ဒေံ
ပိုဲညးၜါဒးမံင်သ္ၚိတာဲဒုန်ဏံ
အခိင်လဵုဂွံဒှ်တသိုက်ရောဒေံ၊
ယွံကော
သုခကဵုဒုက္ခၜါ
ဂေတ်မံင်ပ္ဍဲပိုဲမၞိဟ်တအ်ရ
ဒုင်ကၠင်ဒဒိုက်တုဲမှဂွံဆဵုဂဗတသိုက်။
ဒေံ
အိန်ထံင်ပိုဲညးၜါ
ၜိုန်ရဝါတ်ကျာတ်မံင်ကီုလေဝ်
ဆာန်ပိုဲဟွံမွဲကဵုပြဒ္ဒညာမ္ဂး
ၚုဟ်မးဘဝအိန်ထံင်က္ဆံင်သၠုင်မံင်ဏီဒေံ၊
ယွံကော
အဓိကဂှ်
ပိုဲညးၜါကၠိုဟ်စိုတ်ညးသ္ကအ်
လ္ပတ္ၚအ်က္လင်အရေဝ်အကြာ
ဆာန်ပိုဲလေဝ်သာယာအာမံင်ဏီရကော။
ဒေံ
အဃောဒေံနွံမံင်ပ္ဍဲဇရေင်ကောဏံ
ဒေံမိပ်သၠောင်မံင်စိုတ်ရဟာ
ဟွံသေင်မ္ဂး
ဒေံအောန်မံင်စိုတ်ကီုဟာ၊
ယွံကော
ဒေံဂွံနွံမံင်ဇရေင်ကောမ္ဂး
ၜိုန်ရဍောင်မံင်လေဝ်ဟွံတီ
မိပ်သၠောင်မံင်ပ္ဍဲဂၠမ်စိုတ်ရကော။
ဒေံ
ပ္ဍဲတ္ၚဲဏံမွဲတ္ၚဲ
ကၠောန်ကမၠောန်လေဝ်ဟွံပြေပြံင်
သွက်ဗုင်ဂၞဴပိုဲညးၜါပ္ဍဲတ္ၚဲဏံ
မုပိုဲဂွံဆက်စအာရောဒေံ၊
ယွံကော
ကမၠောန်ဟီုဂှ်
လဆောဝ်ပြေံပြံင်လဆောဝ်ဟွံပြေပြံင်
ၜိုတ်နွံကဵုနွံဂှ်သွက်ဗုင်ဂၞဴပိုဲညးၜါ
ဖန်စအာသိုက်က်ရကော။
ဒေံ
တ္ၚဲဏံပိုဲညးၜါ
ကောပလံင်ဏာဒုင်ဝေင်ကျာ
အကြာကၠအ်ပ္ကဴဥဒျာန်သာယာ
ဒေံဗက်ကၠုင်ကောဏး၊
ယွံကော
သွက်ကောဟီုတှ်ေ
ပၟိက်ဆန္ဒကောဂွံဍိုက်ပေင်မာန်
ဒေံဏံဗပေင်ကဵုကောဏောင်။
ဒေံ
ကောဏံဝါတ်ကျာတ်မံင်
ဒေံတီမံင်ရသေင်ဟာ
ဒေံဗက်ကၠုင်ကောတုဲ
ပ္ဍဲစိုတ်ဒေံဗီုလဵုဒးဒုင်စသိုင်နွံရော၊
ယွံကော
ဝါတ်ဂှ်အဓိကဟွံသေင်
ဟိုတ်နူဆာန်မေတ္တာဍာံဇေတ်တ်
ကေတ်ကောပံင်ကဵုကောမာန်
ဒှ်အဓိကဟေင်ရကော။
ဒေံ
မုက္ခဝါဒေံအီတ္ၚက်
ကောဂွံညာတ်မံင်ဇၟာပ်တ္ၚဲ
ၜိုန်ရကောဏံဍောင်မံင်ကီုလေဝ်
လၟောင်ကောဍောင်ပြေမံင်ဏီ၊
ယွံကော
သွက်ကောဟီုတှ်ေ
မုက္ခဝါဒေံအီတ္ၚက်မံင်
ဟွံအိုတ်အာဏီရကော။
ဒေံ
ၜိုန်ရဘဝပိုဲညးၜါ
ဒးတတ်ထပါ်မံင်
အကြာတင်ဝါတ်ဂါတ်ဏံကီုလေဝ်
ပ္ဍဲဒေံဒှ်လၞီအောန်မံင်စိုတ်ကီုဟာ၊
ယွံကော
ၜိုန်ပိုဲအခေါင်တသိုက်ဟွံမွဲကီုလေဝ်
နကဵုစေတနာကေဝ်ဝ်ဇြုင်င်
ပိုဲဒုင်ကၠုင်ဒဒိုက်မ္ဂး
ပ္ဍဲစိုတ်ဒေံမိပ်သၠောင်မံင်လၟိုန်ရကော။
ဒေံ
ကောမိက်ဂွံသၟာန်ဒေံအရေဝ်မွဲပါင်
အိန်ထံင်ပိုဲညးၜါဏံ
ၜိုန်ဟွံမွဲကဵုတသိုက်ကီုလေဝ်
ပ္ဍဲစိုတ်ဒေံ..ဒေံမိက်ဂွံသာခြာမံင်ဏီဟာ၊
ယွံကော
အရေဝ်ကောသၟာန်နင်ဒေံဏံဂှ်
ဒေံဆက်သွဟ်ကဵုကောဏောင်
နူစဒေံဗက်ကၠုင်ကောဂှ်
ချိုတ်မွဲက္တိုင်ဂျိုင်မွဲကဝ်ဖျေံလဝ်စိုတ်ရကော
ဆီမန်ဇေတ် ဒူရာ