ယူနဳခတ် Unicode ဂှ်ပြံၚ်သၠာဲသုၚ်စောဲအိုတ်ညိမန်

 

ယူနဳခတ် Unicode ဂှ်ပြံၚ်သၠာဲသုၚ်စောဲအိုတ်ညိမန် 🙏🙏🙏 (လၞုဟ်ဗှ်လိက်မ္ဂးတှ်ေ လ္ပလုပ်ဗှ်ညိ) မ္ၚဵုသၞာံတၟိ (2021)ရအဴကောန်ဂကူမန်တအ်။ တုဲအာမွဲသၞာံပၠန်ရတှ်ေ ကောန်ဍေၚ်လုပ်သၞောဝ်ဂၠးတိ ကော်စ Unicode ဂှ် လၟိဟ်ကောန်ဂကူမန်ပိုဲ တၠပညာမန်ပိုဲ သၟတ်မန်ပိုဲတံသီုညးဖအိုတ်ဂှ် ပြံၚ်သၠာဲသုၚ်စောဲဒှ်ကၠုၚ်ယူနဳခတ်တၟာဂလိုၚ်ကီုရဟာ။ 🔻 ဟိုတ်ဒှ်သာ်ဂှ်တုဲ တ္ၚဲဏံ ဗၟာတံသ္ပထောံ အဝ်တဝ်မိတေတ်(automated)ကောန်ဍေၚ်ဇြဝ်ဂျဳကဵုယူနဳခတ်ကောန်ဂကူဍေံတံဂွံဗှ်ဒှ်မွဲမူတုဲ သွက်လိက်မန်ပိုဲတှ်ေ သာ်လဵုလေဝ်ဟွံပြေပြံၚ်တုဲ ဇၟာပ်ညးအဲလ္ပသာသ္ပအ်အိုတ်ညိ၊ ဣဏံဂှ်ဖဵုသွက်လိက်ပတ်မန်ပိုဲဟွံသေၚ်တုဲ ကောန်ဍေၚ်လုပ်သၞောဝ်ဂၠးတိ မဟီုယူနဳခတ်ဂှ် ပိုဲမန်တံ ထေက်ကဵုဒးပြံၚ်သၠာဲသုၚ်စောဲစကာတက်ပ္ဍဵုအာအိုတ်ညိ၊ သၞောဝ်ယူနဳခတ်မွဲဟေၚ် လိက်ပတ်မန်ပိုဲဂွံတဴတက်တုပ်ကဵုကဆံၚ်လိက်ပတ်ဍုၚ်ညးတၞဟ်မာန်ရ။ 🔻 လ္ၚဵုဂှ်ဟီု အဵုလၟုဟ်ဏံ ၜိုန်ပိုဲသုၚ်စောဲဇြဝ်ဂျဳကီုလေဝ် လိက်ယူနဳခတ်လေဝ်ဗှ်ဂွံမံၚ်ရတှ်ေ ဟွံဒှ်သၠာဲယူနဳခတ်ရတုဲ ပိုဲဆက်သုၚ်စောဲအာဇြဝ်ဂျဳဏံရ၊ တက်လေဝ်ခံၚ်ဟွံဒးကလေၚ်ဗ္တောန်တက်ယူနဳခတ်တၟိ ဗီုဗီုသာ်ဏံဗွဲမဂၠိုၚ်လေဝ် နွံတဴပ္ဍဲလညာတ်သၟတ်မန်ပိုဲ ပ္ဍဲလညာတ်တၠပညာမန်ပိုဲ ပ္ဍဲလညာတ်ကောန်ဂကူမန်ပိုဲတံဗွဲမဂၠိုၚ်အိုတ်ရ၊ သၞောဝ်ယူနဳခတ်လေဝ် ယဝ်ပိုဲစစကာဗက်ဂှ် ဟွံၜက်မွဲအာဒိုတ်ဟေၚ် တက်ခံၚ် တက်သောၚ်ကၠးတုဲ ဟွံလအ်တက်လောဲသွာဂွံဟီုမာန်ရ။ 🔻 ညးမသုၚ်စောဲဒၟံၚ်ကောန်ဍေၚ်ဇြဝ်ဂျဳတ္ၚဲဏံဂှ်လေဝ် ဗၠေတ်ရ ဟွံဆာန်လိက်ပတ်ရ ဟွံဗဂဵုလဟဵုရဟွံသေၚ်တုဲ ဇၟာပ်ညးအဲလေဝ် သီုညးမစကာဇြဝ်ဂျဳကေုာံယူနဳခတ်တံဂှ် စေတနာတုပ်လ္တူဂကူလ္တူလိက်ပတ်ဇကုဟွံတၞဟ်ခြာအာပုဟ်တုဲ ယွံပိုဲတံကၠိုဟ်စိုတ် အရာလဵုဒှ်သၞောဝ်ဍာံပြ အရာလဵုဟွံလုပ်သၞောဝ်မ္ဂးတှ်ေ ပိုဲတံဂွံစွံၚုဟ်မးဍေံဒးတုဲ သွက်ဂွံပြံၚ်သၠာဲဂွံဒှ်အာမွဲမူကောန်ဍေၚ်ယူနဳခတ်ဂှ် လောဲလောဲသွာသွာရဟွံသေၚ်ဟာ။ 🔻 ယဝ်ဒးပသောၚ်အာလေဝ် ချူထောံလိက်တၞးဂၠိုၚ်ကဵုတၞးမတုဲတေံဂှ်လေဝ် လ္ၚဵုဂှ်ကၠိုဟ်ရဟွံသေၚ် လ္ၚဵုကၠိုဟ်ဟိုတ်နူလၞုဟ်ဟွံလေပ်ဟွံကၠိုဟ်တုဲ ဂွံဖျေံမာနပူဂဵုပၠန်လေဝ် ပတေၚ်လဝ်ဂၞေၚ်ပူဂဵုတံအိုတ်တုဲ ကၟောန်စိုတ်ပခိုၚ်ဒြဟတ်တုဲ ကၟာတ်မတ်ကၟာတ်ကတောဝ်တုဲ ဆက်သုၚ်စောဲအာသၞောဝ်ဇြဝ်ဂျဳစဵုကဵုတ္ၚဲဏံဂှ်လေဝ် ဂွံဆဵုဒၟံၚ်ဗဝ်သအဝ်ဏီရ။ 🔻 ယဝ်ရဟီုပရောယူနဳခတ်ဗက်ဂှ် လ္ၚဵုဟီု နွံမံၚ်ဖိုဟ်ဟာပရောယူနဳခတ် ဗီုဏံလေဝ်နွံအိုတ်ရ၊ ပ္ဍဲကောန်ဂကူမန်ပိုဲ ဟွံဒှ်မွဲသၞောဝ်မွဲမူယူနဳခတ်မ္ဂးတှ်ေ သုၚ်စောဲယူနဳခတ်ညိဂှ် ဂွံမိၚ်ဂွံဆဵုမံၚ်လ္တူလာၚ်ဟွံပိုတ်သ္ကုတ်ရ၊ ဟိုတ်ဒှ်သာ်ဏံတုဲ တ္ၚဲဏံလိက်ပတ်မန်ပိုဲ ဗဂဵုလဟဵုစိုပ်ကၠုၚ်ကဆံၚ်လ္တူလပှ်ကျာကပေါတ်(IT)အာဲထဳနာနာယျဏောၚ်တှ်ေ အရာလဵုကောန်ဍေၚ်လဵုလုပ်သၞောဝ်ဂၠးတိဂှ်လေဝ် မန်ပိုဲတံ ထေက်ကဵုဒးတီဒးလ္ၚတ် ဒးကၠိုဟ်တုဲ သၞောဝ်ဂှ်ဒးဒှ်ဓဝ်ဍာံလဒေါဝ်ဟွံဒစေၚ်အာတုဲ ဒးကၠောန်ဗက် ဒးသုၚ်စောဲစကာသၞောဝ်တံဂှ်တုဲ Unicode မွဲဟေၚ် လုပ်သၞောဝ်ကောန်ဍေၚ်မဂၞန်အက္ခရအခဝ်ဗျန်သွဵုဂစိုတ်တံဂှ်မာန်ပေၚ်ပေၚ်ရ။ 🔻 လ္ၚဵုတံဂှ်လေဝ် ၜိုန်သုၚ်စောဲလဝ်ယူနဳခတ်ကီုလေဝ် ဟိုတ်နူ Keyboard ဂှ်ဒှ်မံၚ်ဗၟာတုဲ ပ္ဍဲအခိၚ်မပ္ဍဵုက်တက်လိက်မန်ဇကုမ္ဂးတှ်ေ သွဵုဗျန်ဂစိုတ်လ္ၚဵုဟွံမွယ်တုဲ ဒးဗဂပ်တက်အာပြး ချိၚ်ဗှ်အာဂှ်လေဝ် ဂွံဆဵုမံၚ်ခဏခဏကီုရ၊ တၚ်ဏံတှ်ေ ပိုဲတံဒးစကာကောန်ဍေၚ်မန်တုဲမှ တက်ပ္ဍဵုလိက်ပတ်မန်ပိုဲ ပေၚ်တပ်အးမဒှ်ရ၊ ပြသၞာနာနာတံဏံလေဝ် သၟဝ်လိက်ဏံလေဝ် ချူနၚ်လညာတ်သၟာန်သွဟ်မာန်အိုတ်ရ။ 🔻 လိက်မန်ဂွံနွံကဵုၚုဟ်မး လိက်မန်ဂွံဂတာပ်အခေတ်ဂှ်လေဝ် ဒးတက်ပေၚ်တပ်အးမှ ကော်စလိက်ပတ်မန်ပိုဲနွံကဵုၚုဟ်မးကီုတုဲ ဇၟာပ်သွာၚ်မန်ပိုဲတံနာနာလေဝ် လ္ပသာသ္ပအ်ဍောတ်တ်သောဲသောဲတံဂှ်တုဲ ဟွံထေက်ကဵုဒးဂါံယာဇိုၚ်ထၜက်ထောံအိုတ်ညိ၊ တၠပညာမန်ပိုဲတံဂှ်လေဝ် သီုခမဳသၚ်တၠပညာတံ သီုဂကောံမန်လ္ၚဵုတံသီုဖအိုတ်ဂှ်လေဝ် တီတုဲဒးပြံၚ်သၠာဲ တီကၠိုဟ်တုဲ ဒးဗိုၚ်ပူဗိုၚ်ဆဝ်မ္ၚုဟ် ဟွံတီဟွံကၠိုဟ်မ္ဂးတှ်ေ ဒးဂံၚ်လုပ်သၟာန် ဒးဂံၚ်တက်ကျာသၟာန်သွဟ်ဝေၚ်ညးသ္ကံအိုတ်ညိ၊ ဒးချူထ္ၜးမံၚ်ဒုဟ်နကဵုမလိက်သာ်ဏံဂၠိုၚ်ကဵုမပိုဒ်ပၞောန်ဂှ်လေဝ် ဖဵုသွက်ဂကူ သွက်လိက်ပတ်မန်ပိုဲရ၊ ဒးဟီုမံၚ်အရေဝ် သုၚ်စောဲယူနဳခတ်အိုတ်ညိ ဒးက္ဍုဟ်ပါ်ပါဲအကြာပူဂဵုညးသ္ကံဂှ်လေဝ် ဖဵုသွက်ဂကူ ဖဵုသွက်လိက်ပတ်မန်ပိုဲဖအိုတ်ရတုဲ နဒဒှ်ဖဵုပူဂဵုဟီုဂှ် တၟာဒဳရုဲလေဝ်ဟွံမွယ်ရ၊ တီကၠိုဟ်ကၠးစေတနာညးသ္ကံမ္ဂးတှ်ေ မုပပိုဲတံမၚ်ဇူဒၟံၚ်အိုတ်ရောဂှ် ဇၟာပ်ညးအဲ စွံထောံတၚ်သၟာန်ပ္ဍဲဇကုကဵုဇကုအိုတ်တုဲ တၚ်သွဟ်ဖဵုဂကူဂှ် နဒဒှ်လညာတ်ပရဟိတမွဲ ဇၟာပ်ညးအဲဂွံဆဵုတၚ်သွဟ်ဒဒှ်ဍာံပေၚ်ပေၚ်အိုတ်ရ။ 🔻 လၟုဟ်ဏံလေဝ် ဂွံဆဵုဒၟံၚ်ဂကောံလ္ၚဵုလ္ၚဵု ပူဂဵုလ္ၚဵုလ္ၚဵုတံဂှ် သွာၚ်မချဳဒရာၚ်ဒၟံၚ်ဂှ် ဒှ်တဴသွာၚ်လိက်ပတ်ပရေၚ်ပညာဂကူမွဲကီုရလေဝ် ကောန်ဍေၚ်ယူနဳခတ်ဂှ် သၠာဲထောံဟွံမာန်တုဲ ဆက်စကာသုၚ်စောဲဒၟံၚ်စဵုကဵုတ္ၚဲဏံလေဝ်နွံဂွံဆဵုမံၚ်ရ၊ တုဲပၠန် ၜိုန်စကာကောန်ဍေၚ်ယူနဳခတ်ကီုလေဝ် မလိက်မန်တက်ဟွံပေၚ်တုဲ ဗဂပ်အာဂှ်လေဝ်နွံပၠန်ရ၊ လ္ၚဵတီဗၠေတ်ဟွံဒးကီုလေဝ် ဟွံမိက်ပလေဝ်တုဲ ချိၚ်ဗှ်အာအတိုၚ်ဂှ်လေဝ်နွံပၠန်ရ၊ ဗီုသာ်ဏံဂှ် ဒှ်ၚုဟ်မးလိက်ပတ်မန်ဇကုကဆံၚ်သဝ်အာတုဲ နဒဒှ်ပူဂဵုဇကုဟေၚ် ညံၚ်ကဵုဍဵုဍိုက်ဒၟံၚ်လိက်ပတ်ဇကု ဟွံမွဲကဵုနဲကဲဗဂဵုလဟဵု ဟွံကဵုတဴတက်အာကီုရ။ 🔻 ပြသၞာသီုဖအိုတ် ပိုဲတံမဆဵုဒၟံၚ်အကြာညးအကြာအဲဂှ် တၚ်ပသောၚ်သှ်ပလးဍေံဟွံမွယ်ဟွံသေၚ်တုဲ နွံဆပိုဲတံဒးလ္ၚတ် ဒးသၟာန် ဒးတက်ကျာ ဒးသဳကၠဳညးသ္ကံမှ ပြသၞာပိုဲမဆဵုဒၟံၚ်ဇၟာပ်အရာနာနာမဟီုတုဲတံဂှ် ဂွံအိုတ်အာတုဲ ဒးဍာံစၟတ်တံဂှ်လေဝ် ဂွံမံက်ကၠုၚ်မာန်ရ။ 🔻 (၁)။ ဇကုသုၚ်စောဲ Unicode ရကီုလေဝ် ယၟု facebook ဇကုဂှ် ဒှ်ဒၟံၚ်ဇြဝ်ဂျဳဂှ် ထေက်ကဵုဒးပြံၚ်သၠာဲယူနဳခတ်အိုတ်ညိ၊ ပလေဝ်ပြံၚ်သၠာဲဟွံဒှ်တှ်ေ သၟာန်အိုတ်ညိ။ 🔻 (၂)။ Page ဂကောံကေုာံပူဂဵုဇကုဂှ် စသုၚ်စောဲကၠုၚ်ယူနဳခတ်ယျတုဲတှ်ေ ယၟုမုက်လိက်(Page)တံဂှ် ထေက်ကဵုဒးပြံၚ်သၠာဲကောန်ဍေၚ်ယူနဳခတ်အိုတ်ညိ၊ ပြံၚ်သၠာဲဟွံဒှ်ဟွံကၠိုဟ်တှ်ေ သၟာန်အိုတ်ညိ။ 🔻 (၃)။ ပ္ဍဲဖုၚ်ဇကု ပ္ဍဲကောန်ပျူဇကု ကောန်ဍေၚ်ယူနဳခတ် ပ္ဍဵုတက်လိက်မန်ဟွံပေၚ်ခိုဟ်ဟ်တှ်ေ သၟာန်အိုတ်ညိ။ 🔻 (၄)။ သုၚ်စောဲယူနဳခတ်ယျတုဲ မလိက်လဵု သွဵုဗျန်ဂစိုတ်လ္တူသၟဝ်မလဵုဂှ် ဟွံဆဵုတက်ဟွံဒှ်မ္ဂးတှ်ေ သၟာန်အိုတ်ညိ။ 🔻 (၅)။ သၚ်္ကေတဏံ(္)ကော်စဝိရာမဏံဂှ် သုၚ်စောဲဗီုလဵုဂှ်လေဝ် ဟွံတီတှ်ေ သၟာန်အိုတ်ညိ။ 🔻 (၆)။ ဂကောံလ္ၚဵု ပူဂဵုလ္ၚဵုတံဂှ်ပၠန်လေဝ် နဒဒှ်စေတနာအးအးလ္တူလိက်ပတ်ဂကူမန်နွံဍာ်ကၠံပေၚ်ဒၟံၚ်ကီုလေဝ် လိက်ဇကုမချူပတိုန်ဏာတံဂှ် ညံၚ်ဂွံဒှ်သၞောဝ်ယူနဳခတ်ဂှ် ချူအာညိ၊ ယဝ်မိက်ဂွံချူဇြဝ်ဂျဳတှ်ေချူဂွံတုဲ ယူနဳခတ်ဂှ်လေဝ် ထေက်ကဵုဒးချူအာကီုအိုတ်ညိ၊ သာ်ဏံဟွံသေၚ်တှ်ေ စိုတ်ဓါတ်စေတနာဇကု ကရေဲကညာၚ်ဆာန်လိက်ပတ်ကီုလေဝ် ၜိုတ်ဆကောန်ဍေၚ်လုပ်သၞောဝ်ဂၠးတိသုၚ်စောဲဟွံမာန်မ္ဂးတှ်ေ ညံၚ်ကဵုဖဵုအတ္တပူဂဵုဇကုဂှ် ဂၠိုၚ်အာနူကဵုဖဵုလိက်ပတ်ဂကူမန်ဏီရ။ 🔻 (၇)။ သွက်ညးမိက်ဂွံပြံၚ်သၠာဲ သုၚ်စောဲယူနဳခတ်တံဂှ်လေဝ် ပ္ဍဲဖုၚ်ကီု ပ္ဍဲစက်ကောန်ပျူတာကီုတံဂှ် ဟွံတီဟွံကၠိုဟ်တှ်ေ သၟာန်အိုတ်ညိ။ 🔻 (၈)။ ဂကောံမန်ပိုဲကီု နဒဒှ်ပူဂဵုတံကီု သီုကဵုတၠပညာမန်ပိုဲဂမၠိုၚ်တံဂှ် အကြာကောန်ကွးဇကုကီု အကြာဂကောံဇကုကီု ညံၚ်ဂွံဒှ်သၞောဝ်ယူနဳခတ်မာန်တုပ်တုပ်ဖအိုတ်ဂှ် ထေက်ကဵုဒးဟီုဒးဆဝ်မ္ၚုဟ် ဒးပူဗိုၚ်အာ ညံၚ်ဂွံသၠဲလးသုၚ်စောဲကောန်ဍေၚ်ယူနဳခတ်ဂၠိုၚ်တိုန်အိုတ်ညိ။ 🔻 သီုဖအိုတ်ဏံဂှ် ဒှ်တာလျိုၚ်ဇၟာပ်ညးအဲနွံဒၟံၚ်တုပ်ပ်ဖအိုတ်တုဲ သွက်ၚုဟ်မးလိက်ပတ်မန်ပိုဲ ဂွံတုပ်ကဵုဂကူညးတၞဟ်တံဂှ်ကီု သီုဂွံလုပ်သၞောဝ်မွဲမာန်တုပ်ကဵုဇၟာပ်ဂကူ လိက်နွံဒၟံၚ်လ္တူလပှ်ကျာတံဂှ်တုဲ Unicode မွဲဏံဂှ် ထေက်ကဵုဒးဒှ်မွဲမူတုပ်တုပ်အိုတ်မှ ဂွံဂံၚ်ဟီု ပိုဲဏံဗဂဵုလဟဵုလိက်ပတ်မန်ပိုဲထတ်ထတ်ကီုရ။ 🔻 ပိုဲညးနွံသၟဝ်တိညံၚ်ချောဲၜတ်ၜတ်ကီုတုဲ ကရေဲကညာၚ်မံၚ်သၟးဟွံတုဲဒှ်ဟေၚ် ညးတၠပညာတံကီု ခမဳသၚ်မန်ပိုဲတံကီု ဂကောံနွံကဵုအရံၚ်တံဂှ်ကီု ပူဂဵုနွံကဵုအရံၚ်တံဂှ်ကီု တၞဟ်ခြာနူကဵုပိုဲညးဓမ္မတာဏံတုဲ ပိုဲဟီုကၠံလ္ၚီပါၚ်ဂှ် ဟွံသၟဟ်ကဵုညးတံမဟီုမွဲပါၚ်ကီုရ။ 🔻 ဟိုတ်ဒှ်သာ်ဏံတုဲ ကူဂွံမအရေဝ်ဒဿနမွဲပါၚ်တေံဂှ်တှ်ေ ၊ ( မၞိဟ်ဓမ္မတာမွဲ တီတုဲဟွံကၠောန် ကမၠောန်ဂှ်လီုမွဲဍောတ်ကီုရ၊ ယဝ်ရတၠပညာမွဲ တီတုဲဟွံဂံၚ်ကၠောန်မ္ဂးတှ်ေ ကမၠောန်ဂှ်လီုလာ်စာ်ထောၚ် စဵုကဵုကဆံၚ်ဍုၚ်မွဲမာန်မံၚ်) ဟိုတ်ဒှ်သာ်ဝွံတုဲ သွာၚ်မွဲမွဲဂွံခိုၚ်ကၟောန်ပ္ဍဲဂကူဂှ် ညးတၠပညာကဆံၚ်သၠုၚ်တံဒးကၠောန်ဒးပြံၚ်သၠာဲမှ သွက်ညးဓမ္မတာတံဏံလေဝ် ဗက်အာလက္ကရဴတုဲ ၜိုတ်ဒြဟတ်နွံဂှ် ရီုဗၚ်ထံက်ပၚ် ဗဂဵုလဟဵုတဴလိက်ပတ်အိုတ်စိုအ်။ 🙏 (ဗၠေတ်ပဵုယအ်နွံတှ်ေ သၠးအခေါၚ်တုဲ နွံဆပိုဲတံဒးကၠိုဟ်စိုတ်ညးသ္ကံတုဲ ဒးဗက်ပလေဝ် ဗဂဵုလဟဵုအာဂတတေံရနွံ) အုပ်နိဂီု − တၚ်ဂုဏ်ရအဴ။ ။ ➲➲➲➲➲ ( ဝိညာဏ်ထဝ် မန်ထေန် − ညးစၞး ဂကောံထံက်ပၚ်အာဲထဳမန် )