လျးဂိတု ဗ္တံဂိတုပေၚ်ဝွံ ပၠတဴမံၚ်လျးကဵု ဇရေၚ်လိုက်ဂၠးကဝ်ဇၞော်ဏအ်ရ။ ပ္ဍဲသၟဝ် တိုက်ဒမၠု မအုပ်ဓလီုလဝ်ဂှ် ရမျာၚ်စၟအခြဂမၠိုၚ် ဟောကၠံၚ်ဒၟံၚ်တုဲ လဆောဝ်လဆောဝ် ရမျာၚ်ချေံဂမၠိုၚ် တသိုဟ်၊ ရမျာၚ်စိၚ်ကရေဲဂမၠိုၚ် မံက်တိတ်ကၠုၚ်ရ။
လျးပၟတ်ကၠေၚ်သ္ဍဴ နူတိုၚ်ပၟတ်သ္ဍဴဂမၠိုၚ် သီုမတၟးတဴ လ္တူနူလျးသၟိၚ်ဂိတုတုဲ ပ္ဍဲကဵုကျာမပိုက်လွိၚ်ဂှ် ဂၠုမွဲလ္စုတ် တၟးမွဲလ္စုတ် ဒှ်ဒၟံၚ်ရ။
ညးမလ္ၚာ်ဗဵုသ္ၚဳဒၟံၚ် ဂၠးအကး ဗ္တံဂတုပေၚ် ပ္ဍဲမ္ၚးသ္ၚိတာဲနန် ၜါတၠ၊ ညးမွဲဂှ် ကြောံဒၟံၚ်ညိ သာ်ဝွံ ဒဵုကဵုမ္ဒးထေၚ်ကေတ် နကဵုခန္ဓကါယမကြံၚ်မ္ၚိုဟ် ဟိုတ်နူခန္ဓကါယဝွံ သၠုၚ်ဒတူ ၜိုန်နွံဓမ္မတာကီုလေဝ် သဝ်ဒၟံၚ်ညိရ သာ်ဝွံ ထေၚ်ကေတ်ရ။
ဟိုတ်ဍေံ ဗ္ဒာဲဂှ်ညးမွဲပၠန်ဂှ် သၠုၚ်ဒတူ သာတုဲ သၠုၚ်မံၚ်တုဲ မၞုံကဵုခန္ဓကါယ ကၟောန်ဓရောန်တဴရ။ ညးမၞုံကဵုခန္ဓကါယ သာတုဲ ကၟောန်ဓရောန်ဝွံ ဓလဲလဝ် ၝောံကိုဋ် မဖျေံလဝ်ထဝ်တုဲ ဒှ်တဴတၠတိ ရးမန်ပိ တၠညးသၟိၚ်ဗညာဥူရ။ ညးမွဲဂှ်တှ်ေ အမာတ်ဇၞော်သၟိၚ် မာံဇဲတနန်ဟေၚ် မဒှ်ရ။
တၠညးစိၚ်ဗ္တာၚ်ဝွံ သ္ပပ္တံနူ စိၚ်ဗ္တာၚ်ရတ် မက္လိဂွံလဝ် နူဍုၚ်သုတ်ဓါဲ လက်ထက် သၟိၚ်ဝါရေဝ်ရောဝ်တေံ မချိုတ်အာဂှ်တုဲ မိက်ဂွံက္လိဂွံဒၟံၚ် စိၚ်ရတ် မဍိုက်ပေၚ်တဴကဵု လက်သဏ်စိၚ်ဗ္တာၚ်ရ။
ကြဴနူကဵု အမာတ်ပူဇိပ် ကေုာံ စောဍိတ်တအ် သ္ပသပုန်တုဲဂှ် ဒေံညး သၟိၚ်လၚ်္ကာ မပတှ်ေအိုတ် ဟိုတ်နူသ္ပသပုန် ဖံက်သစ္စ က္လေၚ်ဗ္တိုက်တုဲ ဒးပသောၚ်ကၠေံရ။
အခိၚ်မဒးဆောံမံၚ် စိၚ်ဗ္တာၚ် ဟိုတ်နူကဵု ဒးဒုၚ်ဖံက်သစ္စကဵု မၞိဟ်မပတှ်ေဂမၠိုၚ်တုဲ ဍောၚ်အာစိုတ်ဗွဲမဂၠိုၚ်ရ။ ပ္ဍဲအခိၚ်ဂၠမ်စိုတ် ဟွံၜိုဟ်သြိုဟ် မြဴသာ်ဝွံ ဟိုတ်နူကဵု လၟမွဲဂှ် ဆဵုပၞေတ်ဇိုၚ် ဒၞးဇိုၚ်စိၚ် ပ္ဍဲဌာန်ဂြိုပ်လဗုဲ မကၠုၚ်ဂြၚ်ပ္တီတုဲ ပ္ဍဲပၞေတ်ဇိုၚ်စိၚ်ဂှ် ဍိုက်ပေၚ်တဴကဵု လက်သဏ်စိၚ်ဗ္တာၚ်ရောၚ် ပတှ်ေကေတ်တုဲ သီုကဵုအမာတ်ဗိုလ်လဗး ဗွဲမဍိုက်ပေၚ် ကၠုၚ်ဗိုၚ်ဒၞက်စိၚ်ရ။
အဃောဂှ် ပ္ဍဲအကာသတေံ သၞံၚ်တိုၚ်မွဲ ကြပ်လုပ်ကၠုၚ်ကဵုသၟိၚ်ဂိတုဂှ် တၠညးစိၚ်ဗ္တာၚ်ကီု၊ သီုအမာတ်ဇၞော် ညာတ်တဴသီုညးၜါရ။
"ယွံ အမာတ်ဇၞော် သၞံၚ်တိုၚ် မကြပ်လုပ်ကၠုၚ်ကဵုသၟိၚ်ဂိတုဂှ် မုရဴနိမိတ်မွဲ မဒှ်ဂှ်ရော"
"ယွံ... မရာဇ်၊ သၞံၚ်တိုၚ် မကြပ်လုပ်ကဵု သၟိၚ်ဂိတုတုန် ဒှ်နိမိတ်ခိုဟ် ဟွံသေၚ်ရ မရာဇ်၊ သၞံၚ်တိုၚ်တုန် ဒှ်အယာံမာတ် တွဳဗွိုၚ် သၟိၚ်ဂိတုဟေၚ်၊ တွဳဗွိုၚ် မြဴသာ်ဝွံဂှ် နိမိတ် မကြပ်လုပ်စိုပ်ကၠုၚ်ကဵု သၟိၚ်ဂိတု မတုပ်တဴ သၟိၚ်တၠတိတုန် -
သဘဴတုပ်ကဵု ညးစဍုၚ်၊ ညးစကွာန် ကောန်ရဲသၟဝ်တဲဂမၠိုၚ် မက္တဵုသ္ပသပုန်ရ မရာဇ်၊ ဟိုတ်ဂှ်ရ ဒှ်ဟိုတ်နိမိတ် မထေက်ကဵု သ္ဒးစွံသတိ လ္တူညးစဍုၚ်၊ ညးစကွာန် ဍောတ်တ်ဂမၠိုၚ်ရ မရာဇ်။"
"အေ... အဲသၟိၚ်ဏအ်လေဝ် သွက်သ္ဂောံဒၞက်စိၚ် တိတ်ကၠုၚ် ပ္ဍဲမုတ္တမဏအ် ကြပ်ပေၚ်ကၠုၚ် ပိဂိတုရဏောၚ်၊ စိၚ်ဂှ်လေဝ် ဒၞာဲဇိုၚ်ဟေၚ်ဆဵုတုဲ ဒဵုကဵုတ္ၚဲဏအ် အယာံမာတ်မုသၞိၚ်ရုပ်မှ ဟွံဆဵုဏီ၊
လၟဂမၠိုၚ် လညာတ်ဗၠေတ်အာဟာ ဟွံတီ၊ ဒဵုကဵုၜိုတ်လလအ်ဏအ် ဟွံဆဵုမ္ဂးတှ်ေ သွက်ဂွံစဴလေဝ် ဒးအခိၚ်ယျထေၚ်၊ တ္ၚဲယး တ္ၚဲတၟးပြဟ်မ္ဂး သွက်ဂွံဇက်အာ မုတ္တမဂှ် ပဠေဝ်ပဠေတ်လဝ်ညိ။"
"ထေက်ကြိုက်လောန်သန်ရ မရာဇ်။ နကဵုသၟိၚ်တၠဍုၚ်မွဲ ဒးသ္ၚောဲခြာဒၟံၚ်ကဵု ကၟာၚ်နန်ထဝ် အခိၚ်ဗွဲမလအ်လဂှ် ဟွံထေက်ရ မရာဇ်၊ သွက်ဂွံက္လေၚ် မုတ္တမဂှ် ထေက်ကြိုက်ရမရာဇ်"
ဂလာန်မာံဇဲတနန် မဂရၚ်ပ္တီဂှ် တၠညး ဓညိက်ဒၟံၚ်က္ဍိုပ်တုဲ စှ်ေမံၚ်စိုတ်ရ။ သ္ဂာဂၠကၠုၚ်ယျဒှ်တုဲ မာံဇဲတနန် လ္ၚောဝ်တၠညးတုဲ က္လေၚ်စဴအာ ဇရေၚ်ဂဒုက်တာဲကၞက်ဇကုရ။ တၠညးကီုလေဝ် မာံဇဲတနန် စဴတုဲဗက် လုပ်အာအပ္ဍဲဂၠမ်သ္တိက်တုဲ ပဠေဝ်ပဠေတ်တိက်ကီုရ။
မွဲဒမြိပ် ဗ္တံသ္ဂာမဂၠု သၟိၚ်ဂိတုလေဝ် မတ်ဗြဲဓီုဓုဲဂမၠိုၚ် ဂြောပ်ဗ္ဒန်အာရ။ သ္ပပ္တံနူအခိၚ်ဂှ်တုဲ ကၟိန်ဍုၚ်မုတ္တမလေဝ် တ္ၚဲဒမၠုမဂြောပ်ဓလီုဂမၠိုၚ် စဒှ်ကၠုၚ်ရ။
ပ္ဍဲအခိၚ် ပလာံယးတၟးပြဟ် အမာတ်ဇၞော် သၟိၚ်ဇိပ်ဗြဲ နကဵုဃရက်ဃရက် ဃဗက်ဃဗက် လုပ်ခစတုဲ လ္ၚောဝ်ပ္တီတၠညး ဗွဲမပြဟ်ပြေဟ်ရ။ တၠညး ပဠေဝ်ပဠေတ်ဒၟံၚ် သွက်ဂွံစဴ ဇရေၚ်မုတ္တမလေဝ် ပွချဳဒရာၚ် အမာတ်ဇၞော် ဟွံဗိုန်ကၟောန်ဂှ် ခါတ်အကာဲ ဒးအာရ။
"ဃရက်ဃရက် ဃဗက်ဃဗက်ဂှ် မုပၟိက်ရော? ဇိပ်ဗြဲဍောတ် ဂရၚ်ပ္တီပြဟ်ဟ်စမ်"
"ယွံတၠတိ၊ လၟုဟ်ဟေၚ် ကလုတ်ပရိုၚ်စိုပ်ရ။ အပ္ဍဲဍုၚ်မုတ္တမတေံ လစဍုၚ်မုတ္တမ ဗြတ္ထၜ မကဵုမၚ်လဝ်နန်ဂှ် ပခိုၚ်လဝ်ကၟာၚ်ဍုၚ်တုဲ က္တဵုသ္ပမံၚ်သပုန်ရ မရာဇ်"
"ဍံက်၊ ကၠဵုအဲလွဳဂှ် က္လေၚ်ကိတ်အဲပၠန်၊ အယာံမာတ်ဂုဏ်သစ္စ အဲမပ္တိုန်လဝ်ဂှ် ညိဟွံထံက် မၞးတၠိၚ်ဂုဏ်ကွေံရ။ သွက်ဂွံဝေတ်မၞးဂှ်... ကော်ကောံဓရီုသဳကၠဳ ပြဟ်ဟ်စမ်"
အမာတ်ဇၞော် က္လေၚ်လ္ၚောဝ်တၠညးတုဲ တိတ်အာနူ ဂဒုက်တာဲနန် ပြဟ်ဟ်ပြေဟ်ဟ်တုဲ ပဠေဝ်ပဠေတ်တဴ သွက်ဂွံတိုန် ကော်ကောံဓရီုရ။ ကောံဓရီု မကၠောန်သ္ပ ဃရက်ဃရက်ဂှ် ခြာဟွံလအ် သွဟ်ဍာံတိတ်ကၠုၚ်ရ။
သွဟ်ဍာံအိုတ်မွဲဂှ်တုန် ဇက်အာမုတ္တမ လၟုဟ်တုဲ သွဟ်ဂွံထ္ပက်ပၞာန် ဇွောံမ လွဟ်လက်နက် မၞိဟ် နူကဵုကောန်ဍုၚ်ကွာန်ဂမၠိုၚ်ဂှ် ၜိုတ်မက္လိဂွံ သွက်ဂွံပ္ကောံပ္ကေဝ်အာ မဒှ်ရ။ ပ္ဍဲအခိၚ်မွဲခဏဓဝ်ဟေၚ် ဒပ်တၠညးစိၚ်ဗ္တာၚ် သၟိၚ်ဗညာဥူ မတိတ်ပါန်ထၞက်စိၚ်ဂှ် ဒှ်အာဒပ်ပၞာန်ဇၞော် မလုပ်ပေါဲဗ္တိုက်မွဲ ဗွဲမရုသံၚ်ရ။
အမာတ်ဇၞော် သၟိၚ်ဇိပ်ဗြဲဂှ် က္ဍိုက်ပ် ဒပ်မုက်အာဂတတုဲ အဆက်ဂှ် တၠညးသၟိၚ်ဗညာဥူ ကေုာံ ပ္ဍဲလ္ပာ်ပါဲလ္ပာ်ပုၚ်ဂှ် မာံဇဲတနန်၊ စဍုၚ်ဝန် အမာတ်ဇၞော်ပေါန်ဇိပ်၊ စဍုၚ်သြေၚ် စဴဗြဍောတ်၊ စဍုၚ်သတိုၚ် အန္နရာဲ၊ ကောညး ဗြထ္ၜိုတ်ဂမၠိုၚ် သီုမပစူလဝ်အလာံ လှာပ်ပ် ဒပ်ဇၞော် ဇက်ကၠုၚ်ရ။
ဒပ်တၠညးသၟိၚ်ဗညာဥူဝွံ ဒၞါဲမစိုပ် ပ္ကောံပ္ကေဝ်အာ ဇွောံမ၊ မၞိဟ်ဂှ် ပ္ဍဲအခိၚ်မစိုပ်အာ မုတ္တမဂှ် ဒြဟတ်နွံကၠုၚ် ၜိုတ်ၜါလက်ရ။ အတိုၚ်ရန်တၟအ် ပရေၚ်ပၞာန် စိုပ်မုတ်တမဗက် ပြုပြေၚ်ထ္ပက်ပၞာန် ဗွဲမသ္ကာတ်မြဟ်ရ။
စဍုၚ်မုတ္တမ ဗြာတ္ထၜဂှ်လေဝ် နူအပ္ဍဲဍုၚ် ဒုၚ်တဝ်စၞေဟ် ဗွဲမသ္ကာတ်မြဟ်တုဲ နူလ္တူကၟာၚ်ဍုၚ် နကဵုလွဟ်ကမ်ပၟတ် တ္ၚ၊ လဴဂမၠိုၚ် ပန်ဗလးမံၚ် ဟွံသ္ကုတ်ရ။ ဟိုတ်ဂှ်ရ ဒပ်တၠညး သၟိၚ်ဗညာဥူဂမၠိုၚ် ဗ္ဒလုပ်ဇိုၚ်ကၟာၚ်ဍုၚ်ဟွံမာန် ဗိုၚ်လဝ် လ္ပာ်မ္ၚးဍုၚ်ရ။
ကောန်သ္ဂံၚ် ဒပ်တၠညးဂမၠိုၚ် ဗ္ဒလုပ်ကၠုၚ် ဇိုၚ်ကၟာၚ်ဍုၚ် ပစူပ္တိုန်ဇိုၚ်ကၞိန်ကဵု ကၟာၚ်ဍုၚ်တုဲ ပဠေဝ်ပဠေတ်တဴ သွက်ဂွံတိုန်ဂှ် ရဲဒပ်စဍုၚ်မုတ္တမဂမၠိုၚ် ပဠောထကိုဟ်ဖျေံနၚ် နုလ္တူကၟာၚ်ဍုၚ် နကဵုဆုဒကုတ်ဂမၠိုၚ်၊ မတၟံဂမၠိုၚ်၊ ဍာ်ဂမ္တဴ၊ ဍာ်ကၠေၚ်တိဂမၠိုၚ်ရ။
ဇိုၚ်ကၞိန်ဂမၠိုၚ်ဂှ် စဝ်ဖျေံကၠေၚ်တုဲ ပန်စံၚ်ဖျေံနၚ်ကဵု တ္ၚပၟတ်ရ။ ဟိုတ်ဂှ်ရ ဒပ်တၠညးဂမၠိုၚ် ဗ္ဒဖိုၚ်ကၟာၚ်ဍုၚ်ဟွံမာန်၊ ဗ္ဒမာန်ကီုလေဝ် ထ္ကးကၟာၚ်ဍုၚ်ဟွံမာန် ဒှ်ဒၟံၚ်ရ။ ဟိုတ်ဂှ်ရလေဝ် ဖျေံဒပ်မ္ၚးဍုၚ်တုဲ ဗိုၚ်လဝ်ရ။
ကောန်ဍုၚ်မုတ္တမဂမၠိုၚ်ဂှ် ကါလဂွံတီကေတ် တၠညးသၟိၚ်ဗညာဥူ က္လေၚ်စိုပ်ကၠုၚ်တုဲ ကၠုၚ်ဗ္တိုက်တဴ စဍုၚ်မုတ္တမဂှ် ဂွံတဴဒြဟတ်ရ။ က္လိဂွံတဴ အထံက်ပၚ် ဇွောံမစသုၚ် နူဇရေၚ် ကောန်ဍုၚ်ကွာန် မနွံမံၚ်မ္ၚးကၟာၚ်ဍုၚ်ဂမၠိုၚ်ရ။
ကောန်ဍုၚ်ကွာန် မနွံမံၚ် အပ္ဍဲကၟာၚ်ဍုၚ်ဂမၠိုၚ်တုန် သွက်သ္ဂောံပံက်ကဵု ပါၚ်တြၚ်ဍုၚ်ဂှ် ဂိုတ်ဂ္စာန်တဴအိုတ်ရ။
ပရောဂှ်ဂှ် ကါလဗြာတ္ထၜတီမ္ဂး ညးမဂိုတ်ဂ္စာန်ပံက် ပါၚ်တြၚ်ကၟာၚ်ဍုၚ်ဂမၠိုၚ်ဂှ် ကုတ်တဴကအ် ကဵုဂစိုတ်တုဲ ညံၚ်မၞိဟ်လက္ကရဴ ဟွံဂွံဂံၚ်ကၠောန် က္ဍိုပ်ဂမၠိုၚ်ဂှ် ကဵုကွက်လဝ် ပ္ဍဲပါၚ်တြၚ်ဍုၚ်ရ။ ပါၚ်တြၚ်ဍုၚ်ဂှ် ထပ်ဂလိုၚ်ပ္တိုန် ကောန်ပၞာန် မွဲကၠံတုဲ ကဵုမၚ်တဴရ။
ဒပ်တၠညး သၟိၚ်ဗညာဥူဂမၠိုၚ် ဗွဲမသ္ကာတ်မြဟ် ၜိုန်ဂ္စာန်မံၚ်ကီုလေဝ် ဗြာတ္ထၜ မဒစးဒုၚ်ပဠေဝ်လဝ်ဂှ် ဒုၚ်တဝ်စၞေဟ်မံၚ် ဗွဲမသ္ကာတ်မြဟ်ရ။
ပါဲနူဂှ် မုတ္တမဂှ် ဟိုတ်မဒှ်တဴ ဍုၚ်သၞေဟ်ဂၠုၚ်တုဲ အမၠံက်၊ လွဟ်ကမ်ပၟတ် နူဂကူပဝ်တူဂြဳ မကၠုၚ်ကူသာန် သွံရာန်ဗၞိက် နူဍုၚ်ပလိုတ်ဂမၠိုၚ်ဂှ် ဗြာတ္ထၜ က္လိဂွံလဝ်ရ။
ဍုၚ်မုတ္တမဝွံ ပၟတ်ပေါဲပၞာန် ကဵုထၞာန်ဂဵုတဴ ဟိုတ်နူ ဖံက်ပ္ကဝ် ကၟာၚ်ဍုၚ်မုတ္တမ ဟွံမာန်တုဲ ဒပ်တၠညး သၟိၚ်ဗညာဥူဂမၠိုၚ် ကၟာတ်ဗိုၚ်လဝ် မ္ၚးဍုၚ်ရ။
"အပါယျေ၊ အပါယျေ... ဟဳ... ဟဳ... က္လေၚ်စဴကၠုၚ်ပြဟ်ဟ်ညိ... အဟေအ်... အဟေအ်..."
"တၠသ္ၚိယျေ... ဗညာသံၚ်ရာံယျေ... ဇကုဟွံက္လေၚ်စဴကၠုၚ်မ္ဂး ပိုဲတအ် ဒးအာစိုပ်ဒဒိုက်ရ"
ပ္ဍဲလ္ဒောဝ်ဗ္တံသ္ဂာ ရမျာၚ်ကရေဲကော်ဂမၠိုၚ်၊ ရမျာၚ်ကောန်ၚာ် ကေုာံ သၟတ်ဗြဴလရိုအ်ဂမၠိုၚ် တိတ်ကၠုၚ် နူလ္တူကၟာၚ်ဍုၚ် မုတ္တမရ။ ရမျာၚ်ဂမၠိုၚ်တုန် ဒှ်ရမျာၚ် ကောန်ဇာတ်သမ္ဘာ အမာတ်သ္ကိုပ်ပၞာန် မသှ်ေတဴမံၚ် အပ္ဍဲဍုၚ်ဂမၠိုၚ် မလရိုအ်ယာံတဴရ။
ပွမြဴသာ်ဝွံလေဝ် စဍုၚ်မုတ္တမဂှ် သၟတ်ဗြဴ ကေုာံ ကောန်ၚာ်သၟတ်ဂမၠိုၚ် ပ္တိုန်လ္တူကၟာၚ်ဍုၚ်တုဲ သွက်ကောန်သ္ဂံၚ်ဒပ်တၠညးဂမၠိုၚ် စိုတ်ဓါတ်ဂွံစှ်ေ ရန်လဝ်တုဲ ပျဲပျာံထ္ၜးမံၚ်ရ။
"မုဒှ်ရော အဒဴကုန်၊ မုရဴဟိုတ်ဖဵုမွဲ ရမျာၚ်က္ညာၚ်ကရေဲဂမၠိုၚ် ကၠုၚ်နူဌာန်လဵုရော?"
"ယွံသၟိၚ်ဇၞော်၊ ဟိုတ်နူရမျာၚ် က္ညာၚ်ကော်ကရေဲ ကောန်ဗြဴ မသှ်ေမံၚ် အပ္ဍဲဍုၚ် နူလ္တူကၟာၚ်ဍုၚ် ဍုၚ်မုတ္တမဂမၠိုၚ် မဒှ်ရ သၟိၚ်ဇၞော်"
သၟိၚ်ဇၞော် သၟိၚ်ဗြထ္ၜိုတ် မက္ဍိုက်ပ်ဗ္တိုက်မံၚ် ပၞာန်မုတ္တမဝွံ ဟိုတ်နူကဵု ရမျာၚ်က္ညာၚ်ကရေဲ လရိုအ် တိတ်ကၠုၚ်လ္ပာ်မ္ၚး ဂဒုက်တာဲတုဲ သၟာန်မံၚ် ဍိက်ပတှ်ေ အဒဴကုန်ရ။ သၟိၚ်ဗြထ္ၜိုတ် ဟိုတ်မဒှ်တဴ တြုံတၠသ္ၚိ မဟာဒေဝဳ ဒေံတၠညးတုဲ သီုမဒှ် ဒေံတၠညးရ။
"ဣဏအ် ဒှ်တဴကသပ်ၚံက်စၞာဲ စဍုၚ်မုတ္တမရ သၟိၚ်ဇၞော်၊ ညံၚ်ဒပ်တၠညး ဗီုပိုဲတအ် စိုတ်ဓါတ် သ္ဂောံလီုလာ်အာဂှ် သက်က် ကၠောန်သ္ပဏါ ဒးဒှ်ဏောၚ်"
ရံၚ်သ္ၚဳအာ လ္ပာ်ရမျာၚ်မကၠုၚ်ဂှ် ဍိက်ပတှ်ေမွဲ စိုပ်ကၠုၚ်ဇရေၚ် စဍုၚ်ဒဵုကြေဝ်ဂှ်ရ။ အဒဴကုန် နူကဵုမထံက်က္ၜံၚ် ခစမံၚ်ဂှ် က္တဵုတုဲ ဆုတ်အာ လ္ပာ်လက္ကရဴ သၟိၚ်ဗြထ္ၜိုတ်ရ။
"အမာတ်ဇၞော် ပေါန်ဇိပ်ဏေါၚ်ဟာ၊ အဲထေၚ် ဟွံဗၠေတ်မ္ဂး ဟိုတ်နူရမျာၚ်ကရေဲတုဲ ကၠုၚ်ဗဵုကျောဝ်ဏေါၚ်ထေၚ်ရ"
"ဍာံကွေံရ သၟိၚ်ဇၞော်ယျေ၊ အပ္ဍဲကါလပၞာန်ဟီုတှ်ေ ဇၟာပ်ပ်အရာဂှ် ဒးစွံသတိဏောၚ် ဟွံသေၚ်ဟာ?"
