လၟုဟ် ဝွံပ္ဍဲလ္တူလောကဏံ သတ္တံဗွဲမဂၠိုၚ် တာလျိုၚ်ညးကဵုညးနွံမံၚ်သီုဖအိုတ်ရ။ ဂကူပၠန်လေဝ် ဇၟာပ်ပ်တာလျိုၚ်မကၠုၚ်စိုပ် ပ္တဝ်ဏါက္ဍိုပ်တုဲ ဂကူညးတၞဟ်တံဂှ် နွံကဵုလျးအရံၚ် ဂွံမံၚ်ကဵုအခေါၚ်ဗၠးၜးအိုတ်ရ။ ဂကူမန်လေဝ် ယဝ်ရသ္ၚဳကဵုဝေၚ်မွဲပ္ၚံက်တမၠာတေံမ္ဂး နွံကဵုလျးအရံၚ် မတွံဂး လိက်ပတ်, အရေဝ် , ယေန်သၞာၚ်ဂွံကဵုအခေါၚ်ဗၠးၜး တိတ်ဗၠးနူဘဝဍိက်ကီုရ။ အခိၚ်လၟုဟ်ဂှ် မူဟိုတ်ဂွံဒှ်အာဥပမာ စာၚ်က္ဍတ်အဒါဂှ်ရော မိမမန်ပိုဲတံ ၜိုန်ရဒှ်မံၚ်ပ္ဍဲဂကူမန် ဇာတုၜိုပ်ထဝ်ကီုလေဝ် နကဵုဝါသနာဍာ်ဖဏုၚ် ဟွံရေၚ်တၠုၚ်သွက်ဂကူဇကု လိက်ပတ်မၞးဂွံဇၞော်မောဝ် ဟွံလၟောဝ်လဝ်စိုတ် ကောန်ဇာတ်ဇကုလေဝ် မာတ်လဝ်မုက်မက်ဟွံတီ ဗၟံက်ပၠိုတ်ဝိုတ်တၠိၚ်မံၚ်ဍုၚ်မိမတိမ ဆီဇာတိဂကူဇကု မတ်ၜိုန်ရနွံမံၚ်ၜါလ္ပါ်ကီုလေဝ် ညာတ်အာမွဲလ္ပါ်၊ မွဲသာ်ပၠန် အရေဝ်ညးတၞဟ်သ္အာၚ် ဂွိၚ်ဖေက်ဟွံလေပ် ဒေပ်လဝ်စိုတ်ဍိက်တုဲ ပၟိက်စိုတ်ဇကုထေၚ်ခိုဟ် ဟွံကၠိုဟ်လဝ်သွက်အနာဂတ် ပၟတ်ဗွဝ်ထေၚ်ဂးထဝ်ကလောံပဝ်လုပ်အာမ္ဂးဇိုၚ်ကဝ် သၞေၚ်ပိုတ်ဒးချိုတ်အာရဟွံသေၚ်ဟာ။ ကာလဂွံတီဘဝဇကုဂှ် ဘဝညံၚ်ကၠိက်ဂိုတ်ဖျုန်အိုတ်ရ။
ဟိုတ်ဂှ်ရ လ္တူကောန်ဂကူတံဂှ် မိက်ဂွံကဵုဏာသ္တိရ။ ဂကူဇကုဂှ်လ္ပဍဵုဍိုက်ဂွိၚ် ဖေက်တၞီဗၠိုက်မ္ဂး ယိုက်ပတိုန်ဝၚ်ဘဝကၠၚ် ဍုၚ်လ္ပဒုၚ်ချူလဝ်ဝၚ် ဒးမၚ်မွဲအာအရေဝ်လိက်ပတ်ယေန်သၞာၚ် ကာလဂှ်မှ လျးဇကု ဂွံပၠးထာၚ်ဂွံ ရာၚ်မောဝ်အာမာန်ရ။ တၞံဆုမွဲတၞံ ယဝ်ရခိုဟ်မ္ဂး ဂစေံမွဲဠက်လေဝ် ဇူၜိုဟ်မံၚ်ဏီ။
