ဇြဟတ်ဂကောံ
ကသုမွဲဒုန် ၜိုန်ဒုန်ဟွံဒေံါ ဂၠုၚ်ဟွံဂြိပ်အာ၊
ဂၠိုၚ်ကဵုတၞုၚ်ကၠာ ဒုန်ဏာညဳသၟဟ် ပြဟ်စိုပ်တိုၚ်ပ္ကဴ။
ညးမွဲဓဝ်က္ညာၚ် ရမျာၚ်ဟွံထတ် ဗြုလျတ်အောန်တဴ၊
ညးဂၠိုၚ်က္ညာၚ်တဴ ဖ်အဴမွဲဇြဟတ် ဗြုထတ်သေၚ်ဟာ။
ပၞာၚ်မွဲတၞုၚ်စဝ် ယဝ်ရဍေန်မ္ဂး လျးဟွံတၟးအာ၊
ဂၠိုၚ်ကဵုတၞုၚ်ကၠာ ယဝ်ဍေန်ဏာပၠန် ဨကန်တၟးတဴ။
တက်တဲညးမွဲ ဟွံသ္ၚောဲဗြုလျတ် ဟွံထတ်ဗြုတဴ၊
ညးဂၠိုၚ်တက်အဴ ဗြုတဴထတ်ကွေံ ဍေံလျတ်သ္ၚောဲအာ။
ပ္ကဴမွဲအောၚ်ပၠန် ဇန်ဟွံကျေဝ်ဆာဲ အမြာဲလေဝ်အောန်၊
ပ္ကဴဂၠိုၚ်မလောန် ဟွံအောန်အမြာဲ ဇန်ကျေဝ်ဆာဲအာ။
ညးမွဲဓဝ်ကၠောန် ကမၠောန်ဂွံတုဲ လဇုဲကွေံကၠာ၊
ညးဂၠိုၚ်ကၠောန်ဏာ ကေၚ်ကာကၠောန်ဂှ် ပြဟ်တုဲဟွံယောန်။
ယွံလေဝ်ကောန်ၜိုပ် စိုပ်အခိၚ်ရ ပတိက်မံၚ်ညိ၊
မန်ဂွံဗၠးစိ နူဂျိဘွဍိက် ဘိကော်ပကောံ။
ညံၚ်ဂြုန်ဒက်သ္ၚိ ကၞိဒက်ခပေဲါ ကၠောန်မွဲကရောံ၊
ဇြဟတ်ဂကောံ ဗ္ဒေံါသိန္နရာဇ် သာတ်ၜဳမာန်ညိ။
ဇြဟတ်မွဲဓဝ်
ဗ္ကဴမွဲဍောၚ်ပၠန် ဇန်ဟွံကျေဝ်ကၠာ၊
ကသုမွဲဒုန် ဒုန်ဟွံဂြိပ်အာ။
ပၞာၚ်မွဲတၞုၚ်ဂဵု ဆဵုလျးအောန်အာ၊
ဇြဟတ်မွဲဓဝ် တဝ်စၞေဟ်ဟွံမာန်ကၠာ။
ဆာန်ဇေတ်