
ပိုယ်မၞိဟ်ဂျိုၚ်တန်တဴဒၟံၚ် ပ္ဍဲလောကဇၞော်ဏအ်ဝွံ ညးလဵုမွဲဟွံဟီု စပ်ကဵုပရေၚ် ဘ၀ပိုယ်မၞိဟ်မ္ဂး ညံၚ်ဂွံသာယာမာန်၊ ညံၚ်ဂွံဖေါအ်ဗြေဝ်မာန်၊ ညံၚ်ဂွံတၟေၚ်တၟဟ် နူညးဂမၠိုၚ်မာန် ရုန်ဂစာန်တတ်ထပါ်ကၠုၚ်မံၚ် သီုညးဖအိုတ်ရ၊ ပိုယ်မၞိဟ် အဃောဂျိုၚ်မံၚ်ဏအ် တၚ်ရန်တၟအ်မတွံဂး သွက်ဗုၚ်ဂၞဴကေုာံ သွက်ဂကောံ သ္ၚိကၟိန်ဇကုဂှ် ဒးဒုၚ်ကေတ်လဝ်တာလျိုၚ် ဇၞော်အိုတ်ရ၊ ညံၚ်တာလျိုၚ်သာ်ဝွံကီု စပ်ကဵုပရေၚ် ဂကူမန်ပိုယ်လေဝ် ကိစ္စဇၞော်အိုတ်၊ ပၟိက်ဇၞော်အိုတ်ဂှ် မုရော.. ယဝ်ရဂၠိုက်ဂၠာဲစမ်ၜတ်ကၠုၚ်မ္ဂး သွဟ်ဍေံဂၠေံဂၠေံဂှ် `အခေါၚ်ဗၠးၜး´ မွဲဟေၚ်ရ၊ ဂကူပိုယ် ယဝ်နွံပၟိက်ကဵု အခေါၚ်ဗၠးၜးဍာံဍာံမ္ဂး ညံၚ်ဂွံကလိဂွံ အခေါၚ်ဗၠးၜး ပြဟ်ပြဟ်ဂှ် ဒှ်တာလျိုၚ်ဂကူ ပိုယ်ရောၚ်။
`တာလျိုၚ်´ ဟီုဂှ် မုမုရော..
`တာလျိုၚ်´ဟီုဂှ် ကိစ္စမွဲမွဲဗီု၊ မွဲမွဲဂကူဏအ် နူတမ်စဵုကဵုစိုပ်ကၞောတ် ညံၚ်ဂွံ အာစိုပ်ဒတုဲ ဒးယိုက်ဂၠေၚ်ဂှ်ဟေၚ် မဒှ်ရ၊ ဟီုသောၚ်သောၚ်မ္ဂး အရာပွမယိုက် ဂၠေၚ်ဂှ် ကော်ခဴစတာလျိုၚ်ရ၊ အခိၚ်လၟုဟ် သွက်ကောန်ဂကူမန်ပိုယ် သ္ဂောံ ကလိဂွံ အခေါၚ်ဗၠးၜးဂှ် စိုပ်ကၠုၚ်ဇရေၚ်တိုၚ်ပၞး ကောန်ဂကူပိုယ်တအ်ရ၊ လျိုၚ် ၀န်နွံမံၚ်လတူတိုၚ်ပၞး ဂကူပိုယ်တအ်ဂှ် ညံၚ်ဂွံစိုပ်တရဴမာန် ညးမွဲဒလေၚ် အဲမွဲ ဓလေၚ် ယိုက်ဂၠေၚ်ဏာသီုဖအိုတ်မ္ဂး အခေါၚ်ဗၠးၜးဂှ် ဗွဲစၟတ်ကလိဂွံမာန်ရ၊ ဒါတ်တိဗၠေတ်တှေ်ဗၠေတ်အာရ.. အခေါၚ်ဗၠးၜးဂှ် ဂကူပိုယ်နွံပၟိက်ဍာံ. ဂိုတ်ဂစာန် ယိုက်ဂၠေၚ်ဍာံမ္ဂး ဂွံဗၠေတ်အာနူ သကေမ်တဲပိုယ်ဂှ် ဟွံမွဲရ။
