ၊
ရံၚ်ကမၠောန်တုဲယဝ်ဖန် ကၠောန်ပၠန်ဒှ်လောဲ။

၄၆၇။ ရဴဂဴဂှ်လ္ပလၞုဟ် ပွဒုဟ်ဂှ်လ္ပတ္ၚအ်။
ရဴဂဴယဝ်လၞုဟ် ဘဝလၟုဟ်ဟွံဆာဲ၊
ပွဒုဟ်ယဝ်တ္ၚအ် ဟွံလအ်ဒှ်အန္တရာယ်။

၄၆၈။ ရံၚ်ခေတ်တုဲကၠောန် ရံၚ်ကမၠောန်တုဲဖန်။
ကၠောန်ဟွံရံၚ်ခေတ် ၜေတ်ညးဟွံမာန်၊
ဟွံရံၚ်ကမၠောန်တုဲဖန် ထုဲၜန်ဒှ်ကြာန်။

၄၆၉။ ရံၚ်အခိၚ်တုဲကၠောန် ရံၚ်ကမၠောန်တုဲချပ်။
ကၠောန်ဟွံရံၚ်အခိၚ် ဍာ်ဇမၠိၚ်ဟွံဒှ်၊
ချပ်ဟွံရံၚ်ကမၠောန် လောန်အာကြအ်ဒှ်။

၄၇၀။ ရံၚ်တုဲကဵုအဝဵု ဆဵုတုဲပါ်ဖါဲ။
ရံၚ်တုဲကဵုအဝဵု ဆဆဵုဟွံဒှ်၊
ဆဵုတုဲပါ်ဖါဲ ဂၠံၚ်ဆာဲဒှ်ပြဟ်။

၄၇၁။ ရံၚ်မၞိဟ်တုဲစန် ရံၚ်သြန်တုဲရာန်။
ဟွံရံၚ်မၞိဟ်ယဝ်စန် ထုဲၜန်သၞဒှ်၊
ဟွံရံၚ်သြန်ယဝ်ရာန် ပိုန်ဟာန်ဒှ်ခတှ်။ ။

လ

၄၇၂။ လမျီုလ္ပဂိုဟ် ဘဝဒိုဟ်လ္ပမံၚ်။
ဂိုဟ်မံၚ်လမျီုမ္ဂး ဟွံဒးလေဝ်ဂံၚ်ဟီု၊
ဘဝဒိုဟ်ယဝ်မံၚ် တုပ်ညံၚ်ကၠဵုကၠိက်ကီု။

၄၇၃။ လ္ပသ္ပဆဆဵု လ္ပဍဵုဍိုက်ညးကြာန်။
ယဝ်သ္ပဆဆဵု ဆဆဵုဒးဒှ်၊
ယဝ်ဍဵုဍိုက်ညးကြာန် သ္ၚိဌာန်ဒးကၠဟ်။

၄၇၄။ လ္ပရံၚ်ကြပ် လ္ပချပ်သဝ်။
ယဝ်ရံၚ်ကြပ်ပၠန် လညာတ်ဍန်ရ၊
ယဝ်ချပ်သဝ် ကမၠောန်သဝ်ရ။

၄၇၅။ လ္ပဗက်ဂၞပ်တဏှာ သာသာလ္ပမံၚ်။
ဗက်ဂၞပ်တဏှာ သံသာဒးဂၠိၚ်၊
မံၚ်သာသာ အခါချိုတ်ဒးဂွိၚ်။

၄၇၆။ လညာတ်လ္ပဗၠေၚ် အထေၚ်လ္ပဗၠေတ်။
ယဝ်လညာတ်ဗၠေတ် ဗွဲတၟေၚ်ဒးလေၚ်ဒိုက်၊
ယဝ်အထေၚ်ဗၠေတ် မိတ်ဇေတ်ဒးလေၚ်ဒိုက်။

၄၇၇။ လွဳလေဝ်လ္ပဗလး ကမၠောန်ဒးရးလေဝ်သ္ပ။
လွဳဟွံဗလး ကျာ်ဒးထိုၚ်သး၊
ကမၠောန်ဒးရးယဝ်သ္ပ ဝဲသၞဗၠးၜး။

၄၇၈။ လၟုဟ်လေဝ်လ္ပကတူ လက်ကြဴလေဝ်ကဵုၜိုဟ်။
လၟုဟ်ယဝ်ကတူ ဒှ်သောကဍောၚ်ၜိုတ်၊
လက်ကြဴယဝ်ၜိုဟ် ဂွံခိုဟ်စချိုတ်ပၠိုတ်။

၄၇၉။ လေပ်တုဲကဵုသဝ် မိၚ်ဓရ်တုဲကဵုခိုဟ်။
လေပ်တုဲယဝ်ဟွံသဝ် ရဲဖဝ်ဟွံကာတ်မွဲ၊
မိၚ်ဓရ်တုဲယဝ်ဟွံခိုဟ် သပ္ပုရိုသ်ဒှ်ဟွံလောဲ။

၄၈၀။ လ္ပဗၟက်က၆ုကွး လ္ပထ္ၜးဂၠံၚ်ဗၠေတ်။
ယဝ်ဗၟက်ကဵုကွး ခါကွးဒါတ်စးရံၚ်ဝါတ်၊
ယဝ်ထ္ၜးဂၠံၚ်ဗၠေတ် ကြဴတဲဝေတ်ဝါတ်။

၄၈၁။ လ္ပသ္ပဖဝ်ကဵုကွး လ္ပထ္ၜးပွယုတ်။
သ္ပဖဝ်ကဵုကွး ဝေတ်ကွးဟွံပကာ၊
ပွယုတ်ယဝ်ထ္ၜး ဂွံကွးလက်အ္စာ။

၄၈၂။ လ္ပဂၠာဲဝဲသၞ ဒေါသဖအောန်။
ယဝ်ဟွံဂၠာဲဝဲသၞ ကာယဒှ်တသိုက်၊
ဒေါသဖအောန်မ္ဂး ဂွံဗၠးဒဒိုက်။

၄၈၃။ လ္ပပတဴမာန လ္ပဂွဇၟာပ်ဒၞာဲ။
ယဝ်ပတဴမာန ဘဝဒးယုတ်သဝ်၊
ယဝ်ဂွဇၟာပ်ဒၞာဲ စရာဲဟွံမံက်ဂတဝ်။

၄၈၄။ လှဲလှဲလ္ပမံၚ်အာ မေတ္တာလ္ပအေဲကှ်။
လှဲလှဲယဝ်မံၚ်အာ အခါချိုတ်ုးဂြက်ပၠန်၊
မေတ္တာယဝ်အေဲကှ် သၞဝဲဒှ်ထုဲၜန်။

၄၈၅။ လၟုဟ်လေဝ်မံၚ်ကဵုဂုက် အရက်လေဝ်ပါဲ။
လၟုဟ်ယဝ်မံၚ်ဂြက် နရက်ဗၠးပၠန်၊
အရက်ယဝ်ဝေၚ်ပါ အန္တရာယ်ဟွံထုဲၜန်။

၄၈၆။ လေပ်တုဲလ္ပဗၠေတ် စိုတ်ၚေတ်ဂှ်ကြာတ်ထောံ။
လေပ်တုဲယဝ်ဗၠေတ် ကျာ်ဝေတ်လေဝ်ဟွံလောဲ၊
စိုတ်ၚေတ်ယဝ်ဟွံကြာတ် ဒးညာတ်ဒဒိုက်ဘဲ။

၄၈၇။ လေပ်တုဲလ္ပသၠုၚ် အေၚ်ဒုၚ်တုဲလ္ပထေဲ။
လေပ်တုဲသၠုၚ် ညံၚ်ပညုၚ်ထ္ၜးနရက်ပြိုတ်၊
အေၚ်တုဲကလေၚ်ထေဲမံၚ် တုပ်ညံၚ်ဟွံမာန်စိုတ်။

၄၈၈။ လညာတ်ကဵုဒှ်မ္ၚဵု ဇၟာပ်ဆဵုကဵုဒှ်ဖိုလ်။
လညာတ်ယဝ်ဒှ်မ္ၚဵု ကမၠောန်ဆဆဵုဟွံသ္ပ၊
ဇၟာပ်ဆဵုယဝ်ဒှ်ဖိုလ် ဇၞော်မောဝ်တွဵုရ။

၄၈၉။ လေပ်တုဲလ္ပစၞာဲ ဝေၚ်ပါဲညိပွယုတ်။
လေပ်တုဲယဝ်စၞာဲ ဂွံဗၠးအပါဲဝါတ်၊
ပွယုတ်ယဝ်ဟွံပါဲ ဓရ်ဆာဲဟွံညာတ်။

၄၉၀။ လ္ပချပ်ကြာန် လ္ပဆာန်ပြဟ်။
ယဝ်ချပ်ကြာန် ဘဲကြာန်ဒးညာတ်၊
ယဝ်ဆာန်ပြဟ် ကြဴဒးဒှ်ဝါတ်။

၄၉၁။ လ္ပဗျိပြဟ် လ္ပဒှ်သၞ။
ယဝ်ဗျိပြဟ် ဒှ်မၞိဟ်ချပ်ဗ္စာဟွံမဲ၊
ယဝ်ဒှ်သၞ ဆလအ်မှတသိုက်ဟွံမဲ။

၄၉၂။ လ္ပဟီုသီုဒေါသ လ္ပသ္ပဆဆဵု။
ယဝ်ဟီုသီုဒေါသ ဝဲသၞဒှ်ဂၠိုၚ်၊
ယဝ်သ္ပဆဆဵု ဒှ်မၞိဟ်ရုန်မဵုရိုၚ်ဇိုၚ်။

၄၉၃။ လ္ပဂၠာဲဟီုဒုဟ် လ္ပဍုဟ်မံၚ်တွဵု။
ယဝ်ဂၠာဲဟီုဒဟ် ညးဍုဟ်လောဲသွာ၊
ယဝ်ဍုဟ်မံၚ်တွဵု ဒတုဲဖဵုဒးဟုတ်အာ။

၄၉၄။ လ္ပဆာန်လောဲ လ္စစောဲစပ်ဂၠိုၚ်။
ယဝ်ဆာန်လောဲ ဒဒိုက်ဘဲဒးညာတ်၊
ယဝ်စောဲစပ်ဂၠိုၚ် ပခိုၚ်စိုတ်ဝါတ်။

၄၉၅။ လ္ပဇြိုၚ်ဒၟံၚ်စိုတ် လ္ပအိုတ်ဒၟံၚ်ဇြဟတ်။
ယဝ်ဇြိုၚ်စိုတ် ကၠောန်အိုတ်ဟွံလောဲ၊
ယဝ်အိုတ်ဒၟံၚ်ဇြဟတ် ဍိုန်ၜတ်ဒှ်ယဲ။

၄၉၆။ လညာတ်လေဝ်ကဵုဂၠိၚ် ထေဲလေဝ်ထိၚ်လဝ်။
လညာတ်ယဝ်ဂၠိၚ် ဟွံဒးဂွိၚ်စဴၚ်တဴ၊
ထေဲမွဲယဝ်ထိၚ် ဟွံဒှ်သၟိၚ်လေဝ်ဍိုပ်ဍဴ။

၄၉၇။ လ္ပဒဒှ်ေလောန် လ္ပဒေါန်ပြဟ်။
ယဝ်ဒဒှ်ေလောန် အောန်ဂါရဝ၊
ယဝ်ဒေါန်ပြဟာ မှာဂှ်ဒးထဗ။

၄၉၈။ လ္ပဝိုတ်ဂုဏ်ယာဲ လ္ပဗက်ဂၠာဲဒုဟ်။
ယဝ်ဝိုတ်ဂုဏ်ယာဲ အပါဲဟွံဗၠး၊
ယဝ်ဗက်ဂၠာဲဒုဟ် ဘဝလၟုဟ်ဒးဒုၚ်ထဗး။

