ဗွိုက်တိဍာ်ညးတံဗက်ရာန်လဝ်တံဂှ် ဇၞော်သၠဲလးနူကဵုဗၞတ်ဂွံကၠောန်ပရေၚ်ပိုန်ညးတံ ပ္ဍဲပစ္စုပ္ပန်ဏံဏီရ။ ဂကူဂလာညးတံ တၞဟ်နဂွံတန်တဴၜိုဟ်ဟ်သြိုဟ်ဟ် ပ္ဍဲတိဍာ်ဒၞာဲလကျာ်ဗၟာတံ ဒစဵုဒစးဂှ် ဝါတ်ခဲါကၠုၚ်ဂှ်တုဲ ကၠုၚ်အောပ်ဗဒပ္ဍဲတိဍာ်ဍုၚ်မန် ဒှ်မာန်ရောၚ်ဂှ်လေဝ် ပရိုၚ်တံဂှ် တော်ဆလဝ်အိုတ်ကီုရ။ ပ္ဍဲဂကူမန်ဂှ် ၜိုန်ရဂကူဂလာ ဂွံစလဝ်ဗြဴမန်တံအောန်ကီုလေဝ် ပ္ဍဲတိဍာ်ကရေၚ်တံဂှ် ဂကူဂလာတံ ဂွံစလဝ်သၟတ်ဗြဴကရေၚ်တံဗွဲမဂၠိုၚ်တုဲ သီုဗော်သ္ၚိကၟိန်တံဖအိုတ်ဂှ် ဒုၚ်ဂိုၚ်ကေတ်ဘာသာမူသလေမ်အိုတ်ကီုရ။ ဂကူဂလာမူသလေမ်မစိုပ်ကၟိန်ဍုၚ်အမေရိကာန်တံဂှ် ၜိုန်ရတၠသ္ၚိဂလာဂှ် စုတိအာကီုလေဝ် သ္ၚိကၟိန်ညးတံဂှ် ဒုၚ်ဂိုၚ်ကေတ်မံၚ်ဘာသာဂလာဖိုဟ်ဏီရ။ ပ္ဍဲတိဍာ်ပၠန်ဂတးကရေၚ်တံဂှ် ဒၟာနူဂွံလဝ်မၞိဟ်ဗြဴကရေၚ်ဂၠိုၚ်လောန်ဂှ်တုဲ ကောန်ပၞာန်ကရေၚ်တံ ဟွံပေၚ်စိုတ်တုဲ ဗက်ကၠတ်ဂစိုတ်မံၚ်နွံရောၚ်ဂှ်လေဝ် သၟတ်ကရေၚ်တံ ဟီုပတိတ်မံၚ်အိုတ်ကီုရ။ မွဲအခိၚ်တေံ ခေတ်ကာလပါလိမာန်ဒဳမဝ်ကရေဇြဳဂှ် တိဍာ်ဍုၚ်မန်ပိုဲဂှ် ဂလာတံ ကြုက်တံ အုပ်ဇျာပ်လဝ်ပရေၚ်ပိုန်ဂြပ်ဂှ်တုဲ တိဍာ်တံဂှ် စိုပ်အာသကေံတဲ ညးတံအိုတ်ဂှ်တုဲ ပ္ဍဲကြဴနူသကိုပ်ပၞာန်နေဝေန်သီကေတ်အဝဵုတုဲ ကလေၚ်ပါ်ပရအ်ကဵုသၟာဗ္ၚတံဂှ်တုဲ တိဍာ်တံဂှ် ကလေၚ်ဒှ်အာတိဍာ်ကောန်ဂကူမန်ကီု ဂကူတၞဟ်တံကီုရ။ တိဍာ်ဍုၚ်မန် တၞဟ်နဟွံဂွံစိုပ်အာသကေံတဲဂကူညးတၞဟ်တံဂှ် ဒှ်တာလျိုၚ်ဂကူမန်ဇၞော်အိုတ်ကီုရောၚ်ဂှ် ညးမဆာန်ဂကူ မစိုပ်ဍုၚ်ပလိုတ်တံ သ္ၚဳဂၠိပ်တဴသာ်ဝွံကီုရ။ စပ်ကဵုဂွံဒၞာတိဍာ်ဝွံဂှ် ဗော်ရပ်လွဟ်ဂကူကရေၚ်တံ ကၠောန်သ္ပမံၚ်သၞာံဗွဲမလံလရဂှ်တုဲ ဓဝ်သမ္တီကောန်ဂကူဂှ် ဒှ်အရာပၟိက်ဇၞော်ဂှ်တုဲ ဓဝ်သမ္တီဂကူ စိုတ်ဓါတ်ဆာန်ဂကူဇၞော်ရောၚ် စဵုဒၞာကဵုမာန်ရ။ ပ္ဍဲဍုၚ်မန်တ္ၚဲဏံ လပါ်ပရေၚ်ဍုၚ်ကွာန်ဂှ်လေဝ် ဗော်ပရေၚ်ဍုၚ်ကွာန်မသ္ပစၞးကဵုဂကူဗၟာနာနာတံ ကေမ်ဇျာပ်လဝ်ပၠန်ဂှ်တုဲ ပိုန်ဂြပ်ကဵုပရေၚ်ဍုၚ်ကွာန်ၜါသွာၚ်ဝွံဂှ် ဒှ်အရာပၟိက်ဇၞော် ပ္ဍဲဂကူမွဲမွဲဂှ်တုဲ အကာဲအရာဂကူမန်ဂှ် ပ္ၚံက်ဏံ စိုပ်ကရေပ်မာန်ရ။ ပ္ဍဲဒေသကၞောတ်ၜဳဂြာၚ်ဂှ် ဒၟာနူဗော်ရပ်လွဟ်ဍောတ်တ် ကောန်ဂကူကရေၚ်ကဵုမန်တံ ဒ္ဂေတ်ပတိပတ်လီု ဗက်သွံမံၚ်ဂဥုဲၜူမာဲဂှ်တုဲ သၟတ်မန်တံ လီုလာ်မံၚ် ဒဵုကဵုကလေၚ်ပလေဝ်ပလေတ် ဝါတ်လောန်ရ။ တုပ်သာ်ဂှ်ကီု ပ္ဍဲဒေသတၞဟ်ဟ်တံဂှ်လေဝ် သၟတ်တံ ၜူမာဲမံၚ်ကဵုဂဥုဲအိုတ်ကီုဂှ်တုဲ အကာဲအရာသာ်ဝွံဂှ် ဒှ်အကာဲအရာ မတဝ်လျောဝ်အာကဵုဂကူမန်ဂွံဒှ်ဍိက်ဂၠုဲညးတၞဟ်ရ။
ဌာန်ပရိုၚ်ကဴဝဴ