ဆာန်ဂကူမ္ဂး ဟွံဒးတိုန်လတူစင်လေဝ် ဆာန်ဂွံမံင်။
ဆာန်ဂကူမ္ဂး စုတ်လမျီု ကုဂကူဇကုညိ။
ဆာန်ဂကူမ္ဂး စုတ်ဆီ ကုဂကူဇကုညိ။
ကတ်ဗတောန်လဝ်လိက်မန်တုဲ ချူဒၟံင်ပရေင်ဘာသာကၠးကၠး ဗှ်ဗက်ဟွံအိုတ်ရ၊ ချူပရေင်တၞဟ် သအာင်ကီုညိ။
ကောန်ဂကူမန်မွဲတၠမ္ဂး တိုန်ဘာ တုဲကဵုဒှ် တိုန်ဘာ ဟွံတုဲကဵုဒှ် အောန်အိုတ်လိက်မွဲအုပ် ညံင်ဂွံချူပတိတ် ဗွဲဘာသာမန်မာန်ဂဟ် တာလျိုင်သွက်ဂကူနွံမံင်ရဟွံသေင်ဟာ ။ နယ်ကယ်ချူလိက်ဂှ် ခမဳသင် ကေုာံ ခရှ်တၠပညာတအ် ဒးဗတောန်ကဵု ဒးဒါန်ကဵု ဗွဲမဆာန်ဂကူရောင်။
လိက်ချူလဝ်တုဲ မၞိဟ်ဗဟ် နွံဟာ ဟွံမဲဟာ ဂှ် − ဟွံဒးသၟာန်မွဲသာ် တီဍာ်ဒကေဝ်ဇကုရ၊
လိက်ဇကု ချူလဝ်ရှ်သာခိုဟ်မိုဟ် ဒးဂၞပ်ကဵုစိုတ် ညးဗဟ်လိက်တအ်မ္ဂး ဍေံဟွံဗလးနူတဲရ။
လိက်အုပ် ဘာသာဇကုဂၠိုင်တိုန်မ္ဂး ဟွံဒးရာန်ဗှ်လိက် ဘာသာညးတၞဟ်သအာင်ကွေံကွေံရ။ တ္ၚဲဏအ် ပ္ဍဲဆေင်လိက် တိုက်ရံင်လိက်တအ်ဂှ် လိက်မန်ဟၟဲ ဒှ်အာရ။ နွံပၠန်လေဝ် လိက်သြဝါဒဒၠေါအ် ဗတောန်သၟးတုဲ ဟွံမိက်ဗှ် စိုတ်ဟွံလုပ်စရ။
သွက်ဂွံသၠိင်ကောန်ၚာ်ဂး မိမတအ် ယဝ်မိက်ဂွံဗှ်ထ္ၜးကဵုလိက်အုပ် ကုကောန်ၚာ်သၟတ်တအ်မ္ဂး လိက်ဗီုဇကု မိက်ဂွံဗှ်ကဵုဂှ် ဟၟဲတုဲ ဒးရာန်ဗှ်ထ္ၜးကဵုလိက် ဘာသာညးတၞဟ်သအာင်ရ။ ကောန်ၚာ်ဂှ် နူမၞုံမံင်ပ္ဍဲ ခရေင်တေံ ဒးဒုင်ကၠက်မံင်ဂှ် တော်ချပ်ဟွံဂွံမွဲသာ်ရ။
နူနွံပ္ဍဲခရေင်တေံဂှ် ဂကူမန်စကၠက်မံင်ယျ။
ဟိုတ်နူ လိက်အုပ် ဗွဲဘာသာဇကု ဟွံမဲ။
ကောန်ၚာ်ပ္ဍဲခရေင်ဂှ် နူကဵုဍောတ်ဍောတ် ဟိုတ်နူယေန်အာ ပ္ဍဲကတောဝ်ၜါ နကဵုလိက်ပတ် ဘာသာဗၟာ အေၚ်္ဂလိက်တအ်ဂှ်ရ − ဘာသာမိဇကု မတွံဂး မန်ဂဟ် ဍေံဟွံတီရ။
