သဇိုၚ်နဲကဲပရေၚ်စန်ဒက်

၁။ ဗီုပၟိက်ဇၞော် လတူပရေၚ်စန်ဒက်

မၞိဟ်ကဵုမၞိဟ် ဘပဠၜုက်တက် ကေတ်ဇၞးညးတအ်သၟးကီု၊ ကဵုစၞအာဟာရ အခေါၚ်အရာနာနာတုဲ ဗီုဇကုနွံပၟိက် ဖျေံဏာဗီု ကဵုကၠောန်ဗက်အာဂှ် အာဍာ်ဇမၠိၚ်ဟွံမာန်ရ။ ပရေၚ်ဍာံပြဟွံသေၚ်။ နကဵုလညာတ်သမ္တီ ညးဟွံစှေ်စိုတ် ညးဟွံဒုၚ်တဲမ္ဂး သီုကလေၚ် ဒစဵုဒစးကၠုၚ် လတူဇကုဏီရောၚ်။ ဟိုတ်ဂှ်ရ မၞိဟ်ဂှ် တော်လ္ပာ်ဝါတ်မ္ဂး ထိၚ်ဒဝ်ဝါတ်နူ သတ်တိရိစ္ဆာန်ဏီရ။ ၜိုန်ဂှ်လေဝ် ညံၚ်ညးဂွံစှေ်စိုတ် ဂွံကၠိုဟ်ကၠးဒုၚ်ကေတ်တဲ သောၚ်ကလးထ္ၜးကဵုမာန်မ္ဂး ဟွံဒးထိၚ် ဗီုသတ်တိရိစ္ဆာန် ဟွံဒးဗက်စၞောန်ထ္ၜးဒၟံၚ်ဖအိုတ် ဗီုဇကုနွံပၟိက်ဂှ် ညးကၠောန်ကဵုရောၚ်။ ဟိုတ်ဂှ်ရ ရံၚ်နကဵုသၟာစန်ဒက်ခိုဟ်မွဲမ္ဂး ထိၚ်ဒဝ်ရပ်စပ်လောဲက္ဍၚ် ဆဂးဟွံဒုၚ်ကရေပ်ဓရတ် ဟွံဒုၚ်အုပ်ဓလီုက္ဍၚ်ရောၚ်။ ပၠန်ဂတးမဂးဂှ် နကဵုတၠအစောန်မွဲၜါဓဝ် ကၠောန်စိုပ်တရဴမာန် ကေတ်ဇၞးမာန်ဟွံသေၚ် နကဵုဇြဟတ် ညးဍုၚ်ကွာန်ဟေၚ် ကေတ်ပေဲါအံၚ်ဇၞးမာန်ရ။ ဝၚ်မွဲမွဲဂှ် နကဵုဇြဟတ်ညးဍုၚ်ကွာန်ဟေၚ် ပြံၚ်သၠာဲမာန်ရ။ ပိုဲဂွံဗတိုက်ဖျေံ ညးမဂွံလဝ် အဝဵုမာန်ဂှ် ပရေၚ်စန်ဒက်ပိုဲ ဒးခိုဟ်၊ ဒးတဴတက်၊ ဒးသၠဲလး နူညးမဂွံလဝ် အဝဵုဏီရောၚ်။ ပေဲါဗတိုက်မွဲမွဲကျကီု ဇၞးကီုဂှ် တန်တဴလတူ စရာဲပၞာန်၊ အလုံပၠန်ဂတးမွဲ။ ဟီုမွဲသာ်ပၠန် ကျကီုဇၞးကီုဂှ် တန်တဴဒၟံၚ် လတူပရေၚ်စန်ဒက်ရောၚ်။ ညးဍုၚ်ကွာန်တအ် ကၠိုဟ်ကၠးထံက်ဂလာန် ဗိုၚ်လုပ်ကၠုၚ် ကရောံပိုဲဗွဲမဂၠိုၚ်ဟေၚ် ဇြဟတ်ပိုဲ ဇၞော်သၠုၚ်ကၠုၚ်တုဲ ဗတိုက်ဖျေံဗက်ထောံသၞမာန်ရောၚ်။ ဟိုတ်ဂှ်ရ ကျကီု ဇၞးကီုဂှ် ဇြဟတ်မကဵုသ္ဂုတ်သွာတ်မာန်ဂှ် နွံပ္ဍဲညးဍုၚ်ကွာန်တံရောၚ်။ ဂွံတံၚ်ဂြဲ ညးဍုၚ်ကွာန် ဗွဲမဂၠိုၚ်မာန်ဂှ် ဒးဒုၚ်သဇိုၚ် လတူပရေၚ်စဵုဒၞာ မၚ်မွဲပတုဲဖဵု ညးတအ် (ဝါ) ဂၠံၚ်တရဴပရေၚ်စန်ဒက်ဍာံရောၚ်။ လတူဂၠံၚ်တရဴပရေၚ်စန်ဒက်ဍာံဂှ်ပၠန် နကဵုနဲကဲ ပရေၚ်စန်ဒက်နာနာ လုပ်စိုပ် ပ္ဍဲညးတအ် ဗွဲမသၠဲလးဟေၚ် ညးတအ်ပါလုပ် ကၠုၚ်ကဵုဒြဟတ်ဇၞော်ဇၞော်မာန်ရောၚ်တုဲ ပိုဲၜှ်ပလှ်ကေတ် ပကဴအံၚ်ဇၞးမာန်ရောၚ်။

