လိက်အုပ်မွဲမၞုံယၟု−(ဗီုလဵုသ္ဂောံသ္ပညံင်ဟွံဂွံထေဲ)မဒှ်ကီုရ၊ လိက်အုပ်ဏံဝွံ ဒှ်တဴသ္ကံတဲခိုဟ်မွဲသွက်ကောန်ဂကူဗုဒ္ဓဘာသာပိုဲတုဲ သွက်သ္ဂောံသုင်စောဲဘဝဂွံဆဵုတသိုက်ဇေတ်ဇေတ်မာန်ပ္ဍဲဍာန်ဗုဒ္ဓဘာသာမွဲရ၊ ဒှ်နဲကဲခိုဟ်မွဲသွက်သ္ဂောံပြိုင်ပ္ကာန်ကဵုပြသၞာဇၟာပ်ဇၟာပ်တ္ၚဲဏံခိုဟ်မွဲကီု၊ ယဝ်ရပိုဲဏံမိက်သ္ဂောံဒှ်ကောန်ကွးနာဲပိုဲဗုဒ္ဓမ္ဂးတှ်ေ လိက်အုပ်ဏံမွဲဍောတ်ဂှ်ထေက်ကဵုဒးသ္ပသ္ကံတဲအိုတ်ညိအဴ။
လ္ပမံင်လအ်တုဲ ဇၟာပ်ညးအဲစွံသမာဓိမွဲချိန်ခဏ ရာန်ကေတ်အခိင်မွဲလစုတ်တုဲ ပိုဲလုပ်ဗှ်လိက်အုပ်ဏံစိုအ်။
နိဒါန်လိက်
လိက်အုပ်ဍောတ်ဏံမၞုံယၟု(ဗီုလဵုသ္ဂောံသ္ပညံင်ဟွံဂွံထေဲ)အုပ်ဏံဝွံ ပ္ကောံလဝ်မအရေဝ်ဝေတ်ဒၠောံဗ္တောန်နဒဒှ်ကောန်ဗုဒ္ဓဘာသာမွဲတုဲ ဒှ်တဴဖဵုသွက်ဘဝပိုဲတံသီုညးဖ္အိုတ်ကီုရအဴ၊ မအရေဝ်ပ္ဍဲကဵုလိက်အုပ်ဏံဝွံ ဟီုလဴစိုပ်အာဗီုဂွံဗ္စာရဏာဒုဟ်ထေဲပိုဲတံနာနာသာ်ကီု၊ သွက်သ္ဂောံဒ္ဂေတ်ဝေတ်ဗ္တောန်ညံင်ဒုဟ်ဂွံလာဲလေၚ်အာနူကဵုဓဝ်ဒုဟ်ထေဲတံဂှ်တုဲ ဂွံက္တဵုဒှ်ကၠုင်မၞိဟ်ထေဲကဵုညးတၞဟ်ဟွံလေပ်မွဲကီုရ။
ဖျုန်လိက်အုပ်ဏံဝွံ ထေက်ကြိုက်ကဵုအၚောပ်စိုတ်သွက်မၞိဟ်တ္ၚဲဏံသွက်သၟတ်တ္ၚဲဏံခိုဟ်အိုတ်တုဲ ကေတ်ကၠုင်အခိၚ်အကြာကမၠောန်ၜိုတ်သၠးချူဇန်ပ္ကောံကၠုင်လဝ်လိက်ဏံမွဲအုပ် သွက်သ္ဂောံဒှ်ပရင်တဲခိုဟ်အိုတ်သွက်ကောန်ဂကူဗုဒ္ဓဘာသာတံကီု၊ ဒှ်သွက်သ္ဂောံသုင်စောဲအာပ္ဍဲဘဝလၟေင်လၟေင်တ္ၚဲသွက်ကောန်ဂကူတံနကဵုဂၠံင်ဍာန်ဓရ်တပ်အးမွဲတၞုင်ကီုတုဲ ညံင်ကဵုပိုဲကောန်ဂကူတံသီုညးဖ္အိုတ်ဂွံကွာ်ဗက်အာဂၠံင်ဍာန်အပါပိုဲဂေါတမလးလဝ်မွဲတၞုင်သွက်ပိုဲကောန်တံရ။