ဂကူအေတ်သရေတအ်ဂှ် လိက်အုပ်ဘာသာမိဍေံ ဍေံဗှ်ထ္ၜးကဵု ကောန်ဇာတ်ဍေံတအ်ရ။ ကေတ်အခိုက် အေတ်သရေမ္ဂး ကၠောန်ဗီု အေတ်သရေညိ။
လိက်အုပ်ဘာသာမန်ပိုယ် ညံၚ်ဂွံတိတ်ကၠုင် ပ္ဍဲဂကူလိက်သွာင်ဇဳ သွာင်နာနာသာ်မာန် ဗီုညးဗီုအဲ ဒးချူအိုတ်ညိ။
တမ်လိက် ဇကုမချူလဝ်တအ်ဂှ် ညးမပတိတ်လိက်အုပ်တအ် ရာန်ဏောင်။ လိက်ဇကုခိုဟ်မံင်မ္ဂး ညးမပတိတ်လိက်ပတ်တအ် ညးရာန်တွဵုရ။
ဆဂး .... လၟုဟ်... ပ္ဍဲဂကူပိုယ် စွံၚုဟ်မးကဵု အာစာချူလိက်တုဲ ရာန်တမ်လိက်ဂှ် ဟၟဲဏီတုဲ နကဵုအလုမ်ကောန်ဂကူမန် ဒးပံက်လဝ်ကဵု ဌာနပတိတ်လိက်ပတ် မွဲဌာနထေက်ရ။ ကာလဂှ်မှ အာစာချူလိက် ညးမဝါသနာကဵု ချူလိက်တအ် ဂွံမံက်ဂတဝ်တိတ်ကၠုင်မာန်ရ။
ရဲချူလိက်လေဝ် ဂွံကမၠောန် သၟာတက်လိက် စဳလိက်တအ်လေဝ် ဂွံအာသီုကမၠောန်ဏီရ။
လိက်ပတ် သွာင်ဇဳနာနာသာ် မတွံဂး လိက်မဆေင်စပ်ကဵု သုတ ရသ ဒေသန္တရ ဗဟုသုတ သိပ္ပံ ဒှ်တမ် တအ်ရ။ ဗက်ဗှ်လိက် ဘာသာညးတၞဟ်တုဲ ပၠောပ်စုတ် ပ္ဍဲက္ဍဟ်ဇကုတုဲ ဒုင်စသိုင် နကဵုဂၠမ်သြိုဟ်ဇကု ချူပတိတ်နကဵု တဲရပ်ကၞေဟ်ဂှ် ဟွံဒှ် လိက် copy ပုဟ်။
လိက်အုပ်ဂကူ ဇကုမိက်ဂွံဗှ်ဂှ် ဗွဲဘာသာမန်ဟၟဲတုဲ ဒးအာဗှ်မံင်လိက်အုပ် ဘာသာဗၟာတုဲ ခံင်အာကဵုလိက်ဗၟာရ ကာလဗှ်ထ္ၜးကဵု ကောန်ဇကုဂှ် ဗှ်ဏာဗီုဗၟာတုဲ ကောန်ၚာ်ဇကု နူနွံမံၚ်ပ္ဍဲခရေင်ဂှ် ဒးဒုင်ပကၠက်မံင်ဂကူ သ္ၚိတ်သ္ၚတ်ဇြဇြဂှ်
လၟုဟ် ......ပိုယ်ရပ်ဂွံ ကမၠတ်ပဠက်ဂကူမွဲ သီုစိုက်သီုဂွဳ ယျ။
ကမၠတ်ဏအ် မုပိုယ်ဒးပရော။
အာနန်ဒဘိက်ခု
Ananda Bhikkhu Knowledge Page