"ဍာံကွေံရၝာဲ၊ ဟိုတ်ဂှ်ရလေဝ် ဂွံဒှ်မံၚ် အမာတ်ဇၞော်ဝန် တၠညးမပတှ်ေဂှ်၊ လၟုဟ်ပြဟ်ဟ်ဏအ် တၠညးလေဝ် နူကဵုစိၚ်ဗ္တာၚ် မချိုတ်အာတုဲ ဇၟာပ်ပ်အရာ ဒြဟတ်ဍိုန်လျမံၚ်ရ၊ ဟိုတ်မတီတဴ သာ်ဂှ်ရလေဝ် စဍုၚ်မုတ္တမ ကေတ်အခေါၚ်ခိုဟ်တုဒ ဂံၚ်သ္ပသပုန်ရ၊ ဟွံသေၚ်မ္ဂး မၞိဟ်ဗီုဍေံဝွံ ဒးဗ္ကပ်ကဝးဒၟံၚ် သၟဝ်ဂတာဇိုၚ် တၠညးရ"
"ဗီုဏအ်သၟိၚ်ဇၞော်၊ စဍုၚ်မုတ္တမ သ္ပသပုန်မ္ဂး ဍုၚ်မတွံဂး မုတ္တမဂှ် က္လိဂွံမ္ဂးဂွံဏောၚ် နာဂြိုဟ်က္တာန် ကောန်ဍုၚ်ကွာန် ရးမညဂမၠိုၚ်ဂှ်တှ်ေ ဆလအ်မှ က္လိဂွံဟွံမာန်ရ၊
တၠညးဝွံ ဟိုတ်နူမအုပ်ဓုပ်လဝ် ဗွဲမကိတ်ညဳကဵု ဓဝ်သၟိၚ်စှ်၊ သၟိၚ်မမၚ်မွဲဓဝ်၊ သၟိၚ်မပ္တန်သာသနာတုဲ ကောန်ဍုၚ်ကွာန်ဂမၠိုၚ် ရှ်ေသှ်ေ သ္ဍိုက်ဆာန်တဴရ။ ဟိုတ်နူဂုဏ်တအ်ဏအ် ဂမၠိုၚ်တုဲ ဂွံအုပ်ဓုပ် ဍုၚ်ရးဏအ်မာန်ရ။ ဟိုတ်နူနန်ထဝ် ကေုာံ ပၞတ်ရတ် ဟွံသေၚ်ရ။"
အမာတ်ဇၞော် ပေါန်ဇိပ် အတိုၚ်မဒှ် အမာတ်ဇၞော် အာယုက်မဂၠိၚ် ဂလာန်မဇိပ်ဂၠိပ် တန်ကြန်ဟေၚ် သ္ဂးတဴလေပ်ရ။ သၟိၚ်ဗြထ္ၜိုတ်လေဝ် ဃောမက္လၚ်မံၚ် ဂလာန်အမာတ်ဇၞော် ဗွဲမချိုတ်ပၠိုတ် သီုမကွာ်အာဂၠံၚ်ရ။
ကါလစိုပ်အာ ဗ္ဒါဲတာန်ဆံၚ် ကောန်ပၞာန် မဒးဝပ်ဂမၠိုၚ် အယာံမာတ် ဂွံသၟူခအှ်ေသရ သၟးဟွံက ရမျာၚ်ကရဳကရောတ်လေဝ် ဂွံမိၚ်ရ။
"ၜိုတ်အယာံမာတ် က္လိဂွံ အရပ်စပ်သၟိၚ် မသုန်သာ်ဓဝ် ချပ်တဴအုပ်ဓုပ်ဍုၚ် သ္ပသၟိၚ်ဏောၚ် မ္ဂးတှ်ေ နာဲဝွံ မွဲတ္ၚဲ ဒးအာစိုပ် လလေၚ်ဏောၚ်။ လၟုဟ် ဂွံက္တဵုသ္ပသပုန်ကဵု ဍုၚ်နန်ကီုလေဝ် ကောန်ဍုၚ်ကွာန်ဂမၠိုၚ်ဂှ် သီုရှ်ေသှ်ေလ္ၚောဝ်မံၚ် တၠညးဏီဖိုဟ်ရ၊
ဣဏအ်ဂှ် ပ္ဍဲသၟိၚ်ခိုဟ်သၟိၚ်ပြဲ မဍိုက်ပေၚ်တဴကဵု ဣိဒ္ဓိအနုဘဴဟေၚ် ဂွံဆဵုကေတ် ဍာ်ဒ္ကေဝ်မာန်ရ၊ ညးမသ္ပသပုန် ဖံက်သစ္စဝွံ မွဲတ္ၚဲ ဒးအာစိုပ် ဒဒိုက်လ္အိတ်ရောၚ် ဟွံဗၠေတ်ရ၊ နာဍုၚ်ရးမညဏအ်ဂှ်လေဝ် အုပ်ဓုပ်တဴမာန် ဟွံသေၚ်ရ။"
သၟိၚ်ဗြထ္ၜိုတ် ကေုာံ အမာတ်ဇၞော်ဇိပ်ပန်တအ် ဃောမဓရီုကျာ ကွာ်အာဒၟံၚ်ဂှ် သၟိၚ်ဗြထ္ၜိုတ် သီုမရပ်လဝ်ဇြၚ် မုဟွံဟီုဟွံဂး ဒံၚ်သၠာ်ဂြိပ်အာ ဇရေၚ်ချောဲရာပ်ခြုံ ဗွဲမပြဟ်ရ။ အမာတ်ဇၞော် သၟိၚ်ဇိပ်ပန်လေဝ် ညံၚ်ရဴဇဖန်ဂှ်ကီု ဗက်အာလက္ကရဴ စဍုၚ်လ္ဂုၚ်ဂှ် ဂွံညာတ်ကေတ် သၞိၚ်ရုပ်မၞိဟ်မွဲ ဗ္ဒလုပ်အာ ဇိုၚ်ကၟာၚ်ဍုၚ် မုတ္တမရ။
"သၟိၚ်ဇၞော် ညးဂှ်ရော?၊ ရပ်ဂွံကီုဟာ?"
"ဗၠးအာရ သၟိၚ်ဇၞော်၊ ဟိုတ်မလုပ်အာ ဗ္ဒာဲကၟာၚ်ဍုၚ်မုတ္တမတုဲ ဒးယှအ်ကၠေံတဲရ။ ၝဏအ် ဒးဒှ် မၞိဟ်ဓလုက် စဍုၚ်မုတ္တမ မဗလးလဝ်ဏောၚ်။ ရပ်ဂွံတှ်ေဏး၊ လမျီုၝ ဒးကၠေံအာ သၟဝ်ဇြၚ်အဲရ။ ဍံက်..."
စဍုၚ်သြေၚ် သၟိၚ်ဗြထ္ၜိုတ် အေၚ်ၚိတ်ဍာ်ကအ်တုဲ ခ္ဍံက်မံၚ်လ္တာ် အဆက်က်ကဵု သၞမဗၠးအာဂှ် သီုကဵုဟွံပြေတဴစိုတ်ရ။
"ယှအ်စိုတ်ညိ သၟိၚ်ဇၞော်၊ ၝတအ်ဏအ် ကၠုၚ်ဗီုဏအ်တှ်ေ ပိုဲတအ် သာတုဲ သ္ဒးစွံသတိရဏောၚ်၊ ကိစ္စဏအ် တ္ၚဲယး ကောံဓရီုမှ ပ္တိုန်ထ္ၜးရ၊ ကှ်ေ အဲလေဝ် က္လေၚ်စဴဒပ်အဲတုဲ စၟဳစၟတ်ရံၚ်ဏီဏောၚ်။"
ဟီုဟီုဂးဂး အမာတ်ဇၞော် သၟိၚ်ဇိပ်ပန် က္လေၚ်စဴအာ ဒပ်ဇကုရ။ ကျာမၜိုဟ်ဂံက် နူကဵုခံက်ဝါမုတ္တမဂမၠိုၚ်ဂှ် ပိုက်လွိၚ်တတ်ကၠုၚ် ဗလးဇၞော် ဍုၚ်မုတ္တမရ။ ကျာလပိုက်ကၠုၚ်မှ သၟိၚ်ဗြတ္ၜိုတ်လေဝ် ဒးက္လေၚ်ကျောဝ်တဴ ဒၞာဲဖျုန်စၞာံ မကိတ်စမံၚ် စေတ်တ်ဂှ်ရ။
နူကဵုမထ္ဍေၚ်ဗက် လက္ကရဴသၞ ပၞေတ်ဆီတိတ် ဒးလဝ်ဒစုက်ဇလဂမၠိုၚ်၊ တၞံချောဲ ဟကှော်ဂမၠိုၚ်ဂှ် သ္ပဂွံသတိရ။ ၜိုန်ဂှ်လေဝ် ပၞေတ်သရက်အာ ဗၞတ်ညိည သာ်ဝွံဂှ် သ္ပဂရုဟွံမာန် ဒးစၟဳစၟတ်သ္ၚဳရံၚ် ဒပ်ဇကုဇကုဏီဏောၚ်။ ဟိုတ်ဂှ်ရ မွဲဟာန်ကေုာံ အဒဴကုန် ဒးက္လေၚ်ဂေတ်ရံၚ် ဒၞာဲကောန်သ္ဂံၚ်ဂမၠိုၚ် မွဲလ္တုန်ပၠန်ရ။
ပ္ဍဲလ္တူကၟာၚ်ဍုၚ် မုတ္တမတေံ ကောန်သ္ဂံၚ်မၚ်ကၚ်ဂမၠိုၚ် တတ်အာကၠုၚ်မံၚ်ဂှ် ဟိုတ်နူကဵု ပၟတ်ကၠေၚ်သ္ဍဴ မၞုံလ္တူကၟာၚ်ဍုၚ်တုဲ ဂွံညာတ်ကေတ်ဒၟံၚ် ဟဗုၚ်ဟဗုၚ် ဟပါဟပါရ။
ဆက်စၟဳဗှ်အာ သ္ကုတ် ၂ ညိ...