မပတံ က.ၚ္ၚုဲ ဗၠးတိတ်အာ နူကတိုၚ်ဍာ်ဂြက်ဂှ် ဒှ်အခေါၚ်ဗၠးၜးဍေံတအ်ရ၊
မပတံ ဂစေံၜိုပ် ဗၠးတိတ်အာ နူပးဒၞက်ဂှ် ဒှ်အခေါၚ်ဗၠးၜးဍေံတအ်ရ၊
မပတံ ၜိုၚ်.ပှ်.မၚ်ဒြာဲ ဗၠးတိတ်အာ နူဘဲလၟဂှ် ဒှ်အခေါၚ်ဗၠးၜးဍေံတအ်ရ၊
အခိၚ်လၟုဟ်ဏအ် ကောန်ဂကူမန်ပိုယ်ဂှ် ဒှ်မံၚ်ဘ၀ဍိက် ညးဇိက်လေဝ်ဒးဒုၚ်. ညးၜုၚ်လေဝ်ဂြိပ်ဒဴဟွံဂွံ. ညးဘပဠလေဝ် ဒးဖေက်ဂၟံက်ဒၟံၚ်ရ၊ ဍာ် အခိၚ်နွံဒၟံၚ် ပ္ဍဲခေါက်တဲညးမ္ဂး အတိုၚ်ပၟိက်စိုတ်ညးတအ် ဖန်ဖက်ဏာဂှ် ဒးဒုၚ်ဖအိုတ်ရ၊ နကဵုအာဏာ အသံပါၚ်ညးတအ် လက်ဒေါန်.ဟီုထၜေအ်မံၚ် ပိုယ်ကောန်ဂကူ တအ် သီုဍာ်ရမတ်ဏီရ၊ ဍာ်ရမတ်ကောန်ဂကူပိုယ်တအ် ဓဇူစှေ်မံၚ်ဖော်ဖော် ၜိုန်ရဒှ်အာကြုၚ်လဂေါဝ် ဇွောဝ်ကရောတ်မံၚ် နာနာသာ်ကီုလေဝ် ကမၠောန် ဇဲသတ္တိမွဲ ယဝ်ရဂွံဓမံက်ထ္ၜးရုပ်ရဴမာန်မ္ဂး စိုပ်မွဲတ္ၚဲ ပိုယ်ဂွံအီဂြိုၚ် လတူလွဳမာန် နန်ထဝ် မာန်မံၚ်ဏီရ။
တ္ၚဲကောန်ဂကူပိုယ် ဗၠးတိတ်အာနူ သၟဝ်ဂတာတဲ(ခေါက်တဲ)ညးတၞဟ်. တိတ်ဗၠး အာနူ ဘ၀ဒးဓဇူဍာ်ရမတ်ဂှ်ဟေၚ် ကော်ခဴစ အခေါၚ်ဗၠးၜးဇေတ်ဇေတ်ရ၊ ညံၚ် သ္ဂောံကလိဂွံ အခေါၚ်ဗၠးၜးဂှ် ဗိုလ်မတွံဂး သတ္တိ.ဇဲ.ဝဳရိယ အာဂတပၠတရဴ တုဲ ဆက်ကွာ်အာ အကြာတၚ်ဝါတ်ဂါတ်မ္ဂး စိုပ်အခါမွဲတ္ၚဲ ၜက်သြုၚ်တတ်ထပါ်အာ တၚ်ဝါတ်ဂါတ်ဏအ်တုဲမ္ဂး ဂကူပိုယ်နွံပၟိက်မံၚ်ကဵု အခေါၚ်ဗၠးၜးဂှ် ဂွံဒုၚ်စရှ်သာ ဍာံဍာံရောၚ်။
