ရုဲစှ်က္ဍိုပ်သ္ကိုပ်ကဵုလေပ်ညိ

“က္ဍိုပ်သ္ကိုပ်” အရေဝ်ဏံ ပိုယ်တအ်ကေၚ်မိၚ်ကၠုၚ်ဗွဲမဂၠိုၚ်ရ။ မပ္တံ ဍုၚ်မွဲမွဲ ကွာန်မွဲမွဲ ဟွံသေၚ်မ္ဂး ဂကောံမွဲမွဲ ဂွံတောတက်ဇၞော်မောဝ်ကျေဝ်ဂေါဝ်ကီု ဂွံတန်တဴအာဍာ်ဇမၠိၚ်မာန်ကီုဂှ် ညးမဒှ် “က္ဍိုပ်သ္ကိုပ်” တအ် ဒှ်တဴအဓိကမွဲတၠကီု ဟီုမ္ဂးဟွံဗၠေတ်ရ။ ဒှ်သာ်ဂှ်မ္ဂး-ကောန်ဂကောံတအ်ရော ဟွံဒှ်အဓိကပုဟ်ဟာ-? ယဝ်ပုစ္ဆာမ္ဂး “ဟွံသေၚ်” ဗီုဏံဂှ် မ္ဒးသွဟ်ဏာဂၠေံဂၠေံရ။ မုဟိုတ်ရောမ္ဂး ဇရေၚ်ပူဂိုလ် ညးမဒှ် “က္ဍိုပ်သ္ကိုပ်” အံၚ်ဇၞးမွဲဂှ် ဒးနွံကဵု ကောန်ဂကောံခိုဟ်ဟ်တအ် ပူဗိုၚ်လဝ်ရ။ တုပ်ပမာ-သၟာရပ်သၞေဝ်ဂၠုၚ်(အာစာဂၠုၚ်) ကေုာံ ကောန်ဂကောံမတွံဂးညးမဒုန်ဂၠုၚ်တအ် တာလျိုၚ်ညးကဵုညးပြေမှ သ္ဂောံအာစိုပ်သြၚ်တၚ်ရန်တၟအ်တေံမာန်ရ။ ပ္ဍဲအရာဏံ ညးမဒှ်“က္ဍိုပ်သ္ကိုပ်” ယဝ်ထ္ၜးဂၠံၚ်ခိုဟ် တီပြယာဲဂၠံၚ်ဂၠိုၚ်မ္ဂး ညးမဒှ်ကောန်ဂကောံတအ် ဒှ်လၟောၚ်ဍောၚ်ၜိုတ်အောန်တုဲ အာစိုပ်တိုၚ်ပ္ကဴလေဝ် လောဲသွာကီုရ။

ဟိုတ်ဂှ်ရ ပ္ဍဲအရာမရုဲစှ်“က္ဍိုပ်သ္ကိုပ်”ဂှ် ဒှ်တၚ်အဓိကဇၞော်မွဲရောၚ် စှ်ေစိုတ်တုဲၜိုတ်လညာတ်သၟဟ်

အစောံ မ္ဒးပ္တိုန်ထ္ၜးဏာကဵု ကုညးမဗှ်လိက်တအ် “ပူဂိုလ်ဟွံထေက်ကဵုရုဲစှ်နဒဒှ်က္ဍိုပ်သ္ကိုပ်” ဍန်န်ဂၠေံဂၠေံ မွဲကဏ္ဍကီုရ။