#သ္ဂံၚ် လအီမန်
ပ္ဍဲကဵု Telegram လေဝ် လုပ်ဗှ်တဴမာန်ရ။
https://t.me/laaeimon
#တၠညးစိၚ်ဗ္တာၚ် သၟိၚ်ဗညာဥူ #ဍုၚ်မုတ္တမ
#သပုန် စဍုၚ်မုတ္တမ
#ဟံသာဝတဳ သၟိၚ်တ္ၚဲယးတၟး
#The Sunrise of HONGSAWATOI
ဟံသာဝတဳ သၟိၚ်တ္ၚဲယးတၟး S1 Ep02
ပွကမ်ဇာတာ မပြံၚ်သၠာဲ ကေုာံ တၠညးစိၚ်ဗ္တာၚ် သၟိၚ်ဗညာဥူ
ပယျာံနူဂယးပြဟ် လျးသၟိၚ်တ္ၚဲစိုပ်ဗက် ပ္ဍဲဗလးမုတ္တမဝွံ နကဵုဂကောံဒပ် မဖျေံလဝ်ဒပ်ဂမၠိုၚ်၊ ဂဒုက်တာဲပၞာန်ဂမၠိုၚ်၊ စိၚ်ဂမၠိုၚ်၊ ချေံဂမၠိုၚ်၊ ကောန်သ္ဂံၚ်ပၞာန်ဂမၠိုၚ် နွံတဴဒၟံၚ် ဗွဲမချဳဒရာၚ်ရ။ အပ္ဍဲဂဒုက်တာဲနန် တၠညး သၟိၚ်ဗညာဥူဝွံ သၟိၚ်၊ အမာတ်၊ သ္ကိုပ်ပၞာန်ဂမၠိုၚ် ကောံစိုပ်ဒၟံၚ်အိုတ်ရ။
သၟိၚ်အမာတ်ဂမၠိုၚ်ဝွံ ညံၚ်ရဴမဖေက်ဂၟံက် ဂွိၚ်ဂွါဲတဴဒၟံၚ် မမိက်ကဵုမွဲမွဲကီု ညးမွဲကေုာံညးမွဲ ကၠတ်သ္ၚဳဒၟံၚ်ညးသ္ကအ်တုဲ သီုမဂစိုၚ်လဝ်က္ဍိုပ်ဟေၚ် ခစဒၟံၚ်အိုတ်ရ။ ဂလာန်မွဲသ္အာၚ်ဂမၠိုၚ် ဟွံဂံၚ်ဗြုအိုတ်ရ။ မုက်မတ်တၠညး သၟိၚ်ဗညာဥူလေဝ် ဇြကှ်တဴဒၟံၚ် ဂၠိုၚ်လ္တူနူ ပကတိဏီရောၚ် သာ်ဝွံ မ္ဒးထေၚ်ကေတ်ရ။
ပၞောဝ်အပ္ဍဲဂှ် အမာတ်ဇၞော် ဒလချေတ်သေၚ်ဝွံ နကဵုမုက်မတ်ဇြဇြကှ်ကှ် ဗွဲမရောံဒည က္တဵုဂရၚ်ပ္တီတဴရ။ ပ္ဍဲရမျာၚ်ဍောတ်စိုတ် အမာတ်ဇၞော်ဝွံ တတ်ထပါ်ကၠေံထောံ ပွဳပွူမသ္ၚိတ်ဇြဒၟံၚ်ဂှ်ရ။
"လ္ၚောဝ်ပ္တီဏာ သၟဝ်ဂၠးဂတာဇိုၚ်ထဝ် ဗွဲမရှ်ေသှ်ေရဴဂဴရ တၠညး၊ ပ္ဍဲအခိၚ်ဗ္တံ နူလ္တူကၟာၚ်ဍုၚ် မုတ္တမတေံ ဟိုတ်နူကဵု ကောန်ဇာတ် သမ္ဘာဂမၠိုၚ် လရိုအ်က္ညာၚ် ကရေဲကော်တုဲ သ္ကိုပ်ဒပ်ဗညာသံၚ်မွဲ ဗ္ဒလုပ်အာ ဇရေၚ်စဍုၚ်မုတ္တမရ တၠညး"
အမာတ်ဇၞော် ဂရၚ်ပ္တီတုဲဂှ် ဗွဲမရောံဒည သ္ၚဳရံၚ်မုက်တၠညးတုဲ ကုန်ဖျေံဇကု ဂစိုၚ်က္ဍိုပ်တုဲဟေၚ် ခစဒၟံၚ်ရ။ တၠညး သ္ပပၞောတ်ဂှ်လေဝ် ဂွိၚ်တဴဒၟံၚ်ရ။
"ရိုၚ်ဇိုၚ်ကွေံရ၊ ဣဏအ်ဂှ် ဒှ်ကသပ်ပပ်ပဳစၞာဲ စဍုၚ်မုတ္တမဂမၠိုၚ်ရ"
မုက်မတ်တၠညး မဇြကှ်ဒၟံၚ်ဝွံ ဟိုတ်နူဒေါသ ဍာဲဂြၚ်အာတုဲ ရပ်ကေမ်လဝ်တဲသၞာ် ဗွဲမဗိုန်ကၟောန်ရ။ စဍုၚ်လ္ဂုၚ် သၟိၚ်ဗြထ္ၜိုတ် ကေုာံ အမာတ်ဇၞော် ပန်စဵုတအ်ဝွံ မုက္ခဝါ ညးမွဲကေုာံညးမွဲ ရံၚ်သ္ၚဳတုဲ ဓညိက်က္ဍိုပ်မွဲဝါတုဲ နကဵုအကာဲအရာခန္ဓကာယ သ္ဂးတဴဂလာန်ရ။
အမာတ်ဇၞော်လေဝ် ကၠိုဟ်တဴရ။ အခိၚ်ဗ္တံ အဃော မဂေတ်ကၚ် ဂွံဆဵုကေတ် သၞိၚ်ရုပ်မၞိဟ်ဝွံ သရာဲမဂြိပ်တိတ်မွဲ နူဒပ်တၠညး ဂြိပ်အာဇရေၚ် စဍုၚ်မုတ္တမ (မွဲနဲတုန်) သီုမဒှ်တဴဒၟံၚ် သ္ကိုပ်ဒပ် ဗညာသံၚ်ဂှ် ဂွံတီကေတ်ရ။
"ဍာံပြဒၟံၚ်ရအဴ တၠညး၊ စဍုၚ်မုတ္တမဝွံ ဟိုတ်နူမၞုံပၟိက် သွက်သ္ဂောံသ္ပသပုန်တုဲ အပ္ဍဲကဵုဍုၚ် နကဵုဇွောံမ၊ လွဟ်လက်နက် ဗွဲမဍိုက်ပေၚ် ဒုၚ်ဒဝ်တုဲဟေၚ် မံၚ်တဴရ။
လၟုဟ်လေဝ် ညံၚ်ဒပ်တၠညး စိုတ်ဓါတ် သ္ဂောံလီုလာ်ဂှ် သ္ပစၞာဲတုဲ ကောန်ဇာတ်၊ သမ္ဘာသရာဲဂမၠိုၚ် ပ္တိုန်လ္တူကၟာၚ်ဍုၚ်တုဲ ပ္ဍဵုပ္ဍိုက်ပျဲပျာံ ထ္ၜးဒၟံၚ်ဟေၚ်ရ တၠညး။
လအ်မ္ဂး ကောန်ဒပ်ဍောတ်တ်ဂမၠိုၚ် စိုတ်ဂါဲတုဲ ချပ်တဴကၠုၚ် သွက်သ္ဂောံလုပ်ဗ္ဒအာ ဇရေၚ်စဍုၚ်မုတ္တမ မာန်ရ တၠညး။
ဆဂှ်သၟးဟွံက နကဵုသၟိၚ်ဨကရာဇ် ဂ္ဇအ်နန် ဓလဲက္ဍိုၚ်ဗ္တာၚ်မွဲတၠ သြိုၚ်ဂဒုက်တာဲ အပ္ဍဲဗလးမုတ္တမတုဲ ဗ္တိုက်ဒၟံၚ်ပၞာန် အဖဝ် သရာဲသ္ဂံၚ် ဍောတ်တ်ဂမၠိုၚ်ဂှ် ဟွံထေက်ကြိုက်ရ တၠညး။
