လိက်အုပ်မွဲဍောတ်မၞုံယၟု (သာရဝဏ်နဳတိ) မ္ဂးရ၊ ညးမချူခၞံဗဒှ်လဝ် − သာရဝဏ်
နိဒါန်
ပ္ဍဲလောကဝွံ တသိုက်ခိုဟ်ပြဲမ္ဂး ဇၟာပ်မၞိဟ်ဒးစိုတ်ဖအိုတ်ရ၊ ညံၚ်ဂွံဒှ်တသိုက်လေဝ် ဂိုတ်ဂစာန်လွဳပရာဒၟံၚ်နာနာသာ်အိုတ်ရ၊ ဇၟာပ်ကမၠောန်မကၠောန်သ္ပတဴဒၟံၚ်ဂှ်လေဝ် ထေၚ်မံၚ်ဂွံဒှ်တသိုက်မာန်ဖအိုတ်ရ။
၁ ။ ညံၚ်လညတာ်ဂွံဍာံပြ ။
၂ ။ ဒ္ဂေတ်ပွဂွံတပ် ။
၃ ။ ကသပ်ခိုဟ်ဂွံဒှ် ။
၄ ။ ကၠေၚ်ဍဟ်ဂွံလှဲအာ ။
၅ ။ ဓဝ်ချပ်ဗစာဂွံဒှ်ကၠုၚ်ညိဂးတုဲ နကဵုစေတနာသၠုၚ်သၠုၚ်ပြဲပြဲဂှ် ( ပြကိုဟ်နဳတိ ) ဝွံ အဲနာဲသာရဝဏ် မ္ဒးချူဇန်တက်ပတိတ်ဏာရောၚ်မဂ္ဂး ။ တၠစေတနာ −−− နာဲသာရဝဏ်
ပဏာမ
နမော တဿ ဘဂဝတော အရဟတော သမ္မာ သမ္ဗုဒ္ဓဿ
(က) ဂုဏ်ကျာ်ဇၞော်ဂး လှဲလးဂုဏ်ဓရ်
ပွယုတ်ရောတၚ် ဂုဏ်သၚ်ဟီုလဝ်
ဂုဏ်မိမအ္စာ နွံကၠာဂၠိုၚ်ဗဝ်
ဂုဏ်ညးတအ် ကလအ်လ္ၚောဝ်ဇအ်သဝ် ။
(ခ) လ္ၚောဝ်တုဲဟွံဇ ဂုဏ်မသန်ဗွဝ်
သွက်ဂကူရ ညးတၠနန်ထဝ်
မိက်ရေၚ်တၠုၚ်ကဵု ဂုဏ်ဖဵုဂၠိုၚ်ဗဝ်
ချူဗိုန်ဂၠိ “နဳတိ.. ယၟုဂးလဝ် ။
(က)
၁။ ကၠောန်လ္ပတာ်ဆ၊ မှာလ္ပဂွ။
ကၠောန်ယဝ်တော်ဆ ဝိရဳယအေယ်ဇြ၊
မှာယဝ်ဂွ ဒှ်မာန။
ကၠိုဟ်တုဲဟွံခိုဟ် သပ္ပုရိုဟ်ဟွံဒှ်၊
ၜိုဟ်တုဲဟၟဲဖိုလ် ၜိုတ်ကၠဵုဟွံဒှ်။
ယဝ်ပူဇဴကျာ် ဂၠိုင်သာ်ဒှ်ဖိုလ်၊
ယဝ်ရဴဂဴဓရ် ဟွံဒးသဝ်တွဵု။
ယဝ်သ္ပမာန်ကဵုကလော ဗွဲကြဴဒးဆဵုဝါတ်၊
ညးဝေတ်ယဝ်စာန်စး ဂွံစဳကၠးဝါတ်ဂါတ်။
ညးကဵုမှကၠောန် ကမၠောန်စေတနာဟွံဒှ်၊
ညးဒေါန်တုဲမှအာ မေတ္တာဒးအေဲကှ်။
ယဝ်ကၠောန်ဒှ်မ္ၚဵု ဇၟာပ်ညးဆဵုဒးစိုတ်၊
ရံၚ်ဗဵုယဝ်ဒှ်ဂုဏ် ဟွံရုန်မဵုချိုတ်ပၠိုတ် ။
ကောမ်တုဲယဝ်ပါ်ပါဲ ဇၟာပ်ဒၞါဲဂွံအံၚ်ဇၞး၊
ကောန်တုဲယဝ်ဂၠုက်ဂၠာဲ အန္တရာယ်လေဝ်ဂွံဗၠး ။
ကွးယဝ်ညေတ် ဟီုဝေတ်ဝါတ်ဂါတ်၊
ခါဝေတ်ယဝ်တီမ္ဂး ၜိုန်ဒးဍေံကေတ်ဝါတ် ။
ကွေတ်ယဝ်တပ်မ္ဂး ဂွံဗၠးဒဒိုက်၊
ယသပ်ယဝ်ခိုဟ်ပၠန် ဂွံၜိုဟ်ဒှ်တသိုက် ။
ကွေတ်ခိုဟ်ယဝ်တန် သောတာပန်ဒှ်လောဲသွာ၊
သဒ္ဓါယဝ်နွံ ဇၟာပ်ဘုံဂွံပြာထာ ။
ကုသိုလ်ဟွံဝိုတ်မ္ဂး ဂွံဗၠးအပါယ်ပန်၊
ဒပ်ယဝ်ကၠောန်မ္ဂး ဂွံဗၠးဝါတ်ဂါတ်ပၠန်။
ကုသိုလ်ယဝ်ကၠောန်မ္ဂး အပါယ်ဟွံဒးဂဗ ၊
အကုသိုလ်ယဝ်ပါဲ ဂွံဆာန်တိုန်ဇၟာပ်ဘဝ ။
ကၠာဟွံကၠောန်ယဝ်ချပ်မ္ဂး ဂွံအံၚ်ဇၞးလောဲလောဲ၊
ကသပ်ခိုဟ်ယဝ်နိဿဲ ညံၚ်တ္ၚဲဂွံသၠုၚ်ပြဲ။
ယဝ်ဗၟက်ကောန်ၚာ်မ္ဂး ဒးဒုက်လက်ကြာန်၊
ထေဲတုဲယဝ်ဒက်ဝဲ နူဘဲသၞအိုတ်ဟွံမာန်။
ကျတုဲယွံကြာန် မၞိဟ်ဆာန်ဟွံဟွံမဲ၊
မာန်တုဲယွံကြအ် ဟွံလအ်ဒှ်သၞဝဲ။
က္ဍုဟ်တုဲယဝ်ဒှ်သၞ ဒှ်ပွမၞိဟ်ယုတ်ကာဲ၊
ဆာန်တုဲယဝ်ဒှ်ဒုဟ် ဒးဒုၚ်ကဍုဟ်ဇၟာပ်ဒၞါဲ။
ကဵုဒါန်ယဝ်ဟွံကၠး ၜိုတ်သၠးဟွံဒှ်ဖိုလ်၊
ထိုၚ်သးယဝ်ဟွံလေပ် မံၚ်ကြေပ်ဒၟံၚ်တွဵု။
ကေတ်ဗြဴယဝ်ဟွံရုဲစှ် ကြဴဒှ်ဒဒိုက်၊
ခတှ်နွံယဝ်ဟွံလဴ ညံၚ်ဂၠဴညးဍဵုဍိုက်။
ကေတ်ဒြပ်ယဝ်ဟွံကၠောန် ဒှ်ကမၠောန်သမၠီု၊
ကောန်ကောန်ယဝ်ဟွံဂၠာဲဗြဴ ဒှ်ညံၚ်လဴဝေၚ်ပုံ။
ကဵုဒါန်ယဝ်ချိၚ်ဆ လအ်စေတနာအေဲဇြ၊
သဳလယဝ်လီု ဒးဟောမ်ဗြီုဘဝ။
ကၠညးယဝ်တဵု ဂုဏ်ဖိုလ်ဟွံတန်၊
ကၠဵုညးယဝ်လွဳ ကြဴဍေံကဳဇကုပၠန်။
ကမ်သၟးယဝ်ဖျေံစိုတ် ဒှ်ဟိုတ်လေၚ်ဒိုက်၊
အိုတ်တုဲယဝ်ဍောၚ်စိုတ် ဒှ်ဟိုတ်ယဲဍဵုဍိုက်။
ကမၠောန်ဂှ်ထေၚ်သဝ် ဇၟာပ်ကဝ်ဟွံဇၞော်မောဝ်၊
ချပ်လဝ်ဂှ်ယဝ်ယှအ် ဆလအ်ဟွံမံက်ဂတဝ်။
ကွေတ်မှာယဝ်ကေတ် ဒဒိုက်ဇေတ်ဒးဆဵု၊
ဒဂေတ်ခိုဟ်ယဝ်ကၠဟ် ဒှ်မၞိဟ်ရုန်မဵု။
ကွတ်ခိုဟ်ယဝ်ကေတ်လဝ် ဟွံဒးသဝ်အာ၊
ကွတ်သဝ်ယဝ်ပါဲ ဇၟာပ်ဒၞါဲဂွံသံက်သာ။
ကျာ်သြဳမၚ်မွဲမှ ညးပမၞိဟ်ခိုဟ်၊
စိုတ်ခိုဟ်နွံမှ ဘဝဂတဂွံၜိုဟ်။
ယဝ်ကွေတ်ဗၠေတ် ဒဒိုက်ကေတ်ဟွံမာန်၊
ယဝ်ဒဂေတ်မုတ် ဒးဟုတ်ဇၟာပ်ဌာန်။
ယဝ်ကွေတ်ဍာံပြ သောကဗၠးလောဲ၊
ယဝ်သဳလနွံ ဇၟာပ်ဘုံဂွံပြဲ။
ယဝ်ကြံကြ ဝဲသၞထုဲၜန်၊
ယဝ်စွံဝဲသၞ သောကဒှ်ပၠန်။
ကေတ်ယဝ်ဟွံညှာ စေတနာညးလီု၊
ကဵုဏာယဝ်ဟွံချိၚ် ဒှ်ဓဝိၚ်စိုတ်လီု။
ကေတ်ဗြဴတုဲဟွံတ္ၚအ်မ္ဂး ဟွံဗၠးဝါတ်ဂါတ်၊
ကေတ်ကၠအ်တုဲဟွံတဵု ဂုဏ်ဖိုလ်ဟွံညာတ်။
ကဵုသၞယဝ်ဒက်ဝဲ ဒဒိုက်ဟဲဟွံမာန်၊
ကဵုရဲယဝ်တ္ၚဲစၞာဲ ဒြပ်လာဲလေၚ်မနာ်။
ဟွံကၠိုဟ်တှ်ေ ညးကော်အၚိုက်၊
ဟွံဍိုဟ်တှ်ေ ညးကော်အဝိုက်။
ကွေတ်ခိုဟ်ယဝ်ဟွံတီ ဒးတ္ၚီဗၠိုက်လၟိုန်၊
ဗၠိုက်တၞီယဝ်ဟွံကၠိုဟ် ဂၠံၚ်ခိုဟ်ဟွံဗိုန်။
ကမၠောန်ခိုဟ်ယဝ်တ္ၚဲအ် ဟွံလအ်ဒှ်တသိုက်၊
ရန်တၟံယဝ်နွံမှ ဝိရဳယဟွံလီုလာ်။
ကၠိုဟ်တုဲဟွံလွဳ ဒှ်ကၠဵုကဳပုၚ်၊
ညဳတုဲဟွံကၠောန် ကောန်ဂကူဟွံသၠုၚ်။
ဟွံကေတ်ကုသဵုယဝ်သ္ပခမဳ ဒှ်ခါခၞဳသာသနာ၊
ကေတ်ပါရမဳယဝ်ဟွံအေၚ် ဒးလေၚ်ဒိုက်အာ။
ကြာန်ကြာန်ယဝ်မံၚ် ညးဆံၚ်အဲချဟ်၊
ယံၚ်ယံၚ်ယဝ်ကၠောန် ကမၠောန်ဂှ်လီုပြဟ်။
ကၠးကၠးယဝ်ဟီုဂး ၚုဟ်မးဂလာန်ဒှ်၊
ဒးဒးယဝ်ဖနဏာ ပြာထာဂွံဒယှ်။
ယဝ်ကမ်ခိုဟ် ဂွံၜိုဟ်သိုဟ်လောဲ၊
ယဝ်ကၠိုဟ်မ္ဂး ဂွံဗၠးသၞဝဲ။
ကေတ်ယဝ်ဟွံအာတ် ဒှ်ဝါတ်ညးတၞဟ်၊
ဟွံညာတ်ယဝ်ဟွံသၟာန် ဆဵုမာန်ဟွံဒှ်။
ကၠောန်သီုစေတနာမ္ဂး ဂွံအံၚ်ဇၞးလောဲ၊
အာသီုမေတ္တာမ္ဂး ဟွံဒးဆဵုဘဲ။
ယဝ်ကြံၚ်ကဵုသၞ ဆလအ်ဟွံၜိုဟ်၊
ယဝ်ပံၚ်ကဵုသမၠီု သီုသ္ၚိဟွံခိုဟ်။
သီုညာဏ်ယဝ်ကၠောန် ကမၠောန်တုဲပြဟ်၊
ဂစာန်သီုဇဲ ဂၠိၚ်သ္ၚောဲဟွံဒှ်။
ဖဵုဟွံညာတ် စိုတ်ဓါတ်ဍိုန်လျ၊
ဒုဟ်ဟွံဆဵု ရုန်မဵုဇၟာပ်ဘဝ။
သီုဍုဟ်သီုကေတ် ဍေံဗၠေတ်ဂၠံၚ်ရ၊
သီုလၞုဟ်သီုဂွ မာနဒှ်ရ။
ကၠောန်သောၚ်မ္ဂး ဂွံဗၠးထုဲကြာန်၊
အခေါၚ်ကၠိုဟ် ဂွံခိုဟ်စမာန်။
ဟွံဍိုဟ် ဂၠံၚ်ခိုဟ်ဟၟဲ။
ဟွံကၠိုဟ် ဂွံခိုဟ်ဟွံလောဲ။
သဘာဝဟွံကၠိုဟ် ဂၠံၚ်ခိုဟ်ဟၟဲ၊
မာနဟွံတီ ဒးဗၠိုက်တၞီလောဲ။
ဂၠံၚ်တပ်ယဝ်ကွာ် လီုလာ်ဟွံလောဲ၊
ယဝ်ရပ်အဓိဋ္ဌာန် ဒှ်မာန်လောဲလောဲ။
ကၠောန်စိုတ်ယဝ်ယံၚ် အံၚ်ဇၞးဟွံမာန်၊
ကွာ်ဂၠံၚ်ဟွံနက် ညးဗက်သီုကွာန်။ ။
(ခ)
၅၂။ ခိုဟ်မ္ဂးဗတောန် ဂျိုၚ်မ္ဂးဒးကၠောန်။
ခိုဟ်ယဝ်ဟွံဗတောန် ဒးအောန်စိုတ်ဇၟာပ်ဒၞာဲ၊
ဂျိုၚ်မံၚ်ယဝ်ဟွံကၠောန် ဒှ်ကောန်မၞိဟ်ဟွံဆာဲ။
ယဝ်ချပ်ၜိုဟ်ၜိုဟ် ကသပ်ခိုဟ်ဒှ်လောဲ၊
ယဝ်ကၠောန်ခိုဟ်ခိုဟ် ညးအိုဟ်တၟိုဟ်ဟွံဖဲ။
ချိုတ်ယဝ်ဂွိၚ်မ္ဂး စိုတ်ဒးလီုလာဲ၊
အခိၚ်ယဝ်ဖအိုတ် ကြဴစိုတ်ဒှ်ဒဒိုက်။
ခိုဟ်မံၚ်ယဝ်ဟွံအေၚ်ဒုၚ် တုပ်ညံၚ်ၜုၚ်ဖျေံအပါဲ၊
ပြဲဂှ်ယဝ်ဟွံဇြုၚ်သ္ဍိုက် တုပ်ညံၚ်ယိုက်ဖျေံနရက်။
ခိုဟ်မံၚ်ယဝ်ထေဲထုတ် ညံၚ်ပြိုက်စုတ်လ္ၚပၟတ်၊
ညးယုတ်ယဝ်ပံၚ် အရာဂၠံၚ်ဟွံဒးနှောတ်။
ခိုဟ်ပြဲယဝ်ရန်တၟံ ဟွံလအ်ဂွံသၠုၚ်ပြဲ၊
ဟွံဒးကအ်ဟွံစမ္ဂး သွက်ဒးမှာဟွံမွဲ။
ခါဂွံယဝ်မိပ် ဒှ်ဟိုတ်မာနသၠုၚ်လောဲ၊
ခါအိုတ်ယဝ်ဍောတ်စိုတ် ၜိုတ်ချိုတ်ဒဒိုက်ဟွံဟဲ။
ချပ်ယဝ်ရမှာ ဂၠံၚ်သာတိုန်ဟွံမွဲ၊
ဖန်ဏာယဝ်ရဗၠေတ် ညးကေတ်စဟွံမွဲ။
ချပ်ယဝ်ဟွံယှအ် ဟွံလအ်ကၠေၚ်ဍဟ်လှဲ၊