အခေါၚ်ဗၠးၜးဏအ်ဂှ် စာ်စ္ဍးအာနူ ကောန်ဂကူတအ်တုဲ ကၠောန်ဗဒှ်ပတိတ် ကေတ်ဇြဟတ်. ဗပေၚ်ကေတ်စိုတ်ဓါတ်မ္ဂး သဘဴဂွံကလိဂွံဂှ် ဟွံမွဲကဵုအလေံရ၊ ဂကူပိုယ် အဃောကၠောန်ပတိတ်မံၚ်ဇြဟတ် သွက်ကောန်ဂကူပိုယ် သ္ဂောံ ကလိဂွံ အခေါၚ်ဗၠးၜးဂှ် ညးမွဲလပါ်တေံ ကၠုၚ်ပျုတ်ဗ္ဒေက်ပ္ဍဵုပ္ဍိုက် ဓရိုဟ်ဗဂိုဟ်မံၚ် ညံၚ်ဂွံလီုလာ် ဒေါမ်ကၟိုၚ်အာဂှ် ပ္ဍဲစိုတ်ဓါတ်ပိုယ် ဂိကတဴနူဏအ် နွံမံၚ်ညိဏီ ဟာ.. ဒၟာနူကောန်ဂကူအယုတ် ဂြအ်မန်တအ် စံၚ်ဗဂဵုမံၚ်တုဲ ဘဝကောန် ဂကူတအ် ဒးကတဴကတာန် စံၚ်တူမံၚ်ရ။
ဂကူပိုယ်လ္ၚဵုတအ်ဂှ် ဗွဲမ္ၚးဏအ် စွံလဝ်စိုတ်ဓါတ်ခိုဟ်ပြဲ ပပၞညံၚ်ညးဆာန်ဂကူ ဇေတ်တုဲ ဿဂၠမ်သြိုဟ်တေံ ၚ္ၚိတ်လဝ်ဂျိ. ကဵုမံၚ်ဒဒိုက်အန္တရာယ်ကဵု ဂကူပိုယ်ဂှ် ဒးစွံသတိဇၞော်ဇၞော်ရောၚ်၊ ညံၚ်ဟွံဂွံဒး ပးဒၞက်ဍေံတအ်ဂှ် စွံသတိအိုတ်ညိ၊ ပးဒၞက်ဟီုဂှ် ဒှ်အရာပွမဒးအာစိုပ် ဘဝဟောံဗြီုရ၊ ဂစေံမွဲ ဒးပးဒၞက်မ္ဂး ဆဂစေံမွဲဓဝ်ဟေၚ် ဒးချိုတ်ရ၊ ပရေၚ်ကောန်ဂကူ ဒးအာပးဒၞက်မ္ဂး အလုံ ကောန်ဂကူမွဲ ဒးအာစိုပ်ဟောံဗြီုရ၊ ဒးပးဒၞက်တုဲ ကလေၚ်ရုန်ဂစာန် ပဝ်ဂွံမံၚ် ဏီညိဟာ.. ကောန်ဂကူတအ် ချပ်ဗစာ.ပါ်ပဲါရံၚ်အိုတ်ညိ၊ ပါ်ပဲါဟီုဂှ် ဒှ်ဒစဵုဒစး ဟွံသေၚ်.. သွက်ဂွံကလိဂွံ သွဟ်ဍာံမွဲဟေၚ်ရ ကောန်ဂကူတအ်..။
တၚ်ပတဝ်က္ဍိုပ် သွက်ဂွံကလိဂွံ အခေါၚ်ဗၠးၜးဂှ် ဓဝ်ညဳသာလေဝ် ပါလုပ်လၟိဟ် ကီုရ၊ ဒဵုတၟအ်သိန္နရာဇ် မၞုံကဵုသၠုၚ် ၈၄၀၀၀-ယောဇနာဂှ် ၜိုန်ရသၠုၚ်လောန်ကီု လေဝ် ပ္ဍဲကောန်ဂကူတအ် ဓဝ်ညဳသာမွဲ ယဝ်ရနွံမ္ဂး ဒဵုတၟအ်သိန္နရာဇ်ဏအ် ပိုယ်ကောန်ဂကူတအ် ဓရိုဟ်ဗဒေါမ်ကၠေံ မာန်ဏီရ၊ `ညဳသာမွဲကရောမ် ဗဒေါမ်ဒဵုသိန္နရာဇ်´ သာ်ဏအ် ညးဂမၠိုၚ်ဟီုဂးမံၚ်အိုတ်ရ၊ ဇုက်တောဝ်မွဲတၞုၚ်ဂှ် ၜိုန်ရပိုယ် ၜန်ဇုက်ဟွံဂွံကီုလေဝ် ဇုက်တောဝ်ဂမၠိုၚ် ပံၚ်ပကောံတုဲၜန်မ္ဂး စိၚ် နွံမံၚ်ဿဂြိုပ်ဟေမ၀န်ကီုလေဝ် ပိုယ်ကၠေၚ်ဒက်ကေတ် နကဵုဇုက်ဏအ်မာန်ဏီရ။
ညံၚ်ရဴသာ်ဏအ်ကီုရ မဗြဲမွဲမဂှ် ၜိုန်ရဗဒှ်ကဵု ၜဳကြုၚ်ဟွံမာန်ကီုလေဝ် မဗြဲဂမၠိုၚ် ပံၚ်ကောံဂူဖျေံတုဲ ဒှ်အာၜဳမှာသၟိတ် မာန်မံၚ်ရောၚ်ဂှ် ကောန်ဂကူမန်တအ် ကဵုဂွံတီကၠိုဟ်ကေတ်အိုတ်ညိ၊ ကၞိ.ဟွံမွဲကဵုကသိုၚ်.. ဒိုၚ်.ဟွံမွဲကဵုသၞေၚ်.. ပြေၚ်ဂၠဴ.ဟွံမွဲကဵုဂြၚ်.. ကောန်ဂကူ.ဟွံမွဲကဵု၀ၚ် ဂကူဟွံမွဲကဵုဓဝ်ညဳသာဂှ် ရံၚ်ဟွံဒှ်စရာဲ ကၠာဲသက်သက် ကြက်ဟွံမွဲရောၚ်၊ သတ်ဗြာတ်ဂှ် စဍာတ်ကွေံရ. ဆဂး တၞမ်ဍေံဂှ် ကြက်ဟွံမွဲတုဲ ပိုယ်သိုၚ်သ္ၚိဟွံဂွံရ၊ ဓဝ်ညဳသာကောန်ဂကူ တအ်ဂှ် ယဝ်ရဒှ်ကြက်ဂကူ ဍာံဍာံမ္ဂး ဘဝကောန်ဂကူပိုယ် သဘဴဂွံတၞီဗၠိုက် မွဲဝါပၠန်ဂှ် သ္ၚောဲနူကဵု ဂၠးအာကာသတေံဏီရ။
`က္ဍဟ်ဂျိဂှ် ဒှ်သၞအခေါၚ်ဗၠးၜးရ´ ညးအာဂတ ပၠတရဴမွဲဂှ် တီမံၚ်ပရေၚ်ဍုၚ်ကွာန် အိုတ်သီုကီုလေဝ် က္ဍဟ်ညးဂှ် ယဝ်ဒှ်မံၚ်သတ်ဂျိ(သတ်အိက်အာ်)မ္ဂး သဘဴဂွံ အာစိုပ်တိုၚ်ပကဴ ဗွဲမလောဲသွာဂှ် ဒှ်ဟွံမာန်ရ၊ က္ဍိုပ်သ္ကိုပ်မ္ဂးဂှ် ဒးစွံလဝ်စိုတ်ဓါတ် ညံၚ်ရဴပသဲက္ဍိုၚ်တုဲ က္ဍဟ်ခိုဟ်.က္ဍဟ်ပြဲလေဝ် ဒးသုၚ်စောဲ. သတ္တိ.ဗျတ္တိလေဝ် ဝိုတ်ထောံဟွံဂွံရ၊ သ္ပဍာ် ဝိုတ်ကြုၚ်. သ္ပဂၠုၚ် ဝိုတ်သၞေဝ်. သ္ပကေ၀ဝ် ဝိုတ်ကၞာဂှ် ဟွံမွဲကဵုဂုဏ်အသဝ်ရ...
သ္ပကွးမ္ဂး ဒးတဝ်စၞေဟ်ကဵုပုစ္ဆာ၊
သ္ပမၞိဟ်မ္ဂး ဒးတဝ်စၞေဟ်ကဵုမရဏ၊
သ္ပကောန်ဂကူမ္ဂး ဒးတဝ်စၞေဟ်ကဵုသၞဂှ် ဒှ်ဓမတာ မၞုံကဵုအလေံမဍာံစၟတ်ရောၚ်။
ကောန်ဂကူလ္ၚဵုတအ်ဂှ် ကလိဂွံလာဘ်သြန် အကြာဂကူသအာၚ်ညိညတုဲ ဘ၀ ဇကုဒးဂၠုက်မံၚ် သၟဝ်တဲညးတၞဟ်ဂှ် ထေၚ်ဂးဇကု နွံမံၚ်ကဵုကဆံၚ်သၠုၚ် ဖိုဟ်ရ၊ သၠုၚ်လဝ်မာန ပကိုၚ်လဝ်နှေဝ်ဂျိတုဲ အဲဂှ် ကလိဂွံလဝ် ဌာနန္တရ သၠုၚ်လောန်ကွေံရောၚ် စှေ်စိုတ်ဗီုဏအ်တုဲ ဟီုကြီုမံၚ်နကဵု အာဏာအသံပါၚ် ကတဵုမံၚ်ဟရံၚ်ကဵု ကောန်ဂကူဇကုဏီဂှ် ပ္ဍဲစိုတ်ဓါတ်ညးမဆာန်ဂကူတအ် ဂိဓဇောတ်အာ စဵုကဵုစိုပ်ၜဝ်ဇုတ်တေံရ၊ သတ်ဗြဴအလုံမွဲနှိၚ် ညးဂးညးကြောအ် အဲဂးဍာ်ဍာတ် ကယျာန်ဓဝါတ်မံၚ်ဂှ် ဟွံတၟေၚ်တဴမွဲသာ်ဏီရ၊ ကာလညးဗာ်ဖျေံမ္ဂး အလုံမွဲနှိၚ် ပြဟ်စိုပ်တိသုန္ဓရဳဖအိုတ်ဂှ် ကောန်ဂကူဆီအယုတ်တအ် ယဝ်ရ ကလေၚ်ဂွံသတိဏီမ္ဂး ဒှ်မံၚ်ဂုဏ်ဖဵု သွက်ဂကူဏီရ။
ကောန်ဂကူတအ် ကတ်ဗတောန်လွဳပရာမံၚ် ပညာဂကူတၞဟ်သအာၚ်ဂှ် သွက်ဂွံကၠိုဟ်ခၠၚ်အာ လပါ်ဘာသာဍေံတအ်တုဲ လွဳပရာမံၚ်ဟာ.. ညံၚ်ဂကူဇကု ဂွံပတဝ်သြိုဟ်ကဵု ဂကူတၞဟ်မာန်ဂှ် လွဳပရာမံၚ်ဟာ..ဂှ် တၚ်ရန်တၟအ် ကောန်ဂကူတအ်ဟေၚ် ဒှ်ပဓာနရ။
`ဂၠုၚ်သာတှေ် ဂတာလိုက်.. စိုတ်သာတှေ် ဒှ်ဒဒိုက်..´ အရေဝ်ညးဟီုလဝ် နွံမံၚ်ရသေၚ်ဟာ၊ ကမၠောန်ကိစ္စမွဲဂၠံၚ် ကၠောန်ဏာ စိုတ်ဓါတ်ဟွံလုပ်စမ္ဂး အလုုံမွဲဘ၀ဟွံက သဘဴဂွံအာစိုပ် တိုၚ်ပကဴမာန်ဂှ်လေဝ် ဟွံလောဲသွာရ၊ ဟိုတ်ဂှ်ရ `မှာမွဲဘ၀ ပရေံလက်ကဝ်.. ခိုဟ်မွဲဘ၀ လအ်လဂတဝ်၊ ၜံက်ဖျေံတှေ်သဝ်.. ဗဝ်ပတိုန်တှေ်သၠုၚ်၊ ဂွံသဝ်ဂွံသၠုၚ် ကၠုၚ်နူစိုတ်ဓါတ်..´ ဂှ် ဒှ်ဍာံစၟတ်ကွေံရောၚ်။