၄၉၉။ လေပ်တုဲလ္ပဗၠေတ် ဒဂေတ်ခိုဟ်လ္ပကၠဟ်။
လေပ်တုဲယဝ်ဗၠေတ် သမၠီုဇေတ်ဟွံဂေါဝ်၊
ဒ္ဂေတ်ခိုဟ်ယဝ်ကၠဟ် မၞိဟ်ဂှ်ဟွံဇၞော်မောဝ်။

၅၀၀။ လတူဘာလ္ပချဟ်စုတ် ပွမုတ်လ္ပကၠောန်။
လတူဘာချဟ်စုတ် ဒှ်ခဒုတ်ဇၞော်၊
ယဝ်ကၠောန်ပွမုတ် ဒးယုတ်သဝ်ရ။

၅၀၁။ လ္ပပတှ်ေကလော် လ္ပဆော်အဆဴ။
ယဝ်ပတှ်ေကလော် ဗၠေတ်ကလော်ရပ်စဏောဝ်၊
ယဝ်ဆော်ဆဴ ဒးဒုၚ်အဆဴဂိဏောဝ်။

၅၀၂။ လ္ပဟီုဂၠိုၚ် လ္ပကျိုၚ်ဆဆဵု။
ယဝ်ဟီုဂၠိုၚ် ညးဂမၠိုၚ်ဟွံပတှ်ေ၊
ယဝ်ကျိုၚ်ဆဆဵု ညးဆဵုဂြိုၚ်ဒး။

၅၀၃။ လ္ပကလိၚ်ဂုဏ်ယာဲတ မၞိဟ်တၠဂုဏ်လ္ပထေဲ။
ယဝ်တၠိၚ်ဂုဏ်ယာဲတ ဒးကျဘဝပြဲ၊
ယဝ်ထေဲကဵုမၞိဟ်တၠဂုဏ် ဒဒိုက်ရုန်မဵုဆဵုလောဲ။

၅၀၄။ လ္ပတက်ဗြဴ လ္ပလဴဒုဟ်ကောန်။
ယဝ်တက်ဗြဴမ္ဂး ကျာ်သြဳဒးပၠိုတ်၊
ယဝ်လဴဒုဟ်ကောန် ၚုဟ်မးအောန်အိုတ်။

၅၀၅။ လ္ပမံၚ်ဗီုကၟာတ် လ္ပကာတ်ဗီုအရက်။
ယဝ်မံၚ်ဗီုကၟာတ် ဟွံညာတ်တသိုက်ပြဲ၊
ယဝ်ကာတ်ဗီုအရက် ဗၠးနရက်ဟွံလောဲ။

၅၀၆။ လွဳလေဝ်ကဵုပေၚ် ပွလေၚ်လေဝ်ဝေၚ်ပါြ
လွဳယဝ်ပေၚ်မ္ဂး ဂွံအံၚ်ဇၞးမာန်၊
ဒ္ဂေတ်လေဝ်ယဝ်ပါဲ ဂွံဆာဲဇၟာပ်ဌာန်။

၅၀၇။ လ္ပဟီုဆဆဵု ရုန်မဵုလ္ပဂး။
ယဝ်ဟီုဆဆဵု ဟွံဒှ်မ္ၚဵုကျာ်သြဳ၊
ရုန်မဵုယဝ်ဟီု ဒှ်သမၠီုခါခၞဳ။

၅၀၈။ လ္ပကဵုလောဲ လ္ပထေၚ်သောဲဂြိုက်။
ယဝ်ကဵုလောဲ မွဲတ္ၚဲကေတ်ဝါတ်၊
ယဝ်ထေၚ်သောဲဂြိုက် တသိုက်စိုတ်ဒှ်ဝါတ်။

၅၀၉။ လညာတ်လ္ပဍန် ခါဖန်လ္ပဗၠေတ်။
လညာတ်ယဝ်ဍန် ဇၟာပ်တန်ဒးလေၚ်၊
ခါဖန်ယဝ်ဗၠေတ် မၞိဟ်ကေတ်စလေဝ်လေၚ်။

၅၁၀။ လေပ်တုဲလ္ပမှာ ဒှ်အ္စာတုဲလ္ပသၠုၚ်။
လေပ်တုဲယဝ်မှာ ဂၠာဲအ္စာဟွံလောဲ၊
ဒှ်အ္စာတုဲယဝ်သၠုၚ် ကွးအေၚ်ဒုၚ်ဟွံမဲ။

၅၁၁။ လ္ပတေၚ်ပြဟ် လ္ပဒှ်ကြာန်။
ယဝ်တေၚ်ပြဟ် ဒှ်လလေၚ်မာန်၊
ယဝ်ဒှ်ကြာန်မ္ဂး ဒးဒဴနူကွာန်။

၅၁၂။ လွဳလေဝ်ဒးနွံညာဏ် ဂလာန်လေဝ်ဒးချိၚ်ဆ။
လွဳသီုညာဏ် ပိုန်ဟာန်ဒှ်လောဲ၊
ဟီုဂလာန်သီုချိၚ်ဆ ဂွံဗၠးသၞဝဲ။

၅၁၃။ လ္ပဗက်အလိုက်ကောန် လ္ပဒေါန်ဂၠိုၚ်။
ဗဝ်ဗက်အလိုက်ကောန် ကြဴဗတောန်ဝါတ်၊
ယဝ်ဒေါန်ဂၠိုၚ် အတိုၚ်ဟီုဟွံဒှ်ကျာတ်။

၅၁၄။ လိက်မန်ဂှ်ဗတောန် ဝၚ်မန်ဂှ်ထ္ၜး။
လိက်မန်ယဝ်ဗတောန် ကောန်မန်ပြာကတ်၊
ဝၚ်မန်ယဝ်ထ္ၜး စိုတ်ကၠးဆီခတ်။

၅၁၅။ လညာတ်ကဵုတပ် ကသပ်ကဵုပြဲ၊
ယဝ်ညာတ်တပ် ဂွံဒြပ်လောဲလောဲ၊
ယဝ်ကသပ်ပြဲ ဟွံမဲသၞဝဲ။

၅၁၆။ လ္ပဇြိုၚ်စိုတ် လ္ပအိုတ်ဇြဟတ်။
ယဝ်ဇြိုၚ်စိုတ် ကမၠောန်အိုတ်ဟွံလောဲ၊
ယဝ်အိုတ်ဇြဟတ် ဝဳဝတ်ဟွံလောဲ။

၅၁၇။ လ္ပဍောၚ်ၜိုတ် လ္ပအိုတ်ဇြဟတ်။
ယဝ်ဍောၚ်ၜိုတ် ယဲစိုတ်ဒှ်လောဲ၊
ယဝ်အိုတ်ဇြဟတ် စိုတ်ၜတ်ဒှ်ယဲ။

၅၁၈။ လ္ပထေဲလောန် လ္ပထညောန်ဂၠိုၚ်။
ယဝ်ထေဲလောန် ကမၠောန်လီုအိုတ်၊
ယဝ်ထညောန်ဂၠိုၚ် နာံမြိုၚ်ဟုတ်အိုတ်။

၅၁၉။ လ္ပကဟောန် လ္ပထညောန်။
ယဝ်ကဟောန် ဖိုလ်အောန်ဒုဟ်ဂၠိုၚ်၊
ယဝ်ထညောန် မိတ်အောန်သၞဂၠိုၚ်။

၅၂၀။ လ္ပရိုၚ်ရိ လ္ပဗျိပြဟ်။
ယဝ်ရိုၚ်ရိ ဟွံဗၠးဗျိညး၊
ယဝ်ဗျိပြဟ် ဒးဒှ်က္ဍုဟ်ညး။

၅၂၁။ လိက်ဗဟ်ဂှ်လ္ၚတ် နမတ်ဂှ်လွဳ။
လိက်ဗဟ်ဂှ်လ္ၚတ်မှ ဍာံပြဇၞော်မောဝ်လောဲ၊
နမတ်လွဳမှ သံသယဗၠးလောဲ။

၅၂၂။ လညာတ်လ္ပဍန် ဖန်လ္ပဗၠေတ်။
ယဝ်လညာတ်ဍန် ဂကူကၠေံဗဒန်အိုတ်၊
ယဝ်ဖန်ဗၠေတ်မ္ဂး ဂကူဒးဗၠိုက်အိုတ်။

၅၂၃။ လေပ်တုဲကဵုဒှ်ဂုဏ် ဂိုတ်ရုန်ကဵုဒှ်ဖိုလ်။
လေပ်တုဲဟွံဒှ်ဂုဏ် မၞိဟ်ရုန်မဵုညးကော်၊
ဂိုတ်ရုန်တုဲဟွံဒှ်ဖဵု ဂကူကၠဵုညးကော်။

၅၂၄။ လညာတ်ခိုဟ်ဂှ်ဂၠာဲ ကသပ်စၞာဲဂှ်ပါဲ။
လညာတ်ခိုဟ်ဂၠာဲမှ ဘာသာဆာဲမာန်၊
ကသပ်စၞာဲပါဲမှ ညးသ္ပဇၞော်မာန်။

၅၂၅။ လ္ပကြံကြ လ္ပယျဵုလောန်။
ယဝ်ကြံကြ မသဟွံမဲ၊
ယဝ်ယျဵုလောန် ကောန်ဇာတ်သ္ပရဲ။

၅၂၆။ လ္ပယျဵုဂၠိုၚ် လ္ပရိုၚ်လောန်။
ယဝ်ယျဵုဂၠိုၚ် ညးဂြိုၚ်သ္ပပရအ်၊
ယဝ်ရိုၚ်လောန် ဂျိအောန်အဝဵုယအ်။

၅၂၇။ လွဳလ္ပကြဳ အိန်ရဳလ္ပကၠဟ်။
လွဳယဝ်ကြဳ ပါရမဳဟွံပေၚ်၊
ယဝ်ကၠဟ်အိန်ရဳ ကျာ်သြဳဒးလေၚ်။

၅၂၇။ လ္ပဗက်မုက် လ္ပကဟုက်ဂၠိုၚ်။
ယဝ်ဗက်မုက် သၞစုက်ဒှ်ဝဲ၊
ယဝ်ကဟုက်ဂၠိုၚ် နာံမြိုၚ်ဟွံမဲ။

၅၂၉။ လၟုဟ်လေဝ်ရံၚ် လ္ပာ်ဂၠံၚ်ဂတလေဝ်ကျောဝ်။
လၟုဟ်ယဝ်ဟွံရံၚ် ဂံၚ်ယုတ်ဂံၚ်စၞာဲ၊
ဂၠံၚ်ဂတယဝ်ဟွံကျောဝ် ဟွံဂေါဝ်ဟွံဆာဲ။

၅၃၀။ လ္ပတၠိၚ်အ္စာ လ္ပမှာကွေတ်။
ယဝ်တၠိၚ်အ္စာ သံသာဂၠိၚ်သ္ၚောဲ၊
ယဝ်မှာကွေတ် ဒဒိုက်ဇေတ်ဒှ်လောဲ။

၅၃၁။ လ္ပပလီုဘဝ လ္ပဂွဂြိုက်။
ယဝ်ပလီုဘဝ ထဗဒဒိုက်ပြဟ်၊
ယဝ်ဂွဂြိုက် တသိုက်ဟွံဒှ်။

၅၃၂။ လပပၠေၚ် လပဝေၚ်။
ယဝ်ပၠေၚ် ဒးလေၚ်ဒိုက်၊
ယဝ်ဝေၚ် ဒြပ်လေၚ်ဆဵုဒဒိုက်။

၅၃၄။ လ္ပဂၠေံဂၠိုၚ် လ္ပကျိုၚ်ဖအိုတ်။
ယဝ်ဂၠေံဂၠိုၚ် ညးဂလိုၚ်က္ဍုဟ်ဏောၚ်၊
ယဝ်ကျိုၚ်ဖအိုတ် စဵုချိုတ်ဟွံဇၞော်မောဝ်။