ရန်တၟံယဝ်သၠုၚ်ပြဲ ပွယုတ်မွဲဒှ်ဟွံလောဲ။
ယဝ်ဟီုဟွံချပ်ဗစာ ဗၠေတ်မှာဒှ်ဂၠိုၚ်၊
ဟွံရံၚ်အစောမ်တုဲယဝ်ဟီု ဒှ်သမၠီုရိုၚ်ရိုၚ်။
ဟွံချိုတ်ဏီထောံလွဳမ္ဂး ကြဴဒးဆဵုကျာတ်၊
ဟွံပေၚ်ဇဳဒေါံမ္ဂး ကြဴဒးဝါတ်ဂါတ်။
ယဝ်ချပ်သီုညာဏ် ဒှ်မာန်တုဲပြဟ်၊
ယဝ်ဟီုဂလာန်သီုသတိ ကလိဂွံဒယှ်တှ်။
ကၠောန်ဗီုဍိက်မှ အတိုၚ်ပၟိက်ဍိုက်ပေၚ်၊
နွံပၟိက်ဗီုဨကရာဇ်မှ လညာတ်ပြဲဗၠးလေၚ်။
ခိုဟ်ဂှ်ကၠောန်မှ ထာဝရၜိုဟ်သြိုဟ်၊
ဍာံပြဂှ်သ္ပမှ ဘဝဂတဂွံခိုဟ်။
အခိၚ်သောၚ်ယဝ်ချပ် လညာတ်တပ်ဒှ်လောဲ၊
ပွတပ်ယဝ်ကၠောန် ဂွံစောန်ဂွံပြဲ။
ခိုဟ်ဂှ်ယဝ်ခဍန် ဒုဟ်ဒန်ဟွံဗၠး၊
ဒၞာဲဗဒန်ယဝ်ဟီု မိတ်လီုပြးဇး။
ဟွံကၠိုဟ်အခေတ် ၜေတ်ညးဟွံမာန်၊
အခိၚ်ခိုဟ်ဟွံတီ ဗၠိုက်တၞီဒှ်ကြာန်။
ခိုဟ်ကေတ်မဂး ဗၠးသောကလောဲ၊
ဗၠေတ်ပါဲမဂး ဟွံဒးစုတ်စောဲ။
ခိုဟ်ဂှ်ဂၠါဲမှ ကၠောန်ပအံၚ်ဇၞး၊
ဟွံခိုဟ်ပါဲမှ သောကဗၠး ။ ။
(ဂ)
၇၁။ ဂွံတုဲကဵုဒှ်ၚုဟ် ဘဝလၞုဟ်လ္ပကဵုဒှ်။
ဂွံတုဲၚုဟ်ဟွံဒှ် တုပ်သၟဟ်တဲပိုတ်ပိုတ်၊
ဘဝလၞုဟ်ယဝ်ဒှ် တုပ်သၟဟ်မၞိဟ်ချိုတ်ချိုတ်။
ယဝ်ဟီုဂုဏ်ညး ညးဒးသ္ဍိုက်ဆာန်၊
ဝါသနာဗျိယဝ်ဖအောန် ကောန်နွံဇြဟာန်။
ဂုဏ်စယဝ်ဒ္ဂေတ်လီု မၞိဟ်ဒိုဟ်ဓီုညးကော်၊
ဂုဏ်ဓီုယဝ်စိုတ်ကြာန် အ္စာဟွံဆာန်ဒှ်ဒဒိုက်ဇၞော်။
ဂုဏ်ပါၚ်ယဝ်ဂြက် ညံၚ်ရေက်ထေက်ဝေၚ်ပါၚ်၊
ဂုဏ်ဗၟက်ယဝ်ဒှ်သၞ ညံၚ်သွခိုဟ်ဒးအိက်စာၚ်။
ဂတကွးယဝ်ဂြိုၚ်ထတ် ဇြဟတ်ဂျိဟွံကာန်၊
ဟွံဂွံစမ်ၜတ်ယဝ်ဒေါန် ခါလောန်နုက်ဝါတ်။
ဂုဏ်ပါၚ်ယဝ်ညးက္ဍုဟ် ဟွံဗၠးဒုဟ်ဒန်၊
ဂုဏ်လၞုဟ်ယဝ်ဝါတ် ဒှ်မၞိဟ်လညာတ်ဍန်။
ဂုဏ်စယဝ်ယဲ ဒှ်နယ်သမၠီုယုတ်၊
ဂုဏ်စောဲဒးစံၚ်တူ ကော်ခဴမၞိဟ်ဂြုတ်ဂြုတ်။
ယဝ်ဂၠာဲဟွံလေပ်မ္ဂး ဂွံဗၠးဒဒိုက်ဝါတ်၊
ဂွံတုဲယဝ်ဒေပ်ဟွံဒး ညးဂးမၞိဟ်ဝိုက်ဝိုက်။
ဂလာန်ယာဲတယဝ်စး ဒဒိုက်သၟးဒးဆဵု၊
သ္ပကွးယဝ်လၞုဟ် ဘဝလၟုဟ်ဟွံဒှ်မ္ၚဵု။
ဂကူယဝ်ကၠာဲ ဂွံဆာဲတိုန်ဝါတ်သန်၊
မၞိဟ်စိုတ်ဆာဲယဝ်ကၠဟ် ဂၠံၚ်ခိုဟ်ဂှ်ကၠေံဗ္ဒန်။
ဂုဏ်ထေဲယဝ်လေၚ် ဂွံကလေၚ်ပေၚ်ဝါတ်ပၠန်၊
ဂုဏ်ပၠေၚ်ယဝ်ဝါတ် ဒှ်မၞိဟ်လညာတ်ဍန်။
ယဝ်ပၟဝ်ဂုဏ်ကျာ် ဂၠိုၚ်သာ်ဂွံဖိုလ်မာန်၊
ယဝ်ဗက်ဗၞုဟ်ဂုဏ်ဓရ် ဍုၚ်သွဝ်ဂွံစိုပ်မာန်။
ဂလာန်မိမယဝ်ကၠဟ် ဂွံဒှ်တသိုက်ဝါတ်၊
ကာတ်မြဟ်ယဝ်ဟီု အိုတ်သီုဒးကျာတ်။
ဂုဏ်သအေတ်ယဝ်ဝါတ် ဒှ်မၞိဟ်လညာတ်ဍန်၊
ဂုဏ်ကျာတ်ယဝ်ကြံ မကမ်စိုပ်ဗုၚ်ပၠန်။
ဂၠာဲဒြပ်ယဝ်စွံမာန် ပိုန်ဟာန်ဒှ်ဝါတ်၊
ဂၠာဲဇြဟာန်ယဝ်ထ္ၜးဒြပ် အတိုၚ်ချပ်ဒှ်ဝါတ်။
ဂံၚ်မံၚ်တွဵု ဒတုဲဖိုလ်လေၚ်၊
ယံၚ်မံၚ်တွဵု တ္ၚဲလဵုဟွံပေၚ်။
ဂုဏ်လွဳယဝ်မှာ ဒှ်မၞိဟ်ပညာအောန်၊
ဂုဏ်အာယဝ်ဒုဟ်ဒှ် မၞိဟ်ဂှ်ဝိုက်လောန်။
ဂုဏ်ဒြပ်ယဝ်ညးဍုဟ် ၚုဟ်မးဒြပ်အောန်၊
ဂုဏ်လၞုဟ်ယဝ်လေၚ်ဒိုက် ဒှ်မၞိဟ်ၚိုက်လောန်။
ဂုဏ်ညးယဝ်တၠိၚ် အခိၚ်လဵုဟွံမွဲဖိုလ်၊
ဓဝိၚ်ညးယဝ်ကေတ်မံၚ်ၜေတ်ဒၟံၚ်တွဵု။
ဂုဏ်ဟီုယဝ်ဆာန် ဇြဟာန်ဇေတ်ဟွံဒှ်၊
ဂုဏ်ဌာန်ယဝ်ပြး မၞိဟ်ကၠးဟွံဒှ်။
ဂုဏ်ကုသဵုယဝ်လေၚ် ဒှ်ပၠေၚ်ဇကု၊
ဂုဏ်အေၚ်ယဝ်ဒှ်သၞ ဒှ်မၞိဟ်အအ ။
ဂုဏ်လေၚ်ယဝ်ကၠိုဟ် မၞိဟ်ဂှ်ခိုဟ်ဟွံမာန်၊
ဂုဏ်ခိုဟ်ယဝ်ဟွံတီ မွဲတ္ၚဲတ္ၚီဗၠိုက်မာန်။
ဂုဏ်သြန်ယဝ်ဆာန် ကြဴကြာန်ဒှ်ဂွံ၊
ဂုဏ်ဌာန်ယဝ်ဍုဟ် မံၚ်သၟးဒုဟ်ဂွံ။
ဂုဏ်ပါၚ်ယဝ်ဒှ်ဒုဟ် ဒှ်ပါၚ်ၚုဟ်ဟွံမဲ၊
ဂုဏ်က္ဍုဟ်ယဝ်ဒြပ်လေၚ် ဒှ်ပၠေၚ်ဇကုမွဲ။
ဂၠံၚ်ခိုဟ်ယဝ်ကေတ် တသိုက်ဇေတ်ဒှ်မာန်၊
ဂၠံၚ်ဗၠေတ်ယဝ်ပါဲ ဂွံဆာဲဇၟာပ်ဌာန်။
ဂုဏ်ယာဲယဝ်ပါဲ အန္တရာယ်ကၠုၚ်စိုပ်၊
ဂုဏ်ယာဲယွံဓဇန် လညာတ်ဍန်ဟွံတပ်။
ဂုဏ်ပါၚ်ယဝ်ကအ်ပိုတ် ဒှ်မၞိဟ်အိုတ်ဍာ်၊
ဂုဏ်စိုတ်ယဝ်ဍောၚ် အခေါၚ်ဇၞော်မောဝ်လီုလာ်။
ဂုဏ်ဝါတ်ယဝ်ဒှ်ဝဲ ညးမွဲဟွံရီုဗၚ်၊
ဂုဏ်လောဲယဝ်ကျာတ် ၜိုတ်ဝါတ်ဒှ်ဟွံဒှ်ဟေၚ်။
ဟွံကၠိုဟ်ဂုဏ်ဒါန် ပိုန်ဟာန်ဒးဝါတ်ပၠန်၊
ဂုဏ်ခိုဟ်ဟွံတီ ဒးတၞီဗၠိုက်ဨကန်။
ဂုဏ်မသယဝ်ဟုတ် ၜိုတ်ခဒုတ်ဟွံပြဲ၊
ဂုဏ်ယုတ်ယဝ်ဒိုက် တသိုက်ဆဵုဟွံလောဲ။
ဂုဏ်ညးယဝ်ကျောဝ် ဂွံဇၞော်မောဝ်၊
ဂုဏ်တၞောဝ်ယဝ်ရံၚ် ဂၠံၚ်ယုတ်ဟွံလၟောဝ်။
ဂုဏ်ဒြပ်ယဝ်လေၚ် ဒှ်မၞိဟ်ဟွံပေၚ်အှ်ေ၊
ဂုဏ်ပၠေၚ်ယဝ်ဝါတ် ကောန်ဇာတ်ဟွံရှ်ေသှ်ေ။
ဂုဏ်စယဝ်ဒးဒုဟ် ခေတ်လၟုဟ်မၞိဟ်ယုတ်အိုတ်၊
ဂုဏ်လၞုဟ်ယဝ်ဒှ်ဝဲ ဟွံသၠုၚ်ပြဲစဵုချိုတ်။
ယဝ်ဟွံထဗဂၠံၚ်လီု ဟောမ်ဗြီုသီုဂကူ၊
ယဝ်ဟွံပါဲမာန် ဒးထဗစံၚ်တူ။
ဂုဏ်ပါၚ်ရာၚ်ဆာဲမှ ဝဲသၞလလမ်၊
ဂုဏ်သဟာဲဇၞော်မောဝ် တသိုက်ဂေါဝ်ဂီုကၠီု။
ဂုဏ်ဍေံယဝ်ဂြုဲမ္ဂး မံၚ်သၟးဒးယုတ်သဝ်၊
ဂုဏ်ထုဲယဝ်ချိုတ်မ္ဂး ဟွံဒးကဵုဓရ်။
ဂကူယိုက်ဒိုက်မှ ပ္ဍဲလိုက်ဇၞော်မောဝ်၊
အခိုက်မၚ်မွဲမှ သ္ပမၞိဟ်ဆာဲဂေါဝ်။
ဂုဏ်ဒြပ်ပြးဆာဲမ္ဂး မၞိဟ်မှးဟွံဒှ်၊
ဂုဏ်အာဲဒှ်သၞမ္ဂး ဟွံဗၠးဗျိညးတၞဟ်။
ဂုဏ်ညးယဝ်ပလီု ဒှ်သမၠီုယုတ်၊
လဟီုညးယဝ်ဆေဝ်တာ မေတ္တာညးဟုတ်။
ဂုဏ်ဆာန်ယဝ်ချိုတ်မ္ဂး ၚုဟ်မးဟွံမဲ၊
ဂုဏ်စိုတ်ယဝ်ကြအ်မ္ဂး ဂွံဗၠးဟွံလောဲ။
ဂၠာဲဟွံလေပ်မ္ဂး ဟွံဗၠးဒဒိုတ်ဝါတ်၊
ဂိုၚ်ဒေပ်ဟွံဒးမ္ဂး ဟွံလအ်ဒးကျာတ်။
ဂၠာဲယဝ်ဟွံဆဵု ဟွံပြေစိုတ်ဍောၚ်၊
ရံၚ်ဗဵုယဝ်ဟွံညာတ် မံၚ်ကျာတ်ဟွံသောၚ်။
ဂုဏ်ဒြပ်ယဝ်ဟုတ် မၞိဟ်ယုတ်ဟွံမှး၊
ဂုဏ်ယုတ်ယဝ်ချိုတ် ဒဒိုစိုတ်ဟွံဗၠး။
ဂုဏ်ပြိုၚ်ယဝ်ချိုတ် ဒှ်ဟိုတ်စိုပ်အပါဲ၊
ဂုဏ်အိုတ်ယဝ်ယုတ်သဝ် ဇၟာပ်ကဝ်ဟွံဆာဲ။
ဂွံပညာတုဲယဝ်ဟွံကၠောန် ဒှ်ကောန်မၞိဟ်ဝိုက်၊
ဂွံကောန်ယဝ်ဟွံဝေတ် ဒးဂေတ်လီုလာ်။
ဂၠံၚ်ခိုဟ်ဂှ်အာ ဟွံမှာတွဵုရ၊
ဂၠံၚ်မှာဒေါံမ္ဂး ဂွံဗၠးသောက။
ဂိုဏ်ှ်ယဝ်စောဲဂၠိုၚ် ဒှ်ဂရိုၚ်သပ္ပရိုဟ်၊
နာမ်မြိုၚ်ဂှ်ယဝ်ထေၚ်ဇၞော် ဒှ်ဗော်ညးဟွံကၠိုဟ်။
ဂုဏ်ဂိုဏ်ယဝ်လိုလာ် ဂကူဗၠိုက်အိုတ်၊
ဂုဏ်အခိုက်ယဝ်ယောၚ်ယာ ဘာသာဟုတ်ပၠိုတ်အာ။
ဂုဏ်နွံဂှ်ယဝ်ဟွံထိၚ် ဇၟာပ်အခိၚ်ဟွံမဲဖိုလ်၊
ထဝိၚ်ခိုဟ်ယဝ်ဟွံစွံ ညံၚ်ထောံဖျေံဂုဏ်ဖိုလ်။
ဂုဏ်တ္ၚံက်ယဝ်လေၚ် မၞိဟ်ပၠေၚ်ဂကူရ၊
ဂုဏ်ပၠေၚ်ယဝ်ကျာတ် မၞိဟ်မာတ်တသိုက်ရ။
ဂုဏ်ထေၚ်ယဝ်ကျာတ် ဒှ်လညာတ်ဍန်၊
ဂုဏ်အာတ်ယဝ်က္ဍုဟ် ဘဝလၟုဟ်ဒးကၠိခန်။
ဂၠံၚ်ဒးယဝ်ဗကန် ဒုဟ်ဒဏ်ဟွံလောန်၊
အခိၚ်တန်ယဝ်ရာန် ပိုန်ဟာန်အိုတ်အောန်။
ဂုဏ်လေပ်ယဝ်ကျာတ် ဒှ်လညာတ်ဍန်၊
ဂုဏ်ညာတ်ယဝ်ဒှ်ဝဲ ဂုဏ်ပရဲဟွံတန်။
ယဝ်တၠိၚ်ဂုဏ်ကွာန် မၞိဟ်ဆာန်ယာဲဟွံသေၚ်၊
ယဝ်ကၠဟ်ဂုဏ်သၟိၚ် ထဝိၚ်ဒးဆဵုဟေၚ်။
ဂတမၞိဟ်ယဝ်ဒေါန် ၚုဟ်ကောန်စှ်ေအိုတ်၊
ဂတကောန်ယဝ်ရိုၚ် ယေန်သၞာၚ်လီုအိုတ်။
ဂုဏ်ဝါတ်ယဝ်လီုလာ် ဂၠိုၚ်သာ်ဒှ်အန္တရာယ်၊
ဂုဏ်သိုက်ယဝ်သၠုၚ် ညံၚ်ၜုၚ်ဖျေံအပါဲ။
ဂုဏ်ချိၚ်ယဝ်ယောၚ် အခေါၚ်ခိုဟ်လီုဒိုက်၊
ဂုဏ်အခေါၚ်ယဝ်လီု ဒှ်မၞိဟ်ဓီုဝိုက်။
ယဝ်လီုဂုဏ်ဗြဴ ညးလဴဒုဟ်ပေၚ်ကွာန်၊
ဂုဏ်လမျီုယဝ်ယုတ် ဒးဟုတ်ဇၟာပ်ဌာန်။
ဂုဏ်ပတှ်ေယဝ်လေၚ် ဂွံပေၚ်ပၠန်ဟွံလောဲ၊
