Kyaik Lagon (Shwe Dagon Pagoda)
The words and their story
from the mural painting in the Royal Grand Palace, Bangkok
ပရောရုပ်ကသူ လတူဗဒင်သ္ၚိကၠတ်နန်၊ ဝင်နန်ကျာ်မၞိက် ဍုင်ၜင်ကံက်
ပ္ဍဲသ္ၚိကၠတ်နန် ဇရေင်ကျာ်မၞိက် ဍုင်ၜင်ကံက် မၞုံရုပ်ဗီုကသူ လတူဗဒင် ရုပ်ဂဂဳ ရုပ်ဂတာမ်ဒုတ်ဒုတ် ပ္ဍဲလဒေါဝ်ၜဳ။
အတိုင်ဂလာန်ညးတမၠာမဟီုလဝ် ကၠာကၠာတေံ ဂဂဳဇၞော်ဂှ်နွံဌာန်ဒၟံင်ဇရေင်ဇိုင်ဒဵုသိင်္ဃုတ္တရ ဍေံတိတ်အာဂၠာဲရပ်စစိင်ဒှ်စၞအာဟာရ စဖျုန်တုဲဇုတ်စိင်သေဟ်သၟေဟ်တအ်ဂှ် ဍေံဃိုင်နေင်ကၠောန်ခပေဲါဒၟံင်တဴရ။
ဒးကာလမွဲတ္ၚဲ ဨကရာဇ်မွဲတလ ကတဵုဒှ်ယဲက္ဍိုပ်ဂိက္ဍင်လောန် အစာသဝ်ပ္ဍဲဝင်နန်ဂှ်လေဝ်ဝဳဟွံဗၠး တလညးဗှ်ဗၞုဟ်ဒေဝတဴ တုဲဗတမ်ဂှ်တလညးဂွံမိတ်လ္ပအ် ယဝ်ရကေတ်ဆုကြက်စၠန် ဂွံအာကလအ်ပူဇဴဂုန်တလရသိ ညးမပဒတဴဒၟံင်ဇရေင်ဒဵုသိင်္ဃုတ္တရ မ္ဂး ဂွံတိတ်ဗၠးနူယဲက္ဍိုပ်ဂိဂှ်ရောင်။
တ္ၚဲယးဂတ တလညးပတိတ်အမိင် ကဵုအာပ္ဍိုက်ကေတ်ဆုကြက်စၠန် ဗွဲမပြဟ်ရ၊ ဖ္ဍိုက်ဂၠုင်တုဲဇက်တိတ်အာဇရေင်ဒဵုသိင်္ဃုတ္တရ တေံရ။ ကာလစိုပ်ဇရေင်ဌာန်ဒၟံင်တလရသိ ဨကရာဇ်ဂးကဵုတလရသိ "လၟုဟ်ဏအ်ပိုဲကၠုင်စိုပ်သွက်ဂွံကလအ်ပူဇဴဂုန်တလရသိ မဒှ်ရ၊" မိင်ဂလာန်တလညးတုဲ တလရသိ ၉ တၠညးမပဒတဴဒၟံင်ဇရေင်ဒဵုသိင်္ဃုတ္တရဂှ် ဟီုတိုန်ရဴသာ်ဝွံရ "ပ္ဍဲဘဝအတိက်တေံ မရာဇ်ဒှ်အစာပိုဲဂမၠိုင်ရောင်၊ မရာဇ်ဂှ်မၞုံယၟု ရသိရာဂ ရောင်အဴ၊ မရာဇ်ကေတ်ဆုကြက်စၠန်ဗ္တာင်မရာဇ်ကေတ်နေင်ဂှ်ရ ချူကရိကဵုပ္ဍဲက္ဍိုပ်ဒၞာဲဍေံမဂိဂှ်ညိအဴ။" ကာလကၠောန်ဗက်အတိုင်တလရသိဟီုဂှ်တုဲ တလညးဂွံတိတ်ဗၠးအာနူယဲက္ဍိုပ်ဂိ လဝဲါဂှ်ရ။
