ပ္ဍဲဗ္တံဂံက်မွဲဗ္တံဂှ် ဨကရာဇ်အဃောမကွာ်စဴဒၟံၚ်နန်
ဆဵုဒးအနော်ဗျူမွဲ လ္တက်လဝ်ပဠောံကြဳကြဳရ
အခါဂှ် ဨကရာဇ်ကွာ်လုပ်အာဗ္ဒာဲအနော်ဗျူဂှ်တုဲ သၟာန်တိုန်ရ
"အနော် ဟွံဒးဒုၚ်ဘဲဂံက်ပုဟ်? ဟွံဂံက်ပုဟ်ဟာ?"
"ယွံမရာဇ် ၜိုန်ဂံက်ကီုလေဝ် ယာတ်ပဠောံသွက်ဂွံက္တဴဂှ် ပ္ဍဲပိုယ်ဍိက်ဟွံမွဲပုဟ်"
ဨကရာဇ် ကဵုအသမ်ပါၚ်ရ
"အဝ် ဟီုဟဂှ် လ္ပဂွိၚ် လၟုဟ်အဲအာနန်တုဲ ယာတ်ပဠောံသွက်အနော် အဲဗၠးကဵုဍိက်ပလံၚ်နၚ်ဏောၚ်"
အနော်ဗျူဂှ် မိၚ်ဒးကတိပါၚ်ဨကရာဇ်တုဲ မိပ်မြဟ်အာရ
ဆ္ဂး ဨကရာဇ်ဂှ် စိုပ်အာနန်တုဲ ကတိပါၚ်ဇကုကဵုလဝ်ဂှ်ဝိုတ်အာရ
တ္ၚဲယးတၟး အနော်ဗျူဂှ် ချိုတ်အာယျ
ပ္ဍဲတဲညးဂှ် နကဵုတဲခတဝ်ခတဝ် ချူလဝ်လိခ်မွဲတၞးရ
ချူလဝ်ပ္ဍဲလိခ်ဂှ်…
အဲဂှ် ဇၟာပ်အရိုဟ်တ္ၚဲ ဒုၚ်ဘဲဂံက်တုဲ တတ်ထပါ်ကၠုၚ်ရ
ဆ္ဂး ဨကရာဇ်ကဵုအဲယာတ်ပဠောံသွက်ဂွံက္တဴဏောၚ် ကဵုလဝ်ကတိပါၚ်တုဲ ဇဲအဲသွက်ဂွံဒုၚ်ဘဲဂံက်ဂှ် ရိုပ်သီထောံတုဲ အိုတ်ကၞောတ် အဲဒးချိုတ်အာရ။
#တၚ်စၟတ်
အရေဝ်ဆဆဵု ကတိပါၚ်ဇကုဟွံဗိုန်ဗတ်ဂှ် လ္တူနူဇကုထေၚ်လဝ်ဂှ် ညးတၞဟ်စိုပ်အာဒဒိုက်ဒုက္ခမာန်မံၚ်
ဟိုတ်ဂှ်ရ လ္ပကဵုကတိပါၚ်လောဲလောဲညိ။
ကတိပါၚ်ဇကုကဵုတုဲဂှ် လ္ပပလီုထောံညိ
ကတိပါၚ်ဇကုကဵုလဝ် ၜိုတ်ဂှ်ၜိုတ်ဏံ ညးတၞဟ်ဒးဒုၚ်ဘဲဏောၚ်ဂှ်ဇကုတီမာန်ဟွံသေၚ်
စွံဓရ်ကၠိုဟ်ခၠၚ်လ္တူညးဂမၠိုၚ်ညိ။
ဗညာလာဲ(ကၟာမဵု)