ဂုဏ်အေၚ်ယဝ်လီု အရီုဗၚ်ဟၟဲ။
ဂုဏ်နွံယဝ်ဆာန် ကြာန်ဍေံဟွံဒှ်၊
ပံၚ်မာန်ယဝ်ကေတ် သၞဇေတ်ဟွံဒှ်။
ဂုဏ်အဝဵုယဝ်လီု မၞိဟ်ရီုဟၟဲ၊
ဂုဏ်လမျီုယဝ်ယုတ် ဒးဟုတ်လောဲ။
ဂွံအခေါၚ်ယဝ်ကြာန် မၞိဟ်ဆာန်ဟၟဲ၊
ဂွံဌာန်ယဝ်လီု သမၠီုဟွံတီဂုဏ်ပြဲ။
ဂွံအဝဵုဟွံဒှ်မ္ၚဵုမ္ဂး ဟွံဗၠးဂရိုဟ်ညး၊
ဂွံဆဵုဂုဏ်ဟွံဒှ် ဗျဟ်လောန်ညးဂး။
သြန်ပလီုသၞောဝ် ဟွံဇၞော်မောဝ်၊
ရီုဒှ်သၞ ပွဂှ်ဟွံဂပ်ဂေါဝ်။
ဟွံဆဵုဂုဏ် ရုန်မဵုလောဲ၊
ဟွံဆဵုဒဒိုက် တသိုက်ဇမ္ၚောဲ။
ဂွံဒှ်ဖဵုမဂး ဒှ်ဒြပ်ဗၠးဝဲ၊
သၠးဒှ်ဂုဏ်မဂး ၚုဟ်မးသၠုၚ်ပြဲ။ ။
(ဃ)
၁၃၇။ ဃောညးထေဲလ္ပဟီုဒုဟ် ဃောညးလၞုဟ်လ္ပစကာ။
ဃောညးထေဲယဝ်ဟီုဒဟ် ဒှ်ဂဍုဟ်လောဲသွာ၊
ဃောညးလၞုဟ်ယဝ်စကာ ယံၚ်လောဲသွာ။
ယဝ်ချပ်ဃရေက် ဟွံဇြိုဟ်နက်ရ၊
အတိုၚ်ချပ်ယဝ်ဟီုဖအိုတ် ဒှ်ဟိုတ်လီုလောဲရ။
ဃောဒိုက်ဟွံဟေၚ်ဆာဲ ဇၟာပ်ဒၞာဲဒးဍောၚ်ၜိုတ်၊
ဃောဲဂၠာဲဟွံအေၚ် ဟွံပေၚ်စဵုချိုတ်။
ဃောဆာန်ယဝ်ဝေတ် ဍေံကေတ်စလောဲ၊
ဃောဗၠေတ်ယဝ်ဟီုထ္ၜး ဍေံသေၚ်ကၠးလောဲ။
ဃောကၠောန်ယဝ်ရံၚ်ဒုဟ် စိုတ်လၞုဟ်ဂွံဒၞါဲ၊
ဃောဍုဟ်ယဝ်တက်ကျာ ရေဝ်မှာဒှ်အန္တရာယ်။
ဃောခိုဟ်ယဝ်ယုတ် ကျာ်သြဳဟုတ်ပၠိုတ်၊
ဃောဟုတ်ယဝ်ကြာန် ညးကွာန်ဂစိုတ်။ ။
(ၚ)
၁၄၃။ ၚုဟ်မးဘဝကဵုဂွံကၠိုဟ် သပ္ပရိုဟ်ဂှ်နိဿဲ။
ၚုဟ်ဘဝယဝ်ကၠိုဟ် ကမၠောန်ခိုဟ်ဒှ်လောဲ၊
သပ္ပရိုဟ်ယဝ်နိဿဲ မွဲတ္ၚဲဂွံခိုဟ်ပြဲ။ ။
(စ)
၁၄၄။ စကဵုဒှ်ဖိုလ် မံၚ်ကဵုညးဆာန်။
စယဝ်ဒှ်ဖိုလ် တ္ၚဲလဵုဟွံဒးယဲ၊
ယဝ်မံၚ်ကဵုညးဆာန် မၞိဟ်သ္ပာန်ကဵုဇကုဟွံမွဲ။
ယဝ်စိုတ်ထဝ်မ္ဂး ဟွံဒးဟီုဂၠိုၚ်၊
ယဝ်ဇြဟတ်နွံမ္ဂး ကၠောန်ဂွံၚုဟ်ဂၠိၚ်။
ယဝ်စိုတ်ကၠိ ကသပ်တၟိဒှ်ဟွံလောဲ၊
မံၚ်ပ္ဍဲသ္ၚိယဝ်ဓရ်ဟွံမဲ ဂြဲဂြက်ဒှ်သၞဝဲ။
စိုတ်ယဝ်ဟွံတန် ဒှ်လက်သန်မၞိဟ်ဟွံမာန်စိုတ်၊
ယဝ်ကၠောန်ဟွံဒးရး ညးဟွံဒးစိုတ်။
စိုတ်ယဝ်တပ်တး ဂွံဒုၚ်အထိုၚ်သးညးရ၊
သၟးသၟးယဝ်မံၚ်မ္ဂး ကြဴဒးဆဵုဒဒိုက်ရ။
စယဝ်လောန်ကာဲ အန္တာယ်ဒှ်ဍာံရ၊
ယဝ်စွံစိုတ်စၞာဲ ဂွံဆာဲတိုန်ဝါတ်ရ။
စိုတ်ဟွံမဲယဝ်ကၠောန် ကမၠောန်ဂှ်ဟွံအံၚ်၊
ညးဒေါန်ယဝ်ဂိ ညံၚ်သုၚ်ဂျိစိုတ်ဒးစံၚ်။
စယဝ်ဟွံဗစာ မှာလောန်တှ်ေချိုတ်၊
မှာဒၟံၚ်ဟွံပဠေဝ်မ္ဂး ဟွံဒးစဵုကဵုချိုတ်။
ယဝ်စိုတ်ၜတ် ဇြဟတ်ဍိုန်ဒှ်၊
ပ္ဍဲကွတ်ထေၚ်သောဲ လွဳမွဲအေဲကှ်။
ယဝ်စိုတ်ပြဟ် ကြဴဒှ်ဂမ်တူ၊
ၜိုတ်ဒှ်ယဝ်ဟီုမ္ဂး ဟွံဒးစံၚ်တူ။
ယဝ်စိုတ်ကြာန် မၞိဟ်ဆာန်ဇကုဟွံမဲ၊
ယဝ်ဂလာန်သကာတ် ညးညာတ်ဟွံပရဲ။
စဒၟံၚ်ယဝ်ဟွံဖဲ ဒှ်မၞိဟ်တဲဍိုန်၊
သၞဝဲယဝ်ဂလိုၚ် ဂွိၚ်ဂၠိုၚ်ကၠောန်စဟွံတိုန်။
စသုၚ်ဟွံချိၚ်ဆ ကာလယဲမှတီ၊
ကာလဟွံတီမ္ဂး မွဲတ္ၚဲဒးဗၠိုက်တၞီ။
စၟဳစၟတ်တုဲယဝ်သ္ပ ဍာံပြစိုပ်လအိတ်၊
တော်ဆတုဲယဝ်ဟီု ဟွံဒးလီုမိတ်။
စိုတ်ခိုဟ်နွံကၠာမှ ဒ္ဂေတ်ပွခိုဟ်ဒှ်လောဲ၊
ဓဝ်ဗစာနွံလၟိုန်မှ ဂွံဗၠးသၞဝဲ။
စိုတ်ခိုဟ်ယဝ်လွဳ ဇၟာပ်ဇဳဂၠံၚ်ဒှ်တသိုက်၊
မဂဳခိုဟ်ယဝ်ဂၠာဲ ဟွံဒးမာဲပ္ဍဲလိုက်။
စိုတ်ယဝ်ဍိုန်လျ မာနယုတ်သဝ်၊
မာနယဝ်စွံ ညံၚ်ပါဲထောံသွတ်။
စိုတ်ယဝ်ထိၚ် အာယုက်ဂၠိၚ်ခိုဟ်၊
ထဝိၚ်ယဝ်ဖအောန် ကောန်စိုတ်ၜိုဟ်။
ယဝ်စိုတ်သာ ကေၚ်ကာလီုလာ်၊
စေတနာယဝ်လီု ဟောမ်ဗြုံဂၠိုၚ်သာ်။
စိုတ်ပၠေၚ်ယဝ်ဟွံအေၚ် ဒးလေၚ်ဒိုက်၊
ပွလေၚ်ယဝ်ဟွံပါဲ ဟွံဆာဲပ္ဍဲလိုက်။
စိုတ်ယဝ်လီု ဂွံဂီုကၠီုဝါတ်၊
အာရီုယဝ်ဂၠိုၚ် ပခိုၚ်စိုတ်ဝါတ်။
ယဝ်စိုတ်ခိုဟ် ဂွံၜိုဟ်ဇၟာပ်ဒၞါဲ၊
ယဝ်ရကၠိုဟ် ဂွံခိုဟ်ဆာဲ။
ယဝ်စိုတ်ပါ ကၠောန်အာဟွံလၞုဟ်၊
စေတနာယဝ်ထတ် ဇြဟတ်ပေၚ်လၟုဟ်။
ယဝ်စိုတ်ၜတ် ဇြဟတ်ဍိုန်လျ၊
ယဝ်ဇြဟတ်ဍိုန် ဂၠံၚ်တိုန်ဟွံထဗ။
စိုတ်ယဝ်ဇြုၚ်ဗု ပွကုသိုလ်ဒှ်လောဲ၊
ဗဟုသုတယဝ်နွံ စုံရုံဂွံပြဲ။
စိုတ်ခိုဟ်ယဝ်လွဳ ဟွံဒးဟဳဗၠိုက်၊
ဓဝ်ညဳယဝ်ဂၠာဲ ဂကူဆာဲဗၠးဒဒိုက်။
ယဝ်စိုတ်ထတ် ဗိုန်ဗတ်ကၠောန်မာန်၊
ယဝ်ဇြဟတ်နွံ အလုံကမၠောန်သ္ပမာန်။
ယဝ်ဟွံထိၚ်စိုတ် ဒှ်ဟိုတ်လီုလာ်၊
ယဝ်ထဝိၚ်ဟွံမဲ ဆဵုဘဲဂၠိုၚ်သာ်။
စိုတ်ဂၠိၚ်မှ ထိၚ်ဒက်ဂကောမ်မာန်၊
ထဝိၚ်နွံမှ သၞဝဲဗၠးမာန်။
စိုတ်ဓါတ်ခိုဟ်မှ အာဂတမာန်၊
ဓဝ်ကၠိုဟ်နွံမှ သောကဟွံဗါန်။
စိုတ်ဟွံအး ယးတၟးဟွံလောဲ၊
ယဝ်ဟွံကၠး မံၚ်သၟးဒးဘဲ။
ယဝ်စိုတ်သာ ဒးမှာလောဲ၊
စေတနာလောန် ဒးအောန်စိုတ်လောဲ။
ယဝ်မၚ်မွဲစိုတ် ၜိုန််ချိုတ်ဒှ်မ္ၚဵု၊
ယဝ်ဖအောန်သၞဝဲ မိတ်ပြဲဂွံဆဵု။
စိုတ်လ္ၚုမဂး အံၚ်ဇၞးဝါတ်၊
ယၟုယဝ်လီု မၞိဟ်ရီုဟွံညာတ်။ ။
(ဆ)
၁၇၈။ ဆာန်မ္ဂးလ္ပစောဲ ဟွံမွဲမ္ဂးလ္ပလၞုဟ်။
ဆာန်တုဲယဝ်စောဲ ကြဴတဲဒးစံၚ်တူ၊
ဟွံမဲယဝ်ရလၞုဟ် ဘဝလၟုဟ်ဒှ်ဂမ်တဴ။
ဆာန်ဒၟံၚ်ယဝ်ကွးကၠိုဟ် ကွးခိုဟ်လီုအိုတ်၊
ဂွံခိုဟ်ပရအ်ဟွံညဳ ကွးချဳဒရိုက်အိုတ်။
ယဝ်ကၠောန်ဆဒှ် ကမၠောန်ဂှ်ဟွံချိုတ်ပၠိုတ်၊
ၜိုတ်အစောန်နွံယဝ်ထ္ၜး မၞိဟ်ကၠးညးဟွံစှ်ေစိုတ်။
ဆာန်တုဲယဝ်သာဲ ဒှ်သဟာဲယုတ်ယုတ်၊
ဆုဲတုဲယဝ်ဂြုဲ ဒှ်မၞိဟ်ဒုဲညဴၚ်ခဒုတ်။
ဆာန်အိုတ်ယဝ်ထ္ၜး ဍေံကလေၚ်စးဇကုပၠန်၊
ဟွံတီကၠးယဝ်ကဵု ဂုဏ်ဖိုလ်ဍေံဟွံတန်။
ယဝ်ဆာန်လောန် ကဟောန်ဒှ်သၞ၊
ယဝ်ဒေါန်ဂၠိုၚ် အတိုၚ်ဟီုဍေံဟွံသ္ပ။
ဆဵုသၚ်ယဝ်ပၚ်တဲ ဒှ်မ္ၚဵုပြဲတီကၠး၊
ညာတ်ရဲယဝ်ရေဝ်ဍာတ် ရဲဒါတ်စးဒးထိုၚ်သး။
ယဝ်ဆာန်မှာ မေတ္တာကှ်ဒှ်သၞ၊
ယဝ်ဗက်ပၟိက်တဏှာ သံသာဟွံပိုတ်ရ။
ဆန္ဒယဝ်ထတ် ဂွံပြာကဋ်တွဵု၊
ဇြဟတ်စိုတ်ယဝ်နွံ အလုံကမၠောန်မာန်တွဵု။
ဆဵုကမၠောန်ချပ်ဗ္စမှ ကာလကၠောန်ဗၠေတ်အောန်၊
ဆဵုမှာပါဲမှ ဒှ်ပွလုပ်ပၞောန်။
ဆၜိုတ်တီယဝ်ဒးဂၞပ် မၞိဟ်တပ်ဟွံဒှ်ရ၊
ဆၜိုတ်ခပ်ယဝ်ထေၚ်တုဲ ဒှ်ကၞုဲသိုၚ်သ္ၚိသၠ။
ယတ်ထိုၚ်သးဗြဴ ဍေံဟွံလဴဒုဟ်ဇကု၊
ယဝ်ဝေတ်ကွး ဍေံကၠးမ္ဂးဟွံထောံဇကု။
ဆဵုဒုဟ်ယဝ်ဟွံယံၚ် ဂံၚ်ကၠောန်ဂံၚ်သ္ပ၊
ဆဵုပွံၚ်ယဝ်ဟွံဗစာ ဂၠံၚ်မှာဂၠိုၚ်ရ။
ဆၜိုတ်စထေၚ်ခိုဟ် မၞိဟ်သၠိုဟ်တုပ်ကၠဵု၊
ဆၜိုတ်ကၠိုဟ်ထေၚ်စောန် လညာတ်အောန်ဟၟဲဖဵု။
ဆာန်တုဲယဝ်ပံၚ် ဒှ်ပွံၚ်နွံဂုဏ်၊
ယံၚ်တှ်ေယဝ်ဗ္စာ ပွမှာဟွံဍုန်။
ဆဆဵုယဝ်ကြာန် သ္ၚိဌာန်ဒးကၠဟ်၊
ဆဆဵုယဝ်ဆာန် ဒဒိက်ဗါန်ပြဟ်။
ဆာန်တုဲဟွံအေၚ်ဂှ် ဒှ်သၞဝဲ၊
ကေတ်ဍုၚ်ဟွံစန်ဒက် ဒှ်ကမၠောန်လက်ဂြဲ။
ဆက်ဆောမ်ဍိုဟ်မှ အာဂတမာန်၊
ကၠိုဟ်ခၠၚ်နွံမှ ကၠောန်ပဟွံဒှ်ကြာန်။ ။
ဇၟာပ်ဇြိုၚ်ယဝ်ယှအ် လွဳပအ်ညာဏ်ဓီု၊
ဇၟာပ်တ္ၚအ်ယဝ်ကၠောန် ခါလောန်စိုတ်လီု။
၂၁၃။ ဇၟာပ်ကၠောန်လ္ပထေၚ်ခိုဟ် ဇၟာပ်ကၠိုဟ်လ္ပထေၚ်ဒး။
ဇၟာပ်ကၠောန်ယတ်ထေၚ်ခိုဟ် သပ္ပုရိုဟ်ဟွံဒှ်၊
ဇၟာပ်ကၠိုဟ်ယဝ်ထေၚ်ဒး ဟွံဗၠးဗျိညးတၞဟ်။
၂၁၄။ ဇၟာပ်ဒၞာဲလ္ပပတှ်ေ ဇၟာပ်ပတှ်ေလ္ပထေၚ်ဒး။
ဇၟာပ်ဒၞာဲလ္ပပတှ်ေမ္ဂး ဟွံဗၠးဒးလေၚ်၊
ဇၟာပ်ပတှ်ေထေၚ်ခိုဟ် ဓရ်ၜိုဟ်ဟွံပေၚ်။
၂၁၅။ ဇၟာပ်ဒၞာဲလ္ပပြိုၚ် ဇၟာပ်ပရိုၚ်လ္ပကလၚ်။