လုပ်ဗှ်ဖျုန်လိက်စိုအ် −−−− ကျာ်တြဲနာဲပိုဲဗုဒ္ဓဝွံ ဒှ်တဴသာသာဍိုက်ပေင်ကဵုမေတ္တာမွဲကွေံကွေံရ၊ နာဲပိုဲညးဍိုက်ပေင်ကဵုဓရ်နွံတဴမွဲသာ်ပၠန်ဂှ်တှ်ေ ညးတၠဂရုဏာဇၞော်အိုတ်မွဲတုဲ ဟိုတ်ဏံရပိုဲကောန်ဂကူဗုဒ္ဓဘာသာတံသီုညးဖ္အိုတ်လေဝ် ဒးဒုင်ဝေတ်ဗ္တောန်ကေတ်ကၠုင်ညံင်ဂွံနွံကဵုဓဝ်ဂရုဏာမွဲတုဲ သွက်သ္ဂောံရီုဗင်ညးမွဲကဵုညးမွဲ သီုစိုတ်သီုကာယတုဲ နွံကၠုင်ကဵုမေတ္တာလ္တူညးသ္ကံလၟိုန်ရ၊ (ရံင်ကဵုအခိင်အခေတ်ကာလဒေသပူဂဵုမွဲမွဲတုဲ သုင်စောဲစကာမေတ္တာဂရုဏာဏံညိပ္ဍဲနာဍဳမိဏေတ်စက္ကဏံ)။
မေတ္တာဟီုမ္ဂးဂှ် ဒှ်သွက်ဂွံဒစဵုဒစးကဵုဓဝ်ထေဲတံမဒှ်ရ၊ ဓဝ်ထေဲဏံမွဲရဒှ်တဴသၞသတြုပလီုတဴဓဝ်မေတ္တာညံင်ဟွံဂွံက္တဵုဒှ်မံက်ဂတဝ်ကၠုင်မာန်ရ၊ ညးလ္ၚဵုတံဂှ်ဒှ်တဴမၞိဟ်ထေဲပြဟ်စိုတ်ပြဟ်တုဲ ပ္ဍဲကဵုအခိင်ထေဲတိုန်ဂှ်ဟေင် အရာကၠောန်သ္ပဟီုဂးနာနာတံဂှ်လေဝ်မ္ၚိုဟ်ကြံင်တိတ်ဟလုတ်အာကီု၊ ကၠောန်ဗဒှ်ကဵုအရာနာနာလီုလာ်စာ်ထောင်ကၠုင်မာန်လောဲလောဲကီု၊ မုဂွံဗဂဵုလဟဵုကၠောန်သ္ပလေဝ်ဍာန်ပိုတ်ဒၟံင်တုဲ စိုတ်တေံဟွံညိင်ဝတ်ဟွံၜိုဟ်သိုဟ်ထေဲတိုန်ထေဲအာဂၠိုင်ဂၠိုင်တုဲ ဒှ်ကၠုင်ပြသၞာနာနာဒၟာနူကဵုစိုတ်ဇကုလောဲလောဲရ၊ ပ္ဍဲအခိင်အဃောမထေဲတိုန်ဒၟံင်ဂှ်လေဝ် မေတ္တာဟီုဂှ်ကၠေံပၠိုတ်စိုပ်အာအရောပ်လဵုဟွံတီအိုတ်ရ၊ မေတ္တာတံဂှ်လေဝ်အာအေပ်ဇူထောံအိုတ်ရ၊ လပါ်ဓဝ်ထေဲဂှ်ပၠန်လေဝ် သီုကဵုဟွံမွဲယ်ဗၟိက်ကဵုဍေံမွဲသာ်ဟေင် ဗွဲတၟေင်ဍေံမံက်တိတ်ကၠုင်မာန်လောဲလောဲတုဲ အုပ်ဓလီုဂွံလဝ်ဘဝပိုဲဏံဖ္အိုတ်ရ၊ ဟိုတ်ဒှ်သာဲဂှ်တုဲ နဲကဲဂတာပ်အခေတ်ခိုဟ်အိုတ်သွက်သ္ဂောံဂစိုတ်သ္အးကၠေံဓဝ်ထေဲတံညံင်ဂွံအိုတ်အးအာပ္ဍဲစိုတ်ပိုဲဏံဟီုဂှ်တှ်ေ ဗီုဂွံဗ္စာရဏာနာနာ ဗီုလဵုဂွံဝေတ်ဟီုလဴဗ္တောန်ကဵုပိုဲတံပၠန်ဂှ် ဆက်ဗှ်အာညိအဴ။
