ဝတ္ထုဒမၠေအ်

ဝတ္ထုဒမၠေအ် (ဥက္ကဋ္ဌစသြန်)

နာဲအညိၚ် မတ်ကၠက်မံၚ်သီုၜါလပါ်တုဲ နွံမွဲတ္ၚဲ ညးတေံကွာ်စှ်ေအာဂတမုက်သ္ၚိပယာံသဝ်တ္ၚဲ−−ဓဝါဲဂှ်ဟေၚ် ရဲသွံကွာၚ်တကံက်တဲ ကွာ်ကၠုၚ်မွဲဍာန်ကဵုနာဲအညိၚ်တုဲ မွဲအသိၚ်ဟေၚ် နာဲအညိၚ် ဇီုဒးရဲသွံကွာၚ်− ကွာၚ်မွဲထးဂှ် ဗကပ်ဒတုံစိုပ်အာတိဖအိုတ်၊

ရဲသွံကွာၚ်ကဵုနာဲအညိၚ် ညးၜါအရေဝ်ဂၠိုၚ် သေက်ဇဵုညးသ္ကံဂွံမွဲလစုတ်တုဲ စိုပ်အာသ္ၚိဥက္ကဋ္ဌသီုၜါရ၊

ဓဝါဲဂှ် နာဲအညိၚ် တီကၠးဇကုဒှ်မၞိဟ်ဗၠေတ်ဇီုဒးရဲသွံကွာၚ်ဂှ်ကၠာတုဲ ကသပ်တိတ်မွဲဗက်ဂှ် ဓဝါဲဂှ်ဟေၚ် လဒေါဝ်ဝိုၚ်ပ္ဍဲသ္ၚိဥက္ကဋ္ဌ နာဲအညိၚ်ကတဵုတုဲ ဟီုတဴသာ်ဝွံရ၊−−− အမှုဏံညံၚ်အဲဂွံမာန်ဂှ် ဣဏံ သြန်အဲနွံဒၟံၚ်မွဲကၠံဒကေဝ် အဲထပက်သြန်သၟဝ်ခုၚ်ကဵုဥက္ကဋ္ဌရ။

မၞိဟ်မွဲလဒေါဝ်ဝိုၚ်သ္ၚိဥက္ကဋ္ဌဂှ် မတ်စူညိၚ်အာမွဲခဏတုဲ သၟာန်နာဲအညိၚ်ရ၊ −−− နာဲအညိၚ်မုပဂွံတီ ဥက္ကဋ္ဌကွာန်ဏံ စမံၚ်သြန်သၟဝ်ခုၚ်ဂှ်ရော ? −− မုပ − အဲမိၚ်မံၚ်ညးတၞဟ်တက်ကျာဟီုဂးမံၚ်ဂှ်တှ်ေ −− ယဝ်ရဒှ်အမှုစိုပ်သ္ၚိဥက္ကဋ္ဌမ္ဂး မၞိဟ်လဵုဂံၚ်ထပက်သြန်သၟဝ်ခုၚ်ကဵုဥက္ကဋ္ဌကၠာတှ်ေ မၞိဟ်ဂှ်မာန်ရ၊ သာ်ဂှ်ရ အဲထပက်သြန်ကဵုဥက္ကဋ္ဌကၠာရဒှ် ။

မၞိဟ်မွဲသ္ၚိဥက္ကဋ္ဌဂှ် တီကေတ် − အဵု..... ဥက္ကဋ္ဌကွာန်ပိုဲ စမံၚ်သြန်သၟဝ်ခုၚ်ဏောၚ်သွံဟာ ။

 ဝတ္ထုဒမၠေအ် (9×5=44)

ရဲသွံသတ်ဆုသတ်ဒုန်ပ္ဍဲဖျာဇၞော်မွဲဂှ် အဃောသွံမံၚ်သတ်ဆုနာနာတုဲ အဃောဂှ်ပၠန် ကောန်ဥက္ကဋ္ဌကွာန် လုပ်ကၠုၚ်ရာန်သတ်ဆု၊ −−− ဣဏံမွဲထိုၚ်မူစိရောတၠဖျာ−−−? အဵု−−လိမဴထိုၚ်ဏံ မွဲထိုၚ်ဒစိတ်ဒကေဝ်ကီုရ၊

သာ်ဂှ်တှ်ေ အဲရာန်မသုန်ထိုၚ်၊ −− ဣဏံ ၚုဟ်သတ်လိမဴ−44 ဒကေဝ်၊ ဓဝါဲဂှ် ရဲသွံဖျာကလေၚ်ပသောၚ်ကဵုကောန်ဥက္ကဌဂှ်−−−မွဲထိုၚ်ဒစိတ်ဒကေဝ်တှ်ေ မသုန်ထိုၚ်ဒှ်အာ−45 ဒကေဝ်ရကောန်ဗၠာဲ၊