ဗီုညးတာလျိုၚ် ဗော်ဍုၚ်မန်တၟိ အာဆဵုဂဗ ချပ်ဂၞန် ကုညးဍုၚ်ကွာန် ကေုာံ ခမဳသၚ်။

၂။ တၚ်နၚ်သဇိုၚ် မဒးသောၚ်ကလးစန်ဒက်
မၞိဟ်တအ်ဝွံ ပရေၚ်စသုၚ်မံၚ်စံၚ် ဗိုက်လတက် ကေုာံ အခေါၚ်ဗၠးၜးဂှ် နွံပၟိက်ဇၞော်အိုတ်ရ။ ပရေၚ်စသုၚ်မံၚ်စံၚ် ဗိုက်လတက်တအ်ဝွံ ဘဝမၞိဟ်သွက်ဂွံဂျိုၚ်တဴ နွံပၟိက်တုဲ အခေါၚ်ဗၠးၜးမ္ဂးဂှ် စိုပ်ကဵုပရေၚ်ဂကူ ဟွံဒးဒုၚ် သၟဝ်အဝဵုသြဇာ ဂကူညးတၞဟ်တုဲ ဘဝဂကူညး ညးဖန်ဖက်မာန်ကီု၊ စပ်ကဵုပရေၚ်ဂၠာဲပိုန်ဒြပ် ညံၚ်ဟွံဒးဒုၚ်အုပ်ဓလီု ရေက်ကးဇြောတ်ဆီတုဲ သွက်ဂွံသၠဲလးတိုန်ကီု၊ စပ်ကဵုအခေါၚ်မၞိဟ်၊ ဒဳမဝ်ကရေသဳ သၠးပွးကီုတအ်။ ဟီုမွဲဗီုပၠန်မ္ဂး မၞိဟ်တုပ်ပ် အခေါၚ်အရာဒးတုပ်ပ်ရ။ အခေါၚ်မၞိဟ်တုပ်ဂှ် ဒှ်အခေါၚ်စကာအရာ ကတ်ဗ္တောန် လိက်ပတ်၊ ဇၞော်ပၟဝ်ယေန်သၞာၚ်ဂကူဇက၊ု အခေါၚ်ဂၠာဲဒြပ်၊ အခေါၚ်ဟီုဂး ချူဇန်ဒက်ဂကောံ၊ ရှေ်သှေ်ရဴဂဴတအ် ဟွံပါ်ကဆံၚ်မၞိဟ် စွံတုပ်သၟဟ်တအ်ရ။ စပ်ကဵု အခေါၚ်အရာဂကူမွဲမွဲ ကဆံၚ်မၞိဟ်မွဲမွဲ ယဝ်ရ ပရေၚ်ဒးဒုၚ်ပ္ဍဵုပ္ဍိုက် ရေက်ကးဇြောတ်ဆီနွံမ္ဂး ညံၚ်ညးတအ်ဂွံကၠးဂှ် ဟိုတ်သာ်လဵု ညးတံဒးဒုၚ်ပ္ဍဵုပ္ဍိုက် ရေက်ကးနွံဂှ် သဒးကလးထ္ၜးကဵုရောၚ်။ ဆဵုဂကူမန် ကေုာံ ဂကူမဒးဒုၚ်ပ္ဍဵုပ္ဍိုက်ဒၟံၚ်တအ်မ္ဂး ဗီုဂကူကောန်ဍုၚ်အရေၚ်တအ် ဒးဒုၚ်ပ္ဍဵုပ္ဍိုက်ဒၟံၚ် သၟဝ်တဲအလဵုအသဳပၞာန် ဝါဒဳမဟာဂကူနာနာတအ်ဂှ် ဒးစွံအဓိက သောၚ်ကလးကဵုရောၚ်။ ဆဵုသၟာကမၠောန်၊ သၟာဗ္ၚ၊ သၟာဗၞိက်တအ်မ္ဂး ဗီုညးတအ် ဒးဒုၚ်အုပ်ဓလီု ရေက်ကးဒၟံၚ် ပ္ဍဲအရာကမၠောန်ပိုန်ဒြပ် သၟဝ်တဲအလဵုအသဳတ္ၚဲဏအ်ကီု ဆဵုသၚ်စပ်ကဵုသၚ်၊ ဆဵုကွးဘာ စပ်ကဵုကွးဘာ၊ သာ်လဵုညးတအ် သီုပရေၚ်ဂကူ သီုကဆံၚ်ကွပ်မၞိဟ်ညးတအ် မဒးဒုၚ်ပ္ဍဵုပ္ဍိုက်ဒၟံၚ်ဂှ် ဇကုဒးသောၚ်ကလးကဵုရောၚ်။ သောၚ်ကဵုသာ်ဂှ်မာန်မ္ဂး စန်ဒက်ညးတံ စိုပ်တရဴမာန်ရ။ စိုပ်ကဵုပရေၚ်ဂကူ ဇြိုဟ်ဟ်နက်က် ဒးသောၚ်ကဵုရောၚ်။ မုဟိုတ်ရောဟီုမ္ဂး အလဵုအသဳ မ-ဆ-လ/နအဖ တအ်ကီု၊ သီုဗော်ပၠန်ဂတး ကဆံၚ်မၞိဟ်လ္ၚဵုတအ်ဂှ် ပၞုက်ကၠေံဝါဒမဟာဂကူညးတအ် စွံက္ဍိုပ်ကဵုကဆံၚ်မၞိဟ်တုဲ နဲနာနာ ဗ္ၜမ်ၚိတ်ဒၟံၚ် ဂကူတၞဟ်သၟာၚ်ရ။ ဗော်ပိုဲလေဝ် ဖျေံလဝ်ဂၠံၚ်တရဴ တိုပ်လဝ်သဇိုၚ်ပရေၚ်ဂကူအဓိကရောၚ်။ ညးဍုၚ်ကွာန်တအ်ဂှ် နကဵုပရေၚ်ဂကူ ဒးဒုၚ်ပ္ဍဵုပ္ဍိုက်ဂှ်လေဝ် ညးတအ်ညာတ်ကၠးဒၟံၚ်တုဲ စန်ဒက်လောဲသွာရောၚ်။ ပၠန်ဂတးပိုဲဂှ် ဒုၚ်သဇိုၚ် ကုပရေၚ်ဂကူတုဲ ကၠုတ်ပါ်ဇၞော်ကၠုၚ်၊ ဂၠံၚ်တရဴဗော်ဂှ်လေဝ် ကဆံၚ်မၞိဟ်နာနာ ပံၚ်ပကောံလဝ် သၟဝ်အလာံဂကူတုဲ သွက်ဂကူဂွံဗၠးၜး စသုၚ်ဂွံသၠဲလးတုဲ လးလဝ်ဂၠံၚ်တရဴ ဒဳမဝ်ကရေသဳကောန်ဂကူရ။ လ္တူသဇိုၚ်ဂၠံၚ်တရဴဗော်ဇကုဂှ်လေဝ် ညံၚ်ဟွံဗၠေတ်တိတ် ဒးသောၚ်ကလးရောၚ်။ တၞဟ်နူဂှ်ပၠန် အခေါၚ်ညးတအ် ဒးဟောံဗြံဒၟံၚ် ညံၚ်ဂွံကလေၚ်ဂွံဂှ် သာ်လဵုဒးကၠောန် နဲကဲကၠောန်တံဂှ် ဒးသောၚ်ထ္ၜးကဵုပၠန်ရောၚ်။ ၜိုတ်ကဆံၚ် ညးကၠောန်မာန် ညံၚ်ညးတအ် ဂွံကၠောန်ကၠုၚ် ဂွံကၠောန်လဝ်ဂွံ ဒးကဵုနဲကဲ လဴထ္ၜးကဵုရောၚ်။ မွဲအဆက်ဓဝ် ပၠန်ဂတးပိုဲ ရန်တၟအ်နွံသာ်လဵု သွက်ဂွံကေတ်ဇၞးမာန် ဖျေံလဝ်ဗီုကမၠောန်သာ်လဵု နွံသာ်လဵု ဒုၚ်ကေတ်ဒဒိုက် သၠးကၠေံလမျီုဂုဏ်ဖဵုဇကု ၜိုတ်လဵုနွံတုဲ ကၠောန်ဒၟံၚ်သွက်ညးတအ်ဂှ် ဒးသောၚ်ကလးကဵုရောၚ်။ သဘာဝမၞိဟ်တအ်ဝွံ ဇၟာပ်ပ်မၞိဟ် နွံပၟိက်ကဵု အခေါၚ်သၠးၜး ကဆံၚ်တုပ် ဟွံဒးဒုၚ်ရေက်ကး၊ ဟွံဒးဒုၚ်လီဠာန်၊ မိက်ဂွံဇၞော်မောဝ်အာ အဓာန်ဂတ ဖအိုတ်ရ။ ဘဝညးတအ် ဗီုမဒးဒုၚ်ပ္ဍဵုပ္ဍိုက်ဒၟံၚ်ဂှ်လေဝ် ညးတအ်ကၠး၊ နဲကဲကၠောန်ဂှ်လေဝ် ညးတအ်တီ၊ မၞိဟ်ကၠောန်ဒၟံၚ် သွက်အခေါၚ်အရာညးတအ် ဒုၚ်ဒၟံၚ်ဒဒိုက် ကၠောန်ဒၟံၚ် ဍာံဍာံဂှ်လေဝ် ညးတအ်ကၠး၊ ဟိုတ်နူပၠန်ဂတးနွံတုဲ အခေါၚ်အရာ ၜိုတ်ထေက်ကြိုက် ညးတအ်ဂွံဒုၚ်စသိုၚ် နွံဒၟံၚ်ပၠန်မ္ဂး ညးတအ်ကဵုကၠုၚ်ဇြဟတ် ကေတ်ကၠုၚ်တာလျိုၚ် သ္ပကၠုၚ်သမ္တီ ညံၚ်ရဴကေၚ်ကာညးတအ်ကီုတုဲ ကတဵုကၠောန်ကၠုၚ်မာန်ရောၚ်။