ပ္တံနူစသၠးဂဝ်ဂၞဴမိ တြုံအာဇာနဲဍာံမ္ဂး စိုတ်ဖေက်ပရံၚ် စိုတ်ဂံၚ်ပတိတ် သွက်ဂကူဇကုရရန်တၟံလဝ်ဘဝတၠဂှ် အတိုၚ်ဂတိဝန်ကောန်ဂကူညံၚ်ဟွံလီု ဒုၚ်ပူဇဴလမျီု၊ ဗီုလညာတ် နာဲဏံဂှ် ဟွံလအ်ဝၚ်တၟံတိုၚ်မၞး ဂျိုၚ်ဂတဝ်ကၠုၚ် လ္တူလောကဏံရ။ ယဝ်ရ ဟွံဂွိၚ်ကဵုဂကူဍာံမ္ဂး ပယျာံလဵုဂကူပိုဲဟွံသၠုၚ်ပြဲတိုန်ကၠုၚ်ဂှ် ကဵုဂွံကၠးမံၚ်ပ္ဍဲစိုတ်ညိ။ သွက်ဂကူဇကုဂွံ အာစိုပ် ဍုၚ်မိတိမမာန် နကဵုစိုတ်ဓါတ်ဆာန်ဂကူ လးဏာဒဒန် သွက်ဂၠံၚ်တရဴ ကောန်တံ မကွာ်အာတိုၚ်ပ္ကဴဂှ် လ္ပကရဴထောံ စးဂတးမုက်ကဵုဇၞူအလာံဂါံတိုန်အာဂံၚ်ၚ်ညိ။ ကောန်ဂကူတံသာသ္ပံ ဟွံလအ်ဒးကၠေံဗ္ဒန်ဂကူဇကုဒးကၠက်အိုတ်ရ။
ၜိုန်ဂှ်လေဝ် ယဝ်ရမုဟ်ဇကုဟွံယီုတုဲ ယီုမံၚ်မုက်ညးတၞဟ်သက်သက် သွက်ဂွံဒှ်ဖဵု ကောန်ဂကူမန်ဂှ်ဒှ်အာတၞံဂျိတုဲ ဒးစွံသတိထေက်ရောၚ် ပၞောဝ်ကဵုရိုဟ်ကၞက် ပိသာ်မပ္တံကဵုလိက်ပတ်ယဝ်ရကောန်ဂကူပိုဲတံ လွဳလွတ်စုတ်ကဵုဝါဲဆာန်ကဵုဍာ်မာန်မ္ဂး အဓာန်ဂတးတေံ လျးဂိတုတ္ၚဲဂှ် ဒးအောန်အာနူကဵုလျးဂကူပိုဲရသေၚ်ဟာ။
အခိၚ်အခါလၟုဟ် ဂကူပိုဲဒးသ္ကန်ဘဝပိုဲပၠန်ဂှ်ဒှ်အာစၞပရန် ညးတၞဟ်ဟွံဒှ်မွဲကသပ် ဒးဗ္ကပ်မုက်ကဵုတိဟွံမွဲကဵုဓရ်ညဳသာ တုပ်ပၟာညံၚ်ရဴကဇၞော် စကဍောတ်ကီုရ။ ဟိုတ်ဂှ်ရ ဂကူမဒးလီုဂကူမဒးလီုကမ်ဗြမ်ဂတိတုဲ ဆယၟုမ္ဂးမန်ဂှ် တန်တဴအာလ္တူလောကဏံရ။ ဂကူဇကုဂှ် မဒးတၞီဗၠိုက်သၟဝ်ဂတာဇိုၚ်ညးတၞဟ် ဒးမံၚ်က္ဍန်ဂြက် ညံၚ်ဂစေံဒးလဝ်ဒၞက်ကီုရ။မူဟိုတ်ဒှ်အာမာန်ရော။ ညံၚ်ရဴဂလာန်မ္ဂး ဆာန်ဂကူဟွံမွဲကဵုစေဝ်ပၞောန် ဆာန်ကောန်လောန်အာနူဗၞတ်ဗ္ၜတ် ဆာန်လိက်ပတ်ဟွံ မွဲလွဳမ္ဂး ဂွံဂ္ဇံနန်ထဝ် ဂွံဒးလဝ်က္ဍိုၚ်ဗ္တာၚ်မာန်ဏီဟာ၊ ညံၚ်ရဴသာ်ဏံကီုရ ဂကူမန်ပိုဲလေဝ် ဂျိဂှ်ၚိတ်လဝ်ထဝ်ဂှ် ကၠာတ်ပ္တိတ်တုဲ အရေဝ်လိက်ပတ် ယေန်သၞာၚ်အခိုက်ကၞာ ဝေါဟာဇကုနွံကဵုၚုဟ်မး ထေၚ်ဂးအိက် ကလောံပ္တောံၜတ်ဏါကဵုမတ်မၞိဟ် လိက်ပတ်ညးတၞဟ်ဂွံလေပ်မာန် ဂိုတ်ဂ္စါန် လွဳအရေဝ်ညးတၞဟ်ညံၚ်ဂွံလေပ် ဒေပ်လဝ်စိုတ်ဍိက်မိက်ဂွံကျာဂြိုၚ် ကယျိုၚ်ကယျဝ်ညးတၞဟ်ဂွိၚ်ဖေက်က္ဆံၚ်သဝ်ဗိုက်လ္တက် ကျိုၚ်ကျဝ် ပူဂဵုဒုၚ်ဖျဝ်လဝ်စရိုတ်ဗီုဏံဂှ် ဒှ်ပူဂဵုညံၚ်ရဴဒြာဲဟွံတီ ဂုဏ်မၞိဟ်ဟွံတီဂကူကီုရ။
တၞံဂျိဗီုဏံ ဆလအ်လေဝ်လ္ပစုတ် ကဵုဝါဲအိုတ်ညိ။ ယွံကောန်ဂကူမန်တံညးဂမၠိုၚ် ဂျိုၚ်မံၚ်လ္တူလောကဏံ ညံၚ်ဂွံတိတ်ဗၠး အာနူဘဝဍိက်ဂှ် လ္ပတိက်ၚုၚ်မံၚ်ဆဝ်မ္ၚုဟ်စိုတ်ဓါတ်လညာတ် လ္ပကဵုယောၚ်ယာညိ။ ဒ္ဂေတ်ပရေံမ္ဂး ဂကူကၠေံဏောၚ် ဒုၚ်ချိုတ်မံၚ်အဗီုအချဴမ္ဂး ဂကူပိုဲဒးကၠက်ဟေၚ်ရ။ ကောန်ဂကူပိုဲတံ သာသ္ပံမံၚ်ကဵုပိုန်ဒြပ် လဟိၚ်မံၚ်ကဵုတသိုက်ဂှ် စွံလဝ်ကၠာရ၊ ဇူမံၚ် သၞိၚ်ဘဝဍိက်ဂှ် မိပ်မံၚ်ဏီဟာ ချပ်ဗ္စာကေတ်ညိ။
မၞးမွဲဟုတ်ယုတ်အာသီုဍုၚ်ဂှ် လ္ပကဵုဒှ်ညိ၊ ဂကူမၞးကဵု ဘဝမၞးဂှ် ညံၚ်ရဴဍာ်ကၟာကဵုဒကှ်သွာ ညံၚ်ဂွံဒှ်အာသ္ဇိုၚ်ရိုဟ်ကၞက် ညံၚ်ဂွံတဴတက်ဒးဖန်စန်ဒက်လဝ်ညိ။ လိက်ပတ်ဇကုမံက်ဂတဝ်မှ ဂကူဇၞော်မောဝ်ယေန်သၞာၚ်ဇကုကျိုၚ်ကျဝ်မှဂွံရာၚ်ဆာဲ အရေဝ်ဇကုဟီုကဵုမှ ဂွံဒှ်ဂုဏ်စရာဲသွက်ဂကူမၞးရောၚ်။
က္တဵုဒှ်ကၠုၚ်ဘဝမနုဿမပြဲတုဲ ဝၚ်ကဵုတာလျိုၚ်ဒှ်သဇိုၚ်ကောန်ဂကူတံဒးပတုဲဟေၚ်ရ။ သွက်ဘဝပစ္စုပ္ပန်အတိတ် အနာဂတ်တေံ ဘဝဇကုညံၚ်ဂွံပြဲသၠုၚ် ဟွံဒုၚ်က္ဍိုပ်သၟဝ်ဇိုၚ်ဂွံပိုၚ်တ္ကံမာန် ဆီပဠက်လးဂၠံၚ်ဍာန် အဓိဌာန်န်ဗီုဏံ ဒှ်အဓိဌာန်ပူဂဵု အာဇာနဲဍာံဍာံရ။ ညးမကွာ်မံၚ်ဂၠံၚ်တရဴလၟာ် ဇိုၚ်သံသာတံရန်တၟံလဝ် တိုၚ်ပ္ကဴမွဲဟေၚ်ရ။ လညာတ်ပူဂဵု မၞုံကဵုလွဳတံဂှ် အတိုၚ်မရာဒနာမိက်ဂှ်ဂွံဍိုက်ပေၚ် အတိုၚ်ချပ်ကသပ်ဂှ်အံၚ်ဇၞး အတိုၚ်နွံပၟိက်ကၠိဂွံမာန်ရ။ ဘဝဇကုဍိုက်ပေၚ်ကဵုပိုန်ဒြပ် ဒှ်တသိုက်ပြဲသၠုၚ်မ္ဂး ဟွံဒးဒုၚ်ပဍိက်ဏီရ။ မူဟိုတ်ရောဟီုမ္ဂး ဂကူပိုဲမန်နူတမၠာ ၜိုန်ရနွံကဵုနန်ထဝ် ဂွံဓလဝ်ကၠုၚ်က္ဍိုၚ်ဗ္တာၚ်ၜိုန်ဘဝသၠုၚ်ပြဲမံၚ်ကီုလေဝ် ဒမံၚ်သၟဝ်တဲညးတၞဟ်သ္အာၚ် ညံၚ်ရဴဗွိုၚ်ဇာဒိသိုၚ် ကၠဵုပိုၚ်ဂ္ဇံနန်ကီုရ။ သတ်တံပ္ဍဲဂြိုပ်ၜိုန်ရဇာဒိသိုၚ် ပိုၚ်ပြဳလဝ်ကီုလေဝ် ဟိုတ်နူကဵုလညာတ်ဥာဏ်ဟွံမွဲတုဲ ကၠဵုဂှ်နကဵုပြယာဲလ္ၚီလီစၞာဲ ဝေၚ်မံၚ်ပြယာဲ ဆက်ကွာဲမံၚ်ကဵုသၟိၚ်ဇာဒိသိုၚ်ရ။ ခြာဟွံလအ်ကၠဵုဂှ် သၟိၚ်စိၚ်တေံ ဒှ်ရဲဇာဒိသိုၚ်ဂှ် ဒးမံၚ်သၟဝ်တဲအိုတ်ရ၊ ညံၚ်ရဴသာ်ဏံကီုရ။ ဂကူပိုဲမန်ဟိုတ်နူလညာတ်သဝ်တုဲ ဒးမံၚ်သၟဝ်တဴညးရ။ ဂကူပိုဲညံၚ်ဂွံအာစိုပ်ဍုၚ်ဇကုမာန် ဘဝပိုဲညံၚ်ဂွံ တိတ်ဗၠးနူဘဝဍိက်မိက်ဂွံဒှ်ဘဝတၠမ္ဂး ဒးဒက်ကၟာၚ်စိုတ်ဓါတ်ဆာန်ဂကူရ။ ညံၚ်တြုံအာဇာနဲတမၠာတေံ မပ္တံကဵုမှာထေရ် ဗုဒ္ဓဃောသာ၊ မှာထေရ်အရဟံတံဂှ် ရံၚ်မုက်ကောန်ဇကုဂွိၚ်ဖေက် တၞီဗၠိုက်မုက်မတ်သဝ်တုဲ လမျီုဟွံပအဓိက ဂကူဟေၚ်ဒှ်ပဓာန နကဵုလညာတ်ဓရ်ဍာံ ချူကၠာဲလဝ်လိက်ပတ်မန် စဵုကဵုအခိၚ်လၟုဟ်ဏံ ဝၚ်မွဲပ္ၚံက်တၠပညာတံပံက်တြးလဝ်ရ။ တုဲပၠန်ညံၚ်ရဴကျာ်ဇၞော်အ္စာအစွောံ သ္ဂောံသ္ဒးပ္တောံၜတ်ဟွံမွဲရ။ ၜိုန်ရဇိုၚ်ကဝ်တဲပိုတ် စိုတ်ဓါတ်ဆာန်ဂကူဟွံအိုတ် ဟိုတ်နူဆာန်ဂကူလောန်တုဲ လိကကပတ်ပိုဲမန် ဂွံၚ်ဖေက်အောန်အာတုဲ လမျီုၜိုန်ရအိုတ် ဂွိၚ်ဖေက်လျးဂကူပၠိုတ် နကဵုကၞေဟ်မှၚ် ချူပြၚ်ဗစိုပ်ဏာကဵုကောန်ဂကူပိုဲတံ မိက်ကဵုတိတ်ဗၠးအာနူဘဝဍိက်ရဟွံသေၚ်ဟာ ? အခါလၟုဟ်ကောန်ဂကူပိုဲတံ အတိုၚ်ညးအာဇာနဲကၠာတေံ လးလဝ်ဂၠံၚ်ဍာန်ဂှ် ယဝ်ရကွာ်ဗက်အာဍာံဍာံမ္ဂး သၞာံအခါဟွံလအ်အတိုၚ်ရန်တၟံလဝ် သၟဝ်အလာံဇၞူဂှ်ဒးစိုပ်မာန်ဍာံဍာံရ။
လညာတ်အာဇာနဲတံဂှ် ဆာန်ဂကူဍာံမ္ဂး ဒးယိုက်ဂၠေၚ်တာလျိုၚ် ၜိုန်ရဇြိုၚ်မံၚ်ကီုလေဝ် ဟွံစွံလၟောၚ်ဟွံဍောၚ်စိုတ် တိုၚ်ပ္ကဴတေံညံၚ်ဂွံစိုပ်ဂှ် ပ္တဝ်လဝ်က္ဍိုပ်လၟိုန်ရ။ လမျီုဒးပြဟ်လွဟ်စိုပ်ပၞးမှ ဒှ်ညးဆာန်ဂကူဟွံသေၚ်ဏီ လိက်ပတ်ဇကတၞီဗၠိုက် ဗွိုက်လ္တက်အိုတ်သ္ကန်အရေဝ်ဇကုကၠေံဗ္ဒန်ဟွံတဴတက်မ္ဂး ဒးဟီုစညးယိုက်ဂၠေၚ် ဒလေၚ်သွက်ဂကူမွဲကီုရ။ ကောန်ဂကူပိုဲတံ ၜိုတ်လဵုဒှ်မာန်ရော ? ချပ်ရံၚ်ကဵုဘဝအတိတ်တေံမ္ဂး သီုဂိသီုဓဇောတ် ဍာ်ရမတ်ဒးပြဟ်ဒတုံကၠုၚ်ရ။ မပ္တံကဵုဍုၚ်မတ်မလီု၊ ဍုၚ်ဟံသာဝတီလၟုဟ်ဂှ် ၜိုန်ရမိပ်မြဟ်သာယာမံၚ်ကီုလေဝ် မွဲအခိၚ်တေံဂဳက ဒှ်မံၚ်ဍုၚ်မဟိမဇကုဇေတ်တ်တုဲ လၟုဟ်ဟီုဂှ် ညံၚ်ရဴသ္ၚိ ပိုဲညးတၞဟ်ပၠံၚ်ကေတ်ကီုရ။ ဘဝပိုဲမဒးကြၚ်ကြောဝ်မံၚ်လဒေါဝ်ဂြိုပ် ဒးဗစိုပ်လဝ်ဘဝဍိက်ဂှ် သီုကဵုမဒှ်မံၚ်ဍုၚ်ဇကုဇကုဍာံဍာံတုဲ ဒးဒုၚ်ပဍိက် ဒးဒုၚ်ဇိက်မံၚ်ညံၚ်ရဴဂၠဴဟှ် ဒုၚ်မာန်မံၚ်ဟာ ?