ပူဂိုလ်ညးမသုၚ်စောဲအဝဵုအာဏာ

ခေတ်ကာလလၟုဟ်ဏံ ဍုၚ်ကွာန်ကီု ဂကောံကီု အုပ်ဓုပ် နကဵု အဝဵုအာဏာဂှ် အောန်ကၠုၚ် မၞိဟ်ဒးစိုတ်ဟွံမွဲကၠုၚ်တုဲ ပြံၚ်သၠာဲကၠုၚ် ဗီုပြၚ်အုပ်ဓုပ် နကဵု “တၚ်တုပ်စိုတ်” ကေုာံ “သၞောဝ်စဳပၞောန်” အိုတ်ရ။ ညးမဒှ်“က္ဍိုပ်သ္ကိုပ်”တအ်ကီု ကောန်ဂကောံတအ်ကီု ဒးဒ္ဂေတ်ဗက်အာ ဒးကွာ်ဗက်အာ အတိုၚ်“တၚ်တုပ်စိုတ်” ကေုာံ “သၞောဝ်စဳပၞောန်” တအ်ဂှ်ရ။ အဝဵုအာဏာ ဟီုဂှ် တုပ်ပမာ-ပၟတ်ကီုရ။ ယဝ်စိုပ်တဲ ညးမၞုံကဵုဓရ်ဍာံမ္ဂး ဒှ်ဂုဏ်ဖိုလ်မာန်တုဲ ယဝ်စိုပ်အာတဲ ပူဂိုလ်ကြအ်ကဵုအဝဵုအာဏာမ္ဂး ဒှ်လလေၚ်ဖိုလ် သွက်ဍုၚ်ကွာန် သွက်ဂကောံတအ်ဂှ်တအ်ဂှ် မာန်ရ။

ပူဂိုလ်ညးမဟွံမွဲကဵုတၚ်ဒုၚ်လျိုၚ်ကေတ်လျိုၚ်

ဂလာန်ဝွံ ဍာံစၟတ်သြန်ရ။ ကုပူဂိုလ် ညးမဒှ်“က္ဍိုပ်သ္ကိုပ်” တအ် တၚ်ဒုၚ်လျိုၚ်,ကေတ်လျိုၚ် ဂှ် ဒှ်အဓိကဇၞော်မွဲရ။ ကု“က္ဍိုပ်သ္ကိုပ်” ဟွံမွဲကဵုတၚ်ဒုၚ်လျိုၚ်ဂှ် ကောန်ဂကောံတအ် ဂွံရှ်ေသှ်ေရဴဂဴလေဝ် ဒှ်ဟွံမာန်တုဲ အာစိုပ် ဒဵုကဵုက္ဆံၚ် ဍုၚ်ကွာန်လီု ဂကောံလီု လေပ်ရ။ “ဒးတှ်ေ ဗီုဒး၊ ဗၠေတ်တှ်ေ ဗီုဗၠေတ်” ညးမဒှ်“က္ဍိုပ်သ္ကိုပ်” တအ် ဒးနွံကဵုသစ္စ ဒးနွံကဵုတၚ်ဒုၚ်လျိုၚ် လ္တူဂလာန်ဇကု လ္တူကမၠောန်ဇကု ဍိုက်က်ပေၚ်ၚ်ထေက်ရ။

ပူဂိုလ်နွံကဵုဓရ်အဂတိ ဟွံတပ်တး

ညးမဒှ်“က္ဍိုပ်သ္ကိုပ်” ယဝ်ဟွံတပ်တးမ္ဂး ဒှ်ဂၠံၚ်တရဴသွက်ဂကောံဂွံယုတ်ဒေက်စှ်ေဟေၚ်ရ။ ယဝ်ရံၚ်လ္ပာ်ပရေၚ်ဍုၚ်ကွာန်မ္ဂး ပူဂိုလ်လ္ၚဵုတအ်ဂှ် မိက်ဂွံဒှ်တဴ “က္ဍိုပ်သ္ကိုပ်” ဗွဲမလောန်ရ ဆ္ဂး ဒှ် “က္ဍိုပ်သ္ကိုပ်” တုဲ ရံၚ်ကဵုလာဘ်သကာဟွံဗဗွဲဓရ်တအ်မ္ဂး ဍုၚ်ကွာန်မွဲမွဲ ထေက်ကဵုဒးတောတက် ဒးၜိုဟ်သြိုဟ်ဂှ် ဟွံတောတက် ဟွံၜိုဟ်သြိုဟ်ကၠုၚ်ရ။