ဗီုညးတာလျိုၚ်ဗော်ဍုၚ်မန်တၟိ ပံၚ်တောဲ ကုဂကောံသၟတ်မန် ဒေသနာနာတုဲ ကၠောန်တ္ၚဲပၠန်ဂတးမန်တုဲ ပသောၚ်ဒၟံၚ်ဂၠံၚ်တရဴပၠန်ဂတး။

သွက်ဂွံစန်ဒက် နွံဒၞာဲနာနာ

ဆဵုဂဗကဵု ပူဂဵုမွဲမွဲကဵုဒှ် မၞိဟ်မွဲဂကောံကဵုဒှ် အဃောမသဳကၠဳဒၟံၚ် စပ်ကဵုကေၚ်ကာ ပရေၚ်ကမၠောန်ညးတအ်ဂှ်တုဲ စပ်ကဵု ကေၚ်ကာဂှ် ဗီုလဵုညးတအ် ဒးဒုၚ်ပ္ဍဵုပ္ဍိုက်ဒၟံၚ် သၟဝ်တဲအလဵုအသဳတ္ၚဲဏအ်တအ်ဂှ် ဆက်စပ်တုဲ ဒးသောၚ်ကလးကဵုရောၚ်။ နူညးတအ် စိုတ်လုပ်စကၠုၚ်မ္ဂး သၠဲပတိတ်တုဲ ဆက်သောၚ်ကလးအာ အခန်တၞဟ်ဟ်ဂွံရ။
ဥပမာ ။ ။ ပ္ဍဲကဵုဝိုၚ်သၟာဗ္ၚတအ်မ္ဂး ဗီုလဵုအလဵုအသဳတအ် ရေက်ကးဒၟံၚ်၊ ဘဝသၟာဗ္ၚတအ် ဒှ်ဒၟံၚ်ဘဝဍိက် ညံၚ်ရဴခေတ်ပဒေသရာဇ် တၠတိတြေံတအ်ကီုတုဲ မွဲသၞာံမွဲကဆံၚ် ဗီုလဵုသၠုၚ်ပတိုန် ပရေၚ်ရေက်ကးကီုဂှ် ဂပ်ဝ်ဒးပသောၚ် ကဵုညးတအ်ရောၚ်။ ၚုဟ်သြောံမပတိတ်ဍုၚ်မ္ၚး ကဵုၚုဟ်မရာန်ပ္ဍဲသၟာဗ္ၚ ပတိတ်ဏာပရဲ ဂၠိုၚ်ကဵုဆတအ်ဂှ် ဒးသောၚ်ဗစိုပ်ဏာရောၚ်။
အရေဝ်ခိုဟ် တၚ်နၚ်ခိုဟ် နွံကဵုၚုဟ်မးတအ်ဂှ် ပ္ဍဲမွဲဒၞာဲဟီုလဝ်မွဲအလန်ဓဝ်တုဲ လ္ပဒေါအ်ထောအ်ညိ။ စိုပ်ဒၞာဲတၞဟ် အခိၚ်တၞဟ် ထပ်ဟီုပၠန်ညိ။ ဂလာန်မွဲမွဲဂှ် ဟီုတုဲဟီုပၠန် ဟီုဂၠိုၚ်ကဵုဝါမ္ဂး မၞိဟ်မိၚ်တအ်ဂှ် ပါ်ပဲါဒးတုဲ ဇြိုဟ်နက်ကၠုၚ်ရောၚ်။ ညးဍုၚ်ကွာန် ဓမ္မတာတအ်ဂှ် ဆအယာံမာတ်ဟီုမွဲဝါဂှ် သမ္တီမာန်ဖအိုတ်ဟွံသေၚ် စောဲလုပ်က္ဍိုပ်ဖအိုတ် ဟွံသေၚ်ဏီရ။ ဂလာန်မွဲမွဲ မိၚ်ဂၠိုၚ်ကဵုဝါ သံသယ သၟးဇ္ၚး ကၠးဖ္ဍးဇြိုဟ်နက်တုဲ စောဲလုပ်ပ္ဍဲက္ဍဟ်ညးတအ်မာန်ရောၚ်။

