မိက်ဂွံဆဵုကျာ် မၠာ်သ္ၚေဝ်ရံင်ဓရ်

မိက်ဂွံဆဵုကျာ် မၠာ်သ္ၚေဝ်ရံင်ဓရ်

ပူဂိုလ် (ဟွံကေင်စလဝ်ၜဵုမွဲလှ်ေဂှ် ၜဵုပ္ဍုင်မံင်) သာ်ဏအ် ဟီုကဵုဍေံမ္ဂး... ညံင်ရဴ ဍေံဟွံပတှ်ေကီု - မၞိဟ်ဟွံကေင်ဗှ်လဝ်  ဒဿနကျာ်ဂေါတမဂှ် ဟီုကဵုဍေံကျာ်ဂေါတမနွံမံင်  ဍေံဟွံပတှ်ေရ။

ပူဂိုလ်မွဲဟီုတွံစွံလဝ် ဒဿနဂမၠိုင် (၈၄၀၀၀)ပိုဒ် နွံမံင်ဖိုဟ်ရ။ အဵု ဒဿနဂှ် ဓရ်မက္ခန်လေဝ် ကော်စဏီရ။ ဒဿန(ဓရ်မက္ခန်)တအ်ဂှ် ကတဵုဒှ် ဗွဲသဘာဝ ဟွံသေင်ရ။ ဟိုတ်နူဟိုတ်မွဲမွဲတုဲ ညးဟီုထ္ၜးလဝ်ကဵုရ။ မၞိဟ်ဟီုထ္ၜးလဝ်ကဵု ဓရ်မက္ခန် (၈၄၀၀၀)ဂှ် ဟိုတ်ပညာသၠောဲတြးလောန်တုဲ ပိုယ်ဒးအာစိုတ် ဒဿနညးတုဲ ဒ္ဂေတ်ဗက် အတိုင်ဒဿန ညးဟီုရ။ မၞိဟ်ဒ္ဂေတ်စ အတိုင်ဒဿနညးဂှ် ဗုဒ္ဓဘာသာ ကော်စအိုတ်ရ။

ပူဂိုလ်မဟီုစွံလဝ် ဒဿနဂမၠိုင် (၈၄၀၀၀) ဏအ်ဂှ် ယၟုညး ဂေါတမ ရ။ တၠပညာ ဂေါတမ ဏအ်ဂှ် ဟိုတ်နူ ညာဏ်ပညာသၠောဲတြးအိုတ်ဂှ်ရ ပိုယ်ကော်စကျာ်တြဲရ။

ရံင်ကဵု ဒဿနဂမၠိုင် (၈၄၀၀၀)ဏအ် မနွံတဴဂှ် ပူဂိုလ်မဟီုတွံလဝ် ဒးနွံရ။ ပူဂိုလ်မဟီုတွံလဝ်ဟၟဲမ္ဂး ဒဿန (ဓမ္မက္ခန်)ဏအ် ဟွံကတဵုဒှ်ကၠုင်ရ။ ဒဿနမ္ဂး မၞိဟ်ဟွံချူ မၞိဟ်ဟွံဟီုလဝ်မွဲသာ် ဗွဲသဘာဝဍေံ ဟွံကတဵုဒှ်၊ ဍေံဟွံဒတုမ်စှ်ေကၠုင် နူအာကာသတေံရ။

ရံင်ကဵု သဘာဝယုတ္တိဏအ်တုဲ ကျာ်တြဲဂေါတမ မဒှ်တၠဒဿန တၠဓရ် ဂှ် နွံဍာံဍာံရ။  မိက်ဂွံဆဵုနူဏအ်ဏီမ္ဂး ဨဟိပဿိကော ဒးကၠုင်ဗှ်ဝေင် ဒဿနညးဏောင်၊ ဒ္ဂေတ်စမ်ဝေင် အတိုင်ဒဿန ညးဏောင်၊ လ္ၚတ်ရံင် ဒဿနညးဏောင်။

ယဝ်ရ ဇကုဟွံသ္ပသာ်ဏအ်မ္ဂး ဇကုဂှ် ဒှ်ညးမိက်ဂွံတီ ဟွံသေင်တုဲ ဒှ်အာ ညးမိက်ဂွံသ္ပစပရေအ် ကောန်ဗုဒ္ဓဘာသာတအ်ရ။