၅၃၅။ လ္ပဖေက်ကမၠောန် လ္ပလောန်ဗၞတ်။
ယဝ်ဖေက်ကမၠောန် ဟွံစောန်တွဵုရ၊
ယဝ်လောန်ဗၞတ် ဟွံဒးမတ်ညးရ။

၅၃၆။ လ္ပါဲကမၠောန် လ္ပအောန်စိုတ်။
ယဝ်ပါဲကမၠောန် ဒှ်ကောန်သၟိၚ်လၞုဟ်၊
ယဝ်အောန်ဒၟံၚ်စိုတ် ဒှ်ဟိုတ်လေၚ်လၟုဟ်။

၅၃၇။ လျိုၚ်ဂှ်လ္ပကၠဟ် ဂတဟ်ဂှ်လ္ပစွံ။
လျိုၚ်ယဝ်ကၠဟ်မ္ဂး ၚုဟ်မးဟုတ်စှ်ေ၊
ဂတဟ်ယဝ်စွံမ္ဂး ဟွံဗၠးက္ဍုဟ်ညး။

၅၃၈။ လၟုဟ်ကၠိုဟ်မှ ဂတဗစာမှ။
လၟုဟ်ကၠိုဟ်မှ ကၠောန်အံၚ်ဇၞး၊
ဂတဗစာမှ ချိၚ်ဆကၠောန်ဒး။

၅၃၉။ လောဲသၟးပညာတ် ဝါတ်သၟးပဆဵု။
လောဲသၟးယဝ်ညာတ် လညာတ်ဟွံဇြိုဟ်နက်၊
ဝါတ်သၟးယဝ်ဆဵု ဇၟာပ်ဆဵုဍန်ဂြက်။

၅၄၀။ လညာတ်ပဗၠေၚ် အထေၚ်ပသဝ်။
လညာတ်ဗၠေၚ်မဂး ပြးဇးလောဲ၊
အထေၚ်သဝ်မဂး ဟွံဗၠးသၞဝဲ။

၅၄၁။ လေပ်ဂှ်ကၠောန်ကၠာ မှာဂှ်ချပ်ဗစာ။
လေပ်ကၠောန်ကၠာမဂး အံၚ်ဇၞးလောဲ၊
မှာချပ်ဗစာမဂး ဟွံဒးစုတ်စောဲ။

၅၄၂။ လျိုၚ်ကဵုပေၚ် အေၚ်ကဵုမာန်။
လျိုၚ်ဟွံပေၚ် ဒးလေၚ်ဇၟာပ်ဌာန်၊
အေၚ်ဟွံမာန်ဂှ် ဍေံဂၠာဲဒှ်ကြာန်။

၅၄၃။ လပထေၚ်သောဲ လပစောဲစပ်။
ယဝ်ထေၚ်သောဲ လောဲသွာလီုလာ်၊
ယဝ်စောဲစပ် ၜိုန်တပ်ဟွံကွာ်။

၅၄၄။ လေပ်တုဲကေတ် ဗၠေတ်တုဲပလေဝ်။
လေပ်တုဲဟွံကေတ် ဒှ်ကွေတ်သမၠီု၊
ဗၠေတ်တုဲဟွံပလေဝ် ဂၠံၚ်ကျေဝ်ပဟီု။

၅၄၅။ လပထေၚ်သောဲကမၠောန် လပစောန်စိုတ်ညး။
ထေၚ်သောဲကမၠောန် ကၠောန်ဟွံဇၞော်မောဝ်၊
စောန်စိုတ်ကဵုညး မုက်ဟွံယးဂေါဝ်။

၅၄၆။ လညာတ်ကဵုတပ် ကသပ်ကဵုပြဲ။
လညာတ်ဟွံတပ် ဆက်စပ်သၞဝဲ၊
ကသပ်ဟွံပြဲ မွဲတ္ၚဲညာတ်ဘဲ။ ။

ဝ

၅၄၇။ ဝေတ်စိုတ်လ္ပလၞုဟ် ညာတ်ဒုဟ်ကဵုဖေက်။
ဝေတ်စိုတ်ယဝ်လၞုဟ် ဘဝလၟုဟ်လေဝ်ဟွံဆာဲ၊
ညာတ်ဒုဟ်ယဝ်ဟွံဖေက် သဳဒေက်ဒးစိုပ်အပါဲ။

၅၄၈။ ဝေတ်မွဲကဵုတုဲဖအိုတ် စွံစိုတ်လေဝ်ကဵုညဳ။
ဝေတ်မွဲယဝ်တုဲဖအိုတ် ဍောၚ်စိုတ်ဟွံဒှ်၊
စွံစိုတ်ယဝ်ညဳ လွဳကွးဇၞော်မောဝ်ပြဟ်။

၅၄၉။ ဝေတ်လေဝ်လ္ပညှာ အခါမှဒုၚ်ဝန်။
ဝေတ်ယဝ်ဟွံညှာ ဒှ်အ္စာပြဲ၊
မှာယဝ်ဒုၚ်ဝန် ကောန်ကွးဟွံဒက်ဝဲ။

၅၅၀။ ဝါသၞာယုတ်ဂှ်ဝေၚ် ဂလာန်တၟေၚ်ဂှ်စၟတ်လဝ်။
ဝါသၞာယုတ်ယဝ်ဝေၚ် ဗွဲတၟေၚ်ဂွံပြာထာ၊
ဂလာန်တၟေၚ်ယဝ်စမတ် ဒှ်လ္ၚတ်တၠပညာ။

၅၅၁။ ဝါတ်လ္ပဍောၚ်စိုတ် ဒြပ်အိုတ်လ္ပကဟောမ်။
ဝါတ်ယဝ်ဍောၚ်စိုတ် ဒှ်ဟိုတ်ဟုတ်ယုတ်လောဲ၊
ဒြပ်အိုတ်ကဟောံ ဒှ်မၞိဟ်အစောမ်သတ္တိဟွံမဲ။

၅၅၂။ ဝဲသၞလ္ပဂလိုၚ် ပရိုၚ်ယုတ်လ္ပကလၚ်။
ဝဲသၞယဝ်ဂလိုၚ် ၜိုန်ဂျိုၚ်ဒၟံၚ်ဟွံပြဲ၊
ပရိုၚ်ယုတ်ယဝ်ကလၚ် မ္ဂးဟွံဗၠးညးထေၚ်သောဲ။

၅၅၃။ ဝေတ်မ္ဂးကဵုဒး ဍိုဟ်မ္ဂးကဵုခိုဟ်။
ယဝ်ဝေတ်ဟွံဒး ကွးဒးပြးဆာဲ၊
ဍိုဟ်တုဲယဝ်ဟွံခိုဟ် ဍိုဟ်ဂှ်ဍိုဟ်စၞာဲစၞာဲ။

၅၅၄။ ဝေါဟာလေဝ်ဒးကၠိုဟ် ပွခိုဟ်လေဝ်ဒးတီ။
ဝေါဟာဟွံကၠိုဟ် မၞိဟ်သၠိုဟ်ညးကော်၊
ပွခိုဟ်ဟွံတီ ဒးတၞီဗၠိုက်ဇၞော်။

၅၅၅။ ဝဲလပတၠိၚ် ထဝိၚ်လ္ပစွံ။
ယဝ်တလိၚ်ဝဲ တသိုက်ပြဲဟွံညာတ်၊
ယဝ်စွံထဝိၚ် လဟိၚ်စိုတ်ဒှ်ဝါတ်။

၅၅၆။ ဝါတ်ပဖေက် ဒေက်ပပၠေၚ်။
ယဝ်ဖေက်ဝါတ် လညာတ်ဍိုန်လျ၊
ဒေက်မံၚ်ယဝ်ပၠေၚ် ဟွံပေၚ်ဇၟာပ်ဘဝ။

၅၅၇။ ဝၚ်ပရေအ်ထလေတ် ဝၚ်ခိုဟ်ကေတ်။
ဝၚ်ပရေအ်ထလေတ်မှ ညးသပခိုဟ်မာန်၊
ဝၚ်ခိုဟ်ကေတ်မှ ညးသပဇၞော်မာန်။ ။

သ

၅၅၈။သ္ပမၞိဟ်လ္ပသၠး သ္ပကွးလ္ပစး။
သ္ပမၞိဟ်ယဝ်သၠး ဂွံယးတၟးဟွံလောဲ၊
သ္ပကွးယဝ်စး ဂွံစဳကၠးဟွံလောဲ။

၅၅၉။ သၟန်ပါၚ်လ္ပဂၠာန် ညးဆာန်လ္ပထေဲ။
သၟန်ပါၚ်ယဝ်ဂၠာန် ပိုန်ဟာန်လီုလာ်ပြဟ်၊
ညးဆာန်ယဝ်ထေဲ မေတ္တာညးအေဲကှ်။

၅၆၀။ သမၠီုလ္ပထိုၚ်သး ယုတ်လ္ပထ္ၜးဂၠံၚ်။
သမၠီုယဝ်ထိုၚ်သး ဂကောံပြးလောဲသွာ၊
ယုတ်ယဝ်ထ္ၜးဂၠံၚ် တုပ်ညံၚ်ကော်ဏာအပါဲ။

၅၆၁။ သ္ပအ္စာဒးအေၚ် ကေတ်ကၠေၚ်ဒးဗုတ်။
သ္ပအ္စာယဝ်ဟွံအေၚ် ဒးလေၚ်ဒိုက်ပြဟ်၊
ကေတ်ကၠေၚ်ဟွံဗုတ် ၜိုတ်ဓဝုတ်ခိုဟ်ကၠေၚ်ဟွံဒှ်။

၅၆၂။ သၞောဝ်ကဵုဂွံကၠိုဟ် စိုတ်ခိုဟ်ကဵုဂွံနွံ။
သၞောဝ်ဂှ်ယဝ်ကၠိုဟ် ဂွံခိုဟ်စမာန်၊
စိုတ်ခိုဟ်နွံမ္ဂး ဂွံဗၠးဒဒိုက်မာန်။

၅၆၃။ သတ္တိလ္ပကဵုဗျဟ်၊ လွဳဂှ်စွံၚုဟ်မး။
သတ္တိယဝ်ဟွံဗျဟ် ဂွံဒယှ်လောဲ၊
လွဳဂှ်ယဝ်စွံၚုဟ် ဓရ်လၞုဟ်ဒှ်ဟွံလောဲ။

၅၆၄။ သဒ္ဓါညးလ္ပပလီု ဇၟာပ်ဟီုလ္ပရုန်မဵု။
သဒ္ဓါညးယဝ်ပလီု ဒှ်သမၠီုယုတ်ကာဲ၊
ဇၟာပ်ဟီုယဝ်ရုန်မဵု ညးဆ၆ုညးဝေၚ်ပါဲ။

၅၆၅။ သဳလေဝ်ညံၚ်ဂွံတန် သြန်လေဝ်ညံၚ်ဂွံနွံ။
သဳယဝ်ဟွံတန် အပါဲပန်စိန်ဂၠက်၊
သြန်ယဝ်ဟွံမွဲ ရိုဟ်တ္ၚဲဒးဂြတ်။

၅၆၆။ သမၠီုလ္ပဆာန် ပိုန်ဟာန်လ္ပဂိုဟ်လောန်။
သမၠီုယဝ်ဆာန် ဒှ်ကြာန်ဇၟာပ်ဒၞာဲ၊
ပိုန်ဟာန်ဂိုဟ်လောန် ဒါန်အောန်စိုပ်အပါဲ။

၅၆၇။ သတိလေဝ်လ္ပအောန် ကမၠောန်လေဝ်ကဵုဒးရး။
သတိယဝ်အောန် ဒးအောန်မှာဂၠိုၚ်၊
ကမၠောန်ဟွံဒးရး ကြဴဒးစံၚ်တူဂၠိုၚ်။