နဲဂွံဖျေံဗီုပရေၚ်စန်ဒက်

ပရေၚ်စန်ဒက်မ္ဂးဂှ် ဆၜိုတ်လဴထ္ၜးဟီုကလးကဵုဓဝ် ဟွံဍိုက်ပေၚ်ဏီရ။ ကောန်ဂကူ ဂကောံမၞိဟ် ကဆံၚ်မၞိဟ် ကွပ်မၞိဟ်မွဲမွဲ ဂွံတံၚ်ဂြဲဂွံဂှ် အခေါၚ်အရာ ဂုဏ်ဖဵုညးတအ် ညံၚ်သ္ဂောံနွံဂှ် နတဲနဇိုၚ် ဗီုလဵုဇကုဖန်ဖက်ကဵုမာန်ရောၚ် ဆဵုနမတ်တုဲမ္ဂး ဗီုဇကုထ္ၜးကဵုဂၠံၚ်ဂှ် ကၠောန်ဗက်ကၠုၚ်ရောၚ်။ အခေါၚ်အရာညးတအ် ဗီုလဵုမဒးဟောံဗြံဒၟံၚ် ညးလဵုပလီုပလာ်ဒၟံၚ် ညံၚ်သ္ဂောံက္လေၚ်ဂွံမာန် နဲကဲသာ်လဵုဒးကၠောန် နဲကဲဂွံကၠောန်အာ ကဆံၚ်ကဆံၚ်တအ်ဂှ် ညံၚ်ညးတအ်ဂွံကၠး ဒးသောၚ်ထ္ၜးကဵုတုဲ ညံၚ်ညးတအ် ဂွံကၠောန်အာ ဗၟံက်အာရုပ်ရဴမာန်ဂှ် ဒးပံက်ကဵုဂကောံရောၚ်။ ပံက်ကဵုဂကောံဂှ် ပကောံပတိုန် စပ်ကဵုမၞိဟ်ဂမၠိုၚ် ဘဝတုပ်တအ်တုဲ သၟာစန်ဒက်ဗော်တအ်ဝွံ ဖျေံဗီုစန်စက် သောၚ်ကလး ညံၚ်သ္ဂောံကၠောအ်က္ဍဆက်ဆောံ ကုညးတအ်လောဲလေဝ်ဒှ်ရောၚ်။ မွဲသာ်ပၠန် ညးတအကဵုညးတအ် ဂွံကၠောံက္ဍ ထိၚ်ဒဝ်စန်ဒက် ဗမံက်ရုပ်ရဴကမၠောန်မာန်ဂှ် နကဵုဂကောံဟွံသေၚ် ကၠောန်ဟွံဂွံရ။ အကာဲအရာတ္ၚဲဏအ် ပ္ဍဲဍုၚ်ကွာန်ကောန်ဂကူပိုဲ သွက်ဂွံပကောံ သၟတ်တအ်မာန်ဂှ် ဂကောံဝေယျာဝစ္စ၊ ဂကောံဝေၚ်ဇြဟတ်၊ ဂကောံဝုတ်ဗၠာဲ ဗီုထေက်ကြိုက် ဒုၚ်ကေတ်ယၟုမွဲတုဲ ပံက်ပတိုန်ဂွံရ။ သွက်ဂွံစန်ဒက် တၠပညာ၊ တၠကွတ်၊ ပူဂဵုမဆာန်ဂကူတအ်မာန်ဂှ် ဂကောံလိက်ပတ်၊ ဂကောံယေန်သၞာၚ်တအ် ပံက်ကဵုဂပ်ဝ်ရ။ သွက်ဂွံစန်ဒက် သၟာဗ္ၚတအ်မ္ဂး ဂကောံသြောံဟၚ်၊ ဂကောံၚးတိတၟိ၊ ဂကောံသၟာဗ္ၚ ဗီုထေက်ကြိုက် ရုဲပံက်မာန်ရ။ စပ်ကဵုကွပ်မၞိဟ်နာနာ တအ်မ္ဂး လတူကမၠောန်ညးတအ်တုပ်သၟဟ်ဂှ် ဒုၚ်သဇိုၚ်တုဲ ဂကောံအ္စာဘာ၊ ဂကောံသၚ်၊ ဂကောံတမ္ၚာတအ် ပံက်ကဵုမာန်ရ။ ဂကောံနွံတုဲမ္ဂး ရပ်စပ်လတူက္ဍိုပ်ဂကောံတအ်တုဲ တံၚ်ဂြဲကၠုၚ်မ္ဂး ပါကၠုၚ်သီုစန်ရ။

အခါပံက်ဂကောံတအ်မ္ဂး ရန်တၟအ်ဂကောံဂှ် သွက်ဂွံဒှ်အာ ဂုဏ်ဖဵုညးတအ် ဒးနွံရောၚ်။ ဂုဏ်ဖဵုပြဟ်ဟ် ဗီုလဵုနွံ၊ ဂုဏ်ဖဵုဍာ်ဇမၠိၚ် ဗီုလဵုနွံ ညးတအ်ဒးကၠး ဒးစှေ်စိုတ်ရောၚ်။ ဂွံဒှ်သဇိုၚ်ဗော်၊ ဗတိုက်ဖျေံ ညးပ္ဍဵုပ္ဍိုက်ဂကူ အရေဝ်တအ်ဏအ်ဂှ် သိုက်က်မွဲဝါညိညိ ဗီုဂပ်ဝ် ထေက်ကြိုက် ညံၚ်ဟွံစှေ်အာ လီစကာကဵု ကမၠောန်ဗော်ဂှ် ဒးဟီုရောၚ်။ ဒှ်ဂုဏ်ဖဵုညး ညးဟွံညာတ်မ္ဂး ညးညာတ်ကၠုၚ် ဂုဏ်ဖဵုဗော်သက်က်နွံတုဲ ဗော်ကဵုကမၠောန်မ္ဂး စိုတ်ဓါတ်ညးတအ် ဂွံဂစာန်ကၠောန် ဂကောံညးတအ်ဂှ် အောန်စှေ်အာရောၚ်။

ကောံဓရီုဂကောံ

၁။ ဇၟာပ်ကမၠောန်မွဲမွဲ စကၠောန်မ္ဂး ဂကောံက္ဍိုက်ပ်သၟးဒှ်ဒှ် သီုအလုံကောန်ဂကောံဒှ်ဒှ် ဒးချပ်စရောၚ်။
၂။ ဂကောံက္ဍိုက်ပ်တအ်ဂှ် ဓမ္မတာ (၂) ဂိတုမွဲဝါတုဲ သီုအလုံဂကောံမွဲဂှ် (၆) ဂိတုမွဲဝါ ဒးကော်ကောံဓရီုရောၚ်။
၃။ ကောန်ဂကောံ (၃) ဂအုံ (၁) ဂအုံ အာတ်ကၠုၚ်မ္ဂး ဒးသ္ပကဵုကောံဓရီုရောၚ်။
၄။ နဲဂွံဗမံက်ရုပ်ရဴကမၠောန်ဂှ် ဒးချပ်စ ပ္ဍဲကောံဓရီုရောၚ်။
၅။ ကၠောန်ကမၠောန် ကေၚ်ကာဇၞော်မွဲတုဲမ္ဂး ယုတ်ဒေက်သာ်လဵု၊ အံၚ်ဇၞးသာ်လဵုနွံဂှ် ဒးပတိုန်ထ္ၜး သ္ၚဳဂၠိပ်ပါ်ပဲါ ပ္ဍဲကောံဓရီုရောၚ်။
၆။ ဒးသောၚ်ကလး စရၚ်သြန်ရောၚ်။
၇။ ဂလာန်ကောန်ဂကောံ မိက်ဂွံပတိုန်ထ္ၜးပါ်ပဲါနွံတအ်ဂှ် ဟွံဒှ်ပလီုပရေၚ်ညဳသၟဟ်ဂကောံမ္ဂး ဒးကဵုအခေါၚ် ပတိုန်ထ္ၜးရောၚ်။
၈။ ပြသၞာဇၞော်ဇၞော်နွံမ္ဂး၊ ဒးသောၚ်ကလး ညးသ္ကအ်ရောၚ်။
၉။ သွက်ဂကောံဂွံခိုဟ်ဂှ် ဒးချပ်စညးသ္ကအ်ရောၚ်။
၁၀။ ဆန္ဒညးဂမၠိုၚ်ဂှ် ဒးဗက်တုဲ ဆန္ဒမၞိဟ်အောန်ဂှ် ဒးသ္ပသမ္တီရောၚ်။