နဲကဲ(၁)
(ဒးကူချပ်ဂုဏ်ဖဵုနာနာဒးလီုလာ်အာဒၟာနူကဵုပိုဲဒှ်မၞိဟ်ထေဲပြဟ်စိုတ်ပြဟ်မွဲ)
ဒးကူချပ်ဂုဏ်ဖဵုနာနာဒးလီုလာ်ကၠုင်ဒၟာနူကဵုပိုဲဏံဒှ်မၞိဟ်ထေဲပြဟ်စိုတ်ပြဟ်မွဲဟီုဂှ် −−−−
(က) − ဒးဗ္တောန်ဒၟံင်စိုတ်ပိုဲဏံတွဵုဟီုဂှ်တှ်ေ နာဲပိုဲဗုဒ္ဓဝွံ ဒှ်တဴညးတၠမဟာဂရုဏာမွဲတုဲ ဗ္တောန်ဟီုလဴကဵုကောန်ဗုဒ္ဓဘာသာတံညံင်သ္ဂောံဒှ်မၞိဟ်တၠမေတ္တာမွဲရ၊ ပိုဲတံတီထေဲမံင်သၟးတုဲဟွံထပၠိုတ်ထောံပၟတ်ဓဝ်ထေဲဂှ်တွဵုဏောင်တှ်ေ ဣဏံဟီုဂှ် ဒှ်တဴပိုဲတံဟွံဒ္ဂေတ်ဗက်ဗီုအရေဝ်ဝေတ်ဗ္တောန်နာဲပိုဲဗုဒ္ဓကီုရ၊ ဟွံကၠောန်သ္ပကွာ်ဗက်ဗီုကဵုဂၠံင်ဍာန်နာဲပိုဲကီုတုဲ ဟွံထေက်ကဵုဒှ်ကောန်ကွးနာဲပိုဲသၟးဟွံက သီုကဵုဟွံဒှ်တဴမၞိဟ်ဗီုကောန်ဂကူဗုဒ္ဓဘာသာမွဲရ၊ ဟိုတ်ဒှ်သာ်ဂှ်တုဲ ပိုဲတံထေက်ကြိုက်ဒးပဠေဝ်စိုတ်ပိုဲကောန်ဂကူတံ ညံင်သ္ဂောံဒှ်ကောန်ကွးဆာန်နာဲပိုဲအိုတ်တုဲ ဂွံကိတ်ညဳဒုင်ယၟုကောန်ဂကူဗုဒ္ဓဘာသာဍာံဍာံခိုဟ်ခိုဟ်မွဲမာန်ရ။
(ခ) − နာဲပိုဲဗုဒ္ဓဗ္တောန်ဟီုလဴလဝ်ဂှ် မၞိဟ်မထေဲတိုန်ဗွဲကိုပ်ကၠာဂှ်ဒှ်တဴမၞိဟ်ဗၠေတ်မွဲရ၊ တုဲတှ်ေပၠန်လေဝ် မၞိဟ်ဟွံမွယ်ကဵုသတိတံဂှ်ဟေၚ်ရဒးအလီတုဲ ထေဲဗက်အာဗီုဍေံဂှ်အိုတ်မွဲစွံရ၊ (ညးဟီုကေင်မိၚ်မံင်ဂှ် ကၠဵုမွဲကဳတုဲယဝ်ပိုဲကဳဗက်တှ်ေဒှ်ကၠဵုကဳၜါရ၊ ဂလာန်ဝွံထေက်ကဵုဒးဂွံသတိအိုတ်ညိဏး)၊ ဟိုတ်ဒှ်သာ်ဂှ်တုဲ ညံင်ရဴသိုန်မာန်ပတိုန်ကေတ်ဓဝ်ပရေံဓဝ်မယုတ်တံဂၠိင်သ္ၚောဲဂၠိုန်တိုန်ကၠုင်ညးသ္ကံအိုတ်ရ၊ ဗီုဏံဂှ်ဒှ်စိုတ်ဂၠုဓီုတုဲ ဒှ်တဴမၞိဟ်ပရေံနူကဵုမၞိဟ်မထေဲကိုပ်ကၠာအိုတ်ဂှ်ဏီရ၊ ပိုဲတံလ္ပဒုင်ကေတ်ယၟု သီုဒှ်မၞိဟ်ပရေံသီုဒှ်မၞိဟ်ဒိုဟ်ဂၠုဓီုမွဲတွဵုညိ၊ အခိင်ဆဵုတီညာတ်ကေတ်ညးမွဲလပါ်တေံထေဲတိုန်ကၠာတှ်ေ ပိုဲဏံလ္ပထေဲဗက်အာဍေံတွဵုညိအဴ၊ ယဝ်ပိုဲထေဲဗက်ဗီုဍေံကီုတှ်ေ ညံင်ရဴကၠဵုၜါကဳကိတ်ညးသ္ကံတုပ်တုပ်ရ၊ မၞိဟ်ထေဲကိုပ်ကၠာဂှ် ဒှ်မၞိဟ်ဂၠုဓီုမွဲတုဲ သီုကဵုဟွံမွယ်ကဵုဗဟုသုတအရာသုင်စောဲဘဝတုဲ ဖဵုနာနာလေဝ် မၞိဟ်ထေဲပြဟ်တံဂှ်လီုလာ်အိုတ်ပိုတ်ကၠုင်မာန်ရ၊ မၞိဟ်ထေဲပြဟ်တံဂှ်လေဝ် စိုတ်ဍေံတံဟိုတ်ဖဵုအောန်လောန်တုဲ သုင်စောဲစကာအရီုစိုတ်အတ္တပူဂဵုဂၠိုင်တုဲ ညးလဵုမံင်ဗ္ဒဲါဍေံတံဂှ်တှ်ေ ဟၟဲကဵုတသိုက်ကွေံကွေံရ၊ ဇေတ်ဇေတ်ဂှ်တှ်ေ မၞိဟ်ဗွဲမဂၠိုင်ဟွံဒးစိုတ်မၞိဟ်ထေဲပြဟ်စိုတ်ပြဟ်ရ၊ အိန်ထံင်လ္ၚဵုဂှ် ဒှ်သၞတင်ကယျာင်ညးသ္ကံမိင်မံင်တွဵုဂှ်တှ်ေ(ယဝ်အဲတီမံင်ဗှ်ေစိုတ်ပြဟ် ဒှ်မၞိဟ်ထေဲပြဟ်တှ်ေအဲဟွံပံင်ကဵုဗှ်ေ)သာ်ဏံလေဝ် ဂကောံအိန်ထံင်တံဂှ် ဒးဆဵုအာပြသၞာပ္ဍဲဘဝလၟေင်လၟေင်တ္ၚဲဟွံပိုတ်သ္ကုတ်ရ၊ ဗီုလဵုသ္ဂောံသ္ပရော ဆာန်ပံင်အာညးသ္ကံဂွံကၠုင်ကောန်ပိပန်ယျတှ်ေ ဒးဆက်ပံင်အာညးသ္ကံရလေဝ်၊ ယဝ်ညးတၞဟ်တီဇကုဒှ်မၞိဟ်စိုတ်ထေဲပြဟ်ဏောင်တှ်ေ ကမၠောန်ဇၞော်ကဵုဒြဟတ်ဂှ် ဟွံလုပ်စိုပ်အိုတ်တုဲ သီုကဵုဟၟဲကဵုၚုဟ်မးမၞိဟ်ပ္ဍဲမတ်ညးတၠပညာတံရ။
(ဂ) − နာဲပိုဲဗုဒ္ဓဗ္တောန်ဆက်အာပၠန်ဂှ်တှ်ေ ယဝ်ရညးတၞဟ်ထေဲကၠုၚ်ကဵုပိုဲဏံတှ်ေ ပိုဲဏံဂှ်လ္ပထေဲဗက်အာဍာ်ဍေံဂှ်တွဵုညိ၊ ယဝ်ရကောန်ဂကူတံကၠောန်ဂွံဗီုဏံတှ်ေ ဒှ်မၞိဟ်ဇၞးတဴပေဲါပၞာန်ဏံရ၊ ပေဲါပၞာန်ဗီုဏံဂှ်မၞိဟ်ဂွံမာန်ကေတ်ဇၞးဍေံဂှ်နွံအောန်တဴဗွဲမလောန်ရ၊ ပ္ဍဲကဵုအခိင်ပိုဲတီညးမွဲလပါ်ဂှ်ဗီုပြင်ပြံင်သၠာဲဗၠေတ်ပကတိမ္ဂးတှ်ေ လပါ်ပိုဲဏံဂှ်ဒးနွံကဵုသတိဟေင်တုဲ မင်မွဲလဝ်စိုတ်ပိုဲလ္ပကဵုယောင်ယာအာဇၟာပ်စက္ကဂှ်ညိ၊ ဟွံထေက်ကဵုဗက်ထေဲအာကဵုဍေံတုဲ ဒှ်တဴဂွံကၠောန်ဗဒှ်ဖဵုသီုညးၜါလပါ်ကီုရ၊ လဆောဝ်လဆောဝ်တှ်ေ ဓဝ်ဍာံဟီုဂှ် ၜိုန်ရပိုဲဏံဟွံကလေင်ကယျာင်ဗက်ထေဲကဵုဍေံကီုလေဝ် ပိုဲဏံတီကေတ်ညးမွဲဓဝ်သ္ၚိတ်သ္ၚိတ်တုဲ ယဝ်ရဖဵုဍေံအောန်တီကၠးဏောင်တှ်ေ ဒးပဲါစ္ဍးတိတ်အာနူမၞိဟ်ဂကောံတံဂှ်ထေက်ရ၊ ယဝ်ရပိုဲမံင်ဒၟံင်ကရောံဍေံဆက်အာလအ်လအ်တှ်ေ ဓဝ်အေင်ဒုင်ပိုဲမၞိဟ်ဏံဟီုဂှ်နွံကဵုအခိင်အိုတ်တုဲ ဖေက်လုပ်ဒၞက်ဍေံလောဲလောဲရ၊ ပိုဲဏံဂှ် ကျာ်တြဲတၠအရှိုန်ဟွံသေင်တုဲ ဒှ်ပုထုဇန်မၞိဟ်သာမညဏောင်တှ်ေ ဒးစွံသတိဓဝ်အေင်ဒုင်ဏံရ၊ ဟိုတ်ဒှ်သာ်ဂှ်တုဲ ပိုဲကောန်ဂကူဗုဒ္ဓဘာသာတံသီုညးဖ္အိုတ်ဂှ် လ္ပဒးဒုင်ကျထောံပေဲါပၞာန်ဏံဂှ်အိုတ်ညိအဴ၊ ထေက်ကဵုဒးဒှ်မၞိဟ်အံင်ဇၞးပေဲါဗ္တိုက်ဓဝ်ထေဲဏံဂှ်ညိ၊ တုဲတှ်ေ ဒးဒှ်တဴမၞိဟ်ညးသိုင်ပတိုန်ဂုဏ်ဖဵုနာနာဂှ်ညိ၊ လ္ပကဵုဒှ်မၞိဟ်ဟလိုင်ပ္တိုန်ဓဝ်မ္ၚိုဟ်ကြံင်ဟွံပေင်စိုတ်ညးမွဲကဵုညးမွဲဂှ်ညိ၊ ယဝ်ရပိုဲကောန်ဂကူတံပွမထေဲဂှ်နွံမံင်ဏီဟွံအိုတ်ဏောင်တှ်ေ ဆက်ဗ္စာရဏာကေတ်နဲကဲၜါပၠန်ညိအဴ။
နဲကဲ(၂)
ဗ္စာရဏာဒုဟ်ဒဏ်မကၠုင်နူကဵုထေဲ