ရဲသွံဖျာကဵုရဲရာန်ဖျာညးၜါ တော်လဝ်လပါ်ဇကုတှ်ေဒးမံၚ်တုဲ ကယျာန်တဴညးသ္ကံ၊ ဟွံလံပြသၞာဂှ်ဟွံသောၚ်အာတုဲ စိုပ်အာသ္ၚိဥက္ကဋ္ဌကွာန်ရ၊

ဓဝါဲဂှ် ဥက္ကဋ္ဌကွာန်ဟီုကဵုရဲသွံဖျာသာ်ဝွံရ၊ −−− အမှုဏံ ယဝ် 9×5=ဒှ်အာ 45−တှ်ေ အဆံၚ်အဲဥက္ကဋ္ဌဏံ ဘဝဏံအဲဟွံသ္ပဥက္ကဋ္ဌရ၊ ယဝ်ခါရ 9×5= ဒှ်အာ 44-မ္ဂးတှ်ေ ဗှ်ေဒးကုတ်ကံဏောၚ် ဗှ်ေဂံၚ်ပြိုၚ်သောၚ်ဟာဂဗုတ်ဏံ၊ သာ်ဝွံ ဥက္ကဋ္ဌဟီုကဵုမၞိဟ်သွံဖျာရ၊

မၞိဟ်သွံဖျာဂှ်လေဝ် တီကၠးကေတ်စေတနာဥက္ကဋ္ဌ ဟိုတ်ဖဵုအန္တရာယ်နွံကၠးမံၚ်တုဲ−− ယွံ..ယွံဥက္ကဋ္ဌ−သာ်ဂှ်တှ်ေ 9×5=ဒှ်အာ 44 လေဝ်ဂွံမံၚ်ရဥက္ကဋ္ဌ ၊ −−− အဃောမၞိဟ်သွံဖျာစဴ ကွာ်စှ်ေစိုပ်ဇိုၚ်ကၞိန်သ္ၚိ ကလေၚ်ဟီုကဵုဥက္ကဋ္ဌအရေဝ်ဗွဲလက္ကရဴအိုတ်ၜါပါၚ်၊

ယွံဥက္ကဋ္ဌ ကာလဥက္ကဋ္ဌစဴကၠုၚ်နူကဵုကၠအ်ဝါတေံမ္ဂး လဒေါဝ်တရဴဗြဲဂူတှ်ေ သၟဝ်တမ်ဆုဇၞော် ဥက္ကဋ္ဌလ္ပလုပ်ဇူတွဵုညိ၊ မွဲပၠန်ဂှ် အဃောဥက္ကဋ္ဌထေဲဒှ်ဒေါသမ္ဂး လ္ပသ္ဂုတ်သွာတ်ထောံစိုတ်ဥက္ကဋ္ဌပြဟ်ပြဟ်တွဵုညိဏး −− ညးသွံဖျာဟီုကဵုဥက္ကဋ္ဌသာ်ဝွံတုဲ စဴအာသ္ၚိဇကုရ၊

နွံမွဲတ္ၚဲ ဥက္ကဋ္ဌစဴကၠုၚ်နူကၠအ်တုဲ ဘာ်တရဴဗြဲဂူကျာထတ် ဥက္ကဋ္ဌဂြိုပ်လုပ်အာသၟဝ်တမ်ဆုဇၞော်မွဲရ၊ ဓဝါဲဂှ် ဥက္ကဋ္ဌချပ်ဂွံအရေဝ်မၞိဟ်သွံဖျာဟီုလဝ်တေံတုဲ ဂစာန်ကွာ်တိတ်ကၠုၚ်နူသၟဝ်တမ်ဆုဂှ်ဗက် ဂွံမွဲလစုတ် ဒဂဵုတးပန်ဖျေံတၞံဆုဇၞော်ဂှ်တုဲ− ဥက္ကဋ္ဌညာတ်ကေတ်သာ်ဂှ်ဟေၚ် −−−− အေ မၞိဟ်သွံဖျာဂှ် မုပဍေံဂွံတီသာ်ဝွံရော− ဥက္ကဋ္ဌချပ်တုဲ စဴကၠုၚ်သ္ၚိဇကုရ၊