၅၆၈။ သၠးကဵုလေပ် ဂိုၚ်ဒေပ်ကဵုချိုတ်ပၠိုတ်။
သၠးဟွံလေပ်မ္ဂး ၚုဟ်မးဟွံမဲ၊
ဂိုၚ်ဒေပ်ဟွံချိုတ်ပၠိုတ် ဂွံလဝ်အိုတ်လောဲ။

၅၆၉။သမၠီုထဴလ္ပကေတ် ညးဝေတ်လ္ပထေဲ။
သမၠီုထဴယဝ်ကေတ် တသိုက်ဇေတ်ဟောံဗြံၚ်၊
ညးဝေတ်ယဝ်ထေဲမ္ဂး ဟွံဒးကဵုဂၠံၚ်။

၅၇၀။ သိုက်လ္ပကြဵုဇဴ ဆာန်ဗြဴလ္ပကဵုစိုတ်။
သိုက်ယဝ်ကြဵုဇဴ ဒးဒဴနူကွာန်၊
ဆာန်ဗြဴယဝ်ကဵုစိုတ် ဍေံဒေပ်စိုတ်ဒှ်ဂွံမာန်။

၅၇၁။ သ္ပကွးဒးဒုၚ်ဝေတ် မၞိဟ်ဇေတ်ဟွံဒးဗတောန်။
သ္ပကွးဟွံဒုၚ်ဝေတ် ဓရ်ဒ္ဂေတ်ဟွံဍိုက်ပေၚ်၊
မၞိဟ်ဂှ်ယဝ်ဒးဒေါန် ဒှ်ကောန်မၞိသ်ဟွံသေၚ်။

၅၇၂။ သ္ပအ္စာလ္ပညှာ သ္ပဒကာလ္ပသအေတ်။
သ္ပအ္စာယဝ်ညှာ ဟွံပြာကဋ်ဒယှ်၊
သ္ပဒကာယဝ်သအေတ် ဒကာဇေတ်ဟွံဒှ်။

၅၇၃။ သိုက်လ္ပကြံကြ ဒိုက်လ္ပကရောတ်။
သိုက်ယဝ်ကြံကြ ဒှ်သၞလောဲ၊
ဒိုက်ယဝ်ကရောတ် စိုတ်ဍောတ်ဖိုလ်ဟွံမဲ။

၅၇၄။ သ္ပကုသိုလ်လ္ပချိၚ် အခိၚ်ခိုဟ်လ္ပဖအိုတ်။
သ္ပကုသိုလ်ယဝ်ချိၚ် ချိုတ်ဒးဂွိၚ်ပၠန်၊
အခိၚ်ခိုဟ်ယဝ်ဖအိုတ် ကြဴဒးဍောၚ်စိုတ်ဨကန်။

၅၇၅။ သၞောဝ်လပကဵုဗၠေတ် အ္စာဝေတ်လ္ပဂိ။
ယဝ်ဗၠေတ်နူသၞောဝ် ဂွံဇၞော်မောဝ်ဝါတ်၊
အ္စာဝေတ်ဂိမ္ဂး ကြဴဒးဆဵုကျာတ်။

၅၇၆။ သတိလ္ပပအ် လ္ပပၠအ်အခိၚ်။
ယဝ်သတိပအ် ဟွံလအ်ဒးလေၚ်၊
ယဝ်ပၠအ်အခိၚ် အတိုၚ်ချိၚ်ဟွံပေၚ်။

၅၇၇။ သတိလ္ပအောန် ကမၠောန်လ္ပမှာ။
ယဝ်သတိအောန် ဇၟာပ်ကမၠောန်လီုလောဲ၊
ယဝ်ကမၠောန်မှာ သံသာဂၠိၚ်သ္ၚောဲ။

၅၇၈။ သောၚ်သောၚ်ကၠောန်အာ မှာမှာပါဲထောံ။
ကၠောန်သောၚ်သောၚ်မှ ဗၠးလမောၚ်စိုတ်၊
မှာမှာပါဲမှ ဝဲသၞပၠိုတ်။

၅၇၉။ သွက်ဇကုလေဝ်ကဵုဒှ် သွက်ညးတၞဟ်လေဝ်ကဵုနွံ။
သွက်ဇကုယဝ်ဒှ် ဂွံမြဟ်မြဴလၟိုန်၊
သွက်ညးတၞဟ်ယဝ်နွံ ဇၟာပ်ဘုံဒယှ်လၟိုန်။

၅၈၀။ သီုမာနလ္ပပါ်ပါဲ သီုစၞာဲလ္ပကၠောန်။
သီုမာနယဝ်ပါ်ပါဲ အန္တရာယ်ကတဵုဒှ်၊
သီုစၞာဲယဝ်ကၠောန် ကမၠောန်လီုပြဟ်။

၅၈၁။ သွက်ဂကူလေဝ်ကၠောန် သွက်ကောန်လေဝ်စွံ။
သွက်ဂကူဟွံကၠောန် ဒှ်ကောန်သမၠီု၊
သွက်ကောန်ဟွံစွံမ္ဂး ဟွံဗၠးဗျိဟီု။

၅၈၂။ သဘဴမၞိဟ်တီမှ သတိနွံမှ။
သဘဴမၞိဟ်တီမှ ကၠောံဍဒှ်ဖဵု၊
သတိနွံမှ ဝိရဳယဒှ်ဖိုလ်။

၅၈၃။ သၟးသၟးလ္ပမံၚ် ယံၚ်ယံၚ်လ္ပဟီု။
သၟးသၟးယဝ်မံၚ် သၟးသၟးဒှ်ရ၊
ယံၚ်ယံၚ်ယဝ်ဟီု မိတ်လီုလာ်ရ။

၅၈၄။ သွက်ဇကုကဵုဒှ် သွက်ညးတၞဟ်ကဵုနွံ။
သွက်ဇကုဟွံဒှ် ဂွံမြဟ်မြဴအောန်၊
သွက်ညးတၞဟ်ဟွံနွံ ဘုံလဵုဟွံစောန်။

၅၈၆။ သစ္စကဵုဒှ်မာန် အဓိဌာန်ကဵုတပ်။
သစ္စဒှ်မာန် ၜိုတ်ဂစာန်ဒှ်ပရဲ၊
အဓိဌာန်ယဝ်တပ် တိုၚ်ချပ်ဒှ်လောဲ။

၅၈၇။ သွက်ညးလေဝ်မၚ်မွဲ သွက်အဲလေဝ်ကဵုဒှ်။
သွက်ညးမၚ်မွဲ မိတ်ပြဲဒှ်အာ၊
သွက်အဲယဝ်ဒှ် မိပ်မြဟ်လောဲသွာ။

၅၈၈။ သစ္စပစွံဇၟာပ်ဒၞါဲ ဇၟာပ်သဟာဲပပတှ်ေ။
သစ္စစွံဇၟာပ်ဒၞါဲ အန္တရာယ်ဒှ်လောဲ၊
ဇၟာပ်သဟာပတှ်ေ သၠေဟ်ပၟာဒှ်လောဲ။ ။

ဟ

၅၈၉။ ဟွံဒးလ္ပဗက်အလိုက် ဟွံကြိုက်လ္ပဂိုတ်ကျိုၚ်။
ဟွံဒးယဝ်ဗက်အလိုက် ဒဒိုက်ဒးဆဵုမာန်၊
ဟွံကြိုက်ယဝ်ဂိုတ်ကျိုၚ် ညးဂြိုၚ်ဒးသီုကွာန်။

၅၉၀။ ဟွံမာန်လ္ပစွံစိုတ် ဟွံချိုတ်လ္ပထေၚ်။
ဟွံမာန်ယဝ်စွံစိုတ် ဇြဟတ်အိုတ်ကၠောန်ကျာတ်။
ဟွံချိုတ်ယဝ်ထေၚ် ဂွံဝေၚ်ဒုစ္စရိုတ်ဝါတ်။

၅၉၁။ ဟွံတီမ္ဂးသၟာန် ဟွံဆာန်မ္ဂးလ္ပပံၚ်။
ဟွံတီယဝ်ဟွံသၟာန် ဂမြၚ်ညာဏ်ဓီုဓုဲ၊
ဟွံဆာန်ယဝ်ပံၚ် ဒှ်အိန်ထံၚ်ဂြုဲဂြုဲ။

၅၉၂။ ဟီုအရေဝ်အဲလ္ပပါ စကာလ္ပကဟုက်။
ဟီုအရေဝ်ယဝ်အဲပါ မေတ္တာညးလီု၊
စကာယဝ်ကဟုက် စိုတ်ယှုက်ကမၠောန်လီု။

၅၉၃။ ဟွံထေက်လ္ပရာန် ဟွံဆာန်လ္ပကေတ်။
ဟွံထေက်ယဝ်ရာန် ပိုန်ဟာန်လေၚ်အိုတ်၊
ဟွံဆာန်ယဝ်ကေတ် ကြဴဒးညေတ်စိုတ်။

၅၉၄။ ဟီုလေဝ်ကဵု၁ာမ်ပြ ဝဲသၞလေဝ်ထပိုတ်။
ယဝ်ဟီုဍာမ်ပြ ကာယဟွံဍောၚ်၊
ဝဲသၞယဝ်ထပိုတ် ဂွံချိုတ်သောၚ်သောၚ်။

၅၉၅။ ဟီုလေဝ်ကဵုညှာ မေတ္တာလေဝ်ကဵုနွံ။
ဟီုယဝ်ဟွံညှာ ၜိုန်ဒှ်အ္စာလေဝ်ဒးဆဵုဝါတ်၊
မေတ္တာယဝ်ဟွံမဲ ၜိုန်ကၠဵုမွဲလေဝ်ဟွံဂံၚ်ကါတ်။

၅၉၆။ ဟီုဒးချိၚ်ဆ ဟွံလေပ်လ္ပသ္ပအ္စာ။
ယဝ်ဟီုဟွံချိၚ်ဆ ဒှ်ဝဲသၞဂိ၊
ဟွံလေပ်ယဝ်သ္ပအ်အ္စာ ဗၠေတ်မှာညးဗျိ။

၅၉၇။ ဟီုဂလာန်ကဵုဗိုန်ဇၟအ် ပအ်ပအ်လ္ပမံၚ်။
ဟီုဂလာန်ဟွံဗိုန်ဇၟအ် ဆလအ်ညးဟွံပတှ်ေ၊
ပအ်ပအ်ယဝ်မံၚ် အရာဂၠံၚ်ဒးယုတ်ကွေံ။

၅၉၈။ ဟွံညဳမ္ဂးလ္ပကၠောန် ဟွံစောန်မ္ဂးလ္ပကြီု။
ဟွံညဳယဝ်ကၠောန် ကမၠောန်ဂှ်ဟွံတန်လအ်၊
ဟွံစောန်ယဝ်ကြီု ၜိုတ်ဟီုဒှ်ပကရအ်။

၅၉၉။ ဟွံခိုဟ်လ္ပကေတ် ဟွံဗၠေတ်လ္ပစး။
ဟွံခိုဟ်ယဝ်ကေတ် ဒှ်ကွေတ်သမၠီု၊
ဟွံဗၠေတ်ယဝ်စး ဟွံကၠးမၞိဟ်ဓီုၜီု။

၆၀၀။ ဟွံကၠးလ္ပသ္ပအ္စာ တီမှာလ္ပကေတ်။
ဟွံကၠးယဝ်သ္ပအ္စာ အခါလဵုဟွံဂီုကၠီု၊
တီမှာယဝ်ကေတ် ဒှ်ဒ္ဂေတ်သမၠီု။