ပေါဲပၞာန်မက္တဵုဒှ်ကဵုဍိက်ဂှ် နကဵုဍိက်ဟေၚ်ဗ္တိုက် ထေက်ကြိုက်ရ တၠညး"
အရေဝ် အမာတ်ဇၞော်ဂှ် ဒေါအ်အာဗက် သ္ၚဳလ္ၚာ် မုက်တၠညးတုဲ ခါတ်အကာဲရံၚ်ရ။ တၠညးဝွံ သီုမသ္ၚဳရံၚ်တဴ နူဇမ္ၚောဲ က္လၚ်ဒၟံၚ်တုဲ နမဟွံညာတ်ကေတ် ပၞောတ်ဒေါသတုဲ အရာမၞုံပၟိက်ဂှ် ဆက်ဂရၚ်ပ္တီတဴရ။
"ဟိုတ်ဒှ်သာ်ဂှ်ရ သွက်သ္ဂောံဗ္တိုက်တဴ စဍုၚ်မုတ္တမဂှ်၊ စဍုၚ်မုဟ်ဗဳဂှ် စွံက္ဆံၚ်သေနာပတိတုဲ အလဵုဇကုတၠညး အပ္ဍဲဍုၚ်ဝါန် မၞုံဟွံသ္ၚောဲခြာတဴကဵု မုတ္တမဂှ် သြိုၚ်တာဲနန်ဇၞူ ပြံၚ်သ္ပဒ္တဴအာ မွဲခဏဍောတ်တုဲ ကောပ်ကာဲထေက်ရ တၠညး။
ဟိုတ်နူတၠညး သ္ပခိုဟ်ဂှ် အဲဍိက် ဂွံစဍုၚ်ဝါန်တုဲ က္လိဂွံဒၟံၚ် တသိုက်ကီုရ တၠညး၊ အခါလၟုဟ်ပၠန် သွက်တၠညး သ္ဂောံသ္ပဒ္တဴ ဗွဲတသိုက်မာန် ဒုၚ်ဖျဴဏာ ဍုၚ်ဝါန်တုဲ ကဵုအခေါၚ် သ္ဂောံကၠောန်ၜိုတ်ညိ တၠညး။"
"ဍာံပြဒၟံၚ်ရအဴ တၠညး၊ ပ္ဍဲကဵုဂလာန် အမာတ်ပန်စဵု မဂရၚ်ပ္တီဂှ် ထေက်ကြိုက်သန်ရ တၠညး၊ ခြာဟွံလအ် ဗြဲစိုပ်တိမ္ဂး ကောန်ဍုၚ်မုတ္တမဂမၠိုၚ်လေဝ် သ္ဒးကၠောန် ဝါဗ္ၚရောၚ်ဒှ်တုဲ နအလဵုဇကုတၠညး ဆာန်ဍူတဴ ကောန်ဍုၚ်ကွာန်ဂမၠိုၚ်တုဲ ပ္ဍဲအခိၚ်ဗြဲဂှ် ကဵုကၠောန်တဴ ဝါဗ္ၚတုဲ ဗြဲအိုတ်မှ သ္ပပၞာန်ထေက်ရ တၠညး။
ဌာန်ဍုၚ်ဝါန်ဝွံ ဒှ်ဒၞာဲတိအံၚ်ဇၞး သၟိၚ်ဗညာဝါရဳရောဝ် အပါအံက်ဗျု တၠညးတုဲ သ္ပဒ္တဴပ္ဍဲဌာန် ဍုၚ်ဝါန်တုဲ ပ္ကောံပ္ကေဝ်အာ ဇွောံမ၊ မၞိဟ် ထေက်ကြိုက်ရ တၠညး။ ပ္ဍဲအခိၚ် မဆုတ်အာ ဍုၚ်ဝါန်၊ ပၞာန်မုတ္တမဂှ် ဗ္တိုက်တဴ နကဵုဒပ်ပၞာန်အရီု (စစ်ကူတပ်) မ္ဂး ဒုၚ်ဒဝ်မာန် ဟွံသေၚ်ရ၊ ဒးဖဍိုန်တဲ ဒးဒုၚ်ကမျရောၚ်ဂှ် မုချဨကန် သ္ဒးဒှ်ဏောၚ် တၠညး။"
ဂလာန် အမာတ်ဇၞော် ပန်စဵုဂှ် နူကဵုရာဇာပြောဟိတ်ဇၞော် မၚ်ဇဲတနုန် မလုပ်ဒုၚ်ထံက် ဂရၚ်ပ္တီတုဲ တၠညး ချပ်ဗ္စာရဏာတဴဒၟံၚ် မွဲခဏရ။ ကောံဓရီုဝွံ သ္ၚိတ်ဇြ ဒၟံၚ် အတိုၚ်ပကတိတုဲ သ္ကိုပ်ဒပ်တၞဟ်ဟ်ဂမၠိုၚ် သီုကဵုမုက်မတ်ဟွံကျေဝ် ဂစိုၚ်က္ဍိုပ်တုဲ မံၚ်တဴအိုတ်ရ။
"လ္တူနူကဵု ပၞာန်အရီု ဗဂေါမကၠုၚ်ဂှ်၊ ပၞာန်အရီု မကော်ဘိက်လဝ် နူကဵု မံၚ်မလ၊ ဖာသီတအ်ရော ဒဵုကဵုလၟုဟ် ဟွံစိုပ်ကၠုၚ်ဏီပုဟ်ဟာ"
"ဍာံမံၚ် တၠညး၊ စဍုၚ်လ္ဂန်ဖေန် အာဲဗြၜုန်၊ စဍုၚ်ဒဵုကြေဝ် စဴအာဲဗညာ၊ စဍုၚ်မတ်မလီု သၟိၚ်ဥလဵု၊ စဍုၚ်မံၚ်မလ လိုက်ဖြာ မဒှ်ကောဒေံမွဲစွံ ကုစဍုၚ်မုတ္တမဂမၠိုၚ်ဝွံ ကသပ်စၞာဲ ညဳသာသၟဟ်သၟန်တုဲ ဂံၚ်သ္ပတဴသပုန်ရ တၠညး"
ကောဒေံ ဗြာတ္ထၜဂမၠိုၚ် အိုဿီု က္တဵုသ္ပတဴသပုန်ရောၚ် တၠညး ဂွံတီဂွံကေတ်ဂှ် ကပိုက်ဖျေံယဝီု မွဲတဲတုဲ အကာဲအရာ စိုတ်လီုအာ ဗွဲမလောန်ဂှ် ကောယဴညး သၟိၚ်ဗြထ္ၜိုတ် ကၠိုဟ်အာရ။
"လ္ပဂွိၚ်ဂွါဲတဴညိ တၠညး၊ ပၞာန်အရီုနူဗဂေါဂမၠိုၚ် စိုပ်ကၠုၚ်မ္ဂး မွဲဟာန်ကေုာံ စဍုၚ်မုဟ်ဗဳ၊ ဗွဲမသ္ကာတ်တ်မြဟ်ဟ် အဲဍိက်ထ္ပက်ပၞာန်တုဲ က္ဍိုပ်စဍုၚ်မုတ္တမဂှ် ဆက်ကွာဲကဵုဏောၚ် တၠညး။
ခြာဟွံလအ် ဒပ်စဍုၚ်မုဟ်ဗဳ ဇဲယသူရ စိုပ်ဏောၚ်ဂှ် ပရိုၚ်စိုပ်လဝ်တုဲရ တၠညး။ ဟိုတ်ဒှ်သာ်ဂှ်ရ သီုဟွံဒးစွံဓဝိၚ် ဂွိၚ်ဂွါဲမွဲသာ် ဩဝ်ပြံၚ်သ္ပဒ္တဴအာ အပ္ဍဲကဵု ဍုၚ်ဝါန်ဟေၚ်ညိ တၠညး"
