ဝိုတ်အာဇကုဇကု
တ္ၚဲဏံ အာဗစာရဏာလဝ်ကမ္မဌာန် မိယာဲမိတ်သသာဲသ္ကအ်ရဲမွဲရ။ စဴနူသုသာန်ဂှ် ဇကုဇကုကလေၚ်သ္ပတိုန်သတိမွဲ၊ ပ္ဍဲသၞာံဏံ အဲအာဗစာရဏာလဝ်ကမ္မဌာန် ဟွံအောန်ရပုဟ်သွံ။
ကၠာတေံဂှ် သွက်ဒးအာလေဝ်ဟွံမွဲ၊ ဒၞာဲဟွံအာ မံၚ်ဟွံဂွံလေဝ် ဟွံမွဲ၊ စပ်ကဵုဘိက်ပၟိၚ်ပၠန် ဗွဲမဂၠိုၚ် ဘိက်စိုပ်သွက်သ္ၚိသၠးရ မၞိဟ်သ္ၚိဇကု အာညးမွဲဟွံသေၚ်ညးမွဲမ္ဂး တုဲရ။
လၟုဟ် လိက်ဘိက်သွက်ပူဂဵုဇကုဂှ် ဂၠိုၚ်ကၠုၚ်၊ မၞိဟ်ကြပ်ကြပ်ဇကု စုတိချိုတ်ဂၠိုၚ်ကၠုၚ်ကွေံကွေံရ။ အဲဂှ် ဒှ်မၞိဟ်ဝတ်လောကပြေမွဲ ဟွံသေၚ်ပုဟ်ဂှ် တီမံၚ်၊ ဆဂး ပွိုၚ်သၞာံဏံ စနူသ္ၚိသ္ပကုသဵု ကဵုဒါန်နာနာ မ္ၚဵုထပ်တဲ စဝ်ကပေါဝ်ဒှ်တမ် ဗလးထောံဟွံဂွံ၊ ဟွံဘိက်စိုပ်လေဝ် ဒးဗက်အာကဵုလေဝ်နွံကၠုၚ်ရ။
အဵု! စိုတ်အဲပြံၚ်သၠာဲကၠုၚ်ယျဏောၚ်ထေၚ်၊ ညးတၞဟ်တအ် သ္ပဂရုကၠုၚ်ကဵုအဲ ကွေံကွေံရ။ ဒှ်ကၠုၚ် မၞိဟ်လုပ်ဝိုၚ်မွဲ မၞိဟ်တီဝတ်လောကမွဲယျ သာ်ဏံ ဂွံဒုၚ်စတသိုက်ပဳတိ ပ္ဍဲအခိၚ်ချပ်မံၚ်ဂှ်ကီုရ။
စိုပ်သ္ၚိဗက် ကောန်ကၟိန်မွဲ မၚ်ဒုၚ်ကေတ်မံၚ်ဍာ်ဍာတ်ဍာတ် နူသ္ၚိကမ္မဌာန်တေံ မပြအ်ကဵုလဝ်ဂှ်ရ။ ဍေံဂွံတုဲ ဍေံခဍာတ်အရေဝ် ဍေံပါ်ကဵုသော်ဗုဗုဂး၊ အဲကလေၚ်သၟာန်ဍေံ ဒဵုဂလိုၚ်ဂှ်ဒှ်ဟာဗှ်ေ၊ ဍေံကလေၚ်ဟီု အဵု! မုဟီုမံၚ် ဗုမံၚ်အတိုၚ်က္ဍိုပ်ရ။ အဲမတ်ဗုအာ၊ ဂစာန်အာဗဵုဒ္ၚေါဝ် ဂတးဂတန် ဗက်ထာက်ဗဵုသော်ဇကု အလံုမွဲက္ဍိုပ်ရ။ ဟူ! ဍေံဟီုဂှ် ဒှ်ကွေံ။
ချပ်ဂွံအာ ဓရ်ကျာ်ဇၞော်တွံကဵုလဝ် ပ္ဍဲသုသာန်တေံမွဲပါၚ် "သော်က္ဍိုပ်ညးတၞဟ်ဗုရ ပိုယ်ဆဵု သော်က္ဍိုပ်ပိုယ်ဗုဂှ် ပိုယ်ဟွံဆဵုဏီပုဟ်ဂး"။ ဍာံဍာံရ။
လၟုဟ်မှ ဂွံတိုန်သတိဂၠံၚ်တရဴဇကု၊ ဇကုကွာ်ဒၟံၚ် ပ္ဍဲဂၠံၚ်တရဴဒုတိယယျ သွက်အဝယ်တတိယတေံ မုလေဝ်ဟွံဂွံပလေဝ်ပလေတ်လဝ်ဏီဖိုဟ်။ ဇကုဇကုထေၚ်မံၚ် သ္ၚောဲမံၚ်ကဵုဂၠံၚ်တတိယတေံဏီဖိုဟ်ရ။ စိုတ်ဇကု ဝိုတ်တှ်ေဝိုတ်ရ ခန္ဓဇကုဂှ် ဍေံဟွံဝိုတ် သစ္စဍေံဗိုန်မံၚ်။
အစဳဇန်ဂမၠိုၚ်၊ တၚ်ရန်တၟံဂမၠိုၚ်၊ ကမၠောန်ဟွံတုဲဏီတအ်ကီု၊ ကမၠောန်ဟွံစဏီတအ်ကီုဂှ် ကြိုက်ကဵုဒးကၠောန်ထေက်ဒၟံၚ်ယျ။
ဘဝဟီုဂှ် ရံၚ်မဂၞန်သၚ်္ချာအာယုက်မ္ဂး ညံၚ်ကဵုလအ်သ္ၚောဲမံၚ်ကီုရ။ ယဝ်ရံၚ်အာဗွဲလၟေၚ်လၟေၚ်မ္ဂး မွဲချိုန်ခဏဓဝ်ဟေၚ်ရ။ ဖျေံအစဳအဇန်ချိုတ်ချိုတ်ပၠိုတ်ပၠိုတ် ဇိပ်ဇိပ်ဂၠိပ်ဂၠိၚ်တုဲ ကၠောန်မှ ဖဵုဘဝဇကု ဇကုဂွံဒုၚ်စသိုၚ်မာန်ရ။
လုပ်ဝေင်fb ဆာန်အာဲရတ်မ္ဂးဍဵုညိ☟
ဆာန်အာဲရတ်
26 - 1 - 2k20
No comments:
Post a Comment