နွံမွဲတ္ၚဲပၠန် ဥက္ကဋ္ဌစဴကၠုၚ်နူပေါဲသဘၚ်ၜိုတ်စှ်နာဍဳဗ္တံတုဲ ညှာစိုတ်ဗြဴဇကုဟွံမိက်ကော်ပံက်တြၚ်သ္ၚိ၊ ဥက္ကဋ္ဌဂၠဟ်ပတိတ်သၞောဝ်တြၚ်သ္ၚိဇကုတုဲ လုပ်အာဒၞာဲသတိက်ဗြဴဇကု ဂၠုဂၠုဂၠာံဂၠာံလုပ်အာရ၊ ဓဝါဲဂှ် ဥက္ကဋ္ဌဂၠာံရပ်ဒးပ္ဍဲသတိက်နွံဒှ်ဒၟံၚ်မၞိဟ်ၜါတိက်ဒၟံၚ်တုဲ ဥက္ကဋ္ဌထေၚ်ကေတ် ဗြဴညးတေံကၠတ်စတြုံဍောတ်၊ ဓဝါဲဂှ် အာကေတ်နၚ်မြသွက်ဂွံဗာ်ဂစိုတ်သီုညးၜါဂှ်ဟေၚ်−−− ဠယာမြရဂှ် ဥက္ကဋ္ဌချပ်ဂွံအရေဝ်မၞိဟ်သွံဖျာဟီုလဝ်တေံတုဲ ဥက္ကဋ္ဌဂွံသတိ ခရက်ဍေန်တၟးတိုန်ပၟတ်တုဲ ညာတ်ကေတ်မၞိဟ်မတိက်ဒၟံၚ်ဗဒါဲဗြဴညးတေံဂှ် အိုတ်ကၞောတ်ဒှ်ဒၟံၚ်ဒေံဗြဴဇကုဖိုဟ်၊

အေ ... မၞိဟ်သွံဖျာဂှ် မုပဍေံဂွံတီအရာသာ်ဏံဂှ်ရော......? အုပ်နိဂီု ။

ဝတ္ထုဒမၠေအ် (လဓဳဂၠာဲပၟတ်ခရက်)

−

လဓဳကဵုမဂဳပ္ဍဲအရာပ်ပိုဲဂှ် ဒှ်သၞလက်ဒေါန်ညးသ္ကံ ဟိုတ်နူလဓဳဂှ်ဗ္ၜူမံၚ်တွဵုတုဲ အရိုဟ်အရိုဟ်တ္ၚဲရ− စိုပ်အခိၚ်သဝ်တ္ၚဲတှ်ေ ရမ်သာၚ်လက် အကြာအကြာဂှ် သီုရမ်သာၚ်ပ္ၚာန် ရမ်သာၚ်ထၟာဲပုၚ်ထၟာဲသွ ဒတုံစှ်ေကၠုၚ်နူသ္ၚိမဂဳကဵုလဓဳဂှ် ဂွံဆဵုမံၚ်ဟဂှ်ဟဂှ်ရ၊

−

နွံမွဲတ္ၚဲဂှ် မဂဳကဵုလဓဳ ဟိုတ်နူဒှ်သၞထေဲဒၟံၚ်ညးသ္ကံတုဲ ညးၜါဟွံဂွံဟီုအရေဝ် ကြပ်ပေၚ်မွဲအာဒိုတ်၊ ပ္ဍဲကဵုတ္ၚဲပေၚ်ထပှ်တ္ၚဲအခိၚ်ဗ္တံၜိုတ်စှ်နာဍဳဂှ် ကောန်ၚာ်တံလေဝ်တိက်လှိၚ်အာအိုတ်၊ လဓဳဂှ်ဗျဵုတိုန်တွဵု−− ညးတေံဂၠီုအာဂၠီုကၠုၚ် သၠိုက်ယာအာပေၚ်ပြးအကြာဂၞိန်မဂဳညးတေံသ္ၚိတ်သ္ၚိတ်၊

−

ဓဝါဲဂှ် မဂဳညးတေံၚုဟ်တိုန်တုဲ ပ္ဍဲစိုတ်တေံလေဝ်ထေဲမံၚ်ဟွံပြေဏီ −− မုမုဇကုဂၠာဲမံၚ်ဂှ်ရောဗ္တံသ္ဂာတ္ၚဲ − −− အဵု .... အဲ အဲဂၠာဲပၟတ်ခရက်ရလေဝ်မဂဳ− မှတှ်ေ ပၟဝ်ခရက်နွံမံၚ်ပ္ဍဲ.....C...... ဟာ ။

−−−−−−−−−−−−−−−−−−−−−−−−−−−−−−−−−−−−−−−−−−−−−

ဝိညာဏ်ထဝ်