။ ကၠာက္ဍိုၚ်ဗ္တာၚ်ဟွံကဝ် နန်ထဝ်ဟွံဒတုံပြဟ်ဏီဂှ် ယဝ်ရကောန်ဂ်ူပိုဲတံညဳ ပ္တိတ်လွဳတုပ်တုပ်ဗီုဒှ်ဒးမံၚ် ဂၠံၚ်ဍာ်ဒးကွာ် လ္ပါ်ခိုဟ်ယဝ်ချပ် ဂၠံၚ်တပ်ယဝ်ကၠောန်လုပ်ပၞောန်ယဝ်ဟီုဗက်မၚ်မွဲထိၚ်ဒက်ဂကူဇကုမာန်မ္ဂး ဂၠံၚ်ဍာန်သွက်ဂွံစဴကဵုဍုၚ်ဂှ်ဂွံဆဵုဍာံဍာံရ။
ဒၟာနူပိုဲဟွံညဳသာတုဲ တိုၚ်ပ္ကဴလေဝ် သ္ၚောဲခြာမံၚ်ကဵုဂကူပိုဲရ ဟွံသေၚ်ဟာ၊ လ္ၚဵုတံဂှ် ပညာညးစုၚ် ပိုန်ဒြ်ညးတံသၠုၚ်တုဲ ဝိုတ်တၠိၚ်မံၚ်ဘဝ ကၠာတ်ထောံမဇဳဇဒုၚ် ဇိက်မံၚ်သွက်ဘဝအတ္တ ဟွံရံၚ်လ္ပါ်ပရဟိတမ္ဂး ကာလအာစိုပ်ဒဒိုက်တေံ ညးဂှ်ဂွံဟံၚ် ပြာ်မံၚ်ဏီရော။ ဘဝပိုဲၜိုန်ဒှ်မံၚ် ဘဝပြဲကီုလေဝ် လညာတ်သဝ်မ္ဂး ဒးဟဳမံၚ်ဂတာဇိုၚ်ဏီရ။ လၟုဟ်ဂကူပိုဲဇူမံၚ်သၞိၚ်ညးတၞဟ် မိပ်လဟိၚ်မံၚ်ဘဝဍိက်တိက်ထောံဒၚ်ဒၚ် ၜိုန်ရမၚ်စၟဳတ္ၚဲအခေါၚ်ဗၠးၜးကီုလေဝ်သ္ၚောဲခြာမံၚ် ညံၚ်တိသုန္ဓရဳကဵုအကးကီုရ။ လညာတ်ဂကူမန်ပိုဲတံဂှ် ဂွိၚ်ဖေက်ဒးဒုၚ်အ ထေၚ်သောဲကဵုဂကူသ္အာၚ်တုဲ ကောန်ဇကု ကဵုကတ်လ္ၚတ်လိက်ပတ်ညးတၞဟ် ယေန်သၞာၚ်ညးတၞဟ် အရေဝ်ညးတၞဟ်သ္အာၚ်တံဂှ် ဒှ်သွက်ဂကူပိုဲ ဒးကၠက်အာကီုရ။ ရိုဟ်ကၞက်ဏံ ယဝ်ဗိုန်ကၟောန်မ္ဂး ဂကူမန်ပိုဲလေဝ် ဗိုန်ကၟောန်ကီုရ။ လၟုဟ်နကဵုဇြဟတ် ဓရ်ညဳသာကောန်ဟံသာတံ က္ဍိုပ်စှ်ဂၞန်မွဲ ညဳသၟဟ်စှ်မွဲကသပ်မ္ဂး ဂၠံၚ်ဍာန်ပိုဲဂွံကလေၚ် လုပ်ပေါဲဗ္တိုက်ပၠန်ရ။ နကဵုစိုတ်ဓါတ်အာဇာနဲဍာံဍာံဂှ် ဂကူပိုဲ ဂွံဒုၚ်ချူလဝ်ဝၚ်ဘဝအိုတ်ရ ဟွံသေၚ်ဟာ။