၆၀၁။ ဟွံချိုတ်ပၠိုတ်လ္ပစကာ ဟွံချပ်ဗ္စာလ္ပဖန်ဖက်။
ဟွံချိုတ်ပၠိုတ်ယဝ်စကာ အခါလဵုဟွံရာၚ်ဆာဲ၊
ဟွံချပ်ဗ္စာယဝ်ဖန်ဖက် ဒးခက်ခုဲဒၟံၚ်ဇၟာပ်ဒၞာဲ။

၆၀၂။ ဟွံဒးလ္ပစရ၊ မၞိဟ်စၞာဲဆလအ်လ္ပပံၚ်။
ဟွံဒးယဝ်စပၠန် ဨကန်ဒးယဲ၊
မၞိဟ်စၞာဲယဝ်ပံၚ် လ္ပာ်ဂၠံၚ်ခိုဟ်ဟွံမဲ။

၆၀၃။ ဟွံခိုဟ်လ္ပကၠောန်စုတ်၊ ဂလာန်မုတ်လ္ပဟီုညိ။
ဟွံခိုဟ်ယဝ်ကၠောန်စုတ် မၞိဟ်ယုတ်ညးကော်ခဴ၊
ဂလာန်မုတ်ယဝ်ဟီုမ္ဂး ကြဴဒးစံၚ်တူ။

၆၀၄။ ဟီုသီုမေတ္တာ၊ ကၠောန်သီုစေတနာ။
ယဝ်ဟီုသီုမေတ္တာ တၠပညာဒးထိုၚ်သး၊
ယဝ်ကၠောန်သီုစေတနာ ဂွံပြာထာတၟး။

၆၀၅။ ဟီုကဵုဍာံပြ၊ မံၚ်လ္ပရုန်မဵု။
ယဝ်ဟီုဍာံပြ ဆဆဵုဟွံဒှ်တွဵု၊
ယဝ်မံၚ်ဟွံရုန်မဵု ဒှ်မ္ၚဵုနွံဖဵု။

၆၀၆။ ဟွံသၟာန်လ္ပဟီု၊ ဟွံစမ်ၜတ်လ္ပကေတ်။
ဟွံသၟာန်ယဝ်ဟီု ဒှ်သမၠီုဒယှ်၊
ဟွံစမ်ၜတ်ယဝ်ကေတ် ဒဒိုက်ဇေတ်ဆဵုဒှ်။

၆၀၇။ ဟီုသာသာ၊ ကွာ်အာသိုက်သိုက်။
ယဝ်ဟီုသာသာ မေတ္တာလအ်လီု၊
ယဝ်ကွာ်သိုက်သိုက် ကျာ်သြဳဟွံလီု။

၆၀၈။ ဟွံရံၚ်ကိုန်လ္ပအာ၊ ဟွံရံၚ်အခါလ္ပကၠုၚ်။
ဟွံရံၚ်ကိုန်ယဝ်အာ ဒးမှာဒးၚုၚ်၊
ဟွံရံၚ်အခါယဝ်ကၠုၚ် ဒးဒုၚ်တက်ၜုၚ်။

၆၀၉။ ဟီုအရေဝ်လ္ပခဠပ်၊ အခါပ်ချပ်လ္ပဃရက်။
ဟီုအရေဝ်ယဝ်ခဠပ် ဒးလေၚ်ဒြပ်မာန်၊
ယဝ်ချပ်ခရက် ကသပ်ဇြိုဟ်နက်ဒှ်ဟွံမာန်။

၆၁၀။ ဟွံသၟာန်မ္ဂးလ်ပသှ်၊ ဟွံဒှ်မ္ဂးလ္ပဟီု။
ဟွံသၟာန်ယဝ်သှ် သွဟ်ဂှ်ဟွံမဲၚုဟ်၊
ဟွံဒှ်ယဝ်ဟီု ဒှ်သမၠီုရိပၞဟ်။

၆၁၁။ ဟွံတီလ္ပပံၚ်၊ ဟွံရံၚ်လ္ပကော်။
ဟွံတီယဝ်ပံၚ် ကြဴစံၚ်တူဒှ်မာန်၊
ဟွံရံၚ်ယဝ်ကော် ဘဲဇၞော်ဒှ်မာန်။

၆၁၂။ ဟွံမဲလေဝ်လ္ပစံၚ်၊ နွံမံၚ်လေဝ်လ္ပဏှဟ်။
ဟွံမဲယဝ်စံၚ် လ္ပာ်ဂၠံၚ်ခိုဟ်ညာတ်ဟွံမာန်၊
နွံမံၚ်ယဝ်ဏှဟ် ညးတၞဟ်က္ဍုဟ်သီုကွာန်။

၆၁၃။ ဟွံသၟာန်လ္ပသ္ပ၊ ဟွံတီလ္ပဒေါန်။
ဟွံသၟာန်ယဝ်သ္ပ ဒှ်ပွခိုဟ်ဟွံသေၚ်၊
ဟွံတီယဝ်ဒေါန် ဒှ်ကမၠောန်သမၠီုဟေၚ်။

၆၁၄။ ဟွံဆေၚ်လ္ပဟီု၊ သမၠီုလ္ပဝေတ်။
ဟွံဆေၚ်ယဝ်ဟီု မိတ်လီုဒှ်ဂွံ၊
ယဝ်ဝေတ်သမၠီု စိုတ်လီုဒှ်ဂွံ။

၆၁၅။ ဟွံကေတ်လ္ပစး၊ ဟွံထ္ၜးလ္ပဟီု။
ဟွံကေတ်ယဝ်စး မံၚ်သၟးဒးပျဲ၊
ဟွံထ္ၜးယဝ်ဟီု ဒှ်သမၠီုကျောဲကျောဲ။

၆၁၆။ ဟိုတ်ပရေံဂှ်ကဵုညာတ်၊ ဟိုတ်ဝါတ်ဂှ်ကဵုဆဵု။
ဟိုတ်ပရေံယဝ်ညာတ် စိုတ်ဓါတ်မ္ၚိုဟ်ပြဲ၊
ဟိုတ်ဝါတ်ယဝ်ဆဵု မာနဍဵုလောဲ။

၆၁၇။ ဟွံထေက်မ္ဂးလ္ပဂြဟ်၊ ဟွံဒှ်မ္ဂးလ္ပဟီု။
ဟွံထေက်ယဝ်ဂြဟ် မၞိဟ်ဂှ်ဟွံမှး၊
ဟွံဒှ်ယဝ်ဟီု သမၠီုညးဂး ။

၆၁၈။ ဟွံတီဂှ်လ္ပဖေၚ်ခိုဟ်၊ ဟွံဍိုဟ်ဂှ်လ္ပထေၚ်သာ။
ဟွံတီယဝ်ထေၚ်ခိုဟ် မၞိဟ်သၠိုဟ်ညးကော်၊
ဟွံဍိုဟ်ယဝ်ထေၚ်သာ အရာဝိုက်ဇၞော်။

၆၁၉။ ဟိုတ်ဂွံဒိုက်ဂှ်ဂၠာဲ၊ ဟိုတ်ဂွံဆာဲဂှ်ဂစာန်။
ဟိုတ်ဂှ်ဒိုက်ယဝ်ဂၠာဲ ဝေၚ်ဝါဲလေပ်ဒှ်ဖဵု၊
ဟိုတ်ဆာဲဂှ်ယဝ်ဂစာန်မ္ဂး ဒှ်ၚုဟ်မးနွံဖဵု။

၆၂၀။ ဟွံဗိုန်ဂှ်ကဵုကၠိုဟ်၊ ဟွံခိုဟ်ဂှ်ကဵုတီ။
ဟွံဗိုန်ယဝ်ကၠိုဟ် စိုတ်ခိုဟ်ဒှ်လောဲ၊
ဟွံခိုဟ်ယဝ်တီ ဟွံဒးတၞီဗၠိုက်မွဲ။

၆၂၁။ ဟလအ်ဂွံချိုတ်လွဳ၊ ဟလအ်ဂွံညဳဂှ်အေၚ်။
ဟွံလွဳမ္ဂး ဒးဒှ်ဒဒိုက်စဵုချိုတ်၊
ဟွံအေၚ်မ္ဂး ၜါလွးဒှ်အိုတ်။

၆၂၂။ ဟွံသိုက်လ္ပဒေါံ၊ ဟွံဂွံလ္ပစဴ။
ဟွံသိုက်ယဝ်ဒေါံမ္ဂး ဟွံဗၠးဒဒိုက်၊
ဟွံဂွံယဝ်စဴ ဗွဲကြဴဒးကလေၚ်ကွာ်။

၆၂၃။ ဟိုတ်နူပုၚ်လ္ပလီု၊ ဟိုတ်နူလမျီုလ္ပယုတ်။
ဟိုတ်နူပုၚ်ယဝ်လီု ဒဒိုက်ဇီုဒး၊
ဟိုတ်နူလမျီုယဝ်ယုတ် ဗျိပၠုတ်ညးဟွံဗၠး။

၆၂၄။ ဟွံဒးလ္ပကေတ်၊ ဟွံဗၠေတ်လ္ပထေဲ။
ဟွံဒးယဝ်ကေတ် ဒှ်ဒ္ဂေတ်သမၠီု၊
ဟွံဗၠေတ်ယဝ်ထေဲမ္ဂး ဟွံဗၠးညးဗျိဟီု။

၆၂၅။ ဟွံဆေၚ်လ္ပယှုက်၊ ဟွံစုက်လ္ပဟီု။
ဟွံဆေၚ်ယဝ်ယှုက် ညးကဟုက်ဒှ်သၞ၊
ဟွံစုတ်ယဝ်ဟီု သမၠီုဒှ်ရ။

၆၂၇။ ဟွံခိုဟ်လ္ပဆက်၊ ဝိပက်လ္ပဂလိုၚ်။
ဟွံခိုဟ်ယဝ်ဆက် ဂုဏ်ကြက်ဟွံမဲ၊
ဝိပက်ယဝ်ဂလိုၚ် ဝဲဂၠိုၚ်ရိုဟ်တ္ၚဲ။

၆၂၇။ ဟိုတ်ကဵုကၠိုဟ် ဖဵုခိုဟ်ကဵုတီ။

ဟိုတ်ကၠိုဟ်မဂး ဂွံဗၠးဒဒိုက်၊
ဖဵုခိုဟ်တီမဂး ဟွံဒးတၞီဗၠိုက်။ ။

ဠ

၆၂၈။ ဠကၠောန်ကဵုချိုတ်ပၠိုတ်၊ ဠချိုတ်ကဵုဒှ်မ္ၚဵု။
ဠကၠောန်ယဝ်ဟွံချိုတ်ပၠိုတ် ဒြပ်အိုတ်တမ်ဟောမ်၊
ဠချိုတ်မ္ၚဵုဟွံမဲ ဘဝပြဲဒးဟောမ်ဗြံ။

၆၂၉။ ဠသောၚ်ကဵုဒှ်ဖိုလ်၊ ဠသၠးကဵုဒှ်ဂုဏ်။
ဠသောၚ်ကဵုဒှ်ဖဵု တ္ၚဲလဵုလေဝ်ဟွံဇၞော်မောဝ်၊
ဠသၠးဂုဏ်ဟွံဒှ် တုပ်သၟဟ်ပၠေၚ်ဒြပ်ဏောဝ်။

၆၃၀။ ဠတီတှ်ေကဵုဍိုဟ်၊ ဠခိုဟ်တှ်ေကဵုတီဂုဏ်။
ဠတီယဝ်ဟွံဍိုဟ် ဒှ်မၞိဟ်ခိုဟ်ဟွံသေၚ်၊
ဠခိုဟ်ဟွံတီဂုဏ် ဒှ်မၞိဟ်ရုန်မဵုဟေၚ်။ ။

ၜ

၆၃၁။ ၜိုတ်ဂွံၜိုတ်ကေတ်၊ ၜိုတ်ဗၠေတ်ၜိုတ်ဝေတ်။
ၜိုတ်ဂွံယဝ်ကေတ် ဒြပ်ဖကပုဇေတ်ဒှ်ဂၠိုၚ်၊
ၜိုတ်ဗၠေတ်ယဝ်ဝေတ် နွံဒ္ဂေတ်ခိုဟ်ဂၠိုၚ်။