ပူဂိုလ်ဟွံဂံၚ်ဖျေံတၚ်သ္ဂုတ်သွာတ်

ပ္ဍဲအရာပံၚ်ကၠောန်ကမၠောန်ဂကောံဝွံ ပွမဖျေံတၚ်သ္ဂုတ်သွာတ်မွဲဂှ် ဒှ်တၚ်အဓိကမွဲသာ်ကီုရ။ သၠေဟ်ပမာ ဒှ်ကၠုၚ်ၜါလွးတုဲ ညးမဒှ်“က္ဍိုပ်သ္ကိုပ်” တအ် ယဝ်ဟွံဂံၚ်ဖျေံတၚ်သ္ဂုတ်သွာတ်မ္ဂး ကမၠောန်လဇုဲလဇ ဟွံစိုပ်ဒ္တုဲဒှ်မာန်ရ။

ပူဂိုလ်ဟွံမွဲကဵုဓရ်မေတ္တာ

ဒဒိုက်၊တသိုခ် ကောန်ဂကောံ ညးမဒှ်“က္ဍိုပ်သ္ကိုပ်” တအ် ယဝ်ဟွံသ္ပစၟတ်၊ဟွံကၠိုဟ်လဝ်မ္ဂး ကၠောန်ကမၠောန်ဂကောံ ဟွံစိုပ်တရဴရ။ ညးမဒှ်“က္ဍိုပ်သ္ကိုပ်” တအ်ဒးနွံကဵုတၚ်သၠာဲဂတးလညာတ် ကုကောန်ဂကောံရ။ ဟွံထေက်ကဵုစွံဓရ်ဣဿာ မစ္ဆရိယ လ္တူကောန်ဂကောံတအ်တုဲ ဒၞာဲထေက်ကဵုဒးထိုၚ်သးမ္ဂး ဒးထိုၚ်သး ဒၞာဲထေက်ကဵုဒးကဵုက္ဍိုပ်မ္ဂး ဒးကဵုက္ဍိုပ်လေပ်ရ။

သရုပ်ကၠေံမ္ဂး ဂကောံမွဲမွဲ ဂွံအာစိုပ်တိုၚ်ပ္ကဴအံၚ်ဇၞးမာန်ဂှ် “က္ဍိုပ်သ္ကိုပ်” လေဝ်ဒးခိုဟ်၊ ကောန်ဂကောံတအ်လေဝ် ဒးတီတာလျိုုၚ် ဘိုၚ်ယိုက်ဂၠေၚ်အာမ္ဂး အံၚ်ဇၞးလောဲလောဲရ။ မွဲသာ်ပၠန် ပ္ဍဲအရာကၠောန်ကမၠောန်ဂကောံဂှ် ပရေၚ်ဂကောံ, ပရေၚ်ပူဂိုလ် ပိုယ်တအ်ထေက်ကဵု ဒးပါ်ပါဲလေပ်ရ။ ယဝ်ရ ပါ်ပါဲဟွံလေပ်မ္ဂး ပူဂိုလ်မွဲကဵုမွဲ ဒက်ဝဲဒှ်သၞ ဂွံဆဵုညာတ်ကေတ်ဗွဲမဂၠိုၚ်ရ။ “ပရေၚ်ပူဂိုလ်မ္ၚးဏံ ၜိုန်ပၟိက်ဟွံတုပ်ညးသ္ကအ်ကီုလေဝ် ကိစ္စစပ်ကဵုကမၠောန်ဂကောံမ္ဂး ဒးပံၚ်ကၠောန်ညးသ္ကအ်ဂွံ” စိုတ်ဓါတ်ဗီုဏံဒးနွံထေက်ရ။

  ဓမ္မေ ဟောန္တု သဂါရဝါ

မၚ်ဗၠာဲဗျူဟာခေတ် (လျးကျာ်သြဳ)

(11/7/2020)

crd