ဗွဲကြဴ ကောန်ဂကူပိုဲတံ ဟိုတ်နူကံဝိပက် ဆက်ကၠုၚ်နူဘဝအတိက်တေံတုဲ ပိုဲဒးအာစိုပ်ဘဝဍိက်ဟာ။ ဟိုတ်နူလညာတ်ဇကုဟွံသၠုၚ်တုဲ ဒးဒုၚ်မံၚ်သၟဝ်တဲညးဂှ် ပြဲမံၚ်ဏီဟာ။ နူကဵုအခိၚ်ဟကူပိုဲမန် ဒးဆၚ်စှ်ေ နူနန်ဒးယောန် တိတ်နူဍုၚ်ဂှ် ဒှ်ဇာတာၚဴရပ်ဇြုံတုဲ ဇာတာဂကူဇာတာ ဍုၚ်ပိုဲလေဝ်လီုလာ် လိက်ပတ်ဒးစာ်ထောၚ် အခေါၚ်ပိုဲ ဒးအာစိုပ်သၟဝ်တဲညးတၞဟ်အိုတ်ရ။ လၟုဟ်ဂှ် စိုတ်ဓါတ်အာဇာနဲတေံကၠေံအာအိုတ်တုဲ စိုတ်ဓါတ်ပရေၚ်အတ္တ မံက်ဂတဝ်တုဲ ဂၠံၚ်ညးညးကွာ် ဟွံရံၚ်လ္ပါ် သွက်ကောန် ဗွဲကြဴစဴဗွဲဂတမ္ဂး ဗွဲကြဴဏံလပုဟ်တဲဇကုဂှ် ကလေၚ်ထပက်မတ်ဇကုပၠန် ကြက်ဒှ်အာမာန်ဏီရ။ ဂွိၚ်ဖေက်ကဵုဂကူဇကုဗၠိုက် မတ်ဇကုကၠက်မ္ဂး သွက်ဂွံဒှ်အာယာဲၜါ, အပါပိဂှ် စွံသတိကဵုခိုဟ် နူကၠာရိုဟ်ကၞက်ဟွံဒေါံကၟိုၚ်အာ နကဵုမေလံၚ် လပှ်စိၚ်ဂှ်ထိၚ်ဒက်အိုတ်ညိ။
ယွံကောန်ဂကူပိုဲမန် ဆီၜိုပ်ထဝ်တံ ညးဂမၠိုၚ်တာလျိုၚ်ညံၚ်ဂွံဒှ် သွက်ဂကူဇကု ပစ္စုပ္ပန် အတိတ် အနာဂတ်မာန်ဂှ် ဒှ်တာလျိုၚ်ပိုယ်ညးဂမၠိုၚ်ရသေၚ်ဟာ။ ဟိုတ်ဂှ်ရ ဘဝပိုဲညံၚ်ဂွံဒှ်ၚုဟ်မးဂှ် မုဒးကၠောန်ရော။ ယဝ်တာလျိုၚ်သွက်ဂကူ ယိုက်ဂၠေၚ်လဝ် လ္တူပၞးလၟိုန်မ္ဂး ၚုဟ်မးသွက်ဘဝမၞးဂှ် မံက်ဂတဝ်ကၠုၚ်ဍာံဍာံရ။ ညံၚ်ဂကူဇကု ဟွံဂွံတၞီဗၠိုက်ယိုက်ဂၠေၚ်အိုတ်ညိ ဂွိၚ်ဖေက်ဂကူတၞီဗၠိုက်မ္ဂး လ္ပဍဵုဍိုက်အိုတ်ညိ မိက်ဂွံကဵုဏာသတိ လ္တူကောန်ပိုဲမန်တံ နကဵုစေတနာမတ်မၞိက် မိက်ဂွံကဵု ယးတၟးရောၚ်။
ကၞေဟ်-------------------------#ရာမညမာံဝါန်ဇျာဲမန်