လောန်ကၠုၚ်မွဲအခိၚ် သၟတ်ဗြဴမွဲဂှ် အာသ္ၚိမိဇၞော်ဍေံဂးတုဲ ဗက်ဍာန်လတူဒဵုတုဲ အဃောကွာ်အာမံၚ်ဂှ် "ယှော" မိၚ်ရမျာၚ်တုဲ ဂစိုၚ်ရံၚ်ဂှ် ဗ္ဒာဲဇိုၚ်ဇြုံနွံမံၚ်မွဲတၞုၚ်ရ။
ပ္ဍဲအခိၚ်ဂှ် ကၠာသၟတ်ဗြဴဂှ်မုဟွံဂွံပဏီ
ဇြုံဂှ်ဟီုဂးတိုန်ကၠာရ။
"အဲဒးချိုတ်ရဏောၚ်ထေၚ် ဒၞာဲဏံဂံက်ဗွဲမလောန် ဒဵုအခိၚ်လၟုဟ် မုလေဝ်ဟွံဂွံစဏီပုဟ် ဒှ်မာန်တှ်ေ စုတ်ဏာအဲပ္ဍဲပဠောံဗှ်ေတုဲ ကော်ဏာအဲဂွံဟာ"
"ဟွံဒှ်ပုဟ် ဟွံဒှ်ပုဟ် ဗှ်ေဇြုံမုရောဂှ် အဲတီမံၚ် ဗှ်ေဇြုုံဇာတ်ဏောၚ် အဲကော်ဏာဗှ်ေတှ်ေ ဗှ်ေကိတ်အဲဟမုရ ဂျိဗှ်ေသ္ကာတ်မြဟ်မံၚ်"
" ဟွံကိတ်ပုဟ် ဟွံကိတ်ပုဟ် ဖျေံစိုတ် ယဝ်ဗှ်ေရီုဗၚ်အဲတှ်ေ အဲဂှ် ဒှ်သ္ကအ်ရဲဗှ်ေရဏောၚ် အဲဆက်ဆောံကဵုဗှ်ေခိုဟ်ခိုဟ်မိုဟ်မိုဟ်ရပအ်"
ဇြုံဟီုသာ်ဂှ်တုဲ သၟတ်ဗြဴဂှ်ချပ်အာ!
ရံၚ်ဇြုံဂှ်လေဝ် ကျေဝ်မံၚ် ကွတ်ဍေံဍောတ်ဍောတ် ညံၚ်ရဴဇက်လဝ်ရုပ်ကသူမွဲတၞး ဇြုံၜိုတ်အဲဆဵုမံၚ် ဍေံကျေဝ်အိုတ်ရဂးတုဲ သၟတ်ဗြဴဂှ်ဖျေံသ္ကုတ်သွာတ်ရ။
"အေလေဝ် အဲပတှ်ေဗှ်ေရ အဲရီုဗၚ်ဗှ်ေဏောၚ် သတ်လဵုဟွံဟီု စွံဓရ်ကရုဏာထေက်မံၚ်ဟီုဂှ် အဲဒုၚ်တဲရ"
ဟီုဟီုဂးဂး သၟတ်ဗြဴဂှ် ရပ်ကေတ်ဇြုံသာသာ စုတ်ပ္ဍဲပဠောံတုဲ ဆက်ကွာ်အာသ္ၚိမိဇၞော်ဍေံပၠန်ရ။
အဃောကွာ်အာမံၚ်ဂှ် သၟတ်ဗြဴဂှ်ပွမသ္ကာတ်မြဟ် ဒးဒုၚ်စသိုၚ်ရ။
*ဇြုံကိတ်သၟတ်ဗြဴဂှ်ယျ*
သၟတ်ဗြဴဂှ်လရိုအ် ဂွံသံဝေဂရ
"ဗှ်ေသ္ပဏာဗီုလဵုရော…?
ဗှ်ေဟီုဂှ်ဟွံကိတ်ပုဟ်ဂး အဲပတှ်ေကၠုၚ်ဗှ်ေလေဝ်"
"နူဗှ်ေကော်ဏာအဲဏောၚ် ဗှ်ေဖျေံလဝ်သ္ကုတ်သွာတ်တေံ အဲဇြုံဂကူမုရောဟီုဂှ် ဗှ်ေတီမံၚ်ရတှ်ေ မုပဟွံမာန်ပုဟ်လေဝ် ကံဗှ်ေကဵုဗှ်ေရ"ဂးတုဲ ဇြုံဠောဝ်တိတ်အာရ။
- မၞိဟ်လ္ၚဵုဂှ် ဟွံထေက်တန်ကဵုစေတနာပုဟ်။
- မၞိဟ်လ္ၚဵုဂှ် အာဆာန်ဍူဟွံဂွံပုဟ်။
- မၞိဟ်လ္ၚဵုဂှ် လတာ်ၜါကဵုဗီုဇြုံကၠၚ်ဂှ်။
- မၞိဟ်လ္ၚဵုဂှ် လၟုဟ်မွဲဗီု ဏှေံညိမွဲဗီု။
- မၞိဟ်လ္ၚဵုဂှ် မာယာဂၠိုၚ်လောန်ရ
ကၠာဲနူဘာသာသ္အာင်
ဗညာလာဲ