ကဗျဂိုဏ် ကေုာံ ကဗျဂတာပ်ခေတ်
နဇဲရုန်ဂ္စါန် ဂွံဇၞးမာန်ဟေင်
………………………………
သၟိင်တ္ၚဲသဝ်ပၠိုတ် အောန်စိုတ်ဆက်ဒွါ ဒဴအာဟွံမြဟ်၊
သွက်တ္ၚဲယးပြဟ် ဇဲဂှ်ဟွံယှအ် ရန်တၟံတၟးပေင်၊
ကမ်ပရေံဂိ ညိဟွံပြေပြံင် ညံင်သၟိင်တ္ၚဲဟေင်၊
ပ္တိတ်ဇဲဗွဲတၟေင် ကလေင်ရုန်ဂ္စါန် ဂွံမာန်ဒးဒှ်။
ၚဴမသုန်ဟေင် ဟွံထေင်မွဲသာ် ဒတုံဍာ်ပၠိုင်၊
ကောန်ၚဴဂမၠိုင် ပြိုင်လရိုအ်ဟီု ရီုညိကော်ပၟိင်၊
ၜိုန်လရိုအ်က္ညာင် ရမျာင်ကောန်ၚဴ မုရဴဟွံမိင်၊
လအ်ကဵုအခိင် ဍောင်ညိင်သ္ၚိတ်ဟဲ ပ္ဍဲဍာ်ပလိုင်။
ပထမဟီု မၞိဟ်ရီုဟွံမွဲ ချိုတ်ပ္ဍဲဏံရ၊
ဒုတိယပၠ လှေံပထမ လ္ပလရိုအ်ဇ္ဓူ၊
တတိယကၠာ ရာဒနာမံင် ညံင်ဗြဲဂွံဂူ၊
စတုတ္ထကူ ဓလူဒုဟ်တၞဟ် ဒှ်မံင်အိုတ်ရ။
ပဉ္ဇမဂှ် ဒှ်ညးရုန်ဂ္စါန် ဌာန်သွက်ဂွံဗၠး၊
ၚဴပန်သၟဝ်ဂး ဒတုံမ္ဂးချိုတ် အိုတ်လမျီုပြအ်၊
ရမျာင်ပါ်ပဲါ ဗ္ဒဗ္ဒာဲမိင်မံင် ညံင်ဟွံသာသ္ပအ်၊
စိုတ်ဓါတ်ဟွံယှအ် ဗီုရန်တၟံဟေင် ဗွဲတၟေင်ဂွံဗၠး၊၊
မုဟိုတ်ဂွံဇၞး ယဝ်ဒးက္လေင်ရံင် ဂ္စါန်မံင်လၟိုန်ဟေင်၊
ကမ်ၜိုန်စဳရေင် ဂွံစဳရေင်ကမ် တမ်ဇကုဏံ၊
ရုန်ဂ္စါန်လၟိုန်မ္ဂး ဟွံဒှ်ဒးဒှ် လအ်ကဵုပြဟ်ဏံ၊
တိုင်ပ္ကဴရန်တၟံ ဟွံယှအ်ဇဲမ္ဂး ဂွံဇၞးဟေင်၊၊
