ကောန်စဴထဝ်
ဂိတုမေ (3)၊ 2021
ပ္ဍဲဂကူမန်ပိုဲတအ် ဓဝ်သစ္စပန် - ကုလသစ္စ၊ ဗဳဇသစ္စ (ဇာတိသစ္စ)၊ ဒေသသစ္စ၊ ဓနသစ္စဏံ ဗၞတ်ဂလိုၚ်လဵုနွံကီုရော၊
ဂကူဂျူတအ် ၜိုန်ရဍုၚ်ညးတအ်ဍောတ်သွတ်ကီုလေဝ် ညးတအ်ကၠောန်ပတိတ်လွဟ်ဂတာပ်ခတ်ေ၊ က္ၜၚ်ကျာဂတာပ်ခေတ်တုဲ အာသွံစကဵုဍုၚ်ဇၞော်ဇၞော် ညံၚ်ရဴဍုၚ်ဂလာအိန္ဒိယဏီရ။ စပ်ကဵုကွတ်ပညာတဵုလွဳဂှ်လေဝ် ဟွံဒးကေတ်တိဍောတ်ဇၞော်မွဲသာ် တဵု လွဳကၠုၚ်မာန် ဒဵုကဵုအလုံဂၠးတိမွဲ ဒးအမ်သဝ်ရ။ ဆၜိုတ်စိုတ်ဓါတ်ဆာန်ဂကူမွဲဓဝ် ညးတအ်ဒစဵုဒၞာဍုၚ်ညးတအ်ဟွံမာန်ဂှ် ချိုတ် ပၠိုတ်ရ။ ဂွံရာန်လွဟ်ဂှ်လေဝ် ပ္ဍဲညးတအ် သြန်လှဲလးမံၚ် ညံၚ်ရဴဍုၚ်သေဌဳတအ် ဟွံသေၚ်ရ။ စကာကၠေၚ်က္ဍဟ်ပညာတုဲ သွာၚ်နာနာ ညးတအ်ဂစာန်လွဳပရာကၠုၚ်တုဲ ခၞံဗဒှ်ကၠုၚ်တုဲ အံၚ်ဇၞးကၠုၚ်အလုံလိုက်ရ။ ဂကူဂျပါန်တအ် နူဘဝကျပၞာန်တုဲ ဍုၚ်ဒှ်အာပတေၚ်ချးဂှ် အခိၚ်ဂှ် ဟွံဂြိပ်ပဲါအာဍုၚ်တၞဟ်ဟ်တအ် နဒဒှ်ညးဒဒိုက်ဒဴပၞာန်တုဲ ဂစာန်သွက်ဍုၚ် ဒုၚ်ဒဒိုက်ကၠောန်သွက် ဂကူဂှ် ကၞောတ်တဲ ညးတအ်ကလေၚ်လောဲသိုက်ကၠုၚ်၊ ကလေၚ်နွံကၠုၚ်ကဵုအဝဵုပၠန်ရ။
မၞိဟ်ဟီုဂှ် ညးမွဲကဵုညးမွဲ ပညာဟေၚ် ကွာအာညးသကအ်ဂှ်တုဲ လကြဴပညာဂှ် ယဝ်ရဝဳရိယ ဆတ်စုတ်ပၠန်မဂး ပိုတ်တိတ် အာညးသကအ်ရောၚ်။ ပ္ဍဲလိက်ပိဋကတ် ညးဟီုစ ဝဳမံသာဓိပတိ၊ ဝဳိရိယာဓိပတိ မဒှ်ဂှ်တုဲ သတ်မွဲမွဲ ဂွံပါ်ခြာအာညးသကအ် ကံဟွံတုပ်ညးသကအ်၊ ပညာဟွံတုပ်ညးသကအ်၊ စိုတ်ဟွံတုပ်ညးသကအ်တအ်ဂှ် ဟိုတ်နူအဓိပတိတအ်ဂှ် မဒှ်ရ။ သ္ပတၠပ ညာလေဝ် ပညာဇၞော်နူညးတၞဟ်၊ သ္ပတၠဝဳရိယလေဝ် လၞိန်ဗပိန်ကၠေံဝဳရိယညးတၞဟ်၊ ဂွံဒှ်သာ်ဝွံဂှ် တန်တဴကဵုစိုတ်ဓါတ် စိတ္တာဓိပတိဟီုမာန်ရ။ ကောန်ဂကူပိုဲတအ် ၜိုန်ရဗှ်မံၚ်လိက်ပရောဍုၚ်ညးတၞဟ်တအ် ဇၞော်မောဝ်တောတက်ကီုလေဝ် ဆဂး ဗီုညးတၞဟ်တအ်ကၠောန်ဂှ် ဟွံကၠောန်ပတောအ်ဗက်ရ။ ပၠန်ဂတးမန်ဂှ်လေဝ် ကၠောန်ပတိတ်လွဟ်ဇကုကဵုဇကုဟွံမာန်၊ မကမ်ဇ ကုကဵုဇကုဟွံမာန်၊ ပတှေ်ရာန်ကေတ်သၟးရ။ ညးဍုၚ်ကွာန်မန်လေဝ် ဝါတ်မံၚ်ပၠန်ဂှ်တုဲ လအ်ခ္ဍၚ်ဂကူမန်သဝ်စှေ်အာခ္ဍၚ်ရ။ ပိုဲဂ ကူတအ် လိက်ရောဟွံဗှ်၊ ပညာညးတၞဟ်လေဝ် ဟွံကေတ်နဲကဲ၊ ဒးပတိတ်က္ဍဟ်မဂး မူမွဲဟွံကၠောန်အိုတ်ရ။ ပတှေ်ဇြဟတ် ကာယသၟးရ။ အာဍာ်ဏံမဂး ဂကူကၠက် ဍုၚ်ကၠေံဂှ် ချိုတ်ပၠိုတ်ရ။
ကောန်ဂကူပိုဲတအ် ကၠဟ်ဍုၚ်ကၠဟ်ကွာန်တုဲ အာကၠောန်စဍုၚ်သအာၚ်ဂှ် ဗၠေတ်ၜိုန်ရဟွံမိက်ဟီုကီုလေဝ် ဆဂး ဟွံဒးရ။ သွက် ဂွံဂယိုၚ်အာလမျီု ပ္ဍဲအပ္ဍဲဍုၚ်ဇကု တိဍာ်ဇကုဂှ် ဟွံပတိတ်ကသပ်ညာန်တုဲ စၞးဂှ် အဇာဂှ် ပတှေ်ကာယတုဲ အာကၠောန်စဍုၚ်ညး တၞဟ်တအ်ရ။ သြန်ဂှ် ၜိုတ်ညာန်ပညာဟွံဒှ်ဂှ် ပိုဲတအ်ဒးကၠိုဟ်လဝ်ထေက်ရ။ မန်ပိုဲတအ် ဗွဲမအောန် ဂွံဖျဴနၚ်ကွတ်ပညာတုဲ ကၠောန်ဗဒှ်ပတိုန်အပ္ဍဲဍုၚ်ဇကု နကဵုအပေါတ်ကြိယာ မတိတ်နူအပ္ဍဲတိဍာ်ဇကု ညံၚ်ရဴကမ္ပဏဳ တဵုတၞံကဴဂါပ်ဆုကီု၊ တဵုဒူရေန် တအ်ကီု၊ ကၠောန်ဗဒှ်ဝါဲသဘာဝတအ်ကီု၊ တဵုသတ်ဗြဴသုၚ်ဍာ်တအ်ကီု ၜိုန်ရနွံကီုလေဝ် ဗွဲမဂၠိုၚ် အိုတ်အာဘဝ အပ္ဍဲဍုၚ်ညး တၞဟ်တအ် နကဵုဘဝသၟာကမၠောန်မွဲရ။ အာစိုပ်ဍုၚ်ညးတၞဟ်တအ်ဂှ် သြန်ဟွံဂွံဖျဴနၚ်သောၚ်ဍေံ ပညာညံၚ်ဂွံဂွံဖျဴနၚ်ဂှ် ဒှ်အရာ ပၟိက်ဇၞော်မွဲရ။ ဟီုပရောဝွံမဂး ကူချပ်စိုပ်အာနာဲဇြဟာန် ကွာန်ဒူရာ မဒှ်ပူဂဵုကၠောန်ဗဒှ်ကၠအ်ဒၞာဲတဵုတၞံကဴဂါပ်ဆုရ။ ညးတေံ ကတ် လ္ၚတ်လဝ်ပညာတဵု၊ ပညာကၠောန်ပတိတ်၊ ပရးပတိတ် တၞံကဴဂါပ်ဆုဂှ်တုဲ ကာလဍုၚ်ပိုဲပြံၚ်လှာဲဂှ် ညးတေံ ဖျဴနၚ်ကွတ်တအ်ဂှ်တုဲ တဵုပ္ဍဲကွာန် နဒဒှ်ဗီုပြၚ်ပရေၚ်ပိုန်ဒြပ်ရ။
ဟိုတ်နူကောန်ဂကူမန်တအ် အာကၠောန်စဍုၚ်ညးတၞဟ်တအ်ဂှ်တုဲ ကောန်ဇာတ်ညးတအ် ၜံၚ်တိတ်ကၠုၚ်ဂှ် အာစွံလဝ်ပ္ဍဲကွာန် ညံၚ်ရဴအာပၠေဲစွံလဝ်ဂှ်တုဲ ကောန်ဇာတ်တအ်ဂှ် ဇၞော်ဂေါဝ်တိုန်ကၠုၚ် သုၚ်ဂဥုဲချေံ၊ ဂဥုဲတၞး၊ ဟွံယေန်သၞာၚ်၊ ညံၚ်ရဴသတ်ဂြိုပ် ဒမြိုံဟ် ဟွံဍိုဟ်ကေက်ဆိုက်ဗဒက်ကီု ရိုၚ်ဇိုၚ် တုပ်ညံၚ်ရဴဟွံဂွံဗတောန်ဖျောန်လဝ်ရ။ လေပ်ပညာတုဲ ဟွံလုပ်ဝိုၚ်ဂှ်လေဝ် မွဲလပါ်၊ ဟွံလေပ်ပညာဂှ်လေဝ် မွဲလပါ်၊ ဒ္ဂေတ်လီုလာ်ဂှ်လေဝ် မွဲပြကာရ။ ကောန်ဇာတ်ဟွံဇၞော်ဂေါဝ် ပ္ဍဲသကေမ်တဲမိမရံၚ်စံၚ် မၚ်မွဲတအ်ဂှ် ဆလအ်ဒှ်ကောန်ဇာတ်ခိုဟ်ဟ်မာန်ကီုရော၊ သဘာဝနွံမံၚ်ကီုဟာ။ ယဝ်ရနာဲမၞး အာကၠောန်စမံၚ် ပ္ဍဲဍုၚ်ညးတၞဟ် တုဲ ကၠဟ်စွံလဝ်ကောန်ဇာတ် ပ္ဍဲကွာန်မဂး ညံၚ်ရဴနာဲမၞး ပလီုထောံကောန်ဇာတ်တုပ်ပ်ရ။
ညံၚ်ရဴတၞံခၞေဝ်တအ် ဒးဝါဲကာတ်အာ၊ ဒးတ္ၚဲကာတ်အာ၊ ဇြိုက်အာဍာ်၊ ချောဲအုပ်ဂွံအာ၊ ဒးစၟဂိအာတုဲ ဟွံခိုဟ်ဆာဲဂှ်ကီု ကောန်ဇာတ်ညးတအ်ဂှ် နူကဵုတၞောဝ်ဒတောဝ်ဗဳဇခိုဟ်ဟ်ဂှ် ဒှ်အာဗဳဇရိုၚ်ဇိုၚ် ညံၚ်ရဴမအရိုၚ်ရောၚ်။ ဒဒှ်ဍာံဂှ် ကောန်ကၟိန်အဲ အဲဂွံဆဵုလဝ်ဂတမတ်ပေၚ်ၚ်ရ။ ကၠောန်စဍုၚ်ညးတၞဟ် ဂွံသြန်ဂၠိုၚ်၊ ကၠောန်စအပ္ဍဲဍုၚ်ဇကု ဂွံသြန်အောန်ဟီုဂှ် ဒးမံၚ်ရ၊ ဆဂး ၜိုတ်ဂှ်ဓဝ် ဟွံရုမ်ဂပ်ရ။ ဒးတော်ဇဳဒိုဟ်ရ။ နကဵုအလဵုဇကု ဟွံကေၚ်ဗှ်လိက် တော်ဂၞန်မွဲစွံကဵု ကောန်ဇာတ်ဇကု မွဲလှေ်၊ ဟွံကေၚ် လ္ၚောဝ်ကျာ်မွဲစွံ မွဲလှေ်၊ ဟွံကေၚ်အာကၠုၚ် အကြာဝိုၚ်ဇၞော်ဇၞော်မွဲစွံ မွဲလှေ် မပ္တံသာ်ဝွံ အရာမနွံကဵုၚုဟ်မးတအ် ယဝ်ဇကုဟွံမွဲ ကရောံကောန်ဇာတ်ဇကုမဂး ဒးဆောံလေၚ်အာဖအိုတ်ရ။ မိမဂှ် ဒှ်အစာဝါဒိကိုပ်ကၠာ ကုကောန်ဇာတ်ရောၚ်ဟွံသေၚ်ဟာ။ မိမဟၟဲမဂး ကောန်ဇာတ်တအ်ဂှ် ဟွံဒှ်မံၚ်ညံၚ်ကောန်ကၠၚ်ပုဟ်ဟာ။ ကောန်ဂကူပိုဲတအ် ယဝ်ရမံၚ်ပ္ဍဲဍုၚ်ကွာန်မဂး ဗီုညးဗီုအဲ သ္ၚိညးကဵုညး သ္ၚိကၟိန်ညးကဵုညး ဍေံဒးဒှ်ကၠုၚ်တွဵုရ။ ဆဂး ရဲအာကၠောန်စဍုၚ်မ္ၚးတအ်လ္ၚဵုဂှ် သ္ၚိဌာန်ဟွံမွဲ၊ ပိုန်ဒြပ်ဟွံမွဲ၊ ကမၠောန် ဂွံဂယိုၚ်လမျီု ပ္ဍဲဍုၚ်ကွာန်ဇကုမွဲမွဲသာ် ဟွံလေပ်ဂှ်တုဲ ဒးအိုတ်အာဘဝဂြုဲဂြုဲဂြက်က် နွံဗွဲမဂၠိုၚ်ရ။ တိဍာ်ဍုၚ်ကွာန်ဇကုလေဝ် သီုဒးဆောံလေၚ်အာပၠန်ဂှ်တုဲ ဒးဂိဂၠိုၚ်အာရ။ သွက်ဂွံကလေၚ်ဖျေံသဇိုၚ်ပ္ဍဲတိဍာ်ဍုၚ်ကွာန်ဇကုဂှ် မၞိဟ်ဟွံသၟဟ်ရထတအ် နွံမံၚ် ဟွံအောန်မဂး သွက်ဂကူပိုဲအနာဂတ်ဂှ် ဗၞတ်ဂလိုၚ်လဵုဒှ်အန္တရာဲရောဂှ် တော်ဆကေတ်မာန်ရ။ ပညာလေဝ်ဟွံဂွံ၊ ပိုန်ဒြပ်လေဝ် ဟွံဂွံ၊ သ္ၚိကၟိန်အိန်ထံၚ်လေဝ် ဒက်ပတန်ခိုဟ်ဟ်ဟွံမာန်မဂး ဒှ်ကၠုၚ်ဘဝမၞိဟ်ဂှ် ဟွံတၟေၚ်နူကဵုသတ်တိရစ္ဆာန်တအ်ရ။
ဥပမာမွဲ ယဝ်ဒးထ္ၜး ဒးပတောံၜတ်မဂး တဵုလဝ်တၞံသတ် တၞံသတ်ဗြဴတုဲ အလဵုဇကု ဒးတိုန်ၜှ်ကေတ်ရ။ ကောန်ဍုၚ်သေံတအ်ဂှ် ဗလးကၞုဲတုဲ ကဵုၜှ်ရ။ ပညာဗတောန်ကၞုဲကဵုၜှ်သတ်ဗြဴ၊ သတ်တအ်ဂှ် ဟွံကတ်လ္ၚတ်ဗတောန်အိုတ်ရ။ ညံၚ်ရဴသာ်ဂှ်ကီု စကာ ကွတ်စက် ဂတာပ်ခေတ်တုဲလေဝ် တဵုလွဳဟွံလေပ်အိုတ်ရ။ ပတှေ်ရာန်ကေတ်ဒြပ်ညးတၞဟ်တအ်ဖအိုတ်ရ။ လသိုန်ဗ္ဂေတ် လသိုန်ဗတာၚ် အာလူ မပ္တံသာ်ဝွံဂှ်လေဝ် တဵုဟွံလေပ်အိုတ်ရ။ ယဝ်ရသေံဟွံသေၚ်မဂး ဒးဗၜေတ်မံၚ်ဒူရေန် နူဍုၚ်ရေဝ်ဖိုဟ် ဏီရ။ သွက်ဂွံဂတာပ်ခေတ်နူဂကူညးတၞဟ် ဍုၚ်ညးတၞဟ်ဂှ် ညးညးအဲအဲ ဒးဂစာန်လွဳပရာရောၚ်။ ဂကူဝတအ် ပၠန်ဂတး ကၠုၚ်ခြာဟွံလအ်ကီုလေဝ် ရုၚ်လွဟ်ညးတအ်ကဵုညးတအ် ရုၚ်မကမ်ညးတအ်ကဵုညးတအ် နွံကၠုၚ်အိုတ်ဂှ် ဗွဲမသက္ကုသံသယ ဂွံတီကေတ် ဂွံမိၚ်ကေတ်အိုတ်ရ။ ကၠောန်လွဟ်မကမ်တအ်လေပ်မဂး ဍေံဒှ်ဟိုတ်ဂကူဂွံဗၠးၜးရောၚ် ဟီုမာန်ရ။ ဂကူဝတအ် ကၠောန်လွဟ်မကမ်လေပ်မဂး ပၠန်ဂတးညးတအ်လေဝ် ဇၞော်တိုန်မွဲတဲဓဝ်ရ။ ပိုဲမိက်ဂွံဗၠးၜးမဂး လညာတ်သာ်ဝွံ ဒးသ္ပအဓိက ကူချပ်တုဲ ကၠောန်အာရ။ မံၚ်အာကၠောန်အာအတိုၚ်ဗီုတြေံရမဂး ပ္ဍဲခေတ်ဏံ ဂကူမန် ဂွံသှေ်အာဂှ် ဒးဇြိုၚ်စိုတ်ကွေံကွေံရ။ ဇၟာပ်ပ်အရာယုတ်ဒေက်မံၚ်ဂှ်တုဲ၊ ပညာလေဝ်ဟွံမွဲ၊ ပိုန်ဒြပ်လေဝ်ဟွံမွဲ၊ ကွတ်လေဝ်ဟွံမွဲ၊ လညာတ်လေဝ်ဟွံမွဲ၊ စိုတ်ဓါတ် ဆာန်ဂကူ ဘာသာသာသနာလေဝ်ဟွံမွဲ၊ လက်သန်ဂွံဒှ်ဂကူခိုဟ်တအ်ဂှ် မွဲသာ်ဟွံမွဲမဂး သွက်ဂွံဒးဒုၚ်ၚိတ်ကဵုဂကူညးတၞဟ် တအ်ဂှ် ပဲါဟွံဗၠးဟေၚ်ရ။
ကောန်ဂကူပိုဲတအ် သစ္စလတူဂကူ၊ သစ္စလတူတၞောဝ်ဒတောဝ်ဇုဇဗဴလ၊ သစ္စလတူတိဍာ်ပဒေသအပိုၚ်အခြာပယျဵုဒၞက်၊ သစ္စလတူပိုန်ဟာန်ဒြပ်ရတ်အာဲတၟာဲတအ် ဟိုတ်နူအောန်လောန်ဂှ်တုဲ တ္ၚဲဏံ အန္တရာဲဂကူကၠက် ကြပ်ဒးဆဵုဂဗမံၚ်ကွေံကွေံရ။ တိဍာ်ဒၞာဲကောန်ဂကူပိုဲတန်တဴ ညံၚ်ရဴနွံမံၚ်ဍောတ်ဓဝ်ဂှ်ကီု၊ လၟိဟ်ကောန်ဂကူပိုဲဂှ်လေဝ် သှေ်မံၚ်ဟွံဂၠိုၚ်ကွေံကွေံရ။ ဗၟံက်ဂၠံၚ်ကာ ကရေၚ်ဟွံကဵုဗက်အကံက်၊ ပလိုတ်ဂၠံၚ်ကာ ဗၟာဟွံကဵုအာ ကေၚ်ဒှ်ကၠုၚ် မိၚ်ဒးစိုတ်ဍောတ် ဍာ်ရမတ်ဓဇူ။ ဂကူမန် လုပ်မံၚ်ပ္ဍဲ ဒပ်ပၞာန်ဗၟာတအ် နွံမံၚ်ကြပ်ၜိုတ်ကဝက် အခိၚ်ပုန်မံၚ်ကဵုရဲသၠဲတိတအ်ဂှ် ဗန်တဲတုဲ မၚ်ဗဵုမံၚ်ကံကုသဵုမန်၊ “ဗၟာခိုဟ်စ ဂကူ မန်ခိုဟ်စကီု” ညးတအ်ဒုၚ်ဂိုၚ်ကေတ်လဝ်လညာတ်သာ်ဂှ်တုဲ ဂကူပိုဲဒးလဇုဲလလုဲအာနူကဵုဂကူတၞဟ်ဟ်တအ်ရ။ ဂကူမန် ကဵုဂကူဗၟာတုပ်ပ်ရ ၜိုန်ရဒးဒုၚ်ဟီုပတောအ်သာ်ဏံကီုလေဝ် ဆဂး ညးတအ်ဒုၚ်မာန်မံၚ်အိုတ်ဖိုဟ်ဏီရ။ လညာတ်ဗဳဇသစ္စ၊ ဇာတိသစ္စ၊ ကုလသစ္စ၊ ဒေသသစ္စ ဂွံမၚ်မွဲဂကူတိဍာ်ဍုၚ်ဇကု တၟာဒဳရုဲဟွံမွဲအိုတ်ရ။ ဂွံဗက်လကြဴဗၟာတှေ် ညံၚ်ကဵုသာမံၚ်အိုတ် အစောန် ဟိုတ်နူလညာတ်ကွေတ်ဗၠေတ်တ်သာ်ဝွံဂှ်တုဲ တ္ၚဲဏံ ပိုဲဂကူတအ် ကြပ်ဒးဆဵုဂဗမံၚ်ကဵုကပ်ဂကူကၠက်ရ။
လညာတ်ပရေၚ်ဍုၚ်ကွာန်ကောန်ဂကူပိုဲဂှ်လေဝ် ဒးဒုၚ်ၚိတ်အာကဵု ဗော်ပရေၚ်ဍုၚ်ကွာန်ဂကူကိုဝ်လိုဝ်နဳဗၟာတအ် ကြပ်အိုတ် မံၚ်ရ။ လညာတ်ဂွံမၚ်မွဲဂကူ၊ လညာတ်ဂွံမၚ်မွဲတၞောဝ်ဒတောဝ် ညံၚ်ရဴတၚ်ယၟုမန်တအ်ဂှ်လေဝ် သှေ်မံၚ်ဟွံဂၠိုၚ်ရ။ ကောန်ဂကူ မန်ပိုဲ တၚ်ယၟုဗၟာကဵုတၚ်ယၟုမန်ဂှ် ညးဂှ်ဂၠိုၚ်ရော ၜတ်ကၞာတ်ရံၚ်မဂး ဒဒှ်ရယၟုဗၟာဂၠိုၚ်ဂှ် ညာတ်ကေတ်မာန်ဂှ်တုဲ ဣဏံဂှ် လညာတ် မၚ်မွဲတၞောဝ်ဒတောဝ်ပိုဲ၊ ဂကူပိုဲ ဒးဒုၚ်ၚိတ်မံၚ် နကဵုယေန်သၞာၚ်ဘာသာဗၟာတအ်ဇၞော်ဇၞော်ဂှ် ညာတ်ကေတ်မာန်ရ။ ပ္ဍဲလိက် ကာတ်ဒှ်ကောန်ဍုၚ်တအ်ဂှ် ယဝ်ရစၟဳစၟတ်ရံၚ်မဂး ကောန်ဂကူပိုဲတအ် တၚ်ခုတ်လဝ်ယၟုဗတ်မန် အောန်မံၚ်ရောၚ်ဂှ် လဝဲါဂှ်တီကေတ်မာန်ရ။ က္ဍိုပ်သကိုပ်မန်ပိုဲတအ် ချူလိက်မန်ဒးခံၚ်ၚ်တအ်ဂှ် ဂၠာဲဝါတ်မံၚ်အိုတ်အစောန်ရောၚ်ဂှ် ညးတီအဲတီရ။ ယၚ်ဝွံဂှ်လေဝ် ဒှ်အရာသာသ္ပအ် ပ္ဍဲအရာမၚ်မွဲလိက်ပတ်ဂကူဇကုဇၞော်ဇၞော်မွဲရ။ ပ္ဍဲကဵုဗွိုၚ်ဂကူမန် မချူမံၚ်ပ္ဍဲလာၚ်တအ်ဂှ်လေဝ် စကာလိက်မန် အောန်မံၚ်ကွေံကွေံဂှ်တုဲ ဗွဲမဂၠိုၚ် လိက်ဗၟာသၟးဂၠိုၚ်ရ။ ညံၚ်ရဴက္ဍုဟ်ကြုက်တုဲ ရာန်မံၚ်ကပေါတ်ဍုၚ်ကြုက်ဂှ်ကီု ညးတအ်ဟီု ညးတအ်က္ဍုဟ်မၠေံဗၟာတုဲ စကာမံၚ်ဘာသာဗၟာ ကရိုက်စိုတ်ဖိုဟ်ရောၚ်။ ဝါဒိတေံ ပၠန်ဂတးမန်ဂှ် ၜိုန်ရချဳဒရာၚ် မံၚ် အကြာဍုၚ်မတ်မလီုကီုလေဝ် တ္ၚဲဏံ စိုပ်မံၚ်တၞုၚ်တၞးပစ္စန္တရးမုဟ်ဂၠဴခၟူဂစေံတေံရောၚ်။ ဓဝ်သစ္စပန် မဒှ်ဇုတ်ဓရံၚ်ကောန်ဂကူ မွဲမွဲ သွက်ဂွံတန်တဴအဓါန်မဂၠိၚ်သ္ၚောဲဂှ် ဟုတ်ယုတ်စှေ်ကၠုၚ်မံၚ်ဇၞော်ဇၞော် ပ္ဍဲဂကူပိုဲမဂး အရာဝွံ ကလိဂွံအဓိပဲါ ဂကူပိုဲ စိုပ်မံၚ် ပ္ဍဲအရံၚ်သာ်လိမဴရောၚ်။
ဓဝ်သစ္စပန်လတူဏံ ယဝ်ရဂကူမန်ပိုဲ ဟွံမၚ်မွဲခိုၚ်ၚ်ကၠိုက်က်မဂး သွက်ဂကူပိုဲ ဂွံကၠက်အာနူလိုက်လောကဏံဂှ် ဟွံဝါတ် ရောၚ်။ ဂကူမန်ပ္ဍဲဍုၚ်သေံ ကၠက်အာတုဲရောၚ် ဟီုမာန်ရ။ ဂကူမန် အာကၠောန်စဍုၚ်သေံတအ် အာမ္ၚုဟ်ညးတအ်လေဝ် ညး တအ်ဟွံၚုဟ်ကတဵုကၠုၚ်၊ နကဵုဗီုပြၚ် ဂကူမန် မတၟေၚ်တၞဟ်ခြာနူဂကူသေံ ညးတအ်ဟွံမံက်တိုန်ကၠုၚ်ဏီဖိုဟ်မဂး ဂွံစၟဳစလတူ ညးတအ်ဂှ် ဒှ်ဟွံမာန်ဂှ်တုဲ ဒးဟီုစ ညးတအ်ကၠက်အာတုဲရောၚ်။ ပ္ဍဲဍုၚ်သေံ ဇြဟတ်ဓဝ်သစ္စပန်ဂှ် မွဲသာ်ကီုလေဝ် ခိုၚ်ၚ်ကၠိုက်က် ထ္ၜးဟွံမာန်ရ။ နကဵုဒေသသစ္စမွဲ ညးတအ် မၚ်မွဲလဝ်တိဍာ်ဂကူမန် ဗွဲတၞဟ်ခြာလေဝ်ဟွံမွဲ၊ သၟေဟ်ပိပြကာဂှ်လေဝ် ဟွံမွဲပၠန်မဂး ဂွံစၟဳညးတအ် ဂွံကလေၚ်မံက်ဂတဝ်ကၠုၚ် နူဘဝမကၠေံကၠက်ဂှ် စၟဳဟွံဂွံသက်က်ရ။ ညးတအ်ကၠက်အာဂှ် လောန်ကၠုၚ်သၞာံ ဟွံလအ်ဂှ်တုဲ ဒးဟီုစ ညးတအ်ကၠက်ထ္ၜး ဂတမတ်ပိုဲရောၚ်။