"ကှ်ေ... ဟီုသာ်ဂှ်တှ်ေ သီုအမာတ်ဇၞော် ပန်စဵု၊ မၚ်ဇဲတနုန်တအ် တ္ၚဲယးမ္ဂး ပြံၚ်သ္ပဒ္တဴအာ ပ္ဍဲဍုၚ်ဝါန်ဏောၚ်၊ ကောယဴ သၟိၚ်ဗြထ္ၜိုတ် ကေုာံ ဒပ်သှ်ေဂမၠိုၚ်၊ မၚ်တဴ ပၞာန်အရီု နူဗဂေါတုဲ ကဵုဆက်ထ္ပက်မံၚ်ပၞာန် ပ္ဍဲမုတ္တမဏအ်ညိ"
"ဒးရးသန်ရ တၠညး"
ကောံဓရီုဝွံ ဗွဲမဒးရး တုဲဒှ်အာအိုတ်ရ။ တၠညး ကေုာံ ဂၞကျာ်ပလောၚ်ပေါၚ်မဂမၠိုၚ် သီုကဵု အမာတ်သ္ကိုပ်ပၞာန် တၞဟ်ဂမၠိုၚ် ဆုတ်အာ ဇရေၚ်ဍုၚ်ဝါန် အိုတ်တုဲ သ္ကိုပ်ဒပ်ဇၞော် သၟိၚ်ဗြထ္ၜိုတ် ကေုာံ ဒပ်မပါဗက် လက္ကရဴဂမၠိုၚ် ဆက်တုဲ ထ္ပက်ဒၟံၚ်ပၞာန် ပ္ဍဲမုတ္တမရောၚ်။
အမာတ်အိုဿီုဂမၠိုၚ်တုန် မုက်မတ် ဟွံခိုဟ်တဴ ကွေံကွေံအိုတ်ရ။ သ္ပပ္တံနူ အခိၚ်ဂှ်တုဲ တၠညးစိၚ်ဗ္တာၚ် သၟိၚ်ဗညာဥူဝွံ ဗၞတ်လလအ် စှ်သုန်သၞာံ သ္ပသၟိၚ် အုပ်ဓုပ်ပိုၚ်ပြဳကၠုၚ် အပ္ဍဲနန်ထဝ် မုတ္တမတုဲ သ္ဒးသၠးကၠေံ နူနန်ထဝ် မုတ္တမ ဒတုဲရောၚ်ဂှ် အယာံမာတ် ညးလဵုမွဲလေဝ် တီကေတ်ဟွံမာန်အိုတ်ရ။
အခိၚ်လအ်ဂွံ ၜိုတ်မွဲသတ္တဟဂှ် ဒပ်ပၞာန်အရီု မကၠုၚ်နူကဵု ဗဂေါလေဝ် စိုပ်ကၠုၚ်ရဒှ်တုဲ သ္ကိုပ်ဒပ်ဇၞော် သၟိၚ်ဗြထ္ၜိုတ်တအ် စဳရေၚ်ထ္ပက်တဴပၞာန်အိုတ်ရ။ ကၟာၚ်ဍုၚ်မုတ္တမဝွံ အတိုၚ်ဗီုပြၚ်တိဍာ် ပါဲနူကဵု ဒုၚ်ဒဝ်ခိုဟ်တုဲ က္လေၚ်ဒှ်ဒၟံၚ် ကၟာၚ်ဍုၚ်တၟံဍိုတ်ပၠန်ရ။ စဍုၚ်မုတ္တမလေဝ် ကသပ်လညာတ်ခိုဟ်တုဲ က္လိဂွံတဴဍုၚ်ဟွံမာန် အယာံမာတ်ဗိုၚ်တဴ မ္ၚးဍုၚ်ဟေၚ်မာန်ရ။
ဗြဲလေဝ်စှ်ေ စိုပ်တိယျဒှ်တုဲ ကါလပေါဲပၞာန် တ္ၚဲအခိၚ် လအ်ကၠုၚ်မ္ဂး ကောန်ပၞာန် ၜါလ္ပာ်ဂမၠိုၚ် ကၠောဝ်ဗျဵုကၠုၚ်အိုတ်ရ။ ညံၚ်ရဴကောန်ဍုၚ်ကွာန် မၞုံအပ္ဍဲဍုၚ်ဂမၠိုၚ် မကၠောဝ်ဗျဵုတဴကီု ကောန်ပၞာန်တၠညး မၞုံမ္ၚးဍုၚ်ဂမၠိုၚ်လေဝ် သီုဟွံမွဲတဴကဵု ပွမဒစးဒုၚ် ပဠေဝ်ပဠေတ် ဒးပ္တဝ်မုက်ကဵုပၞာန်ဂှ် သာတုဲ ကၠောဝ်တဴအိုတ်ရ။
ဍုၚ်ဝါန်ဝွံလေဝ် ဒှ်တဴဍုၚ် ဍောတ်တ်ဟေၚ်တုဲ ဒပ်ဂမၠိုၚ် ညံၚ်သ္ဂောံရုမ်ဂပ်ဂှ် ထံက်ပၚ်တဴဇွောံမ ဟွံမာန်ရ။ အခိၚ်လအ်ကၠုၚ်မ္ဂး အလဵုဇကု သ္ကိုပ်ဒပ်ဂမၠိုၚ် ပုၚ်ဗဂါပ် ဟွံဓဝ်ယာတဴရ။ ဒပ်မဗိုၚ်လဝ်ဍုၚ်ဂမၠိုၚ်ဂှ် ဟိုတ်နူကဵု ဥတုဗြဲ ရာသဳပရေံကီု၊ ယဲဝေဒနာ ဂၠိုၚ်ဂၠၚ်ကီုတုဲ လအ်ခ္ဍၚ် ပၞာန်ဗျဟ်ခ္ဍၚ် ဒှ်ကၠုၚ်ရ။
ပၞာန်အရီု မစိုပ်ကၠုၚ် နူဍုၚ်ဗဂေါ စဍုၚ်မုဟ်ဗဳ သ္ကိုပ်ဒပ်ဇဲယသူရဂှ်တှ်ေ စိုတ်ဓါတ် ကတိုၚ်ကၟဟ်တဴရ။ ဒးဗာ်ဒးထ္ပက်ဏောၚ်၊ ဒးချိုတ်ဏောၚ်ဂှ်လေဝ် ဟွံဖေက်၊ သွက်သ္ဂောံ ထပါ်လုပ် ဗ္တိုက်ပၞာန်ဂှ်ဟေၚ် ကြီုကြဵုဇာဒၟံၚ် စောတ်တ်ရ။
"ပိုဲတအ်ကၠောဝ်မ္ဂး ဍေံတအ် သာတုဲ ဒးကၠောဝ်ဏီဏောၚ်။ ပိုဲတအ်ကၠောဝ်ဂှ် ဂၠာဲက၊ ဂၠာဲၚဴ၊ ဂၠာဲစ မ္ၚးဍုၚ် ဂွံတဴမံၚ်ဏီရ။ ဍေံတအ် ကၠောဝ်ကၠုၚ်မ္ဂး ဂၠာဲစအပ္ဍဲဍုၚ် ဂွံဟွံသေၚ်ရ။ ၜိုတ်လဵု ဒုၚ်လအ်လအ်မာန်ရော"
"ဆဂး ဗီုဏအ်၊ သ္ကိုပ်ဒပ် ဇဲယသူရ၊ ပိုဲတအ် ၜိုတ်အယာံမာတ် ဆက်ဗိုၚ်လဝ်ဍုၚ် အတိုၚ်ဏအ်သၟးရတှ်ေ ဟွံပြေပြံၚ်တဴ ဗွဲဍာ်ဇမၠိၚ်ရ။ ဗြဲစှ်ေတုဲ အခိၚ်ကၠောန်ဝါဗ္ၚလေဝ် စိုပ်ဒၟံၚ်ယျ၊ ဟိုတ်နူပၞာန်ဏအ်တုဲ ကောန်မုတ္တမဂမၠိုၚ်ဂှ် ဒဵုကဵုအခိၚ်လၟုဟ် စှ်ေတဴ ဇရေၚ်ဝါဗ္ၚ ဟွံမာန်ဏီရ။ ပရေၚ်ပၞာန်ဏအ်ဂှ် ဒးပ္တုဲကၠေံထောံ ပြဟ်ဟ်မှဒှ်ဏောၚ်။"
"ကသပ် သၟိၚ်ဇၞော် ဗီုလဵုနွံရော"
အပ္ဍဲကဵုဂဒုက်တာဲ လျးမတၟးတဴ နကဵုတိုၚ်ပၟတ် ကၠေၚ်သ္ဍဴဂမၠိုၚ်ဂှ် သၟိၚ်ဗြထ္ၜိုတ်ကဵု စဍုၚ်မုဟ်ဗဳ ဇဲယသူရတအ်ညးၜါ ကေုာံသ္ကိုပ်ဒပ်တၞဟ်ဂမၠိုၚ် ဆိုၚ်က္ဍိုပ်ရေၚ်သ္ကအ်တုဲ ပ္ညဳပ္ညပ်တဴဒၟံၚ် သွက်ဗျူဟာပၞာန်ရ။