ဇၟာပ်ဒၞာဲယဝ်ပြိုၚ် ဒှ်မၞိဟ်ရိုၚ်ရိ၊
ဇၟာပ်ပရိုၚ်ယဝ်ကလၚ် ဟွံဗၠးဒုဟ်တၚ်ဗျိ။
၂၁၆။ ဇၟာပ်ဒၞာဲလ္ပထေၚ်ကမ် ဇၟာပ်ဟီုလ္ပထေၚ်ဒး။
ဇၟာပ်ဒၞာဲထေၚ်ကမ် မၞိဟ်အမ်အမ်ညးကော်၊
ဇၟာပ်ဟီုထေၚ်ဒး ဟွံဗၠးသၞဝဲဇၞော်။
၂၁၇။ ဇၟာပ်ပညာလ္ပကတ် ဇၟာပ်ကွတ်လ္ပဗတောန်။
ဇၟာပ်ပညာယဝ်ကတ် ပဋိပတ်လီုအိုတ်၊
ဇၟာပ်ကွတ်ယဝ်ဗတောန် မှာလောန်စဵုချိုတ်။
၂၁၈။ ဇၟာပ်ဒၞာဲလ္ပကျိုၚ် ဇၟာပ်ကယျိုၚ်လ္ပလတက်။
ဇၟာပ်ဒၞာဲယဝ်ကျိုၚ် သၞဂၠိုၚ်ဒးဘယ်၊
ဇၟာပ်ကယျိုၚ်ယဝ်လတက် ဂုဏ်ကြက်ဟွံမဲ။
၂၁၉။ ဇၟာပ်ဒၞါဲဟွံခိုဟ် ဇၟာပ်ကၠိုဟ်ဟွံဒှ်ဂုဏ်။
ဇၟာပ်ဒၞါဲယဝ်ခိုဟ် ၜိုဟ်သိုဟ်လောဲ၊
ဇၟာပ်ကၠိုဟ်ယဝ်ဒှ်ဂုဏ် ရုန်မဵုဟွံမဲ။
၂၂၀။ ဇြဟတ်စိုတ်ဂှ်လွဳ ဇြဟတ်ညဳဂှ်ဂစာန်။
ဇြဟတ်စိုတ်ယဝ်လွဳ တသိုက်ဇဳဂွံမာန်၊
ဇြဟတ်ညဳယဝ်ဂစာန် လုံကွာန်ၜိုဟ်မာန်။ ။
၂၂၁။ ဇျာန်နူညးလ္ပကျိုၚ် ကယျိုၚ်တၟေၚ်လ္ပလတက်။
ဇျာန်နူညးယဝ်ကျိုၚ် မၞိဟ်ရိုၚ်ဇိုၚ်ဒှ်ဂွံ၊
ယဝ်လတက်ကယျိုၚ်တၟေၚ် ဒးဒုၚ်ထေၚ်သဝ်ဂွံ။ ။
ညးဟီုယဝ်ထေဲထုတ် လဟုတ်စှ်ေလောဲ၊
ညးဟုတ်ယဝ်ထေၚ်သဝ် ဒှ်ဓရ်မေတ္တာဟွံမွဲ။
၂၅၅။ ညးခိုဟ်လ္ပဣဿာ ညးမှာလ္ပကေတ်ဒုဟ်။
ညးခိုဟ်ယဝ်ဣဿာ ဒှ်လအာသမၠီု၊
ညးမှာယဝ်ကေတ်ဒဟ် ဒှ်ကဍုဟ်ညးဟီု။
၂၅၆။ ညးဝေတ်ဂှ်ထိုၚ်သး ညးစးဂှ်ပါဲထောံ။
ညးဝေတ်ဂှ်ထိုၚ်သးမှ ဒှ်တၠပညာ၊
ညးစးဂှ်ပါဲထောံမှ သောကသံက်သာ။
၂၅၇။ ညးယုတ်ဂှ်ပါဲ ညးဆာဲဂှ်ပံၚ်။
ညးယုတ်ယဝ်ပါဲ အန္တရာယ်ဟွံမွဲ၊
ညးဆာဲယဝ်ပံၚ် ဇၟာပ်ဂၠံၚ်ဂွံသၠုၚ်ပြဲ။
၂၅၈။ ညံၚ်ဂွံဒးပၠောပ်ကတောဝ် ညံၚ်ဂွံဂေါဝ်ဗတောန်။
ညးဂွံဒးပၠောပ်ကတောဝ် ဂွံဇၞော်မောဝ်ပြဟ်၊
ညံၚ်ဂွံဂေါဝ်ဗတောန် ဂွံစောန်ဒယှ်။
၂၅၉။ ညံၚ်ဂွံပတှ်ေဂှ်ပံၚ် ညံၚ်ဂွံပံၚ်ဂှ်ဖန်။
ညံၚ်ဂွံပတှ်ေယဝ်ပံၚ် ဟွံထုဲထံၚ်ရ၊
ညံၚ်ဂွံပံၚ်ယဝ်ဖန် ကောပ်ပၠန်ဍာံပြ။
၂၆၀။ ညံၚ်ဂွံကၠးဂှ်ဟီု ညံၚ်ဂွံလီုပကၠောန်။
ညံၚ်ဂွံကၠးယဝ်ဟီု မၞိဟ်လီုလေဝ်ခိုဟ်မာန်၊
ညံၚ်ဂွံလီုယဝ်ဟွံကၠောန် ကမၠောန်ဟွံဒှ်ကြာန်။
၂၆၁။ ညံၚ်ဂွံခိုဟ်ဂှ်လွဳ ညံၚ်ဂွံညဳဂှ်ဖန်။
ညံၚ်ဂွံခိုဟ်လွဳမှ ဒှ်တၠပညာ၊
ညံၚ်ဂွံညဳဖန်မှ ကၠောန်သပလောဲသွာ။
၂၆၂။ ညာတ်ညးကဵုဒှ်ဖဵု ကဵုညးကဵုဒှ်ဂုဏ်။
ညာတ်ညးဟွံဒှ်ဖဵု တ္ၚဲလဵုဟွံဒှ်မိတ်၊
ကဵုညးကဵုဒှ်ဂုဏ် ရုန်မဵုစဵုလအိတ်။
၂၆၃။ ညးဟီုကဵုဂိ ညးဗျိကဵုတီ။
ညးဟီုယဝ်ဟွံဂိ ဒှ်ရိပၞဟ်၊
ညးဗျိယဝ်ဟွံတီ ဒးတၞီဗၠိုက်ပြဟ်။
၂၆၄။ ညံၚ်ဂွံစှ်ေစိုတ်ဂၠာဲ ညံၚ်ဂွံဆာဲဂှ်လွဳ။
ညးဂွံစှ်ေစိုတ်ယဝ်ဂၠာဲ ဂွံဆာဲဒှ်မ္ၚဵု၊
ညးဂွံဆာဲယဝ်လွဳ တသိုက်ဇဳဂွံဆဵု။
၂၆၅။ ညာတ်မုက်လ္ပဆာန် မိၚ်ဂလာန်လ္ပသ္ဍိုက်။
ညာတ်မုက်ယဝ်ဆာန် ဒဒိက်ဗါန်ပြဟ်၊
မိၚ်ဂလာန်ယဝ်သ္ဍိုက် ဒးလေၚ်ဒိုက်ဒှ်။
၂၆၆။ ညာတ်ကဵုကေတ်လှဲ မၚ်မွဲကဵုခိုဟ်။
ညာတ်ယဝ်ကေတ်လှဲ မွဲတ္ၚဲဒှ်တသိုက်၊
ယဝ်မၚ်မွဲခိုဟ် ဂွံၜိုဟ်ဗၠးဒဒိုက်။
၂၆၇။ ညံၚ်ဂွံဆာဲဂှ်လွဳ ညံၚ်ဂွံညဳဂှ်ဖန်။
ညံၚ်ဂွံဆာဲယဝ်လွဳ ဌာန်ဇဳညးထိုၚ်သး၊
ညံၚ်ဂွံညဳယဝ်ဖန် ဨကန်ဟွံပါ်ဒကး။
၂၆၈။ ညးဝေတ်လ္ပထေၚ်လက် ညးဗၟက်လ္ပထေၚ်က္ဍုဟ်။
ညးဝေတ်ယဝ်ထေၚ်လက် ဝဲဗက်ဒှ်ဂွံရ၊
ညးဗၟက်ယဝ်ထေၚ်က္ဍုဟ် မံၚ်သၟးဒုဟ်ဒှ်ရ။
၂၆၉။ ညးကၠိုဟ်ဂှ်ပတိုန် ညးဍိုန်ဂှ်လွဳ။
ညးကၠိုဟ်ယဝ်ပတိုန် ဒှ်ကိုန်ဇၞော်မောဝ်၊
ညးဍိုန်ယဝ်လွဳ ခိုဟ်ဇဳဂွံဂေါတ်။
၂၇၀။ ညးလက်လ္ပဒက်ဝဲ ညးပျဲလ္ပဍောၚ်စိုတ်။
ညးလက်ယဝ်ဒက်ဝဲ ဖိုလ်ပြဲဟွံညာတ်၊
ညးပျဲယဝ်ဍောၚ်စိုတ် ဒှ်ဟိုတ်မံၚ်ကျာတ်။ ။
၂၇၁။ ဋာန်နဒးစုတ်ဓရီု ဒ္ဂေတ်လီုဒးပလေဝ်။
ဋာန်နဟွံစုတ်ဟရီု ဟွံစှ်ေဗီုပြၚ်န၊
ဒ္ဂေတ်လီုယဝ်ဟွံပလေဝ် ဟွံကျေဝ်ဇၟာပ်ဘဝ။ ။
၂၇၂။ ဌာန်ခိုဟ်ဂှ်မံၚ် ပွံၚ်ပြဲဂှ်ပံၚ်။
ဌာန်ခိုဟ်ယဝ်မံၚ် ဇၟာပ်ဂၠံၚ်ဂွံၜိုဟ်သြိုဟ်၊
ပွံၚ်ပြဲယဝ်ပံၚ် ပရေံမံၚ်ကလေၚ်ခိုဟ်။ ။
၂၇၃။ ဍိုန်ဍိုန်ဟီုဂး ဒးဒးရးရးကၠောန်။
ဍိုန်ဍိုန်ယဝ်ဟီုဂး ဂွံဇၞးညးလောဲ၊
ဒးဒးရးရးယဝ်ကၠောန် ကမၠောန်ဂှ်လီုဟွံလောဲ။
၂၇၄။ ဍောတ်လ္ပထေၚ်သောဲ ဇၞော်ပြဲလ္ပထေၚ်သၠုၚ်။
ဍောတ်ယဝ်ထေၚ်သောဲ မၞိဟ်တဲခိုဟ်ဟွံဒှ်၊
ဇၞော်ပြဲထေၚ်သၠုၚ်မ္ဂး ဗၠေတ်လေတ်ဒးဒှ်။
၂၇၅။ ဍာမ်ဍာမ်ဂှ်မံၚ် လ္ပာ်ဂၠံၚ်ဒးဂှ်ကေတ်။
ဍာမ်ဍာမ်ယဝ်မံၚ် ဇၟာပ်မၞိဟ်ဒးယိုက်ဒိုက်၊
ဂၠံၚ်ဒးယဝ်ကေတ် တၠပညာဇေတ်ညးသ္ဍိုက်။
၂၇၆။ ဍုန်သွၜဵုလ္ပဝိုတ် စိုတ်ဃိုတ်လ္ပနွံပၟိက်။
ဍုန်သွဝိုတ်ၜဵုမ္ဂး ၚုဟ်မးသွံဟွံမဲ၊
စိုတ်ဃိုတ်ယဝ်နွံပၟိက် ဒးထၞိက်ဒးပျဲ။
၂၇၇။ ဍိုဟ်လေဝ်ကဵုဒးရး ကော်ဂးကဵုဍိုန်ဍောတ်။
ယဝ်ဍိုဟ်ဒးရး ဂွံဗၠးအထေၚ်သဝ်ဏောၚ်၊
ကော်ဂးဍိုန်ဍောတ် ညးဒးနှောတ်ပ္ဍဲကတောဝ်။
၂၇၈။ ဍာမ်ဂှ်ကေတ် ဗၠေတ်ဂှ်ကၠဟ်။
ဍာမ်ဂှ်ယဝ်ကေတ် ဒှ်ကွေတ်သပ္ပုရိုဟ်၊
ဗၠေတ်ဂှ်ယဝ်ကၠဟ် ဟွံလအ်ဒှ်မၞိဟ်ခိုဟ်။
၂၇၉။ ဍာံမ္ဂးကဵုဂံၚ် ဗၠေတ်မ္ဂးကဵုယံၚ်။
ဍာံဂှ်ယဝ်ဟွံဂံၚ် ဇၟာပ်ဂၠံၚ်ဒးဟုတ်၊
ဗၠေတ်ဂှ်ယဝ်ဟွံဂံၚ် ဂံၚ်ကၠောန်သ္ပစုတ်။
၂၈၀။ ဍာံဂှ်ကၠောန်သ္ပ ဝိရဳယဂှ်ချိၚ်ဆ။
ဍာံဂှ်ကၠောန်သ္ပ ဒှ်ပွတၠပညာ၊
ဝိရိယယဝ်ချိၚ်ဆ ကာယဂွံသံက်သာ။ ။
၂၈၁။ တ္ၚံက်မ္ဂးလ္ပကၠောန် ကဟောန်မ္ဂးလ္ပဟီု။
တ္ၚံက်တုဲယဝ်ကၠောန် ဒှ်ကမၠောန်ဍဵုဍိုက်၊
ကဟောန်တုဲယဝ်ဟီု မိတ်ခိုဟ်ဒးလီုလာ်။
၂၈၂။ တီဂှ်ကၠောန်ကၠာ မှာဂှ်ဂၠုက်ဂၠာဲ။
တီဂှ်ယဝ်ကၠောန်ကၠာ ဟွံမှာဒှ်ဖဵု၊
မှာဂှ်ယဝ်ဂၠုက်ဂၠာဲ ဂွံဆာဲတိုန်တွဵု။
၂၈၃။ တၠပညာဂှ်နိဿဲ ဓရ်ပြဲဂှ်လ္ၚတ်ညိ။
တၠပညာယဝ်နိဿဲ ဂွံဗၠးဘဲမာန်တွဵု၊
ဓရ်ပြဲယဝ်လ္ၚတ် ဂတမတ်ဂွံဆဵုဖဵု။
၂၈၄။ တဵုကၠအ်လ္ပဂိုဟ်ဝါဲ ဒ္ဂေတ်ဆာဲလ္ပကၠဟ်ထောံ။
တဵုကၠအ်ဂိုဟ်ဝါဲမ္ဂး တမ်ဒးဟောမ်ဗြုံ၊
ဒ္ဂေတ်ဆာဲကၠဟ်ထောံမ္ဂး ဒြပ်ဂွံလဝ်ဒးလီု။
၂၈၅။ တွံဓရ်လ္ပယျာန် ဟီုဂလာန်လ္ပစၞာဲ။
တွံဓရ်ယဝ်ယျာန် ဒှ်စာန်စးကဵုကျာ်၊
ယဝ်ဟီုဂလာန်စၞာဲ ဒှ်အန္တရာယ်ဂၠိုၚ်သာ်။
၂၈၆။ တြေံလေဝ်လ္ပကၠဟ် တၟိဂှ်လေဝ်ကေတ်။
တြေံယဝ်ကၠဟ် ဒှ်ညးပလီုအခိုက်ကၞာ၊
တၟံယဝ်ဟွံကေတ် ဗက်ခေတ်ဟွံမာန်။
၂၈၇။ တၠဂုဏ်လေဝ်ဒးကၠိုဟ် မၞိဟ်ခိုဟ်လေဝ်ဒးတီ။
တၠဂုဏ်ဟွံကၠိုဟ် ဂၠံၚ်ခိုဟ်တိုန်ဟွံမဲ၊
မၞိဟ်ခိုဟ်ဟွံတီ ဒးတၞီဗၠိုက်လောဲ။
၂၈၈။ တသိုက်စိုတ်ဂှ်ကေတ် ဒ္ဂေတ်ခိုဟ်ဂှ်ဆာန်။
တသိုက်စိုတ်ယဝ်ကေတ် ဟွံဗၠေတ်နူဓရ်၊
ဒ္ဂေတ်ခိုဟ်ယဝ်ဆာန် ဇၟာပ်ဌာန်ဟွံသဝ်။
၂၈၉။ တ္ၚဲဏအ်ဂှ်လွဳ တ္ၚဲညဳဂှ်ကၠောန်။
တ္ၚဲဏအ်ယဝ်ဟွံလွဳ ဖိုလ်ဇဳလေၚ်မနာ်၊
တ္ၚဲညဳယဝ်ဟွံကၠောန် ဒှ်ကမၠောန်ကြာန်။
၂၉၀။ တုဲကၠုၚ်ဂှ်ကေတ်နယ် တ္ၚဲဏအ်ဂှ်ပတိတ်ပရဲ။
တုဲကၠုၚ်ဂှ်ယဝ်ကေတ်နယ် ဒှ်လောဲလီုဝါတ်၊
တ္ၚဲဏအ်ယတ်ပတိတ်ပရဲ ဂၠံၚ်ပြဲဂွံညာတ်။ ။
၂၉၁။ ထုဲထုဲလ္ပကၠောန် ထညောန်ထညောန်လ္ပမံၚ်။
ထုဲထုဲယဝ်ကၠောန် ယှုက်လောန်ဒးဍောၚ်ၜိုတ်၊
မံၚ်ထညောန်ထညောန် မိတ်အောန်ဒးဍောၚ်စိုတ်။