ညးမဆာန်ဂကူဇေတ်ဇေတ်တအ်ဂှ် ဘ၀ညးတအ် ၜိုန်ရလၚ်ဇွောဝ်မံၚ် ညံၚ်ရဴ တိုၚ်ပၞာၚ်မွဲတိုၚ်ကီုလေဝ် ရန်တၟအ်ကဵုသွက်ကောန်ဂကူတအ် ဂွံလျးတၟးတုဲ ပတိတ်မံၚ်ဇြဟတ် ဂိုတ်ဂစာန်လွဳပရာမံၚ် ပရေၚ်လိက်ပတ်၊ယေန်သၞာၚ်မန် တအ်ဂှ် ထေက်ကဵုဒးအမ်သဝ်ကွေံရ။
နာဲတအ် ယဝ်ရဆာန်ဂကူဍာံဍာံမ္ဂး တာလျိုၚ်ဂကူမွဲမွဲသာ် ဒးယိုက်ဂၠေၚ်. ဒးရေၚ်တၠုၚ်ထေက်ရောၚ်၊ ရပ်လွဟ်မာန်မှ ဒှ်ညးဆာန်ဂကူတွဵုဟွံသေၚ်.. ဇၟာပ်သၟန်ပါၚ်မဟီုတိုန် ပရေၚ်ဍုၚ်ကွာန်လေပ်ဂှ်လေဝ် ဒှ်ညးဆာန်ဂကူဖအိုတ် ဟွံသေၚ်ရ၊ လိက်ပတ်မန်. ယေန်သၞာၚ်မန်. ညံၚ်ဂွံမံက်ဂတဝ်အာ လတူဂၠးကဝ် ဏအ်မာန် ယဝ်ရဂိုတ်ဂစာန် ပတိတ်ဇြဟတ် ကေတ်တာလျိုၚ်မ္ဂး ဒှ်ညး ဆာန်ဂကူဇေတ်ဇေတ်ရ၊ တာလျိုၚ်ကောန်ဂကူ ဂွံပြေပြံၚ်မာန် သာ်လဵုဒး ကၠောန်. သာ်လဵု ဒးပတိတ်ကသပ်. သာ်လဵုဒးမၚ်မွဲအာဂှ် ယဝ်ရကူချပ် ဂွံမံၚ်သတိ ဏီမ္ဂး ပြဲနူကဵု ညးမဆာန်ဂကူ ဂဇအ်မံၚ်လတူသ္ၚိဏီရ။
ကောန်ဂကူလ္ၚဵုတအ်ဂှ် လိက်ပတ်ဇကုလေဝ် ဟွံပကာ. ဂွံဟီုအရေဝ်ဂကူ သအာၚ် မွဲမမွဲပါၚ်မ္ဂး ထေၚ်ဂးနွံကဵုရှ်သာ. ဂွံကျိုၚ်ကယျိုၚ်ကယျဝ် ဂတာပ် ခေတ်မ္ဂး ထေၚ်ဂးကျေဝ်ဂေါဝ်မံၚ်အိုတ်ရ၊ လညာတ်ညးတအ်ဂှ် ဒှ်မံၚ်ညံၚ်ရဴ `စးဒှ်လပါ်ဗုၚ် ဂၠုၚ်နွံလတူဒဵု´ ကီု ဟီုစဂွံရ၊ ဂဇအ်မံၚ်လတူကွဳတုဲ ယဵုယိုက်လဝ် အှော်စန်ဂှ် ဇြိုၚ်ဟာ.. မံၚ်လတူတိမန်တုဲ ယဵုယိုက်လဝ်ဂကူသအာၚ်ဂှ် ဇြိုၚ်ဟာ..ဂှ် ကောန်ဂကူလ္ၚဵုတအ် ဂၠာဲတဴသွဟ်ဟွံဒးလေဝ် နွံမံၚ်ဗဝ်သအဳရ။
ကောန်ဂကူတအ် ကျောဝ်ရံၚ်စမ်.. ပ္ဍဲကဵုဂကောံကၟိန်ဍုၚ်ဗၟာဏအ် တ္ၚဲမာတ် ကမၠောန် နွံမံၚ်ဗွဲမဂၠိုၚ်ဂၠၚ်ရ၊ ၜိုန်ဂှ်လေဝ် စပ်ကဵု `တ္ၚဲကောန်ဂကူမန်´ ပိုယ် ဗၞတ်မွဲတ္ၚဲဓဝ်လေဝ် ဍေံတအ်ဟွံသ္ပစၟတ်သမ္တီသက်သက်ဂှ် ထေက်ကဵုဒးအမ်သဝ် ကွေံရ၊ ထေက်ကဵုဒးသိၚ်သာကွေံရ။