၆၃၂။ ၜိုတ်ဂွံလ္ပစဖအိုတ်၊ ၜိုတ်စိုတ်ဒှ်လ္ပဟီု။
ၜိုတ်ဂွံယဝ်စဖအိုတ် ဒြပ်အိုတ်ဒးဝါတ်၊
ၜိုတ်စိုတ်ဒှ်ယဝ်ဟီု ဒှ်သမၠီုမတ်ဟွံညာတ်။

၆၃၃။ ၜိုတ်တီကေတ်ကဵုမာန်၊ ၜိုတ်ဆာန်ကဵုဒှ်ဖိုလ်။
ၜိုတ်တီယဝ်ကေတ်မာန် နိဗ္ဗာန်စိုပ်လောဲလောဲ၊
ၜိုတ်ဆာန်ယဝ်ဒှ်ဖိုလ် နွံကဵုဂုဏ်ပရဲ။

၆၃၄။ ၜိုတ်လေပ်ဂှ်ဟီု၊ ၜိုတ်ကြီုဂှ်ကၠောန်။
ၜိုတ်လေပ်ယဝ်ဟွံဟီု ဒှ်သမၠီုရ၊
ၜိုတ်ကြီုဟွံကၠောန် ညးစၞောန်လပုဟ်တဲရ။

၆၃၅။ ၜိုတ်နွံဂှ်တြပ်စိုတ်၊ ၜိုတ်အိုတ်ဂှ်စွံသတိ။
ၜိုတ်နွံယဝ်တြပ်စိုတ် ဍောၚ်ၜိုတ်ဟွံဒှ်၊
ၜိုတ်အိုတ်ယဝ်စွံသတိ ဂတျ်တၟိဟွံဒှ်။

၆၃၆။ ၜိုတ်ဖဲလ္ပရံၚ်၊ ၜိုတ်မံၚ်လ္ပကၠောန်။
ၜိုတ်ဖဲဓဝ်ယဝ်ရံၚ် ဂွံအံၚ်ဇၞးဝါတ်၊
ၜိုတ်မံၚ်ဓဝ်ယဝ်ကၠောန် ဂွံစောန်ဝါတ်ဂါတ်။

၆၃၇။ ၜိုန်ညးလက်လ္ပထေဲ၊ ၜိုန်ညးကသေဲလ္ပပတှ်ေ။
ညးလက်ထေဲမ္ဂး ၚုဟ်မးစှ်ေအိုတ်၊
ညးကသေဲပတှ်ေမ္ဂး ဟွံဗၠးစံၚ်တူစိုတ်။

၆၃၈။ ၜိုတ်ညးလျုၚ်လ္ပသၠုၚ်၊ ၜိုတ်ညးဒုၚ်လ္ပကေတ်။
ၜိုတ်ညးလျုၚ်ယဝ်သၠုၚ် မွဲတ္ၚဲဒးၚုၚ်ၚ၊
ၜိုတ်ညးဒုၚ်ယဝ်ကေတ် ဒှ်ဒ္ဂေတ်ဗာလ။

၆၃၉။ ၜိုန်ဒးလေပ်ဒးဗ္စာ၊ ၜိုန်မှာလေဝ်ဒးအေၚ်။
ၜိုန်ဒးယဝ်ဟွံဗ္စာ ဒှ်ဟိုတ်စိုတ်သာသ္ပအ်၊
ၜိုတ်မှာယဝ်ဟွံအေၚ် ဒးလေၚ်ဒိုက်လအ်။

၆၄၀။ ၜိုတ်ဒှ်လ္ပကၠောန် ၜိုတ်ကဟောန်လ္ပလက်။
ၜိုတ်ဒှ်ယဝ်ကၠောန် ဒှ်ကမၠောန်ပၠေၚ်ဒြပ်၊
ၜိုတ်ကဟောန်ယဝ်လက် သၞဗက်ချိုတ်တပ်။

၆၄၁။ ၜိုန်ဒးလ္ပဟီု၊ ၜိုန်လီုလ္ပဝေတ်။
ၜိုန်ဒးယဝ်ဟီု မိတ်လီုဒှ်မာန်၊
ၜိုန်လီုယဝ်ဝေတ် သၞဇေတ်ဒှ်မာန်။

၆၄၂။ ၜိုန်ဍုဟ်ကဵုဒှ်ၚုဟ်၊ ၜိုန်ဒုဟ်ကဵုဒှ်ပရဲ။
ဍုဟ်ဒှ်ၚုဟ်ဖန် လက်သဏ်အံၚ်ဇၞး၊
ဒုဟ်ယဝ်ဒှ်ပရဲ အာဇနဲညးဂး။

၆၄၃။ ၜတ်ၜတ်ဆက်ဆောမ်၊ ကောမ်ကောမ်လွဳ။
ၜတ်ၜတ်ဆက်ဆောမ် ပကောမ်မၞိဟ်လောဲ၊
ကောပ်ကောမ်ဂိုတလွဳ ညးပချဳဟွံလောဲ။

၆၄၄။ ၜက်ၜက်ဆက်ဆောမ်၊ ကောမ်ကောမ်လွဳ။
ၜက်ၜက်ဆက်ဆောမ် ပကောမ်မၞိဟ်လောဲ၊
ကောမ်ကောမ်ဂိုတ်လွဳ ညးပချဳဟွံလောဲ။ ။

ၝ

၆၄၅။ ၝောံမၞိဟ်ဂှ်ရဴဂဴ၊ မၞိဟ်ဘာဂှ်ပံၚ်ဖက်။
ၝောံမၞိဟ်ယဝ်ရဴဂဴ ဂါရဝဒှ်၊
ယဝ်ပံၚ်ဖက်ကဵုမၞိဟ်ဘာ ဇၟာပ်အရာကုသဵုလ်ဒှ်။

၆၄၆။ ၝကၠောန်ဂှ်ခပျ်၊ ၝတပ်ဂှ်ကေတ်။
ၝကၠောန်ယဝ်ဟွံချပ် ဟွံစိုပ်ဒတုဲရ၊
ၝတပ်ဂှ်ယဝ်ဟွံကေတ် ဒးဗၠေတ်ေဒၟံၚ်တွဵုရ။ ။

အ

၆၄၇။ အရေဝ်ဖအောန်၊ ကမၠောန်ဂလိုၚ်။
အရေဝ်ယဝ်ဖအောန် ဟွံမှာလောန်ရ၊
ကမၠောန်ယဝ်ဂလိုၚ် ဂွံဒုၚ်ထိုၚ်သး။

၆၄၈။ အခိၚ်ညဳဂှ်ပါ်ပါဲ ၊ စိုတ်စၞာဲဂှ်လ္ပထ္ၜး။
အခိၚ်ဟွံညဳယဝ်ပါ်ပါဲ ဒှ်အခိၚဂၠာဲသၞ၊
စိုတ်စၞာဲယဝ်ထ္ၜး ဂကောမ်ပြးဍာံပြ။

၆၄၉။ အေၚ်ကဵုဂွံမာန်၊ ဆာန်ကဵုဂွံလေပ်။
ယဝ်ရအေၚ်မာန် နိဗ္ဗာန်ဟွံလအ်ဒးစိုပ်၊
ယဝ်ဆာန်လေပ်ရ ဝဲသၞဟွံဆက်စပ်။

၆၅၀။ အရေဝ်ကဵုဍာတ် စိုတ်ဓါတ်ကဵုသၠုၚ်ပြဲ။
အရေဝ်ယဝ်ဍာတ် ညးညာတ်ဒှ်သဟာဲ၊
စိုတ်ဓါတ်ယဝ်သၠုၚ်ပြဲ မွဲတ္ၚဲဂွံရာၚ်ဆာဲ။

၆၅၁။ အတိုၚ်ထေၚ်လ္ပဟီုစုတ်၊ အတိုၚ်ယုတ်လ္ပစွံလဝ်။
အတိုၚ်ထေၚ်ဟီုစုတ် ဒ၊ဟုတ်လီုလာ်၊
အတိုၚ်ယုတ်စွံလဝ် ၜိုန်ကဝ်တူဟွံဆဵုတသိုက်။

၆၅၂။ အရေဝ်လ္ပကဵုလောန်၊ ဇၟာပ်ကၠောန်လ္ပဃရေတ်။
အရေဝ်လောန်မ္ဂး ကောန်ဒးကဵုညး၊
ဇမာပ်ကၠောန်ယဝ်ဃရေက် ဟွံဗၠးလက်ညး။

၆၅၃။ အခိၚ်လ္ပကဵုလောန်၊ ကမၠောန်လ္ပကဵုယုတ်။
အခိၚ်လောန်မ္ဂး ၚုဟ်မးဟွံမဲ၊
ကမၠောန်ယဝ်ယုတ် ဒးဒုၚ်စုတ်စောဲ။

၆၅၄။ အရေဝ်ဟွံမဲလ္ပဟီု၊ သမၠီုလ္ပပံၚ်။
အရေဝ်ဟွံမဲယဝ်ဟီု သမၠီုဒှ်အာရ၊
သမၠီုယဝ်ပံၚ် ပွယုတ်ဂံၚ်သ္ပ။

၆၅၅။ အရက်လေဝ်လ္ပသုၚ်၊ ဍာ်လျုၚ်လေဝ်လ္ပကမၠိ။
အရက်ယဝ်သုၚ် ဒးဒုၚ်နရက်၊
ဍာ်လျုၚ်ယဝ်ကမၠိ ကောန်တိတိုန်ခက်ဗြက်။

၆၅၆။ အဲခိုဟ်လေဝ်လ္ပဂး၊ ဟွံဒးလေတ်လ္ပကေတ်။
အဲခိုဟ်လေဝ်ဂး ဟွံဗၠးက္ဍုဟ်ညးတၞဟ်၊
ဟွံဒးယဝ်ကေတ် ဟွံဗၠးက္ဍုဟ်ညးတၞဟ်။

၆၅၇။ အဲဂှ်လ္ပဆာန်ဂၠိုၚ်၊ အတိုၚ်ဒှ်ဂှ်ဟီု။
ယဝ်ဆာန်အဲဂၠိုၚ် နိဗ္ဗာန်ဇြိုၚ်ဂွံဆဵု၊
အတိုၚ်ဒှ်ယဝ်ဟွံဟီု ကမၠောန်လီုဒှ်ဆဆဵု။

၆၅၈။ အတိုၚ်တီဂှ်ကေတ်၊ အတိုၚ်ဗၠေတ်ဂှ်ဒုၚ်ဝန်။
အတိုၚ်တီယဝ်ဟွံကေတ် တီဗၠေတ်ဂၠံၚ်ဍာန်၊
အတိုၚ်ဗၠေတ်ဟွံဒုၚ်ဝန် လောန်ဂၠိုၚ်ဒှ်ကြာန်။

၆၅၉။ အခေတ်လေဝ်ဒးဗက်၊ နရက်လေဝ်ဒးဖေက်။
ယဝ်ဟွံဗက်ခေတ် ၜေတ်ညးဟွံမာန်၊
နရက်ယဝ်ဟွံဖေက် သဳဒေက်ဒှ်ဂွံမာန်။

၆၆၀။ အေၚ်ဒုၚ်လ္ပလၞုဟ်၊ ဟီုဒုဟ်လ္ပတ္ၚအ်။
အေၚ်ဒုၚ်ယဝ်လၞုဟ် ဘဝလၟုဟ်ယုတ်သဝ်၊
ဟီုဒုဟ်ယဝ်တ္ၚအ် ဆလအ်ဟွံမံက်ဂတဝ်။