မၞိဟ်မထေဲပြဟ်တံဂှ် ပ္ဍဲဘဝလၟေင်လၟေင်တ္ၚဲဍေံတံဂှ်လေဝ် ဟွံမွယ်ကဵုတသိုက်စိုတ်ကွေံကွေံရ၊ အခိင်ဍေံတိက်လေဝ်နွံကဵုဒဒိုက်စိုတ်နာနာမာန်ရ၊ သွက်မၞိဟ်စိုတ်ပြဟ်ထေဲပြဟ်တံဟွံတီမွဲသာ်ဂှ် ပွမထေဲပြဟ်ဏံဂှ်ဒှ်တဴအန္တရာဲကဵုဘဝဇကု ဒှ်တဴအန္တရာဲကဵုဂကောံအိန်ထံင်ဇကု ဒှ်တဴအန္တရာဲကဵုဂကောံဘာသာဇကုမာန်လောဲလောဲတုဲ စိုတ်ဍေံတံဂှ်လေဝ်ဒှ်ကၠုင်သရမွဲ အ္စာဂဥုဲစောန်စောန်တံကၠုင်လွဳလေဝ် လွဳဗၠးမာန်ဂၠံင်ဍာန်ဟွံမွယ်ရ၊ နဲကဲလွဳဗၠးမာန်ဂှ်တှ်ေ ဒးတီကၠိုဟ်ဟိုတ်ဖဵုကဵုဂၠိုင်ဂၠိုင်တှ်ေ စိုတ်ဒှ်မံင်သရပ္ဍဲတေံဂှ်ပူဂဵုတံဂှ်ဟေင်လွဳကေတ်ဗၠးရ၊ ဇကုပိုဲဏံပိုဲဒးလွဳကေတ်ကေတ်ရ။
လၟေင်လၟေင်တ္ၚဲဏံပိုဲဂွံဆဵုဒၟံၚ်တွဵုရဟွံသေင်ဟာ၊ နူဍောတ်ဍောတ်မိမပိုဲညးတံဒှ်သၞညးသ္ကံကီု၊ ပရေင်ပရောမွဲမွဲ ညးမွဲလပါ်ဂှ်ဟွံတီကၠးတုဲ ဗီုဆဵုဗီုဟီုလက်ဒေါန်စုတ်ပေင်ပြးကီုရ၊ အခိင်တီဓဝ်ဍာံဂှ်တှ်ေဗၠေတ်မံင်တုဲ အရာအဃောမထေဲဒှ်သၞလောန်ကၠုင်ဗွဲကိုပ်ကၠာဂှ်မုဖဵုနွံရော၊ ထၟာဲပုင်ပ္ၚာင်စပုင်အပါကၠဟ်ဖျေံတိထ္ကးအာအိုတ်တးဂှ်ကလေင်ကေတ်ဂွံမံင်ဏီဟာ၊ ဣဏံဒုဟ်ထေဲပြဟ်ပ္ဍဲဘဝအဲညးချူလိက်ဏံဂွံဆဵုကၠုင်၊ −− ပ္ဍဲကဵုတ္ၚဲဏံလေဝ် ဇၟာပ်ညးအဲထေင်ဗၠေတ်မှာကၠုင်ဒၟာနူစိုတ်ပြဟ်ထေဲပြဟ်တံဂှ်နွံတဴသီုညးဖ္အိုတ်ရအောန်ကဵုဂၠိုင်၊ ယဝ်ဒှ်မၞိဟ်ထေဲအောန်ထေဲလဇုဲဏောင်တှ်ေ ဂွံဒုၚ်ကေတ်ဂုဏ်ဖဵုနာနာသာ်ပ္ဍဲဘဝလၟေင်လၟေင်တ္ၚဲသက်ပ္တောံၜိုတ်ဟွံမွယ်ရ၊ ဟိုတ်ဒှ်သာ်ဂှ်တုဲ ဇၟာပ်ညးအဲလေဝ် ဒးနွံကဵုဟိုတ်ဖဵုကဵုဂၠိုင်ဂၠိုင်ညိ၊ ထေဲဟီုဂှ် ယဝ်ချူလဝ်ဂွံတှ်ေချူစွံလဝ်ပ္ဍဲစၞာံဇကုပိုဲ ညံင်ကဵုပိုဲထပက်အင်ယန်ရုပ်ကၞုဲရုပ်ကၠရုပ်ကၠဵုတံတှ်ေ တၟေင်ဒှ်ဖဵုကဵုမံင်သတိသွက်ပိုဲဏံခိုဟ်အိုတ်မွဲရ၊ ဇၟာပ်ညးအဲလ္ပဝိုတ်ထောံညိ။