၂၉၂။ ထေဲလ္ပကဟောန် ညးကၠောန်လ္ပပလီု။
ထေဲတုဲယဝ်ကဟောန် မှာလောန်ဒှ်သၞ၊
ညးကၠောန်ယဝ်ပလီု ဒှ်သမၠီုရ။
၂၉၃။ ထေက်ကဵုဇကုဂှ်ကြီု ထေက်ကဵုဟီုဂှ်ဂး။
ထေက်ကဵုဇကုယဝ်ကြီု သမၠီုဟွံဒှ်၊
ထေက်ကဵုဟီုယဝ်ဂး ဂွံအံၚ်ဇၞးပြဟ်။
၂၉၄။ ထေက်မှာကဵု နွံဖဵုမှကေတ်။
ဟွံထေက်ယဝ်ကဵု လေၚ်ဖိုလ်ဂၠိုၚ်သာ်၊
ဟွံမဲဖိုလ်ယဝ်ကေတ် ဒဒိုက်ဇေတ်ဍဵုဍိုက်။
၂၉၅။ ထေက်ဟာချပ်ဗ္စာ ဒးဟာပါ်ဖါဲ။
ဟွံတီထေက်တန် ဖန်ဖက်ဝါတ်၊
ဗၠေတ်မှာဟွံကၠိုဟ် ဂၠံၚ်ခိုဟ်ဟွံညာတ်။ ။
ယဝ်ညာတ်ဒၞါဲခိုဟ် သပ္ပုရိုဟ်ဒှ်လောဲ၊
ယဝ်ဆဵုဒၞါဲဝါတ် လညာတ်ဇြိုဟနက်ဒှ်လောဲ။
၃၃၀။ ဒးဟာချပ်ဗစာ မှာဟာပါ်ဖါဲ။
ဒးဟာယဝ်ဟွံဗစာ မှာလေဝ်ထေၚ်ဒး၊
မှာဟာဟွံပါ်ဖါဲ ဂၠာဲဒုဟ်ဟွံဒး။
၃၃၁။ ဒြဟတ်စိုတ်ဂှ်လွဳ ဒြဟတ်ညဳဂှ်ထိၚ်။
ဒြဟတ်စိုတ်လွဳမှ ကၠောန်ပဂိုတ်မာန်၊
ဒြဟတ်ညဳထိၚ်မှ ဍာ်ဇမၠိၚ်အာမာန်။
၃၃၂။ ဒးတီအဓိက သာမညဒးကၠိုဟ်။
ဟွံတီအဓိက ကၠောန်ပဟွံစိုပ်တရဴ၊
သာမညဟွံကၠိုဟ် ၜိုန်ခိုဟ်ဟွံဍိုပ်ဍဴ။
၃၃၃။ ဒးတီအခိၚ် ဒးချိၚ်ဒြဟတ်။
ဟွံတီအခိၚ် အံၚ်ဇၞးဂၠိၚ်သ္ၚောဲ၊
ဟွံချိၚ်ဒြဟတ် ဟွံထတ်ဒှ်ယဲ။
၃၃၄။ ဒးဝေၚ်ပရိယာဲ ဒးဂၠာဲလညာတ်ပြဲ။
ဝေၚ်ပရိယာဲ ဇၟာပ်ဒၞါဲအံၚ်ဇၞး၊
ဂၠာဲလညာတ်ပြဲ မွဲတ္ၚဲဒှ်ၚုဟ်မး။
၃၃၅။ ဒဒိုက်ပဖေက် ယုတ်ဒေက်ပလၞုဟ်။
ဒဒိုက်ဖေက် ကၠက်ၜေက်တသိုက်၊
ယုတ်ဒေက်လၞုဟ် လၟုဟ်ဒှ်ဒဒိုက်။
၃၃၆။ ဒးဗစာ ဒးညှာ။
ဟွံဗစာ မှာလောဲ၊
ဟွံညှာ မေတ္တာညးဟွံမဲ။
၃၃၇။ ဒုဟ်ကဵုကၠိုဟ် ဂုဏ်ခိုဟ်ကဵုတီ။
ဒုဟ်ဟွံကၠိုဟ် ဂွံခိုဟ်ဟွံလောဲ၊
ဂုဏ်ခိုဟ်ဟွံတီ ဗၠိုက်တၞီလောဲ။
၃၃၈။ ဒးစွံအိန်ရဳ ကျာ်သြဳဒးနွံ။
နွံအိန်ရဳမှ ကျာ်သြဳဒှ်မာန်၊
ကျာ်သြဳနွံမှ ညးပပဓာန်။
၃၃၉။ ဒုဟ်ပလီု ဂုဏ်ဟီု။
ဒုဟ်ပလီုမဂး ဂွံဗၠးဝဲ၊
ဂုဏ်ဟီုမဂး ၚုဟ်မးဒှ်လောဲ။
၃၄၀။ ဒးနွံရီုဗၚ် ဒးမၚ်မွဲစိုတ်။
ရီုဗၚ်ဟွံမဲ တ္ၚဲလဵုဟွံၜိုဟ်၊
ဟွံမွဲမွဲစိုတ် ချိုတ်လေဝ်ဟွံခိုဟ်။
၂၄၁။ ဒးလေပ်ပညာ ဝေါဟာဒးကၠိုဟ်။
ဟွံလေပ်ပညာ ချပ်ဗစာဟွံဒး၊
ဝေါဟာဟွံကၠိုဟ် မၞိဟ်ခိုဟ်ဟွံဂး။
၃၄၂။ ဒုၚ်ပါ်ဖါဲ ဒုၚ်ဂၠာဲညိ။
လညာတ်ခိုဟ်အိုတ်ဂှ် ဒှ်ပါ်ဖါဲရ၊
ဂၠုက်ဂၠာဲခိုဟ်အိုတ်ဂှ် ဒှ်ဂၠာဲဒုဟ်ရ။
၃၄၃။ ဒးအိုတ်ဟွံမဲ လောဲအိုတ်ဟွံဒှ်။
ဒးအိုတ်ယဝ်နွံ ဇၟာပ်ဘုံကျာ်ဒှ်၊
လောဲအိုတ်နွံတွဵု ကဵုဓရ်ဟွံသၟဟ်။
၃၄၄။ ဒးနွံဝါသနာ စေတနာဒးတပ်။
ဟၟဲဝါသနာ ကၠောန်အာဇြိုၚ်စိုတ်၊
စေတနာဟွံတပ် ကၠောန်ချပ်လေၚ်အိုတ်။
၃၄၅။ ဒၞါဲကြံၚ်ပၜတ် ဒၞာဲၜတ်ပကြံၚ်။
ဒၞါဲကြံၚ်ယဝ်ၜတ် ဒြဟတ်ယှအ်လီု၊
ဒၞါဲၜတ်ယဝ်ကြံၚ် ဟွံအံၚ်ဇၞးလီု။ ။
၃၄၆။ ဓရ်ခိုဟ်လ္ပသၠေဟ်ပၟာ ပညာလ္ပထေၚ်သောဲ။
ဓရ်ခိုဟ်ယဝ်သၠေဟ်ပမာ ဒးအာစိုပ်အပါယ်ပန်၊
ပညာဂှ်ယဝ်ထေၚ်သောဲ ဂွံပြဲတိုန်ဝါတ်ဂါတ်။
၃၄၇။ ဓရ်ကဵုညာတ် မၞိဟ်ဝါတ်ကဵုဆာန်ဍူ။
ယဝ်ဟွံညာတ်ဓရ် ဇၟာပ်ကဝ်ဒးကျာတ်၊
မၞိဟ်ဝါတ်ဟွံဆာန်ဍူ စိုတ်လတူတပ်ဂွံဒှ်ဝါတ်။
၃၇၈။ ဓီုမံၚ်လ္ပယှအ်စိုတ် စရိုတ်ခိုဟ်လ္ပကၠဟ်ထောံ။
ဓီုမံၚ်ယဝ်ယှအ်စိုတ် စဵုချိုတ်လေပ်ဟွံမာန်၊
စရိုတ်ခိုဟ်ယဝ်ကၠဟ် ဒးဒှ်ဒဒိုက်ဇၟာပ်ဌာန်။ ။
၃၄၉။ နွံဖိုလ်မ္ဂးအေၚ် ကမၠောန်ပၠေၚ်ညးလ္ပသၞ။
နွံဖိုလ်ယဝ်အေၚ် ဂွံဍိုက်ပေၚ်ဨကန်၊
ကမၠောန်ပၠေၚ်ညးယဝ်ဟွံသ္ပ တဲသၞအောန်ပၠန်။
၃၅၀။ နွံမ္ဂးကဵုဒါန် ဆာန်မ္ဂးဒးမၚ်မွဲ။
နွံယဝ်ဟွံကဵုဒါန် အဓါန်ဂတဒးဝါတ်ဂါတ်၊
ဆာန်ယဝ်ဟွံမၚ်မွဲ ကြဴတဲဒးကျာတ်။
၃၅၁။ နွံဖိုလ်မ္ဂးလ္ပယှအ် ဇၟာပ်သကအ်လ္ပဗက်။
နွံဖိုလ်ယဝ်ယှအ် ဟွံလအ်ဒးဍန်ဂြက်၊
ဇၟာပ်သကအ်ယဝ်ဗက်မ္ဂး ဟွံဗၠးဘဲနရက်။ ။
၃၆၇။ ပဂုဏ်ကဵုဒး ပါ်ထ္ၜးကဵုတပ်။
ပဂုဏ်ဟွံဒး ဟွံဗၠးသၞဝဲ၊
ပါ်ထ္ၜးဟွံတပ် ဒုဟ်စိုပ်ဂွံဘဲ။
၃၆၈။ ပၟိက်ညးလေဝ်ဗက် နရက်လေဝ်ဒးဖေက်။
ပၟိက်ညးယဝ်ဟွံဗက် ဒးဒုၚ်လက်ကြာန်၊
နရက်ယဝ်ဟွံဖေက် ဒ္ဂေတ်ယုတ်ဒေက်မာန်။
၃၆၉။ ပရေအ်လေဝ်လ္ပဂွ မာနလေဝ်လ္ပစွံ။
ပရေအ်တုဲယဝ်ဂွ ဟွံထဗဂၠံၚ်ခိုဟ်၊
မာနယဝ်စွံ ညံၚ်ကၠဟ်ထောံဘဝခိုဟ်။
၂၇၀။ ပညာဒးလ္ၚတ် ဗၞတ်ဗၜတ်ဒးတီ။
ဟွံလ္ၚတ်ပညာ ဟွံပြာထာ၊
ဗၞတ်ဗၜတ်ဟွံတီ ဗၠိုက်တၞီလၟိုန်ခါ။
၃၇၁။ ပပတှ်ေလောဲ ပထေၚ်သောဲပြဟ်။
ပတှ်ေလောဲ သၞဝဲစိုပ်မာန်၊
ထေၚ်သောဲပြဟ် လေၚ်ဒိုက်ဒှ်ကြာန်။
၃၇၂။ ပပတှ်ေပြဟ် မဒှ်သၞ။
ပတှ်ေပြဟ် ဒှ်လေၚ်၊
ယဝ်ဒှ်သၞ သောကစံၚ်ပၠေၚ်။
၃၇၃။ ပခဒေဟ်လောန် ပကၠောန်ယုတ်။
ခဒေဟ်လောန် အောန်ဂါရဝ၊
ကၠောန်ယုတ် ဒးဟုတ်ဇၟာပ်ဘဝ။
၃၇၄။ ပတံၚ်အခိၚ် ပဂွိၚ်ကဵုညး။
တံၚ်အခိၚ်မဂး ၚုဟ်မးယှအ်အိုတ်၊
ဂွိၚ်ကဵုညးမဂး ဟွံဗၠးဒဒိုက်စိုတ်။
၃၇၅။ ပလီုဂုဏ်လေပ် ပကြေပ်ဂုဏ်သိုက်။
ဂုဏ်လေပ်လီုအာ ပညာဟွံပြဲ၊
ဂုဏ်သိုက်ကြေပ်ဂှ် တုပ်သၟဟ်ပြိုတ်မွဲ။ ။
၃၇၆။ ဖန်ဒးဂွံၚုဟ် တီဒုဟ်ဝေၚ်လေပ်။
ယဝ်ဖန်ဟွံဒး ၚုဟ်မးဂွံအောန်၊
ဟွံတီဒဟ်မ္ဂး ဂွံဗၠးဒဒိုက်အောန်။
၃၇၇။ ဖန်ဂွံခေါၚ်လ္ပဍောၚ် ဖန်သောၚ်လွဳဓရ်။
ဖန်ဂွံခေါၚ်ဍောၚ်ထောံမ္ဂး ကြဴဒးကဟောမ်၊
ဖန်သောၚ်ဟွံလွဳဓရ် ဂၠိုၚ်ကဝ်ဒးကဟောမ်။
၃၇၈။ ဖိုလ်ဒါန်ကဵုကၠိုဟ် ခမဳခိုဟ်ကဵုတီ။
ဖိုလ်ဒါန်ယဝ်ကၠိုဟ် ဘဝခိုဟ်စိုပ်လောဲ၊
ခမဳခိုဟ်ယဝ်တီ ဒးတၞီဗၠိုက်ဟွံမွဲ။ ။
၃၇၉။ ဗၠေတ်မ္ဂးဒးသောၚ်ထ္ၜး ဟွံကၠးမ္ဂးဒးသၟာန်။
ဗၠေတ်ဟွံသေၚ်ထ္ၜး ညးတၞဟ်စိုတ်ဟွံအး၊
ဟွံကၠးယဝ်ဟွံသၟာန် ဂမြၚ်ညာဏ်ဟွံတၟး။
၃၈၀။ ဗၠေတ်မ္ဂးကၠဟ်လ္ပဇြိုၚ် ဟွံခိုၚ်မ္ဂးလှာဲလ္ပဂိုဟ်။
ဗၠေတ်ဂှ်ယဝ်ကၠဟ်ဇြိုၚ် ပရိုၚ်ယုတ်မံက်၊
ဟွံခိုၚ်ဂှ်ယဝ်လှာဲဂိုဟ် မၞိဟ်ဒိုဟ်ဂွိုၚ်ညးကော်။
၃၈၁။ ဗီုစဂှ်ကၠောန် ဗီုစၞောန်ထ္ၜးဂှ်မံၚ်။
ဗီုစဂှ်ယဝ်ဟွံကၠောန် ဒးဒုၚ်ဒေါန်ဗျိ၊
ဗီုစၞောန်ထ္ၜးယဝ်ဟွံမံၚ် အစံၚ်အ္စာထေဲတှ်ေဂိ။
၃၈၂။ ဗီုချပ်လဝ်ဂှ်သ္ဂး ဗီုဂွံဒးဂှ်ဆက်ဆောမ်။
ဗီုချပလဝ်ယဝ်သ္ဂး ဂွံဗၠးနူသၠေဟ်ပၟာ၊
ဗီုဂွံဒးယဝ်ဆက်ဆောမ် ဂကောမ်ညဳသာ။
၃၈၃။ ဗၠေတ်မ္ဂးလ္ပညှာ သ္ပအ္စာမ္ဂးအေၚ်။
ဗၠေတ်ဒၟံၚ်ယဝ်ညှာ ညံၚ်ထဴဏာပါဲ၊
သ္ပအ္စာယဝ်ဟွံအေၚ် ညံၚ်ပၠေၚ်ထောံကွးဆာဲဆာဲ။
၃၈၄။ ဗီုတ္ၚဲလေဝ်လ္ပသၠုၚ် ဗီုကြုၚ်လေဝ်လ္ပတ္ၚံက်။
ယဝ်သၠုၚ်ဗီုတ္ၚဲ ညးမွဲဟွံသ္ဍိုက်ဆာန်၊
ယဝ်တ္ၚံက်ဗီုကြုၚ် ဒးဒုၚ်ပျဲကဵုညးတၞဟ်မာန်။
၃၈၅။ ဗျုလ္ပထောံဒစုန် မၞိဟ်တၠဂုဏ်လ္ပဝိုတ်။
ဗျုယဝ်ထောံဒစုန် လောတ်စှ်ေဖျုန်မေက်၊
မၞိဟ်တၠဂုဏ်ယဝ်ဝိုတ် ချိုတဟွံဗၠးနရက်။
၃၈၆။ ဗၞတ်ဗ္ၜတ်ကဵုကၠိုဟ် ဒ္ဂေတ်ခိုဟ်ကဵုနွံ။
ဗၞတ်ဗ္ၜတ်ကၠိုဟ်မှ ညးသ္ပခိုဟ်၊
ဒ္ဂေတ်ခိုဟ်နွံမှ ညးသ္ပသပ္ပုရိုဟ်။
၃၈၇။ ဗီုကၠလ္ပဒှ် ဗီုပဟ်လ္ပမံၚ်။
ယဝ်ဒှ်ဗီုကၠမသဟွံမဲ၊
ယဝ်မံၚ်ဗီုပဟ် ဂွံဒယှ်ဟွံလောဲ။
၃၈၈။ ဗီုကေတ်ဂှ်ကဵု ဗီုကဵုဂှ်ကေတ်။
ဗီုကေတ်ယဝ်ကဵု ညးလဵုဟွံက္ဍုဟ်၊
ဗီုကဵုယဝ်ကေတ် ခါလဵုဟွံဗၠေတ်ပုဟ်။
၃၈၉။ ဗီုညးလ္ပမှာ ဗီုအ္စာလ္ပကၠဟ်။