တုဲပၠန် ညးတအ်သၟးရကၠက်မာန် ပိုဲဂကူမန်တအ်ရော ကၠက်ဟွံမာန်ဟာ ယဝ်ရသၟာန်ရံၚ်မဂး ဒုၚ်သဇိုၚ်ကဵုဓဝ်သစ္စပန်ဂှ်တုဲ ယဝ်ရဒးဟီုမဂး ခြာဟွံလအ် ကၠက်မာန်ရောၚ်။ လညာတ်ဒုၚ်ဂိုၚ်ကေတ်ကောန်ဂကူပိုဲ ပ္ဍဲခေတ်ဏံဂှ်လေဝ် ဟိုတ်နူဍေံဟွံ တုပ်ကဵုဗီုပြၚ် အခိၚ်အေဿရေတအ် ဂစာန်လွဳပရာ ဂွံဒက်ပတန်ဍုၚ်ကီု၊ ဍေံဟွံတုပ်သၟဟ်ကဵု ဗီုဂကူရခေၚ်တအ် ဂစာန် လွဳပရာ ဒုၚ်ဂိုၚ်ကေတ်ကီုဂှ်တုဲ အန္တရာဲကၠက်ဂှ် နွံမံၚ်ဟွံဍောတ်ရ။ ဗွဲတၟေၚ် လညာတ်ပရေၚ်ဍုၚ်ကွာန်ဂကူမန်ပိုဲတအ်ဂှ် ဒးဒုၚ် ၚိတ်လဝ်ဂှ်တုဲ အန္တရာဲသွက်ဂွံကၠက်ဂှ် ဍေံထ္ၜးမံၚ်သက်သဳရ။ လညာတ်ပရေၚ်ဍုၚ်ကွာန်ကၠက်အာတုဲမဂး သစ္စပန်သာ်တအ်ဂှ် လေဝ် ကၠေံဏှၚ်အာလောဲလောဲမာန်ဂှ်တုဲ လညာတ်ပရေၚ်ဍုၚ်ကွာန်ဂှ် ဒှ်အဓိက ပ္ဍဲအရာမၚ်မွဲဂကူ ညံၚ်ဟွံဂွံကၠေံကၠက်ရောၚ်။ က္ဍိုပ်သကိုပ် သီုညးတၠဓနဂကူဂျူတအ် ကၠဟ်ဍုၚ်ဇၞော်ဇၞော် ညံၚ်ရဴ ဍုၚ်ရာတ်သာ၊ ဂျာမနဳတအ်တုဲ အာပတန်ဍုၚ်အေဿရေ မဍောတ်သွတ် မနွံကဵုအန္တရာဲပန်ကၠၚ်ဒစာံဒိုဟ်ဂှ် သွက်ဂွံကလေၚ်မၚ်မွဲ ဒေသသစ္စရောၚ်လေဝ် ဟီုမာန်ရ။ အခိၚ်ကာလညး တအ် အာမံၚ်တန်တဴမံၚ် ပ္ဍဲဍုၚ်ညးတၞဟ်တအ်ဂှ် ၜိုန်ရသိုက်သၠိၚ်မံၚ်ကီုလေဝ် ဆဂး မွဲတ္ၚဲဟွံသေၚ်မွဲတ္ၚဲ အန္တရာဲညးတအ် ဇၞော်ဇၞော်နွံမာန်ဂှ် ဝါဒိတေံ ညးတအ်ဟွံတော်ဆလဝ်ရ။ ကၞောတ်တဲ သွက်ကောန်ဂကူညးတအ် ဂွံဂျိုၚ်တန်တဴအာ အဓါန်ဇ မၠိၚ်မာန်ဂှ် ဍုၚ်တၞဟ်ဟ်တအ်ဂှ် ၜိုတ်ဒေသတိဍာ်ဍုၚ်ညးတအ်အပိုၚ်ဂှ် ဂီုကၠီုဟွံမွဲရောၚ်ဂှ် ညးတအ်ညာတ်အာဂှ်တုဲ အကြာဒ ဒိုက်မဇၞော်လောန်ဂှ် နကဵုစိုတ်ချိုတ်တိပိုၚ်ဂျိုၚ်က္ဍိုၚ်ဗတာၚ်ဂှ် ပတန်ကၠုၚ်ဍုၚ်အေဿရေရောၚ်။ ကောန်ဍုၚ်အာယှတအ် မိပ်လ ဟိၚ်ကဵုဍုၚ်အမေရိကာန်တုဲ “ညာတ်ကေတ်လဝ် နဒဒှ်ကၟိန်ဍုၚ်ညးဒဒိုက်ဒဴပၞာန်” ဂှ် တ္ၚဲဏံ ညးတအ် ဒးဒုၚ်ဍဵုဍိုက်ကဵု ဂကူဗု ဗုတအ် ဗၞတ်ဒးရးရောၚ်။ မံၚ်ပ္ဍဲအမေရိကာန်ဂှ် ဂီုကၠီုဟွံမွဲရောၚ်ဂှ် ကၠိုဟ်ကၠုၚ်စိုတ်အိုတ်ရ။ ဂွံဒှ်ကောန်ဍုၚ်အမေရိကာန် ကေတ်ဂုန်စရာဲဇၞော်ဇၞော်ဂှ် တ္ၚဲဏံ လညာတ်ဂှ် ဒးဒုၚ်စမ်ၜတ်ကၠုၚ်ဍာ်ဇြိုဟ်ဍာ်ဍာရောၚ်။