လ္ၚဵုဂှ် ပ္ဍဲအခိင်ဒေါသမံက်တိတ်ကၠုင်ဂှ် မူရောဟွံတီမွဲသာ်အရာလဵုဒှ်ဖဵုအရာလဵုဒှ်ဒုဟ်တုဲ ထေဲတိုန်ညးသ္ကံရံင်ဟွံညာတ်ဟိုတ်ဖဵုအိုတ်ရ၊ စိုတ်ထေဲဂှ်အုပ်ဓလီုလဝ်အလုံခန္ဓမွဲဖ္အိုတ်တုဲ အလုံခန္ဓကာပိုဲဏံမွဲဖအိုတ်ဂှ်ဂၠုဓီုအာကီုရ၊ မၞိဟ်ထေဲကၠာဂှ်ဒှ်ဒေါသက္တဵုဒှ်တုဲယျတှ်ေ အရာလဵုကၠောန်ဝါတ်ဂှ်ဒှ်ကမၠောန်ကၠောန်သ္ပလောဲသွာတဴတုဲ ပ္ဍဲအခိင်ထေဲပြေဂှ်ဟေင် ညးဒးဒုင်ဒဒိုက်အရာမကၠောန်သ္ပဏာနာနာသာ်တံဂှ် ခန္ဓဇကုပိုဲဏံပၠန်ရ၊ ထေဲကၠာအိုတ်ဂှ် ထ္ၜးကေတ်အစောံစရာဲသွံစမုက်မတ်ညးသ္ကံ၊ ပ္ဍဲအခိင်ဓဝ်ထေဲဂှ်ထ္ၜးတဴရုပ်ရဴပေင်ပေင်ဂှ်ဟေင် ညံင်ရဴကုတ်ကအ်ဇြောတ်ဆီညးသ္ကံမာန်ရ၊ ပ္ဍဲကဵုစက္ကဂှ်ဟေင်ရမူရောဟွံဖေက်တဴမွဲသာ်တုဲ ရုဲကၠဟ်ပ္တိတ်နင်မအရေဝ်ပသပသအုဲအုဲအရာဟွံမွယ်ကဵုဓဝ်မဂွညးသ္ကံအိုတ်ရ။
မၞိဟ်စိုတ်ပြဟ်ထေဲပြဟ်ဏံဂှ် ဂစိုတ်မိမၜါလေဝ်ဒှ်လေပ်မာန်မံင်ရ၊ ဂစိုတ်ခမဳသၚ်တံလေဝ်လောဲသွာမာန်ရ၊ သွက်မၞိဟ်အောန်ကဵုဒေါသဒေါသနွံအောန်တံဂှ် ဒဒိုက်စိုတ်ဒဒိုက်ကာယဟွံဟွံမွယ်ဗွဲလက္ကရဴရ၊ ပွမထေဲဏံဂှ်ထ္ၜးကၠုင်ဒုဟ်ဒဏ်နာနာသာ်မာန်ရ၊
ဆက်ချူမံၚ်ဖိုဟ်ရ၊ ချူဟွံတုဲဒှ်ဏီပုဟ် မလိက်တံလေဝ်ဟွံသ္ဂောံစၟတ်လဝ်ချိုတ်ချိုတ်ပၠိုတ်ပၠိုတ်တုဲ အခိၚ်သၠးမှကလေင်စၟတ်ချူပဠေဝ်အာသိုက်သိုက်ဏောင်၊ တက်လိက်ပ္ဍဵုပ္ဍဲစက်ကောန်ပျူတာဂှ် လဆောဝ်တှ်ေမွဲမကဵုမွဲမစုက်ဒၟံၚ်ညးသ္ကံတုဲ တက်အာပ္ဍဵုအာအတိုင်သဘာဝတုဲ လဆောဝ်တှ်ေ တက်ၜက်တက်ပေအာနွံရ၊ ပဠေဝ်ဗှ်အာအိုတ်ညိအဴ၊ မလဵုပိုဒ်လဵုပၞောန်လဵု ယဝ်ဆဵုဗၠေတ်ၜက်ပေနွံတှ်ေ ဘိုင်စၟတ်ကဵုကီုတှ်ေဒှ်ဖဵုဗွဲမလောန်ရ၊ အခိင်အဲညးချူလိက်ဏံစၟတ်တှ်ေ သ္ဂောံတုဲဒှ်ပြဟ်မာန်ရ။ တင်ဂုဏ်ရအဴ
No comments:
Post a Comment