လတူဂကောံပံက်လဝ်နာနာတအ်ဂှ် ဟွံလအ်ဟွံလအ် ဒးအာဆဵုဂဗ ကဵုဇြဟတ်၊ ကဵုပညာ၊ ယဝ်ရအခက်အခုဲအပ္ဍဲဂကောံညးတအ်နွံမ္ဂး ဗိုၚ်သောၚ်ကလးကဵု နကဵုပရေၚ်ဍုၚ်ကွာန် ဒးနွံရောၚ်။ နွံပၟိက်ကၠုၚ်မ္ဂး အရီုအဗၚ်နကဵုရုပ်ဝတ္ထုလေဝ် ၜိုတ်ထေက်ကြိုက် ဂပ်ဂဝ်ဒးကဵုရောၚ်။ ဗော်ဗိုၚ်သောၚ်ကၠုၚ်မ္ဂး ဂွံကၠုၚ်ဇြဟတ် စိုတ်ထတ်ကၠုၚ်ရောၚ်။
ညးက္ဍိုက်ပ်ဂကောံတအ်သၟး ကော်တုဲကဵုပညာတၟေၚ် သၠာဲဂတးနဲကဲ၊ ပရေၚ်ဆဵုဂဗတအ် ဒးကၠောန်ကဵုရောၚ်။ နူဂှ်ရုဲစှ်ညးစၞးတုဲ ပ္ဍဲကဵုဗဟဵု၊ ခရိုၚ်၊ ဘာသာပရေၚ်ဍုၚ်ကွာန်နွံမ္ဂး ကဵုတိုန်ဘာပရေၚ်ဍုၚ်ကွာန်ဒှ်ဒှ် ကဵုဆဵုသဳကၠဳ ကုက္ဍိုပ်သ္ကိုပ်ဗော်တအ်ဒှ်ဒှ် ဒးသ္ပကဵုရောၚ်။ မၞိဟ်မအာက္ဍိုပ်ဂကောံ ကောန်ဂကောံတအ် ကၠိုဟ်ကၠးစှေ်စိုတ် လတူဗော်မ္ဂး ဒှ်ကၠုၚ်အရီုအဗၚ် ဇြဟတ်ဗော်ဖအိုတ်ရောၚ်။ လတူမၞိဟ်မကဵုလဝ်ပညာတၟေၚ်တအ်ဏအ်ဂှ် ရုဲစှ်မၞိဟ်မစှေ်စိုတ် လတူကမၠောန်ဗော် ဍာံဍာံတုဲ ကော်ဆဵုမွဲတုဲမွဲ တၞဟ်ခြာ သ္ပကေဒါ မၞိဟ်သဇိုၚ်ဗော် ကတောဝ်မတ် ဇိုၚ်တဲဗော်ဂွံရ။ ပ္ဍဲဍုၚ်ကွာန် အကာဲအရာတၟေၚ် ကဵုဒုၚ်စဳရေၚ် ဖန်ဇန်ဂွံရ။

အခါပံက်ဂကောံမ္ဂး တၚ်နၚ်သွက်ဂွံထ္ၜးဗွဲခမၞန်

၁။ ပံက်ဂကောံသၟတ်မ္ဂး
(က) သွက်ဂွံသၠုၚ်ဗတိုန် ဗလမသုန်သာ်။
(ခ) သွက်ဂွံမၚ်မွဲ ဆာန်ကၟိန်ရေၚ်သ္ကအ်။
(ဂ) သွက်ဂွံမၚ်မွဲပလေဝ်ပလေတ်ပတိုန် ဍုၚ်ကွာန်ဇကု။
(ဃ) သွက်ဂွံကၠောန်ကာကုသဵု ဝေယျာဝစ္စကျာ်ဘာ။
(ၚ) သွက်ဂွံမၚ်မွဲ ထိၚ်ဒဝ်အာ လိက်ပတ်ယေန်သၞာၚ်ဂကူ။

၂။ ဂကောံသၟာဗ္ၚ

(က) သွက်ဂွံဗၠးတိတ်နူ ညးတမ်ရိုဟ်တအ် မရေက်ကးဇြောတ်ဆီမာန်၊ ပကောံသြောံ၊ ပကောံသြန်။
(ခ) အခါယဲဒိုက် ဒှ်အခက်အခုဲမ္ဂး သွက်ဂွံရီုဗၚ်ညးသ္ကအ် နကဵုကမၠောန်။
(ဂ) အခါဒှ် ဝါတ်ဂါတ်ဇွောအ်မမ္ဂး သွက်ဂွံဒလေအ်သြန်ဂကောံ (ဝါ) သြောံဂကောံ။
(ဃ) သွက်ဂွံသၠုၚ်ပတိုန်ကဆံၚ် ပရေၚ်တဵုလွဳဂှ် ကတ်လ္ၚတ်ပညာ သဳကၠဳလညာတ် ရာန်သွံကပေါတ် မစပ်ကဵု ဒှ်ရီုဗၚ်ညးဂမၠိုၚ်။ (ဥပမာ။ ။ စက်တံၚ်ဍာ၊ စောဝ်ဟစတ်ဂဥုဲ၊ ကာထဲတိမပ္တံကဵုနာနာ။)
(ၚ) သွက်ဂွံပံၚ်ကၠောန် ပ္ဍဲအရာဒှ်ဂုဏ်ဖဵုညးဂမၠိုၚ် ( ဥပမာ။ ။ ၜံက်မရံၚ်၊ တက်ကၟိန်။)

၃။ ဂကောံသၚ်၊ ဂကောံအ္စာဘာ၊ ဂကောံတမ္ၚာ
(က) သွက်ဂွံပကောံစွံသြန်ဂကောံတုဲ ဒမၠေအ်ရီုဗၚ်ညးသ္ကအ်။
(ခ) သွက်ဂွံသၠာဲဂတးလညာတ် ကဵုနဲကဲညးသ္ကအ်။
(ဂ) ဒှ်ဒဒိုက်ညးမွဲမွဲမ္ဂး သွက်ဂွံရီုဗၚ်ညးသ္ကအ်။
(ဃ) သွက်ဂွံဆာန်ကၟိန်ညးသ္ကအ်။
(ၚ) သွက်ဂွံသၠုၚ်ပတိုန် ဘဝဇကု။

၄။ ဂကောံတၞဟ်တၞဟ်။

ဂကောံဝေယျဝစ္စ၊ ဂကောံဝေၚ်ဇြဟတ်၊ ဂကောံလိက်ပတ်ယေန်သၞာၚ် ဒုၚ်သဇိုၚ်ကဵု ကမၠောန်မွဲဓဝ်ရတုဲ လတူကမၠောန် မွဲဂှ်ဟေၚ် ညံၚ်ဂွံစိုပ်တရဴ ကဵုနဲကဲ ပညုၚ်ထ္ၜးဂၠံၚ်တရဴမ္ဂး ရုံဂပ်မာန်ကီုရ။