ဗ္တံဝွံ သီုမသ္ၚိတ်ဇြတဴ ဗွဲပကတိ လဆောဝ်လဆောဝ် ပါဲနူကဵုရမျာၚ် ကောန်ပၞာန်ဂမၠိုၚ် မဂေတ်ကၚ်တုဲ အပ္ဍဲပွဳဗွိုၚ် ဂဒုက်တာဲတုန် ရမျာၚ်စၟအခြဂမၠိုၚ်ဟေၚ် အုပ်ဓလီုလဝ်ရ။
စဍုၚ်မုဟ်ဗဳ ဇဲယသူရဝွံ ဟိုတ်နူကဵု ပရေၚ်ဆဵုဂဗပၞာန် ၜတ်တဴဒၟံၚ်တုဲ သၟိၚ်ဗြထ္ၜိုတ်ဟေၚ် ဒးစၞောန်ထ္ၜးပ္ညဳပ္ညပ်ဒၟံၚ် နဲကဲဗျူဟာပၞာန်ဂမၠိုၚ်ရ။ ၜိုန်ဂှ် ဇဲယသူရဝွံ တၟအ်ဇီုဇီု၊ ကၠကိတ်တ် ဒှ်ညးမယိုက်ဂၠေၚ် လျိုၚ်သ္ဇိုၚ်ဝန်ပၞာန် ဂံၚ်ၚ်သ္ကာသ္ကာမွဲရ။
"အဲဂှ်တှ်ေ ဖံက်လုပ်အာ ကၟာၚ်ဍုၚ်မုတ္တမတုဲတှ်ေ မိက်ဂွံဗ္တိုက်တဴရ။ နကဵုသရာဲခိုဟ် ၜိုတ်ၜါစှော်တၠ၊ သီုကဵုအဲ အခိၚ်ဗ္တံ ကၠတ်သၠာ်လုပ် ကၟာၚ်ဍုၚ်မုတ္တမဏောၚ်။ ဒပ်သ္ကိုပ်ဒပ်တအ်ဂှ် မၚ်ဒၟံၚ်မ္ၚးဍုၚ် ဒတုဲညိ။
အဲကၠတ်သၠာ်လုပ် ကၟာၚ်ဍုၚ်မာန်ဗက် သရာဲကၚ် ပ္ဍဲပါၚ်တြၚ်ဍုၚ်ဂမၠိုၚ် ကေုာံ သရာဲကၚ် ပ္ဍဲဓဗိုန်ဇၞော် ကဵုသမ္တီဂမၠိုၚ်ဂှ် ပသောၚ်ထောံတုဲ အဲဖျေံစွံလဝ်ကဵုကၚ် မၞိဟ်အဲဏောၚ်။ သ္ဂာဗ္တံလောန်ဗက် အဲပံက်ထောံ ပါၚ်တြၚ်ဍုၚ်ဏောၚ်။
ပါၚ်တြၚ်ဍုၚ် ပံက်ဗက် ဒပ်သ္ကိုပ်ဒပ်တအ် ကဵုရမျာၚ်ကရေဲ အပ္ဍဲကဵုဍုၚ်တုဲ ထ္ပက်လုပ်အာမွဲဒမြိပ် အခိၚ်ဟွံထေၚ်စၟတ်လဝ်မွဲသာ် ဗ္တိုက်မွဲအသိၚ်မ္ဂး ဒုၚ်ဒဝ် မာန်ဏီဟာ။ ဆဂးဂှ် လၟုဟ် ဂိတုဏအ် ထပှ်စွေက်၊ မၚ်ထပှ်တ္ၚဲပၠန်မ္ဂး ဂိတုအိုတ်ရ။
လၟုဟ် ယဝ်ခါရ ပိုဲတအ် ဖံက်လုပ်အာ ကၟာၚ်ဍုၚ် သၟဝ်လျးဂိတုမ္ဂး ဍေံတအ် တီကေတ်မာန်ဏောၚ်။ ဗ္တံဂိတုဂၠုဟီုမ္ဂး ပိုဲတအ် ကေတ်ဗ္ဒန်ဒၞါကဵု ဒမၠုလေဝ်ဂွံရ။ ဟိုတ်ဂှ်ရ မၚ်ထပှ်တ္ၚဲတုဲမှ ကၠတ်လုပ်ဗ္တိုက်မ္ဂး ဟွံအံၚ်ဇၞးတဴ ဟွံမွဲရ။"
ကသပ်သ္ကိုပ်ဒပ်ဇၞော် သၟိၚ်ဗြထ္ၜိုတ်ဂှ် သ္ကိုပ်ဒပ် ဇဲယသူရ ဒးအာဂၞပ်ရ။
"ကသပ်သၟိၚ်ဇၞော် ခိုဟ်ကွေံရ၊ သွက်ဂွံဗာ်ထ္ပက် မ္ၚးဍုၚ်ဂှ် စွံတာလျိုၚ်အဲညိ၊ ဍေံတအ် မွဲမှ ဟွံကဵုဗၠးအာပုဟ်။ သရာဲသ္ဂံၚ် သွက်ဂွံလုပ်ဗ္တိုက် ပ္ဍဲဍုၚ်ဂမၠိုၚ်လေဝ် ပ္ဍဲဒပ်အဲ မၞိဟ်သၟိၚ်ဇၞော် မဒးဂၞပ်ဂှ် ရုဲစှ်ကေတ်ညိ။"
"ကှ်ေ ဒှ်သာ်ဂှ်မ္ဂး အပ္ဍဲ ထပှ်တ္ၚဲဏအ် စိၚ်၊ ချေံ၊ ကောန်ပၞာန်ဂမၠိုၚ် ညံၚ်သ္ဂောံဖဲလဲဂှ် လွဳလဝ်ဒြဟတ်တုဲ ပဠေဝ်ပဠေတ်လဝ် သွက်ပၞာန်ညိ"
နဲကဲဗျူဟာပၞာန် သ္ကိုပ်ဒပ်ဇၞော် သၟိၚ်ဗြထ္ၜိုတ်ဂှ် သီုကဵု စဍုၚ်မုဟ်ဗဳ သီုဖ္အိုတ် တုပ်စိုတ်အိုတ်တုဲ သ္ကိုပ်ဒပ်တၞဟ်ဟ်ဂမၠိုၚ် သွက်သ္ဂောံစဴအာ ဇရေၚ်ဒပ်ဇကုဂှ် ပဠေဝ်ပဠေတ်တုဲ ဒှ်တဴဒၟံၚ် ဗွဲမချဳဒရာၚ်ရ။
အဃောဂှ် ဍိက်ပတှ်ေ သၟိၚ်ဗြထ္ၜိုတ် အဒဴကုန်ဝွံ ဗွဲမပြဟ်ပြေဟ် လုပ်ကၠုၚ် ပ္ဍဲဂဒုက်တာဲနန်တုဲ ဆိၚ်ဟီုထ္ၜးဏောၚ်သ္ပဂှ် မွဲဒမြိပ် ညာတ်ဒးသ္ကိုပ်ဒပ်တၞဟ်ဂမၠိုၚ်တုဲ ဂစိုၚ်က္ဍိုပ်တုဲဟေၚ် ဒးဒတူညိၚ် မံၚ်ထောံရ။
တုဲဂှ် သ္ကိုပ်ဒပ်တၞဟ်ဟ်ဂမၠိုၚ်ဝွံ လွဟ်လက်နက် ဗၞုဟ်၊ ဇြၚ် ညးကဵုညး ဂိုၚ်ကေတ်တုဲ စဴအာအိုတ်ရ။
ဆက်ဗှ်အာ သ္ကုတ် ၃ ညိ...
#သ္ဂံၚ် လအီမန် (သၟာပၠန်ဂတး အညတြ)
ပ္ဍဲကဵု Telegram လေဝ် လုပ်ဗှ်တဴဂွံရ။
https://t.me/laaeimon
#တၠညးစိၚ်ဗ္တာၚ် သၟိၚ်ဗညာဥူ #မုတ္တမ
#ပွကမ်ဇာတာ မပြံၚ်သၠာဲ
#ဟံသာဝတဳ သၟိၚ်တ္ၚဲယးတၟး
#The Sunrise of Hongsawatoi