ဗီုညးယဝ်မှာ အခါလဵုဟွံခိုဟ်၊
ဗီုအ္စာယဝ်ကၠဟ် ဟွံဒှ်သပ္ပုရိုဟ်။
၃၉၀။ ဗၠေတ်လ္ပဒက်ဝဲ အစောဲလ္ပစွံလအ်။
ဗၠေတ်ယဝ်ဒက်ဝဲ မွဲတ္ၚဲဒးဆဵုဒဒိုက်၊
အစောဲယဝ်စွံလအ် စိုတ်ယအ်ဂၠိုၚ်ဝိုက်။
၃၉၁။ ဗီုမှာလေဝ်ဒးကၠိုဟ် ဗီုခိုဟ်လေဝ်ဒးတီ။
ဗီုမှာယဝ်ကၠိုဟ် ဂၠံၚ်ခိုဟ်ဒှ်လောဲ၊
ဗီုခိုဟ်ယဝ်တီ ဟွံဒးတၞီဗၠိုက်မွဲ။
၃၉၂။ ဗီုတီဂှ်ကဵုညးကၠိုဟ် ဗီုခိုဟ်ဂှကဵုညးကေတ်။
ဗီုတီဂှ်ဟွံမိက်ကဵုညးကၠိုဟ် တီခိုဟ်ဟွံသေၚ်၊
ဗီုခိုဟ်ဂှ်ယဝ်ဟီုထလေတ် ဒှ်ဒ္ဂေတ်သမၠီုဟေၚ်။
၃၉၃။ ဗီုကေတ်ဒးကၠိုဟ် ဗီုခိုဟ်ဒးဖန်။
ဟွံကၠိုဟ်ဗီုကေတ် ဒးဗၠေတ်ဒၟံၚ်လၟိုန်၊
ဗီုခိုဟ်ဟွံဖန် ထုဲၜန်ဒၟံၚ်လၟိုန်။
၃၉၄။ ဗီုအဲဒးတီ ဗီုညးဒးကၠိုဟ်။
ဗီုအဲဟွံတီပၠန် ဖန်ဖက်ဟွံလောဲ၊
ဗီုညးဟွံကၠိုဟ် ဂၠံၚ်ခိုဟ်ဟၟဲ။
၃၉၅။ ဗီုကၠိုဟ်သောၚ်ထ္ၜး ဗီုကၠးစန်ဒက်။
ဗီုကၠိုဟ်သောၚ်ထ္ၜးမှ ညးပဗက်မာန်၊
ဗီုကၠးစန်ဒက်မှ အာဂတမာန်။
၃၉၆။ ဘဝလေဝ်လ္ပပၠေၚ် ကွတ်ဝေၚ်လေဝ်လ္ပကတ်။
ပၠေၚ်ဘဝမ္ဂး ကြဴဒးကဟောမ်စိုတ်၊
ကွတ်ဝေၚ်ယဝ်ကတ် ဒှ်ဟိုတ်ဒြပ်ရတ်အိုတ်။
၃၉၇။ ဘဝသိုက်လ္ပသ္ဍိုက် ဘဝဒိုက်လ္ပဍောၚ်စိုတ်။
ဘဝသိုက်ယဝ်သ္ဍိုက် ဒဒိုက်ဝဋ်ဂၠိၚ်၊
ဘဝဒိုက်ယဝ်ဍောၚ်စိုတ် ကသပ်အိုတ်ဒးဂွိၚ်။
၃၉၈။ ဘာသာဒးဗဒါဲ ပရိယာဲဒးကၠိုဟ်။
ဗဒါဲဘာသာမှ ကၠောန်ပဒှ်လောဲ၊
ပရိယာဲကၠိုဟ်မှ အာဂတိဂၠိၚ်သ္ၚောဲ။
ဟိုတ်လအ်ဟွံကၠိုဟ် ၜိုန်ခိုဟ်ဟွံလဟိၚ်။
၄၄၉။ မေတ္တာဂှ်လ္ပခယျ စေတနာဂှ်ချိၚ်ဆ။
မေတ္တာဂှ်ယဝ်ခယျ ကာလလဵုဟွံဒးဗီု၊
စေတနာဂှ်ယဝ်ဟွံချိၚ်ဆ ကၠောန်ပစိုတ်လီု။
၄၅၀။ မှာပဂွ မာနပစွံ။
မှာယဝ်ဂွ ဘဝလီုလောဲ၊
မာနယဝ်စွံ ဒးထောံမိတ်ပြဲ။
၄၅၁။ မိက်ခိုဟ်မၚ်မွဲ မိက်လောဲတြပ်စိုတ်။
ယဝ်မၚ်မွဲ ရိုဟ်တ္ၚဲခိုဟ်မာန်၊
တြပ်စိုတ်မွဲ လောဲအိုတ်ရ။
၄၅၂။ ယုတ်ဂှ်လ္ပဒးဂၞပ် ပွပပ်ဂှ်လ္ပကၠောန်။
ယုတ်ယဝ်ဒးဂၞပ် မၞိဟ်ပပ်ပပ်ညးကော်၊
ပွပပ်ကၠောန်မ္ဂး ကြဴဴဒးဒဒိုက်ဇၞော်။
၄၅၃။ ယဲလ္ပဂိုဟ်ဒြပ် ဟွံဒးဂၞပ်လ္ပစ။
ယဲဂိုဟ်ဒြပ်မ္ဂး ဂွံဗၠးဟွံလောဲ၊
ဟွံဒးဂၞပ်စမ္ဂး ဒးဆဵုဘဲ။
၄၅၄။ ယၟုလေဝ်မၚ်မွဲ အဝယ်လေဝ်ဒးရံၚ်။
ယၟုယဝ်ဟွံမၚ်မွဲ ညးမွဲဟွံသ္ပကာ၊
အဝယ်ယဝ်ဟွံရံၚ် လ္ပာ်ဂၠံၚ်ယုတ်ကၠောန်ဒးအာ။
၄၅၅။ ယုတ်မွဲလ္ပပကေၚ် အထေၚ်မွဲလ္ပဂလိုၚ်။
ယုတ်မွဲယဝ်ပကေၚ် ယုတ်ဟေၚ်ဒှ်ရ၊
အထေၚ်မွဲယဝ်ဂလိုၚ် စိုတ်ဟွံခိုၚ်ရ။ ။
၄၅၆။ ရံၚ်ဌာန်တုဲဗ္ဒာဲ ရံၚ်သဟာဲတုဲကဵု။
ဟွံရံၚ်ဌာန်တုဲယဝ်ဗ္ဒာဲ အန္တရာယ်ကၠုၚ်စိုတ်၊
ဟွံရံၚ်သဟာဲတုဲယဝ်ကဵု ဂုဏ်ဖိုလ်ဟွံစိုတ်။
၄၅၇။ ရန်တၟံကဵုဍာံပြ ဝိရဳယကဵုနွံတွဵု။
ရန်တၟံယဝ်ဍာံပြ ဒ္ဂေတ်ပွလေဝ်ဟွံပြံၚ်သၠာဲ၊
ဝိရဳယယဝ်နွံတွဵု ဂုဏ်ဖိုလ်ဂွံညာတ်ဆာဲ။
၄၅၈။ ရံၚ်အခိၚ်တုဲချပ် ရံၚ်ဒြပ်တုဲကျိုၚ်။
ဟွံရံၚ်အခိၚ်ယဝ်ချပ် ကသပ်ဗက်ခေတ်ဟွံမာန်၊
ဟွံရံၚ်ဒြပ်ယဝ်ကျိုၚ် ညးဂြိုၚ်ဒးသီုကွာန်။
၄၅၉။ ရံၚ်ဂၞပ်ညးတုဲဟီု စမ်ၜတ်တုဲထိုၚ်သး။
ဟွံရံၚ်ဂၞပ်တုဲယဝ်ဟီု ၜိုတ်ဟီုဏာဟွံမဲရှ်၊
စမ်ၜတ်တုဲယဝ်ထိုၚ်သး သၟးသၟးဍေံဟွံဒှ်။
၄၆၀။ ရံၚ်သၞောဝ်တုဲဝေတ် ရံၚ်ကွေတ်တုဲကေတ်။
ဟွံရံၚ်သၞောဝ်ယဝ်ဝေတ် တၠပညာဇေတ်ဟွံဒှ်၊
ဟွံရံၚ်ကွေတ်တုဲကေတ် တသိုက်ဇေတ်ဟွံဒှ်။
၄၆၁။ ရံၚ်အဝယ်တုဲသ္ပ ရံၚ်ပွတုဲကြီု။
ရံၚ်အဝယ်တုဲသ္ပ ဟွံဒှ်ပွယုတ်၊
ရံၚ်ပွတုဲယဝ်ကြီု ၜိုတ်ဟီုဍေံဟွံလုတ်။
၄၆၂။ ရတ်ပိဂှ်ဗ္ဒာဲ စိုတ်စၞာဲဂှ်ဝေတ်။
ရတ်ပိယဝ်ဗ္ဒာဲ ဂွံဆာဲဇၟာပ်ဘဝ၊
စိုတ်စၞာဲယဝ်ဝေတ် တသိုက်ဇေတ်ဂွံထဗ။
၄၆၃။ ရံၚ်တုဲတှ်ေညှာ ရံၚ်အခါတုဲကၠုၚ်။
ဟွံရံၚ်တုဲယဝ်ညှာ ဒှ်ကောန်အပါဟွံမဲ၊
ဟွံရံၚ်အခါတုဲယဝ်ကၠုၚ် ဒးဒုၚ်စုတ်စောဲ။
၄၆၄။ ရံၚ်အဝယ်တုဲကၠောန် ရံၚ်ကမၠောန်တုဲသ္ပ။
ရံၚ်အဝယ်တုဲယဝ်ကၠောန် ဒှ်ကမၠောန်သပ္ပုရိုဟ်၊
ရံၚ်ကမၠောန်တုဲယဝ်သ္ပ ထာဝရဂွံခိုဟ်။
၄၆၅။ ရပ်လေဝ်ဒးတော်ဆ ဒ္ဂေတ်ပွလေဝ်ဒးခိုဟ်။
ရပ်တော်ဆမှ ကာယဗၠးဍောၚ်ၜိုတ်၊
ဒ္ဂေတ်ပွခိုဟ်မှ ဍာံပြဒြပ်ပေၚ်စိုတ်။
၄၆၆။ ရံၚ်ဌာန်တုဲကၠောန် ရံၚ်ကမၠောန်တုဲဖန်။
ရံၚ်ဌာန်တုဲယဝ်ကၠောန် ဗၠေတ်အောန်ဗၠးဘဲ၊
ရံၚ်ကမၠောန်တုဲယဝ်ဖန် ကၠောန်ပၠန်ဒှ်လောဲ။
၄၆၇။ ရဴဂဴဂှ်လ္ပလၞုဟ် ပွဒုဟ်ဂှ်လ္ပတ္ၚအ်။
ရဴဂဴယဝ်လၞုဟ် ဘဝလၟုဟ်ဟွံဆာဲ၊
ပွဒုဟ်ယဝ်တ္ၚအ် ဟွံလအ်ဒှ်အန္တရာယ်။
၄၆၈။ ရံၚ်ခေတ်တုဲကၠောန် ရံၚ်ကမၠောန်တုဲဖန်။
ကၠောန်ဟွံရံၚ်ခေတ် ၜေတ်ညးဟွံမာန်၊
ဟွံရံၚ်ကမၠောန်တုဲဖန် ထုဲၜန်ဒှ်ကြာန်။
၄၆၉။ ရံၚ်အခိၚ်တုဲကၠောန် ရံၚ်ကမၠောန်တုဲချပ်။
ကၠောန်ဟွံရံၚ်အခိၚ် ဍာ်ဇမၠိၚ်ဟွံဒှ်၊
ချပ်ဟွံရံၚ်ကမၠောန် လောန်အာကြအ်ဒှ်။
၄၇၀။ ရံၚ်တုဲကဵုအဝဵု ဆဵုတုဲပါ်ဖါဲ။
ရံၚ်တုဲကဵုအဝဵု ဆဆဵုဟွံဒှ်၊
ဆဵုတုဲပါ်ဖါဲ ဂၠံၚ်ဆာဲဒှ်ပြဟ်။
၄၇၁။ ရံၚ်မၞိဟ်တုဲစန် ရံၚ်သြန်တုဲရာန်။
ဟွံရံၚ်မၞိဟ်ယဝ်စန် ထုဲၜန်သၞဒှ်၊
ဟွံရံၚ်သြန်ယဝ်ရာန် ပိုန်ဟာန်ဒှ်ခတှ်။ ။
၅၃၈။ လၟုဟ်ကၠိုဟ်မှ ဂတဗစာမှ။
လၟုဟ်ကၠိုဟ်မှ ကၠောန်အံၚ်ဇၞး၊
ဂတဗစာမှ ချိၚ်ဆကၠောန်ဒး။
၅၃၉။ လောဲသၟးပညာတ် ဝါတ်သၟးပဆဵု။
လောဲသၟးယဝ်ညာတ် လညာတ်ဟွံဇြိုဟ်နက်၊
ဝါတ်သၟးယဝ်ဆဵု ဇၟာပ်ဆဵုဍန်ဂြက်။
၅၄၀။ လညာတ်ပဗၠေၚ် အထေၚ်ပသဝ်။
လညာတ်ဗၠေၚ်မဂး ပြးဇးလောဲ၊
အထေၚ်သဝ်မဂး ဟွံဗၠးသၞဝဲ။
၅၄၁။ လေပ်ဂှ်ကၠောန်ကၠာ မှာဂှ်ချပ်ဗစာ။
လေပ်ကၠောန်ကၠာမဂး အံၚ်ဇၞးလောဲ၊
မှာချပ်ဗစာမဂး ဟွံဒးစုတ်စောဲ။
၅၄၂။ လျိုၚ်ကဵုပေၚ် အေၚ်ကဵုမာန်။
လျိုၚ်ဟွံပေၚ် ဒးလေၚ်ဇၟာပ်ဌာန်၊
အေၚ်ဟွံမာန်ဂှ် ဍေံဂၠာဲဒှ်ကြာန်။
၅၄၃။ လပထေၚ်သောဲ လပစောဲစပ်။
ယဝ်ထေၚ်သောဲ လောဲသွာလီုလာ်၊
ယဝ်စောဲစပ် ၜိုန်တပ်ဟွံကွာ်။
၅၄၄။ လေပ်တုဲကေတ် ဗၠေတ်တုဲပလေဝ်။
လေပ်တုဲဟွံကေတ် ဒှ်ကွေတ်သမၠီု၊
ဗၠေတ်တုဲဟွံပလေဝ် ဂၠံၚ်ကျေဝ်ပဟီု။
၅၄၅။ လပထေၚ်သောဲကမၠောန် လပစောန်စိုတ်ညး။
ထေၚ်သောဲကမၠောန် ကၠောန်ဟွံဇၞော်မောဝ်၊
စောန်စိုတ်ကဵုညး မုက်ဟွံယးဂေါဝ်။
၅၄၆။ လညာတ်ကဵုတပ် ကသပ်ကဵုပြဲ။
လညာတ်ဟွံတပ် ဆက်စပ်သၞဝဲ၊
ကသပ်ဟွံပြဲ မွဲတ္ၚဲညာတ်ဘဲ။ ။
၅၄၇။ ဝေတ်စိုတ်လ္ပလၞုဟ် ညာတ်ဒုဟ်ကဵုဖေက်။
ဝေတ်စိုတ်ယဝ်လၞုဟ် ဘဝလၟုဟ်လေဝ်ဟွံဆာဲ၊
ညာတ်ဒုဟ်ယဝ်ဟွံဖေက် သဳဒေက်ဒးစိုပ်အပါဲ။
၅၄၈။ ဝေတ်မွဲကဵုတုဲဖအိုတ် စွံစိုတ်လေဝ်ကဵုညဳ။
ဝေတ်မွဲယဝ်တုဲဖအိုတ် ဍောၚ်စိုတ်ဟွံဒှ်၊
စွံစိုတ်ယဝ်ညဳ လွဳကွးဇၞော်မောဝ်ပြဟ်။
၅၄၉။ ဝေတ်လေဝ်လ္ပညှာ အခါမှဒုၚ်ဝန်။
ဝေတ်ယဝ်ဟွံညှာ ဒှ်အ္စာပြဲ၊
မှာယဝ်ဒုၚ်ဝန် ကောန်ကွးဟွံဒက်ဝဲ။
၅၅၀။ ဝါသၞာယုတ်ဂှ်ဝေၚ် ဂလာန်တၟေၚ်ဂှ်စၟတ်လဝ်။
ဝါသၞာယုတ်ယဝ်ဝေၚ် ဗွဲတၟေၚ်ဂွံပြာထာ၊
ဂလာန်တၟေၚ်ယဝ်စမတ် ဒှ်လ္ၚတ်တၠပညာ။
၅၅၁။ ဝါတ်လ္ပဍောၚ်စိုတ် ဒြပ်အိုတ်လ္ပကဟောမ်။
ဝါတ်ယဝ်ဍောၚ်စိုတ် ဒှ်ဟိုတ်ဟုတ်ယုတ်လောဲ၊
ဒြပ်အိုတ်ကဟောံ ဒှ်မၞိဟ်အစောမ်သတ္တိဟွံမဲ။