၆၆၁။ အခါန်ယုတ်ကဵုကၠိုဟ်၊ အခါန်ခိုဟ်ကဵုတီ။
အခါန်ယုတ်ယဝ်ကၠိုဟ် ဂၠံၚ်ခိုဟ်ဒှ်လောဲ၊
အခါန်ခိုဟ်ယဝ်တီ ဗၠိုက်တၞီဟွံလောဲ။

၆၆၂။ အဃောခိုဟ်လ္ပယုတ်၊ အဃောဟုတ်လ္ပကြာန်။
အဃောခိုဟ်ယဝ်ယုတ် ညံၚ်စုတ်အသုဘပ္ဍဲပုၚ်၊
အဃောဟုတ်ယဝ်ကြာန် ပိုန်ဟာန်ဟွံဇၞော်သၠုၚ်။

၆၆၃။ အကြာကၠဵုလေဝ်ဂၠာဲနယ်၊ အကြာပေါဲလေဝ်ဂၠာဲဓရ်။
ၜိုန်နယ်ကၠဵု ဂွံဖိုလ်ဂၠိုၚ်ဂၠေၚ်၊
ၜိုန်အကြာပေါဲလေဝ် သံဝေဂမံၚ်ထေၚ်။

၆၆၄။ အတိုၚ်ထေဲလ္ပဟီု၊ အတိုၚ်ဟီုလ္ပမံၚ်။
အတိုၚ်ထေဲယဝ်ဟီု လီုလာ်လေၚ်အိုတ်၊
အတိုၚ်လီုယဝ်မံၚ် ဟွံဗၠးစံၚ်တူစိုတ်။

၆၆၅။ အတိုၚ်အီဂှ်ကဵုဒှ်၊ အတိုၚ်ဒယှ်ဂှ်မံၚ်အာ။
အတိုၚ်အီဟွဒှ် ရသ်သာဟွံမဲ၊
အတိုၚ်ဒယှ်ဟွံမံၚ်ဂှ် ညးတၞဟ်ထေၚ်သောဲ။

၆၆၆။ အတိုၚ်ဟီုကဵုဒှ်၊ အတိုၚ်ဒှ်ကဵုတီ။
အတိုၚ်ဟီုဟွံဒှ် အရေဝ်ဂှ်ဟွံမဲဖဵု၊
အတိုၚ်ဒှ်ဟွံတီ ဒးတၞီဗၠိုက်တွဵု။

၆၆၇။ အိန်ရဳဂှ်ထိၚ်၊ ထဝိၚ်ဂှ်စွံ။
အိန်ရဳထိၚ်မှ ကာယရံၚ်ဆာဲ၊
ထဝိၚ်စွံမှ သောကစ္ဍးပါဲ။

၆၆၈။ အခိုက်ဍုၚ်ကေတ်ကဵုဒး၊ အခိုက်ရးကဵုတီကၠိုဟ်။
အခိုက်ဍုၚ်ကေတ်ဟွံဒး မၞိဟ်မှးဟွံဒှ်၊
အခိုက်ရးဟွံကၠိုဟ် မၞိဟ်ခိုဟ်ဟွံဒှ်။

၆၆၉။ အတိုၚ်စိုတ်လ္ပအာ၊ အတိုၚ်မှာလ္ပကေတ်။
အတိုၚ်စိုတ်ယဝ်အာ ကာယဍောၚ်ၜိုတ်၊
အတိုၚ်မှာယဝ်ကေတ် ဒှ်ကွေတ်ယုတ်အိုတ်။

၆၇၀။ အရီုဗၚ်လေဝ်ဒးဂၠာဲ၊ ဌာန်ဒၞာဲလေဝ်ဒးရံၚ်။
အရီုဗၚ်ဟွံဂၠာဲ ဂွံဆာဲဝါတ်ဂါတ်၊
ဌာန်ဒၞာဲဟွံရံၚ် ဟွံဗၠးစံၚ်တူကျာတ်။

၆၇၁။ အတိုၚ်မိၚ်လ္ပပၠောပ်စိုတ်၊ အတိုၚ်အိုတ်လ္ပဂွိၚ်။
အတိုၚ်မိၚ်ယဝ်ပၠောပ်စိုတ် ဒှ်ဟိုတ်မံၚ်ကျာတ်၊
အတိုၚ်အိုတ်ယဝ်ဂွိၚ် ဘိၚ်ဘၚ်မံၚ်ဝါတ်။

၆၇၂။ အခိုက်ကၞာလေဝ်မၚ်၊ ပရူဝၚ်လေဝ်ထ္ၜး။
ယဝ်မၚ်အခိုက်ကၞာ ဘသာဟွံကၠက်၊
ပရူဝၚ်ယဝ်ထ္ၜး စိုတ်ကၠးဗိုန်ခြက်။

၆၇၃။ အဓိကဂှ်ကၠောန်၊ စေဝ်ပၞောန်ဂှ်ဗက်။
အဓိကဂှ်ကၠောန်မှ ဍာံပြဇၞော်မောဝ်၊
စေဝ်ပၞောန်ဗက်မှ ဒ္ဂေတ်ပွဆာဲဂေါဝ်။

၆၇၄။ အလိုက်ညးလ္ပစး၊ ထိုၚ်သးညးလ္ပဣဿာ။
အလိုက်ညးယဝ်စး မံၚ်သၟးဒှ်ဝါတ်၊
အထိုၚ်သးညးယဝ်ဣဿာ ဒၞာဲအာမံၚ်ကျာတ်။

၆၇၅။ အတိုၚ်ဆာန်လ္ပဗက်လိုက်၊ အတိုၚ်သ္ဍိုက်လ္ပဗက်စိုတ်။
အတိုၚ်ဆာန်ယဝ်ဗက်လိုက် ဒဒိုက်ဒှ်လောဲ၊
အတိုၚ်သ္ဍိုက်ယဝ်ဗက်စိုတ် ဒှ်ဟိုတ်ဟီုလောဲ။

၆၇၆။ အခိၚ်ဂွံဂှ်လွဳ၊ အခိၚ်ညဳဂှ်ကၠောန်။
အခိၚ်ဂွံဂှ်ယဝ်လွဳ ဖိုလ်ဇဳဂွံမာန်၊
အခိၚ်ညဳဂှ်ယဝ်ကၠောန် ကမၠောန်ဒးဂၠံၚ်ဍာန်။

၆၇၇။ အဓိပ္ပါယ်ကမၠောန်ကဵုတီ၊ ပွတၞီကဵုကၠိုဟ်။
ယဝ်ဟွံတီအဓိပ္ပါယ်ကမၠောန် လ္ပကၠောန်ဒေါံထောံ၊
ပွတၞီယဝ်ဟွံကၠိုဟ် ဂၠံၚ်ခိုဟ်ဒေါံထောံ။

၆၇၈။ အခိၚ်ဂှ်ပတိုန်ၚုဟ်၊ လၞုဟ်ဂှ်ပတိုန်ဒုဟ်။
အခိၚ်ယဝ်ပတိုန်ၚုဟ် ဓရ်လၞုဟ်အေဲဇြ၊
လၞုဟ်ယဝ်ပတိုန်ဒုဟ် ညးက္ဍုဟ်ဟွံထဗ။

၆၇၉။ အလဵုဇကုကၠောန်၊ အလဵုဇကုဗတောန်။
အလဵုဇကုကၠောန်မ္ဂး ဗီုဒးစိုတ်ဂွံ၊
အလဵုဇကုဗတောန်မ္ဂး ကွးဒးသ္ပဂရု။

၆၈၀။ အေၚ်လ္ပဖေက်၊ ဒေက်လ္ပယံၚ်။
အေၚ်ယဝ်ဖေက်မ္ဂး ဟွံဗၠးဝါတ်ဂါတ်၊
ဒေက်မွဲယဝ်ယံၚ် ဂၠံၚ်ပေၚ်ဟွံညာတ်။

၆၈၁။ အရေဝ်ကဵုဍာတ်၊ လညာတ်ကဵုသၠုၚ်။
အရေဝ်ဍာတ် ညာတ်မိတ်လောဲ၊
လညာတ်သၠုၚ် ဂွံဍုၚ်လောဲ။

၆၈၂။ အခိၚ်ကဵုတီၚုဟ်၊ ဒုဟ်လၞုဟ်ကဵုကၠိုဟ်။
ယဝ်တီၚုဟ်အခိၚ် ကၠောန်လဟိၚ်ဟွံဒှ်ကြာန်၊
ဒုဟ်လၞုဟ်ယဝ်ကၠိုဟ် ဂွံခိုဟ်စမာန်။

၆၈၃။ အခေါၚ်ယုတ်ပဂၠါဲ၊ အခေါၚ်ဆာဲလ္ပပၠေၚ်။
ဂၠါဲအခေါၚ်ယုတ် ဟုတ်စှ်ေရိုဟ်တ္ၚဲ၊
ပၠေၚ်အခေါၚ်ဆာဲ အန္တရာယ်ဒှ်လောဲ။

၆၈၄။ အခေါၚ်ပအာတ်တ္ၚအ်၊ ရန်တၟအ်လ္ပယုတ်သဝ်။
အာတ်အခေါၚ်တ္ၚအ် လွဳယှအ်လီုလောဲ၊
ရန်တၟအ်ယုတ်သဝ် ဒှ်ဆေဝ်ဒဝ်တသိုက်ပြဲ။

၆၈၅။ အခေါၚ်ပကၟာတ်၊ လညာတ်ပဗၠေတ်။
အခေါၚ်ကၟာတ်လဝ် ညံၚ်ဖျဝ်ဖျေံဇကု၊
လညာတ်ဗၠေတ်ဗၠန် ထုဲၜန်သတြု။

၆၈၆။ အဲလေဝ်ဂုဏ်ဒှ်၊ ညးတၞဟ်လေဝ်ခိုဟ်မာန်။
အဲဂုဏ်ဒှ်မှ သောကဗၠးၜး၊
ညးတၞဟ်ခိုဟ်မှ ညးသ္ပထိုၚ်သး ။

၆၈၇။ အတ္တလ္ပလောန်ကာဲ၊ ကသပ်စၞာဲလ္ပစွံ။
အတ္တလောန်ကာဲ ဇၟာပ်ဒၞါဲဒးလေၚ်၊
ယဝ်စွံကသပ်စၞာဲ အန္တရာယ်ဂေတ်ပေၚ်။

၆၈၇။ အတ္တလ္ပလောန်ကာဲ၊ ကသပ်စၞာဲလ္ပစွံ။
အတ္တလောန်ကာဲ ဇၟာပ်ဒၞါဲဒးလေၚ်၊
ယဝ်စွံကသပ်စၞာဲ အန္တရာယ်ဂေတ်ပေၚ်။ ။

အာ

၆၈၈။ အာကဵုဒှ်ဖိုလ်၊ မံၚ်ကဵုညးဆာန်။
ယတ်အာဒှ်ဖိုလ် နွံကဵုမ္ၚဵုရ၊
ယဝ်မံၚ်ကဵုညးဆာန် ဇြဟာတ်ဂၠိုၚ်ရ။

၆၈၉။ အာဲခိုဟ်ဂှ်မၚ်မွဲ၊ မိတ်ရဲဂှ်လ္ပပလီု။
အဲခိုဟ်ယဝ်မၚ်မွဲ တသိုက်ပြဲဂွံမံၚ်တွဵု၊
မိတ်ရဲယဝ်ဟွံပလီု ဂွံဂီုကၠီုမံၚ်တွဵု။

၆၉၀။ အ္စာဝေတ်လ်ပပသၞ၊ ဂုဏ်ယာဲတ်လ္ပတၠိၚ်။
အ္စာဝေတ်ယဝ်သ္ပသၞ ဍာံပြဒးဆဵုဘဲ၊
ယဝ်တၠိၚ်ဂုဏ်ယာဲတ ဂွဴဒှ်တသိုက်ရဟွံလောဲ။