ဂကောံက္ဍိုက်က္ဍိုပ်

၁။ ပံက်ဂကောံမွဲမွဲမ္ဂး ဒးရုဲစှ်လဝ် ဂကောံက္ဍိုက်ပ်မွဲရောၚ်။ ရံၚ်ကဵု ကောန်ဂကောံတုဲ (၃) (၅) (၇) (၉) တၠ ၜိုတ်ထေက်ကြိုက် ဒးစွံလဝ်ရောၚ်။
၂။ ပ္ဍဲဂကောံက္ဍိုက်ပ်ဂှ် ဥက္ကဋ္ဌ၊ ညးအုပ်ကာ၊ ညးဂိုၚ်သြန်၊ ညးစၟတ်စရၚ်တအ် ဒးရုဲစွံရောၚ်။ မၞိဟ်ဂၠိုၚ်မ္ဂး ဒု-ဥက္ကဋ္ဌ၊ ဒု-ညးအုပ်ကာတအ် ဒးစွံလဝ်ရောၚ်။
၃။ မွဲသၞာံမွဲဝါ နကဵုဆန္ဒညးဂမၠိုၚ် ဒးရုဲစှ်ပတိုန်ဂကောံက္ဍိုက်ပ်ရောၚ်။
၄။ ကၠာဟွံပေၚ်သၞာံ ဂကောံက္ဍိုက်ပ်ယအ်အာမ္ဂး ဒးရုဲဗပေၚ်စုတ်ရောၚ်။
၅။ ကောန်ဂကောံဖအိုတ်ဂှ် ဒးကလၚ်အရေဝ်ဂကောံက္ဍိုက်ပ်ရောၚ်။
၆။ ဖန်ဇန်ကမၠောန်မွဲမွဲမ္ဂး ပ္ဍဲဂကောံက္ဍိုက်ပ်ဂှ် ဒးချပ်ညးသ္ကအ်တုဲ ဒးဗက်စ ဆန္ဒလ္ပာ်မၞိဟ်ဂၠိုၚ်ရောၚ်။
၇။ ကောန်ဂကောံတအ် မိက်ဂွံပတိုန်ဂလာန်မ္ဂး ဒၞာဲထေက်ကြိုက်ဂှ် ဒးကဵုအခေါၚ် ပတိုန်ထ္ၜးရောၚ်။
၈။ ကေတ်တာလျိုၚ်က္ဍိုက်ပ် ဟွံမာန်မ္ဂး ဒးပတိုန်ထ္ၜးနုက်တိတ်တုဲ ဒးကဵုအခေါၚ် ရုဲပတိုန်တၟိရောၚ်။

တာလျိုၚ်ဥက္ကဋ္ဌ

၁။ ဒးပၠတရဴ အလုံမွဲဂကောံရောၚ်။
၂။ ရန်တၟအ်ညံၚ်သ္ဂောံစိုပ်ဂှ် ဒးက္ဍိုက်ပ်ဖန်ကဵုအာရောၚ်။
၃။ စေဝ်ပၞောန်ညံၚ်သ္ဂောံဗိုန်ဗတ်ဂှ် ဒးထိၚ်ဒဝ် ကောန်ဂကောံတအ်ရောၚ်။
၄။ ပရေၚ်ညဳသၟဟ်ပ္ဍဲဂကောံ ညံၚ်သ္ဂောံနွံဂှ် ဒးလွဳရောၚ်။
၅။ ပြသၞာဒှ်မ္ဂး က္ဍိုက်က္ဍိုက်တုဲ ဒးသောၚ်ကလးရောၚ်။

တာလျိုၚ်ညးအုပ်ကာ

၁။ တၚ်ရန်တၟအ်ဂကောံက္ဍိုက်ပ်တအ် မဖျေံလဝ်ဂှ် ညံၚ်ဂွံဒှ် ဒးပြုပြေၚ်ရောၚ်။
၂။ တၚ်စၞောန်ဥက္ကဋ္ဌဂှ် ဒးဗမံက်ရုပ်ရဴရောၚ်။
၃။ ပရေၚ်ကမၠောန်နာနာ ညံၚ်ဂွံဒှ်ဂှ် ဒးဗ္ဂေတ်စက်ရောၚ်။
၄။ တၚ်ဝါတ်ဂါတ်နာနာ ပြသၞာနာနာဂှ် ဒးပတိုန်ထ္ၜး ချပ်စကဵု ဥက္ကဋ္ဌရောၚ်။
၅။ သ္ပကောံဓရီုမ္ဂး တၚ်နၚ်သ္ဒးချပ်စတအ်ဂှ် ဒးပကောံပတိုန်ထ္ၜးတုဲ တၚ်သ္ဂုတ်သွာတ်တအ်ဂှ် ဒးချုသမ္တီရောၚ်။

တာလျိုၚ်ညးဂိုၚ်သြန်

၁။ သြန်ဂကောံသီုဖအိုတ်ဂှ် သီုစရၚ် ဒးဂိုၚ်ဒေပ်လဝ်ရောၚ်။
၂။ စရၚ်သြန်လုပ်တိတ်သရောပ်ဂှ် ဒးကၠောန်လဝ်ရောၚ်။
၃။ စပ်ကဵုပရေၚ်သြန် ဒးချပ်ကဵု ဥက္ကဋ္ဌ၊ ညးအုပ်ကာတအ်ရောၚ်။
တာလျိုၚ်ကောန်ဂကောံ
၁။ ဇကုဇကု ဒးရီုဗၚ်မၚ်မွဲညးသ္ကအ်ရောၚ်။
၂။ ကမၠောန်ဂကောံနာနာတအ်ဂှ် ဒးကၠောန် သီုစိုတ်၊ သီုစရိုတ်ရောၚ်။
၃။ ဒးဟီုဂးဆက်ဆောံညးသ္ကအ် ဗွဲမယေန်သၞာၚ်ရောၚ်။
၄။ ကောန်ဂကောံတအ် ညံၚ်ဂွံညဳသာတုဲ လၟိဟ်မၞိဟ်ညံၚ်ဂွံဂၠိုၚ်ဂှ် ဒးလွဳရောၚ်။
၅။ စေဝ်ပၞောန်ဂကောံ၊ စေဝ်ပၞောန်ဍုၚ်ကွာန်၊ အခိုက်အလိုက်ဍုၚ်ကွာန်ဂှ် ဒးရှေ်သှေ်ရောၚ်။
၆။ ဒးရှေ်သှေ် ဂကောံက္ဍိုက်ပ်ဇကုရောၚ်။
စေဝ်ပၞောန်ကောန်ဂကောံတအ် သွက်ဒးမၚ်မွဲ
၁။ ဒးကလၚ်အရေဝ် ညးလျိုၚ်ဂကောံက္ဍိုက်ပ်တအ်ရောၚ်။
၂။ သြန်ဂကောံဂှ် ဒးစုတ်လၟိုန်ရောၚ်။
၃။ ဟိုတ်ဖဵုဇၞော် ဟွံကတဵုဒှ်မ္ဂး ကမၠောန်ဂကောံဂှ် ဒးကၠောန်ဗီုညးတၞဟ်ကီုရောၚ်။
၄။ ဇကုကဵုဇကု ၜုၚ်တက်လက်ချဴညးသ္ကအ် ဟွံဂွံ၊ ပြသၞာဒှ်မ္ဂး ပတိုန်ထ္ၜးကဵု ညးက္ဍိုက်ပ် တာလျိုၚ်နွံတအ်ရောၚ်။
၅။ ကေတ်အခေါၚ်ခိုဟ် လတူပရေၚ်ဂကောံတုဲ ပတိတ်ပရဲ သွက်ဇကုဟွံဂွံ။
၆။ သိက္ခာဂကောံ ညံၚ်ဂွံစှေ် ပဟွံဂွံ