ကၠာဟွံကလေင်စဴဏီ တလညးဂေတ်ဗဵုဝေင်ပွဳပွူဒဵုသိင်္ဃုတ္တရ တလညးညာတ်ဒးဇုတ်စိင်ဂၠိုင်ဂၠင် ဂအုမ်လဝ်ဇရေင်ဇိုင်ဒဵုဂှ် တလညးကဵုပ္ဍိုက်စုတ်လတူဂၠုင်ရ၊ ဖ္ဍိုက်ကေတ်ဖျဴဏာဇရေင်ဍုင်တလညးရ၊ အဃောဂၠုင်ဖ္ဍိုက်လဝ်ဇုတ်ဇက်အာဒၟံင်လဒေါဝ်ၜဳဂှ် ဂဂဳဇၞော်မတိတ်အာဂၠာဲရပ်စစိင်ဂှ် ကလေင်စဴစိုပ်ဒၞာဲခပေဲါဍေံတုဲညာတ်ဒးခပေဲါဍေံလီုအာတုဲ ဒှ်ဒေါသထဍေင်ဗက်အာကဵုဂၠုင်ဖ္ဍိုက်လဝ်ဇုတ်စိင်တအ်ဂှ်ရ၊ ပ္ဍဲပါင်ၜဳဂှ် ဂတာမ်ဇၞော်မွဲမၞုံယၟု ဂန္ဓဗ္ဗ ကၞပ်သ္ၚံဒၟံင်ပ္ဍဲဂတာၜဳ အခိင်ဂၠုင်ထပှ်ဖ္ဍိုက်တတ်ၜက်အာဂှ်ဍေံဟွံဂွံသတိမွဲသာ် တုဲကာလ ဂဂဳဇၞော်သီုမနောဒေါသ ဗက်ကၠုင်ကဵုဂၠုင်တအ်ဂှ် ဂတာမ်ဂန္ဓဗ္ဗ တကိုတ်တိုန် ဖေက်ဒှ်အန္တရာယ်ကဵုဇကု တုဲဟာလဝ်ၚာင်သီုၜါဒိုဟ်ရ၊ ဂဂဳဂှ်ဇကုဍေံဇၞော်လောန်တုဲ တေက်ဒးအာၚာင်ဂတာမ်ဟာလဝ် ဂတာမ်ၚေပ်ဂဂဳဂှ်ပိုတ်အာ ၃ ဒကုတ် ချိုတ်အာဒၞာဲဂှ်ရ။
အခိင်ကာလကလိလောန်အာဗွဲမလအ်လ စိုပ်လက်ထက်ကျာ်တြဲဂေါတမ သၟာဗၞိက်ကောန်မန် ကောကဵုဒေံညးၜါမၞုံယၟု တဖုဿ ဘဏ္ဍိက ဇက်ယာဂၠုင်အာသွံဗၞိက်ဇရေင်ဍုင်ဂလာ ဂွံဂဗကုကျာ်တြဴ က္တဵုဒှ်ဓဝ်သဒ္ဓါ ဂွံကဵုဒါန်ကွာင်မြဳဍာ်သာဲ ကုတဳလပိုန်ကျာ်တြဲ ကျာ်တြဲကဵုပိုန်ကွာင်မြဳဍာ်သာဲတုဲ ဒုင်ကဵုဓါတ်သော် ၈ တၞုင်ကုညးၜါကောကဵုဒေံဂှ်ရ။
တဖုဿ ဘဏ္ဍိက ဒုင်ဖျဴဓါတ်သော် ကလေင်စဴစိုပ်ရးမည ဗဂိန်ကဵုသၟိင်ဍုင်ဥက္ကလာပ(ပစ္စုပ္ပန်ဍုင်ဒဂုင်) သၟိင်ဥက္ကလာပ ဂၠာဲဒၞာဲသွက်ဂွံသၠိုင်ဓါတ်သော်ကျာ်တြဲ ကၞောတ်တဲရုဲစှ်ကေတ်ဒဵုသိင်္ဃုတ္တရ တုဲဒက်ပတန်ကျာ်စေတဳမွဲတၞုင်ရ၊ သ္ပဟိုတ်ဒှ်ဒၞာဲဂဂဳဇၞော်လဂုင်(ဂေင်)လဝ်ဇုတ်စိင်ဒှ်ခပေဲါ အခိင်ကၠာကၠာတေံတုဲ မကော်ဂးကျာ်စေတဳလဂုင်ဇုတ်စိင် သီုဒယိုင်အလာမ်ဇၞောဝ်ရုပ်ဗီုဂဂဳ ပူဇဴလဝ်ဇရေင်ကျာ်စေတဳဂှ်ရ၊ ဗွဲကြဴညးဂမၠိုင်ကော်ဂး ကျာ်လဂုင် စဵုကဵုစိုပ်အခိင်တ္ၚဲဏအ်ရ။
စတမ်နူအခိင်တေံတုဲ ကောန်ဂကူမန်တအ် ဒက်ပတန်ကျာ်စေတဳမ္ဂး မနွံဒယိုင်ဇၞောဝ် ကွက်ပူဇဴလဝ်အလာမ်ဇၞောဝ်ရုပ်ဗီုဂဂဳဂှ် ဂွံဆဵုညာတ်မံင်ဒဵုအခိင်တ္ၚဲဏအ်ရ။
link: https://www.facebook.com/poojidtakorn/photos/a.227046790667127/1322870207751441/?type=3&theater