လောန်ကၠုၚ်မွဲအခိၚ်တေံ က္ဍိုပ်သ္ကိုပ်ဂကူမန်ပိုယ်ဂမၠိုၚ် ပိုယ်ကောန်ဂကူမန် မွဲဂကူဏအ် တ္ၚဲခိုဟ်တ္ၚဲပြဲမွဲတ္ၚဲ ဒးနွံထေက်ရောၚ်. သာ်တဴသာ်ဏအ်တုဲ ပတမ်နူ ကောန်သၟိၚ်မန် သမလကဵုဝိမလ ကောကဵုဒေံညးၜါ သိုၚ်ခၞံဗဒှ်လဝ်ဍုၚ်နန် ပ္ဍဲဍုၚ်ဟံသာ၀တဳ(ဗဂေါ) ပ္ဍဲကဵုသက္ကရာဇ် ၁၁၁၆-သၞာံ. ဂိတုမာ်မွဲစွေက်. တ္ၚဲစန်တုဲ ညးတအ်ခုတ်ခဴစလဝ် `တ္ၚဲကောန်ဂကူမန်´ မဒှ်ရ၊ ပတမ်နူအခိၚ်ဂှ်တုဲ စိုပ်ကဵုစိုပ်ကၠုၚ် အခိၚ်လၟုဟ်ဏအ် ညးမဆာန်ဂကူတအ် ကေတ်တာလျိုၚ် ယိုက်ဂၠေၚ်မၚ်မွဲကၠုၚ်လဝ်ဂှ် ဒှ်ဂုဏ်စရာဲ အာဲကၟာဲဂကူမန်ပိုယ် ဇြိုဟ်ဇြိုဟ် နက်နက်ရ။
ဂစေံၜိုပ် အဃောပဝ်ကဠာၚ်မံၚ် လတူအာကာသတေံဂှ် ကျာမေလံၚ်တအ် ၜိုန်ရပိုက်ကြာန်ကၠုၚ်ကီုလေဝ် ဟွံစိုပ်ခပေဲါဏီမ္ဂး ဟွံယှအ်ကၠေံလွဳဏီရ၊ ညးမ ဆာန်ဂကူ ဇေတ်ဇေတ်တအ်ဂှ်လေဝ် လျိုၚ်၀န်ယိုက်ဂၠေၚ်လဝ် လတူတိုၚ်ပၞးဂှ် ၜိုန်ရဂိသကေဝ် ဍောၚ်ၜိုတ်လောန်ကီုလေဝ် ဟွံစိုပ်တရဴတိုၚ်ပကဴဏီမ္ဂး ဆက်ကွာ် အာမံၚ်ဏီရ၊ လ္ၚဵုဂှ် ဗီုဏအ်ဟွံသေၚ် ဆၜိုတ်ဂံါကွာ်တိတ်အာ တရဴမွဲလဂံါဓဝ်ဂှ် ထေၚ်ဂးကြပ်ညောန်မံၚ်ကဵု တိုၚ်ပကဴယျ.. သွက်ဂွံဂံါကွာ်အာ တရဴနွံမံၚ် လ္ၚီလက်ယောဇနာဏီဂှ် ဝိုတ်မံၚ်သတိအိုတ်ရ။
ယွံကောန်ဂကူတအ် ယဝ်ရကောန်ဂကူတအ် နွံပၟိက်မံၚ်ကဵု အခေါၚ်ဗၠးၜး ဍာံဍာံမ္ဂး စိုတ်ဓါတ်ညံၚ်ဂွံကလိဂွံ အခေါၚ်ဗၠးၜးဍာံဍာံဂှ်လေဝ် ဒးလွဳလဝ်ကီုရောၚ်၊ အာကာသဂွံကျေဝ်ဂှ်လေဝ် ဒၟာနူမတ်ဗြဲရ.. လျးဂိတု ဂွံဂၠုဓီုအာဂှ်လေဝ် ဒၟာနူမတ်ဗြဲပၠန်ရ.. ညံၚ်ရဴသာ်ဏအ်ကီု ကောန်ဂကူတအ် ဂွံအာစိုပ်အခေါၚ် ဗၠးၜးဂှ် ဒၟာနူစိုတ်ဓါတ် ကောန်ဂကူတအ်ရ၊ ညံၚ်ကောန်ဂကူတအ် ဂွံဒးအာစိုပ်ဘ၀ဍိက်ဂၠုဲဂှ်လေဝ် ဒၟာနူစိုတ်ဓါတ် ကောန်ဂကူတအ်ပၠန်ရ၊ အခိၚ်တ္ၚဲဏအ် ကောန်ဂကူတအ် မုနွံပၟိက်အိုတ်ရော.. ပိုက်တမ်ဂၠာဲရိုဟ် ဂၠာဲရံၚ်သွဟ်ဍာံဍာံမ္ဂး `အခေါၚ်ဗၠးၜး´ ရဟွံသေၚ်ဟာ ကောန်ဂကူတအ်...။
မိသိုက်လှိၚ်(ကွာန်လှာ)