ဒုဟ်ပတိတ်နူဂကောံ

၁။ သြန်ဂကောံဟွံစုတ် ယုတ်ဒက်ပေၚ် (၃)ဝါမ္ဂး။
၂။ ဟိုတ်ဖဵုဇၞော်ပ္ဍဲဇကုဟွံမွဲဟွံကၠောန်ကမၠောန်ဂကောံ ပေၚ်(၃)ဝါမ္ဂး။
၃။ ဟွံကလၚ်တၚ်စၞောန်ထ္ၜး ညးတာလျိုၚ် ပေၚ် (၃)ဝါမ္ဂး။
၄။ ပွမပလီုသိက္ခာဂကောံဇၞော်ဇၞော် ကၠောန်ဒးမ္ဂး။
၅။ ဒှ်ဒုဟ်ရာဇဝတ်ဇၞော်ဇၞော်မွဲမွဲမ္ဂး ဒးပတိတ်ထောအ်နူဂကောံရောၚ်။

ပ္ဍဲဒှ်တိဍာ် သြဇာသၞကဵုဇကု သၞဴရဴတအ်ဂှ် မၞိဟ်ဇကုမပလဝ်ကတောဝ်မတ်တအ်ဂှ် ညးတၞဟ်ဟွံတီမ္ဂး ခိုဟ်အိုတ်ရ။ ဂတညးတၞဟ်မ္ဂး ဗီုပြၚ် ကမၠောန်ထ္ၜးရုပ်ရဴဂှ်ဟေၚ် ဓမ္မတာ ဒးဆက်ဆောံအာရောၚ်။ ပ္ဍဲတိဍာ် သြဇာသၞတဴတအ်မ္ဂး မၞိဟ်မပသဇိုၚ်ဇကုဂှ် ပ္ဍဲဂကောံမပံက်လဝ်တအ် တာလျိုၚ်ဇၞော်ဇၞော် လ္ပကဵုကေတ်၊ ဆက်ဆောံကုဗော်လေဝ် ဒးပၞုက်ကၠေံလဝ်ရောၚ်။ သွက်ဂကောံ ဇၞော်မောဝ်တိုန် ဌာန်ဂတဂှ် ကောန်ဂကောံဓမ္မတာဒှ်ဒှ်၊ မၞိဟ်မပလဝ် ကတောဝ်မတ်ဗော်တအ်ဒှ်ဒှ်၊ မၞိဟ်ဇကု ကဆံၚ်ဇကု ညံၚ်ဂွံဒှ်တိုန်ဂၠိုၚ် ဖျေံကိုန်စဳဇန် ဇၟာပ်မၞိဟ် ကဵုဂစာန်စန်ဒက်အာပၠန်မ္ဂး (ဥပမာ – မၞိဟ်မွဲဂှ် စန်ဒက်ကေတ် မၞိဟ်မသုန်) မၞိဟ်ဂၠိုၚ်တိုန်ဒၟံၚ်လၟိုန်ရောၚ်။ ကွာန်တၞဟ်ဟ်လေဝ် ဂကောံညံၚ်ဂွံဒှ်ကၠုၚ် ဒးကဵုဍေံတအ် ဆဝ်ဗ္ၚုဟ်အာရောၚ်။

ပ္ဍဲတိဍာ် သြဇာသၞတဴတအ်မ္ဂး ညံၚ်ဂွံဆက်ဆောံဆဵုဂဗညးသ္ကအ်လောဲသွာ ဂကောံမပံက်ဂွံဂှ် ပံက်ထ္ၜးရုပ်ရဴမွဲမွဲတုဲ စပ်ကဵု ပရေၚ်ဍုၚ်ကွာန်၊ ပရေၚ်ပၠန်ဂတး၊ ပရေၚ်ဗော်တအ်ဂှ် နကဵုမၞိဟ်စိုတ်ဆာန်ဂကူတအ်ဂှ်ဟေၚ် နဲဂကောံဍောတ် (ကလာပ်သဳ) မွဲဂကောံမၞိဟ်ၜိုတ် (၅) တၠ ဗီုညးကဵုညး စန်ဒက်ပံက်ပကောံကေတ်ရ။ ပ္ဍဲမၞိဟ်ဂှ်ပၠန် ဗီုညးကဵုညး ဆက်စန်ဒက် ပကောံကေတ် ဂကောံညးကဵုညး မၞိဟ်စန်ဒက်ဂွံလဝ်ဖအိုတ်တအ်ဂှ် တီညးသ္ကအ်ဟွံဂွံရ။ ပ္ဍဲကဵုလွဳၜံၚ် မၞိဟ်သာ်ဏအ်ဂှ် လအ်ဂွံခိုၚ်ကၠိုက်ဇြိုဟ်နက်ကဵုသဘဴဓဝ်ဂှ် နကဵုပရေၚ်သာယျာ ညံၚ်ဂွံဒှ်မိပ်မြဟ် ပြိုၚ်ပ္ကာန်နာနာကီု၊ ညံၚ်စိုတ်ဂွံလဟိၚ် ဖန်ကဵုပေဲါသ္ဘၚ်လှေ်ဒယှေ်ကီု၊ ဖန်ကဵုကယျိုၚ်ကယျဝ် တုပ်သၟဟ်ဒးရးကီု မွဲကွာန်ကုမွဲကွာန် ကဵုအရီုအဗၚ်ညးသ္ကအ်ကီု ဒးကၠောန်ကဵုရောၚ်။ မၞိဟ်မွဲမွဲ ဟိုတ်နူကမၠောန်ဂကောံ၊ ဟိုတ်နူကမၠောန်ဗော် ဒှ်အာဒဒိုက်မွဲမွဲမ္ဂး နကဵုဗော်ဒှ်ဒှ်၊ နကဵုကွာန်ဒှ်ဒှ်၊ နကဵုဂကောံမွဲစွံဒှ်ဒှ် ဒးရီုဗၚ်မၚ်မွဲညးသ္ကအ် ဍိုက်က်ပေၚ်ပေၚ်ရောၚ်။

ပ္ဍဲအရာစန်ဒက်သာ်ဏအ်ဂှ် မၞိဟ်ဇၞော်ကွာန်တအ် ညံၚ်ဂွံဒှ်မၞိဟ်သဇိုၚ်ဇကုဂှ် သွက်ဂွံစန်ဒက် ဒးစွံအရီု ဇၞော်ဇၞော်ရောၚ်။ ညးတအ်ဂှ် ဒးဆက်ဆောံဒၟံၚ် ကုရဲဗော်၊ ကုညးဍုၚ်ကွာန်တအ် ဇၟာပ်ဇၟာပ်တ္ၚဲရောၚ်။ စန်ဒက်ဂွံညးတအ်မ္ဂး ကမၠောန်ဇကုနာနာဂှ် ကၠောန်လောဲကၠုၚ်တုဲ ဖဵုဂုဏ် သွက်ပၠန်ဂတးဂှ် ဂွံဒုၚ်စပြဟ်ဟ် နတဲရောၚ်။ ဂွံဆက်ပံက်အာ ဂကောံနာနာဂှ် ဂွံကၠုၚ်အရီုအဗၚ်ရောၚ်။ ဟိုတ်ဂှ်ရ မၞိဟ်ဇၞော်ကွာန် တအ်ဂှ် စွံအာရီုတုဲ သွက်ဂွံစန်ဒက်အာကီုရ။