၅၅၂။ ဝဲသၞလ္ပဂလိုၚ် ပရိုၚ်ယုတ်လ္ပကလၚ်။
ဝဲသၞယဝ်ဂလိုၚ် ၜိုန်ဂျိုၚ်ဒၟံၚ်ဟွံပြဲ၊
ပရိုၚ်ယုတ်ယဝ်ကလၚ် မ္ဂးဟွံဗၠးညးထေၚ်သောဲ။
၅၅၃။ ဝေတ်မ္ဂးကဵုဒး ဍိုဟ်မ္ဂးကဵုခိုဟ်။
ယဝ်ဝေတ်ဟွံဒး ကွးဒးပြးဆာဲ၊
ဍိုဟ်တုဲယဝ်ဟွံခိုဟ် ဍိုဟ်ဂှ်ဍိုဟ်စၞာဲစၞာဲ။
၅၅၄။ ဝေါဟာလေဝ်ဒးကၠိုဟ် ပွခိုဟ်လေဝ်ဒးတီ။
ဝေါဟာဟွံကၠိုဟ် မၞိဟ်သၠိုဟ်ညးကော်၊
ပွခိုဟ်ဟွံတီ ဒးတၞီဗၠိုက်ဇၞော်။
၅၅၅။ ဝဲလပတၠိၚ် ထဝိၚ်လ္ပစွံ။
ယဝ်တလိၚ်ဝဲ တသိုက်ပြဲဟွံညာတ်၊
ယဝ်စွံထဝိၚ် လဟိၚ်စိုတ်ဒှ်ဝါတ်။
၅၅၆။ ဝါတ်ပဖေက် ဒေက်ပပၠေၚ်။
ယဝ်ဖေက်ဝါတ် လညာတ်ဍိုန်လျ၊
ဒေက်မံၚ်ယဝ်ပၠေၚ် ဟွံပေၚ်ဇၟာပ်ဘဝ။
၅၅၇။ ဝၚ်ပရေအ်ထလေတ် ဝၚ်ခိုဟ်ကေတ်။
ဝၚ်ပရေအ်ထလေတ်မှ ညးသပခိုဟ်မာန်၊
ဝၚ်ခိုဟ်ကေတ်မှ ညးသပဇၞော်မာန်။ ။
သ္ပကွးဟွံဒုၚ်ဝေတ် ဓရ်ဒ္ဂေတ်ဟွံဍိုက်ပေၚ်၊
မၞိဟ်ဂှ်ယဝ်ဒးဒေါန် ဒှ်ကောန်မၞိသ်ဟွံသေၚ်။
၅၇၂။ သ္ပအ္စာလ္ပညှာ သ္ပဒကာလ္ပသအေတ်။
သ္ပအ္စာယဝ်ညှာ ဟွံပြာကဋ်ဒယှ်၊
သ္ပဒကာယဝ်သအေတ် ဒကာဇေတ်ဟွံဒှ်။
၅၇၃။ သိုက်လ္ပကြံကြ ဒိုက်လ္ပကရောတ်။
သိုက်ယဝ်ကြံကြ ဒှ်သၞလောဲ၊
ဒိုက်ယဝ်ကရောတ် စိုတ်ဍောတ်ဖိုလ်ဟွံမဲ။
၅၇၄။ သ္ပကုသိုလ်လ္ပချိၚ် အခိၚ်ခိုဟ်လ္ပဖအိုတ်။
သ္ပကုသိုလ်ယဝ်ချိၚ် ချိုတ်ဒးဂွိၚ်ပၠန်၊
အခိၚ်ခိုဟ်ယဝ်ဖအိုတ် ကြဴဒးဍောၚ်စိုတ်ဨကန်။
၅၇၅။ သၞောဝ်လပကဵုဗၠေတ် အ္စာဝေတ်လ္ပဂိ။
ယဝ်ဗၠေတ်နူသၞောဝ် ဂွံဇၞော်မောဝ်ဝါတ်၊
အ္စာဝေတ်ဂိမ္ဂး ကြဴဒးဆဵုကျာတ်။
၅၇၆။ သတိလ္ပပအ် လ္ပပၠအ်အခိၚ်။
ယဝ်သတိပအ် ဟွံလအ်ဒးလေၚ်၊
ယဝ်ပၠအ်အခိၚ် အတိုၚ်ချိၚ်ဟွံပေၚ်။
၅၇၇။ သတိလ္ပအောန် ကမၠောန်လ္ပမှာ။
ယဝ်သတိအောန် ဇၟာပ်ကမၠောန်လီုလောဲ၊
ယဝ်ကမၠောန်မှာ သံသာဂၠိၚ်သ္ၚောဲ။
၅၇၈။ သောၚ်သောၚ်ကၠောန်အာ မှာမှာပါဲထောံ။
ကၠောန်သောၚ်သောၚ်မှ ဗၠးလမောၚ်စိုတ်၊
မှာမှာပါဲမှ ဝဲသၞပၠိုတ်။
၅၇၉။ သွက်ဇကုလေဝ်ကဵုဒှ် သွက်ညးတၞဟ်လေဝ်ကဵုနွံ။
သွက်ဇကုယဝ်ဒှ် ဂွံမြဟ်မြဴလၟိုန်၊
သွက်ညးတၞဟ်ယဝ်နွံ ဇၟာပ်ဘုံဒယှ်လၟိုန်။
၅၈၀။ သီုမာနလ္ပပါ်ပါဲ သီုစၞာဲလ္ပကၠောန်။
သီုမာနယဝ်ပါ်ပါဲ အန္တရာယ်ကတဵုဒှ်၊
သီုစၞာဲယဝ်ကၠောန် ကမၠောန်လီုပြဟ်။
၅၈၁။ သွက်ဂကူလေဝ်ကၠောန် သွက်ကောန်လေဝ်စွံ။
သွက်ဂကူဟွံကၠောန် ဒှ်ကောန်သမၠီု၊
သွက်ကောန်ဟွံစွံမ္ဂး ဟွံဗၠးဗျိဟီု။
၅၈၂။ သဘဴမၞိဟ်တီမှ သတိနွံမှ။
သဘဴမၞိဟ်တီမှ ကၠောံဍဒှ်ဖဵု၊
သတိနွံမှ ဝိရဳယဒှ်ဖိုလ်။
၅၈၃။ သၟးသၟးလ္ပမံၚ် ယံၚ်ယံၚ်လ္ပဟီု။
သၟးသၟးယဝ်မံၚ် သၟးသၟးဒှ်ရ၊
ယံၚ်ယံၚ်ယဝ်ဟီု မိတ်လီုလာ်ရ။
၅၈၄။ သွက်ဇကုကဵုဒှ် သွက်ညးတၞဟ်ကဵုနွံ။
သွက်ဇကုဟွံဒှ် ဂွံမြဟ်မြဴအောန်၊
သွက်ညးတၞဟ်ဟွံနွံ ဘုံလဵုဟွံစောန်။
၅၈၆။ သစ္စကဵုဒှ်မာန် အဓိဌာန်ကဵုတပ်။
သစ္စဒှ်မာန် ၜိုတ်ဂစာန်ဒှ်ပရဲ၊
အဓိဌာန်ယဝ်တပ် တိုၚ်ချပ်ဒှ်လောဲ။
၅၈၇။ သွက်ညးလေဝ်မၚ်မွဲ သွက်အဲလေဝ်ကဵုဒှ်။
သွက်ညးမၚ်မွဲ မိတ်ပြဲဒှ်အာ၊
သွက်အဲယဝ်ဒှ် မိပ်မြဟ်လောဲသွာ။
၅၈၈။ သစ္စပစွံဇၟာပ်ဒၞါဲ ဇၟာပ်သဟာဲပပတှ်ေ။
သစ္စစွံဇၟာပ်ဒၞါဲ အန္တရာယ်ဒှ်လောဲ၊
ဇၟာပ်သဟာပတှ်ေ သၠေဟ်ပၟာဒှ်လောဲ။ ။
၆၂၂။ ဟွံသိုက်လ္ပဒေါံ၊ ဟွံဂွံလ္ပစဴ။
ဟွံသိုက်ယဝ်ဒေါံမ္ဂး ဟွံဗၠးဒဒိုက်၊
ဟွံဂွံယဝ်စဴ ဗွဲကြဴဒးကလေၚ်ကွာ်။
၆၂၃။ ဟိုတ်နူပုၚ်လ္ပလီု၊ ဟိုတ်နူလမျီုလ္ပယုတ်။
ဟိုတ်နူပုၚ်ယဝ်လီု ဒဒိုက်ဇီုဒး၊
ဟိုတ်နူလမျီုယဝ်ယုတ် ဗျိပၠုတ်ညးဟွံဗၠး။
၆၂၄။ ဟွံဒးလ္ပကေတ်၊ ဟွံဗၠေတ်လ္ပထေဲ။
ဟွံဒးယဝ်ကေတ် ဒှ်ဒ္ဂေတ်သမၠီု၊
ဟွံဗၠေတ်ယဝ်ထေဲမ္ဂး ဟွံဗၠးညးဗျိဟီု။
၆၂၅။ ဟွံဆေၚ်လ္ပယှုက်၊ ဟွံစုက်လ္ပဟီု။
ဟွံဆေၚ်ယဝ်ယှုက် ညးကဟုက်ဒှ်သၞ၊
ဟွံစုတ်ယဝ်ဟီု သမၠီုဒှ်ရ။
၆၂၇။ ဟွံခိုဟ်လ္ပဆက်၊ ဝိပက်လ္ပဂလိုၚ်။
ဟွံခိုဟ်ယဝ်ဆက် ဂုဏ်ကြက်ဟွံမဲ၊
ဝိပက်ယဝ်ဂလိုၚ် ဝဲဂၠိုၚ်ရိုဟ်တ္ၚဲ။
၆၂၇။ ဟိုတ်ကဵုကၠိုဟ် ဖဵုခိုဟ်ကဵုတီ။
ဟိုတ်ကၠိုဟ်မဂး ဂွံဗၠးဒဒိုက်၊
ဖဵုခိုဟ်တီမဂး ဟွံဒးတၞီဗၠိုက်။ ။
၆၂၈။ ဠကၠောန်ကဵုချိုတ်ပၠိုတ်၊ ဠချိုတ်ကဵုဒှ်မ္ၚဵု။
ဠကၠောန်ယဝ်ဟွံချိုတ်ပၠိုတ် ဒြပ်အိုတ်တမ်ဟောမ်၊
ဠချိုတ်မ္ၚဵုဟွံမဲ ဘဝပြဲဒးဟောမ်ဗြံ။
၆၂၉။ ဠသောၚ်ကဵုဒှ်ဖိုလ်၊ ဠသၠးကဵုဒှ်ဂုဏ်။
ဠသောၚ်ကဵုဒှ်ဖဵု တ္ၚဲလဵုလေဝ်ဟွံဇၞော်မောဝ်၊
ဠသၠးဂုဏ်ဟွံဒှ် တုပ်သၟဟ်ပၠေၚ်ဒြပ်ဏောဝ်။
၆၃၀။ ဠတီတှ်ေကဵုဍိုဟ်၊ ဠခိုဟ်တှ်ေကဵုတီဂုဏ်။
ဠတီယဝ်ဟွံဍိုဟ် ဒှ်မၞိဟ်ခိုဟ်ဟွံသေၚ်၊
ဠခိုဟ်ဟွံတီဂုဏ် ဒှ်မၞိဟ်ရုန်မဵုဟေၚ်။ ။
၆၃၁။ ၜိုတ်ဂွံၜိုတ်ကေတ်၊ ၜိုတ်ဗၠေတ်ၜိုတ်ဝေတ်။
ၜိုတ်ဂွံယဝ်ကေတ် ဒြပ်ဖကပုဇေတ်ဒှ်ဂၠိုၚ်၊
ၜိုတ်ဗၠေတ်ယဝ်ဝေတ် နွံဒ္ဂေတ်ခိုဟ်ဂၠိုၚ်။
၆၃၂။ ၜိုတ်ဂွံလ္ပစဖအိုတ်၊ ၜိုတ်စိုတ်ဒှ်လ္ပဟီု။
ၜိုတ်ဂွံယဝ်စဖအိုတ် ဒြပ်အိုတ်ဒးဝါတ်၊
ၜိုတ်စိုတ်ဒှ်ယဝ်ဟီု ဒှ်သမၠီုမတ်ဟွံညာတ်။
၆၃၃။ ၜိုတ်တီကေတ်ကဵုမာန်၊ ၜိုတ်ဆာန်ကဵုဒှ်ဖိုလ်။
ၜိုတ်တီယဝ်ကေတ်မာန် နိဗ္ဗာန်စိုပ်လောဲလောဲ၊
ၜိုတ်ဆာန်ယဝ်ဒှ်ဖိုလ် နွံကဵုဂုဏ်ပရဲ။
၆၃၄။ ၜိုတ်လေပ်ဂှ်ဟီု၊ ၜိုတ်ကြီုဂှ်ကၠောန်။
ၜိုတ်လေပ်ယဝ်ဟွံဟီု ဒှ်သမၠီုရ၊
ၜိုတ်ကြီုဟွံကၠောန် ညးစၞောန်လပုဟ်တဲရ။
၆၃၅။ ၜိုတ်နွံဂှ်တြပ်စိုတ်၊ ၜိုတ်အိုတ်ဂှ်စွံသတိ။
ၜိုတ်နွံယဝ်တြပ်စိုတ် ဍောၚ်ၜိုတ်ဟွံဒှ်၊
ၜိုတ်အိုတ်ယဝ်စွံသတိ ဂတျ်တၟိဟွံဒှ်။
၆၃၆။ ၜိုတ်ဖဲလ္ပရံၚ်၊ ၜိုတ်မံၚ်လ္ပကၠောန်။
ၜိုတ်ဖဲဓဝ်ယဝ်ရံၚ် ဂွံအံၚ်ဇၞးဝါတ်၊
ၜိုတ်မံၚ်ဓဝ်ယဝ်ကၠောန် ဂွံစောန်ဝါတ်ဂါတ်။
၆၃၇။ ၜိုန်ညးလက်လ္ပထေဲ၊ ၜိုန်ညးကသေဲလ္ပပတှ်ေ။
ညးလက်ထေဲမ္ဂး ၚုဟ်မးစှ်ေအိုတ်၊
ညးကသေဲပတှ်ေမ္ဂး ဟွံဗၠးစံၚ်တူစိုတ်။
၆၃၈။ ၜိုတ်ညးလျုၚ်လ္ပသၠုၚ်၊ ၜိုတ်ညးဒုၚ်လ္ပကေတ်။
ၜိုတ်ညးလျုၚ်ယဝ်သၠုၚ် မွဲတ္ၚဲဒးၚုၚ်ၚ၊
ၜိုတ်ညးဒုၚ်ယဝ်ကေတ် ဒှ်ဒ္ဂေတ်ဗာလ။
၆၃၉။ ၜိုန်ဒးလေပ်ဒးဗ္စာ၊ ၜိုန်မှာလေဝ်ဒးအေၚ်။
ၜိုန်ဒးယဝ်ဟွံဗ္စာ ဒှ်ဟိုတ်စိုတ်သာသ္ပအ်၊
ၜိုတ်မှာယဝ်ဟွံအေၚ် ဒးလေၚ်ဒိုက်လအ်။
၆၄၀။ ၜိုတ်ဒှ်လ္ပကၠောန် ၜိုတ်ကဟောန်လ္ပလက်။
ၜိုတ်ဒှ်ယဝ်ကၠောန် ဒှ်ကမၠောန်ပၠေၚ်ဒြပ်၊
ၜိုတ်ကဟောန်ယဝ်လက် သၞဗက်ချိုတ်တပ်။
၆၄၁။ ၜိုန်ဒးလ္ပဟီု၊ ၜိုန်လီုလ္ပဝေတ်။
ၜိုန်ဒးယဝ်ဟီု မိတ်လီုဒှ်မာန်၊
ၜိုန်လီုယဝ်ဝေတ် သၞဇေတ်ဒှ်မာန်။
၆၄၂။ ၜိုန်ဍုဟ်ကဵုဒှ်ၚုဟ်၊ ၜိုန်ဒုဟ်ကဵုဒှ်ပရဲ။
ဍုဟ်ဒှ်ၚုဟ်ဖန် လက်သဏ်အံၚ်ဇၞး၊
ဒုဟ်ယဝ်ဒှ်ပရဲ အာဇနဲညးဂး။
၆၄၃။ ၜတ်ၜတ်ဆက်ဆောမ်၊ ကောမ်ကောမ်လွဳ။
ၜတ်ၜတ်ဆက်ဆောမ် ပကောမ်မၞိဟ်လောဲ၊
ကောပ်ကောမ်ဂိုတလွဳ ညးပချဳဟွံလောဲ။
၆၄၄။ ၜက်ၜက်ဆက်ဆောမ်၊ ကောမ်ကောမ်လွဳ။
ၜက်ၜက်ဆက်ဆောမ် ပကောမ်မၞိဟ်လောဲ၊
ကောမ်ကောမ်ဂိုတ်လွဳ ညးပချဳဟွံလောဲ။ ။
၆၄၅။ ၝောံမၞိဟ်ဂှ်ရဴဂဴ၊ မၞိဟ်ဘာဂှ်ပံၚ်ဖက်။