၆၉၁။ အာကၠုၚ်ကဵုဒးရး၊ ဟီုဂးကဵုဍိုန်ဍောတ်။
အာကၠုၚ်ဒးရး ၚုဟ်မးဇကုနွံ၊
ဟီုဂးဍိုန်ဍောတ် ဂတမတ်ဍိုက်ပေၚ်စုံ။

၆၉၂။ အ္စာခိုဟ်ဂှ်ဂၠာဲ၊ ဒၞာဲခိုဟ်ဂှ်မံၚ်။
အ္စာခိုဟ်ယဝ်ဟွံဂၠာဲ ဇၟာပ်ဒၞာဲဟွံဆာဲ၊
ဒၞာဲခိုဟ်ယဝ်ဟွံမံၚ် ဇၟာပ်ဂၠံၚ်ဒှ်အန္တရာယ်။

၆၉၃။ အာယုက်ကဵုဒှ်ၚုဟ်၊ ဒုဟ်ကဵုပါဲမာန်။
အာယုက်ယဝ်ဒှ်ၚုဟ် လၟုဟ်လေဝ်ၜိုဟ်၊
ဒုဟ်ယဝ်ပါဲမာန် ဇၟာပ်ဌာန်ၜိုဟ်သြိုဟ်။ ။

ဣ

၆၉၄။ ဣမိလ္ပကဵုဂၠိုၚ်၊ တဴလျိုၚ်ကဵုဂွံကၠိုဟ်။
ဣမိဂၠိုၚ်မ္ဂး ကောန်ဒးချိုတ်ရ၊
တဴလျိုၚ်ဟွံကၠိုဟ် မၞိဟ်သၠိုဟ်ဒှ်ရ။ ။

ဥ

၆၉၅။ ဥပမာညးကဵုတီကၠး၊ ညးဟွံထိုၚ်သးစိုတ်လ္ပဍောတ်။
ဥပမာညးဟွံကၠး ဟွံသောၚ်ၜးဒှ်ဂဗုတ်၊
ညးဟွံထိုၚ်သးဍောတ်စိုတ် ဒှ်ဟိုတ်ဂွံထေဲထုတ်။

၆၉၆။ ဨဟီုတုဲကေတ်၊ ပွဗၠေတ်ပလေဝ်ထောံ။
ဨဟီုတုဲယဝ်ဟွံကေတ် ဒှ်ဒ္ဂေတ်စးအ္စာ၊
ဗၠေတ်ဟွံပလေဝ်မ္ဂး ဟွံဗၠးဘဲသံသာ။

ဩ

၆၉၇။ သြကာသကဵုကြဵု၊ ဂုဏ်ဖိုလ်ရတ်ပိကဵုတီ။
သြကာသဟွံကြဵု ဟလဵုဂွံကလအ်စရော၊
ဂုဏ်ရတ်ပိယဝ်ဟွံတီ ဒးတၞီဗၠိုက်စံၚ်တူ။ ။

အး

၆၉၈။ အးအးမံၚ်အာ၊ မှာမှာလ္ပကၠောန်။
ယဝ်မံၚ်အးအး ညးညာတ်ဒးသ္ဍိုက်ဆာန်၊
မှာမှာယဝ်ဟွံကၠောန် ကြပ်ညောန်ကဵုနိဗ္ဗာန် ။ ။ 

ပတ္ထနာနိဂိုမ်

လ္ၚီပိကၠံဍာံ၊ ပိစှော်ဒ္စါံ၊ ဒှ်သၞာံချူတုဲမာန်။
လောဲလောဲသွာသွာ၊ ဂွံတုဲအာ၊ တၟာရုဲဟွံခက်ဗာန်။
ဖဵုဂွံချူဇန်၊ လိခ်ဝွံပၠန်၊ ပ္တန်စိုတ်ဖျေံအဓိဌာန်။
ကဵုဒှ်သ္ဇိုၚ်ပြဲ၊ ဉာဏ်ကၞောတ်တဲ၊ ဟွံမဲညးပြိုၚ်ပကာန်။
မွဲဟွံတုပ်သၟဟ်၊ ဉာဏ်တၟေၚ်ဂှ်၊ လအ်ဂွံဒှ်တဴမာန်။
ဒတုဲဖဵုဆာဲ၊ ဇၟာပ်ဇၟာပ်ဒၞာဲ၊ ကဵုဂွံဂၠာဲကၠောန်မာန်။
ပိုန်ရုပ်ပညာ၊ အာယုက်ကၠာ၊ ပြာထာကဵုဒှ်မာန်။
သမၠီုရုန်မဵု၊ ဟွံမွဲမ္ၚဵု၊ လ္ပကဵုဆဵုဇၟာပ်ဌာန်။
တတိယအဝဲဒှ်၊ ပ္ဍဲဂြိုပ်ဂှ်၊ ကဵုမိပ်မြဟ်နဇျာန်။
ဇၟာပ်ဘဝတအ်၊ တိုၚ်ရန်တၟအ်၊ ဗိုန်ဇၟအ်ကဵုဒှ်မာန်။ (နာဲသာရဝဏ်၊ ဘာမဟာသတိပဋ္ဌာန်၊ ကွာန်တံၚ်ဖလုတ် ပွိုၚ်ဍုၚ်ဇြပ်ဗု တွဵုရးဍုၚ်မန်)
−
အလန်ပထမ − ၃၀၊၄၊၉၀၊ လၟိဟ်လ္ၚီအုပ်။
အလန်ဒုတိယ − ၂၆−၈−၉၂၊ လၟိဟ်လ္ၚီအုပ်။
အလန်တတိယ −၀၀−၀၉၆၊ လၟိဟ် ၀၀ အုပ်။

ယွံကောန်ဂကူမဆာန်အာဲကၟာဲလိခ်ပတ်တအ်၊ ဆအယာံမာတ်သာရဝဏ်နဳတိကၞပ်(၁)ဏအ်ဂှ် သြဝ်လ္ပတြပ်ကဵုစိုတ်ညိဏီ။

သွက်ဂွံတက်တြးပတိတ်ဂတတေံမာန် မပတမ်သာရဝဏ်နဳတိကၞပ်(၂)ကၞပ်(၃)မွဲဟာန်ကေုာံ သက်သဳသာဓက ဝတ္ထုဇာတ်နိပါတ်ဂမၠိုၚ်မာန်ဂှ်လေဝ် သြဝ်ဘိုၚ်ကဵုဇြဟတ်အိုတ်ညိဂှ် အာတ်ဏာအရီုဗေၚ်ဗွဲတၟေၚ်ရ။

အာဲကၟာဲနွံမ္ၚဵု မိက်ဂွံဆဵု ရံၚ်ဗဵုလိက်ပတ်ညိ။
လိက်ပတ်ဟွံရံၚ် ဆီလှာဲပြံၚ် ဇၟာပ်ဂၠံၚ်ယုတ်သဝ်ဂိ။
တီကေတ်တုဲကၠာ လွဳပရာ မၚ်အာလိက်ပတ်ညိ။ (နာဲသာရဝဏ်)

• လၟေၚ်ကမၠောန်တုန်
လိက်သာရဝဏ်နဳတိဝွံ အလန်ပထမ၊ ဒုတိယတအ်ဂှ် တက်ပ္ဍဵုဗီုပ္ဍဲစက်သြရသပုတ္တတုဲ၊ အလန်တတိယတအ်ဂှ်လေဝ် တက်လဝ်ကောန်ဗျူတာ(ခိုၚ်သဇၚ်)ရောၚ်။

ကွတ်အ္စာ−စှ်ၜါ(၁၂)
ကွတ်ဂမျိုၚ်လမျီုကၠာ ဂးစှ်ၜါ အ္စာတံတွံလတ်ရောၚ်၊ ကွတ်အ္စာ(၁၂)ဏံဝွံ နူကဵုခေတ်သုဓမ္မဝတဳ(သဓီု)တေံ စိစောန်ကၠုၚ်မံၚ်တုဲတုဲရောၚ်။

(၁) ပါည်ထဝ် = ထဝ်−သြန်−ရေၚ်မတ် ကၠောန်ဖျေံသၞောတ် ဂ္ညိအပေါတ်ကယျိုၚ်ကယျဝ် ကွတ်(ပါန်ထဝ်)။
(၂) ပါည်ပ္သဲ = မြ မုဲ ၜုန် ဂြၚ် ကွဵု−မၞုဟ်−ဇြၚ် ကၠောန်နၚ်ဂၠိုၚ်နဲ ကွတ်(ပါန်ပ္သဲ)။
(၃) ပါည်ပုတ် = ပုတ်−ဂၠတ်−တှ်ေ−ကၠောန် ညာန်စိစောန် နဲကၠောန်ဂၠိုၚ်ခုတ် ကွတ်(ပါန်ပုတ်)။
(၄) ပါည်ခဳ = ဍာ်ဂဥုဲ−၅−အရံၚ် ဖက်−နှောဂဂံၚ် ချူညံၚ်ကၠးဗ္စဳ ကွတ်(ပါန်ခဳ)။
(၅) ပါည်ရန် = အၚ်္ဂဒဵု−တိသောတ် ဖက်စှ်ေသၞောတ် ဒက်ဍိုတ်စဳဖန် ကွတ်(ပါန်ရန်)။
(၆) ပါည်တေ = လောဟ−ဇရိုတ်ကၠာ မိတ်−ဗ္ကေတ်ၜါ စဝ်−သၚ်−သောန်လေဝ် ကွတ်(ပါန်တေဝ်)။
(၇) ပါည်ဍအ် = အၚ်္ဂဒဵု−တိနှော ဗါန်ရေက်ပ္ကဴ ကၠောန်တဴညောန်ခၠအ် ကွတ်(ပါန်ဍအ်)။
(၈) ပါည်တၟံ = ဝါန်သီုထ္ၜိုဟ်ဍာ် တၟံဂၠိုၚ်သာ် စြေက်−ပါ်−ပုတ်−ဗၠအ် ကွတ်(ပါန်တၟံ)။
(၉) ပါည်ပေါတ် = ဂၠိုၚ်ကြက်ဆုဇေတ် စုတ်စက်ဗ္ဂေတ် ဟွံဗၠေတ်နူသၞောတ် ကွတ်(ပါန်ပေါတ်)။
(၁၀) ပါည်ယန် = ယန်သေ−တာန်−တၟာန် ဒုန်သီုသာန် စှ်ေပ္ကာန်ကၠောန်ဖန် ကွတ်(ပါန်ယန်)။
(၁၁) ပါည်ကျာ = လှ်ေဒယှ်ေတိၚ်တိုက် ဗါတ်ဂၠိုၚ်အခိုက် ဆန်အလိုက်ချူဏာ ကွတ်(ပါန်တျာ)။
(၁၂) ပါည်တိ = တိဗန်−တိကမၠေတ် ကၠောန်လၟာန်ကေတ် အပေါတ်ဗ္ဂေတ်အရာသ္ၚိ ကွတ်(ပါန်တိ)။
ကွတ်အ်စာ(၁၂)သာ်ဝွံ တၠပညာတမၠာတမၠာတေံ တၚ်ယၟုခုဟ် ထ္ၜုတ်ပ္တန်စွံလဝ်ရောၚ်။
• ဥတ္တရ စူဠဒဳပ၊ နာဲအံက်ပိုၚ် ကွာန်ဝၚ်္က သက္ကရာဇ် ၂၅၆၃၊ ဂိတုဒုတိယဒ္ဂိုန် ။ ။ အုပ်နိဂီု ။

နိဿဲ

လိက်မွဲမွဲဍောတ်မၞုံယၟု (သာရဝဏ်နဳတိ) မ္ဂးရ၊ ညးမချူခၞံဗဒှ်လဝ် − သာရဝဏ် ဘာမဟာသတိပဋ္ဌာန်− ကွာန်တၚ်ဖလုတ် ပွိုၚ်ဍုၚ်ဇြပ်ဗု တွဵုရးဍုၚ်မန်