တၚ်နၚ်ပလီုသြဇာမာန် မဒးစွံသတိ

၁။ လတူမၞိဟ်သဇိုၚ်ဗော်ကီု၊ မၞိဟ်ဇၞော်ကွာန်တအ်ကီု ညာတ်ယောၚ်မ္ဂး စၞးမဒးဗျိဒေါန်ဂှ် စၞောန်ထ္ၜးနဲခိုၚ် ဘိုၚ်ပလေဝ်ညိ။
၂။ မ္ၚးနူမၞိဟ်ပလီုကမၠောန် လ္ပဟီုဂး နကဵုအဝဵုညိ။
၃။ ပ္ဍဲတိဍာ်တၟိ၊ ကောန်ဗော်ဇကု ပဋိပတ်ယောၚ်ယာ ညံၚ်ဟွံဂွံဒှ် ဗွဲတၟေၚ်စွံသတိညိ။
၄။ တၚ်ကောန်ဗော်ဇကုယောၚ် လ္ပလဴကဵု ညးဍုၚ်ကွာန်ညိ။
၅။ ကောန်ဗော်ဇကု ဒှ်ဒုဟ်ပ္ဍဲဗွိုၚ်ဗော်မ္ဂး အရာညးဍုၚ်ကွာန်တအ် တီဟွံထေက်ဂှ် လ္ပကဵုတီညိ။
၆။ ကောန်ဗော်ကလိလောန်ဒုဟ် လတူညးဍုၚ်ကွာန်မ္ဂး ကေတ်အရေဝ် ဂတညးဍုၚ်ကွာန်ညိ။
၇။ လ္ပဒစဵုဒစး အခိုက်ကၞာကွာန် ကေုာံ စေဝ်ပၞောန်ကွာန်ညးညိ။
၈။ ဂတညးဍုၚ်ကွာန် ရှေ်သှေ်ရဴဂဴ ညးဇၞော်ဇကုညိ။
၉။ စသုၚ်မံၚ်စံၚ်ကဆံၚ်ကဵုတုပ် ညးဍုၚ်ကွာန်တအ်ညိ။

ဗီုညးတာလျိုၚ် ဗော်ဍုၚ်မန်တၟိ ကဵု ညးဍုၚ်ကွာန်တအ် ပဒၟံၚ်ပြဘိုက် အပ္ဍဲကၞာထးမွဲဒၞာဲ။

ပရေၚ်စန်ဒက်ဗော် အတိုၚ်ရန်တၟအ်လဝ် ရုပ်ရဴညံၚ်ဂွံမံက်တိုန်ပြဟ်ဟ်ဂှ် ကမ္မတဳ မဒးကေတ်တာလျိုၚ် ဌာနပရေၚ်စန်ဒက်ဂှ် စွံအဓိကကဵု ကမၠောန်ဇကုတုဲ မွဲကွာန်တုဲမွဲကွာန် ဒးဂေတ်စန်ဒက်ဒၟံၚ် လၟိုန်ကာလရောၚ်။ ၜးကယျိုၚ်အရာပ်တုဲ အကြာကောန်ဂကောံတအ် လုပ်သၞဴရဴ ကၠောန်မာန်က္ဍၚ် ခိုဟ်က္ဍၚ်ရ။ ဒၞာဲအာကဵုဒပ်ပၞာန်ဟွံဂွံ ဒးလုပ်ကၠောန်ကဵု နဲပၞုက်လေဝ် နွံကီုရောၚ်။ ပရေၚ်စန်ဒက် ဂွံသဇိုၚ်တုဲမ္ဂး ပၞာန်ဇကုထ္ပက်အာ တန်တဴမာန် ပသဇိုၚ်မာန်ကၠုၚ်ရ။

ပရေၚ်စန်ဒက်ဗော် ဟွံခိုၚ်တုဲ ဒေသသဇိုၚ်ပိုဲ သၞဂွံဖျေံဒၞာဲမာန်ဂှ် ဟိုတ်နူပရေၚ်စန်ဒက်ဗော်ပိုဲ ဍိုန်လျဒၟံၚ်ရောၚ်ဂှ် ညာတ်တီဒၟံၚ် ဖအိုတ်ရ။ ရန်တၟအ်စဵုဒၞာသၞ မလုပ်ဖျေံသဇိုၚ်ပိုဲ သၞဂွံဖျေံဒၞာဲမာန်ဂှ် နူပရေၚ်စန်ဒက် ဒၞာဲကၠောန်ဂွံ ကၠောန်လောဲဂှ် ဒးကၠောန်ပြဟ်ဟ် ပခိုၚ်လဝ်ကၠာရောၚ်။ မၞိဟ်သဇိုၚ်သၞဇကု စန်ဒက်ဟွံဂွ္ဂံဂှ် ဒးၚးတးရောၚ်။ စန်ဒက်ဂွံ မၞိဟ်သဇိုၚ်ဗော် ကတောဝ်မတ်ဗော် (ကေဒါဗော်)တအ်ဂှ် ဒးပၞုက်စွံလဝ်ကီုရောၚ်။ ထ္ၜးဗၟံက်လဝ်ဖအိုတ် စကာလဝ်ဖအိုတ် ဟွံဂွံ။ ဒးဗလးစကာ ပံၚ်ကဵုသၞထေက်လေပ် ဒးစကာကဵုရောၚ်။ ဆ္ဂး ညးတာလျိုၚ် ကဆံၚ်လတူ ဒးကဵုတီရောၚ်။ ဒေသသဇိုၚ်ဇကု ဂွံဖျေံစိုတ်ရမ္ဂး နကဵုပရေၚ်စန်ဒက် သၠဲပတိုန်တိဍာ် သၠဲပတိတ်ဇြဟတ် အရီုအဗၚ်ညးဍုၚ်ကွာန်တအ်တုဲ လုပ်ပခိုၚ်ကဵု ဒပ်ပၞာန်ဇကု၊ ဒက်ပခိုၚ် ပရေၚ်အုပ်ဓုပ်ဇကု ဗီုတအ်ဏအ်မာန်မ္ဂး သဇိုၚ်တိဍာ်ဇကုခိုၚ်ကၠိုက်အာမာန်ရောၚ်။

(သ္ပဒတန် ပ္ဍဲကောံဓရီု – ဂကောံစၟဳစၟတ်သ္ပဒတန် လိက်တၞးကဵုပညာ အလန်ပထမ 27/11/82)
စၟတ်တ္ၚဲ – 26/7/84 ဂှ် ထပ်တက်ပတိတ်ပၠန်ရ။

နူဗော်ဍုင်မန်တၟိ