ၝောံမၞိဟ်ယဝ်ရဴဂဴ ဂါရဝဒှ်၊
ယဝ်ပံၚ်ဖက်ကဵုမၞိဟ်ဘာ ဇၟာပ်အရာကုသဵုလ်ဒှ်။
၆၄၆။ ၝကၠောန်ဂှ်ခပျ်၊ ၝတပ်ဂှ်ကေတ်။
ၝကၠောန်ယဝ်ဟွံချပ် ဟွံစိုပ်ဒတုဲရ၊
ၝတပ်ဂှ်ယဝ်ဟွံကေတ် ဒးဗၠေတ်ေဒၟံၚ်တွဵုရ။ ။
လၞုဟ်ယဝ်ပတိုန်ဒုဟ် ညးက္ဍုဟ်ဟွံထဗ။
၆၇၉။ အလဵုဇကုကၠောန်၊ အလဵုဇကုဗတောန်။
အလဵုဇကုကၠောန်မ္ဂး ဗီုဒးစိုတ်ဂွံ၊
အလဵုဇကုဗတောန်မ္ဂး ကွးဒးသ္ပဂရု။
၆၈၀။ အေၚ်လ္ပဖေက်၊ ဒေက်လ္ပယံၚ်။
အေၚ်ယဝ်ဖေက်မ္ဂး ဟွံဗၠးဝါတ်ဂါတ်၊
ဒေက်မွဲယဝ်ယံၚ် ဂၠံၚ်ပေၚ်ဟွံညာတ်။
၆၈၁။ အရေဝ်ကဵုဍာတ်၊ လညာတ်ကဵုသၠုၚ်။
အရေဝ်ဍာတ် ညာတ်မိတ်လောဲ၊
လညာတ်သၠုၚ် ဂွံဍုၚ်လောဲ။
၆၈၂။ အခိၚ်ကဵုတီၚုဟ်၊ ဒုဟ်လၞုဟ်ကဵုကၠိုဟ်။
ယဝ်တီၚုဟ်အခိၚ် ကၠောန်လဟိၚ်ဟွံဒှ်ကြာန်၊
ဒုဟ်လၞုဟ်ယဝ်ကၠိုဟ် ဂွံခိုဟ်စမာန်။
၆၈၃။ အခေါၚ်ယုတ်ပဂၠါဲ၊ အခေါၚ်ဆာဲလ္ပပၠေၚ်။
ဂၠါဲအခေါၚ်ယုတ် ဟုတ်စှ်ေရိုဟ်တ္ၚဲ၊
ပၠေၚ်အခေါၚ်ဆာဲ အန္တရာယ်ဒှ်လောဲ။
၆၈၄။ အခေါၚ်ပအာတ်တ္ၚအ်၊ ရန်တၟအ်လ္ပယုတ်သဝ်။
အာတ်အခေါၚ်တ္ၚအ် လွဳယှအ်လီုလောဲ၊
ရန်တၟအ်ယုတ်သဝ် ဒှ်ဆေဝ်ဒဝ်တသိုက်ပြဲ။
၆၈၅။ အခေါၚ်ပကၟာတ်၊ လညာတ်ပဗၠေတ်။
အခေါၚ်ကၟာတ်လဝ် ညံၚ်ဖျဝ်ဖျေံဇကု၊
လညာတ်ဗၠေတ်ဗၠန် ထုဲၜန်သတြု။
၆၈၆။ အဲလေဝ်ဂုဏ်ဒှ်၊ ညးတၞဟ်လေဝ်ခိုဟ်မာန်။
အဲဂုဏ်ဒှ်မှ သောကဗၠးၜး၊
ညးတၞဟ်ခိုဟ်မှ ညးသ္ပထိုၚ်သး ။
၆၈၇။ အတ္တလ္ပလောန်ကာဲ၊ ကသပ်စၞာဲလ္ပစွံ။
အတ္တလောန်ကာဲ ဇၟာပ်ဒၞါဲဒးလေၚ်၊
ယဝ်စွံကသပ်စၞာဲ အန္တရာယ်ဂေတ်ပေၚ်။
၆၈၇။ အတ္တလ္ပလောန်ကာဲ၊ ကသပ်စၞာဲလ္ပစွံ။
အတ္တလောန်ကာဲ ဇၟာပ်ဒၞါဲဒးလေၚ်၊
ယဝ်စွံကသပ်စၞာဲ အန္တရာယ်ဂေတ်ပေၚ်။ ။
၆၈၈။ အာကဵုဒှ်ဖိုလ်၊ မံၚ်ကဵုညးဆာန်။
ယတ်အာဒှ်ဖိုလ် နွံကဵုမ္ၚဵုရ၊
ယဝ်မံၚ်ကဵုညးဆာန် ဇြဟာတ်ဂၠိုၚ်ရ။
၆၈၉။ အာဲခိုဟ်ဂှ်မၚ်မွဲ၊ မိတ်ရဲဂှ်လ္ပပလီု။
အဲခိုဟ်ယဝ်မၚ်မွဲ တသိုက်ပြဲဂွံမံၚ်တွဵု၊
မိတ်ရဲယဝ်ဟွံပလီု ဂွံဂီုကၠီုမံၚ်တွဵု။
၆၉၀။ အ္စာဝေတ်လ်ပပသၞ၊ ဂုဏ်ယာဲတ်လ္ပတၠိၚ်။
အ္စာဝေတ်ယဝ်သ္ပသၞ ဍာံပြဒးဆဵုဘဲ၊
ယဝ်တၠိၚ်ဂုဏ်ယာဲတ ဂွဴဒှ်တသိုက်ရဟွံလောဲ။
၆၉၁။ အာကၠုၚ်ကဵုဒးရး၊ ဟီုဂးကဵုဍိုန်ဍောတ်။
အာကၠုၚ်ဒးရး ၚုဟ်မးဇကုနွံ၊
ဟီုဂးဍိုန်ဍောတ် ဂတမတ်ဍိုက်ပေၚ်စုံ။
၆၉၂။ အ္စာခိုဟ်ဂှ်ဂၠာဲ၊ ဒၞာဲခိုဟ်ဂှ်မံၚ်။
အ္စာခိုဟ်ယဝ်ဟွံဂၠာဲ ဇၟာပ်ဒၞာဲဟွံဆာဲ၊
ဒၞာဲခိုဟ်ယဝ်ဟွံမံၚ် ဇၟာပ်ဂၠံၚ်ဒှ်အန္တရာယ်။
၆၉၃။ အာယုက်ကဵုဒှ်ၚုဟ်၊ ဒုဟ်ကဵုပါဲမာန်။
အာယုက်ယဝ်ဒှ်ၚုဟ် လၟုဟ်လေဝ်ၜိုဟ်၊
ဒုဟ်ယဝ်ပါဲမာန် ဇၟာပ်ဌာန်ၜိုဟ်သြိုဟ်။ ။
၆၉၄။ ဣမိလ္ပကဵုဂၠိုၚ်၊ တဴလျိုၚ်ကဵုဂွံကၠိုဟ်။
ဣမိဂၠိုၚ်မ္ဂး ကောန်ဒးချိုတ်ရ၊
တဴလျိုၚ်ဟွံကၠိုဟ် မၞိဟ်သၠိုဟ်ဒှ်ရ။ ။
၆၉၅။ ဥပမာညးကဵုတီကၠး၊ ညးဟွံထိုၚ်သးစိုတ်လ္ပဍောတ်။
ဥပမာညးဟွံကၠး ဟွံသောၚ်ၜးဒှ်ဂဗုတ်၊
ညးဟွံထိုၚ်သးဍောတ်စိုတ် ဒှ်ဟိုတ်ဂွံထေဲထုတ်။
၆၉၆။ ဨဟီုတုဲကေတ်၊ ပွဗၠေတ်ပလေဝ်ထောံ။
ဨဟီုတုဲယဝ်ဟွံကေတ် ဒှ်ဒ္ဂေတ်စးအ္စာ၊
ဗၠေတ်ဟွံပလေဝ်မ္ဂး ဟွံဗၠးဘဲသံသာ။
၆၉၇။ သြကာသကဵုကြဵု၊ ဂုဏ်ဖိုလ်ရတ်ပိကဵုတီ။
သြကာသဟွံကြဵု ဟလဵုဂွံကလအ်စရော၊
ဂုဏ်ရတ်ပိယဝ်ဟွံတီ ဒးတၞီဗၠိုက်စံၚ်တူ။ ။
၆၉၈။ အးအးမံၚ်အာ၊ မှာမှာလ္ပကၠောန်။
ယဝ်မံၚ်အးအး ညးညာတ်ဒးသ္ဍိုက်ဆာန်၊
မှာမှာယဝ်ဟွံကၠောန် ကြပ်ညောန်ကဵုနိဗ္ဗာန် ။ ။
လ္ၚီပိကၠံဍာံ၊ ပိစှော်ဒ္စါံ၊ ဒှ်သၞာံချူတုဲမာန်။
လောဲလောဲသွာသွာ၊ ဂွံတုဲအာ၊ တၟာရုဲဟွံခက်ဗာန်။
ဖဵုဂွံချူဇန်၊ လိခ်ဝွံပၠန်၊ ပ္တန်စိုတ်ဖျေံအဓိဌာန်။
ကဵုဒှ်သ္ဇိုၚ်ပြဲ၊ ဉာဏ်ကၞောတ်တဲ၊ ဟွံမဲညးပြိုၚ်ပကာန်။
မွဲဟွံတုပ်သၟဟ်၊ ဉာဏ်တၟေၚ်ဂှ်၊ လအ်ဂွံဒှ်တဴမာန်။
ဒတုဲဖဵုဆာဲ၊ ဇၟာပ်ဇၟာပ်ဒၞာဲ၊ ကဵုဂွံဂၠာဲကၠောန်မာန်။
ပိုန်ရုပ်ပညာ၊ အာယုက်ကၠာ၊ ပြာထာကဵုဒှ်မာန်။
သမၠီုရုန်မဵု၊ ဟွံမွဲမ္ၚဵု၊ လ္ပကဵုဆဵုဇၟာပ်ဌာန်။
တတိယအဝဲဒှ်၊ ပ္ဍဲဂြိုပ်ဂှ်၊ ကဵုမိပ်မြဟ်နဇျာန်။
ဇၟာပ်ဘဝတအ်၊ တိုၚ်ရန်တၟအ်၊ ဗိုန်ဇၟအ်ကဵုဒှ်မာန်။ (နာဲသာရဝဏ်၊ ဘာမဟာသတိပဋ္ဌာန်၊ ကွာန်တံၚ်ဖလုတ် ပွိုၚ်ဍုၚ်ဇြပ်ဗု တွဵုရးဍုၚ်မန်)
−
အလန်ပထမ − ၃၀၊၄၊၉၀၊ လၟိဟ်လ္ၚီအုပ်။
အလန်ဒုတိယ − ၂၆−၈−၉၂၊ လၟိဟ်လ္ၚီအုပ်။
အလန်တတိယ −၀၀−၀၉၆၊ လၟိဟ် ၀၀ အုပ်။
ယွံကောန်ဂကူမဆာန်အာဲကၟာဲလိခ်ပတ်တအ်၊ ဆအယာံမာတ်သာရဝဏ်နဳတိကၞပ်(၁)ဏအ်ဂှ် သြဝ်လ္ပတြပ်ကဵုစိုတ်ညိဏီ။
သွက်ဂွံတက်တြးပတိတ်ဂတတေံမာန် မပတမ်သာရဝဏ်နဳတိကၞပ်(၂)ကၞပ်(၃)မွဲဟာန်ကေုာံ သက်သဳသာဓက ဝတ္ထုဇာတ်နိပါတ်ဂမၠိုၚ်မာန်ဂှ်လေဝ် သြဝ်ဘိုၚ်ကဵုဇြဟတ်အိုတ်ညိဂှ် အာတ်ဏာအရီုဗေၚ်ဗွဲတၟေၚ်ရ။
အာဲကၟာဲနွံမ္ၚဵု မိက်ဂွံဆဵု ရံၚ်ဗဵုလိက်ပတ်ညိ။
လိက်ပတ်ဟွံရံၚ် ဆီလှာဲပြံၚ် ဇၟာပ်ဂၠံၚ်ယုတ်သဝ်ဂိ။
တီကေတ်တုဲကၠာ လွဳပရာ မၚ်အာလိက်ပတ်ညိ။ (နာဲသာရဝဏ်)
- လၟေၚ်ကမၠောန်တုန်
လိက်သာရဝဏ်နဳတိဝွံ အလန်ပထမ၊ ဒုတိယတအ်ဂှ် တက်ပ္ဍဵုဗီုပ္ဍဲစက်သြရသပုတ္တတုဲ၊ အလန်တတိယတအ်ဂှ်လေဝ် တက်လဝ်ကောန်ဗျူတာ(ခိုၚ်သဇၚ်)ရောၚ်။
ကွတ်ဂမျိုၚ်လမျီုကၠာ ဂးစှ်ၜါ အ္စာတံတွံလတ်ရောၚ်၊ ကွတ်အ္စာ(၁၂)ဏံဝွံ နူကဵုခေတ်သုဓမ္မဝတဳ(သဓီု)တေံ စိစောန်ကၠုၚ်မံၚ်တုဲတုဲရောၚ်။
(၁) ပါည်ထဝ် = ထဝ်−သြန်−ရေၚ်မတ် ကၠောန်ဖျေံသၞောတ် ဂ္ညိအပေါတ်ကယျိုၚ်ကယျဝ် ကွတ်(ပါန်ထဝ်)။
(၂) ပါည်ပ္သဲ = မြ မုဲ ၜုန် ဂြၚ် ကွဵု−မၞုဟ်−ဇြၚ် ကၠောန်နၚ်ဂၠိုၚ်နဲ ကွတ်(ပါန်ပ္သဲ)။
(၃) ပါည်ပုတ် = ပုတ်−ဂၠတ်−တှ်ေ−ကၠောန် ညာန်စိစောန် နဲကၠောန်ဂၠိုၚ်ခုတ် ကွတ်(ပါန်ပုတ်)။
(၄) ပါည်ခဳ = ဍာ်ဂဥုဲ−၅−အရံၚ် ဖက်−နှောဂဂံၚ် ချူညံၚ်ကၠးဗ္စဳ ကွတ်(ပါန်ခဳ)။
(၅) ပါည်ရန် = အၚ်္ဂဒဵု−တိသောတ် ဖက်စှ်ေသၞောတ် ဒက်ဍိုတ်စဳဖန် ကွတ်(ပါန်ရန်)။
(၆) ပါည်တေ = လောဟ−ဇရိုတ်ကၠာ မိတ်−ဗ္ကေတ်ၜါ စဝ်−သၚ်−သောန်လေဝ် ကွတ်(ပါန်တေဝ်)။
(၇) ပါည်ဍအ် = အၚ်္ဂဒဵု−တိနှော ဗါန်ရေက်ပ္ကဴ ကၠောန်တဴညောန်ခၠအ် ကွတ်(ပါန်ဍအ်)။
(၈) ပါည်တၟံ = ဝါန်သီုထ္ၜိုဟ်ဍာ် တၟံဂၠိုၚ်သာ် စြေက်−ပါ်−ပုတ်−ဗၠအ် ကွတ်(ပါန်တၟံ)။
(၉) ပါည်ပေါတ် = ဂၠိုၚ်ကြက်ဆုဇေတ် စုတ်စက်ဗ္ဂေတ် ဟွံဗၠေတ်နူသၞောတ် ကွတ်(ပါန်ပေါတ်)။
(၁၀) ပါည်ယန် = ယန်သေ−တာန်−တၟာန် ဒုန်သီုသာန် စှ်ေပ္ကာန်ကၠောန်ဖန် ကွတ်(ပါန်ယန်)။
(၁၁) ပါည်ကျာ = လှ်ေဒယှ်ေတိၚ်တိုက် ဗါတ်ဂၠိုၚ်အခိုက် ဆန်အလိုက်ချူဏာ ကွတ်(ပါန်တျာ)။
(၁၂) ပါည်တိ = တိဗန်−တိကမၠေတ် ကၠောန်လၟာန်ကေတ် အပေါတ်ဗ္ဂေတ်အရာသ္ၚိ ကွတ်(ပါန်တိ)။
ကွတ်အ်စာ(၁၂)သာ်ဝွံ တၠပညာတမၠာတမၠာတေံ တၚ်ယၟုခုဟ် ထ္ၜုတ်ပ္တန်စွံလဝ်ရောၚ်။
- ဥတ္တရ စူဠဒဳပ၊ နာဲအံက်ပိုၚ် ကွာန်ဝၚ်္က သက္ကရာဇ် ၂၅၆၃၊ ဂိတုဒုတိယဒ္ဂိုန် ။ ။ အုပ်နိဂီု ။