ကောန်ဂကူပိုဲတအ် အခိၚ်တ္ၚဲဏံ ဂွံမိၚ်ကေတ်ဂလာန်သကာတ်သကာတ်မြဟ်ဟ် မဂပ်ဝ်စံၚ်တူပူမှ်ဂၠမ်စိုတ်လောန် မတွံဂး “ ဒှ်ဂကူမန် ဂွကွေံလောန်” ဂှ်ရ။ ဂကူမန် မဒးဒုၚ်ၚိတ်ကဵုဂကူဗၟာတအ် ဗွဲတၟေၚ် စပ်ကဵုလညာတ်ပရေၚ်ဍုၚ်ကွာန်ရ။ ဂကူမန် မဗက်လကြဴဗော်ပရေၚ်ဍုၚ်ကွာန်ဗၟာ ကော် ဗော်မြာ်၊ ဗော်အံၚ်ဆာန်စုကျဳတအ်ဂှ် ကြဴနူညးတအ်ဒးဒုၚ်သီအဝဵုကဵု ဒပ်ပၞာန်ဗၟာနာဲ မေန်အံၚ်လှာၚ်တအ်တုဲ ဟိုတ်နူဗော်ပရေၚ်ဍုၚ်ကွာန်မန် ကော် ဗော်ညဳသၟဟ်ဂကူမန် (Mon Unity Party)တအ် ဗလး ညးစၞးၜါတၠ အမာတ်နာဲဗညာအံၚ်မောဝ်ကဵု အမာတ်နာဲလျးတၟး ဂွံလုပ်ကေတ်တာလျိုၚ် ပ္ဍဲကံၚ်သဳအုပ်ဓုပ်ပၞာန် ပ္ဍဲအဆံၚ်ကၟိန် ဍုၚ်ကဵုတွဵုရးဍုၚ်မန် ကရောံဗော်ပရေၚ်ဍုၚ်ကွာန်ကောန်ဂကူရခေၚ်တအ် မွဲစွံဂှ်တုဲ ညးတအ် ထေဲအိုတ်ဍာ်ရ။ ၜိုန်ရဗော်ပရေၚ် ဍုၚ်ကွာန်ဟွံတုပ် ဒုၚ်ဂိုၚ်ကေတ်ပရေၚ်ဍုၚ်ကွာန်ဟွံတုပ်ကီုလေဝ် ထ္ၜးဟိုတ်ညးတအ်ဂကူမန်ဂှ်တုဲ ညးတအ်ဟီုပါ်ပဲါ ကုညး စၞးဂကူမန် ဗော်သ္ပစၞးဂကူမန်ဂှ် မွဲဒကေဝ်ဟွံတာန်ရ။
ဂကူမန် မပါလုပ်လပါ်ဗော်အံၚ်ဆာန်စုကျဳတအ်ဂှ် ဒှ်ဂကူမန် မဒစဵုဒစးကဵုပရေၚ်ဍုၚ်ကွာန်မန်သၟးဟွံက သီုဒစဵုဒစးကဵု ပရေၚ် ကူမန်နာနာသာ်အိုတ်ကီုရ။ ဟိုတ်နူလညာတ်ပရေၚ်ဍုၚ်ကွာန်ညးတအ် စိုပ်အာသကေံတဲဗော်မြာ်၊ မံၚ်အာသၟဝ်တဲဗော်မြာ်ဂှ် တုဲ ဒတဴလိုၚ်ညးတအ်ဂှ်၊ ကမၠောန်ညးတအ်ဂှ် ဟွံတၟေၚ်တၞဟ်ခြာနူကဵုဂကူဗၟာ မစှေ်စိုတ်ကဵုဗော်မြာ်တအ်ဂှ်ရ။ တိၚိတ်ဂှ် ဂကူ ဟွံကၠက်၊ ဗၟာၚိတ်ဂှ် ဂကူမန်ကၠက်ရောၚ်ဟီုဂှ် ဒၞာဲဝွံ ဂွံညာတ်ကေတ်ကၠးကၠးရ။ ညးတအ်ဂှ် ဒှ်ဂကောံဇြဟတ် သွက်ဂွံကလက်ဂ ကူမန်ရောၚ်ဟီုဂှ် ပြဝလဟီုညးတအ်၊ လညာတ်ညးတအ်၊ ဒုၚ်ဂိုၚ်ကေတ်ညးတအ်ဂှ် ထ္ၜးမံၚ်သက်သဳပေၚ်ၚ်ရ။ နကဵုအရေဝ်ပ ရေၚ်ဍုၚ်ကွာန် မၞိဟ်တအ် တီကၠိုဟ်ဂၠိုၚ်ဂှ် ပသာ်ရောဟီုမဂး “မန်တဝ်မုဲ” မဒှ်ရ။ မၞိဟ်ပါ်ပဲါပရေၚ်ဍုၚ်ကွာန်မန် ပပ်ပ်ပဳပဳတအ်ဂှ် ဒှ်မန်ကေတ်စလပါ်ဗၟာတအ်ဂှ်တုဲ “မန်တိဇြိုၚ်၊ မန်ပၠေၚ်ပုၚ်၊ မန်ပၠေၚ်ဍုၚ်မန်၊ မန်ဖံက်သစ္စလတူဂကူ၊ မန်တၠိၚ်ဂုန်ဂကူ”ရောၚ်ဂှ် သၟိတ်ကော်ခဴမာန်ရ။ ပရေၚ်ဍုၚ်ကွာန်မန် ညံၚ်ဂွံဒတုံဗၚ်ဂှ် လၟိုန်ကာလဟိုတ်နူညးတအ် ဂစာန်လွဳပရာမံၚ်ဂှ်တုဲ ညးတအ်ဂှ် ဒှ်မၞိဟ် “ဓရိုဟ်ဖျေံမန် ညံၚ်ဂွံဒတုံဗၚ်”ရောၚ်။
အခိၚ်ကာလပေဲါရုဲမာဲမဂး ညးတအ်ဟီုအရေဝ်မန် ကျိုၚ်ကယျိုၚ်မန်တုဲ နကဵုရန်တၟံမိက်ဂွံလီမာဲဂကူမန်တုဲ စှေ်ပရေၚ်စန်ဒက် အိုတ်ရ။ ဟိုတ်နူမိက်ဂွံလီမာဲဂကူမန်ဂှ်တုဲ ညးတအ်ဂှ် ဒှ်မံၚ်မၞိဟ်ဖံက်သစ္စလတူဂကူ၊ လတူပရေၚ်ဍုၚ်ကွာန်မန်တုဲတုဲရောၚ် ဟီု မာန်ရ။ ဂကူဗၟာ သၟာပရေၚ်ဍုၚ်ကွာန်ဗၟာဇေတ်တ်ဂှ် ဟိုတ်နူလီဂကူမန်ဟွံဂွံဂှ်တုဲ ဗလးညးတအ်ကဵုလီဂှ်တုဲ ညးတအ်ဂှ် ဒးသ္ပစၞး ဗၟာတအ်တုဲ ဒးလီဂကူမန်ဂှ် ပရေံနူကဵုစာၚ်ကဝေၚ် ပူကဝေၚ် ဂစေံကဝေၚ်တအ်ဏီရ။ ဂကူမန် တၞောဝ်မန် တိဍာ်မန် ဂွံ လေၚ်ဒိုက်ဇၞော်ဇၞော်မာန်ဂှ် ဟိုတ်နူညးတအ် ဂစာန်လွဳပရာမံၚ်ဂှ်တုဲ “ဗဳဇသစ္စ- သစ္စဒးမၚ်မွဲတၞောဝ်ဒတောဝ်မန်” ဂှ်လေဝ် ညးတအ် ဖံက်ပကဝ်ကၠေံပၠန်ရ။ တိဍာ်ဍုၚ်မန်ပိုဲ ညံၚ်ဂွံစိုပ်အာ ပ္ဍဲသၟဝ်အုပ်ဓုပ်ဗော်မြာ်တအ်မာန်ဂှ်လေဝ် ညးတအ်ဖန်ဖက်မံၚ် ပၠန်ဂှ်တုဲ “ဒေသသစ္စ- ဓဝ်သစ္စ ဒးမၚ်မွဲတိဍာ်ဍုၚ်မန်” ဂှ်လေဝ် ညးတအ် ပလီုပလာ်ကၠေံပၠန်ရ။ ကာလဗော်မြာ် ဗော်ဗၟာညး တအ် ဒးဒုၚ်သီအဝဵုဂှ် ဒၟာနူကောန်ဂကူမန် ဗော်ပရေၚ်ဍုၚ်ကွာန်မသ္ပလဝ်စၞးဂကူမန်တအ် ဟွံရီုဗၚ်ညးတအ်ဂှ်တုဲ ညးတအ်ဟီု လက်ချဴ “ဒှ်ဂကူမန် ယုတ်သဝ်လောန်” ပၠန်ဂှ်တုဲ သစ္စၜိုတ်နွံဂှ် ညးတအ် ဖံက်ဏာလဝ်ဖအိုတ်ရ။
ကောန်ဂကူမန်ဍာံမဂး တ္ၚဲလဵုမွဲလေဝ် ဒစဵုဒစးကဵုဂကူမန် ဟွံဂွံ၊ တရဴစးကဵုဂုန်ဖဵုဂကူမန် ဟွံဂွံ ၊ ပလီုပလာ်သိက္ခာဂကူမန် ဟွံဂွံ၊ ဗဒေက်ဖျဝ်ဂကူမန်ဟွံဂွံ၊ ဟီုဗျိပတိုန်ဒုဟ်ဂကူမန်ဟွံဂွံ၊ လိုန်ထၞိက်ဂကူမန်ဟွံဂွံ။ သွက်ဂကူမန်ဂွံရာၚ်ဆာဲ ဂွံခိုဟ်စ၊ ဂွံနွံကဵုစ ရာဲကျာ်သြဳ ပ္ဍဲအဒေါဝ်ဂၠးတိဂှ် လၟိုန်န်ကာလ ဒးသ္ပလွဳပရာတုဲ ဒးဆာန်ဂကူ ဒးပူဇဴလမျီု၊ ဒးသ္ပဒဒန်ရောၚ်။ ယဝ်ရမိက်ဂွံဒှ် တြုံဗြဴနွံကဵုကျာ်သြဳဍာံမဂး ဂၠံၚ်တရဴဗောဓိသတ်ဂှ် ဒးကွာ်ဗက်လၟိုန်ဂှ်တုဲ ဗီုဗောဓိသတ်ဆာန်ဂကူ ဒုၚ်ဂိသွက်ဂကူတအ်ဂှ် ဇ ကုလေဝ် ဒးကၠောန်သ္ပသာ်ဂှ်ကီုရောၚ်။ ဆဂှ်သၟးဟွံက ကာလကျာ်တြဲ ဒှ်ဘဝကျာ်အတုလအတုလံ ဟွံမွဲကဵုကိလေသဂှ်လေဝ် နဒဒှ်ဝတ်တြုံမပြဲမွဲ ညးတာဒၞာမံၚ် ဂကူသာကျဝၚ်ညးဏီရောၚ် ဟွံသေၚ်ဟာ။ ပူဂဵုဟွံဆာန်ဂကူ ဟွံသၠးဂုန်ဖဵုဂကူတအ်ဂှ် ညးလဵုမွဲ တိုန်ဒှ်ဇၞော်ညးမာန်ကီုရော။ ပူုဂဵုဝိုတ်တၠိၚ်ဂုန်ဂကူတအ်ဂှ် ပ္ဍဲဘဝဏံသၟးဂှ် ကျာ်သြဳပၠိုတ-်မံၚ်တုဲတုဲရောၚ်။ ဒှ်ဇမၞော်ညး ညံၚ်ရဴနာဲထေန်ကျဝ်တအ် ၜိုန်ဒှ်သမ္မတကီုလေဝ် ဟိုတ်နူဂကူညးတၞဟ်တအ် ခါန်ကၞက်ပတိုန်လဝ်ဂှ်တုဲ ကျာ်သြဳ ကီု အဝဵုကီု အောန်ကွေံကွေံရ။ ဆအယာံမာတ်သမ္မတကောန်ရုပ်ဆုရောၚ်ဂှ် ညာတ်ကေတ်မာန်ရ။ ဝန်ဇၞော်နာဲသက်လောန် ဂှ်လေဝ် တုပ်သာ်ဂှ်ကီုရ။ ကောန်ဂကူဇကု သ္ပရှေ်သှေ်ရဴဂဴလေဝ်ဟွံမာန်၊ အကြာဂကူညးတၞဟ်တအ်ဂှ်လေဝ် မုက်မတ်ဟွံယးရ။ ဟိုတ် နူညးတအ် ဗက်လကြဴဗော်ဗၟာ ဗော်မြာ်တအ်ဂှ်တုဲ ကာလညးတအ် ဒးကလှ်စှေ်အာနူအဝဵုဂှ် အကြာဂကူညးတအ် ညးတအ် ဒးဒုၚ်တးပါဲလဝ်ဝိုၚ်ရောၚ်။
ပ္ၚံက်လဵုစိုပ်ပ် ကရေပ်လဵုစိုပ်ပ် တၞောဝ်ဒတောဝ်မန်ဇကု၊ ဂကူမန်ဇကုဂှ် ကၠဟ်ထောံဟွံဂွံဂှ်တုဲ ယဝ်ကၠဟ်ထောံကၠေံမဂး ဒှ်မၞိဟ် အောန်ကဵုကျာ်သြဳ အောန်ကဵုဣဒ္ဓိဗလရောၚ်။ ဇကုဒှ်ဂကူမန်တုဲ ယဝ်ရအာကၠောန်မံၚ် ပ္ဍဲဂကောံဂကူညးတၞဟ် မဟွံသေၚ်ကဵုဂ ကောံဂကူဇကုမဂး ဟိုတ်နူဂၠံၚ်တရဴဗၠေတ်အာနူ ဓဝ်ဒးမၚ်မွဲဂကူ၊ ဒးမၚ်မွဲတၞောဝ်ဒတောဝ်ဂှ်တုဲ တၠပညာတအ်ဟွံထိုၚ်သးတုဲ ဒးဒုၚ်ဟီုဂရိုဟ်မာန်ရောၚ်။ ပ္ဍဲပ္ၚံက်အလန်ဏံ ကောန်ဂကူမန် မဟီုလက်ဆဴဂကူမန် ဟိုတ်နူလညာတ်ပရေၚ်ဍုၚ်ကွာန်ဂှ် နွံဂၠိုၚ် လောန်ဂှ်တုဲ ပ္ဍဲဂကူမွဲမွဲ ဍုၚ်မွဲမွဲ ယဝ်ရမၞိဟ်ဖံက်သစ္စသာ်ဂှ်ဂှ် နွံဂၠိုၚ်မဂး ဂကူဂှ် ဍုၚ်ဂှ် သွက်ဒးဒှ်ဍိက်ကိုဝ်လိုဝ်နဳညးတၞဟ် ဒဵုကဝ် တန်ကဝ်တူမာန်ရောၚ်။ ရဲလျောဝ်ဗက် လပါ်ဂွံဒှ် ဂွံဒုၚ်ဂိုၚ်ကေတ် နဒဒှ်ဂကူဗၟာတအ်ဂှ် ဒှ်မၞိဟ်ဒးဒုၚ်ၚိတ်ကလက်ကီု၊ သီုၚိတ်က လက်ဂကူမန်ဂှ်တုဲ ညးတအ်ဂှ် ဒှ်မၞိဟ်မဂစာန်လွဳပရာ ညံၚ်ဂကူမန် ဂွံဒှ်ဍိက်ပၠက်ညးတၞဟ်၊ ဒှ်မၞိဟ်ပံၚ်သွံစဍုၚ်မန်ရောၚ် စၟတ်သ မ္တီမာန်ရ။ ညးတအ်ဂှ် ဒှ်မၞိဟ်နွံကဵုလညာတ် “ဂကူမန်ကဵုဗၟာတုပ်ပ်” ရောၚ်ဂှ်တုဲ အန္တရာဲဂကူပိုဲဇၞော်လောန်ရ။
ကောန်ဂကူပိုဲမန်တအ် လညာတ်ဆာန်ဂကူ လညာတ်မၚ်မွဲဂကူ လညာတ်ဆာန်တိဍာ်ဍုၚ်မန် လညာတ်မၚ်မွဲတိဍာ်ဂကူမန် အောန်ဂှ်တုဲ ဂကူဇကု ဒှ်အာဂကူတၞဟ်၊ တိဍာ်ဂကူဇကု ဒှ်အာတိဍာ်ဂကူတၞဟ်တအ်အိုတ်ရ။ ဒှ်အာဍိက်ညးတၞဟ်တအ် မွဲတၠတုဲ မွဲတၠ ဂွကဵုညးဂၠးတိတအ်လောန်ရ။ ဗဳဇဇကု ဂကူဇကု ဒးဒုၚ်ၚိတ်တုဲမဂး တိဍာ်ဒေသဇကုလေဝ် အဝ်တဝ်မေတေတ် ဒးဒုၚ် ပၠံၚ်ၜးဏာဂှ်တုဲ ဓဝ်သစ္စပိသာ်ပန်သာ်ဂှ်လေဝ် လေၚ်ဒိုက်အာ မွဲသာ်ဟွံသှေ်ရ။ ဟိုတ်နူဒှ်အာဂကူဟွံမွဲကဵုဓဝ်သစ္စပန်သာ်ဂှ်တုဲ ဂွံကလေၚ်ဗၠးၜးမွဲဝါပၠန်ဂှ် လ္ပဟီုဏီ ညံၚ်ဟွံဂွံကၠေံကၠက်အာနူဂၠးတိဏံဂှ်လေဝ် ဟွံဂံၚ်ဒုၚ်လျိုၚ်ရ။ ပိုဲဂကူမန်တအ် အခိၚ်ဏံ စိုပ်မံၚ်ဍာ်ဏံရောၚ်ဟွံသေၚ်ဟာ။ တိဍာ်ဍုၚ်မန်ဂှ် ၜိုန်ရဍောတ်သွတ်လောန်ကီုလေဝ် အပ္ဍဲဂှ် တိဍာ် ပွိုၚ်ဍုၚ်ဒှ်အာဂကူဗၟာတအ်ဂှ် ၜိုတ်ကဝက်နွံပၠန်ဂှ်တုဲ အကာဲအရာဂကူပိုဲဂှ် စိုပ်မံၚ်ဍာ်ဒစိတ်ရောၚ်။
ဇြဟတ်ပရေၚ်ဍုၚ်ကွာန်ဂကူမန်ဂှ် ဂွံပြိုၚ်ပကာန်ပေဲါရုဲမာဲတုဲ ဂွံဇၞးမာဲဂၠိုၚ်ၚ်တုဲ ဂွံကေမ်္ၚာပ်တွဵုရးဍုၚ်မန်ဂှ် ဒှ်ကၠုၚ်ဟွံမာန်ရ။ ဇြဟတ်ပရေၚ်ပိုန်ဒြပ်ဂကူမန်ဂှ်လေဝ် ပ္ဍဲတွဵုရးဍုၚ်မန်ဂှ် ပြိုၚ်ပကာန်ကဵုဂကူတၞဟ် မနွံမံၚ်ပ္ဍဲဂှ်ဟွံမာန်ပၠန်ရ။ မူဇြဟတ်မွဲကီု ပြိုၚ်ပ ကာန်ဟွံမာန်မဂး သွက်ဂကူပိုဲ ဟွံဒှ်လက်သန်ကၠက်မဂး မူလက်သန်မွဲ မဒှ်ဂှ်ရော။ မန်နွံပ္ဍဲဍုၚ်သေံဂှ် ထ္ၜးဏာသက်သဳကဵုပိုဲ ဂ တမတ်တုဲရောၚ်ဟွံသေၚ်ဟာ။ မန်ဍုၚ်သေံ ၜိုတ်ဏံဟွံဟီုကၠက်မဂး ၜိုတ်လဵုမှ ဂွံဟီုညးတအ်ကၠက်ဂှ်ရော။ ပွိုၚ်ဍုၚ်ကျာ်ထဝ်၊ ၜဳသြေၚ်၊ အပံၚ်၊ တကအ်ခၟိုိၚ်၊ မတ်မလီုတအ်ဂှ် မန်တအ် ပြိုၚ်မာဲဟွံဇၞးဂှ် မူကလိဂွံအဓိပဲါရော၊ ပရေၚ်ဍုၚ်ကွာန်မန် ကၠက်အာ ရောၚ်ဟွံဂံၚ်ဟီုဟာ။ ကျာ်ထဝ်၊ ၜဳသြေၚ်၊ မတ်မလီုတအ်ဂှ် ဗီုလဵုပြိုၚ်ၚ် ဇၞးဟွံမာန်မဂး ဒးဟီုစကၠက်အာပေၚ်ၚ်ရောၚ်။ ပွိုၚ်ဍုၚ် ပိုဲဇၞးမာဲဍာံဍာံဂှ် ပွိုၚ်ဍုၚ်လဵုဟွံမွဲရောၚ်ဂှ်တုဲ နကဵုပရေၚ်ဍုၚ်ကွာန် အခိၚ်ဟွံရုဲ ဒးဒုၚ်စမ်ၜတ်မံၚ် ကၠက်ကဝက်၊ ဟွံကၠက်ကဝက် ရောၚ်။ ဂတဏံ ၜိုတ်စှ်သၞာံပၠန်မဂး ဇၟာပ်ပ်ပွိုၚ်ဍုၚ် ကျမာဲဖအိုတ်မဂး နကဵုပရေၚ်ဍုၚ်ကွာန်ဂှ် ဒးဟီုစဂကူမန်ကၠက်အာရောၚ်။ နကဵုပရေၚ်ဍုၚ်ကွာန် ကၠက်အာတုဲမဂး ကံကုသဵုဂကူမန်အနာဂတ်ဂှ် မ္ၚးနူဒးလၚ်ဇွောဝ်ဍာ်ရမတ်တုဲ မူပဂွံဏီဂှ်ရော။
crd အအာ